စစ်ဘေးရှောင်စခန်း

January 13, 2021

ကျောက်တော်မြို့ရှိ ရထားဘူတာ စစ်ဘေးရှောင်စခန်း (ဓာတ်ပုံ)

ရခိုင်ပြည်နယ်၊ ကျောက်တော်မြို့ရှိ လူဦးရေ ၇၀၀ ကျော်ရှိတဲ့ ရထားဘူတာ စစ်ဘေးရှောင်စခန်းမှာ  စားဝတ်နေရေးအတွက် အကူအညီတွေ လိုအပ်နေပါတယ်။ အဆိုပါစစ်ဘေးရှောင်စခန်းမှာ အိမ်ထောင်စု ၂၀၆ စု၊ အမျိုးသား အယောက်  ၃၀၀   နဲ့ အမျိုးသမီး ၄၃၅ ယောက် စုစုပေါင်း ၇၃၅ ယောက် ခိုလှုံနေထိုင်နေကြတာပါ။  စခန်းမှာ အိမ်သာ ၁၂ လုံးသာရှိနေပြီး အမျိုးသားတွေနဲ့ အမျိုးသမီးတွေဟာ အိမ်သာတွေကို အတူတူစုပေါင်းသုံးနေရတာမို့ အမျိုးသမီးတွေအတွက် လုံခြုံမှုမရှိဘူးလို့ ဆိုပါတယ်။ "အိမ်သာရယ်၊ ထင်းရယ်၊ ဆောင်းရာသီဆိုတော့ အနွေးထည်တွေလည်း လိုအပ်ပါတယ်။''လို့ တင်းမကျေးရွာက စစ်ဘေးရှောင်လာသူ မသန်းနုခိုင်က ပြောပါတယ်။ စားဝတ်နေရေးရယ်၊ ကျန်းမာရေးရယ်၊ ပြီးတော့ ထင်းတွေ ဘာတွေလည်း အများဆုံး လိုအပ်နေတယ်လို့  စစ်ဘေးရှောင် ကိုသန်းရွှေက ပြောပါတယ်။ ရခိုင်ပြည်နယ်က စစ်ဘေးရှောင်စခန်းတွေကို အစိုးရက ရိက္ခာထောက်ပံ့ဖို့အတွက်  စခန်းရှိ စစ်ဘေးရှောင်စာရင်းအမှန်ရရှိအောင် တပ်မတော်၊ ရဲတပ်ဖွဲ့နဲ့ အထွေထွေ အုပ်ချုပ်ရေးတို့က ပူးပေါင်းစစ်ဆေးမယ်လို့ ဇန်နဝါရီ ၄ ရက်နေ့က စခန်းတွေကို စာထုတ်အသိပေးထားပါတယ်။ Photo - Kaung Mrat Naing / MPA
4 months Ago

December 22, 2020

လူဦးရေ ၁၅၀၀ ခန့်ရှိသည့် ကမ်းထောင်းကြီး စစ်ဘေးရှောင်စခန်းတွင် အကူအညီများ လိုအပ်နေ

ကမ်းထောင်းကြီးမြို့ စစ်ဘေးရှောင်စခန်းမှာ အခြေခံစားသောက်ကုန်တွေ လာရောက်လှူဒါန်းတာတွေ ရှိပေမဲ့ စစ်ဘေးရှောင်ထောင်ချီ ရှိတာကြောင့် အကူအညီ လိုအပ်နေတယ်လို့ ကူညီပေးနေတဲ့ မြေပုံမြို့နယ် ရက္ခဒါနဖောင်ဒေးရှင်း ဥက္ကဋ္ဌ ဦးမောင်အေးသာက ဒီဗွီဘီကို ပြောပါတယ်။ ရခိုင်ပြည်နယ် မြေပုံမြို့နယ် ကမ်းထောင်းကြီးမြို့ စစ်ဘေးရှောင်စခန်းက စစ်ဘေး ၁၅၀၀ လောက်ရှိပြီး အခြေခံစားသောက်ကုန်တွေကို နီးစပ်ရာမြို့နယ်တွေက လာရောက်လှူဒါန်းပေးနေကြတာပါ။ ဦးမောင်အေးသာက “ဒီမှာက စာရေးသောက်ရေး အဆင်မပြေတာတွေ အများကြီးရှိတယ်။ ၁ လကို ဆန်အိတ် ၄ တောင်းအိတ်ဆိုတော့ ၅၂၀ လောက် လိုနေတယ်။ နောက်ပြီး ဒီအိမ်လုံခြုံမှုမရှိတာလည်း လိုနေတယ်။ မီးဖိုချောင်ပစ္စည်းတွေ မရှိတာလည်း  တွေ့ရတယ်” လို့ ပြောပါတယ်။ မြေပုံမြို့နယ် ရက္ခဒါနာဖောင်ဒေးရှင်းဟာ ကျောက်ဖြူ ရက္ခဒါနဖောင်ဒေးရှင်းနဲ့ မြို့ပေါ် ပရဟိတအဖွဲ့တွေနဲ့ ပူးပေါင်းပြီး ကူညီထောက်ပံ့ပေးနေပေမဲ့ အကူအညီတွေ လုပ်နေတယ်လို့ ဆိုပါတယ်။ လက်ရှိစစ်ဘေးရှောင်စခန်းတွေမှာ နေထိုင်နေကြရသူတွေ အခက်အခဲကြုံနေတာကြောင့် စိတ်မကောင်းဖြစ်ရသလို ထပ်မံ့လှူပေးနိုင်အောင် ကြိုးစားသွားမယ်လို့ ကျောက်ဖြူမြို့က ကယ်ဆယ်ရေးပစ္စည်းတွေ လာရောက်လှူဒါန်းပေးတဲ့ ဖြူစင်သော ကမ်းလက်ပရဟိတအသင်းဝင် ဦးမျိုးအောင်က ပြောပါတယ်။ “ကျနော်တို့ ထင်ထားတာထက်ကို ပိုပြီးတော့ဆိုးနေတာပေါ့နော်။ ဆိုးနေတယ်ဆိုတော့ ကလေးသူငယ်ကအစ ထမင်းစားချိန်မှာလည်း ထမင်းဗန်းလေးတွေ ကိုင်ပြီးတော့ ရှိတဲ့ဟာလေးနဲ့ စားနေရတော့ သားသမီးချင်း ကိုယ်ချင်းစာတယ်။ နောက်ပြီး ဒီမှာဒုက္ခရောက်နေတဲ့လူတွေကို ဒီထက်မကလှူဖို့အတွက် ကျနော်တို့ကြိုးစားပါဦးမယ်။” ကမ်းထောင်းကြီးစစ်ဘေးရှောင်စခန်းမှာ အမ်းမြို့နယ်နဲ့ မြေပုံမြို့နယ်တွေက စစ်ရှောင် မိသားစု ၄၀၃ စုနဲ့ လူဦးရေ ၁၅၀၀ ဝန်းကျင်ရှိပြီး အခုလို နေထိုင်စားသောက်ရေး အခက်အခဲဖြစ်နေတာကို အစိုးရတာဝန်ရှိသူတွေအနေနဲ့ ကူညီဆောင်ရွက်ပေးဖို့ လိုအပ်နေတယ်လို့ ရက္ခဒါန ဖောင်ဒေးရှင်းတာဝန်ရှိသူက ပြောပါတယ်။ သတင်း - နောင်နောင်
5 months Ago
More News
Up