ကွန်ဂို

July 20, 2019

ကွန်ဂိုအမျိုးသမီး အီဘိုလာကူးစက်ခံရချိန် ရ၀မ်ဒါကို မသွားရောက်ခဲ့ဟု WHO ပြော

ယူဂန္ဓာနိုင်ငံမှာ အီဘိုလာ ဗိုင်းရပ်စ်ပိုး ပျံနှံ့စေသူလို့ယူဆရတဲ့ ကွန်ဂိုအမျိုးသမီးဟာ ရောဂါကူးစက်ခံရချိန်အတွင်း ရ၀မ်ဒါ နဲ့ ကွန်ဂိုနိုင်ငံ  ဂိုမာမြို့တွေကို မသွားရောက်ခဲ့ဘူးလို့ ကမ္ဘာ့ကျန်းမာရေးအဖွဲ့ WHO က ဇူလိုင် ၁၉ ရက်နေ့မှာ ပြောပါတယ်။ ဇူလိုင် ၁၈ ရက်နေ့က ယူဂန္ဓာကျန်းမာရေး ၀န်ကြီးဌာန ရေးသားတဲ့ အစီရင်ခံစာမှာ အဲဒီအမျိုးသမီးဟာ မသေဆုံးခင် ယူဂန္ဓာ၊ ရ၀မ်ဒါနဲ့ ကွန်ဂိုနိုင်ငံ  ဂိုမာမြို့တွေကို သွားရောက်ခဲ့တယ် သံသယရှိတယ်ဆိုပြိး ဖော်ပြပါတယ်။ အဲဒီ အစီရင်ခံစာကြောင့်  အီဘိုလာ မဖြစ်ပွားဖူးတဲ့ ရ၀မ်ဒါနိုင်ငံမှာ ရောဂါဖြစ်နေပြီဆိုတဲ့ စိုးရိမ်စိတ်တွေ ပေါ်ပေါက်ခဲ့ပါတယ်။ မကြာခင်မှာပဲ WHO က အဲဒီ အစီရင်ခံစာကို ရုပ်သိမ်းပြီး နေ့စဉ်သတင်းတွေ တက်နေတဲ့ ၀က်ဘ်ဆိုက်ကိုလည်း တချို့သတင်းတွေကို အတည်မပြုရသေးဘူးဆိုကာ ပိတ်ပစ်ခဲ့ပါတယ်။ ကျန်းမာရေးဝန်ထမ်းတွေကလည်း အီဘိုလာရောဂါ အသိပညာပေး လုပ်ငန်းတွေနဲ့ ကာကွယ်ဆေးထိုး လုပ်ငန်းတွေကို ဒေသတွင်း အဓိကလမ်းတွေနဲ့ နယ်စပ်ဒေသတွေမှာ လုပ်နေကြပါတယ်။ ရောဂါစဖြစ်တဲ့ လွန်ခဲ့တဲ့ ၁၁ လကတည်းက  သူတို့ဟာ လူပေါင်း ၇၅ သန်း နီးပါးကို ရောဂါ ရှိမရှိ စစ်ဆေးခဲ့ပြီးပါပြီ။  အီဘိုလာရောဂါကြောင့် သေဆုံးသူ ၁၇၀၀ ကျော်ပြီလို့ ရိုက်တာသတင်း အရ သိရပါတယ်။
2 years Ago

May 31, 2019

ကွန်ဂိုတွင် အီဘိုလာရောဂါ ကူးစက်ခံရသည့် ကလေးအရေအတွက် မြင့်တက်

ကွန်ဂိုနိုင်ငံမှာ အီဘိုလာရောဂါ ကူးစက်ခံရတဲ့ ကလေးငယ်အရေအတွက် ဒုတိယအမြင့်ဆုံး အဆင့်ထိ မြင့်တက်နေပါတယ်။ ဧပြီလ အစောပိုင်းအထိ အီဘိုလာရောဂါ ဖြစ်ပွားသူနဲ့ ကူးစက်ခံရဖို့ အလားအလာများသူ ပမာဏ စုစုပေါင်းရဲ့ လေးပုံတပုံကျော်ဟာ အသက် ၁၅ နှစ်အောက် ကလေးငယ်တွေပါ။ အီဘိုလာရောဂါဟာ အလျင်အမြန် ကူးစက်နိုင်ပြီး ကိုယ်ခံအားစနစ်နဲ့ ကိုယ်တွင်းအင်္ဂါတွေကို ပျက်စီးစေပါတယ်။ ရောဂါလက္ခဏာတွေကတော့ ဝမ်းလျှောတာ၊ အော့အန်တာ၊ ဖျားနာတာနဲ့ သွေးလျှံတာတွေပါ။ ရောဂါကူးစက်ခံရတဲ့ ကလေးငယ် သုံးယောက်တိုင်းမှာ နှစ်ယောက် သေဆုံးနေတယ်လို့ ကမ္ဘာ့ကျန်းမာရေးအဖွဲ့ (WHO) က ပြောပါတယ်။ ကွန်ဂိုနိုင်ငံမှာ မေလ ၂၆ ရက်နေ့အထိ အီဘိုလာရောဂါကြောင့် သေဆုံးသူ တထောင့်နှစ်ရာကျော်ရှိပြီး အဲဒီထဲမှာ အသက် ၁၈ နှစ်အောက် ၅၄၁ ယောက် ပါပါတယ်။ အီဘိုလာရောဂါပိုးဟာ ခန္ဓာကိုယ်ကထွက်တဲ့ အရည်တွေကနေဆင့် ကူးစက်နိုင်ပါတယ်။ ဒါပေမယ့် အစိုးရဆေးရုံတွေ အပြင်ဘက်မှာ လုပ်ကိုင်နေကြတဲ့ ကျန်းမာရေးဝန်ထမ်းတွေဟာ ရောဂါကာကွယ်ရေး လမ်းညွှန်ချက်တွေကို အမြဲမလိုက်နာကြဘူးလို့ ကွန်ဂို ကျန်းမာရေးဝန်ကြီးဌာနက ပြောပါတယ်။ ဒါဟာ ကွန်ဂိုနိုင်ငံမှာ ၁၀ ကြိမ်မြောက် အီဘိုလာရောဂါ ဖြစ်တာပါ။ ကွန်ဂိုနိုင်ငံအတွင်း မှတ်ပုံတင်မထားတဲ့ ပုဂ္ဂလိက ဆေးခန်းတွေနဲ့ တိုင်းရင်းဆေးကု ဆရာတွေက အိမ်မှာတင် ကုသပေးတဲ့ ဓလေ့တွေကြောင့် ကျန်းမာရေးစောင့်ရှောက်မှုစနစ်ကို ကြီးကြပ်နိုင်မှု မရှိတဲ့အတွက် ကျန်းမာရေးစောင့်ရှောက်မှု စံချိန်စံညွှန်းတွေက ကျယ်ကျယ်ပြန့်ပြန့် ကွဲပြားနေပါတယ်။
2 years Ago
More News
Up