ကြာအင်းဆိပ်ကြီး

July 26, 2021

ကြာအင်းဆိပ်ကြီးတွင် နေအိမ်အချို့ ရေနှစ်မြှုပ်၊ ရေဘေးသင့် ပြည်သူ ၆၀၀ နီးပါးရှိလာ

ကရင်ပြည်နယ်၊ ကြာအင်းဆိပ်ကြီးမြို့မှာ ဒီကနေ့ ဇူလိုင် ၂၆ ရက်နေ့ မနက်ပိုင်းကတည်းက မိုးအဆက်မပြတ် ရွာသွန်းနေတဲ့အတွက်ကြောင့် မြို့ရဲ့ အနိမ့်ပိုင်း ရပ်ကွက်တွေ ရေနှစ်မြှုပ်သွားပြီလို့ ဒေသခံတွေက DVB ကို ပြောပါတယ်။

အခုအခါ မြို့ရဲ့ အမှတ် ၂၊ ၃ နဲ့ အမှတ် ၆ ရပ်ကွက်တွေမှာ ရေ ၁၀ ပေလောက်ထိ မြင့်တက်လာပြီး နေအိမ်အချို့ ရေနှစ်မြှုပ်သွားခဲ့တာ ဖြစ်ပါတယ်။

ရေနှစ်မြှုပ်သွားတဲ့အတွက်ကြောင့် အဲဒီရပ်ကွက်နေသူ အိမ်ထောင်စု ၁၅၀ ကျော်၊ လူဦးရေ ၆၀၀ နီးပါးကို ဘေးလွတ်ရာ ပြောင်းရွှေ့ထားရပါတယ်။

ကြာအင်းဆိပ်ကြီးမြို့ ရေးကြီးမှုကြောင့် ယာယီကယ်ဆယ်ရေစခန်း ၄ ခု ဖွင့်လှစ်ထားရပြီး ကယ်ဆယ်ရေးစခန်းတွေ ထပ်ဖွင့်ဖို့ လုပ်ဆောင်နေတယ်လို့ လူမှုကယ်ဆယ်ရေးအဖွဲ့ တာဝန်ရှိသူ တစ်ဦးက ပြောပါတယ်။

ကြာအင်းဆိပ်ကြီးမြို့ ရဲ့ အနိမ့်ပိုင်း ရပ်ကွက်တွေဟာ နှစ်စဉ် ရေကြီးမှုနဲ့ ရင်ဆိုင်နေရပြီး၊ ပုံမှန်ဆိုရင် တစ်ရက်လောက် ရေကြီးပြီး ရေပြန်ကျသွားပေမယ့် ဒီနှစ်မှာတော့ ရေက ကျဆင်းခြင်း မရှိဘဲ ဆက်လက် မြင့်တက်နေတာပါ။

လက်ရှိမှာတော့ ယာယီကယ်ဆယ်ရေးစခန်းတွေမှာ နေထိုင်နေတဲ့ ရေဘေးသင့်ပြည်သူတွေ အတွက် အကူအညီတွေ လိုအပ်နေပါတယ်။

1 week Ago

July 23, 2021

ကြာအင်းဆိပ်ကြီးမြို့၌ ရေကြီးရေလျှံ၊ ဒေသခံများ ရေဘေးလွတ်ရာ ပြောင်းရွှေ့

ကရင်ပြည်နယ်၊ ကြာအင်းဆိပ်ကြီးမြို့မှာ မိုးသည်းထန်စွာ ရွာသန်းပြီး ဇမိမြစ်ရေတက်လာတာကြောင့် အမှတ် ၆ ရပ်ကွက်က မြေနိမ့်ပိုင်း  နေအိမ် ၈၀ ကျော် ရေဝင်ပြီး ဒေသခံတွေ ရေဘေးလွတ်ရာကို ပြောင်းရွှေ့နေထိုင်ကြရပါတယ်။

ရေဘေးဒုက္ခသည် မိသားစုဝင်တွေဟာ ရပ်ကွက်အတွင်း  သဘာဝဘေးဖြစ်လာရင် ခိုလှုံဖို့တည်ဆောက်ထားတဲ့ အဆောက်အဦးမှာ သွားရောက်ခိုလှုံနေကြပြီး ဒီကနေ့ အထိ အကူအညီတွေမပေးနိုင်သေးဘူးလို့  ကြာအင်းဆိပ်ကြီးမြို့က လူမှုကူညီရေးအဖွဲ့ဝင်တဦးက ပြောပါတယ်။

“ရေက အခုဆိုရင် ၂၉ လက်မကျော်နေပြီ။ ၃၀ ဆိုရင် တော်တော်များများမြုပ်မှာ။ အိမ်နှစ်ထပ်ရှိတဲ့အိမ်ဆိုရင် အောက်ထပ်အကုန်လုံးမြုပ်နေပြီ။ အခုက သူတို့က သဘာဝဘေးကျရောက်ရင် နေဖို့ အဆောက်အအုံမှာ  သွားနေကြတယ်။ လောလောဆယ်ကတော့ ဘာမှ မလုပ်ပေးရသေးဘူး။ ”

ကြာအင်းဆိပ်ကြီးမြို့မှာ ကိုဗစ်-၁၉ ကူးစက်ပျံ့နှံ့မှုကလည်း တိုးလာနေပြီး ဒီနေ့အထိ ကိုဗစ်လူနာ ၁၀၀ ကျော်နေပြီး ရောဂါကူးစက်ခံရမှာစိုးလို့ ရေးဘေးအလှူရှင်တွေကို မဖိတ်ခေါ်ရဲဘူးလို့လည်း ပြောပါတယ်။

“လောလောဆယ်ကတော့ ဘယ်လိုပြောမလဲ။ ကိုဗစ်ကလည်း တအားကြီးကို တက်နေတော့ အလှူရှင်တွေကိုလည်း ဖိတ်ခေါ်ဖို့ကမရဲဘူး အဲလိုမျိုးဖြစ်နေတယ်။ ကိုဗစ်က အခု နေ့တိုင်းလိုလိုပဲ တက်နေတယ်။”

ကြာအင်းဆိပ်ကြီးမြို့မှာ ရေကြီးရေလျှံမှုဖြစ်တာ ဒီကနေ့ဆိုရင် ၄ ရက်ရှိနေပြီဖြစ်ပြီး မိုးတွေ ဆက်လက်ရွာသွန်းမယ်ဆိုရင်တော့ ရေထပ်တက်လာကာ  တခြား ရပ်ကွက်တွေပါ ရေမြုပ်နိုင်တဲ့ အခြေအနေ ဖြစ်နေပါတယ်။

ပြီးခဲ့တဲ့ နှစ်တွေတုန်းက မိုးရာသီရောက်တိုင်း အခုလို ရေကြီးရေလျှံမှုတွေ ဖြစ်လေ့ရှိပေမယ့် တရက်နှစ်ရက်နဲ့ ရေပြန်ကျပေမယ့် အခုနှစ်မှာ ရေဆက်တက်နိုင်တဲ့ အနေအထားဖြစ်နေတယ်လို့လည်း ဆိုပါတယ်။

2 weeks Ago
More News
Up