တရုတ်-မြန်မာနယ်စပ်

August 11, 2021

တရုတ်-မြန်မာနယ်စပ် မူဆယ် နန်းတော်ဂိတ် ယာယီပိတ်

တရုတ်-မြန်မာ နှစ်နိုင်ငံ တရားဝင် အဝင်၊ အထွက်ဂိတ် မူဆယ် နန်းတော်ပေါက်ကနေ မြန်မာနိုင်ငံ ပြန်ဝင်ခွင့်ကို ဒီနေ့ ဩဂုတ် ၁၁ ရက်နေ့ကစပြီး တရုတ်ဘက်က ယာယီပိတ်ထားတယ်လို့ နီးစပ်သူတွေဆီက သိရပါတယ်။

"တရုတ်ဘက်က ပိတ်တာ။ မြန်မာဘက်ကတော့ လက်ခံတယ်။ ဒီဘက်က ဘာမှ မပြောသေးဘူး။ ဘယ်နှရက်နားပြီး ဘယ်နေ့ ပြန်ဖွင့်မှာလည်း မသိသေးဘူး။" လို့ မြန်မာဘက်က လွှဲပြောင်းလက်ခံတဲ့ထဲ ပါဝင်သူတစ်ဦးက ပြောပါတယ်။

တရုတ်ဘက်ကတော့ ကိုဗစ်-၁၉ ရောဂါ အခြေအနေကြောင့် Lockdown ချထားတဲ့နေရာတွေမှာ ဆန်၊ ဆီ နဲ့ ခေါက်ဆွဲ ခြောက်ထုပ်‌တွေ ယာယီ ဖြန့်ဝေထောက်ပံ့မှုတွေ လိုက်လံလုပ်ဆောင်နေရလို့ မြန်မာနိုင်ငံပြန်မယ့်သူတွေကို တရားဝင်ဂိတ် နန်းတော်ပေါက်ကနေ လွှဲပြောင်းပေးတာ ယာယီ ရပ်နားထားတာလို့ ရွှေမြန်မာအွန်လိုင်း အရေးပေါ် ကျန်းမာရေး ကူညီမှုအသင်း (ရွှေလီ)က ဥက္ကဋ္ဌ ကိုချမ်းမြေ့က ပြောပါတယ်။

"ဟုတ်ပါတယ်ခင်ဗျ။ သူတို့ ဒီဘက်က ထောက်ပံ့မှုတွေ လိုက်လုပ်နေတယ်။    တစ်ရက်ပဲ မဟုတ်ဘူး။ ပြန်လည် ဖွင့်လှစ်ပေးမယ့် ရက်ကို ပြန်အကြောင်းကြားပေးမှာ။ သုံးချိုးကို တစ်ချိုး လောက်ပဲကျန်မှာ။ အခက်အခဲ ဖြစ်မှာစိုးလို့ ထောက်ပံ့ပေးတာ။ တစ်ပတ် တစ်ကြိမ် သူတို့ လာပြီး ထောက်ပံ့မယ်လို့ ပြောတယ်။ အိမ်ရှင်အိမ်တွေက အခန်းခတွေ ဘာတွေ သူတို့က ညှိနှိုင်းပေးမယ့် သဘောရှိတယ်။" 

မြန်မာ-တရုတ် နယ်စပ်‌တလျှောက် တရုတ်ဘက်က ကပ်ရောဂါကူးစက် ပြန့်ပွားမှုကို တင်းတင်း ကျပ်ကျပ် ထိန်းချုပ်ဖို့နဲ့ ယူနန်ပြည်နယ်မှာ တရားဝင်နေထိုင်ခွင့် အထောက်အထား တစုံနရာနဲ့ ပုံမှန် ဝင်ငွေနဲ့ အလုပ်အကိုင် မရှိသူ နိုင်ငံခြားသားတွေကို ပြည်နှင်ဒဏ် ချမှတ်ဖို့ အသိပေးကြေညာချက်ထုတ်ပြန်ပြီးနောက် မူဆယ်နန်းတော် တရားဝင် ဂိတ်ပေါက်ကနေ ဇူလိုင်လ ၂၆ ရက်နေ့ကစ ထွက်ခွင့်ပြုခဲ့ပါတယ်။

ဇူလိုင် ၂၆ ရက်နေ့မှ ဩဂုတ်လ ၁၀ ရက်နေ့အထိ ၁၆ ရက်အတွင်း နန်းတော် တရားဝင်ဂိတ်ကနေ မြန်မာနိုင်ငံကို ပြန်ဝင်လာသူ မြန်မာနိုင်ငံသား စုစုပေါင်း ၄,၆၅၄ ဦးရှိပါတယ်။

သံသယ လူနာအချို့အပါအဝင် မြန်မာနိုင်ငံသားအချို့ကို တရုတတ်ဘက်က နှစ်နိုင်ငံ နယ်ခြားစည်းမျဉ်းတွေမှာ လိုက်လံပို့ဆောင်တာတွေ ရှိနေပြီး တရုတ်ဘက်မှာ တရားမဝင် သွားရောက် နေထိုင်အလုပ်လုပ်နေသူ မြန်မာနိုင်ငံသားတွေလည်း နယ်စပ်တလျှောက် ခိုးဝင်ပေါက်ဖြစ်တဲ့ မန်ဟီးရိုး၊ ကျင်စန်းကျော့၊ ကြူကုတ် (ပန်ဆိုင်း) တို့ဘက်က ပြန်လာ‌သူတွေလည်း နေ့စဉ်နီးပါး ရှိနေပါတယ်။

ကိုဗစ်-၁၉ ရောဂါ ကူးစက် ပြန့်ပွားမှု အခြေအ‌နေကြောင့် တရုတ်-မြန်မာ နယ်စပ်တလျှောက်က တရားဝင်ဂိတ် အားလုံးကို တရုတ်ဘက်က ရက်အကန့်အသတ်မရှိ ပိတ်ထားတာလည်း ဖြစ်ပါတယ်။

Pra Jaw

3 months Ago

July 30, 2021

တရုတ်-မြန်မာနယ်စပ် ဝမ်တိန်မြို့ကို Lockdown ဖြေလျှော့ပြီး Stay at Home သတ်မှတ်

တရုတ် - မြန်မာနယ်စပ် ရွှေလီမြို့နယ် ဝမ်တိန်မြို့ကို ဇူလိုင်လ ၂၉ ရက်နေ့ကစပြီး Lockdown ဖြေလျှော့ကာ Stay at Home အဖြစ် သတ်မှတ်လိုက်တယ်လို့ ဝမ်တိန် ကိုဗစ်-၁၉ ကူးစက်ရောဂါ ကွယ်တားဆီးရေးဌာနက အသိပေးကြေညာလိုက်ပါတယ်။

ဝမ်တိန် ရန်ကွမ်းရွှေ့အန်း ဧရိယာနဲ့ ၇.၀၈ မှာ ကွာရန်တင်းဝင်နေတဲ့ သူတွေ Stay at Home အဖြစ် ဆက်လက်နေထိုင်ရမယ်လို့ ဖော်ပြထားပါတယ်။

Stay at Home ကာလအတွင်း မည်သူမှ ဝမ်တိန်မြို့မှ ထွက်ခွာခွင့်မပြုကြောင်း၊ အရေးပေါ်ကိစ္စကြောင့် ထွက်ရမယ်ဆိုပါက ၄၈ နာရီ အတွင်း စစ်ဆေးထားတဲ့ ပိုးကင်းစင်ကြောင်း လက်မှတ်၊ မှတ်ပုံတင်၊ စာရွက်စာတမ်း မိတ္တူတွေနဲ့ ကိုယ်သွားမယ့်နေရာစတဲ့ အကြောင်းပြချက် ခိုင်ခိုင်လုံလုံ သက်ဆိုင်ရာကို တင်ပြရမှာဖြစ်ပြီး ကိုဗစ်ကပ်ရောဂါ ကာကွယ် ထိန်းချုပ်ရေးဌာနက စိစစ်အတည်ပြုချက်ရမှ ထွက်ခွာခွင့်ပြုမယ်လို့ ပါရှိပါတယ်။

ဝမ်တိန်ကို ဝင်ရောက်မယ့်သူတွေလည်း အလားတူအထောက်အထားတွေ ပြရမှာဖြစ်ပြီး စီးပွားရေးလုပ်ငန်းရှင်တွေအနေနဲ့ လုပ်ငန်းလိုင်စင်၊ အိမ်ပိုင်အထောက်အထား၊ အိမ်ထောင်စု စာရင်း၊ အိမ်ငှားဖြစ်ပါက အငှားစာချုပ် စတဲ့ အထောက်အထား တစ်မျိုးမျိုးနဲ့ ၇၂ နာရီအတွင်း ပိုး စစ်ထားတဲ့ ပိုးကင်းစင်ကြောင်း ဆေးလက်မှတ်၊ သွားရောက်ရတဲ့အကြောင်းအရင်း တင်ပြရမှာပါ။

ဝမ်တိန်ဒေသမှ ရွှေလီမြို့နယ်နဲ့ အခြား မြို့တွေကို ကုန်မျိုးစုံ တင်ပို့၊ တင်သွင်းမယ်ဆိုရင် ဟိုင်းဝေးလမ်းမကြီး ဖြစ်တဲ့ ဟယ့်ရှန်း ဂိတ်ကနေသာ ယာဉ် အစားထိုးမောင်းနှင် စနစ်နဲ့ ဝင်၊ ထွက်ဖို့၊ ကိုဗစ် ကာကွယ်ရေးဆိုင်ရာ ကျန်းမာရေးပစ္စည်းတွေကို သတ်မှတ်ထားတဲ့ စည်းကမ်းနဲ့ အညီ တင်သွင်းဖို့ ပါရှိပါတယ်။

ဒါ့အပြင် ဝမ်တိန်မှာ လက်ရှိ နေထိုင်သူတွေအပါအဝင် ပြင်ပမှ ရောက်ရှိလာသူအားလုံး ဧည့်စာရင်းတိုင်ရမှာဖြစ်ပြီး ဧည့်စာရင်းမတိုင်ထားတဲ့သူဆီမှာ ပိုးတွေ့ပြီး ကူးစက်စေပါက ဥပဒေနဲ့အညီ အရေးယူသွားမယ်လို့ ဖော်ပြထားပါတယ်။

ဆေးဆိုင်တွေမှာ အဖျားကျဆေး၊ အပူကျဆေး၊ ပိုးသတ်ဆေးလိုမျိုး၊ ချောင်းဆိုးပျောက်ဆေးနဲ့ ပတ်သက်တဲ့ ဆေးမျိုး လုံးဝ ရောင်းချခွင့်မပြုကြောင်း၊ ကိုဗ်စ-၁၉ ရောဂါလက္ခဏာ ဖြစ်လာပါက သက်ဆိုင်ရာကို သတင်းပို့ပြီး ဆေးစစ်ရမယ်လို့ ဆိုပါတယ်။

ဝမ်တိန်ကို ဇူလိုင်လ ၈ ရက်ညက လော့ဒေါင်းချခဲ့တာဖြစ်ပြီး ကျင်းစန်းကျော့ -  ဝမ်တိန် နှစ်နိုင်ငံ ကုန်သွယ်ရာဂိတ်ကိုတော့ ဇူလိုင်လ ၈ ရက်နေ့ နေ့လည်ခန့်က ကပ်ရောဂါ အခြေအနေကြောင့် တရုတ်ကဘက်က ရက်အကန့်အသတ် မရှိပိတ်ထားခဲ့ပေမယ့် ဇူလိုင်လ ၂၃ ရက်ကစ ဝမ်တိန်ဘက်က ကုန်တင်ပြီး၊ အခွန်ဆောင်ပြီး မြန်မာကုန်တင်ကားတွေကို တစ်ပတ် သုံးကြိမ်၊ တစ်ကြိမ်ကို အစီး ၂၀ ဝန်းကျင် ထွက်ခွင့်ပြုပေးနေတာ ဖြစ်ပါတယ်။

တရုတ် သတင်းတွေအရ ဇူလိုင်လ ၂၉  ည ၂၄ နာရီထိ ရွှေလီ၊ ဂျယ်ဂေါင် အပါအဝင် ထပ်တိုးလူနာမရှိကြောင်း၊ လက်ရှိ ယူနန်ပြည်နယ်အတွင်း ကုသမှုခံယူနေတဲ့ ပိုးတွေ့ လူနာ ၃၆၆ ဦးရှိပြီး ပြည်တွင်း ကူးစက်မှု ၆၃ ဦး၊ ပြည်ပ ကူးစက်မှု ၃၀၃ ဦး ရှိကာ သေဆုံးသူ မရှိကြောင်း သိရပါတယ်။

Pra Jaw

3 months Ago
Up