စက်သုံးဆီဈေးနှုန်းမြင့်တက်

August 16, 2022

ကရင်နီ (ကယား) ပြည်နယ်၌ စက်သုံးဆီ ဈေးနှုန်းမြင့်တက်၊ အကန့်အသတ်ဖြင့် ရောင်းချ

ကရင်နီ(ကယား)ပြည်နယ်၊ လွိုင်ကော်မြို့မှာ စက်သုံးဆီပြတ်လပ်မယ့် အနေအထား ရှိနေတဲ့အတွက် စက်သုံးဆီအရောင်းဆိုင် တော်တော်များများက စက်သုံးဆီကို အကန့်အသတ်နဲ့သာ ရောင်းချပေးတော့တယ်လို့ မြို့ခံတွေက ပြောပါတယ်။

မနေ့ ဩဂုတ် ၁၅ ရက်ကစပြီး ဒီလိုအကန့်အသတ်နဲ့သာ ရောင်းချပေးနေတာဖြစ်ပြီး ဓာတ်ဆီ တလီတာကို ကျပ် ၂,၅၀၀ ဈေးနဲ့ ရောင်းချနေကြောင်း မြို့ခံတယောက်က ပြောပါတယ်။

“လွိုင်ကော်လည်း ပြတ်ခါနီးပဲ။ လိုသလောက်မရဘူး။ မနေ့ကသွားထည့်တာ ၂၀,၀၀၀ ဖိုးပဲရတယ်၊ အိမ်စီးကား။”

နောက်ထပ် ဒေသခံတယောက်ကလည်း ဒီကနေ့မနက် ကားဆီသွားထည့်တာ ကျပ် ၁၀,၀၀၀ ဖိုးပဲ ဆီရောင်းပေးကြောင်း ပြောပါတယ်။

“ကားဆို တသောင်း နှစ်သောင်းဖိုး ရောင်းပေးတယ်။ ဆိုင်ကယ်က သုံးထောင်ဖိုး။ ပြတ်တော့ မပြတ်သေးဘူး။ ဒီနေ့ကပဲ သွားဝယ်တာ။ ပြည်အောင်ရတနာက တသောင်းဖိုး ရောင်းပေးတယ်။ တော်ဝင်က နှစ်သောင်းဖိုးရောင်းပေးတယ်။ ဆီတွေထပ်ဝင်ဖို့ ရှိသေးတယ်လို့ ပြောတယ်။” 

လွိုင်ကော်မြို့မှာနေတဲ့ အမျိုးသမီးတယောက်ကတော့ “ဒီနေ့ ဆိုင်ကယ် ဆီသွားထည့်တာ သုံးထောင်ဖိုး ထည့်ခဲ့တယ်။ အရင်က တထောင် နှစ်ထောင်ဆို ထည့်လို့ရပေမဲ့ အခု ဆီပြတ်မှာစိုးလို့ သုံးထောင်ဖိုး ထည့်လာခဲ့တယ်” လို့ ပြောပါတယ်။

စက်သုံးဆီ ပြတ်လပ်ခါနီးဖြစ်တဲ့ ဆိုင်တချို့မှာတော့ ကားတွေကို ဆီရောင်းချပေးတာမျိုး မရှိတော့ဘဲ ဆိုင်ကယ်တမျိုးသာ တစီးကို ကျပ် ၂,၀၀၀ တန် ရေသန့်ဘူးတဘူး ဆီထည့်ပေးနိုင်တော့တယ်လို့ ဒေသခံတချို့က ပြောပါတယ်။

လွိုင်ကော်မြို့ စက်သုံးဆီဆိုင်ကြီးတွေမှာတော့ ဓာတ်ဆီ 92 တလီတာကို ကျပ် ၂,၅၀၀ ရောင်းချနေပြီး တဂါလန်ကို ကျပ် ၁၁,၅၀၀ ဈေးရှိပါတယ်။

ဒီးမော့ဆိုမြို့နယ် အရှေ့ခြမ်းမှာတော့ ဓာတ်ဆီ၊ ဒီဇယ် လုံးဝပြတ်လပ်နေပြီး 92 တလီတာကို ကျပ် ၃,၅၀၀ အထိ ပေးဝယ်ရတယ်လို့ ဒေသခံတွေက ပြောပါတယ်။

ဒီးမော့ဆိုမြို့နယ် အနောက်ဘက်ခြမ်းမှာလည်း ဓာတ်ဆီတဂါလန် ၁၃,၀၀၀ ဈေးပေါက်ပြီး မနေ့ကတည်းက ဆီတွေ ဝယ်မရဘဲ ပြတ်နေပြီလို့ ဒေသခံတွေက ပြောပါတယ်။

ဖားဆောင်းမြို့နယ်မှာတော့ ဓာတ်ဆီ တလီတာကို ကျပ် ၃,၀၀၀၊ ဒီဇယ် တဂါလန်ကို ကျပ် ၁၅,၀၀၀၊ ပုံးဝါတပုံး ကျပ် ၇၀,၀၀၀ ဈေးရှိနေပါတယ်။

စက်သုံးဆီတွေကို လွိုင်ကော်ကနေတဆင့် ဝယ်ယူအသုံးပြုရတဲ့အတွက် လွိုင်ကော်မြို့မှာ စက်သုံးဆီ ပြတ်လပ်ရင်တော့ တခြားမြို့တွေပါ ပြတ်လပ်နိုင်တဲ့ အနေအထား ရှိနေပါတယ်။

ရန်ကုန်၊ မန္တလေး အပါအဝင် တခြားမြို့တွေမှာလည်း အခုလို စက်သုံးဆီဈေးမြင့်တက်တာ၊ ပြတ်လပ်တာတွေ ရှိနေပါတယ်။

စစ်ကောင်စီရဲ့ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းကတော့  စက်သုံးဆီပြတ်လပ်မှုတွေ ဖြစ်ပေါ်နေတယ်ဆိုတဲ့ ကောလာဟလတွေကြောင့် ဆီဆိုင်ကြီးတွေမှာ စက်သုံးဆီ ဝယ်သူများပြီး စက်ပျက်တဲ့သဘောဖြစ်ကြောင်း သီလဝါဆိပ်ကမ်းမှာ စက်သုံးဆီတင်သင်္ဘောတွေ ဆိုက်ရောက်ကုန်ချနေသလို နောက်ထပ် စက်သုံးဆီသင်္ဘော ၁၂ စီးလည်း ထပ်ဝင်လာဖို့ရှိကြောင်း ဂါလန် ၁၃ သိန်းလောက်ရှိမယ်လို့ ခန့်မှန်းရပါတယ်လို့ မနေ့က မီဒီယာတွေကို ပြောပါတယ်။

6 months Ago

July 27, 2022

စက်သုံးဆီစျေး ပြန်မြင့်တက်လာ

ရန်ကုန်စျေးကွက်မှာ မနေ့က 92 Ron  တလီတာကို ၁၇၀၀ အောက်မှာ ရှိခဲ့ပေမဲ့ ဒီကနေ့မှာ တလီတာစျေး ၁၈၀၀ ကျပ်အထက် ပြန်လည်မြင့်တက်လာပါတယ်။

စက်သုံးဆီ တင်သွင်းသိုလှောင်ဖြန်ဖြူးခြင်း လုပ်ငန်းကြီးကြပ်ရေးကော်မတီက ရန်ကုန်တိုင်းအတွက် ဒီကနေ့ သတ်မှတ်ထုတ်ပြန်တဲ့ စက်သုံးဆီ ရည်ညွှန်းစျေးနှုန်းတွေက  92  Ron တလီတာ ၁၈၁၀ ကျပ်၊ 95 Ron တလီတာ ၁၈၆၀ ကျပ်၊ ဒီဇယ်တလီတာ ၂၀၈၀ ကျပ်နဲ့ ပရီမီယမ် ဒီဇယ်တလီတာကို  ၂၁၃၅ ကျပ် ဖြစ်ပါတယ်။

မနေ့က ဖြစ်ခဲ့တဲ့ စျေးနှုန်းတွေနဲ့ယှဥ်ရင် စက်သုံးဆီအမျိုးအစားအလိုက် တလီတာကို ပျမ်းမျှ ကျပ် ၁၀၀ ၀န်းကျင် တရက်အတွင်း မြင့်တက်လာတာပါ။

စက်သုံးဆီစျေးနှုန်း တည်ငြိမ်စေဖို့အတွက် ရည်ရွယ်ပြီး စစ်ကောင်စီက ဖွဲ့စည်းထားတဲ့ လုပ်ငန်းကြီးကြပ်ရေးကော်မတီကနေ တိုင်းဒေသကြီး/ ပြည်နယ်၊ မြို့နယ်တွေအလိုက် ရည်ညွှန်းဈေးနှုန်းတွေကို နေ့စဥ် သတ်မှတ်ထုတ်ပြန်ပေးနေပြီး အဲဒီကော်မတီကို ပြီးခဲ့တဲ့ ဧပြီလနှောင်းပိုင်းမှာ စတင်ဖွဲ့စည်းခဲ့တာ ဖြစ်ပါတယ်။

ပြည်တွင်းစက်သုံးဆီ စျေးကွက်မှာ ပြီးခဲ့တဲ့ ဇွန်ဒုတိယပတ်က  92 Ron တလီတာကို ကျပ် ၂၃၀၀ အထက်ထိ မြင့်တက်ခဲ့ပြီးတော့ တစတစ ပြန်လည်ကျဆင်းလာခဲ့ပါတယ်။ တလီတာကို ၁၇၀၀ အောက်ထိ ပြန်လည်ကျဆင်းခဲ့ပြီးတော့ ဒီကနေ့မှာ ၁၈၀၀ အထက်ကို ပြန်လည်မြင့်တက်လာတာ ဖြစ်ပါတယ်။

မြန်မာနိုင်ငံမှာ စစ်တပ်က အာဏာသိမ်းပြီးနောက် မြန်မာကျပ်ငွေ တန်ဖိုးထိုးကျပြီး ပြည်ပကနေ နိုင်ငံခြားငွေနဲ့ ၀ယ်ယူ တင်သွင်းနေရတဲ့ စက်သုံးဆီစျေးနှုန်းတွေလည်း အဆမတန် မြင့်တက်နေတာပါ။

အဲဒီလိုစျေးနှုန်း ကြီးမြင့်တာအပြင် အရောင်းဆိုင်တွေမှာ ဆီပြတ်လပ်တဲ့ပြဿာနာ၊ ၀ယ်ယူရခက်တဲ့ ပြဿနာတွေလည်း မကြာခဏ ဖြစ်ပေါ်ခဲ့ပါတယ်။

မြန်မာနိုင်ငံမှာ စစ်တပ်အာဏာမသိမ်းခင်က စက်သုံးဆီ တလီတာကို ကျပ် ၇၀၀ ဝန်းကျင်ပဲ ရှိခဲ့တာပါ။

လောင်စာဆီစျေးမြင့်တက်မှုရဲ့ နောက်ဆက်တွဲ ဆိုးကျိုးက သယ်ယူပို့ဆောင်ခ နှုန်းထားတွေကို မြင့်တက်စေပြီး အထွေထွေကုန်စျေးနှုန်းကို ကြီးမြင့်စေတာကြောင့်  ၀င်ငွေနည်း အခြေခံပြည်သူတွေအပေါ်  ရိုက်ခတ်စေပါတယ်။

7 months Ago
More News
Up