တောင်ကြီး

March 29, 2021

တောင်ကြီးတွင် စစ်တပ်၏ ပစ်ခတ်မှုကြောင့် လူငယ် ၁ ဦးကျဆုံး၊ ၉ ဦး ဒဏ်ရာရ

ရှမ်းပြည်နယ်မြို့တော် တောင်ကြီးမှာ မနေ့က အကြမ်းဖက်စစ်တပ်က  ရပ်ကွက်ထဲ ဝင်ရောက်ပစ်ခတ်တဲ့အတွက် လူငယ် ၁ ဦးကျဆုံးပြီး ၉ ဦး ဒဏ်ရာရသလို အဖမ်းခံရသူတွေလည်း ရှိနေပါတယ်။ 

ပြောက်ကျားပုံစံနဲ့ စစ်အာဏာရှင်ဆန့်ကျင်ရေး ဆောင်ရွက်နေတဲ့ လူငယ်တွေဟာ  ညနေပိုင်းက မြေဖြူရပ်ကွက်ထဲရှိနေစဉ် အကြမ်းဖက်စစ်တပ်နဲ့ရဲက အသံဗုံးနဲ့ရော ကျည်ဆန်အ စစ်နဲ့ပါ ပစ်ခတ်တဲ့အတွက် အသက် ၂၀ နှစ်အရွယ် လူငယ် ၁ ဦး ကျဆုံးခဲ့ပြီး ၉ ဦးထက်မနည်း ဒဏ်ရာရသွားတယ်လို့ တောင်ကြီးဒေသခံတစ်ဦးက ဒီဗွီဘီကို ပြောပါတယ်။ 

“မနေ့ညနေ ၄ နာရီခွဲလောက်က ကလေးတွေက ပြောက်ကျားလိုပုံစံနဲ့ လမ်းကြားတွေထဲမှာ ရှိနေတာပေါ့နော်။ အဲဒါကို သူတို့ရှိတဲ့နေရာကို ဟိုအကြမ်းဖက်သမားတွေက ပစ်တာ၊ အသံဗုံးနဲ့ ရော၊စက်သေနတ်နဲ့ဆွဲပစ်တယ်၊ ကျည်အစစ်နဲ့ပစ်တယ်၊ ကလေးတစ်ယောက် ခေါင်းပွင့်သွားတယ်။ သူ့ကိုဆေးရုံခေါ်သွားကြသေးတယ်။ ဆေးရုံရောက်မှ ညကျမှ ဆုံးသွားတာ။ ဆုံးသွားတဲ့ကလေးက စိုင်းဝေယံမိုးတဲ့၊ ချမ်းမြသာစည်က၊ နောက်ထပ်ဒဏ်ရာရတာ ၉ ယောက်လောက်ရှိတယ်၊ အဖမ်းခံရတဲ့ လူတွေလည်းရှိတယ်။ ကလေးတစ်ယောက်ဆိုရင် သေနတ်မှန်သွားတာကို ဆွဲခေါ်သွားတယ်။ သူ့ဖိနပ်တဖက် အိမ်ရှေ့မှာ ကျန်ခဲ့တယ်၊ ဘယ်သူ့သား သမီးလဲမသိဘူး၊ ကလေးတွေက နေရာပေါင်းစုံက လာတာ။”   

မြေဖြူရပ်ကွက်ဟာ သပိတ်မှောက်သူတွေလာတတ်တဲ့ အနောက်မြို့ပတ်လမ်းနဲ့ နီးသလို ဒီမတိုင်ခင်က စစ်ကောင်စီအကြမ်းဖက်သမားဘက်က ၂ ဦး  ချယ်ရီကွင်းဟိုတယ်နားမှာ ပျောက်သွားတဲ့သတင်းတွေလည်း ထွက်ပေါ်နေလို့ အဆိုပါရပ်ကွက်ကို ပိတ်ဆို့ဖမ်းဆီးနေတယ်လို့ ယူဆတယ်လို့ ဆိုပါတယ်။

မနေ့က ပစ်ခတ်သံတွေဟာ ညနေ ၆ နာရီကျော်လောက်မှာ ခဏငြိမ်သွားပြီး ည ၈ နာရီလောက်မှာ လမ်းမပေါ်လူမရှိဘဲနဲ့ တမြို့လုံး စက်သေနတ်တွေနဲ့ ပစ်ခတ်ခြိမ်းခြောက်ခဲ့တယ်လို့ နောက်ဒေသခံတစ်ယောက်က ပြောပါတယ်။ 

ဒီကနေ့မနက်မှာတော့ အနောက်မြို့ပတ်လမ်း ညောင်ပင်သာရပ်ကွက်နားက အမှတ် ၃ စာသင်ကျောင်းထဲမှာ တပ်ကလာပြီး စခန်းချထားကြောင်း၊ စစ်တပ်တွေက နေရာတိုင်းမှာ အချိန်မရွေးပေါ်လာပြီး စစ်ချင်သူတွေစစ် ပစ်ချင်သလိုပစ် ဖမ်းချင်သလိုဖမ်းနေကြောင်းလည်း ဒေသခံတဦးက ပြောပါတယ်။ 

မနေ့ညက မင်းလမ်းပေါ်ရှိ မေရှမ်းကြေးအိုးဆိုင်ထဲဝင်သွားပြီး  အလုပ်သမားတွေ ဝင်ဖမ်းသွားလို့ အလွန်အရေးမကြီးရင် ဘယ်သူမှအပြင်မထွက်ကြောင်း၊ ဈေးသည်တွေလည်း ထွက်ပြီးဈေးမရောင်းရဲ ၊ ဝယ်သူကလည်းအပြင်မထွက်ရဲ ၊ မျက်နှာစိမ်းဈေးသယ်ဆိုရင် ပြည်သူ ဘက်က ရပ်ကွက်လုံခြုံရေးအဖွဲ့တွေကလည်း ဒလန်ဖြစ်မှာစိုးလို့ အဝင်မခံတာကြောင့် အခြောက် အခြမ်းတွေနဲ့ ‌ချွေတာစားသုံးနေရကြောင်း၊ တနေ့လုပ်တနေ့စား ဆင်းရဲသားတွေလည်း ဝမ်းစာရေး အခက်အခဲ ကြုံနေရတယ်လို့ တောင်ကြီးဒေသခံက ပြောပါတယ်။   

2 months Ago

March 23, 2021

တောင်ကြီး၌ အကြမ်းဖက်ရဲနှင့်စစ်တပ်က ၅ နှစ်ကလေးငယ်အပါအဝင် ပြည်သူများကို ထပ်မံဖမ်းဆီး

ရှမ်းပြည်နယ်မြို့တော် တောင်ကြီးမှာ အကြမ်းဖက်စစ်အာဏာရှင်ရဲ့ စစ်တပ်နဲ့ရဲတွေက ပြီးခဲ့တဲ့ရက်ပိုင်းက လူနေအိမ်နဲ့ရပ်ကွက်ထဲ ဝင်ရောက်ရမ်းကားပြီးတဲ့နောက် ဒီကနေ့မနက်က ရတနာသီရိရပ်ကွက်ထဲမှာ ပြည်သူတွေကို ဝင်ရောက်ဖမ်းဆီးခဲ့ပါတယ်။ 

အဖမ်းခံရသူတွေမှာ အငြိမ်းစားကျောင်းဆရာမ ၁ ဦး၊  ဆရာမရဲ့သမီး၊ အိမ်မှာ လာတည်းတဲ့ ဧည့်သည်သားအမိနဲ့ ဆိုင်ကယ်ပြင်ဆိုင်က အလုပ်သမားတွေဖြစ်တယ်လို့ တောင်ကြီး ဒေသခံတစ်ဦးက ဒီဗွီဘီကို ပြောပါတယ်။

“ကနေ့မနက်က ရတနာသီရိရပ်ကွက်ထဲမှာရှိတဲ့ ဆိုင်ကယ်ပြင်ဆိုင်က အလုပ်သမားတွေ ရော၊ အဲဒီဆိုင်ကို ငှားထားတဲ့ ပိုင်ရှင်သားအမိကိုပါ ဖမ်းသွားတယ်။ ဆိုင်ငှားထားတဲ့ ပိုင်ရှင်က အ ငြိမ်းစားကျောင်းဆရာမကြီးဖြစ်ပြီး မဟော်သဓာကိုယ်ပိုင်ကျောင်းမှာ စာသင်နေတယ်လို့ သိရတယ်။ သူတို့ဆီမှာ လာတည်းတဲ့ သားအမိပါရောပြီး အဖမ်းခံရတယ်။ စုစုပေါင်း ၆ ယောက်ပေါ့။ ကလေး လေးက ၅ နှစ်ပဲရှိသေးတယ်။ ကလေးကတော့ အခု ပြန်လွှတ်လာပါပြီ၊ ဘာကြောင့်ဖမ်းလဲဆိုတာ သေချာတော့မသိဘူး။ ဒါပေမဲ့ သူတို့ဆိုင်က တာယာအဟောင်းတွေကို ဆန္ဒပြသူတွေ အကာအရံလုပ်ဖို့ ပေးလိုက်တာကြောင့် လာဖမ်းတာလို့လည်းပြောနေကြပါတယ်။”  

ဒါ့အပြင် တောင်ကြီးမြို့ ကျောင်းကြီးစုရပ်ကွက် ကန်ကြီးရွာ စောစီရွာတွေဘက်မှာလည်း ပေါ်တာလိုက်ဆွဲနေကြောင်း၊ ဘာလုပ်ဖို့ ပေါ်တာဆွဲတာတော့မသိဘဲ လူငယ်တွေကို ခေါ်သွား တာလို့ သူကဆက်ပြောပါတယ်။ 

“လိုက်ဖမ်းတာကိုတော့ ကိုယ်တိုင်မမြင်ပါဘူး၊ ဒါပေမယ့် မြို့ထဲမှာအဲဒီလိုပဲ တဆင့်စကား တဆင့်နားကြားနေရတာလေ၊  ကျောင်းကြီးစုရပ်ဘက်မှာတော့ အပြစ်ရှိလို့ လိုက်ဖမ်းတာ မ ဟုတ်ဘဲ ပေါ်တာဆွဲတာလို့လည်း ကြားတယ်”

တောင်ကြီးက ဘုန်းကြီးကျောင်းနဲ့ ရပ်ကွက်အုပ်ချုပ်ရေးရုံးတွေမှာ အကြမ်းဖက်စစ်တပ်က လာရောက်တပ်စွဲထားပေမယ့် ပစ်ခတ်တာတော့မရှိကြောင်း၊ ရပ်ကွက်ထဲမှာ လာပြီးတပ်စွဲတာဟာ ပြည်သူတွေကို လုံခြုံမှုကင်းမဲ့စေတယ်လို့ နောက်ထပ်ဒေသခံတစ်ဦးက ပြောပါတယ်။ 

“ကနေ့မနက် ချမ်းမြသာစည်ရပ်ကွက်အုပ်ချုပ်ရေးရုံးမှာ လာပြီးစခန်းချတယ်၊ ပြီးတော့ ရတနာသီရိရပ်ကွက်အုတ်ဖိုကျောင်းမှာရောပဲ၊ သူတို့က ၂ ရက်နေမယ်လို့ ပြောတယ်။ ဒါပေမယ့် ကြောက်တာပေါ့နော်၊ အခုစစ်သားတွေက ကြောက်စရာလူတွေဖြစ်နေပြီ။”

မြို့ထဲမှာ စစ်တပ်က လာရောက်နေရာချထားပေမယ့် စစ်အာဏာရှင်ဆန့်ကျင်ရေးဆန္ဒပြ မှုကို ဆက်လုပ်နေပြီး  ထိပ်တိုက်မတွေ့အောင် ရှောင်သွားကြတဲ့အတွက် ဒီကနေ့ တောင်ကြီး သပိတ်ဖြိုခွဲတာမရှိဘူးလို့ ဆိုပါတယ်။ 

ရတနာသီရိရပ်ကွက်ထဲမှာ ပြီးခဲ့တဲ့တနင်္ဂနွေနေ့ကလည်း အကြမ်းဖက်ရဲနဲ့စစ်တပ်က လူဝင်ဖမ်းပြီး ရာဘာကျည်နဲ့ ပစ်ခတ်ရမ်းကားခဲ့ပါတယ်။ 

အဆိုပါ ချမ်းမြသာစည်၊ ရတနာသီရိ၊ အုတ်ဖိုစတဲ့ရပ်ကွက်ကလူတွေဟာ ယခင်နေ့တွေက သပိတ်စစ်ကြောင်းထဲပါဝင်ခဲ့သလို ညစဉ်ဖယောင်းတိုင်ထွန်းညှိပြီးတော့လည်း ထိုင်သပိတ်လုပ်ခဲ့ပါတယ်။ 

တောင်ကြီးမှာ လက်နက်မဲ့ ဆန္ဒပြပြည်သူတွေကို စစ်အာဏာရှင်ရဲ့ စစ်တပ်နဲ့ရဲတွေက ပြီးခဲ့တဲ့ရ က်ပိုင်းကတည်းက အကြမ်းဖက် ပစ်ခတ်ဖြိုခွင်းမှုတွေ ဖမ်းဆီးမှုတွေ ဆက်တိုက်ပြု လုပ်နေတာပါ။

2 months Ago
More News
Up