ဈေးကောင်းရ

January 19, 2021

စစ်ကိုင်းတိုင်းတွင် အိန္ဒိယဒန့်သလွန်သီး ဈေးကောင်းရနေ၍ တောင်သူများအဆင်ပြေ

စစ်ကိုင်းတိုင်းအတွင်း မြို့နယ်တွေမှာ အိန္ဒိယ ဒန့်သလွန်သီးတွေ ဈေးကောင်းရနေတာကြောင့် ဒန့်သလွန်စိုက်တောင်သူတွေ  အဆင်ပြေကြတယ်လို့ သိရပါတယ်။   စိုက်ပျိုးရရှိတဲ့ ဒန့်သလွန်သီးတွေကို အဝယ်ဒိုင်တွေဆီကို ပို့ဆောင်ရောင်းချရတာဖြစ်ပြီး တစ်တောင့်ကို  ၉၀၊ ၁၀၀ ကျပ်နဲ့ ရောင်းချရတယ်လို့ သိရပါတယ်။ ရွာတုံရွာနေ တောင်သူ ဦးကျော်မျိုးထိုက်က “ဒန့်သလွန်က‌တော့ အိန္ဒိယမျိုးပေါ့။ PKM1 လို့လည်း ခေါ်တယ်။ ပြုစုတာကောင်းရင် ၄ လလောက်ဆိုရင် အသီးစသီးပြီ။ မိရိုးဖလာစိုက်ပျိုးရေးနဲ့ အခုလို တွဲစိုက်သင့်တယ်။ ဒန့်သလွန်သီးက ဝယ်သူလည်း ပေါတယ်လေ။ အပင် ၇၀၀ ကျော် စိုက်ပျိုးထားတယ်။ ရေကောင်း ကောင်းပေးနိုင်ရင် တစ်လကို ၃ ကြိမ်ခန့် အသီး ခူးရတယ်” လို့ ပြောပါတယ်။ အိန္ဒိယဒန့်သလွန်ပင်မျိုးတွေဟာ စိုက်ပျိုးပြီး ၃ လကျော်ပါက အပင်တစ်ပင်ကို  အတောင့် ၁၀၀ ကနေ ၆၀၀ လောက် သီးပြီး ဒန့်သလွန်းအသီး တောင့်တစ်တောင့်ကို  ၂ ပေဝန်းကျင်အထိ အရှည်ရှိတယ်လို့ သိရပါတယ်။    မုံရွာမြို့ အောင်မြင်သူ သီနှံပွဲရုံပိုင်ရှင် ဦးလှမင်းနိုင်က "ကျနော်တို့ကတော့ ဝယ်တဲ့နေရာမှာ ခြံရှင်တွေနဲ့ ချိတ်ဆက်ထားရတယ်ပေါ့။ မနှစ်က သီးတစ်ထောင့်ကို ၄၀၊  ၅၀ ပေးရတယ်။ အခုနှစ်ကတော့ ၉၀၊ ၁၀၀ ပေးရပြီး လိုချင်သလောက်မရဘူးဗျ” လို့ ပြောပါတယ်။ ဒန့်သလွန်ပင်တစ်ပင်မှာ တစ်နှစ် ၃ ကြိမ် ခူးရပါက အပင် ၁၀၀၀ ကို သိန်း ၈၀ လောက် ဝင်ငွေရတယ်လို့ အပင်စိုက်တောင်သူတွေက ပြောပါတယ်။ စစ်ကိုင်းတိုင်အတွင်းမှာ ကနီမြို့၊ အ‌ရာတော်မြို့၊ မုံရွာမြို့တွေမှာ တစ်ပိုင်တစ်နိုင်ဒန့်သလွန်ကို စမ်းသပ်စိုက်ပျိုးနေကြပြီး အသီးဝယ်လိုအားကောင်းတာကြောင့် ဈေးကောင်းရနေကြတာပါ။ သတင်း - ကျော်မင်းသန့်
4 months Ago

January 8, 2021

ကိုဗစ်ကာလ တောင်ငူခရိုင်တွင် ပန်းမုန်လာအထွက်နည်းပြီး ဈေးကောင်းရ 

စစ်တောင်းမြစ်ကမ်းပါး‌ ပဲခူးတိုင်းဒေသကြီး၊ အုတ်တွင်းမြို့နဲ့ တောင်ငူမြို့နယ် တဝိုက် စိုက်ပျိုးလေ့ရှိကြတဲ့ ဒေသထွက် ပန်းမုန်လာဟာ ကိုဗစ်ကာလ စိုက်ပျိုးလုပ်ကိုင်သူ နည်းပါးပြီး အထွက်နှုန်း လျော့နည်းပေမဲ့ ဈေးကောင်းရနေတယ်လို့ ဒေသခံတောင်သူတွေက ပြောပါတယ်။ “ဈေးကွက်အနေအထား  ကြည့်ကြတာလည်းပါသလို အရင်းနှီးကြီးတာတစ်ကြောင်းပေါ့။ ဒါပေမဲ့ ဒီနှစ်မှာ ပန်းမုန်လာက အထွက်နည်းပေမယ့် ကုန်စိမ်းဈေးကောင်းလို့ သိပ်တော့မ ထောင်းပါဘူး” လို့ ပန်းမုန်လာစိုက် တောင်သူ တစ်ဦးက ပြောပြပါတယ်။ ‌ဒေသထွက် ပန်းမုန်လာတွေဟာ တောင်ငူမြို့နယ်ကုန်စိမ်းစျေးကွက်သို့ နှစ်စဉ် ဒီဇင်ဘာလ တတိယပတ်မှစတင်ပြီးဝင်ရောက်လေ့ရှိပြီး ပန်းမုန်လာပွင့်(အရွယ်အစား)လှပါက  တစ်ပွင့်ကို ကျပ် ၃ဝဝ လောက်ရလို့ မနှစ်ကထက် ဈေးပိုရတယ်လို့ တောင်ငူမြို့ ညောင်ပင်ဈေးက ကုန်စိမ်းပွဲရုံပိုင်ရှင် ဒေါ်သဲသဲက ပြောပါတယ်။ စစ်တောင်းမြစ်မကြီးနဲ့ ခပေါင်းချောင်းမြစ်လက်တက်က  ကမ်းပါးတွေမှာ  စိုက်ပျိုးလေ့ ရှိတဲ့ ဆောင်းရာသီ သီးနှံ ပန်းမုန်လာတွေဟာ  ရှမ်းပြည်နယ်က ထွက်တဲ့ ပန်းမုန်လာ‌လောက်  လူကြိုက် မများပေမယ့် ဈေးနူန်းသက်သာလို့ ပုံမှန်ဆို အဝေးမြို့ရွာတွေကို ပို့ရလေ့ရှိပါတယ်။ အရင်နှစ်ရာသီက စျေးကောင်း မရလို့တောင်သူတွေ အရှုံးနဲ့ရင်ဆိုင်ခဲ့ရပြီး အခုနှစ် ကိုဗစ်ကာလ စိုက်ပျိုးသူနည်းပါးတာကြောင့် အထွက်လျော့နည်းပြီးဈေးကောင်းရတာ ဖြစ်တယ်လို့ ဒေသခံ စိုက်ပျိုးတောင်သူတွေနဲ့ ကုန်စိမ်းပွဲရုံပိုင်ရှင်တွေက ပြောပါတယ်။ တောင်ငူမြို့နယ်  ညောင်ပင်စျေး ကုန်စိမ်းစျေးကွက်သို့ နှစ်စဉ် ဒီဇင်ဘာလနောက်ဆုံး ပတ် လောက်မှာ စတင် ဝင်ရောက်လေ့ရှိတဲ့ ပန်းမုန်လာဈေးနှုန်းဟာ မနှစ်က အပွင့်တစ်ရာပါ တစ်ခြင်းကို ကျပ် ၂၀,၀၀၀ လောက်ရပြီး အခုနှစ်တော့  ကျပ် ၃ဝ,ဝဝဝ နီးပါးရရှိပါတယ်။ စစ်တောင်းမြစ်နဲ့ ခ‌ပေါင်းချောင်းကမ်းပါးကျေးရွာတချို့မှာနှစ်စဉ် စက်တင်ဘာလဆန်းပိုင်းမှာ ပန်းမုန်လာက စတင်စိုက်ပျိုးပြီး ဒီဇင်ဘာတတိယပတ်လောက်မှာ ထွက်‌လေ့ရှိပါတယ်။ ဆေးဖိုး၊ မျိုးဖိုးနဲ့ လုပ်အားခ‌ ပေါင်းမယ်ဆိုပါက တစ်ဧက ကျပ် ၃၅၀,၀၀၀ လောက်သာ  ကုန်ကျပေမဲ့  တစ်ဧက  ပန်းပွင့်ရေ ၅၀၀၀ လောက်ထွက်မယ်ဆိုရင် တောင်သူတွေအတွက် အဆင်ပြေတယ်လို့ သိရပါတယ်။ သတင်း - ရဲထွဋ်
4 months Ago
Up