ကျောင်းသားသမဂ္ဂ

July 24, 2021

အမျိုးသားစီမံခန့်ခွဲမှုပညာဒီဂရီကောလိပ် ဝင်ခွင့်ခေါ်သည့်အပေါ် ကျောင်းသားသမဂ္ဂရှုတ်ချ

ရန်ကုန်မြို့၊ ဗိုလ်တထောင်မြို့နယ်မှာ ဖွင့်လှစ်ထားတဲ့ အမျိုးသားစီမံခန့်ခွဲမှုပညာ ဒီဂရီကောလိပ်ရဲ့ ၂၀၂၁-၂၀၂၂ ပညာသင်နှစ် ပထမနှစ်သင်တန်းဝင်ခွင့်လျှောက်လွှာ ခေါ်ယူမှုအပေါ် အသိအမှတ်မပြု ရှုတ်ချကြောင်း ကျောင်းသားသမဂ္ဂက ကြေညာပါတယ်။

အမျိုးသားစီမံခန့်ခွဲမှုပညာ ဒီဂရီကောလိပ်ဟာ အာဏာဖီ ဆန်ရေးလှုပ်ရှားမှု(CDM)မှာ ပါဝင်ခြင်း မရှိတဲ့ စစ်ကောင်စီအမိန့်ကိုနာခံတဲ့ လောက်ကောင်ဆရာ၊ ဆရာမတွေ၊ ဝန်ထမ်းတွေဟာ တရားမဝင် စစ်ကောင်စီပိုင်သတင်းစာကတဆင့် ပုန်းလျှိုးဝှက်လျှိုး ကြေညာထားတယ်လို့ သိရှိရကြောင်း  ကျောင်းသားသမဂ္ဂ ကြေညာချက်မှာ ဖော်ပြထားပါတယ်။

ကျောင်းသားသမဂ္ဂအနေနဲ့ အကြမ်းဖက်စစ်ကောင်စီ လက်အောက်မှာ တက်ရောက်နေတဲ့ Non CDM ကျောင်းသားကျောင်းသူတွေ၊ ဆရာ၊ ဆရာမတွေ၊ ဝန်ထမ်းတွေကို လောက်ကောင်အဖြစ် သတ်မှတ်ပြီး အသိအမှတ်မပြုကြောင်း ကြေညာထားခဲ့ပြီး ခုတခါ ပထမနှစ်သင်တန်းတွေမှာ အသစ်အပ်နှံတက်ရောက်မယ့်သူတွေကိုလည်း ပြင်းထန်စွာ ကန့်ကွက်ရှုတ်ချပြီး  အသိအမှတ်ပြုမှာမဟုတ်ကြောင်း ကြေညာထားတာပါ။

ဒါ့အပြင် အခုပထမနှစ်သင်တန်းမှာ တက်ရောက်မယ့်သူတွေရော၊ အကြမ်းဖက်စစ်ကောင်စီ လက်အောက် သင်တန်းတွေမှာ တက်ရောက်ကြမယ့် ဘယ်သူမဆို တရားမဝင် ရရှိမယ့် ဘွဲ့ဒီဂရီကို ဘယ်နယ်ပယ်မှာမှ အသိအမှတ်ပြုလို့မရအောင် ဆက်လက်လုပ် ဆောင်သွားမယ်လို့လည်း ဆိုပါတယ်။

အမျိုးသားစီမံခန့်ခွဲမှုပညာဒီဂရီကောလိပ်မှာတော့ စီးပွားရေးလုပ်ငန်းသုံးစီမံခန့်ခွဲမှုပညာ၊ လုပ်ငန်းခွင်သုံးအင်္ဂလိပ်စာ၊ ခရီးသွားလုပ်ငန်းနှင့် ဧည့်ဝန်ဆောင်စီမံခန့်ခွဲမှု အတတ်ပညာနဲ့ သတင်းအတတ်ပညာဘာသာရပ်တွေကို သင်ကြားပေးနေတာ ဖြစ်ပါတယ်။

3 months Ago

April 29, 2021

ပါမောက္ခအပါအဝင် ပညာရေးဝန်ထမ်း ၁၀ ဦးနှင့် ကျောင်းသားသမဂ္ဂအဖွဲ့ဝင် ၂၀ ကို အကြမ်းဖက်စစ်အုပ်စုက အမှုဖွင့်

စစ်အာဏာရှင်ကိုဆန့်ကျင်ပြီး ပြည်သူ့ဘက်ကရပ်တည်တဲ့ ပညာရေးဝန်ထမ်း တက္ကသိုလ် ပါမောက္ခ၊ တွဲဖက် ပါမောက္ခတွေ၊ ကထိက တွေနဲ့ ကျောင်းသားသမဂ္ဂအဖွဲ့ဝင်တွေကို ရာဇသတ်ကြီး ပုဒ်မ ၅၀၅ (က) နဲ့ အမှုဖွင့်အရေးယူနေတယ်လို့ အာဏာသိမ်း စစ်ကောင်စီရဲ့ ပြန်ကြားရေးက သတင်းထုတ်ပြန်ပါတယ်။

အမှုဖွင့်ခံရတဲ့ ပညာရေးဝန်ထမ်း ၁၀ ဦးကတော့    ပါမောက္ခ ဒေါက်တာမြတ်ထူးကြွယ်၊ တွဲဖက် ပါမောက္ခတွေဖြစ်ကြတဲ့  ဒေါက်တာနန်းနွယ်၊ ဦးကြည်ထင်ပေါ်၊ ဒေါက်တာဝင်းပပထွန်း၊ ဒေါက်တာအောင်ကျော်စွာနဲ့ ဒေါက်တာ ဝေယံလင်း၊ တက္ကသိုလ် ကထိကတွေဖြစ်တဲ့ ဦးသုလင်းဝေ၊ ဒေါက်တာတိုးတိုးကျော်၊ ဦးလှိုင်တင်နဲ့ ဒေါက်တာ ကျော်သန်းမိုးတို့ဖြစ်ပါတယ်။

အဆိုပါ ပညာရေးဝန်ထမ်းတွေဟာ  အာဏာဖီဆန် CDM လှုပ်ရှားမှုမှာ ပါဝင်တယ်ဆိုပြီး  အမှုဖွင့်ခံရတာဖြစ်ပါတယ်။

အလားတူ နိုင်ငံအနှံ့ရှိ ကျောင်းသားသမဂ္ဂအဖွဲ့ဝင် အယောက် ၂၀  ကိုလည်း လူမှုကွန်ရက်သုံးပြီး နိုင်ငံတော်တည်ငြိမ်အေးချမ်းမှုကို ပျက်ပြားစေဖို့ လှုံ့ဆော်ခဲ့တယ်လို့ စွပ်စွဲပြီး ပုဒ်မ ၅၀၅-က နဲ့ အမှုဖွင့်အရေးယူဆောင်ရွက်နေတယ်လို့ ဒီကနေ့ထုတ်  သတင်းစာတွေမှာ ဖော်ပြပါတယ်။

အမှုဖွင့်ခံရတဲ့ ကျောင်းသားတွေအထဲမှာ ရဲရင့်ဘုန်းအောင်၊ ပိုင်ဖြိုးဇင်၊ သိရိမိုး၊ အောင်ညီညီသွင်၊ စည်သူနိုင်၊ ဘုန်းမြတ်မိုး၊ ဇင်မောင်ဖြိုး၊ နန်းမြသဇင်ဦး၊ နွေးအိအိကျော်၊ အေးချမ်းကို၊ စောထက်အောင်လင်း၊ ဝေယံဖြိုး၊ စည်သူအောင်၊ ဖူးပွင့်စိုး၊ ဥဂ္ဂါမြတ်၊ သီရိယမင်းအောင်၊ မေသင်းခိုင်၊ မျိုးမင်းထက်၊ ဇော်မျိုးလွင်နဲ့ မင်းသူရှိန် တို့ပါဝင်ပါတယ်။

အထက်ပါကျောင်းသားတွေကို လက်ခံထားသူတွေကိုလည်း အရေးယူမှာဖြစ်ပြီး နောက်ထပ် ထပ်မံဆက်လက် ကြေညာဖို့ရှိနေတယ်လို့လည်းဆိုပါတယ်။

6 months Ago
More News
Up