စိုင်းစိုင်း

December 10, 2020

ဖို့ဘ်စ်မဂ္ဂဇင်း၏ Asia’s Digital Stars ၁၀၀ စာရင်းတွင် စိုင်းစိုင်းနှင့် ဝတ်မှုန်ရွှေရည် ပါဝင်

နာမည်ကြီး မဂ္ဂဇင်းတစောင်ဖြစ်တဲ့ ဖို့ဘ်စ်မဂ္ဂဇင်းက  ရွေးချယ်တဲ့ Asia’s Digital Stars အယောက် ၁၀၀ စာရင်းမှာ မြန်မာနိုင်ငံက အနုပညာရှင်တွေဖြစ်ကြတဲ့ စိုင်းစိုင်းခမ်းလှိုင်နဲ့ ဝတ်မှုန်ရွှေရည်တို့ ပါဝင်လာခဲ့ပါတယ်။ ဒီစာရင်းထဲမှာတော့ အင်တာနက်လူမှုကွန်ရက်ဆိုရှယ်မီဒီယာတွေပေါ်မှာ ပရိသတ် တွေကို အလွှမ်းမိုးနိုင်ဆုံး အာရှ-ပစိဖိတ်ဒေသတွင်းက အဆိုတော်တွေ၊ တေးဂီတအဖွဲ့ တွေ၊ ရုပ်သံနဲ့ ရုပ်ရှင်စတားတွေ၊ ထင်ရှားကျော်ကြားသူဦးရေ ၁၀၀ ကို ရွေးချယ်ဖော်ပြ ထားခဲ့တာ ဖြစ်ပါတယ်။ စိုင်းစိုင်းလို့ ချစ်စနိုးခေါ်ကြတဲ့ ပရိသတ်အချစ်တော် အဆိုတော် စိုင်းစိုင်းခမ်းလှိုင် ဟာ ၁၉၉၆ ခုနှစ်လောက်ကတည်းက အနုပညာလောကထဲကို မော်ဒယ်လ်ဘဝနဲ့ စတင် ဝင်ရောက်ခဲ့ပြီး ၂၀၀၀ ပြည့်နှစ်မှာ ပထမဆုံးထွက်ရှိခဲ့တဲ့  ‘ချောကလက်ရောင် ရေခဲအိပ် မက်’ တေးစီးရီးနဲ့ စတင် လူသိများလာခဲ့တာပါ။ အဲဒီနောက်မှာတော့ သူငယ်ချင်းများစွာ၊ ဖေဖော်ဝါရီမှတ်တမ်း၊ Sai Sai Live Show၊ စိုင်းစိုင်းဟုခေါ်သည်၊ Happy Sai Sai Birthday၊ အမြဲတမ်းဂေါ်လီ Ever Golli၊ ဒိတ်ဒိတ်ကြဲ စတဲ့ တကိုယ်တော် တေးအယ်လ်ဘမ်တွေအပြင် အတွဲသီချင်းခွေပေါင်း များစွာမှာလည်း သီဆိုအောင်မြင်ခဲ့သူပါ။ စက္ကူငှက်၊ ကံကိုဆွဲ၍ မှုန်းသီခြယ် မင်ရည်ကျဲ၏ မကျဲ၏ စတဲ့ ကိုယ်တိုင်ရေး ဝတ္ထုတွေလည်း ထွက်ရှိခဲ့ဖူးတဲ့ စိုင်းစိုင်းခမ်းလှိုင်ဟာ အာဒံရယ်၊ ဧဝရယ်၊ ဒဿရယ်၊ အေဒင်ရဲ့ ကချေသည်၊ ကြာတော့သည်လည်း မောင့်စကား စတဲ့ နာမည်ကြီး ရုပ်ရှင်ကားတွေမှာလည်း ပါဝင်သရုပ်ဆောင်ခဲ့ပြီး သိပ်မကြာခင်ကတော့ သူကိုယ်တိုင် ထုတ်လုပ်ခဲ့တဲ့ ပိတောက်ကတဲ့ဂီတ ရုပ်ရှင်ကားကိုလည်း ရုံတင်ပြသနိုင်ခဲ့တာပါ။ သူဟာ တခြားစီးပွားရေးတခုအနေနဲ့ နှုတ်ခမ်းနီမလေးတွေအကြိုက် Sai နှုတ်ခမ်းနီကိုလည်း ထုတ်လုပ်ခဲ့ကာ လက်ရှိအချိန်ထိ ပရိသတ်ရဲ့ အခိုင်အမာအားပေးမှု ကို ဆယ်စုနှစ်နဲ့ချီ ရရှိထားခဲ့သူတဦး ဖြစ်ပါတယ်။ သူ့ရဲ့ တနှစ်နဲ့တနှစ် မတူအောင် ကွဲပြားခြားနားတဲ့ တီထွင်ဆန်းသစ်မှုတွေနဲ့ ဖျော်ဖြေခဲ့တဲ့ မွေးနေ့ရှိုးတွေဟာလည်း အောင်မြင်ခဲ့ပါတယ်။ ပြီးခဲ့တဲ့ ဧပြီလတုန်းက အသက် ၄၁ နှစ် ပြည့်ခဲ့ပြီဖြစ်တဲ့ စိုင်းစိုင်းခမ်းလှိုင်ဟာ မွေးနေ့ အထိမ်းအမှတ် ဖျော်ဖြေပွဲကို လတ်တလော COVID-19 ကပ်ရောဂါကြောင့် အိပ်ခန်းထဲမှ ဖျော်ဖြေပွဲအသွင် “Sai Sai Birthday Show” in Bedroom လို့ အမည်နဲ့ ကျင်းပခဲ့တာ ဖြစ်ပြီး ရရှိတဲ့ အကျိုးအမြတ်တွေကို ကိုဗစ်-၁၉ ရောဂါကာကွယ်တိုက်ဖျက် ရေးလုပ်ငန်းတွေမှာ ပရိသတ်တွေနဲ့အတူ လှူဒါန်းခဲ့တာ ဖြစ်ပါတယ်။ ခုလတ်တလော Asia’s Digital Stars အယောက် ၁၀၀ စာရင်းမှာ ရွေးချယ်ခံရတာ နဲ့ ပတ်သက်ပြီးတော့ စိုင်းစိုင်းဟာ ဖေ့စ်ဘွတ်ခ်လူမှုကွန်ရက်စာမျက်နှာပေါ်မှာ ပရိသတ် (Followers) ၉ သန်းကျေိာ်နဲ့ အများဆုံးအနုပညာရှင်ဖြစ်ကာ ၂၀၂၀ ပြည့်နှစ်မှာ ယူအေ ဘီဘဏ်နဲ့ ပူးပေါင်းပြီး SaiSai Pay အက်ပလီကေးရှင်းကို မိတ်ဆက်နိုင်ခဲ့တာတွေ၊ နောက်ပြီး ကိုဗစ်-၁၉ ကပ်ဘေးကာလ ကာကွယ်ကုသရေးလုပ်ငန်းစဉ်တွေမှာလည်း အနု ပညာ နဲ့ တဖက်တလမ်းက ကူညီခဲ့တယ်လို့ ဖော်ပြထားပါတယ်။ ကစ်လို့ ပရိသတ်တွေက သိကြတဲ့ အသက် ၃၂ နှစ်အရွယ် သရုပ်ဆောင်မင်းသမီး ဝတ်မှုန်ရွှေရည်ကတော့ သရုပ်ဆောင်မော်ဒယ်တယောက်အနေနဲ့ အနုပညာလမ်း ကြောင်းပေါ်မှာ ဆယ်စုနှစ်ချီ လျှောက်လှမ်းလာခဲ့ပြီးဖြစ်ကာ လက်ရှိမှာတော့ နာမည်ကြီး ထိပ် တန်းသရုပ်ဆောင် မင်းသမီးတလက်အနေနဲ့ ထင်ရှားပါတယ်။ ခုချိန်မှာတော့ ဝတ်မှုန်ရွှေရည်ဟာ ‘နင်စေရင်’၊ ‘နှလုံးသားဖြင့် ပြုလုပ်သည်’ စ တဲ့ ရုပ်ရှင်ကားတွေနဲ့ မြန်မာ့ရုပ်ရှင် အကယ်ဒမီဆုတွေ ဆွတ်ခူးရရှိခဲ့ပြီဖြစ်ကာ ပရဟိတ လုပ်ငန်းတွေမှာလည်း တက်တက်ကြွကြွ ပါဝင်လေ့ရှိသူတဦး ဖြစ်ပါတယ်။ ပြီးခဲ့တဲ့ ဧပြီလတုန်းကလည်း ကိုဗစ်-၁၉ ကပ်ဘေးကာလတွင်း အိမ်မှာ မနေသာ ဘဲ အပြင်ထွက် ဝမ်းရေးအတွက် လှုပ်ရှားနေကြရတဲ့ မရှိနွမ်းပါးသူတွေကို လိုအပ်မယ့် ပစ္စည်းတွေနဲ့ အလှူဒါန ပြုလုပ်တာတွေ၊ အဲဒီနောက် ကိုဗစ်-၁၉ ရောဂါ တိုက်ဖျက်ရေးမှာ အဓိက လုပ်ဆောင်နေကြတဲ့ ဖောင်ကြီးဆေးရုံကျန်းမာရေး ဝန်ထမ်းတွေအတွက် ကျန်းမာရေး အာမခံအလှူကို ပရိ သတ်တွေနဲ့အတူ ပြုလုပ်ခဲ့ပါသေးတယ်။ တခြားနိုင်ငံတွေနဲ့ ချစ်ကြည်ရေးရုပ်ရှင်ကားတွေအနေနဲ့ ဝတ်မှုန်ရွှေရည်ပါဝင်ခဲ့တဲ့ ထိုင်း မြန်မာချစ်ကြည်ရေးရုပ်ရှင်-“ဘန်ကောက်မှ မန္တလေးသို့”၊ ဂျပန်-မြန်မာချစ်ကြည် ရေးရုပ်ရှင်- “ဇာတိမြေ”၊ ကိုရီးယားမြန်မာချစ်ကြည်ရေးရုပ်ရှင် -“တိမ်တွေပေါ်ကပန်း”စတဲ့ ရုပ်ရှင်ကားတွေဟာလည်း ထင်ရှားတဲ့ ရုပ်ရှင်ကားတွေ ဖြစ်ပါတယ်။ အခုနှစ်ရဲ့ မြန်မာ့ရုပ်ရှင်အကယ်ဒမီထူးချွန်ဆုပေးပွဲမှာလည်း ဝတ်မှုန်ရွှေရည်ဟာ ပြီးခဲ့တဲ့နှစ်က ရုံတင်ပြသခဲ့တဲ့ “လိပ်ပြာစံအိမ်”ရုပ်ရှင်ကားနဲ့ ဆန်ကာတင်စာရင်းမှာ ပါ ဝင် နေခဲ့ပါတယ်။ အဲဒီရုပ်ရှင်ကိုတော့ From Bangkok to Mandalay ရုပ်ရှင်ကားကို ရိုက်ကူးခဲ့တဲ့ ထိုင်းရုပ်ရှင်ဒါရိုက်တာ ChaartChai Ketnust က ရိုက်ကူးပုံဖော်ပေးထားတာ ဖြစ်ကာ  ဝတ်မှုန်ရွှေရည်နဲ့အတူ ပရိသတ်ကြိုက် သရုပ်ဆောင် မင်းသားတွေ ဖြစ်ကြတဲ့ နိုင်းနိုင်း၊ ဒေါင်း၊ ကလေးသရုပ်ဆောင် ပြည့်ပြည့်တို့က အဓိက ဇာတ်ကောင်တွေနေရာမှာ ပါဝင် ထားခဲ့ကြတာ ဖြစ်ပါတယ်။ ခုတခါ Asia’s Digital Stars အယောက် ၁၀၀ စာရင်းမှာ ရွေးချယ်ခံရတာ နဲ့ ပတ် သက်ပြီးတော့ ဝတ်မှုန်ရွှေရည်ဟာ ရုံတင်ဝင်ငွေစံချိန်တင် ရုပ်ရှင်ကားတကားဖြစ်တဲ့ “လိပ်ပြာစံအိမ်”ရုပ်ရှင်ကားထဲမှာ ပါဝင်သရုပ်ဆောင်ခဲ့ပြီး အဲဒီကားနဲ့ ၂၀၁၉ ခုနှစ် Asian Academy Creative Awards ဆန်ကာတင်စာရင်းမှာ ပါဝင်ခဲ့ကြောင်းနဲ့ ဖေ့စ်ဘွတ်ခ်လူမှု ကွန်ရက်စာမျက်နှာပေါ်မှာ ပရိသတ် (Followers) ၆ သန်းကျေိာ်နဲ့ အများဆုံးအနုပညာ ရှင်ဖြစ်တယ်လို့ ဖော်ပြထားပါတယ်။ ဒီစာရင်းထဲမှာတော့ မြန်မာနိုင်ငံက စိုင်းစိုင်းခမ်းလှိုင်၊ ဝတ်မှုန်ရွှေရည်တို့နဲ့အတူ အာရှနဲ့ ပစိဖိတ်ဒေသတွင်း ကျော်ကြားသူတွေဖြစ်ကြတဲ့ ထိပ်တန်းအမျိုးသမီးကေပေါ့ပ် အဖွဲ့- Blackpink ၊ ဝါရင့်အိန္ဒိယသရုပ်ဆောင်မင်းသားကြီး အမီတာဘချန်း၊ ပီးမတ်ခ်မင်း သားလို့ မြန်မာပရိသတ်တွေ ကြား ထင်ရှားတဲ့ ထိုင်းသရုပ်ဆောင်မင်းသား မာရီယို၊ ဩစ တေးလျ နာမည်ကြီးဟာသ သရုပ်ဆောင်မင်းသမီး ရီဘဲလ်ဝီလ်ဆင်၊ ထိုင်ဝမ်ပေါ့ပ်စတား အဆိုတော် ဂျေချောင်၊ X-men ရုပ်ရှင် စီးရီးစ်တွေနဲ့ နာမည်ကြီးတဲ့ သရုပ်ဆောင်မင်းသား ဟူးချ်ဂျက်ခ်မန်း၊ ဘောလိဝုဒ်စတားသရုပ် ဆောင်မင်းသမီး အလီယာဘတ်စတဲ့ နာမည်ကျော်တွေလည်း ရွေးချယ်ဖော်ပြခံခဲ့ရတာ ဖြစ်ပါတယ်။
7 months Ago

April 20, 2020

စိုင်းစိုင်း၊ မျိုးကျော့မြိုင်၊ ပန်းရောင်ခြယ်နှင့် အဆိုတော်များသီဆိုသည့် “ကမ္ဘာမြေသီချင်း” (ရုပ်သံ)

“ဒဏ်ရာတွေသာ အထပ်ထပ်နဲ့… ငါ့နှလုံးသားထဲမယ်… အမာရွတ်ဟောင်းများနဲ့ သာ ဆို့နင့်ကြေကွဲ… စိတ်ဓာတ်မကျပါနဲ့… အိုး… ငါ့ရဲ့ လက်ကိုတွဲ… အိပ်မက်ဆိုးက နိုး ရင်… မနက်ခင်းအလင်းတွေ ရှိမယ်” ဒါကတော့ လတ်တလော အသစ်ထွက်ရှိလာတဲ့ စိတ်ခွန်အားပေးသီချင်းတပုဒ်ဖြစ်ပြီး အွန်လိုင်းပရိသတ်တွေကြားမှာတော့ ရေပန်းစားနေတဲ့ သီချင်းတပုဒ် ဖြစ်ပါတယ်။ “ကမ္ဘာမြေသီချင်း”လို့ အမည်ပေးထားတဲ့ ဒီသီချင်းကိုတော့ အဆိုတော် စိုင်းစိုင်း ခမ်းလှိုင်က ရေးစပ်ပေးထားခဲ့တာဖြစ်ပြီး သူနဲ့အတူ တခြားနာမည်ကြီး အဆိုတော်တွေ ဖြစ်ကြတဲ့ မျိုးကျော့မြိုင်၊ ဟန်ထွန်း၊ အဲလက်စ်၊ R ဇာနည်၊ ဖြိုးကြီး၊ ကိုအောင်၊ သအို၊ ဘန် နီဖြိုး၊ နေဝင်း၊ ဖြိုးလေး၊ G-Fatt၊ ဖြိုးပြည့်စုံ၊ အောင်ထက်၊ မောင်မောင်ပြည့်စုံ၊ ပန်းရောင် ခြယ်၊ Mary၊ ဂျူဝယ်လ်၊ Gabriel Phway၊ အမရာဘုဏ်းတို့က အားဖြည့်သီဆိုပေးထားကြတာ ဖြစ်ပါတယ်။ “ဘာမှ အားမငယ်နဲ့… အိုး… ရှေ့ဆက်လိုက်ပါ ကလေးရယ်… မင်းရဲ့ မျက်ရည် သုတ်လိုက်… မျှော်လင့်ချက်တွေ ရှိတယ်… အနာဂတ်နေ့တွေအတွက်… နင်… အားမ လျှော့လိုက်ပါနဲ့… နင့်ရဲ့ ဒုက္ခဟာ… ငါ့ရဲ့ ဒုက္ခပဲ” လတ်တလောကာလဟာ ကမ္ဘာအနှံ့ ကပ်ရောဂါတခုလိုဖြစ်လာနေတဲ့ COVID-19 ဗိုင်းရပ်စ်အန္တရာယ်ကြောင့် ပြည်သူတွေအားလုံးဟာ လူစုလူဝေးတွေနဲ့ ပွဲလမ်းသဘင် အခမ်းအနားတွေကို ရှောင်ကြဉ်ကြရတဲ့ကာလဖြစ်နေတာမို့ အနုပညာရှင်တွေက တတ်စွမ်းသမျှ အနုပညာအားနဲ့ စိတ်ခွန်အားပေးမှုတွေကို အွန်လိုင်းပလက်ဖောင်းတွေ အသီးသီးကနေ မျှဝေနေကြတာပါ။ အနုပညာရှင် အသီးသီးရဲ့ သီဆိုမှုပုံရိပ်တွေပါဝင်တဲ့ ဒီသီချင်းရုပ်သံကိုတော့ လူ ငယ်ဒါရိုက်တာ အောင်မြတ်က ရိုက်ကူးပုံဖော်ပေးထားခဲ့တာ ဖြစ်ပါတယ်။ “ဒီကမ္ဘာမြေရဲ့ သီချင်းသံများ ရှိမယ်… ဒီကမ္ဘာမြေအတွက် မေတ္တာတရားရှိမယ်… ဒီကမ္ဘာမြေကို လှပဖို့… လက်တွဲလိုက်ကြမယ်… ငါလေ အားတင်းထားတယ်… မင်း… အားတင်းထား… သူငယ်ချင်းရယ်” ဒီသီချင်းရုပ်သံကို စိုင်းစိုင်းခမ်းလှိုင်က သူ့ရဲ့ ဖေ့စ်ဘွတ်ခ်အင်တာနက်လူမှုကွန်ရက် ပေါ်မှတဆင့် ခုလိုရေးသားပြီး မျှဝေထားခဲ့တာ ဖြစ်ပြီး နာရီပိုင်းအတွင်း ဝင်ရောက်ကြည့် ရှုကြတဲ့ အကြိမ်ရေ ၁ သန်းကျော် သွားခဲ့ပြီ ဖြစ်ပါတယ်။ “ဒီသီချင်းလေးက အခက်အခဲနဲ့ ကြုံဆုံနေရတဲ့ လူသားတိုင်းအတွက် ရည်ရွယ်ပါတယ်… သီချင်းထဲမှာ ပါဝင်တဲ့သူတွေ အကုန်လုံးက ချစ်ခြင်းမေတ္တာနဲ့ ပါဝင်ထားကြတာပါ… ကျနော်တို့ ဒီသီချင်းကို Music Platform အကုန်လုံးမှာ နားဆင်နိုင်မှာပါ… TV Channel တွေအကုန်လုံးကိုလည်း ထုတ်လွှင့်ခွင့်တောင်းပါမယ်… အဆိုတော် အများကြီး ကို video chat နဲ့ အသံပြာအောင် Key ချိန်ခဲ့ရတာတော့ တကယ့်အမှတ်တရပါပဲဗျာ… ဒီသီချင်းမှာပါဝင်တဲ့လူတိုင်းကို အထူးအရမ်း ကျေးဇူးတင်ပါတယ်… ကျနော်တို့ အား တင်းထားကြမယ်… ကျန်းမာကြပါစေ” မြန်မာနိုင်ငံမှာတော့ COVID-19 ဗိုင်းရပ်စ်ကူးစက်ခံရသူ ၂ ယောက်ကို ပြီးခဲ့တဲ့ မတ်လ ၂၃ ရက်နေ့မှာ ပထမဆုံးအတည်ပြုနိုင်ခဲ့ပြီးနောက် လက်ရှိအချိန်ထိ ကူးစက်ခံရသူ စုစုပေါင်း ၁၁၁ ယောက် ရှိခဲ့ပြီဖြစ်ကာ ၅ ယောက် သေဆုံးခဲ့ပြီ ဖြစ်ပါတယ်။
1 year Ago
Up