စေတနာ့ဝန်ထမ်း

April 19, 2021

မအူပင်မြို့တွင် ဆရာဝန် ၄ ဦးနှင့် စေတနာ့ဝန်ထမ်း ၁ ဦးကို အကြမ်းဖက်စစ်တပ်က ဖမ်းဆီး

ဧရာဝတီတိုင်း၊ မအူပင်မြို့နယ်မှာ ဧပြီလ ၁၈ ရက်ည သန်းခေါင်ကျော်လောက်က  ဆရာဝန် ၄ ဦးကို အကြမ်းဖက်စစ်တပ်နဲ့ရဲက နေအိမ်တွေမှာ ဝင်ရောက်ဖမ်းဆီးခေါ်ဆောင်သွားပါတယ်။

ဖမ်းဆီးခံထားရတဲ့ ဆရာဝန်တွေဟာ  CDM လှုပ်ရှားမှုမှာ ပါဝင်ထားကြသူတွေဖြစ်တယ်ဆိုပြီး  အကြမ်းဖက်စစ်တပ်နဲ့ရဲက မနေ့ည သန်းခေါင်ကျော် ည ၁ နာရီလောက်မှာ နေအိမ်တွေမှာ လိုက်လံဖမ်းဆီးခဲ့တာဖြစ်တယ်လို့ မိသားစုဝင်တွေကပြောပါတယ်။

" ဆရာက ညဘက် အိမ်မှာနေတာ အောက်က ခေါ်သံကြားလို့ တံခါးဖွင့်ပေးမိတာ စစ်ကားတွေနဲ့ စစ်သားတွေရောက်လာပြီ ခေါ်သွားတာ''လို့ပြောပါတယ်။

ဖမ်းဆီးခံလိုက်ရတဲ့ ဆရာဝန် ၄ ဦးကတော့  ဒေါက်တာ နိုင်ထူး၊ ဒေါက်တာ ဝေယံဦး၊ ဒေါက်တာ ဆုလာဘ်နွယ်နဲ့ ဒေါက်တာ ထက်ပိုင်ဖြိုးတို့ ဖြစ်ကြပါတယ်။

တစ်ညတည်းမှာပဲ ဆရာဝန် ၄ ဦးကို အကြမ်းဖက်စစ်တပ်နဲ့ရဲက ဖမ်းဆီးသွားတဲ့အပြင် ဂရုဏာလူမှုရေးအသင်းရဲ့ စေတနာ့ဝန်ထမ်း ကိုသန်းထွဋ်ဦးကိုလည်း ဖမ်းဆီးခဲ့တာပါ။

ဖမ်းဆီးခံရတဲ့  ဆရာဝန် ၄ ဦးနဲ့ စေတနာဝန်ထမ်း ၁ ဦးကို မအူပင်မြို့မရဲစခန်းမှာ ပုဒ်မ ၅၀၅ နဲ့အမှုဖွင့်ဖို့ ထိန်းသိမ်းထားတယ်လို့ သိရပါတယ်။

3 weeks Ago

March 17, 2021

ပိုးထိလူနာပို့ စေတနာ့ဝန်ထမ်း ၂ ဦးကို ညမထွက်ရအမိန့်ချိုးဖျက်မှုဖြင့် ထောင်ဒဏ် ၁ လ အမိန့်ချ

ပိုးထိလူနာ လာပို့တဲ့ ကျိုက်ခမီမြို့က စေတနာ့ဝန်ထမ်း ၂ ဦးကို ညမထွက်ရအမိန့် ဖောက်ဖျက်တယ်ဆိုပြီး အကြမ်းဖက်စစ်အုပ်စုရဲ့ သံဖြူဇရပ်မြို့နယ် တရားရုံးက ထောင်ဒဏ် ၁ လ အမိန့်ချမှတ်လိုက်ပါတယ်။

ကျိုက်ခမီမြို့ရှိ ဟိတကာရီ လူငယ်များနာရေးကူညီမှုအသင်းရဲ့ စေတနာ့ဝန်ထမ်းတွေ ဖြစ်တဲ့ ကိုတရုတ်နဲ့ ကိုအောင်လင်းထက်တို့ကို မတ်လ ၁၆ ရက်နေ့မှာ ထောင်ဒဏ် ၁ လ အမိန့်ချမှတ်ခဲ့တာပါ။

စေတနာ့ဝန်ထမ်း အမျိုးသား ၂ ဦးဟာ မတ် ၁၀ ရက်နေ့ ညပိုင်းမှာ ကျိုက်ခမီမြို့က ပိုးထိလူနာကို မော်လမြိုင် ကုတင် ၃၀၀ စစ်ဆေးရုံကို ပို့ဆောင်ပေးခဲ့ကြပါတယ်။

လူနာပို့ဆောင်ပြီးအပြန် ကျိုက်ခမီမြို့အနားအရောက်မှာ လူနာတင်ယာဉ်ဆီဖြည့်နေစဉ်  ည ၈ နာရီ ကျော်သွားလို့ဆိုပြီး စစ်တပ်က လာရောက် ဖမ်းဆီးသွားပြီးနောက် ထောင်ဒဏ် အမိန့်ချ မှတ်ခဲ့တာပါ။

လူနာ အသက်ကယ်တင်‌ပေးနေတဲ့ လူမှုကယ်ဆယ်ရေးသမားတွေကို ထောင်ဒဏ် အမိန့်ချအရေးယူတာဟာ လုံးဝမဖြစ်သင့်ဘူးလို့ မွန်ပြည်နယ် လူမှုကယ်ဆယ်ရေးအဖွဲ့ တာဝန်ရှိသူက DVB ကို ပြောပါတယ်။

မွန်ပြည်နယ်မှာတော့ အကြမ်းဖက်စစ်အုပ်စုက ညမထွက်ရအမိန့်ထုတ်ပြန်ပြီးနောက် လူမှုကယ်ဆယ်ရေးအဖွဲ့ အများစု ညပိုင်း အရေးပေါ်ကူညီမှုတွေ ရပ်နားလာပါတယ်။

2 months Ago
More News
Up