စစ်ကောင်စီတပ်

September 19, 2021

သင်းအုပ်ဆရာကို စစ်တပ်က ပစ်သတ်၊ လက်ချောင်းဖြတ် လက်စွပ်ယူသွားသည့်အပေါ် အပြင်းအထန် ရှုတ်ချ

ခရစ်ယာန် သင်းအုပ်ဆရာ ကျုံးဗျက်ဟုမ်းကို စစ်ကောင်စီတပ်က ပစ်သတ်ပြီး သူ့ရဲ့ နာရီ၊ ဖုန်းနဲ့ မင်္ဂလာရွှေလက်စွပ်ကိုလည်း လက်ချောင်းဖြတ် လုယူသွားတဲ့အပေါ်  အပြင်းအထန် ကန့်ကွက်ရှုတ်ချကြောင်း ချင်းနှစ်ခြင်း ခရစ်ယာန်အဖွဲ့ချုပ်က စက်တင်ဘာ ၁၉ ရက်နေ့စွဲနဲ့ ထုတ်ပြန်ပါတယ်။

စက်တင်ဘာ ၁၈ ရက်က ချင်းပြည်နယ် ထန်တလန်မြို့မှာ စစ်ကောင်စီတပ်တွေက လက်နက်အလွန်အကျွံအသုံးပြု ပစ်ခတ်တိုက်ခိုက်ခဲ့တာကြောင့် မြို့ပေါ်နေ ပြည်သူတွေရဲ့ နေအိမ် တွေ မီးလောင်ခဲ့တာဖြစ်ပြီး  မီးငြှိမ်းသတ်ဖို့ ပြင်ဆင်နေတဲ့ နှစ်ခြင်းခရစ်ယာန်လူငယ်တွေကို စစ်တပ်က ပစ်ခတ်ခဲ့လို့  ထန်တလန်ရာပြည့်နှစ်ခြင်းခရစ်ယာန်အသင်းဝင် သင်းအုပ်ဆရာ ကျုံးဗျက်ဟုမ်း သေဆုံးသွားခဲ့တာ ဖြစ်ပါတယ်။

စစ်ကောင်စီတပ်တွေဟာ ခရစ်ယာန်ဘုရားကျောင်းတွေမှာ တပ်စွဲထားတာ၊ ဘုရားကျောင်းတွေထဲမှာ အရက်သေစာသောက်စားတာ၊ သမ္မာကျမ်းစာတွေနဲ့ ဓမ္မသီချင်းစာအုပ်တွေကို ဖျက်ဆီးတာ၊ လက်နက်ကြီးလက်နက်ငယ်တွေနဲ့ ဘုရားရှိခိုးကျောင်း အဆောက်အဦတွေကိုပစ်ခတ်ဖျက်ဆီးတာ၊ မြို့တွေ ရွာတွေမှာရှိတဲ့ လူနေအိမ်တွေကို မီးလောင်ကျွမ်းတာစတဲ့ ရိုင်းစိုင်းတဲ့ အပြုအမှုတွေလုပ်ဆောင်ကာ ယုံကြည်ကိုးကွယ်တဲ့ ဘာသာတရားကို စော်ကားနေတယ်လို့လည်း ဆိုပါတယ်။ 

မြန်မာစစ်တပ်ရဲ့ ပြုမူလုပ်ဆောင်မှုတွေဟာ လက်ရှိပြည်တွင်းနိုင်ငံရေး ပဋိပက္ခတွေထက်ပင် ပိုမိုရှုပ်ထွေးကြီးမားတဲ့ ဘာသာရေးနဲ့ လူမျိုးရေးအသွင်ဆောင်တဲ့ ပြည်တွင်းပဋိပက္ခဖြစ်ပေါ်စေနိုင်တဲ့ အတွက် အပြင်းအထန် ကန့်ကွက်ရှုတ်ချကြောင်းလည်း ချင်းနှစ်ခြင်း ခရစ်ယာန်အဖွဲ့ချုပ်က  ထုတ်ပြန်ထားပါတယ်။

ထန်တလန်မြို့မှာ မနေ့ညက စစ်ကောင်စီတပ်တွေက လက်နက်ကြီးနယ်တွေနဲ့ ပစ်ခတ်တိုက်ခိုက်မှုကြောင့် မြို့ပေါ်က နေအိမ် ၁၉ လုံးလောက် မီးလောင်သွားတယ်လို့ ချင်းသတင်းဌာနတွေက အတည်ပြုပါတယ်။ 

ချင်းပြည်နယ်၊ ဟားခါးမြို့မှာလည်း စက်တင်ဘာ ၁၈ ရက်နေ့ညဦးပိုင်းက မြို့ပေါ်ရပ်ကွက်တစ်မှာ  ပေါက်ကွဲမှုဖြစ်ပွားခဲ့ပြီး ပစ်ခတ်သံတွေ ထွက်ပေါ်လာကာ နေအိမ်တလုံး မီးလောင်ခဲ့ပါတယ်။

ပစ်ခတ်မှုကြောင့် အရွယ်မရောက်သေးသူတွေအပါအဝင် အနည်းဆုံး သုံးဦး ထိခိုက်ဒဏ်ရာရရှိထားတယ်လို့ ဒေသခံ သတင်းမီဒီယာတခုက ဖော်ပြထားပါတယ်။

PHOTO- CRDIT

16 mins Ago

လောင်းလုံးမြို့နယ် သပိတ်စစ်ကြောင်း ပစ်ခတ်ဖြိုခွင်းခံရ

ထားဝယ်ခရိုင်၊ လောင်းလုံးမြို့နယ်အတွင်း စစ်အာဏာရှင်စနစ်ဆန့်ကျင်ရေး နေ့စဥ်ချီတက်ဆန္ဒထုတ်ဖော်နေတဲ့ သပိတ်စစ်ကြောင်းဟာ စက်တင်ဘာ ၁၉ ရက် မနက် ၉ နာရီခွဲအချိန်က အင်းဇောက်ကျေးရွာ သပိတ်စထွက်မယ့်နေရာမှာ ပစ်ခတ်ဖြိုခွင်းခံရတယ်လို့ သိရပါတယ်။

အကြမ်းဖက်စစ်ကောင်စီတပ်သား ၅ ဦးလောက် အရပ်ဝတ်၊ အိမ်စီးကားနဲ့ လာရောက်ပစ်ခတ်ဖြိုခွင်းခဲ့တာဖြစ်ပြီး လက်ရှိအချိန်ထိ ကျည်ထိမှန်သူ၊ အဖမ်းခံရသူများ ရှိ/မရှိ အတည်မပြုနိုင်သေးဘူးလို့ ဒီမိုကရေစီအရေး လှုပ်ရှားမှု  သပိတ်ကော်မတီ(ထားဝယ်ခရိုင်) က ထုတ်ပြန်ထားပါတယ်။

သပိတ်စထွက်မယ့်နေရာမှာ ကျန်ခဲ့တဲ့ ဆန္ဒပြသူတွေရဲ့ ဆိုင်ကယ် အစီး ၂၀ လောက်ကိုလည်း အကြမ်းဖက်စစ်ကောင်စီတပ်တွေက လာရောက်သိမ်းယူဖို့ လုပ်နေတယ်လို့ သိရပါတယ်။

စက်တင်ဘာ ၁၇ ရက်နေ့ မနက်ပိုင်းကလည်း အောက်ရေဖြူကျေးရွာအုပ်စုမှာ အကြမ်းဖက်စစ်ကောင်စီတပ်က အသက်မပြည့်သေးတဲ့ အမျိုးသမီးငယ် အပါအဝင် ဒေသခံပြည်သူ ၁၂ ယောက်လောက်ကို ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။

မနေ့ညနေ ၆ နာရီခွဲလောက်ကလည်း အကြမ်းဖက်စစ်ကောင်စီ တပ်သားတွေရဲ့ ပစ်ခတ်မှုကြောင့်‌ အောက်ရေဖြူကျေးရွာအုပ်စု ကဒက်ငယ်ထိန်ကျေးရွာက ၁၅ နှစ်အရွယ် လူငယ် ၁ ဦး သေဆုံးခဲ့ပါတယ်။

တနင်္သာရီတိုင်း ထားဝယ်ခရိုင် လောင်းလုံးမြို့နယ်မှာ စစ်အာဏာရှင်ဆန့်ကျင်ရေး နေ့စဉ်ဆိုသလို ဆန္ဒပြနေကြတာလည်း ဖြစ်ပါတယ်။

1 hour Ago

စံပြကျေးရွာတွင် မိုင်းပေါက်ကွဲမှုကြောင့် ၇ နှစ်ရွယ် ကလေးငယ် ၁ ဦး ဒဏ်ရာရ

ပုလဲမြို့နယ်နဲ့ မြိုင်မြို့နယ်စပ်က စံပြကျေးရွာမှာ စက်တင်ဘာ ၁၈ ရက်နေ့ ညနေ ၅ နာရီလောက်က စစ်ကောင်စီတပ် ထောင်ထားတဲ့ မိုင်းပေါက်ကွဲမှုကြောင့် ၇ နှစ်ရွယ်က ကလေးငယ်တစ်ဦး ဒဏ်ရာရခဲ့တယ်လို့ ကျေးရွာသားတွေဆီက သိရပါတယ်။

“ညနေ ၅ နာရီလောက်က ပေါက်ကွဲတာဗျ။ ကလေးက ခရမ်းစိုက်ခင်းထဲ ပြေးလွှား ဆော့နေတာကနေ ခရမ်းပင်ကို အပ်ချည်ကြိုးချည်ထားပြီး တစ်ဖက်က လက်ပစ်ဗုန်းစနက်တံကို ချည်ပြီး တိုက်မိုင်းပုံစံ လုပ်ခဲ့ဟန်တူပါတယ်။ အဲဒီကြိုးကို ကလေးက ကစားရင်းတိုက်ပြီး ပေါက်ကွဲသွားတယ်။ ကလေး ကံကောင်းသွားတယ်လို့ ပြောရမှာပေါ့ဗျာ။ ဝမ်းဗိုက် ရှပ်ထိသွားတာ။ အသက်အန္တရာယ်တော့ မစိုးရိမ်ရပါဘူး” လို့ စံပြရွာသားတဦးက ပြောပါတယ်။

စံပြကျေးရွာအတွင်းမှာ အကြမ်းဖက်စစ်ကောင်စီတပ်တွေက ပြီးခဲ့တဲ့ရက်ပိုင်းက ဝင်ရောက်တပ်စွဲပြီး အပြစ်မဲ့ ရွာသားနှစ်ဦးကို မီးရှို့သတ်ဖြတ်ခဲ့ကာ နောက်ထပ်ရွာသား ၁ ဦးကိုလည်း ညှဉ်းပန်းနှိပ်စက်သတ်ဖြတ်ခဲ့ကြပါတယ်။

ဒါ့အပြင် ကျေးရွာအတွင်းက ကားတစ်စီးနဲ့ ဆိုင်ကယ်အများအပြားကိုလည်း မီးရှို့ခဲ့ကြတယ်လို့ ဒေသခံတွေဆီက သိရပါတယ်။

4 hours Ago

မုံရွာမြို့တွင် အချဉ်ပေါင်းသည် မတင်တင်အေး အပါအဝင် ပြည်သူ ၃ ဦး ဖမ်းဆီးခံရ

စစ်ကိုင်းတိုင်း မုံရွာမြို့မှာ အချဉ်ပေါင်းသည် မတင်တင်အေး စက်တင်ဘာ ၁၈ ရက်က ဒုတိယအကြိမ် ထပ်မံဖမ်းဆီးခံလိုက်ရပါတယ်။

စက်တင်ဘာ ၁၈ ရက် ညနေ ၅ နာရီဝန်းကျင်မှ စစ်ကောင်စီတပ်တွေ မတင်တင်အေးရဲ့ညီမ အသီးရောင်းဆိုင်ရှေ့မှာ အရပ်ဝတ်တွေနဲ့ လာရောက်ဖမ်းဆီးခေါ်ဆောင်သွားတယ်လို့ မျက်မြင်တစ်ဦးက ပြောပါတယ်။

အချဉ်ပေါင်းသည် မတင်တင်အေးဟာ အာဏာသိမ်းစစ်တပ်က သပိတ်စစ်ကြောင်းကို စတင်ဖြိုခွဲခဲ့တဲ့ ဖေဖော်ဝါရီ ၂၇ ရက်က ပြသာဒ်ကျောင်းအနီးမှာ ပထမအကြိမ် ဖမ်းဆီးခံရသူ တစ်ဦးလည်း ဖြစ်ပါတယ်။

ဒါ့အပြင် မနေ့ ညနေပိုင်းမှာ မုံရွာမြို့ ဒေါင်းကျောင်းရှေ့ ပန်းရောင်းတဲ့ ဈေးသည် လင်မယား နှစ်ဦး အပါအဝင် အချဉ်ပေါင်းသည် မတင်တင်အေးတို့ကို စစ်ကောင်စီတပ်တွေက ဖမ်းဆီးခဲ့တာဖြစ်ပြီး ဘာကြောင့်ဖမ်းတယ်ဆိုတာ မသိရသေးပါဘူး။

4 hours Ago
More News
Up