ကျေးရွာအချို့

September 19, 2021

အရာတော်မြို့နယ်က ကျေးရွာအချို့ကို ရွှေ့ပြောင်းပစ်မည်ဟု စစ်ကောင်စီ ခြိမ်းခြောက်

စစ်ကိုင်းတိုင်း၊ အရာတော်မြို့နယ်က ကျေးရွာတွေမှာ  စစ်ကောင်စီက အင်တာနက်ဖြတ်တောက်ထားသလို ရွာတွေကို ရွေ့ပြောင်းပစ်မယ်ဆိုပြီး ခြိမ်းခြောက်စာကပ်တာ၊ လော်စပီကာနဲ့ ကြေညာတာတွေ  စက်တင်ဘာ ၁၈၊ ၁၉ ရက် နေ့တွေက ထပ်မံ ပြုလုပ်နေတယ်လို့ ဒေသခံတွေက  ပြောပါတယ်။

လက်လုပ်ဗုံး၊ မိုင်းနဲ့ လက်နက်ကိုင်ဆောင်သူတွေရဲ့ နေအိမ်တွေကို ချိပ်ပိတ်သွားမှာဖြစ်ပြီး ဆန္ဒပြ အကြမ်းဖက်လှုပ်ရှားမှုလုပ်တဲ့ ကျေးရွာတွေကို မိမိအိမ် မိမိရွှေ့စနစ်နဲ့ ရွှေ့ပြောင်းခိုင်းမှာ ဖြစ်တယ်လို့ လည်း ခြိမ်းခြောက်နေတယ်လို့ဆိုပါတယ်။

ကဲဘာရွာ၊ ဆင်တလည်ရွာ၊ ညောင်ခြေထောက်ရွာတွေလည်း ပြောင်းရွှေ့ရနိုင်ပြီး ကိုင်းရွာ၊ ထန်းတောကုန်း၊ ဘောင်းကျ၊ ရှောက်ခါး၊ ရဲချင်းကျေးရွာတွေလည်း အလားအလာမကောင်းကြောင်း သိစေအပ်ပါတယ်လို့ စစ်ကောင်စီ ဖြန့်‌ဝေတဲ့ လက်ကမ်းစာရွက်မှာ ရေးသားထားပါတယ်။

အရာတော်မြို့နယ်မှာ စက်တင်ဘာ ၁၄ ရက်နေ့ကလည်း ကြွေပုဂံ (၂) ရွာ၊ မလဲသာ၊ ကန်ရင်း၊ မင်းရွာ၊ ကျီးကန်၊ နောင်ကြီးအိုင်၊ ကဲဘာ၊ ဆင်တလည်၊ ညောင်ခြေထောက်၊ ကိုင်းရွာ၊ ထန်းတောကုန်း၊ ဘောင်းကျ၊ ရှောက်ခါး၊ ရဲချင်းရွာ စတဲ့ ရွာပေါင်း ၁၅ ရွာကို ရွှေ့ပြောင်းပစ်မယ်လို့ ခြိမ်းခြောက်ထားပါတယ်။

3 months Ago

September 10, 2021

ဂန့်ဂေါဒေသရှိ ကျေးရွာအချို့ကို စစ်တပ်က ဖျက်ဆီးမီးရှို့တိုက်ခိုက်၊ PDF တပ်ဖွဲ့ဝင်အချို့ ကျဆုံး

မကွေးတိုင်း၊ ဂန့်ဂေါမြို့နယ်က ရွာတချို့ကို အကြမ်းဖက် စစ်တပ်က စက်တင်ဘာ ၉ ရက်က ဝင်ရောက်ဖျက်ဆီး မီးရှို့နေပြီး ပြည်သူ့ကာကွယ်ရေးတပ်ဖွဲ့ဝင်တချို့ ကျဆုံးသွားတယ်လို့ ဒေသခံတွေရဲ့ ပြောပြချက်အရ သိရပါတယ်။

“မနေ့ မနက်ပိုင်းက စပြီး မြင်သားရွာကို စစ်ကောင်စီတပ်တွေ ဝင်လာတယ်။ ရွာသားတွေကတော့ ထွက်ပြေးနေကြပြီ။ ရွာထဲက အိမ် ၅ လုံးကို မီးရှို့တယ်။ ကားတွေလည်း ယူသွားတယ်။ ပြီးတော့ တောင်ခင်ရန်းရွာက သူတို့ တပ်စွဲတဲ့နေရာကို ပြန်သွားတယ်” လို့ ဒေသခံတယောက် ပြောပါတယ်။

အကြမ်းဖက် စစ်တပ်ဟာ တောင်ခင်ရန်းကရွာကနေ မြင်သားရွာဘက်ကိုလာနေတုန်း သာလင်းရွာနားမှာ ဒေသခံ ပြည်သူ့ကာကွယ်ရေးတပ်က တားဆီးပစ်ခတ်ခဲ့ပေမဲ့ မိုးရွာနေတာကြောင့် တူမီးလက်နက်တွေ အဆင်မပြေဖြစ်ပြီး ပြန်ဆုတ်ခွာခဲ့ရတယ်လို့ သိရပါတယ်။

“PDF ဘက်က ၁၁ ယောက်ကျတယ်လို့ သိရတယ်။ အတိအကျမသိရသေးဘူး။ ဘယ်သူမှ ရွာကို မပြန်ရဲသေးလို့လေ။ စစ်ကောင်စီတပ်တွေက တဖွဲ့က ပြန်ပြီး တဖွဲ့က မြင်သားတံတားထိပ်က သုံးထပ်တိုက်မှာတပ်စွဲကင်းပုန်းဝပ်နေကြတာ။ တနေကုန်ပဲ။ နေကုန်မှ ရွာထဲက ကားတွေကိုယူပြီး ပြန်ထွက်သွားတာ” လို့ ဒေသခံတယောက်က ပြောပါတယ်။ 

ဒါထက်မက သေဆုံးတာတွေ ရှိနိုင်ပေမဲ့ ရွာသားတွေဟာ တိမ်းရှောင်နေကြရတာကြောင့် အတည်ပြုလို့တော့ မရသေးပါဘူး။

PDF တချို့ကို ဖမ်းမိတာမှာ ခေါ်မသွားဘဲ ပစ်သတ်ခဲ့တာလို့လည်း ဒေသခံတွေက ပြောပါတယ်။ ပြီးတော့ မြင်သားရွာ ဘုန်းကြီးကျောင်းမှာ ပုန်းနေသူတွေကို အပြင်ကနေ သေနတ်ပစ်ဖောက် ဖုန်းတွေလာအပ်ခိုင်းပြီး အကုန်ခွဲပစ်တယ်လို့လည်း ဒေသခံတယောက်က ပြောပါတယ်။

ဒီနေ့မနက်မှာတော့ ၆ နာရီလောက်ကစပြီး နေအိမ် ၂ လုံးကို မီးရှို့နေကြောင်းနဲ့ စစ်တပ်ဟာ ရွာထဲက အိမ် ၃ လုံးမှာ တပ်စွဲနေထိုင်တယ်လို့လည်း ဆိုပါတယ်။ ရွာသားတွေကတော့ အခုအချိန်ထိ တောထဲမှာ တိမ်းရှောင်နေကြရတယ်လို့လည်း သိရပါတယ်။

3 months Ago
Up