စစ်အာဏာရှင်

September 18, 2021

စစ်အာဏာရှင်ကို ပြည်သူအားလုံးပူးပေါင်းတိုက်ပွဲဝင်ပေးကြရန် မအက်စတာဇေနော တိုက်တွန်း

လက်ရှိအချိန်ဟာ စစ်အာဏာရှင် အမြစ်ပြတ်တိုက်ထုတ်ရေးအတွက် အကောင်းဆုံးအခြေအနေ တစ်ခု ဖြစ်နေပြီး ပြည်သူတွေက ယုံယုံကြည်ကြည် ပူးပေါင်းတိုက်ပွဲဝင်ပေးကြဖို့  TIME မဂ္ဂဇင်းရဲ့ ၂၀၂၁ ခုနှစ်အတွက် ကမ္ဘာ့လွှမ်းမိုးမှုအရှိဆုံး လူပုဂ္ဂိုလ် ၁၀၀ စာရင်းမှာ ရွေးချယ်ခံခဲ့ရတဲ့ မအက်စတာဇေနောက တိုက်တွန်းလိုက်ပါတယ်။

“တိုင်းရင်းသားတော်လှန်ရေးတပ်တွေဟာ နှစ်ပေါင်း ၇၀ ကျော်ကြာ စစ်အာဏာရှင်ဆန့်ကျင်ရေး တိုက်ပွဲဝင်ခဲ့ရပြီး တိုင်းရင်းသားပြည်သူတွေဟာ ဘဝကို ဆင်းဆင်းရဲရဲဖြတ်သန်းခဲ့ရပါတယ်။ စစ်တပ်ရဲ့သွေးခွဲအုပ်ချုပ်မှုကြောင့် မညီမညွတ်ဖြစ်ခဲ့ရာကနေ အခုအချိန်မှာတော့ ညီညွတ်မှုအားအကောင်းဆုံးအခြေအနေကို ရောက်လာတဲ့အတွက် တန်းတူညီမျှမှုကိုဦးတည်ပြီး ဖက်ဒရယ်စနစ်အတွက် တိုက်ပွဲဝင်သွားမယ်”လို့  မအက်စတာဇေနောက ပြောပါတယ်။

TIME မဂ္ဂဇင်းက ၂၀၂၁ ခုနှစ်အတွက် ကမ္ဘာ့လွှမ်းမိုးမှုအရှိဆုံးလူပုဂ္ဂိုလ် ၁၀၀ ရွေးချယ်ခဲ့တဲ့ စာရင်းမှာ ကချင်တိုင်းရင်းသူ မအက်စတာဇေနော၊ ရှမ်းနီတိုင်းရင်းသူ မအိသဉ္စာမောင်နဲ့  အမေရိကန်နိုင်ငံသူ မြန်မာအမျိုးသမီး အာကာသိပ္ပံပညာရှင် ဒေါ်မီမီအောင်တို့ ပါဝင်ခဲ့ပါတယ်။ 

မအက်စတာဇေနောက “ ကမ္ဘာ့လွမ်းမိုးမှုအရှိဆုံးအယောက် ၁၀၀ မှာ အခုလို ထည့်သွင်းသတ်မှတ်ခြင်းဟာ ယနေ့မြန်မာနိုင်ငံအခင်းအကျင်းကို နိုင်ငံတကာအနေနဲ့ စိတ်ဝင်စားတယ်၊ ဖော်ပြစေချင်တယ်လို့ မှတ်ယူပါတယ်။ နောက်ပြီး ဒီနေ့မြန်မာနိုင်ငံပြည်သူလူထု ကြုံတွေ့နေရတဲ့ နိုင်ငံရေးအကျပ်အတည်းတွေနဲ့ပတ်သက်လို့ နိုင်ငံတကာစာမျက်နှာရှေ့ မီးမောင်းထိုးပြရာရောက်တဲ့အတွက် မြန်မာနိုင်ငံရဲ့ ရှေ့ဆက်နိုင်ငံရေး၊ စစ်ရေးတည်ဆောက်မှုလုပ်ငန်းစဉ်တွေမှာ တစ်စုံတစ်ရာအထောက်အကူ ဖြစ်စေနိုင်မယ်လို့ မျှော်လင့်မိပါတယ်။” လို့ သူ့ရဲ့လူမှုကွန်ရက်မှာ ပြောထားပါတယ်။ 

စစ်အာဏာရှင်ကိုဆန့်ကျင်တိုက်ခိုက်နေတဲ့ မြန်မာနိုင်ငံတဝန်းက ပြည်သူတွေအားလုံး ဒီဖက်ဆစ်အာဏာရှင်စနစ်ကို လက်ရည်တပြင်တည်း တွန်းလှန်တိုက်ထုတ်သွားကြဖို့၊ ဖက်ဒရယ်ပြည်ထောင်စုကို ရှေးရှုပြီး နားလည်မှုတည်ဆောက်ကြဖို့လည်း တိုက်တွန်းပြောပါတယ်။ 

မအက်စတာဇေနောဟာ စစ်အာဏာရှင်ဆန့်ကျင်ရေး၊ စစ်ဘေးရှောင်ဒုက္ခသည်တွေကို အကူအညီပေးရေး၊ ဖက်ဒရယ်အရေးတို့အတွက် အချိန် ၁၀ နှစ်ကျော်လှုပ်ရှားဆောင်ရွက်ခဲ့သူ ဖြစ်ပါတယ်။

မအက်စတာဇေနောနဲ့  မအိသဉ္စာမောင်တို့ဟာ စစ်တပ်အာဏာသိမ်းပြီးနောက်   ဖေဖော်ဝါရီ ၆ ရက်နေ့ စစ်အာဏာရှင်ဆန့်ကျင်ရေး ရန်ကုန်သပိတ်ကို စတင်ဦးဆောင်ခဲ့ကြသူတွေလည်း ဖြစ်ပါတယ်။

မအက်စတာဇေနောဟာလက်ရှိအချိန်မှာတော့  တိုင်းရင်းသားဒေသတစ်နေရာမှာ စစ်သင်တန်း တက်ရောက်နေပြီး ရရာအခန်းကဏ္ဍကနေ စစ်ကောင်စီကို ဆန့်ကျင်တိုက်ခိုက်သွားမယ်လို့ ကတိပြုပြောဆိုပါတယ်။

Photo Credit- TIME

3 days Ago

August 17, 2021

စစ်အာဏာရှင်ကိုတိုက်ထုတ်ရာတွင် ကရင်နီပြည်သူတစ်ရပ်လုံးပူးပေါင်းပါဝင်ကြရန် KNPP တိုက်တွန်း

အာဏာရှင်စစ်အုပ်စုရဲ့ ကျူးကျော်မှုကို ခုခံကာကွယ်ရာမှာ ကရင်နီပြည်သူ လူထုတစ်ရပ်လုံးက ပူးပေါင်းကြဖို့ KNPP ပါတီက တိုက်တွန်းလိုက်ပါတယ်။

သြဂုတ် ၁၇ ရက်နေ့ ကျရောက်တဲ့ ၇၃ နှစ်မြောက် ကရင်နီပြည်တပ်မတော်နေ့ အခမ်းအနားအကြိုမိန့်ခွန်းမှာ KNPP ပါတီရဲ့ အမြဲတမ်း ဗဟိုအလုပ်မှုဆောင် ခွန်းရီမာန်ထူးက အွန်လိုင်းကနေ အခုလို တိုက်တွန်းလိုက်တာပါ။

"ကျနော်တို့ရဲ့ ခုခံ‌တော်လှန်ရေးက ပါတီတစ်ခုအတွက်မဟုတ်ဘဲနဲ့ ကရင်နီတစ်မျိုးသားလုံးနဲ့ ဆိုင်တဲ့ ခုခံကာကွယ်ရေးတစ်ရပ်ဖြစ်ပါတယ်။ စနစ်တစ်ခုကို တော်လှန်တာမဟုတ်ဘူး။ တိုင်းပြည် အုပ်ချုပ်တဲ့ အစိုးရကို တော်လှန်တာ မဟုတ်ဘူး။ ဟိုဟာလိုချင်တယ်၊ ဒီဟာ လိုချင်တယ်လို့ တိုင်းပြည်အုပ်ချုပ်တဲ့ အစိုးရကို တောင်းဆိုတာမဟုတ်ဘူး။ ကျနော်တို့တိုင်းပြည်ကို ကျူးကျော် လာတာကို ခုခံတာဖြစ်တဲ့အတွက် ခုခံကာကွယ်ရေးဖြစ်တယ်။ ကျနော်တို့ လူငယ်တွေသိဖို့က နေရင်းထိုင်ရင်းနဲ့ သူများတွေလို ထပြီးတိုက်တာ မဟုတ်ဘူး။ ကျနော်တို့ရဲ့ လွတ်လပ်ရေးကို ကျူးကျော်တဲ့အတွက် ခုခံကာကွယ်တယ်ဆိုတာ ကျနော်တို့လူငယ်တွေ အားလုံးသိစေချင်တယ်။ အခုချိန်အခါမျိုးဟာ အင်မတန်မှ လုပ်ဆောင်သင့်တဲ့ အချိန်ဖြစ်ပါတယ်။ အစပိုင်းမှာတုန်းက ကရင်နီပြည်ဟာသီးခြားလွတ်လပ်တဲ့ တိုင်းပြည်ဖြစ်တဲ့အတွက်ကြောင့် ပြန်ရဖို့ တိုက်ကြတယ်။ နိုင်ငံတကာအ‌ခြေနေအရ ၂၀၀၀ ခုနှစ်မှာ တိုင်းရင်းသားတွေနဲ့ ဖက်ဒရယ်ပြည်ထောင်စု တည်ထောင်ဖို့ ဦးတည်ခဲ့တယ်။ ဖက်ဒရယ်ပြည်ထောင်စု အမှန်တကယ်ပေါ်ထွန်းဖို့က ကျနော်တို့ KNPP ပါတီတစ်ခုတည်းနဲ့မရပါဘူး။ ကရင်နီပြည် လူထုအားလုံးပါဝင်မှာရပါမယ်။ အဲ့လိုမှ မဟုတ်ရင် အာဏာရှင်ဗမာစစ်အုပ်စုအောက်မှာ တစ်သက်လုံးနေသွားရမှာဖြစ်တယ်။"

လက်ရှိ ကရင်နီပြည်နယ်(ကယား)အတွင်းကို ထိုးစစ်ဆင်လာတဲ့ စစ်ကောင်စီ တပ်စစ်ကြောင်းတွေကို ကရင်နီအမျိုးသားကာကွယ်ရေးတပ်မတော် (KNDF)၊ ကရင်နီတပ်မတော် (KA)၊ ဒေသအလိုက်ဖွဲ့စည်းထားတဲ့ ပြည်သူကာကွယ်ရေးတပ် (PDF) တို့ စုပေါင်းပြီး ရရာလက်နက်နဲ့ ခုခံကာကွယ်နေပါတယ်။

1 month Ago
More News
Up