ဆူဒန်နိုင်ငံ

October 27, 2021

ဆူဒန်နိုင်ငံ စစ်အာဏာသိမ်းမှု ဆန့်ကျင်ဆန္ဒပြပွဲအတွင်း လူ ၃ ဦးထက်မနည်း သေဆုံး

ဆူဒန်နိုင်ငံမှာ စစ်တပ်က အာဏာသိမ်းတာကို ဆန့်ကျင်တဲ့ ဆန္ဒပြပွဲတွေအတွင်း အနည်းဆုံး  လူ ၃ ဦးသေဆုံးသွားပြီး  ဒဏ်ရာရတဲ့ အရပ်သားတွေကို ခါတွန်မြို့တော်က ဆေးရုံမှာ အောက်တိုဘာ ၂၅ ရက်က ကုသပေးနေပါတယ်။

ဆူဒန်စစ်တပ်က အသွင်ကူးပြောင်းရေးအစိုးရကို တနင်္လာနေ့က အာဏာသိမ်းအပြီး မြို့တော် ခါတွန်နဲ့ နိုင်ငံတဝန်း  တခြားမြို့တွေမှာ ပြည်သူတွေ လမ်းပေါ်ထွက် ဆန္ဒပြခဲ့ကြပါတယ်။

ဆန္ဒပြပွဲကို ဖြိုခွင်းမှုအတွင်း စစ်သားတွေက လူသုံးယောက်ထက်မနည်းကို သတ်ခဲ့ပြီး လူ ၈၀ ကျော် ဒဏ်ရာရခဲ့ပါတယ်။

ခါတွန်မြို့တော် တော်ဝင်စောင့်ရှောက်မှု နိုင်ငံတကာဆေးရုံမှာ တက်ရောက်ကုသနေရတဲ့ ဒဏ်ရာရသူတွေထဲက တယောက်ဖြစ်တဲ့ အယ်လ်တာယက်ဘ် မိုဟာမဒ်အာမက်က အဲဒီနေ့ အစောပိုင်းမှာ ဆန္ဒပြသူ ၃ ယောက် သေဆုံးတာကို သူ မျက်မြင်သက်သေ တွေ့ခဲ့တယ်လို့ ပြောပါတယ်။

လက်နက်ကိုင်တပ်တွေက ဗုံးသီးတွေ၊ ကျည်အစစ်တွေနဲ့ ပစ်ခတ်ခဲ့တယ်လို့ သူက ပြောပါတယ်။

အောက်တိုဘာ ၂၅ ရက်မှာ စစ်အာဏာသိမ်း ဆန့်ကျင်ရေး ဆန္ဒပြပွဲတွေအတွင်း စစ်တပ်က ပစ်ခတ်အပြီး လူ ၃ ယောက် ဒဏ်ရာတွေနဲ့ သေဆုံးတယ်လို့ ဆူဒန် ဆရာဝန်များ ဗဟိုကော်မတီက လည်း အတည်ပြု ပြောပါတယ်။

ဆူဒန်နိုင်ငံမှာ ကိုလိုနီခေတ်နှောင်းကာလ အများစုကို စစ်ခေါင်းဆောင်တွေက အာဏာသိမ်း အုပ်ချုပ်လေ့ ရှိပါတယ်။

ဆူဒန်ဟာ သမ္မတဘတ်ရှိုင်းယား လက်ထက်က အိုစမာဘင်လာဒင်ကို ၁၉၉၀ ပြည့်လွန်နှစ်တွေက လက်ခံ ခိုလှုံခွင့်ပေးခဲ့ဖူးပြီး စစ်ရာဇဝတ်မှုတွေအတွက် ဘတ်ရှိုင်းယားကို နိုင်ငံတကာ ရာဇဝတ်မှု ခုံရုံးက အလိုရှိနေပါတယ်။

3 months Ago

October 22, 2019

ဆူဒန်နိုင်ငံ စစ်ပွဲဖြစ်ရာဒေသများအတွက် လူသားချင်းစာနာမှု အကူအညီများ လက်ခံ

ဆူဒန်နိုင်ငံမှာ ၈ နှစ်ကြာ စစ်ပွဲတွေဖြစ်နေတဲ့ ဒေသတွေအတွက် လူသားချင်းစာနာမှု အကူအညီတွေ ပထမဆုံး လက်ခံဖို့ ဆူဒန်အစိုးရက သဘောတူလိုက်ပြီလို့ သူပုန်အဖွဲ့ ခေါင်းဆောင်တယောက်က အောက်တိုဘာ ၂၁ ရက်နေ့မှာ ပြောပါတယ်။ ဒါဟာ ရပ်ဆိုင်းနေတဲ့ ငြိမ်းချမ်းရေးဆွေးနွေးပွဲတွေကို ပြန်စဖို့ လမ်းပြမြေပုံသစ်ရဲ့ လုပ်ငန်းစဉ် တစိတ်တပိုင်းလည်း ဖြစ်ပါတယ်။ သောကြာနေ့မှာ ဆူဒန်အစိုးရနဲ့ ဆူဒန်သူပုန်အဖွဲ့တွေဟာ လမ်းပြမြေပုံသစ်ကို သဘောတူညီခဲ့ပြီးပြီးခဲ့တဲ့ တောင်ဆူဒန်နိုင်ငံမှာ ကျင်းပခဲ့တဲ့ ဆွေးနွေးပွဲအတွင်း ကတိကဝတ်တွေကို လက်မှတ်ရေးထိုးခဲ့ကြပါတယ်။ အဲဒီလမ်းပြမြေပုံထဲမှာ စစ်ပွဲတွေ ရပ်ဆိုင်းဖို့ သဘောတူညီချက်လည်း ပါပါတယ်။ ဒါပေမဲ့ အရင်က အပစ်အခတ်ရပ်ရေး သဘောတူညီချက်တွေကိုလည်း နှစ်ဖက်စလုံးက အကြိမ်ကြိမ် ချိုးဖောက်ခဲ့ကြဖူးပါတယ်။ ဆူဒန်နိုင်ငံအတွင်း ပဋိပက္ခ အဆုံးသတ်ရေးဟာ အကြမ်းဖက်ဝါဒကို ထောက်ပံ့နေတဲ့ နိုင်ငံများစာရင်းကနေ ဆူဒန်ကို ပယ်ဖျက်ဖို့ အမေရိကန်အတွက် မရှိမဖြစ် ရှိထားရမယ့် လိုအပ်ချက်လည်း ဖြစ်ပါတယ်။ ဆူဒန်နိုင်ငံကို နှစ်ပေါင်း ၃၀ ကျော် အုပ်ချုပ်ခဲ့တဲ့ သမ္မတ အိုမာအယ်လ်ဘာရှာကို  အခုနှစ် ဧပြီလမှာ အာဏာသိမ်း ဖယ်ရှားပြီးနောက် လက်ရှိမှာတော့ အသွင်ကူးပြောင်းရေးအစိုးရက ဆူဒန်ကို ထိန်းချုပ်ထားပါတယ်။  
2 years Ago
Up