တရားစွဲ

May 31, 2021

သရုပ်ဆောင် ရဲတိုက်နှင့် ပိုင်တံခွန်တို့ကို ဖေ့စ်ဘွတ်ခ်ပေါ်က အထောက်အထားများဖြင့် တရားစွဲ

အင်းစိန်ထောင်မှာ ဖမ်းဆီးခံနေရတဲ့ သရုပ်ဆောင် ရဲတိုက်နဲ့ မော်ဒယ်ပိုင်တံခွန်တို့ကို စစ်ကောင်စီက  ဖေ့စ်ဘွတ်ခ်နဲ့ မီဒီယာတွေပေါ်က အထောက်အထားတွေနဲ့ တရားစွဲထားတာဖြစ်ပြီး တရားလိုကိုစစ်ပြီးမှ အာမခံလျှောက်မယ်လို့ သူတို့ရဲ့ဥပဒေအကြံပေးက ပြောပါတယ်။

သရုပ်ဆောင်ရဲတိုက်ကို လသာရဲစခန်းက ပုဒ်မ ၅၀၅(က) ၊ မရမ်းကုန်းရဲစခန်းက မူးယစ်ပုဒ်မ ၁၆(ဂ)တို့နဲ့ တရားစွဲ ထားတာဖြစ်ပါတယ်။

သရုပ်ဆောင် ပိုင်တံခွန်ကိုတော့ မြောက်ဒဂုံရဲစခန်းက  ပုဒ်မ ၅၀၅(က) နဲ့ တရားစွဲထားပါတယ်။ သူတို့နှစ်ဦးစလုံးရဲ့ အမှုတွေကို စတင်စွဲဆိုခဲ့တဲ့ မေလ ၄ ရက်နေ့ကနေ ရက်ပေါင်း ၁၈၀ အတွင်းအပြီးစစ်ဆေးသွားဖို့ရှိတယ်လို့ သူတို့ရဲ့ ဥပဒေအကြံပေး ရှေ့နေ ဦးခင်မောင်မြင့်က ပြောပါတယ်။

“အမှုသွားအမှုလာ အနေအထားကတော့ ကိုပိုင်တံခွန်က အပြင်မှာ ဆောင်ရွက်နေတာတွေထက် ဖေ့စ်ဘွတ်ခ်ပေါ် တင်ထားတာတွေအပေါ် မူတည်ပြီးစွဲထားတာဖြစ်တဲ့အတွက် သိပ်ပြင်းပြင်းထန်ထန်မရှိဘူး။ ကိုရဲတိုက်အမှုကလည်း သူကိုယ်တိုင်ဆောင်ရွက်ခဲ့တာထက် မီဒီယာပေါ်မှာတင်ထားတဲ့ အင်တာဗျူးတစ်ခုအပေါ်မှာ မူတည်ပြီး စွဲထားတာဖြစ်တဲ့အတွက် သိပ်ပြင်းပြင်းထန်ထန်မရှိဘူး။ တခုရှိတာက စိတ်ကြွစိတ်ပြား ၁၁ ပြားနဲ့ ဆက်စပ်ပစ္စည်းတွေနဲ့ပတ်သက်ပြီး စွဲထားတဲ့အမှုကတော့ အာရုံနည်းနည်းစိုက်ပြီး လိုက်ရမယ်။ အာမခံက တင်ရင်လည်း သူတို့ကလက်ရှိမှာ ကျန်းမာရေးကကောင်းနေတယ်။ အထူးတရားရုံးမှာ တင်သမျှအမှု အားလုံးကို အာမခံမပေးဘူး။ လတ်တလော တင်ရင်ပယ်မယ့် အတူတူတရားလိုကိုစစ်ပြီးမှာ အမှုက ခိုင်ခိုင်မာမာ မရှိဘူးဆိုရင် ဘယ်လိုအမှုမျိုးမဆို အာမခံတင်လို့ရတဲ့အပေါ်မူတည်ပြီး အာမခံလျှောက်ထားပါမယ်”

သရုပ်ဆောင်ရဲတိုက်နဲ့ပိုင်တံခွန်တို့ကို အင်းစိန်ထောင် သီးသန့်ဆောင်မှာ ထိန်းသိမ်းထားတာဖြစ်ပြီး ကျန်းမာရေးကောင်းမွန်ကြတယ်လို့ သိရပါတယ်။

သူတို့ကို အင်းစိန်ထောင်တွင်းအထူးတရားရုံးမှာ စစ်ဆေးနေတာဖြစ်ပြီး သရုပ်ဆောင်ရဲတိုက်ကို ဇွန်လ ၁ ရက်နဲ့  ၃ ရက်နေ့ သရုပ်ဆောင်ပိုင်တံခွန်ကိုတော့ ဇွန်လ ၉ ရက်နေ့မှာ ရုံးချိန်းပြန်ခေါ်ပါတယ်။  

“အင်းစိန်ထောင် သီးသန့်ဆောင်မှာထားတယ်။ အဆောင်နံပတ်တော့မသိဘူးဗျ။ အားလုံးအတူတူထားတာ တော့မဟုတ်လောက်ဘူး။ တစ်ယောက်နဲ့ တစ်ယောက်ခွဲထားကြလိမ့်မယ်။ အထဲမှာ ၅၀၅(က) နဲ့စွဲထားတာက လေးထောင်လောက်ရှိတော့ အဆောင်တွေတော့ ကွဲကြလိမ့်မယ်ထင်တယ်။” လို့ သူတို့ရဲ့ ရှေ့နေက ပြောပါတယ်။

သရုပ်ဆောင်ရဲတိုက် ကို ဧပြီ ၃ ရက်နေ့က မရမ်းကုန်းမြို့နယ် သမိုင်းလမ်းဆုံးမှာ ဖမ်းဆီးခဲ့တာဖြစ်ပြီး ပိုင်တံခွန်ကိုတော့ ဧပြီ ၈ ရက် နေ့က မြောက်ဒဂုံက သူ့ရဲ့နေအိမ်မှာ ဖမ်းဆီးခဲ့တာဖြစ်ပါတယ်။

သရုပ်ဆောင် ပြေတီဦး၊ အိန္ဒြာကျော်ဇင်နဲ့ မေတိုးခိုင်တို့သုံးဦးကိုတော့ မေလ ၂၇ရက်နေ့က ကျောက်တံတား ရဲစခန်းကနေ ကျောက်တံတားတရားရုံးကို ပုဒ်မ ၅၀၅(က)နဲ့ အမှုစွဲတင်ထားပါတယ်။ သူတို့သုံးယောက်ကို လည်း အင်းစိန်ထောင် သီးသန့်ဆောင်မှာပဲ ထိန်းသိမ်းထားတာဖြစ်ပါတယ်။ 

2 months Ago

May 28, 2021

မြန်မာသတင်းသမားများကို တရားစွဲဆိုထားမှု ချက်ချက်ရုပ်သိမ်းရန် အေအိုင်အဖွဲ့တောင်းဆို

မြန်မာအာဏာသိမ်း စစ်ကောင်စီအနေနဲ့ ဂျာနယ်လစ် သတင်းထောက်တွေအပေါ် စွဲချက်တင်ထားတာတွေကို ချက်ချင်းရုပ်သိမ်းဖို့ အပြည်ပြည်ဆိုင်ရာလွတ်ငြိမ်းချမ်းသာခွင့်အဖွဲ့ Amnesty International က တောင်းဆိုလိုက်ပါတယ်။

ဂျာနယ်လစ်တွေဟာ ဒီကနေ့ မြန်မာနိုင်ငံမှာ ဖြစ်ပျက်နေတဲ့ ကိစ္စတွေအပေါ် အမှန်တရားဖော်ထုတ်ဖို့ ကြိုးပမ်းမှုရဲ့ ရှေ့တန်းမှာ ရှိနေတာလို့  အေအိုင်အဖွဲ့ရဲ့ သုတေသနဆိုင်ရာ ဒေသဒါရိုက်တာ အီးမာလင်းဂေလ်က ပြောပါတယ်။

ဂျာနယ်လစ်တွေအပေါ်  စစ်အာဏာပိုင်တွေက တိုးပြီးကျူးလွန်နေတဲ့ ရက်စက်တဲ့အကြမ်းဖက်မှု၊ ခြိမ်းခြောက်မှုနဲ့ အနှောင့်အယှက်ပေးမှုတွေဟာ အမှန်တရားကို ဖော်ထုတ်ခြင်းက ဘယ်လောက်အစွမ်းထက်တယ်ဆိုတာ ပြနေတာပဲ လို့လည်း ဆိုပါတယ်။

သတင်းသမား တစ်ဦးတစ်ယောက်ချင်းဟာ ခြိမ်းခြောက်၊ ဖမ်းဆီး၊ ကံဆိုးမှုတွေ ကြုံရနိုင်နေပေမယ့် မြန်မာနိုင်ငံရဲ့  လွတ်လပ်တဲ့သတင်းမီဒီယာတခုလုံးဟာ လုံးဝပိတ်ပင်ထားလို့ မရနိုင်ဘူးလို့လည်း ပြောပါတယ်။

မြန်မာနိုင်ငံမှာ သတင်းထောက်တွေ ကြုံနေရတဲ့ ဆက်လက်ဖိနှိပ်ချုပ်ခြယ်မှုတွေ၊ ခြိမ်းခြောက်မှုတွေ၊ အကြမ်းဖက်မှုတွေဟာ ဖေဖော်ဝါရီ ၁ ရက်အာဏာသိမ်းမှုအပြီး ငြိမ်းချမ်းစွာ ဆန္ဒပြမှုတွေအပေါ်ဖိနှိပ်ပြီး လုံခြုံရေးတပ်ဖွဲ့တွေ ကျူးလွန်ခဲ့တဲ့ အကြမ်းဖက်မှုတွေကို မှေးမှိန်စေဖို့ စစ်တပ်အာဏာပိုင်တွေရဲ့ ကြိုးပမ်းမှုဖြစ်တယ်လို့လည်း ဆိုပါတယ်။

မြန်မာနိုင်ငံမှာ အင်တာနက်အပါအဝင် ဆက်သွယ်ရေးလမ်းကြောင်းတွေကို ဆိုးဆိုးရွားရွား ဖြတ်တောက်ခံထားရပေမယ့်လည်း စစ်အာဏာပိုင်တွေရဲ့ ချိုးဖောက်ကျူးလွန်မှုတွေကို ကမ္ဘာကြီးကသိနေတာဟာ သတင်းစာနယ်ဇင်းသမားတွေရဲ့ ရဲစွမ်းသတ္တိတွေကြောင့်ပါပဲလို့လည်း  Amnesty International ရဲ့ ထုတ်ပြန်ကြေညာချက်မှာ  ဖော်ပြထားပါတယ်။

2 months Ago
More News
Up