စစ်တပ်က ဖမ်းဆီး

September 23, 2021

မိုးညှင်းမြို့က လူငယ် ၁ ဦးအပါအဝင် မိသားစုဝင် ၃ ဦးကို စစ်တပ်က ဖမ်းဆီး

ကချင်ပြည်နယ်၊ မိုးညှင်းမြို့မှာ စက်တင်ဘာ ၂၂ ရက် ည ၈ နာရီလောက်က အမျိုးသား လူငယ်တစ်ဦး အပါအဝင် မိသားစုဝင် သုံးဦး ဖမ်းဆီးခံခဲ့ရပါတယ်။

မိုးဒါးစုရပ်ကွက်နေ မောင်စောကြည်ခန့်ဖြိုး၊ သူရဲ့အမေနဲ့ အစ်မ ဖြစ်သူတို့ကို  စစ်ကောင်စီ တပ်ဖွဲ့က ဝင်ရောက်ဖမ်းဆီးခေါ်ဆောင်သွားကြောင်း ဒေသခံတွေထံက သိရပါတယ်။

"စောကြည်ခန့်ဖြိုးကို လာဖမ်းတာ သူ့အမေနဲ့ သူ့အစ်မလည်း ဖမ်းခံသွားရတယ်။ သူက ပရဟိတလည်း လုပ်တယ်။ ဘာကြောင့်ဖမ်းတာလည်းတော့မသိဘူး။ သူက အိမ်မှာ မနေတာ ကြာပြီ။ အိမ်ခဏ ပြန်လာတုန်း ဖမ်းခံရတာ" လို့ ဒေသခံတစ်ဦးက ပြောပါတယ်။

မောင်စောကြည်ခန့်ဖြိုး အိမ်ကိုပြန်လာချိန် စစ်ကောင်စီ တပ်ဖွဲ့ဝင်တွေက အိမ်စီးကား နှစ်စီးနဲ့ အရပ်ဝတ်နဲ့ လာရောက်ကာ ဖမ်းဆီးခဲ့တာဖြစ်ပြီး ဘယ်နေရာမှာ ဖမ်းဆီးခေါ်ဆောင်ထားတယ်ဆိုတာတော့ မသိရသေးပါဘူး။

စက်တင်ဘာ ၂၃ ရက်နေ့ မနက်မှာတော့ မိခင်ဖြစ်သူ တစ်ဦးကိုသာ ပြန်လည်လွတ်မြောက်ပေး ခဲ့ပြီး အစ်မ ဖြစ်သူမှာလည်း မလွတ်မြောက်သေးကြောင်း ဒေသခံတွေထံက သိရပါတယ်။

4 days Ago

September 17, 2021

လောင်းလုံးမြို့နယ်၌ ရွာသား ၁၂ ဦးကို စစ်တပ်က ဖမ်းဆီး

တနင်္သာရီတိုင်းဒေသကြီး၊ လောင်းလုံးမြို့နယ်၊ အောက်ရေဖြူကျေးရွာအုပ်စုမှာ  စက်တင်ဘာ ၁၇ ရက်မနက်ပိုင်းက အကြမ်းဖက်စစ်ကောင်စီတပ်က အသက်မပြည့်သေးတဲ့ အမျိုးသမီးငယ် အပါအဝင် ဒေသခံပြည်သူ  ၁၂ ယောက် လောက်ကို ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။

စစ်ကောင်စီတပ် အင်အား ၇၀ လောက်ဟာ အချုပ်ကား တစ်စီးနဲ့အတူ မနက် ၈ နာရီလောက် ရောက်ရှိလာပြီး ကျေးရွာအုပ်စုအတွင်း သေနတ်နဲ့လိုက်လံပစ်ခတ်တပြီး လမ်းသွားလမ်းလာတွေကို ဖမ်းဆီးသွားခဲ့တာပါ။ 

အပြစ်မဲ့ဖမ်းဆီးခံရတဲ့ ပြည်သူတွေကို အချုပ်ကားနဲ့ စစ်ကောင်စီလက်အောက်ခံ လောင်းလုံးမြို့မရဲစခန်းကို ခေါ်ဆောင်သွားတယ်လို့ ဒေသခံတွေက ပြောပါတယ်။ 

ရေဖြူကျေးရွာဒေသခံ ရွာသားတစ်ဦးက" အပြစ်မရှိဘဲ သေနတ်နဲ့ လိုက်လံပစ်ခတ်ဖမ်းဆီးတာ။ လက်နက်အားကိုးနဲ့ လူရမ်းကားတွေ။ မင်းမဲ့စရိုက်ဆန်ဆန် လိုက်ပစ်ခတ်ပြီး လူတွေကို အကြောင်းမဲ့ ဖမ်းဆီးသွားတယ်"လို့ ပြောပါတယ်။ 

အဆိုပါကျေးရွာနဲ့ အနီးအနားက ဂေါ့အင်း၊ ကဒက်ငယ်ထိန်၊ ဝံတွင်း၊ ကျောက်ဖြူကျေးရွာတွေမှာပါ အကြမ်းဖက်စစ်ကောင်စီတပ်ဖွဲ့တွေက ကင်းပုန်းဝပ်ပြီး လမ်းသွားလမ်းလာတွေကို စောင့်ကြည့်တာတွေရှိတယ်လို့ ဒေသခံတွေက ဆိုပါတယ်။ 

မိဘပြည်သူများအနေနဲ့ အောက်ရေဖြူကျေးရွာအုပ်စုဘက်ကို ဖြတ်သန်းသွားလာတာ လုံးဝမပြုလုပ်ကြဖို့ ဒီမိုကရေစီအရေးလှုပ်ရှားမှု သပိတ်ကော်မတီ(ထားဝယ်ခရိုင်)မေတ္တာရပ်ခံ အသိပေးထားပါတယ်။

1 week Ago
More News
Up