စစ်အာဏာသိမ်းမှုဆန့်ကျင်ရေး

February 20, 2021

မသန်စွမ်းလူငယ်အား ရိုက်နှက်ခဲ့သည့် ရဲတပ်ဖွဲ့တာဝန်ရှိသူများကို အရေးယူပေးရန် တောင်းဆို

မန္တလေးမြို့ တံခွန်တိုင်အဝိုင်းမှာ ဖေဖော်ဝါရီ ၁၅ ရက်နေ့က စစ်အာဏာသိမ်းတာကို ကန့်ကွက်ဆန္ဒထုတ်ဖော်ခဲ့တဲ့ ဖြစ်စဉ်အတွင်း မသန်စွမ်းလူငယ်အား အကြမ်းဖက် ရိုက်နှက်ခဲ့တဲ့ ရဲတပ်ဖွဲ့တာဝန်ရှိသူတွေကို အရေးယူပေးဖို့ မြန်မာနိုင်ငံ မသန်စွမ်းအသင်းချုပ်နဲ့ မသန်စွမ်းအသင်းတွေ အပါအဝင် အရပ်ဘက်အဖွဲ့အစည်းတွေက တောင်းဆိုလိုက်ပါတယ်။

မသန်စွမ်း မောင်ဟန်သက်ဇော်ဟာ ဆန္ဒထုတ်ဖော်တဲ့အနားမှာ ရှိနေစဉ် ရဲတပ်ဖွဲ့က ရိုက်နှက်မှုကြောင့် ဦးခေါင်းကိုထိပြီး လဲကြသွားတဲ့ ဗွီဒီယိုမှတ်တမ်းဟာ လူမူကွန်ရက်မှာ ပျံ့နှံ့ခဲ့တာပါ။

မောင်ဟန်သက်ဇော်ဟာ ကိုယ်အင်္ဂါမသန်စွမ်းသလို ဉာဏ်ရည်မသန်စွမ်းသူလည်းဖြစ်ပြီး မိဘတွေမရှိတဲ့အတွက် ဦးလေးဖြစ်သူနဲ့ နေထိုင်နေသူပါ။

ရဲတပ်ဖွဲ့က ရိုက်နှက်နေစဉ် မပြေးနိုင်တဲ့အတွက် ၁၀ ချက်ထက်မနည်း အရိုက်ခံခဲ့ရတာပါ။

ဒါအပြင် ကိုယ်အင်္ဂါမသန်စွမ်းဖြစ်တဲ့ ဧရာဝတီတိုင်းဒေသကြီး အိမ်မဲမြု့နယ်မဲဆန္ဒနယ် တိုင်းဒေသကြီး လွှတ်တော်ကိုယ်စားလှယ်ကိုလည်း ပြန်လွှတ်ပေးဖို့ တောင်းဆိုခဲ့ကြပါတယ်။

မသန်စွမ်းတွေကို အကြမ်းဖက်ရိုက်နှက်တာဟာ ကုလသမဂ္ဂ မသန်စွမ်းသူများ အခွင့်အရေးဆိုင်ရာ သဘောတူစာချုပ်နဲ့ မြန်မာနိုင်ငံမသန်စွမ်းသူများအခွင့်အရေးဥပဒေကို ချိုးဖောက်ရာရောက်တယ်လို့ မသန်စွမ်းအဖွဲ့အစည်းတွေက ပြောပါတယ်။

ဒီလို အကြမ်းဖက်မှုတွေနဲ့ပတ်သက်ပြီး အရပ်ဘက်အဖွဲ့အစည်းတွေ၊ မသန်စွမ်းအဖွဲ့တွေက လူပုဂ္ဂိုလ် ၂၇၀ ကျော် ဒီနေ့ လက်မှတ်ရေးထိုးပြီး ကန့်ကွက်ရှုတ်ချထားပါတယ်။

စစ်အာဏာသိမ်းမှုကို ဆန္ဒထုတ်ဖော်ခဲ့တာကြောင့် မြန်မာနိုင်ငံမြို့အများအပြား အကြမ်းဖြိုခွင်းတာတွေ ရှိခဲ့ပြီး သေဆုံးသူ ဒဏ်ရာရရှိသူတွေနဲ့ အဖမ်းခံရသူ အများအပြားရှိနေတဲ့အထိမှာ မသန်စွမ်းသူတွေလည်း ပါဝင်နေပါတယ်။

4 months Ago

February 17, 2021

စစ်အာဏာသိမ်းမှုဆန့်ကျင်ကြောင်း ဂျပန်ရောက် မြန်မာလူငယ်များက သတင်းစာရှင်းပွဲပြုလုပ် ကြေညာ

ဂျပန်နိုင်ငံရောက်မြန်မာလူငယ်တွေက ဂျပန်နိုင်ငံရဲ့ ထင်ရှားတဲ့ တိုကျိုမြို့ ဂင်ဇာရှီ Goodwayမှာ မြန်မာစစ်တပ်ရဲ့ စစ်အာဏာသိမ်းမှုကို ဆန့်ကျင်တဲ့ကြောင်း ဖေဖော်ဝါရီ ၁၆ ရက်   ညက သတင်းစာရှင်လင်းပွဲပြုလုပ် ကြေညာလိုပါတယ်။

သတင်းစာရှင်းလင်းပွဲမှာ ပါဝင်ဦးဆောင်ခဲ့သူ ကုမ္ပဏီဝန်ထမ်းတဦး ဖြစ်တဲ့ မခိုင်ဇင်က “ကျမတို့က ဂျပန်နိုင်ငံမှာ ဆက်လက်ပညာသင်ယူခဲ့ကြပြီး နယ်ပယ်အသီးသီးမှာ လုပ်ငန်းခွင်ဝင်နေကြပါပြီ။ ဂျပန်နိုင်ငံလို ကမ္ဘာထိပ်သီးနိုင်ငံကြီးမှာ သင်ယူလေ့လာခဲ့တာတွေကို မကြာခင်မှာ ကိုယ့်မိခင် မြန်မာနိုင်ငံ တိုးတက်ရေးအတွက် ပြည်တွင်း ပြည်ပက မြန်မာလူငယ်တွေ ချိတ်ဆက်ပူးပေါင်းပြီး ကြိုးစားဆောင်ရွက်ကြမယ့် ရည်ရွယ်ချက်တွေ၊ အိပ်မက်တွေ ရိုက်ချိုးခံရသလိုပါပဲ။ ဒါကြောင့် မြန်မာလူငယ်တွေကိုယ်စား ကျမတို့က အခုလို စစ်အာဏာသိမ်းတာကို ဆန့်ကျင်ကြောင်း ပြတ်ပြတ်သားသား ဖော်ပြချင်လို့ အခုလို သတင်းစာရှင်းလင်းပွဲ ပြုလုပ်ကြရတာပါ” လို့  ဒီဗွီဘီကို ပြောပါတယ်။

အသက် ၁၉ နှစ်အရွယ် တက္ကသိုလ်ကျောင်းသူတဦး အပါအဝင် ဆန္ဒပြ မြန်မာနိုင်ငံသားတွေကို အကြမ်းဖက်ပစ်ခတ်နှိမ်နင်းမှုတွေ ဖမ်းဆီးနေတာတွေ ရှိနေတာကို ဂျပန်အစိုးရ ဂျပန်ပြည်သူတွေနဲ့ ကမ္ဘာကို ဂျပန်မီဒီယာကတဆင့် သိရှိစေချင်လို့ အခုလို အထောက်အထားတွေနဲ့ ရှင်းလင်းတင်ပြရင်း ပါဝင်ရတာပါလို့လည်း သတင်းစာရှင်းလင်းပွဲ ဦးဆောင်သူတဦး ဖြစ်တဲ့ ဂျပန်ကုမ္ပဏီဝန်ထမ်း မသီရီက သတင်းစာရှင်းလင်းပွဲမှာ ထည့်သွင်းပြောဆိုခဲ့ပါတယ်။

ဂျပန်နိုင်ငံက မြန်မာနိုင်ငံရဲ့ ဒီမိုကရေစီလမ်းကြောင်း တိုးတက်စေဖို့ကို ကူညီပေးခဲ့ပေမဲ့ အခုလို စစ်အာဏာသိမ်းမှုက နောက်ပြန်ဆုတ်စေတဲ့အတွက် မြန်မာပြည်သူတွေရဲ့ လက်ရှိ ဖြတ်သန်းနေရတဲ့ ဘဝတွေကို သိရှိစေတဲ့အကြောင်းနဲ့  မြန်မာပြည်သူတွေရဲ့ဆန္ဒနဲ့ထပ်တူ ဂျပန်အစိုးရက အမြန်ဆုံး မြန်မာစစ်တပ်ခေါင်းဆောင်တွေကို အမြန်ဆုံး အရေးယူ ပိတ်ဆို့ကာ အသိအမှတ်မပြုဖို့လည်း ဂျပန်နိုင်ငံမှာ ဆေးဝန်ထမ်းတဦးဖြစ်တဲ့ မလဲ့လဲ့က ထည့်သွင်း ပြောဆိုသွားပါတယ်။

အခုလက်ရှိ မြန်မာနိုင်ငံမှာ စစ်အာဏာသိမ်းဆန့်ကျင်မှု လှုပ်ရှားဆောင်ရွက်နေကြတဲ့ လူငယ်တွေနဲ့ ထပ်တူရှိနေတာကို ပြသချင်လို့ရယ်၊ ကျမတို့ စစ်အာဏာရှင်အောက် နေခဲ့ရတဲ့ဘဝကို အခုလက်ရှိလူငယ်တွေကို ဒုက္ခရောက်မခံစားစေချင်လို့ အခုလို သတင်းစာရှင်းပွဲမှာ ကိုယ်တိုင်ဝင်ရောက်ပြောဆိုတာပါလို့လည်း တိုကျိုတက္ကသိုလ် ပါရဂူတန်းကျောင်းသူ မနန်းပွင့်ဖြူက ဒီဗွီဘီကို ပြောပါတယ်။

တိုကျိုမြို့မှာ ပြုလုပ်တဲ့ အဆိုပါ သတင်းစာရှင်းလင်းပွဲကို NHK သတင်းဌာနကြီးအပါအဝင် ဂျပန်နိုင်ငံက ထိပ်သီးသတင်းစာတွေနဲ့ ရုပ်သံသတင်းဌာနကြီးများစွာ တက်ရောက် သတင်းယူကြပါတယ်။

4 months Ago
More News
Up