စမ်းချောင်း

October 16, 2021

ကြည့်မြင်တိုင် စည်ပင်ရုံးအနီး စစ်တပ်က အရပ်သား ၂ ဦးကို ပစ်ခတ်ဖမ်းဆီး၊ စမ်းချောင်းတွင် ဗုံးကွဲ

ရန်ကုန်၊ ကြည့်မြင်တိုင်မြို့နယ်၊ စည်ပင်ရုံးအနီးရှိ လုံခြုံရေးချထားတဲ့ အတားအဆီးတွေကို  ဝင်တိုက်မိတဲ့ အိမ်စီးကားတစီးကို  စစ်ကောင်စီလက်နက်ကိုင် အစောင့်တွေက သေနတ်နဲ့ပစ်ခတ်ကာ ကားပေါ်ပါသူနှစ်ဦးကို ဖမ်းဆီးလိုက်တယ်လို့ အဲဒီပတ်ဝန်းကျင်နေထိုင်သူတွေက ပြောပါတယ်။

အောက်တိုဘာ ၁၅ ရက် မနေ့ည ၉ နာရီလောက်က Crown အမျိုးအစားယာဥ်တစ်စီးက အတားအဆီးတွေကို  ဝင်တိုက်မိတာကြောင့် လုံခြုံရေးတွေက သေနတ်နဲ့ ပစ်ခတ်တားဆီးခဲ့တာလို့ ဆိုပါတယ်။

အဲဒီကားပေါ်မှာ လူနှစ်ဦးပါပြီး ယာဥ်မောင်းလို့ ယူဆရသူက ခေါင်းကွဲသွားတယ်လို့ မျက်မြင်တွေ့ရှိသူတစ်ဦးက ပြောပါတယ်။

“ကားက ဘားကနေ ပြန်လာတာ။ မူးပြီးတိုက်တာ။ လုံခြုံရေးတွေက ဖြစ်ဖြစ်ချင်း ပစ်တော့ ပတ်ဝန်းကျင်ကသူတွေပါ အထိတ်တလန့်ဖြစ်ကုန်ကြတယ်” လို့ ပြောပါတယ်။

အဲဒီလိုဖြစ်ပြီး မကြာခင် စစ်သားနဲ့ ရဲတွေ ထပ်မံရောက်ရှိလာပြီး စစ်ဆေးနေတာ တွေ့ရတယ်လို့လည်း ဆိုပါတယ်။

ကြည့်မြင်တိုင်မြို့နယ်က ဌာနဆိုင်ရာရုံးတွေမှာ မကြာခဏ ဗုံးပေါက်လေ့ရှိတာကြောင့် စစ်ကောင်စီတပ်တွေက လုံခြုံရေးချ စောင့်ကြည့်မှုတွေ အချိန်ပြည့်လုပ်နေတယ်လို့လည်း ဒေသခံတွေက ပြောပါတယ်။

အောက်တိုဘာ ၁၆ ရက် ဒီနေ့ မွန်းတည့်  ၁၂ နာရီလောက်ကလည်း  စမ်းချောင်း မုန့်တောင်ရုံးနားမှာ ဗုံးပေါက်ခဲ့ပါတယ်။

စစ်ကောင်စီတပ်ဖွဲ့ဝင်တွေရဲ့ကားတွေ၊ စစ်ကောင်စီသတင်းပေး ဒလန်တွေနဲ့ ရပ်ကွက်အုပ်ချုပ်ရေးမှူးတွေကို သုတ်သင်ရှင်းလင်းနေတဲ့အတွက် ပြည်သူတွေအနေနဲ့ သူတို့နဲ့ ကင်းရှင်းစွာနေထိုင်ပေးဖို့ မြေအောက်တော်လှန်ရေးသမားတွေက  တောင်းဆိုထားပါတယ်။ 

ပြည်သူတွေကို ထိခိုက်မှာစိုးရိမ်တာတွေကြောင့် တချို့ကိစ္စတွေ မလုပ်ဆောင်ဖြစ်တာတွေ များစွာရှိတယ်လို့လည်း တော်လှန်ရေးလူငယ်တွေက ပြောပါတယ်။

3 months Ago

September 25, 2021

အင်းစိန်အကျဉ်းထောင်အနီးတဝိုက် ဗုံးများဆက်တိုက်ပေါက်ကွဲ

ရန်ကုန်တိုင်း၊ အင်းစိန်မြို့နယ်၊ အင်းစိန်အကျဉ်းထောင်အနီးတဝိုက် ရွာမဘက်ခြမ်းမှာ စက်တင်ဘာ ၂၅ ရက် ဒီနေ့မနက်ပိုင်းက ဗုံး ၄ လုံး ပေါက်ကွဲခဲ့တယ်လို့ ဒေသခံတွေက  ပြောပါတယ်။

ဒီမနက် ၈ နာရီလောက်က ပထမဗုံးပေါက်ပြီးနောက် ၅ မိနစ်လောက်အကြာမှာ ဗုံး ၃ လုံး ဆက်တိုက်ပေါက်ကွဲခဲ့တာလို့ ဆိုပါတယ်။

အင်းစိန်ပေါက်တောဝဒေသခံတဦးက “အနောက်ဘက် ရွာမ၊ ရွာမ မင်းစေတီတဝိုက် ထောင်အနီးတဝိုက်ပေါ့။ မနက် ၇ နာရီ ၃၈ မိနစ်မှာ ပထမတလုံးပေါက်တယ်၊ နောက် ၅ မိနစ်လောက်ကျ ၃ လုံး ဆက်တိုက်ပေါက်တယ်။ ထိခိုက်ဒဏ်ရာရသူ ရှိမရှိတော့ မသိရဘူး။”လို့ ပြောပါတယ်။

ဗုံးကွဲတဲ့နေရာဟာ ဘုရင့်နောင်လမ်းမပေါ်နဲ့ အကျဉ်းဦးစီးဌာန ဝန်ထမ်းအိမ်ရာအနီးမှာဖြစ်ပြီး ဝန်ထမ်းတွေနဲ့ တခြားသူတွေ ထိခိုက်တဲ့ အခြေအနေကိုတော့ မသိရပါဘူး။

“ဘုရင့်နောင် လမ်းပေါ်မှာ ပေါက်တယ်။ ဝန်ထမ်းအိမ်ရာနားမှာ မပေါက်သေးတဲ့ဗုံးကို စစ်တပ်က သွားရှင်းတော့ ဗုံး ၄ လုံးပေါက်တယ်။ လူတွေထိ မထိကတော့ မသိရဘူး” လို့ အင်းစိန်ဒေသခံ တယောက်က ပြောပါတယ်။

ပေါက်ကွဲမှုဖြစ်ပြီးနောက် စစ်ကောင်စီတပ်တွေက အင်းစိန် ပေါက်တောဝကနေ ရွာမဘက်တကြောလုံးကို လမ်းပိတ်ဆို့လိုက်ပါတယ်။

“မနက် ၈ နာရီကျော်လောက်က စပိတ်တာပဲ။ ပေါက်တောဝ မီးပွိုင့်ကနေ ရွာမဘက်အထိ။  စစ်ဆေးတာတွေ ဘာတွေတော့ မရှိဘူး၊ အကုန်လုံး ရွာမဘက်တက်တဲ့ ကားတွေအကအစ သွားခွင့်မပြုတော့တာ။ ၁၀ နာရီလောက်မှ ပြန်ဖွင့်တယ်။”

ဗုံးဖောက်ခွဲမှုကို ဘယ်အဖွဲ့က လုပ်တယ်ဆိုတာနဲ့  ဖမ်းဆီးခံရတာ ရှိမရှိတော့ မသိရသေးဘဲ ဒီဗွီဘီက စုံစမ်းမေးမြန်းနေဆဲ ဖြစ်ပါတယ်။  အင်းစိန်ထောင်ရှေ့မှာ ပြီးခဲ့တဲ့ စက်တင်ဘာ ၂၁ ရက် ညကလည်း ဗုံး ၃ လုံး ပေါက်ခဲ့ပါသေးတယ်။ 

အလားတူ သာကေတမြို့နယ်  မြင်တော်သာလမ်းပေါ်က မီတာရုံးမှာလည်း ဒီနေ့ညနေ ၃ နာရီလောက်က ဗုံးပေါက်ကွဲမှု ဖြစ်ပွားခဲ့သလို ညနေ ၅ နာရီလောက်မှာလည်း ပေါက်ကွဲသံ ထပ်ကြားရတယ်လို့  ဒေသခံတဦးက ပြောပါတယ်။ ပေါက်ကွဲမှုတွေကြောင့် ထိခိုက်ဒဏ်ရာရမှု အခြေအနေကိုတော့ မသိရဘူးလို့ ဆိုပါတယ်။

ဒါ့အပြင် သာကေတအဝိုင်းထိပ်မှာလည်း စစ်ကောင်စီတပ်က ဆိုင်ကယ်တွေ တားဆီး စစ်ဆေးတာပြုလုပ်နေတယ်လို့ မြို့ခံက ပြောပါတယ်။

ရန်ကုန် စမ်းချောင်းမြို့နယ် မြေနီကုန်း ခုံးကျော်တံတားအနားမှ ဒီမနက် အစောပိုင်း ၂ နာရီလောက်က ပေါက်ကွဲမှုနဲ့ ပစ်ခတ်သံတွေကြားရတယ်လို့ ဒေသခံတဦးက ပြောပါတယ်။ လူငယ်တချို့ သေဆုံးတယ်လို့ သိရပေမဲ့ အသေးစိတ်ကိုတော့ မသိရသေးပါဘူး။

4 months Ago
More News
Up