ကျေးရွာအုပ်ချုပ်ရေးမှူး

January 23, 2023

အိမ်မဲမြို့နယ်၌ ကျေးရွာအုပ်ချုပ်ရေးမှူးမိသားစုကို စစ်ကောင်စီတပ်က ဖမ်းဆီး

ဧရာဝတီတိုင်း၊ မြောင်းမြခရိုင်၊ အိမ်မဲမြို့နယ်မှာ ကျေးရွာအုပ်ချုပ်ရေးမှူးအပါအဝင် မိသားစုဝင် ၃ ဦးနဲ့  နေအိမ်အလည်လာသူ ၃ ဦးတို့ကို  စစ်ကောင်စီတပ်က ဖမ်းဆီးခဲ့တယ်လို့ ဒေသခံတွေထံက သိရပါတယ်။

ကညင်ကုန်းကြီးကျေးရွာ အုပ်ချုပ်ရေးမှူးစောနေမူးကို ဇန်နဝါရီ ၂၀ ရက်မှာ စစ်ကောင်စီတပ်ဖွဲ့ဝင်တွေက နေအိမ်မှာ လာရောက်ဖမ်းဆီးခဲ့တာဖြစ်ပြီး အုပ်ချုပ်ရေးမှူးကို မတွေ့တဲ့အတွက် နေအိမ်ရှိ သူတွေကို ဖမ်းဆီးခေါ်ဆောင်သွားတာလို့ ဒေသခံရွာသားတဦးက ပြောပါတယ်။

“အုပ်ချုပ်ရေးမှူးကို စစ်တပ်နဲ့ ရဲက လာဖမ်းတာ။ သူတို့အပြောကတော့ လက်နက်တွေ ဝှက်ထားလို့ဆိုပြီး ပြောတယ်။ အိမ်ကိုလည်း ရှာတယ်။ အုပ်ချုပ်ရေးမှူးက အိမ်မှာ မရှိတာနဲ့ သုံးနှစ်သားကလေးရယ် သူ့မိန်းမရယ် အိမ်အလည်ရောက်နေတဲ့ အမျိုးသမီးသုံးဦးရယ်ကို ဖမ်းသွားတယ်။  အဲဒီညမှာပဲ အုပ်ချုပ်ရေးမှူးကို ရွာသစ်ကြီးကျေးရွာမှာ ဖမ်းမိသွားတယ် "လို့ ဒေသခံအမျိုးသားတစ်ဦးက ပြောပါတယ်။

ကညင်ကုန်းကြီးကျေးရွာ အုပ်ချုပ်ရေးမှူး စောနေမူးကို စစ်ကောင်စီက ဖမ်းဆီးပြီးနောက် သုံးနှစ်အရွယ် ကလေးငယ်နဲ့ အိမ်အလည်လာတဲ့  အမျိုးသမီးသုံးဦးကို ဇန်နဝါရီ ၂၁ ရက်မှာ ပြန်လွှတ်ပေးခဲ့ပေမဲ့ ဇနီးဖြစ်သူ  ဒေါ်အိဖြူကိုတော့ ဆက်လက်ဖမ်းဆီးထားဆဲ ဖြစ်ပါတယ်။

2 weeks Ago

January 11, 2023

လေးမျက်နှာမြို့နယ်တွင် ကျေးရွာအုပ်ချုပ်ရေးမှူး ၁ ဦးကို စစ်ကောင်စီတပ် ဖမ်းဆီး

ဧရာဝတီတိုင်း၊ လေးမျက်နှာမြို့နယ်မှာ အန်အယ်ဒီအစိုးရလက်ထက်က ခန့်ထားခဲ့တဲ့ ကျေးရွာအုပ်ချုပ်ရေးမှူး ၁ ဦးကို စစ်ကောင်စီ တပ်သားတွေက ဇန်နဝါရီ ၉ ရက် ညပိုင်းက ဝင်ရောက်ဖမ်းဆီးခဲ့တယ်လို့ ဒေသခံတွေဆီက သိရပါတယ်။

အချုပ်ကြီးကျေးရွာ အုပ်ချုပ်ရေးမှူး ဦးမြင့်ဇော်နိုင်ကို ညပိုင်း ဝင်ရောက်ဖမ်းဆီးသွားတာ ဖြစ်ပြီး ဒီတကြိမ်နဲ့ဆို အဖမ်းခံရတာ ၂ ကြိမ်ရှိပြီလို့ ဒေသခံတွေက ပြောပါတယ်။

ဒေသခံတဦးက “အာဏာသိမ်းကာစကလည်း အဖမ်းခံရတယ်။ ပြီးမှ ပြန်လွတ်လာတာ။ ရွာမှာ သူ့ကိုပဲ အုပ်ချုပ်ရေးမှူးတာဝန် ပြန်ပေးထားတာ။ ခုမှ ဘာလို့ထပ်ဖမ်းတယ်ဆိုတာ မသိဘူး။ လာဖမ်းတာတော့ စစ်သားတွေ” လို့ ပြောပါတယ်။

စစ်ကောင်စီတပ်သားတွေ ဖမ်းဆီးသွားတဲ့ ကျေးရွာအုပ်ချုပ်ရေးမှူး ဦးမြင့်ဇော်နိုင်ကို မိသားစုက လိုက်လုံစုံစမ်းခဲ့ပေမဲ့ အိုင်သပြုရဲစခန်းနဲ့ လေးမျက်နှာရဲစခန်းမှာ မရှိသလို အဆက်အသွယ် မရရှိသေးဘူးလို့ ဆိုပါတယ်။

ကျေးရွာအုပ်ချုပ်ရေးမှူး ဦးမြင့်ဇော်နိုင်ဟာ အုပ်ချုပ်ရေးမှူးမလုပ်ခင်က အန်အယ်ဒီပါတီဝင် ဖြစ်ခဲ့ဖူးတာကြောင့် ခုလိုမျိုး လာရောက်ဖမ်းဆီးတာလည်း ဖြစ်နိုင်တယ်လို့ ဒေသခံတွေက ပြောပါတယ်။

4 weeks Ago
More News
Up