ဆူရှီဆိုင်

May 1, 2020

ဆူရှီဆိုင်သွားခဲ့သည့် Foodpanda Delivery ဝန်ထမ်းများ ကျန်းမာရေးကောင်းမွန်

COVID-19 အတည်ပြုလူနာ Case-146ရဲ့ဆူရှီဆိုင် ဝန်ထမ်းတွေမှာ ရောဂါပိုး မတွေ့တဲ့အပြင် ဆိုင်ကို ဝင်ထွက်သွားလာခဲ့တဲ့ Foodpanda Delivery ဝန်ထမ်းတွေလည်း ကျန်းမာရေးကောင်းမွန်တယ်လို့ Foodpanda Myanmar တာဝန်ရှိသူ တဦးက ဒီဗွီဘီကိုပြောပါတယ်။ ရန်ကုန်၊ လှိုင်မြို့နယ်၊ ပါရမီလမ်းပေါ်က ပိုးတွေ့လူနာ Case 146ရဲ့ ဆူရှီဆိုင်ကို Foodpanda Delivery ဝန်ထမ်းတချို့ အဝင်အထွက်ရှိခဲ့လို့  နေအိမ်မှာ ၂၁ ရက်နေဖို့ ကုမ္ပဏီက ညွှန်ကြားထားခဲ့တာဖြစ်ပါတယ်။ ဆူရှီဆိုင်ဝန်ထမ်းတွေအားလုံးမှာ COVID-19 ပိုးမတွေ့ရှိကြောင်း စစ်ဆေးသိရှိရပေမဲ့ ကြိုတင်ကာကွယ်တဲ့အနေနဲ့ ဆူရှီဆိုင်အနီးတဝိုက် သွားလာသယ်ယူပို့ဆောင်တဲ့ Delivery ဝန်ထမ်းအားလုံကို ရွေးချယ်ပြီး နေအိမ်မှာ  ၂၁ ရက်နေဖို့ စီစဉ်ထားတာလို့ ဆိုပါတယ်။ နေအိမ်မှာ ထားရှိတဲ့ ဝန်ထမ်း အရေအတွက် ဘယ်လောက်ရှိတယ် ဆိုတာကိုတော့ ကုမ္ပဏီရဲ့ မူဝါဒအရ ဖြေလို့မရကြောင်း Foodpanda Myanmar တာဝန်ရှိသူကပြောပါတယ်။ အစားအသောက်တွေ အိမ်တိုင်ရာရောက်ပို့ပေးတဲ့ Foodpandaရဲ့ ဝန်ထမ်းတွေအားလုံး ဒီလိုအချိန်မှာ လုံခြုံစိတ်ချရမှုရှိပြီး လိုအပ်တဲ့ စောင့်ရှောက်မှုတွေ ရရှိဖို့အတွက် အလေးထားလုပ်ဆောင်ပေးနေတယ်လို့ Foodpanda Myanmar ရဲ့ မန်နေဂျင်း ဒါရိုက်တာ ကိုဇေယျာမင်းက ပြောပါတယ်။  လှိုင်မြို့နယ်ကျန်းမာရေးဦးစီးမှူး ဒေါက်တာဝေဆင့်ကျော်ကတော့ ဒီလိုမျိုး နေအိမ်မှာ ထားသင့် မထားသင့်ဆိုတာ ဖြစ်စဉ်ကို ပြန်လေ့လာရမှာဖြစ်ပြီး၊ ကျန်းမာရေးဌာနကိုလည်း ဆက်သွယ်ရမှာဖြစ်ကြောင်းနဲ့ နေအိမ်မှာ ထားဖို့ လိုမလိုကိုလည်း တိုင်ပင်သင့်တယ်လို့ ဒီဗွီဘီကိုပြောပါတယ်။ နေအိမ်မှာပဲနေနေကြတဲ့ Foodpanda Delivery ဝန်ထမ်းတွေဟာ မေလ တတိယပတ်လောက်မှာ ၂၁ ရက် ပြည့်မှာဖြစ်ပါတယ်။ သူတို့ကို နေ့စဉ် ခန္ဓာကိုယ် အပူချိန်တိုင်းတာပြီး၊ သတ်မှတ်အပူချိန် ၃၇.၅ ကျော်တာနဲ့ သက်ဆိုင်ရာကို ချက်ချင်းအကြောင်းကြားကာ ကျန်းမာရေးနဲ့ အားကစားဝန်ကြီးဌာနရဲ့ ညွှန်ကြားချက်နဲ့ အညီ လိုက်နာသွားဖို့ အဆင်သင့်ရှိကြောင်း Foodpanda တာဝန်ရှိသူက ပြောပါတယ်။ 
1 year Ago

April 26, 2020

လူနာအမှတ် ၁၄၆ နှင့် ထိတွေ့မှုရှိသည့် ဆူရှီဆိုင်ဝန်ထမ်း ၇ ဦးကို Quarantine Center ပို့

COVID-19 အတည်ပြုလူနာအမှတ် ၁၄၆ နဲ့ ထိတွေ့မှုရှိတဲ့ ဆူရှီဆိုင်ဝန်ထမ်း ၇ ဦးကို Quarantine Center ပို့လိုက်ပြီလို့ တိုင်းဒေသကြီးလွှတ်တော်ကိုယ်စားလှယ်က ပြောပါတယ်။  COVID-19 ကူးစက်ခံရတဲ့ လူနာအသစ် ၂ ဦးထဲက ရန်ကုန်တိုင်း ကမာရွတ်မြို့နယ်က ပိုးတွေ့လူနာ ၁၄၆ ဟာ လူနာအမှတ် ၁၃၉ ရဲ့ အမျိုးသားဖြစ်ပြီး အသွားအလာ ကန့်သတ်စောင့်ကြပ်ကြည့်ရှုမှုခံယူနေတုန်း ပိုးတွေ့ရှိခဲ့တာဖြစ်ပါတယ်။  COVID-19 အတည်ပြုလူနာနံပါတ် ၁၄၆ ဟာ ပါရမီလမ်းမှာ ဆူရှီဆိုင်ဖွင့်လှစ်ထားသူတဦး ဖြစ်ပါတယ်။ လက်ရှိမှာတော့ သူရဲ့ဆိုင်ကို Lockdown လုပ်ထားပြီး ဆိုင်ဝန်ထမ်း ၇ ဦးကိုလည်း သက်ဆိုင်ရာ ကျန်းမာရေးဌာနကနေ Quarantine Center ကို ခေါ်ယူသွားပြီလို့ လှိုင်မြို့နယ်၊ မဲဆန္ဒနယ် အမှတ် (၂) တိုင်းဒေသကြီးလွှတ်တော်ကိုယ်စားလှယ်က ဒေါ်ခိုင်မာဌေးက ပြောပါတယ်။ လူနာအမှတ် ၁၄၆ နေထိုင်ခဲ့တဲ့ ကမာရွတ်မြို့နယ် အောင်မေတ္တာ ၁ လမ်းက နေအိမ်ကိုလည်း Lockdown ချထားပါတယ်။  မြန်မာနိုင်ငံမှာ ဒီနေ့ မွန်းလွဲပိုင်းအထိ COVID-19 ရောဂါဓာတ်ခွဲအတည်ပြုလူနာ စုစုပေါင်း ၁၄၆ ဦး၊ သေဆုံးသူ ၅ ဦးနဲ့  ရောဂါပိုးကင်းစင်လာသူ ၁၀ ဦးရှိပြီလို့ ကျန်းမာရေးဌာနက ထုတ်ပြန်ထားပါတယ်။ ကိုရိုနာဗိုင်းရပ်စ် ကူးစက်ခံရသူအများစုမှာ ရန်ကုန်တိုင်းကဖြစ်ပြီး လက်ရှိ အထူးကြပ်မတ်ကုသဆောင်မှာ ကုသမှုခံယူနေရသူ ၃ ဦးရှိပါတယ်။  ကျန်ရှိနေတဲ့ ရောဂါပိုး ကူးစက်ခံရပြီး ဆေးရုံတက်ရောက်နေတဲ့ လူနာတွေကတော့ ကျန်းမာ ရေး ကောင်းမွန်တည်ငြိမ်နေတယ်လို့ ဆိုပါတယ်။
1 year Ago
Up