စစ်ကြောရေး

June 14, 2021

ဒလန်အမျိုးသမီးကို ပစ်ခတ်ခဲ့မှုသံသယဖြင့် ဖမ်းဆီးခံရသူ ၁ ဦး စစ်ကြောရေးတွင် သေဆုံး

မန္တလေးတိုင်း၊ မြင်းခြံခရိုင်၊ တောင်သာမြို့က ဒလန်လို့လူသိများတဲ့ အမျိုးသမီးတစ်ဦးကို သေနတ်နဲ့ပစ်ခတ်ခဲ့မှုမှာ  သံသယရှိသူအဖြစ် ဖမ်းဆီးခံလိုက်ရတဲ့ အမျိုးသား တစ်ဦးဟာ စစ်ကြောရေးမှာ ရိုက်နှက်ညှဉ်းပန်းခံရပြီး သေဆုံးသွားတယ်လို့ တောင်သာမြို့ခံတွေထံက သိရပါတယ်။

ဇွန် ၁၃ ရက် နေ့ခင်း ၁ နာရီကျော်လောက် တောင်သာက ယွန်းယွန်း လျှပ်စစ်ပစ္စည်းဆိုင်ထဲကို ဆိုင်ကယ်ဦးထုပ်ဆောင်းထားတဲ့ လူငယ်နှစ်ယောက် ဝင်လာပြီး  စစ်တပ်သတင်းပေး ဒလန်လို့ လူသိများတဲ့ ဆိုင်ရှင်မနှင်းကို သေနတ်နဲ့ ပစ်ခတ်ကာ ပြန်လည်ထွက်ပြေးသွားခဲ့တာပါ။

သေနတ်နဲ့ အပစ်ခံရတဲ့ အမျိုးသမီးဟာ ဝမ်းဗိုက်ကို ကျည်ရှပ်မှန်သွားခဲ့ပြီး ဒဏ်ရာစိုးရိမ်ရတာကြောင့်  မိတ္ထီလာ စစ်ဆေးရုံကနေ ဆက်ကာ နေပြည်တော်အထိ ပို့‌ဆောင် ကုသပေးနေကြတယ်လို့လည်း သိရပါတယ်။

အဆိုပါသေနတ်ပစ်ခတ်မှုနဲ့ပတ်သက်ပြီး တောင်သာမြို့နယ် ရုံးပင်ကျေးရွာနဲ့အနီးအနား ကျေးရွာတွေကို စစ်တပ်နဲ့ ရဲတွေ ညတွင်းချင်း ဝင်ရောက်ရှာဖွေပြီး သေနတ် ပစ်ဖောက်ခဲ့ကြပါတယ်။ 

အဲဒီနောက် ရုံးပင်ကျေးရွာသားတစ်ဦး သေနတ်ထိမှန်ခဲ့ကြောင်းနဲ့ အင်းတဲ ကျေးရွာသား တစ်ဦးကိုတော့ သေနတ်ပစ်ခတ်မှုမှာ သံသယရှိသူအဖြစ် ဖမ်းဆီးခေါ်ဆောင်သွားခဲ့ကြတယ်လို့ သိရပါတယ်။ 

“လုပ်တဲ့သူက အတည်မပြုနိုင်ဘူး။ သူတို့ လုံးဝမဟုတ်ဘူး”လို့ တောင်သာမြို့ခံက ပြောပါတယ်။

အဖမ်းခံရတဲ့ အင်းတဲကျေးရွာနေ အသက် ၃၅ နှစ်ခန့်ရှိ အမျိုးသားကို တောင်သာမြို့က ထောက်လှမ်းရေးရုံးမှာ စစ်ကြောရေး လုပ်ဆောင်ရာနေရာမှာ ရိုက်နှက်မေးမြန်းခဲ့ပြီး အဆိုပါအမျိုးသားဟာ ညတွင်းချင်း သေဆုံးသွားတာကြောင့် တောင်သာ‌ဆေးရုံရှိ ရင်ခွဲရုံကို ‌ပို့ဆောင်ထားတယ်လို့ သိရပါတယ်။

“တောင်သာ ထောက်လှမ်းရေးရုံးထဲမှာပဲ စစ်တာ၊ ရိုက်နှက်သံတွေက လမ်းပေါ်ကနေကို ကြားရတယ်။ ခဏနေတော့ သေသွားပြီဆိုပြီး သတင်းထွက်လာတာ၊ သေမှပဲ ဆေးရုံတင်တယ်တဲ့။ သေပြီးမှပဲ ရင်ခွဲရုံပို့လိုက်တယ်လို့ ပြောတယ်” လို့ တောင်သာမြို့ခံတစ်ဦးက ပြောပါတယ်။

သေဆုံးသူအမျိုးသားရဲ့ ရုပ်အလောင်းကိုတော့  ဒီနေ့ နေ့လည်ပိုင်း အထိ မိသားစုကို ပြန်မပေးသေးဘူးလို့ သိရပါတယ်။

1 month Ago

June 11, 2021

စစ်ကြောရေးတွင် နှိပ်စက်ညှဉ်းပန်းမှုကြောင့် သေဆုံးသူ ၂၂ ဦး၊ အလောင်း ပြန်မရသူ ၃ ဦးရှိ

စစ်ကြောရေးမှာ အကြမ်းဖက်စစ်အုပ်စုရဲ့ ပြင်းထန်တဲ့  နှိပ်စက်ညှဉ်းပန်းမှုတွေကြောင့် သေဆုံးခဲ့ရသူ ၂၂ ယောက်နဲ့ အဲဒီထဲက ၃ ယောက်ကတော့ အလောင်းပြန်ယူခွင့် မရသူတွေဖြစ်တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ)က သတင်းထုတ်ပြန်ပါတယ်။

အာဏာသိမ်း စစ်အုပ်စုဟာ ပြီးခဲ့တဲ့ ဖေဖော်ဝါရီ ၁ ရက်နေ့ကတည်းက ရွေးကောက်ခံ နိုင်ငံ့ခေါင်းဆောင်တွေအပါအဝင် စစ်အာဏာသိမ်းမှုကို ဆန့်ကျင်တဲ့ ပြည်သူတွေကို နေ့စဉ်နဲ့အမျှ နည်းအမျိုးမျိုးနဲ့ ဖမ်းဆီးတာတွေ ပြုလုပ်ခဲ့ကြတာပါ။

အဲဒီလို မတရားဖမ်းဆီးပြီး နှိပ်စက်ညှဉ်းပန်းမှုတွေ ပြုလုပ်တာကြောင့် တချို့မှာ ကိုယ်လက်အင်္ဂါ ချို့ယွင်းသူတွေရှိသလို တချို့မှာတော့ အသက်သေဆုံးသည်အထိ နှိပ်စက် ညှဉ်းပန်းမှုတွေလည်း ရှိခဲ့တယ်လို့ အေအေပီပီက ပြောပါတယ်။

စစ်အာဏာရှင် အဆက်ဆက်ဟာ ပြည်သူတွေကို အကြောက်တရားနဲ့ လွှမ်းမိုးစေဖို့ အထူးရည်ရွယ်ချက်နဲ့ နှိပ်စက်ညှဉ်းပန်းမှုကို မူဝါဒတွေ ချမှတ်လုပ်ဆောင်ခဲ့ကြပြီး စစ်အ စိုးရတွေလက်ထက် စစ်ကြောရေးစခန်းတွေဟာ လူမဆန်တဲ့ ညှဉ်းပန်းနှိပ်စက်မှု စခန်းတွေအဖြစ် နာမည်ဆိုးနဲ့ ကျော်ကြားခဲ့တယ်လို့ ဆိုပါတယ်။

ပြီးခဲ့တဲ့ ၁၉၈၈ ခုနှစ်နောက်ပိုင်း စစ်အုပ်ချုပ်ရေးကာလအတွင်း စစ်အစိုးရဆန့် ကျင်သူ ထောင်ပေါင်းများစွာကို ဖမ်းဆီးထောင်ချခဲ့ကြပြီး နဝတ၊ နအဖ အုပ်ချုပ်ရေး ကာလမှာ စစ်ကြောရေး စခန်း၊ အကျဉ်းထောင်၊ ရဲဘက် စခန်းတွေမှာ ညှဉ်းပန်းနှိပ်စက်မှု၊ ဆေးဝါးကုသမှု မရရှိတာတွေကြောင့် ကျဆုံးသူ ၁၂၇ ယောက်ရဲ့ အချက်အလက်တွေကို အေအေပီပီက ကောက်ယူ မှတ်တမ်းတင်ထားခဲ့တယ်လို့ ဆိုပါတယ်။

အခုလက်ရှိအာဏာသိမ်းစစ်အုပ်စုဟာလည်း အဲဒီလို ညှဉ်းပန်းနှိပ်စက်မှုတွေကို မူ ဝါဒအဖြစ် ဆက်လက်ချမှတ် ကျင့်သုံးနေကြပြီး ရိုက်နှက်ဖမ်းဆီးတာ၊ ကားနဲ့ ဝင်တိုက် ဖမ်းဆီးတာ၊ သေနတ်နဲ့ ပစ်ခတ်တာတွေကြောင့် စစ်အာဏာသိမ်းမှု ဆန့်ကျင်ရေး လှုပ် ရှားသူတွေဟာ ပြင်းပြင်းထန်ထန် ဒဏ်ရာဒဏ်ချက်တွေ ရရှိသွားကြပြီး တချို့မှာပင်ကိုယ်ရုပ်ကိုပင် မမှတ်မိနိုင်လောက်အောင် ဒဏ်ရာတွေ ရရှိထားကြတယ်လို့ ဆိုပါတယ်။

  စစ်အုပ်စုက ဖမ်းဆီးသွားပြီး နောက်တရက်မှာ အသက်မဲ့ခန္ဓာကိုယ်ကို လာယူဖို့ မိသားစုတွေဆီ အကြောင်းကြားတဲ့ ဖြစ်စဉ်တွေ၊ တချို့မှာ အသက်မဲ့ခန္ဓာကိုယ်ကိုတောင် ပြန်မရဘဲ သေဆုံးကြောင်း အကြောင်းကြားတဲ့ ဖြစ်စဉ်တွေဟာလည်း မြန်မာနိုင်ငံအနှံ့ ရှိနေခဲ့တယ်လို့ဆိုပါတယ်။

အေအေပီပီက ကောက်ယူ စုဆောင်းထားတဲ့ မှတ်တမ်းတွေအရ စစ်အုပ်စု အာဏာ သိမ်းချိန်ကစ ဒီကနေ့အထိ ဖမ်းဆီးခံခဲ့ရသူ ၅၉၆၅ ယောက်ရှိပြီး အဲဒီထဲက ၄၈၀၄ ယောက်ကတော့ အကျဉ်းထောင်နဲ့ စစ်ကြောရေး စခန်းတွေမှာ ဆက်လက်ဖမ်းဆီး ချုပ် နှောင်ခံထားရဆဲဖြစ်တယ်လို့ဆိုပါတယ်။

အသက်သေဆုံးသူစုစုပေါင်းကတော့ အနည်းဆုံး ၈၆၀ ယောက်ရှိခဲ့ကာ ဖမ်းဆီးခံရ ပြီးနောက် ပြင်းထန်တဲ့ ညှဉ်းပန်းနှိပ်စက်မှုတွေကြောင့် အသက်ဆုံးရှုံးသွားခဲ့ရသူ ၂၂ ယောက်နဲ့ အဲဒီထဲက ၃ ယောက်ကတော့ မိသားစုက အလောင်းပြန်ယူခွင့် မရခဲ့ဘူးလို့ ဆိုပါတယ်။

ကျဆုံးသူ ၂၂ ယောက်ထဲမှာ ၁၃ ယောက်ကတော့ ဖမ်းဆီးခံရပြီး ၂၄ နာရီအတွင်း သေဆုံးခဲ့ရသူတွေဖြစ်ပြီး၊ ၄ ယောက်ကတော့ ၂ ရက်အတွင်း သေဆုံးခဲ့ရသူတွေ ဖြစ်တယ်လို့ အေအေပီပီက ဆိုပါတယ်။

၄ ယောက်ကတော့ ရက်သတ္တတပတ်အတွင်း သေဆုံးခဲ့ရပြီး၊ ၁ ယောက်ကတော့ ရက်သတ္တ ၂ ပတ်အတွင်း သေဆုံးခဲ့ရကာ ကြည့်ရှုခွင့်ရခဲ့တဲ့ သေဆုံးသူ အားလုံးနီးပါးမှာ နှိပ်စက်ညှဉ်းပန်းမှုကြောင့် ရုပ်အလောင်းနေရာအနှံ့ ကြီးမားတဲ့ ဒဏ်ရာဒဏ်ချက်တွေ တွေ့ရပေမယ့် စစ်အုပ်စုကတော့ ရောဂါတခုခုနဲ့ သေဆုံးသွားကြောင်းသာ ထုတ်ပြန်ခဲ့ တယ်လို့ ဆိုပါတယ်။

အေအေပီပီ အနေနဲ့ အဲဒီလို ရက်စက်ကြမ်းကြုတ်စွာ တရားမဲ့ နှိပ်စက် ညှဉ်းပန်း သတ်ဖြတ်နေတာတွေကို ပြင်းထန်စွာ ကန့်ကွက်ရှုံ့ချလိုက်ကြောင်းနဲ့ နိုင်ငံတကာ အ သိုင်းအဝိုင်းအနေနဲ့လည်း အသက်သေဆုံးသည်အထိ နှိပ်စက်ညှဉ်းပန်းမှုတွေ ထပ်မံမဖြစ် ပွားစေရေးအတွက် ဟန့်တားနိုင်တဲ့ အရေးယူ ဆောင်ရွက်မှုတွေကို အမြန်ဆုံး ထိရောက်စွာ အကောင်အထည်ဖော် ဆောင်ရွက်ပေးနိုင်ဖို့လည်း တောင်းဆိုထားပါတယ်။

2 months Ago
Up