မွန်ပြည်နယ်၊ သထုံခရိုင်၊ ကျိုက်ထိုမြို့နယ်ရှိ မတ် ၂၇ ရက် ည ၈ နာရီလောက်က စစ်ကောင်စီအခြေစိုက် ဘိုက္ကားတပ်စခန်း  တပ်စခန်းကနေ လက်နက်ကြီးပစ်ခတ်လို့ အရပ်သား ၂ ယောက် သေဆုံးခဲ့သလို တယောက် ထိခိုက်ဒဏ်ရာရရှိခဲ့တယ်လို့ ကျိုက်ထိုဒေသခံတွေက ပြောပါတယ်။

စစ်ကောင်စီမှ လက်နက်ကြီးပစ်ခတ်မှုကြောင့် မဲရုံးလေးနား ကျောက်ပုံရွှေလုပ်ကွက်မှာ လုပ်ကိုင်နေကြချိန်မှာ လက်နက်ကြီးကျည် ကျပေါက်ကွဲမှုကြောင့် ဒေသခံ ၆ ယောက် ထိမှန်ပြီး ၂ ဦး ပွဲချင်းပြီး သေဆုံးခဲ့ပြီး ကျန်တယောက်က စိုးရိမ်ရတယ်လို့ ဒေသခံတွေရဲ့အဆိုအရ သိရပါတယ်။

ဘိုကားကျေးရွာမှ စောနောင် (၂၄ နှစ်)၊ ကွင်းကလေးကျေးရွာမှ လျှံထက်အောင် (၂၂ နှစ်) တို့ သေဆုံးပြီး  စိုးရိမ်ရအခြေအနေဒဏ်ရာရရှိတဲ့ ဦးဝင်းဌေးကိုတော့ သထုံဆေးရုံကို လွှဲပြောင်းပေးလိုက်တယ်လို့ ဒေသခံတွေက ပြောပါတယ်။

ကျိုက်ထိုမြို့နယ်အတွင်းမှာ စစ်ကောင်စီမှ ညတိုင်းနီးပါး လက်နက်ကြီးပစ်ခတ်နေမှုကြောင့်  မတ် ၂၀ ရက်နေ့ကလည်း ကရဝေးဆိပ် ရွာလယ်ကို ကျရောက်ပေါက်ကွဲခဲ့ပြီး ၂ ဦး ပွဲချင်းပြီး သေဆုံးခဲ့ရသလို စစ်ကောင်စီရဲ့ ပစ်ခတ်မှုကြောင့် ဒေသခံတွေဟာ ဘေးလွတ်ရာ ထွက်ပြေး တိမ်းရှောင်နေရပါတယ်။

စစ်ကောင်စီတပ်ဘက်က ကျိုက်ထိုမြို့နယ်မှာ စစ်ကောင်စီတပ်တွေဟာ မကြာခဏ တိုက်ခိုက်ခံရတာကြောင့် အထိနာ အကျအဆုံးများလာခဲ့တာကြောင့် လက်နက်ကြီးတွေနဲ့ ပစ်ခတ်ခံနေရပါတယ်။

တနင်္သာရီတိုင်း မြိတ်ခရိုင် ပုလောမြို့နယ်မှာ စစ်ကောင်စီတပ်သားတွေက ဒေသခံ ၂ ယောက်ကို မတ် ၂၅ ရက်နေ့မှာ ဖမ်းဆီးသတ်ဖြတ်ခဲ့တယ်လို့ ပြည့်သူ့ကာကွယ်ရေးတပ်ဖွဲ့တွေထံက သိရ ပါတယ်။

နတ်အိမ်တောင်ရွားသားတွေဖြစ်တဲ့ အသက် ၄၂ နှစ်ရှိ ဦးတင်ဦး နဲ့ အသက် ၄၃ နှစ်ရှိ ကိုမျိုးမင်းသူတို့ ပစ်သတ်ခံခဲ့ရတာပါ။

ဒေသခံ တစဦးက “ကိုမျိုးမင်းသူဟာ ဆိုင်ကယ်နဲ့ ရွာထဲ ဝင်လာချိန် စစ်ကောင်စီတပ်သား တွေနဲ့ တိုးပြီး ပစ်သတ်ခံရတာပါ။ ကိုတင်းဦးကတော့ ဥယျာဉ်ထဲမှာ ပစ်သတ်ခံရတာပါ”လို့ ဆိုပါတယ်။

ပစ်သတ်ခံရတဲ့သူတွေဟာ သာမန်အရပ်သားတွေဖြစ်ကြပြီး ပြည်သူ့ကာကွယ်ရေးတပ်ဖွဲ့တွေနဲ့ ဆက်စပ်မှု မရှိဘူးလို့လည်း ဒေသခံတွေက ဆိုပါတယ်။

ပုလောကုန်းကျေးရွာနားမှာ မတ် ၂၄ ရက်က စစ်တပ်နဲ့ ဒေသခံကာကွယ်ရေးတပ်တို့ တိုက်ပွဲဖြစ်ပွားကြပြီး စစ်တပ်က ပုလောကုန်းကျေးရွာနားက နတ်အိမ်တောင်ရွာကိုလည်း မီးရှို့ ဖျက်ဆီးခဲ့တယ်လို့ သိရပါတယ်။

တနင်္သာရီမြို့နယ်ထဲမှာ မတ် ၂၅ ရက်မှာလည်း ဆိုင်ကယ်မောင်းနှင်းလာတဲ့ ဒေသခံလူငယ် ၄ ယောက်ကို ကမ္မလိုင်းဂိတ်မှာ စစ်တပ်က သေနတ်နဲ့ ပစ်ခတ်ခဲ့ရာ ၂ ယောက် သေဆုံးသွားတယ်လို့  ဒေသခံတွေက ပြောပါတယ်။

စစ်ကိုင်းတိုင်း၊ ကလေးမြို့မှာ စစ်ကောင်စီလက်အောက်ခံ ကလေးမြို့တွင်းတပ်တွေကနေ မတ်လ ၂၇ ရက်က မြို့နယ်တဝိုက်ကို လက်နက်ကြီးတွေနဲ့ ပစ်ခတ်ခဲ့တယ်လို့ မြို့ခံတွေက ပြောပါတယ်။

စစ်ကောင်စီရဲ့ လက်နက်ကြီးကျည်ဟာ ကလေးနယ်အနောက်မြောက်ဘက်ဒေသ လက်ပံချောင်းကျေးရွာအတွင်းကို ၂ ကြိမ် ကျရောက်ပေါက်ကွဲပြီး ရွာအနီးတဝိုက်မှာ ၃ ကြိမ် ကျရောက်ပေါက်ကွဲခဲ့တာလို့ လက်ပံချောင်းရွာ ဒေသခံတဦးက ပြောပါတယ်။

“ရွာထဲမှာ ၂ ကြိမ်ကျတာ။ ပထမတကြိမ်က အမျိုးသမီးတဦး ခြေထောက်မှာ ထိမှန်ဒဏ်ရာရတာ။ ဒုတိယတကြိမ်ကတော့ C ရပ်ကွက်မှာ ကျတာ။ နေအိမ်ထိမှန်ပြီး နေအိမ်အနည်းငယ် ပျက်စီးသွားတယ်။ တရွာလုံးကတော့ ကြောက်လို့ အိမ်ထဲမှာပဲနေကြတာ။ အပြင်မထွက်ရဲကြဘူး။”

ကလေးမြို့ပြစစ်ဆင်ရေး Special Underground တပ်ဖွဲ့က မနက်ပိုင်းမှာ တောင်ဇလပ်ရပ်ကွက်ရှိ စသုံးလုံးရုံးကို တိုက်ခိုက်ခဲ့ပြီးနောက် ကလေးမြို့တွင်းမှာရှိတဲ့ စစ်တပ်တွေကနေ မြို့နယ်မြောက်ပိုင်းနဲ့ တောင်ပိုင်းကို လက်နက်ကြီးနဲ့ ပစ်ခတ်ခဲ့တာပါ။

အဲ့ဒီနေ့ညနေပိုင်းမှာပဲ တောင်ဇလပ်ရပ်ကွက်ရှိ ဆည်မြောင်းရုံးမှာ တပ်စွဲနေတဲ့ စစ်ကောင်စီတပ်သား ၂ ဦးကို SUG အဖွဲ့က ထပ်မံတိုက်ခိုက်ခဲ့ပါသေးတယ်။

မနှစ် ဒီဇင်ဘာလကလည်း စစ်ကောင်စီက ကလေးမြို့တွင်း စစ်တပ်ကနေ မြို့နယ်တဝိုက်ကို လက်နက်ကြီးနဲ့ ပစ်ခတ်မှုကြောင့် နေအိမ်ပေါ် လက်နက်ကြီးကျရောက်ပြီး အဘွားအို ၂‌ ဦး လက်နက်ကြီးထိမှန် သေဆုံးခဲ့ပါသေးတယ်။

ဓာတ်ပုံ-လက်ပံချောင်းလူမှုကွန်ရက်

မြန်မာနိုင်ငံမှာ အာဏာသိမ်း ၂ နှစ်ကျော်အကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၃,၁၇၁ ယောက်နဲ့ ဖမ်းဆီးထိန်းသိမ်းခံရသူပေါင်း ၂၀,၉၀၈ ယောက်ထိ ရှိလာခဲ့ပြီဖြစ်တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ထားပါတယ်။

ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၃ ခုနှစ်၊ မတ် ၂၈ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြပါတယ်။

နွေဦးတော်လှန်ရေးကာလအတွင်း ဒီနေ့အထိ ၁၇,၀၄၀ ယောက် လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၅,၂၄၁ ယောက်ကတော့ ထောင်ဒဏ် ချမှတ်ခံထားရပါတယ်။

တော်လှန်ရေးနဲ့ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူ အရေအတွက်ကတော့ ၁၀၈ ယောက်ရှိနေပြီး မျက်ကွယ် သေဒဏ်ချမှတ်ခံထားရသူ ၄၂ ယောက် အပါအဝင် ၁၂၁ ယောက်ကတော့ မျက်ကွယ်ပြစ်ဒဏ် ချမှတ်ခံထားရတာကြောင့် သေဒဏ်ချမှတ်ခံထားရသူ စုစုပေါင်း အယောက် ၁၅၀ ရှိလာခဲ့ပြီ ဖြစ်ပါတယ်။

လတ်တလောအချိန်ထိ ဖမ်းဆီးခံရပြီး ပြန်လည်လွတ်မြောက်လာသူ ဦးရေကတော့ ၃,၈၄၄ ယောက် ရှိခဲ့တယ်လို့ ဆိုပါတယ်။

ပြီးခဲ့တဲ့ မတ် ၄ ရက် မနက် ၁၁ နာရီကျော်လောက်က မွန်ပြည်နယ်၊ ဘီးလင်းမြို့နယ်၊ ဒေါက်ရပ်ကျေးရွာအနီးမှာ ကင်းပုန်းဝပ်နေတဲ့ အကြမ်းဖက်စစ်အုပ်စု အမှတ် ၈ ခြေလျင်တပ်ရင်းက လမ်းလျှောက်လာတဲ့ အရပ်သား ၂ ယောက်ဖြစ်ကြတဲ့ စောငပြူးနဲ့ စောရဲနိုင်ဝင်းတို့ကို အကြောင်းမဲ့ သေနတ်နဲ့ပစ်ခတ်ခဲ့တာကြောင့် နေရာတင် သေဆုံးခဲ့တယ်လို့ အေအေပီပီက ပြောပါတယ်။

ဒါ့အပြင် လာလ်ပန့်ဆန်းငါဟာ ချင်းပြည်နယ်၊ ဖလမ်းမြို့နယ်၊ မွာလ်ဖော်ကျေးရွာသားဖြစ်ပြီး အကြမ်းဖက်စစ်အုပ်စုက အာဏာသိမ်းပြီးနောက် CDM ပြုလုပ်လာဖို့ စည်းရုံးလှုံ့ဆော်မှုတွေနဲ့ ကိုယ်တိုင်ဆန္ဒဖော်ထုတ်မှုတွေမှာ ပါဝင်ခဲ့တာကြောင့် ၂၀၂၃ ခုနှစ်၊ ဇန်နဝါရီ ၂၄ ရက်မှာ အကြမ်းဖက်စစ်အုပ်စုရဲ့ ဖမ်းဆီးခြင်း ခံခဲ့ရပါတယ်။ ပြီးခဲ့တဲ့ ဖေဖော်ဝါရီ ၂၄ ရက်မှာတော့ ရာဇသတ်ကြီး ဥပဒေပုဒ်မ ၅၀၅-က နဲ့ ထောင်ဒဏ် ၂ နှစ် အမိန့်ချမှတ်ခံခဲ့ရပြီး မော်လိုက် ကလေးအကျဉ်းထောင်မှာ ဖမ်းဆီးချုပ်နှောင်ခံထားရချိန် မတ် ၂၁ ရက်မှာ ရုတ်တရက် သေဆုံးခဲ့တာမို့ အကြမ်းဖက်စစ်အုပ်စုက လာာ်ပန့်ဆန်းငါရဲ့ မိသားစုဝင်တွေကို အကြောင်းကြားခဲ့တာကြောင့် သူ့ရဲ့ရုပ်အလောင်းကို မိသားစုဝင်တွေက မွာလ်ဖော်ကျေးရွာဆီ သယ်ဆောင်သွားပြီး သင်္ဂြိုဟ်ခဲ့တယ်လို့ သိရပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေး ကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီး အချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။

စစ်ကောင်စီဘက်က စစ်ကြောင်းဝင်ရောက်ခဲ့တဲ့ ကချင်ပြည်နယ်၊ ရွှေကူမြို့နယ် မံဝိန်းရွာ၊ ငှက်တံတားရွာ၊ စီမူကြီး၊ စီမူလေးရွာနဲ့ နီးစပ်ရာ ကျေးရွာတချို့က ဒေသခံ ၁,၀၀၀ လောက် စစ်ဘေးရှောင်နေကြရတယ်လို့ စစ်ရှောင်ပြည်သူတွေနဲ့ နီးစပ်သူတဦးက ဒီဗွီဘီကို ပြောပါတယ်။

ရွှေကူမြို့နယ်မှာ KIA၊ PDF ပူးပေါင်းတပ်တွေနဲ့ စစ်ကြောင်းထိုးလာတဲ့ စစ်ကောင်စီ တပ်မ-၇၇ နဲ့ ၁၀ တို့ မတ်လ ၂၃ ရက်ကစပြီး ထိတွေ့တိုက်ပွဲ ဆက်တိုက်ဖြစ်ပွားခဲ့ပြီး မတ်လ ၂၅ ရက်နေ့မှာ စီသောင်၊ မံဝိန်းနဲ့ စီမူလေးကျေးရွာတွေကို စစ်ကောင်စီဘက်က ဂျက်တိုက်လေယာဉ်နဲ့ ဗုံးကြဲချခဲ့တယ်လို့ ဒေသခံတွေက ပြောပါတယ်။

ဗုံးကြဲမှုကြောင့် မံဝိန်းရွာက လူထုခန်းမ ထိခိုက်ခဲ့ပြီး စီသောင်းရွာက လူနေအိမ်တလုံး မီးလောင်ပျက်စီးခဲ့ကာ ရွာသားတွေရဲ့ နွားတွေ ထိခိုက်သေဆုံးခဲ့တယ်လို့ ဆိုပါတယ်။

အဲ့ဒီအပြင် တိုက်ပွဲဖြစ်နေတဲ့ ရွှေကူမြို့နယ်မှာ ဆက်သွယ်ရေးလိုင်းတွေ ပြတ်တောက်နေတာ သုံးရက်ထက်မနည်း ရှိနေပါပြီ။

“ဖုန်းလိုင်းပြတ်နေတာ သုံးလေးရက်ရှိပြီ။ လိုင်းမပေါ်တော့တာ။ စစ်ကြောင်းစထိုးတဲ့ နေ့တည်းကပဲ လိုင်းက တချက်တချက်ပဲပေါ်တာ၊ Atom နဲ့ Mytel ဆို လုံးဝဖြတ်ထားတာ” လို့ ဒေသခံတဦးက ပြောပါတယ်။

စစ်ရေးအခြေအနေ တင်းမာနေတဲ့ ရွှေကူမြို့မှာ စစ်ကြောင်းထိုးလာတဲ့ စစ်ကောင်စီတပ်တွေနဲ့ ထိပ်တိုက်တွေ့ဆုံမှု မရှိစေဖို့ ပြည်သူတွေအနေနဲ့ ခရီးသွားလာမယ်ဆိုရင် လမ်းကြောင်းအခြေအနေကို သတင်းစုံစမ်းပြီးမှ ခရီးသွားလာကြဖို့ ရွှေကူ KPDF တပ်ရင်းက မတ်လ ၂၇ ရက် နေ့စွဲနဲ့ သတိပေး ထုတ်ပြန်ထားပါတယ်။

ကရင်ပြည်နယ်၊ မြဝတီမြို့နယ် ကုန်သွယ်ရေးဇုန်အနီးမှာ မတ် ၂၅ ရက်ကစပြီး ၂၈ ရက်နေ့ထိ စစ်ကောင်စီတပ်နဲ့ KNU/KNLA ပူးပေါင်းတပ်တို့ တိုက်ပွဲတွေ ဆက်ဖြစ်နေတယ်လို့ Cobra စစ်ကြောင်းမှ တာဝန်ရှိသူတဦးက ပြောပါတယ်။

“စစ်ကောင်စီတပ်ဘက်က သင်္ကန်းညီနောင်စခန်းနဲ့ ၂၇၅ တပ်တွေကနေ လက်နက်ကြီးတွေနဲ့ ရမ်းသန်းထုနေတယ်။ လက်နက်ကြီးကြောင့် ရွာသား တယောက် နှစ်ယောက် ထိခိုက်မိတာ ရှိတယ်။ အိုးအိမ်ပျက်စီးမှုကတော့ ရှိတယ်။ အိမ်ကြားထဲ ကျတာတွေရှိတယ်။”

မတ် ၂၅ ရက်က စစ်ကောင်စီရဲ့ ကုန်သွယ်​ရေးဇုန်မှာရှိတဲ့ အုပ်ချုပ်ရေးယန္တရား၊ ကုန်သွယ်ရေးယန္တရား အားလုံးကို ဖြတ်တောက်ခဲ့တာလို့ သိရပါတယ်။

“စစ်ကောင်စီတပ်ကို ကျနော်တို့ကတော့ တိုက်မှာပဲ၊ ခွင့်မလွှတ်ဘူး၊ နိုင်အောင်တိုက်မှာ” လို့ မြေပြင်မှ ရဲဘော်တဦးက ပြောပါတယ်။

တိုက်ပွဲဆက်ဖြစ်ပွားနေပြီး စစ်ကောင်စီဘက်က အခုတောင် လက်နက်ကြီးနဲ့ ရမ်းသန်းထုနေတယ်လို့ ပြောပါတယ်။

ကရင်ပြည်နယ်ရှိ မြဝတီ၊ ကော့ကရိတ်နဲ့ ကြာအင်းဆိပ်ကြီးမြို့နယ်တွေမှာ မတ်လအတွင်း စစ်ကောင်စီတပ်နဲ့ KNU/KNLA ပူးပေါင်းတပ်တွေအကြား တိုက်ပွဲဖြစ်ပွားနေပြီး ပြည်သူ့နေအိမ်တွေ ပျက်စီးတာတွေ ရှိနေတယ်လို့ သိရပါတယ်။

ကရင်ပြည်နယ်ရှိ မြဝတီကုန်သွယ်ရေးဇုန်ကို တိုက်ခိုက်တာဟာ မိုက်မဲတဲ့လုပ်ရပ်ဖြစ်တယ်လို့ စစ်ကောင်စီရဲ့ ပြန်ကြားရေးတာဝန်ခံ ဗိုလ်ချုပ်ဇော်မင်းထွန်းက မတ်လ ၂၇ ရက်မှာ  ပြောထားပါတယ်။

စစ်တပ်အာဏာသိမ်းတဲ့ ၂၀၂၁ ခု ဖေဖော်ဝါရီလကစပြီး ၂၀၂၂ ခု ဒီဇင်ဘာလအထိ ကေအန်ယူ ထိန်းချုပ်နယ်မြေတွေမှာ လေကြောင်းတိုက်ခိုက်မှု ၂၃၀ ရှိခဲ့ပြီး ပြည်သူတွေရဲ့ အိုးအိမ် အသက် ဆုံးရှုံးမှုများစွာ ရှိခဲ့တယ်လို့ ကေအန်ယူက အစီရင်ခံစာ ထုတ်ပြန်ပြောပါတယ်။

မြန်မာစစ်တပ်ရဲ့ စစ်ရာဇဝတ်မှုတွေကြောင့် ရှင်သန်မှု ပျောက်ဆုံးနေရသော လူသားများ ဆိုတဲ့ အစီရင်ခံစာကို မတ်လ ၂၇ ရက်နေ့မှာ ထုတ်ပြန်လိုက်တာဖြစ်ပြီး ၂၀၂၁ ခုနှစ် ဖေဖော်ဝါရီ ၁ ရက် အာဏာသိမ်းယူခဲ့တဲ့ စစ်ကောင်စီရဲ့ ၂ နှစ်တာကာလအတွင်း ကျူးလွန်ခဲ့​တဲ့ စစ်ရာဇဝတ်မှုတွေနဲ့ လူ့အခွင့်အရေး ချိုးဖောက်မှုတွေကို ကေအန်ယူ - လူ့အခွင့်အရေး ကော်မတီ သုတေသနနဲ့ မှတ်တမ်းဌာနခွဲက ပြုစုထုတ်ပြန်ခဲ့တာပါ။

၂ နှစ်အတွင်း စစ်ကောင်စီက ပြည်သူလူထုကို ရန်သူသဖွယ် ပစ်မှတ်ထားကာ လေကြောင်းတိုက်ခိုက်မှု အကြိမ်ရေ ၂၃၀ တိတိ ကျူးလွန်ခဲ့ပြီး ပြည်သူ့နေအိမ် ၁၈၄ လုံး၊ ပြည်သူသေဆုံးမှု ၂၂ ဦး၊ ပြည်သူထိခိုက်မှု ၄၄ ဦးထိ ရှိခဲ့ကြောင်း အဆိုပါအစီရင်ခံစာမှာ ဖော်ပြပါတယ်။

အလားတူ စစ်ရဟတ်ယာဉ် အသုံးပြုတိုက်ခိုက်မှုကြောင့် ပြည်သူလူထုပိုင် အဆောက်အအုံ ၁၄ လုံး (စပါးကျီ၊ စပါးကြိတ်စက်၊ ဈေးဆိုင်)၊ ဆေးရုံ ၄ ခု၊ စာသင်ကျောင် ၃ ကျောင်း၊ ဘုန်းကြီး/သီလရှင်ကျောင်း ၃ ကျောင်းနဲ့ ဘုရားကျောင်း ၃ ကျောင်း ပျက်စီးခဲ့တယ်လို့ ဆိုပါတယ်။

အာဏာသိမ်းကာလ စစ်တပ်ရဲ့ ပြည်သူတွေအပေါ် ကျူးလွန်တဲ့ ဖြစ်စဉ် ၁၉ မျိုး အကြိမ်ရေ ၁,၅၀၀ နီးပါးထဲမှာ ပြည်သူလူထုကို ခြမ်းခြောက်တာ၊ ဂိတ်စခန်းတွေကို တိုးချဲ့တာ၊ လူထုကို စစ်ဆေးပစ်ခတ်ဖြိုခွင်းတာ၊ အတင်းအဓမ္မ ပြောင်းခိုင်းတာအပြင် စစ်သား အတင်းလုပ်ခိုင်းတာတွေ ပါသလို ညှဉ်းပန်းနှိပ်စက်တာ၊ နေအိမ်တွေကို ဖျက်ဆီးတာနဲ့ နေအိမ်ကို မွှေနှောက်ကာ လိုချင်တဲ့အရာတွေ ယူသွားတာ၊ ပြည်သူ့နေအိမ်တွေကို မီးရှို့တာ၊ ပေါ်တာဆွဲတာနဲ့ ဖမ်းဆီးသတ်ဖြတ်တာတွေ ပါဝင်ပါတယ်။

မြန်မာစစ်တပ်ရဲ့ နည်းမျိုးစုံနဲ့ လူ့အခွင့်အရေး ချိုးဖောက်မှုကြောင့် ကျေးရွာနေ ပြည်သူ ၁၉၂ ဦး သေဆုံးခဲ့ရပြီး ၄၈၅ ဦး ထိခိုက်ဒဏ်ရာရရှိခဲ့ကာ ပေါ်တာဆွဲ၊ လူသားဒိုင်းအဖြစ် ဖမ်းဆီးတာနဲ့ အကြောင်းမဲ့ဖမ်းဆီးခံရသူပေါင်း ၁,၃၀၁ ဦးရှိတယ်လို့ အစီရင်ခံစာမှာ ဖော်ပြပါတယ်။

စစ်ကောင်စီရဲ့ လက်နက်ကြီးနဲ့ လေကြောင်းတိုက်ခိုက်မှုကြောင့် အဆောက်အဦ အလုံး ၂၀၊ ဆေးရုံ ၆ လုံး၊ စာသင်ကျောင်း ၁၃ ကျောင်း၊ ဘုန်းကြီးကျောင်းနဲ့ သီလရှင်ကျောင်း ၈ ကျောင်း၊ ဘုရားကျောင်း ၆ ကျောင်း ပျက်စီးသွားတယ်လို့ အစီရင်ခံထားပါတယ်။

ဒါ့အပြင် ကေအန်ယူအုပ်ချုပ်တဲ့ဒေသတွေမှာ အမျိုးသမီးတွေအပေါ် အကြမ်းဖက်တဲ့ လူ့အခွင့်အရေး ချိုးဖောက်မှုဆိုင်ရာ ကိစ္စရပ်တွေကို အဓိက မှတ်တမ်းပြုစုတဲ့ ကရင်အမျိုးသမီးအစည်းအရုံး (KWO) ရဲ့ ထုတ်ပြန်ချက်ကို ကိုးကားပြီးတော့လည်း ၁ ရက်နေ့မှစတင်ကာ ကော်သူးလေဒေသအတွင်းရှိ အသတ်ခံရတဲ့ အမျိုးသမီး ၃၀ ရှိပြီး ဒဏ်ရာရတဲ့ အမျိုးသမီး ၁၁၇ ဦးရှိခဲ့ကြောင်းလည်း ဖော်ပြပါတယ်။

ကော်သူးလေ အုပ်ချုပ်ရေးနယ်မြေအတွင်း တိုက်ပွဲတွေ နေ့စဉ်ရက်ဆက် ဖြစ်ပွားနေတဲ့အတွက် ပြည်သူလုထု ၃၆၅,၁၈၇ ဦးမှာ စစ်ဘေးလွတ်ရာကို ထွက်ပြေးတိမ်းရှောင်နေကြရပြီး အရေးပေါ် လူသားချင်းစာနာမှု အကူအညီတွေ လိုအပ်နေကြောင်းလည်း ထောက်ပြထားပါတယ်။

ကမ္ဘာ့ကုလသမဂ္ဂအနေနဲ့ အရပ်သားပြည်သူတွေ တိုက်ခိုက်ခံရခြင်းမှ ကာကွယ်နိုင်ရေးနဲ့ လူသားချင်း စာနာထောက်ထားမှု အကူအညီတွေ ပံ့ပိုးနိုင်ဖို့အတွက် မြန်မာနိုင်ငံမှာ  စစ်ရေးအရ လေယာဉ်မပျံသန်းရဇုန်ကို ကြေညာပြီး လိုက်နာမှုရှိစေဖို့နဲ့ နိုင်ငံတကာမှ တာဝန်ယူ စောင့်ကြပ်ပေးဖို့ တောင်းဆိုထားပါတယ်။

ဒါ့အပြင် အရပ်သားပြည်သူတွေကို အကာအကွယ်ပေးနိုင်တဲ့ လုံခြုံတဲ့နေရာတွေ (safe zones) ထောက်ပံ့ပေးဖို့၊ ပြည်တွင်းနေရပ်စွန့်ခွာသူ စစ်ဘေးရှောင် (IDPs) စခန်း၊ ဆေးရုံ၊ ဆေးခန်းနဲ့ စာသင်ကျောင်းတွေလို နေရာတွေ တိတိကျကျ သတ်မှတ်ကြေညာဖို့ ကေအန်ယူက တောင်းဆိုထားပါတယ်။

နိုင်ငံတကာအစိုးရတွေအနေနဲ့ နိုင်ငံတကာတရားစီရင်ရေး ယန္တရားအနေနဲ့ကလည်း ဒီလို နိုင်ငံတကာ လူသားချင်းစာနာထောက်ထားတဲ့ ဥပဒေတွေကို ပြောင်ပြောင်တင်းတင်း ကျူးလွန်သူ၊ အမိန့်ပေးစေခိုင်းတဲ့ အာဏာသိမ်းစစ်ကောင်စီကို တာဝန်သိစွာ ပြစ်ဒဏ်ပေး အရေးယူပေးဖို့လည်း တောင်းဆိုထားပါတယ်။

အိမ်နီးချင်း ထိုင်းနိုင်ငံအစိုးရအနေနဲ့လည်း တိုက်ပွဲကနေ ထွက်ပြေးတိမ်းရှောင်နေသူတွေကို  နိုင်ငံတကာအဖွဲ့အစည်းတွေနဲ့ ဝင်ရောက်တွေ့ဆုံခွင့်နဲ့ လိုအပ်တဲ့ အကူအညီတွေ ပေးအပ်နိုင်ရေး ကူညီပံ့ပိုးမှုတွေ ဆောင်ရွက်ပေးဖို့လည်း တောင်းဆိုထားပါတယ်။

ကရင်ပြည်နယ်၊ ကော့ကရိတ်မြို့နယ်မှာ ပြီးခဲ့တဲ့ မတ် ၂၅ ရက်နဲ့ ၂၆ ရက်တွေက ကျုံဒိုး မြို့ပြစစ်ဆင်ရေး ၂ ရက်တာတိုက်ပွဲတွေအတွင်း စစ်ကောင်စီတပ်တွေဘက်က ၁၅ ယောက်ထက်မနည်း သေဆုံးခဲ့ပြီး ထိခိုက်ဒဏ်ရာ အပြင်းအထန်ရလို့  တပ်ပျက်ကာ စစ်ကြောင်းလိုက်ထွက်ပြေးခဲ့ရတယ်လို့  Lion Battalion Commando - ဗျူဟာစစ်ကြောင်းက ပြောပါတယ်။

အဆိုပါ မြို့ပြစစ်ဆင်ရေးတိုက်ပွဲမှာတော့ ဗျူဟာမှူး ဗိုလ်အယ်စေးဝါ ဦးဆောင်ပြီးတော့ Lion Battalion Commando - ဗျူဟာစစ်ကြောင်းနဲ့ ကရင့်တော်လှန်ရေးတပ်ဖွဲ့တွေ၊ တခြားသော PDF ပူးပေါင်းစစ်ကြောင်း တွေက ကျုံဒိုးမြို့အခြေစိုက် ခမရ (၅၄၅/ ၅၄၆)၊ ကျုံဒိုးရဲစခန်း၊ ဂျိုင်းတံတားနဲ့ ငါးတိုင်အလယ်တန်းစာသင်ကျောင်းအတွင်း တပ်စွဲထားကြတဲ့ အကြမ်းဖက်စစ်ကောင်စီ၊ လက်အောက်ခံ နယ်ခြားစောင့်တပ် BGF နဲ့ ရဲတွေကို မတ် ၂၅ ရက်မနက် ၇ နာရီခွဲလောက်ကတည်းက ထိုးဖောက်ဝင်ရောက်တိုက်ခိုက်ခဲ့ကြတာလို့ ဆိုပါတယ်။

တိုက်ပွဲတွေအတွင်းမှာတော့ Lion Battalion Commando - ဗျူဟာစစ်ကြောင်းဘက်က ရဲဘော်တွေ ဖြစ်ကြတဲ့ မိုးသက်မောင်မောင်(ခ)အရှည်ကြီး ၊ မျိုးမင်းလှိုင်(ခ)မျိုးကြီးနဲ့ သရဲနီတို့က ဖက်ဒရယ်ဒီမိုကရေစီ တော်လှန်ရေးနဲ့ ပြည်သူလူထုလွတ်မြောက်ရေးအတွက် မြင့်မြတ်စွာကျဆုံးခဲ့တယ်လို့ ထုတ်ပြန်ချက်မှာဖော်ပြထားပါတယ်။ သူတို့ရဲ့ ပေးဆပ်မှုကို တန်ဖိုးထားလေးစားဂုဏ်ယူစွာနဲ့ အကြမ်းဖက်စစ်တပ်ကို ဆက်လက် တိုက်ထုတ်ပြီးတော့ တော်လှန်ရေးအောင်မြင်သည်ထိဆက်လက်လုပ်ဆောင်သွားမယ်လို့လည်း ကတိပြုထားပါတယ်။

မြန်မာနိုင်ငံမှာ စစ်တပ်က မတရား အကြမ်းဖက် အာဏာသိမ်းယူထားခဲ့တဲ့ ကာလဟာ ၂ နှစ်ကျော်အထိ ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေး မတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး ကဏ္ဍအသီးသီးမှာ အဘက်ဘက်က ကျဆင်းနေခဲ့တာပါ။

အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက် သတ်ဖြတ်နေမှုတွေကို မြန်မာပြည်သူလူထုတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပြီး နိုင်ငံတဝန်းမှာတော့ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေလည်း တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။

NUG အစိုးရကတော့ ပြည်သူ့ခုခံတွန်းလှန်စစ်ပွဲ စတင်ခဲ့တဲ့ ၁ နှစ်အတွင်း အကြမ်းဖက် စစ်ကောင်စီဘက်က တပ်ဖွဲ့ဝင်ပေါင်း ၂၀,၁၅၀ ကျော်သေဆုံးကာ ဒဏ်ရာရသူ ၇,၀၀၀ ကျော်လောက်ရှိလာပြီး စစ်ကောင်စီ စိုးမိုးအုပ်ချုပ်နိုင်တဲ့နေရာဟာ တိုင်းပြည်နယ်မြေ အကျယ်အဝန်းရဲ့ ထက်ဝက်တောင် မရှိတော့ဘူးလို့ NUG ယာယီသမ္မတ ဒူဝါလရှီးလက ပြောကြားထားပါတယ်။

အကြမ်းဖက်စစ်တပ်ရဲ့ လုပ်ရပ်တွေကို သတိကြီးစွာထားကြဖို့ တိုင်းရင်းသားခေါင်းဆောင်တွေ အားလုံးကို အမျိုးသားညီညွတ်ရေးအစိုးရ (NUG) ယာယီသမ္မတ ဒူဝါလရှီးလက တိုက်တွန်းလိုက်ပါတယ်။

“အကြမ်းဖက်စစ်ကောင်စီဟာ တိုင်းရင်းသားအဖွဲ့အစည်းအချို့နဲ့ တွေ့ဆုံပြီး အတုအယောင် ငြိမ်းချမ်းရေးညီလာခံကို ဖန်တီးဖို့ လုပ်ဆောင်နေတာကို တွေ့မြင်နေရပါတယ်။ ဖက်ဆစ်စစ်တပ်ဟာ သူတို့ရဲ့ ပြုမူနေကျ အလေ့အထအတိုင်းပဲ တိုင်းရင်းသားတွေအကြားမှာ နည်းမျိုးစုံနဲ့ သွေးခွဲသပ်လျှိုဖို့ ကြိုးစားနေတယ်ဆိုတာကို လယ်ပြင်မှာ ဆင်သွားသလို အထင်အရှားပဲ တွေ့မြင်နေရပါတယ်။ ဒါကြောင့် ကျနော်တို့အားလုံး စစ်တပ်ရဲ့ ထောင်ချောက်ကို သတိကြီးကြီးနဲ့ စောင့်ကြည့်နေရမယ့်အချိန်လည်း ဖြစ်ပါတယ်။ တိုင်းရင်းသားခေါင်းဆောင်တွေ အားလုံးကိုလည်း အကြမ်းဖက်စစ်တပ်ရဲ့ လုပ်ရပ်တွေကို သတိကြီးစွာ ထားကြဖို့အတွက် အလေးအနက် တိုက်တွန်းလိုပါတယ်။”

မတ် ၂၈ ရက် ဒီကနေ့ပြုလုပ်တဲ့ NUG အစိုးရရဲ့ ၁၂ ကြိမ်မြောက် အစိုးရအဖွဲ့အစည်းဝေးမှာ ခုလိုပြောလိုက်တာဖြစ်ပြီး အစည်းအဝေးကို ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်းတို့ အပါအဝင် ပြည်ထောင်စုဝန်ကြီးတွေ၊ ဒုဝန်ကြီးတွေ တက်ရောက်ခဲ့ကြပါတယ်။

ဒါ့အပြင် စစ်အုပ်စုက အတင်းအကျပ်ပြုလုပ်ဖို့ ကြိုးစားနေတဲ့ ရွေးကောက်ပွဲနဲ့ ပတ်သက်ပြီးတော့လည်း “တချိန်တည်းမှာပဲ အကြမ်းဖက်စစ်တပ်ရဲ့ အတုအယောင် ရွေးကောက်ပွဲမှာ ပါတီကို မှတ်ပုံမတင်ကြ၊ ရွေးကောက်ပွဲကို အသိအမှတ် မပြုကြတဲ့ နိုင်ငံရေးပါတီများ အားလုံးကိုလည်း လေးစားဂုဏ်ပြုကြောင်း ဒီနေရာကနေ ပြောလိုပါတယ်။ ဒါ့အပြင် ဖက်ဆစ်အကြမ်းဖက်ခေါင်းဆောင် မင်းအောင်လှိုင်ဟာ သူ့ရဲ့ လက်ဝေခံ လက်နက်ကိုင်အဖွဲ့ကို ကောင်းစွာမထိန်းချုပ်နိုင်တော့တဲ့အပြင် လက်တွေ့မှာလည်း ကျနော်တို့ အမျိုးသားညီညွတ်ရေးအစိုးရနဲ့ ပြည်သူ့ကာကွယ်ရေးတပ်ဖွဲ့တွေရဲ့ နယ်မြေစိုးမိုးထားနိုင်မှုကို ထိတ်လန့်ကြောက်ရွံ့လျက်ရှိတာကို တွေ့ရပါတယ်။ ဖက်ဆစ်တော်လှန်ရေးနေ့ကို ပုံဖျက်ထားတဲ့နေ့မှာ တော်လှန်ရေးအင်အားစုတွေကို အမြစ်ဖြတ်ချေမှုန်းမယ်ဆိုတဲ့ စကားဟာ စစ်အုပ်စုရဲ့ ကြောက်စိတ်ကို ဖော်ပြနေတယ်ဆိုတာ ထင်ရှားပါတယ်” လို့ ယာယီသမ္မတ ဒူဝါလရှီးလက ပြောပါတယ်။

ဒါ့အပြင် NUG အစိုးရအနေနဲ့ ကြားကာလ လုပ်ငန်းတာဝန်တွေကို တစိုက်မတ်မတ် လုပ်ဆောင်နေတယ်ဆိုတာနဲ့ ဒီလိုလုပ်ဆောင်ရာမှာ အာဏာသိမ်းစစ်အုပ်စုရဲ့ အကြမ်းဖက်လုပ်ရပ်တွေကို အထောက်အပံ့ဖြစ်စေတဲ့ စီးပွားရေးနဲ့ ဘဏ္ဍာရေး အရင်းအမြစ်တွေ လျော့ပါးချည့်နဲ့သွားအောင် လုပ်ဆောင်ဖို့ကလည်း တခုအပါအဝင် ဖြစ်တယ်လို့ ဆိုပါတယ်။

ပြည်ထောင်စုဝန်ကြီးချုပ် မန်းဝင်းခိုင်သန်းကတော့ “ကျနော်တို့ တော်လှန်ရေး အင်အားစုတွေအတွက် အချိန်က အကန့်အသတ်ရှိနေတယ် ဆိုတာကို အမြဲသတိရနေဖို့ လိုပါတယ်။ အချိန်အကန့်အသတ်ကြားက ရလဒ်ကောင်းတွေ ထွက်နိုင်ဖို့ ကြိုးစားရမှာ ဖြစ်ပါတယ်။ အဲဒီလိုလုပ်ဖို့ဆိုရင် ကျနော်တို့တွေအားလုံး ပိုမိုစုစည်းကြဖို့ လိုအပ်ပါတယ်။ အစိုးရအဖွဲ့အတွင်းမှာလည်း စုစုစည်းစည်း၊ အားကောင်းကောင်းနဲ့ မောင်းနှင်ဖို့လိုသလို မဟာမိတ်အင်အားစုတွေနဲ့လည်း ပိုမိုကျစ်လျစ်တဲ့ စုစည်းအားနဲ့ ရှေ့ဆက်နိုင်ကြဖို့ လိုအပ်မှာ ဖြစ်ပါတယ်။ ကျနော်တို့အစိုးရအနေနဲ့ ပြည်ပ နိုင်ငံတကာဆက်ဆံရေးဘက်မှာ လုပ်သင့်လုပ်ထိုက်တာတွေ အချိန်နဲ့တပြေးညီ ဆောင်ရွက်နေသလို ပြည်တွင်းက အားစိုက်ရမယ့် ခုခံတော်လှန်စစ်နဲ့အတူ အုပ်ချုပ်ရေး ဖော်ဆောင်နေတဲ့ နေရာဒေသတွေ ဘက်မှာလည်း ကာကွယ်ရေး၊ အုပ်ချုပ်ရေးကဏ္ဍတွေကို တပြိုင်နက် စီမံဆောင်ရွက်နေကြတာ အားလုံးအသိပဲ ဖြစ်ပါတယ်။ ဒီတပတ်အတွင်းမှာဆိုရင် စစ်ရေးအရှိန်မြှင့်လာမှုနဲ့အတူ တော်လှန်ရေးဘက်တော်သားတွေဘက်မှာလည်း ထိခိုက်ကျဆုံးတာတွေကို စိတ်မကောင်းစွာ ကြားသိရပါတယ်။ ဒီအတွက်လည်း တာဝန်ရှိတဲ့ ဝန်ကြီးဌာနတွေအနေနဲ့ အတူတကွ ပေါင်းစပ်ပြီး စနစ်တကျ ကိုင်တွယ်စီမံ ဆောင်ရွက်ကြဖို့ လိုအပ်မှာဖြစ်ပါတယ်” လို့ ပြောပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပါတယ်။

နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ် တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

ထိုင်းနိုင်ငံနဲ့ နယ်စပ်ထိစပ်နေပြီး  ကရင်ပြည်နယ်၊ ဖာပွန်ခရိုင် ကေအန်ယူ တပ်မဟာ ၅ နယ်မြေ သံလွင်မြစ်ကမ်းပေါ်ရှိ မယ်ခါးထာ့စစ်ကောင်စီတပ်စခန်းပါအဝင် စခန်း ၃ ခုကို ကရင်အမျိုးသားလွတ်မြောက်ရေးတပ်မတော် (KNLA)က မတ်လ ၂၈ ရက် ဒီကနေ့ မနက်ပိုင်းမှာ တိုက်ခိုက်သိမ်းပိုက်လိုက်ပါတယ်။

ဒီမနက် ၅ နာရီလောက်တည်းက ပစ်ခတ်သံတွေ ကြားခဲ့ရကြောင်း တိုက်ပွဲဖြစ်တဲ့ နေရာနဲ့ကပ်နေတဲ့ ထိုင်းနိုင်ငံဘက်ခြမ်းရှိ ကရင်ဒေသခံတွေက ပြောပါတယ်။

ဆယ်စုနှစ်တွေနဲ့ချီပြီး မြန်မာစစ်တပ်တွေတပ်စွဲထားတဲ့ ဒီစခန်းကို မသိမ်းပိုက်ခင် CDM လုပ်ဖို့ ဒါမှမဟုတ် စခန်းကနေခွာဖို့၊ အလံဖြူထောင်ဖို့ သတိပေးခဲ့ပေမယ့် ပြုလုပ်ခြင်းမရှိတဲ့အတွက် KNLA ဘက်က တက်ရောက်သိမ်းပိုက်ခဲ့တာလို့ ဆိုပါတယ်။

မယ်ခါးထာ့ စခန်းကို  ဒီကနေ့မနက် ၈ နာရီလောက်က  မီးရှိုဖျက်ဆီးခဲ့တယ်လို့ ကေအန်ယူသတင်းအရင်းမြစ်ဘက်ကပြောပေမဲ့ ကျန်စခန်း နှစ်ခုကိုတော့ သတင်းထုတ်ပြန်တာ မရှိသေးပါဘူး။   

ဒီတိုက်ခိုက်မှုအတွင်း ထိခိုက်သေဆုံးမှုအခြေအနေတွေကိုတော့ ကေအန်ယူဘက်က ထုတ်ပြန်ထားတာမရှိသေးပေဲ့ ဒေသခံတွေဘက်ကတော့ ဒဏ်ရာရတဲ့လူနာတချို့ကို ထိုင်းဘက်ခြမ်း ပို့ဆောင်တာတွေ့ရှိတယ်လို့ ဆိုပါတယ်။

ဒီတိုက်ခိုက်မှုဖြစ်ပြီးနောက် စစ်ကောင်စီဘက်က လေယာဉ်တွေနဲ့လာရောက် ပျံသန်းနေကြောင်းလည်း ဒေသခံတွေက ပြောပါတယ်။ 

သော်လဲထကျေးရွာနဲ့ မျက်နှာချင်းဆိုင် သံလွင်မြစ်ဖက်ကမ်းက စစ်ကောင်စီတပ်စခန်းပါအဝင်၊ ဒါးကွင်၊ မယ်ခါးထာ့စခန်းတွေဟာ ၁၉၉၅ ခု ဒီကေဘီအေ ငြိမ်းချမ်းရေးယူပြီး နောက်ပိုင်း အဆိုပါဒေတွေထဲကို စစ်တပ်တွေက ဝင်ရောက် နေရာယူခဲ့တာဖြစ်ပါတယ်။