ဆရာဝန်

July 30, 2021

ကိုဗစ်-၁၉ ကပ်ရောဂါ အရေးပေါ်ကုသမှုအတွက် ဆရာဝန်၊ သူနာပြုဝန်ထမ်းများ အရေးပေါ် ခေါ်ယူ

ကိုဗစ်-၁၉ ကပ်ရောဂါ အရေးပေါ်ကုသမှု စီမံကိန်းအတွက် နယ်စည်းမထား ဆရာဝန်များအဖွဲ့(MSF)က ဆရာဝန်၊ သူနာပြုနဲ့ သန့်ရှင်းရေးဝန်ထမ်း အလုပ်နေရာတွေ အရေးပေါ် ခေါ်ယူနေပါတယ်။

လက်ရှိမှာတော့ MSF အနေနဲ့ မြန်မာနိုင်ငံမှာ အရေးပေါ်အခြေအနေနဲ့ ရင်ဆိုင်နေရတဲ့ ကိုဗစ်- ၁၉ ရောဂါ အရေးပေါ်ကုသမှု ပရောဂျက်ကို ရန်ကုန်၊ ကချင်နဲ့ ရှမ်းပြည်နယ်ဘက်မှာ တိုးချဲ့ဆောင်ရွက်နေတာမို့ အဲဒီလုပ်ငန်းတွေမှာ ပါဝင်ကူညီပေးဖို့ ဝန်ထမ်းသစ်တွေ ခေါ်ယူနေတာ ဖြစ်ပါတယ်။

လျှောက်ထားသူဟာ ကျွမ်းကျင်တဲ့ ဆရာဝန်၊ သူနာပြု၊ လက်ထောက်သူနာပြုနဲ့ သန့်ရှင်းရေးဝန်ထမ်း ဖြစ်ပါက “MSF COVID response”  ခေါင်းစဉ်နဲ့ မိမိ နေထိုင်ရာ နေရာနဲ့ လျှောက်လိုတဲ့ ရာထူးကို  ရှင်းလင်းစွာ ရေးသားဖော်ပြပြီး ကိုယ်ရေးအချက်အလက် လျှောက်လွှာကို အီးမေးလ်လိပ်စာ- [email protected] ကို ပေးပို့လျှောက် ထားနိုင်မှာ ဖြစ်ပါတယ်။

ကိုဗစ်-၁၉ တတိယလှိုင်း ကူးစက်မှုတွေ မြင့်တက်နေတဲ့ မြန်မာနိုင်ငံမှာတော့ တရက်တည်း ရောဂါကူးစက်ခံရသူပေါင်း ၅,၀၀၀ ကျော်နဲ့ စုစုပေါင်း ကူးစက်ခံရသူ ၂ သိန်း ၉ သောင်းနီးပါးရှိခဲ့တယ်လို့ စစ်ကောင်စီ ကျန်းမာရေး နဲ့ အားကစားဝန်ကြီးဌာနက ဇူလိုင် ၂၉ ရက်ညမှာ ထုတ်ပြန်ပါတယ်။

ဒါ့အပြင် မတရား စစ်အာဏာသိမ်းကာလဟာ ၆ လပြည့်တော့မှာ ဖြစ်ကာ ဒီကာ လအတွင်း ပြည်တွင်းရေး မငြိမ်သက်မှုတွေနဲ့အတူ ကိုဗစ်-၁၉ တတိယလှိုင်း ကူးစက်မှုမှာတော့ ပြည်သူတွေအပေါ် ကျန်းမာရေးစောင့်ရှောက်မှုအခြေအနေတွေ ပိုဆိုးအောင် စစ်ကောင်စီက တွန်းပို့နေပြီး ပိုမိုဆိုးဝါးတဲ့ အခြေအနေတွေနဲ့ ရင်ဆိုင်နေရတာပါ။

ကိုဗစ်ကပ်ရောဂါ ကူးစက်မှုတွေ စတင်ချိန်ကစလို့ အဆိုးဆုံး အခြေအနေတွေနဲ့ ရင်ဆိုင်နေရတဲ့ မြန်မာနိုင်ငံမှာ ဒါကို အချိန်မီမတားဆီးနိုင်ရင် လာမယ့် သီတင်းပတ် ၂ ပတ်အကြာ တိုင်းပြည်လူဦးရေ ထက်ဝက်လောက် ရောဂါကူးစက်ခံရနိုင်တယ်လို့ ကုလသမဂ္ဂဆိုင်ရာ ဗြိတိန်သံအမတ်ကြီးက သတိပေးထားပါတယ်။

Photo Credit-MSF

3 days Ago

ဆရာဝန်အချို့ ကိုဗစ်ကူးစက်ခံရသဖြင့် ကနီပြည်သူ့ဆေးရုံ ယာယီပိတ်

ကနီမြို့နယ်ပြည်သူဆေးရုံက ဆရာဝန်ကြီးနဲ့ဓာတ်ခွဲဆရာဝန်တို့ ကိုဗစ်-၁၉ တွေ့ရှိတာကြောင့် ဆေးရုံကို ဇူလိုင် ၂၉ ရက် ညနေပိုင်းက ယာယီပိတ်လိုက်ရတယ်လို့ ဆေးရုံဝန်ထမ်းတွေက ပြောပါတယ်။

ဆေးရုံဝန်ထမ်းတဦးက “ကနီမြို့နယ်ဆေးရုံက ဆရာဝန်ကြီးနဲ့ ဓာတ်ခွဲဆရာမကြီး P ထိတာ။ ကျန်တဲ့ ဝန်ထမ်းတွေက contact ဆိုတော့ အကုန်းလုံး Quarantine ဝင်ရတယ်။အဲဒါကြောင့် ဇူလိုင် ၂၉ ရက်ညနေပိုင်းမှာ ကုသမှုတွေ အကုန်ရပ်ဆိုင်းလိုက်ရတယ်ပေါ့ဗျာ” လို့ ပြောပါတယ်။

ကနီမြို့နယ်တစ်ခုလုံး စစ်ကောင်စီက တပ်ရင်း ၃ ရင်းနဲ့ ထိုးစစ်ဆင်နေတာကြောင့် ဒေသခံအလုံးအရင်း တော၊ တောင်တွေထဲ ထွက်ပြေးတိမ်းရှောင်နေရပါတယ်။

အဲဒီလို ထွက်ပြေးနေရတာမို့ ကိုဗစ်-၁၉ စည်းမျဉ်းစည်းကမ်းနဲ့ နေထိုင်ဖို့ မဖြစ်နိုင်တာကြောင့် ရောဂါကူးဆက်တာလည်း  မြင့်တက်နေတယ်လို့ သိရပါတယ်။

ကနီမြို့နယ်အတွင်း ဇူလိုင် ၂၉ရက်အထိ ကိုဗစ်-၁၉ ရောဂါရှိသူ ၈၈ ဦး ရှိနေပြီး သေဆုံးသူ ၂ ဦး ရှိနေပါတယ်။

နယ်မြေမအေးချမ်းတာကြောင့် ကိုဗစ်-၁၉ ရောဂါရှိ၊ မရှိ မစစ်ဆေးနိုင်သလို လူသေဆုံးတာလည်း တရက်ထက် တရက် မြင့်လာနေတယ်လို့ ကနီမြို့နယ်လုံးဆိုင်ရာ လူမှုကယ်ဆယ်ရေးအဖွဲ့တွေက ပြောပါတယ်။

4 days Ago

July 22, 2021

ဗန်းမောက်မြို့တွင် ကိုဗစ်-၁၉ အတည်ပြုလူနာ ၅၀၀ ကျော်တွေ့၊ ဆရာဝန်နှင့် သူနာပြု မလုံလောက်

စစ်ကိုင်းတိုင်း၊ ဗန်းမောက်မြို့မှာ ဇွန်လ ၂၉ ရက်မှ  ဇူလိုင် ၂၁ ရက်နေ့အထိ ရက် ၂၀ ကျော်စစ်ဆေးရာမှာ ကိုဗစ်-၁၉ အတည်ပြုလူနာ ၅၀၀ ကျော်အထိတွေ့ရှိရပြီး၊ ရောဂါစစ်ဆေး ထိန်းချုပ်ကုသရေးလုပ်ငန်းတွေကို ဆရာဝန်နဲ့ သူနာပြုစုစုပေါင်း ၁၀ ယောက်လောက်နဲ့ သာ ဆောင်ရွက်နေကြရပါတယ်။

မြို့နယ်ဓာတ်ခွဲမှူး ဦးဇေယျာထွန်းက “ ၁၀ ဦးတောင်မပြည့်တဲ့အနေအထားပဲရှိတယ်။ ဆရာဝန်က ၂ ယောက်ပဲရှိတယ်။ သူနာပြုက ၃ ယောက်ရှိတယ်။ ဓာတ်ခွဲမှူးက ကျနော် ၁ ယောက်ပဲရှိပါတယ်။ စေတနာ့ဝန်ထမ်း ၁ ယောက်မှမရှိဘူး။ အမှိုက်သိမ်းလည်း ကျန်းမာရေးဝန်ထမ်းတွေပဲ။ အစစအရာရာ ကျနော်တို့ပဲရှိတာ။”လို့ပြောပါတယ်။ 

ဗန်းမောက်မှာ ကွာရန်တင်းစင်တာမရှိဘဲ Positive စင်တာပဲရှိပြီး ကိုဗစ် အတည်ပြုလူနာဆိုရင် ကုသရေးစင်တာဆီပို့ဆောင်ကုသပေးနေတာပါ။

လူနာတွေအနေနဲ့ အစားအသောက်ကိစ္စကတော့ ကိုယ့်အစီအစဉ်နဲ့ကိုယ်ပေါ့ ဆောင်ရွက်ရပြီး  ဆရာဝန်ကြီးတွေက မနက်၊ နေ့လယ် ၊ ညနေ တရက်သုံးကြိမ် ကိုဗစ်လူနာတွေကို ကြည့်ရှုကုသ ပေးတယ်လို့ မြို့နယ်ဓာတ်ခွဲမှူးက ပြောပါတယ်။

ဗန်းမောက်မြို့မှာ ဗန်းမောက်ဆေးရုံသစ် နှစ်ထပ်ဆောင်၊ မြို့အဝင် ဘုန်းကြီးကျောင်းတစ်ကျောင်း နဲ့ ဘောလုံးကွင်းခန်းမ၊ နယ်စပ်ဖွံ့ဖြိုးရေးကျောင်းတို့ကို Positive စင်တာ တွေအဖြစ်ပြုလုပ်ပေးထားပြီး ကိုဗစ်စစ်ဆေးမှုကို မနက် ၁၀ နာရီကနေစပြီး ပြုလုပ်ပေးနေ ပါတယ်။

ဗန်းမောက်မြို့က ကိုဗစ်-၁၉ စစ်ဆေးသူ ၁၄၆၈ ဦးမှာ ၊ ရောဂါပိုးတွေ့သူ ၅၀၄ ဦးရှိပြီး ဆေးရုံကဆင်းခွင့်ရသူ  ၃၀၇ ဦးရှိကာ ကုသဆဲလူနာ ၁၉၆ ဦး၊ သေဆုံးသူ ၁ ဦး ရှိပါတယ်။

2 weeks Ago
More News
Up