စစ်တပ်ဖမ်းဆီး

September 15, 2021

ဒဂုံတက္ကသိုလ်ကျောင်းသား၊ ကျောင်းသူ ၆ ဦးကို စစ်တပ်က ဖမ်းဆီး

ဒဂုံတက္ကသိုလ်ကျောင်းသား၊ ကျောင်းသူ ၆ ဦးကို အကြမ်းဖက်စစ်တပ်က မတရားဖမ်းဆီးသွားတယ်လို့ ဒဂုံတက္ကသိုလ်ကျောင်းသားများ သမဂ္ဂက စက်တင်ဘာ ၁၅ ရက် ဒီကနေ့ ထုတ်ပြန်ကြေညာပါတယ်။ 

ဒဂုံတက္ကသိုလ် ကျောင်းသား၊ ကျောင်းသူများတွေဖြစ်တဲ့ မဝတ်ရည်အောင် (သတ္တဗေဒ)၊ မသဉ္ဇာဇော် (ဓာတုဗေဒ)၊ မောင်စည်သူအောင်တင် (ဥပဒေ)၊ မောင်ရဲလင်းဦး (ရှေး/သု)၊ မောင်မြင့်သိန်းနိုင် (ပထဝီဝင်)၊ နဲ့ မောင်နေထက်လင်း (သမိုင်း) တို့ကို  စက်တင်ဘာ ၁၄ ရက် မနေ့ ညက  စစ်တပ်က ဖမ်းဆီးသွားတာလို့ ဆိုပါတယ်။

ရန်ကုန်မြို့ ၃၉လမ်းက တိုက်ခန်းတစ်ခုမှာရှိနေတုန်းမှာပဲ စစ်ကောင်စီတပ်တွေက လာရောက်ဖမ်းဆီးသွားတာဖြစ်ပြီး ဖမ်းဆီးတုန်းက ရိုက်နှက်တာတွေရှိခဲ့တယ်လို့ လမ်းသူလမ်းသားတွေက ပြောပါတယ်။
ဘာကြောင့်ဖမ်းတယ်၊ ဘယ်မှာ ထိန်းသိမ်းထားတယ်ဆိုတာတွေကို မသိရသေးသလို မိသားစုဝင်တွေနဲ့လည်း အဆက်အသွယ်မရသေးဘူးလို့ နီးစပ်သူတစ်ဦးက ဒီဗွီဘီကို ပြောပါတယ်။

"လောလောဆယ်တော့ မိသားစုနဲ့ အဆက်အသွယ်မရသေးဘူး ရိုက်နှက်ခံရတာရှိတယ်လို့တော့ လမ်းထဲက လူတချို့ဆီကနေ သိရတယ်။ ဘာကြောင့်ဖမ်းတယ်ဆိုတာတော့ မသိရသေးဘူး။ ကျိန်းသေတာကတော့ အိမ်အတိအကျနဲ့လာဖမ်းတာဆိုတော့ ဒလန်တယောက်ယောက်သတင်းပေးလို့ပဲ။"
ဖမ်းဆီးခံ ကျောင်းသား ၆ ယောက်ထဲက ၄ ယောက်က ၃၉ လမ်းထဲက တိုက်ခန်းမှာ နေထိုင်တာဖြစ်ပြီး ကျန်နှစ်ယောက်ကတော့ ခဏလာတည်းခိုတာဖြစ်တယ်လို့သိရပါတယ်။

2 weeks Ago

September 14, 2021

တောင်တွင်းကြီးမြို့နယ်တွင် ဒေသခံပြည်သူ ၅ ဦးကို စစ်တပ်က ဖမ်းဆီး

မကွေးတိုင်း၊ တောင်တွင်းကြီးမြို့နယ်၊ အိုးပေါက်ကျေးရွာက ဒေသခံပြည်သူ ၅ ယောက်ကို အကြမ်းဖက်စစ်တပ်တွေက စက်တင်ဘာလ ၁၃ ရက်နေ့က ဖမ်းဆီးသွားပါတယ်။

ဖမ်းဆီးခံရသူတွေထဲမှာ တက္ကသိုလ်ကျောင်းသား ၁ ယောက်နဲ့  ပြည်သူ ၄ ယောက် ပါဝင်တယ်လို့ ဒေသခံတွေဆီက သိရပါတယ်။

အမည်မဖော်လိုသူ ဒေသခံတဦးက ''Mytel တာဝါတိုင်ဖျက်တယ်လို့ဆိုပြီး စစ်ကောင်စီခန့် အုပ်ချုပ်ရေးမှူးပါတယ်။ စစ်ကား ၁ စီး၊ ဆိုင်ကယ် ၈ စီး စစ်သားတွေလာပြီးဖမ်းသွားတာ။ တရွာလုံးလည်း ကြောက်ပီးပြေးတဲ့သူကပြေး။ စိတ်မကောင်းစရာမြင်ကွင်းပါ။ ဒီလိုအခြေအနေက ဘယ်လောက်ကြာနေဦးမလဲ  မသိသေးပါဘူးဗျာ။ ပြည်သူတွေ အရမ်းဒုက္ခရောက်နေပြီ" လို့ ပြောပါတယ်။

အိုးပေါက်ကျေးရွာအနီးက Mytel တာဝါတိုင်နဲ့ ကုက္ကိုကုန်းကျေးရွာအနီးက Mytel တာဝါတိုင်တွေဟာ စက်တင်ဘာလ ၁၂ ရက်နေ့က ဖျက်ဆီးခံလိုက်ရတာဖြစ်ပါတယ်။

ပြီးခဲ့တဲ့စက်တင်ဘာ ၁၂ ရက်ကလည်း အိုးပေါက်ကျေးရွာနဲ့ဆက်စပ်နေတဲ့ တောင်လျောင်း(ရွာမ) ကျေးရွာမှာ  Mytel တာဝါတိုင်ဖျက်ဆီးတဲ့အထဲမှာ ပါဝင်တယ်လို့ စွပ်စွဲပြီး စစ်ကောင်စီကပစ်ခတ်ခဲ့လို့ ဒေသခံရွာသား ၂ ဦးသေဆုံးပြီး ၄ ဦး ဖမ်းဆီးခံရတယ်။

2 weeks Ago
Up