စိတ်ပျက်

December 6, 2020

ဘူးလုပ်လှောင်ပြောင်ခဲ့သည့် မီဝေါလ်ပရိသတ်လုပ်ရပ်အပေါ် စိတ်ပျက်မိဟု ရွန်းနီပြော

ဒီဇင်ဘာ ၅ ရက်နေ ချန်ပီယံရှစ်ပွဲစဉ်အစ ကစားသမားတွေ ဒူးထောက်နေချိန်မှာ ဘူးလုပ်လှောင်ပြောင်ခဲ့တဲ့ မီဝေါလ်ပရိတ်သတ်တွေရဲ့လုပ်ရပ်ဟာ စိတ်ပျက်ဖွယ်ကောင်းတယ်လို့ ဒါဘီနည်းပြ ဝိန်းရွန်းနီက ပြောပါတယ်။  မီဝေါလ်အသင်းနဲ့ ဒါဘီအသင်းတို့ရဲ့ပွဲစဉ်မှာ မီဝေါအသင်းဟာ ဒုတိယမြောက်တစ်နိုင်ငံလုံး lockdown ပြီးနောက်ပိုင်း ပထမဆုံးအဖြစ် ပရိသတ် ၂၀၀၀ လောက်ကို ကွင်းထဲဝင်ကြည့်ခွင့်ပြုခဲ့ပါတယ်။ ဒါပေမဲ့ ကွင်းထဲကို ပရိသတ်တွေပြန်လည်ဝင်ရောက်မှုဟာ ပွဲမတိုင်ခင် လှောင်ပြောင်မှုဖြစ်ရပ်ကြောင့် ရုပ်ဆိုးအကျည်းတန်ခဲ့ရပါတယ်။ ဒီလိုမျိုးကြားရတာဟာ လူပေါင်းများစွာအတွက် စိတ်ပျက်ဖွယ်ရာကိစ္စပါ လို့ ရွန်းနီက ပြောပါတယ်။  “ကျနော့်အသင်းရဲ့ လုပ်ဆောင်မှုအတွက်တော့ ဂုဏ်ယူမိပါတယ်။ မိနစ် ၉၀ အတွင်းမှာ သူတို့ဟာ ဒီကိစ္စကို မဖြစ်ခဲ့သလိုမျိုး ကစားသွားနိုင်ခဲ့ပေမဲ့ သူတို့စိတ်ထဲမှာ ဒီအကြောင်းကို တွေးနေမှာတော့ သေချာပါတယ်” လို့ ရွန်းနီကပြောပါတယ်။  ဒီပွဲမှာ ရွန်းနီရဲ့ ဒါဘီကောင်တီအသင်းဟာ မီဝေါလ်အသင်းကို ၁ ဂိုး ဂိုးမရှိနဲ့ အနိုင်ရရှိခဲ့တာဖြစ်ပါတယ်။ ဘူးလုပ်လှောင်ပြောင်ခဲ့ခြင်းနဲ့ပတ်သတ်ပြီး အက်ဖ်အေနဲ့ ခွဲခြားဆက်ဆံမှုတိုက်ဖြတ်ရေးအဖွဲ့ Kick It Out တို့ကလည်း ရှုတ်ချခဲ့ကာ ဒါဘီတိုက်စစ်မှူး ကော်လင်းကာဇင် ရတ်ချက်ကတော့ ဒီဖြစ်ရပ်ဟာ လုံးဝကို ကျက်သရေမရှိတဲ့လုပ်ရပ်လို့ပြောပါတယ်။  ဘောလုံးပွဲတွေ ပြန်လည်စတင်တဲ့ ဇွန်လကစလို့ ပရီးမီးယားလိဂ်နဲ့ အီး အက်ဖ်အယ်လ်ပွဲစဉ်တွေက ကစားသမားတွေ၊ တာဝန်ရှိသူတွေနဲ့ ဝန်ထမ်းတွေဟာ ပွဲမစတင်မီ ဒူးထောက်ငြိမ်သက်မှု လုပ်ဆောင်ခဲ့ကြပါတယ်။  အသားအရောင်တန်းတူညီမျှရေးဆောင်ရွက်ချက်တစ်ခုဖြစ်တဲ့ Black Lives Matter လှုပ်ရှားမှုကို ထောက်ခံတဲ့ သဘောထားကို ပြသတာဖြစ်ပါတယ်။ မန်စီတီးနဲ့ အင်္ဂလန်လက်ရွေးစင်နောက်ခံလူ မီကာရတ်ချက်ကလည်း ဒီလုပ်ရပ်ကို ပြစ်တင်ရှုတ်ချခဲ့ပါတယ်။ လူမျိုးရေးခွဲခြားမှုဆန့်ကျင်ခြင်းကို ရှုတ်ချတာဟာ လူမျိုးရေးခွဲခြားမှုကို ထောက်ခံအားပေးတာနဲ့အတူတူပဲလို့ ကိုဗင်ထရီနဲ့ အက်စတွန်ဗီလာတိုက်စစ်မှူးဟောင်း ဒီယွန် ဒဗ္ဗလင်ကပြောပါတယ်။  ပြီးခဲ့တဲ့သောကြာနေ့မှာမှ မီဝေါလ်ရဲ့ပထမအသင်းသားတွေဟာ ခွဲခြားဆက်ဆံမှုပုံစံတိုင်းကို အားကစားပွဲတွေကနေ ဖယ်ရှားတဲ့လှုပ်ရှားမှုများကို ထောက်ခံကြောင်း ကြေညာချက်တစ်စောင်ထုတ်ပြန်ခဲ့ပါတယ်။  ဒါပေမယ့် စနေနေ့ပွဲစဉ်မှာ ပရိသတ်တွေနဲ့ အော်ဟစ်လှောင်ပြောင်မှုအတွက် စိတ်ပျက်မိတယ်လို့ မီဝေါလ်အသင်းနည်းပြ ဂါရီရိုးဝတ်က ပြောပါတယ်။
5 months Ago

November 9, 2020

လီဗာပူးအသင်းနှင့် သရေကျခဲ့သည့် ရလဒ်အပေါ် မန်စီတီးတိုက်စစ်မှူး စိတ်ပျက်

လီဗာပူ;အသင်းနဲ့ တဘက် ၁ ဂိုး စီသရေကျခဲ့တဲ့ ရလဒ်အပေါ် မန်စီတီး တိုက်စစ်မှူး ဂါဘရီရယ်ဂျဆုက စိတ်ပျက်လက်ပျက် ဖြစ်နေပါတယ်။ တနင်္ဂနွေနေ့ပွဲမှာ လီဗာပူ တိုက်စစ်မှူး ဆာလက်က ဧည့်သည်အသင်းအတွက် ဦးဆောင်ဂိုးကို ပွဲချိန် ၁၃ မိနစ်မှာ ပင်နယ်တီကနေတဆင့် သွင်းယူခဲ့ပြီး ဂျဆုက မိနစ် ၃၀ ဝန်းကျင်မှာ ချေပဂိုး ပြန်လည်သွင်းယူပေးခဲ့ပါတယ်။ အသင်းအတွက် အဖိုးတန် ချေပဂိုး သွင်းယူပေးနိုင်ခဲ့ပေမဲ့ အသက် ၂၃ နှစ်အရွယ် ဘရာဇီးသားက သူတို့အသင်းအနေနဲ့ ဒီထက်ပိုကောင်းခဲ့သင့်တယ်လို့ ပြောပါတယ်။ “ဒီရလဒ်က ကျနော်တို့အတွက် မကောင်းပါဘူး။ ဒါဟာ ခက်ခဲတဲ့ပွဲတပွဲဆိုတာ သိပေမဲ့ ကျနော်တို့ အိမ်ကွင်းမှာ ဖြစ်တာကြောင့် အနိုင်ရလဒ် ရရှိခဲ့သင့်ပါတယ်။ သူတို့ဟာ ချန်ပီယံအသင်းပါ။ ဒါပေမဲ့ ကျနော်တို့ အမှတ်မလျော့သင့်ခဲ့ပါဘူး။ ဒါဟာ ထိပ်တန်းပွဲစဉ်တခုပါ။ သူတို့ဟာ တကယ့်ကို ဖိဖိစီးစီး ကစားသွားခဲ့ပြီး ကစားသမားကောင်းတွေ အများကြီးလည်း ပိုင်ဆိုင်ထားပါတယ်။ ကျနော်တို့ဟာ ဒီပွဲကို အနိုင်ရဖို့အတွက် အခွင့်အရေးကောင်းတစ်ခုလည်း ရခဲ့ပါတယ်။ နှစ်သင်းစလုံးက အနိုင်ရလဒ်ကို ဦးတည်ကစားသွားခဲ့တာ ဖြစ်ပါတယ်။ တခါတရံမှာ ကျနော်တို့ ဘောလုံးကို ပိုမိုထိန်းချုပ်ထားဖို့ လိုအပ်ခဲ့ပါတယ်။ ကျနော်တို့ ဒီလို ကစားပုံအတိုင်း ဆက်ထိန်းထားပြီး အခွင့်အရေးတွေကို ဂိုးအဖြစ် ပြောင်းလဲဖို့ ကြိုးစားရပါမယ်။ အိမ်ကွင်းမှာ ကစားခဲ့ရတဲ့အတွက် ကျနော်တို့ အနိုင်ရရှိခဲ့သင့်ပါတယ်။ ဒီရလဒ်ဟာ ကျနော်တို့အတွက် မကောင်းခဲ့ပေမဲ့ လီဗာပူးအသင်းအတွက်တော့ ကောင်းမွန်တဲ့ရလဒ် ဖြစ်နိုင်ပါတယ်။” လီဗာပူးအသင်းနဲ့ပွဲမှာ ဂျဆုဟာ လီဗာပူး ခံစစ်မှူး အာနိုးလ်ကို လှလှပပ လှည့်စားကာ အသင်းအတွက် ချေပဂိုးကို သွင်းယူပေးခဲ့တာ ဖြစ်ပါတယ်။  ဒီဂိုးကို အသင်းခေါင်းဆောင် ဒီဘရိုင်းက ဖန်တီးပေးခဲ့တာဖြစ်ပေမဲ့ ဒီဘရိုင်းဟာ ပွဲရလဒ်ကို ပြောင်းလဲပေးနိုင်ခဲ့တဲ့ ပင်နယ်တီအခွင့်အရေးကိုတော့ ဖြုန်းတီးခဲ့ပါတယ်။ ဂျဆုဟာ ဒဏ်ရာကြောင့် ကာလအတန်ကြာ အနားယူခဲ့ရသူဖြစ်ပြီး လီဗာပူးအသင်းနဲ့ပွဲဟာ ဒီရာသီအတွင်း သူ့အတွက် ဒုတိယမြောက်ပွဲထွက်မှုလည်း ဖြစ်ပါတယ်။
6 months Ago
More News
Up