တရုတ်

May 26, 2022

အင်ဒို-ပစိဖိတ် စီးပွားရေးမူဘောင်သည် အမေရိကန် ကြွယ်ဝချမ်းသာရေးအတွက်ဖြစ်ဟု တရုတ်ပြော

အင်ဒို-ပစိဖိတ် စီးပွားရေးမူဘောင် (IPEF) ဟာ အမေရိကန် အကျိုးစီးပွားကို ဆောင်ရွက်ပေးပြီး တခြားနိုင်ငံတွေကို ဖယ်ထုတ်ဖို့ ကြိုးစားနေတယ်လို့လည်း တရုတ်နိုင်ငံခြားရေး ဝန်ကြီးဌာန ပြောခွင့်ရ ဝမ်ဝင်ဘင်က  မေ ၂၅ ရက် ပုံမှန် သတင်းစာရှင်းလင်းပွဲမှာ ပြောပါတယ်။

“အကောက်ခွန်ကင်းလွတ်ခွင့်၊ ဈေးကွက်ဝင်ရောက်ခွင့် စတဲ့ အစီအစဉ်တွေ မရှိပေမဲ့ အမေရိကန်ပြည်ထောင်စုရဲ့ မြင့်မားတဲ့ စံနှုန်းတွေကို လက်ခံဖို့ နိုင်ငံတွေကို အတင်းအကျပ် ဖိအားပေးဖို့ အစီအစဉ်ပဲ ရှိတယ်၊ ဒီမူဘောင်က ဒေသတွင်းနိုင်ငံတွေရဲ့ ဘုံဖွံ့ဖြိုးတိုးတက်ရေးကို အမှန်တကယ် မကူညီနိုင်ရင် ဝေးကွာသွားမှာပဲ” လို့ ဝမ်က ပြောပါတယ်။

အမေရိကန်သမ္မတ ဂျိုးဘိုင်ဒင်ဟာ အင်ဒို-ပစိဖိတ် စီးပွားရေးမူဘောင် စီမံကိန်းကို  မေ ၂၃ ရက်က သူ့ရဲ့ ပထမဆုံး အာရှဒေသခရီးစဉ်အတွင်း စတင် မိတ်ဆက်ခဲ့တာပါ။

အာရှအတွက် အမေရိကန်က ကျောထောက်နောက်ခံပေးထားတဲ့ စီးပွားရေးစီမံကိန်းဟာ တရုတ်စီးပွားရေးကနေ နိုင်ငံတွေကို ခွဲထုတ်ဖို့ ကြိုးစားနေတာဖြစ်တယ်၊ ဒါပေမဲ့ နိုင်ငံအများအပြားက ပေးဆပ်ရတာ များမှာကို စိုးရိမ်နေကြတယ်လို့ တရုတ်နိုင်ငံခြားရေး ဝန်ကြီးဌာနက ပြောလိုက်ပါတယ်။

အင်ဒို-ပစိဖိတ် စီးပွားရေးမူဘောင် (IPEF)ကို ကနဦး တည်ထောင်သူ နိုင်ငံတွေထဲမှာ ဩစတြေးလျ၊ ဘရူနိုင်း၊ အင်ဒိုနီးရှား၊ ဂျပန်၊ နယူးဇီလန်၊ စင်ကာပူ၊ တောင်ကိုရီးယား၊ ထိုင်း၊ ဗီယက်နမ်နဲ့ အမေရိကန်တို့ ပါပေမဲ့ တရုတ်နိုင်ငံတော့ မပါခဲ့ပါဘူး။

13 hours Ago

May 25, 2022

ပေကျင်းတွင် ကိုဗစ်ကူးစက်မှု အဆုံးသတ်ရေး လုပ်ဆောင်မှုများကြောင့် ဒေသခံများ စိုးရိမ်

တရုတ်နိုင်ငံ မြို့တော် ပေကျင်းမှာ လချီကြာနေတဲ့ ကိုဗစ်-၁၉ ကပ်ရောဂါ ကူးစက်မှု အဆုံးသတ်ရေး ရောဂါခြေချုပ် အားထုတ်မှုတွေကို ပိုတိုးလုပ်လာပြီး လူတွေကို အကြီးအကျယ် စစ်ဆေးနေတဲ့အတွက် ဒေသခံတချို့ကြားမှာ စိုးရိမ်သောကတွေနဲ့ စိတ်ပျက်မှုတွေ တိုးလာနေပါတယ်။

"ရှန်ဟိုင်းလိုမဖြစ်အောင် ပေကျင်းမြို့တော်က ကြိုးစားသင့်တယ်၊ ကျနော် အခု ပိုပြီး စိုးရိမ်လာပြီ" လို့ အသက် ၆၀ အရွယ် ဒေသခံတယောက်က ပြောပါတယ်။

သက်ကြီးနိုင်ငံသားတွေကို စောင့်ရှောက်နေရတဲ့ မိသားစုတွေမှာ စိန်ခေါ်မှုတွေ အဆင်မပြေမှုတွေကို အကြီးအကျယ် ရင်ဆိုင်နေရတယ်လို့ သူက ဆက်ပြောပါတယ်။

တရုတ်အစိုးရရဲ့ ကိုဗစ် လုံးဝကင်းစင်ရေး မူဝါဒ အစိတ်အပိုင်းအနေနဲ့ ရပ်ကွက်တခုက လူအယောက် ၁,၈၀၀ လောက်ကို ရောဂါခြေချုပ်အနေနဲ့ အနားက ဟော့ဘေးပြည်နယ် ကျန်းကျားကျိုးမြို့ဆီကို ရွှေ့ပြောင်းနေရာချထားခဲ့တယ်လို့ အစိုးရမီဒီယာ ပေဂျင်းဒေးလီး သတင်းဌာနက ကြေညာပါတယ်။

ပေဂျင်းရဲ့ ခရိုင် ၁၆ ခုထဲက ၁၁ ခုမှာ ပြင်းထန်မှု အမျိုးအစားပေါ် မူတည်ပြီး အိမ်ကနေ အလုပ်လုပ်ဖို့ အမိန့်ထုတ်ထားပါတယ်။

မြို့တော်တလွှား အများသုံး သယ်ယူပို့ဆောင်ရေးကိုလည်း လျှော့ချထားပြီး ကုန်တိုက်တန်းတွေနဲ့ တခြားနေရာတွေကိုတော့ ပိတ်ထားပါတယ်။

တရုတ်မြို့တော် ပေကျင်းမှာ မေ ၂၄ ရက်က ရောဂါလက္ခဏာပြတဲ့ ကိုရိုနာဗိုင်းရပ်စ် ကူးစက်ခံ လူနာသစ် ၄၁ ယောက်ကို မှတ်တမ်းတင်ထားပြီး အရင်နေ့နဲ့ အပြောင်းအလဲ မရှိဘူးလို့ စီစီတီဗီ သတင်းဌာနက ဆိုပါတယ်။

2 days Ago

ကုလလူ့အခွင့်အရေးမဟာမင်းကြီး၏ တရုတ်ခရီးစဉ် အရေးပါဟု တရုတ်ပြော

ကုလသမဂ္ဂလူ့အခွင့်အရေးဆိုင်ရာ မဟာမင်းကြီး မစ်ရှဲလ်ဘာချေးလက်ရဲ့ တရုတ်နိုင်ငံခရီးစဉ်ဟာ အပြန်အလှန် နားလည်မှုတွေ တိုးမြှင့်ဖို့၊ ပူးပေါင်းဆောင်ရွက်ရေး အားဖြည့်ဖို့ ခရီးစဉ် ဖြစ်လာရေး မျှော်လင့်တယ်လို့ တရုတ် နိုင်ငံခြားရေးဝန်ကြီး ဝမ်ယိက မတ် ၂၄ ရက်မှာ ပြောလိုက်ပါတယ်။

UNHRC ရဲ့ မဟာမင်းကြီးအဖြစ် တရုတ်နိုင်ငံကို ပထမဆုံး လာရောက်လည်ပတ်တဲ့ ဘာချေးလက်ကို ဝမ်ယိက တရုတ်တောင်ပိုင်း ကွမ်တုံပြည်နယ်မှာ ကြိုဆိုပါတယ်။

၁၇ နှစ်အတွင်း ပထမဆုံး ခရီးစဉ်ဟာ နှစ်ဖက်စလုံးအတွက် အထင်ကရ အရေးပါတယ်လို့လည်း ဝမ်ယိက ပြောပါတယ်။

ဘာချေးလက်ဟာ မေ ၂၃ ရက်ကနေ ၂၈ ရက်နေ့ထိ ခရီးစဉ်တွင်း တရုတ်နိုင်ငံ အနောက်မြောက်ပိုင်း ရှင်းကျန်းပြည်နယ် ဝီဂါ ကိုယ်ပိုင်အုပ်ချုပ်ခွင့်ရဒေသနဲ့ ကွမ်တုံပြည်နယ်တို့မှာ လည်ပတ်မှာဖြစ်ပြီး တရုတ်ပြည်သူတွေနဲ့ ကျယ်ကျယ်ပြန့်ပြန့် တွေ့ဆုံဖို့ စီစဉ်ထားပါတယ်။

2 days Ago
More News
Up