ကျောက်မဲမြို့နယ်

November 14, 2021

ကျောက်မဲမြို့နယ်တွင် အရပ်သား ၁ ဦး မိုင်းစထိမှန် ဒဏ်ရာရ

ရှမ်းပြည်နယ်မြောက်ပိုင်း ကျောက်မဲမြို့နယ်မှာ နိုဝင်ဘာ ၁၃ ရက် မနက်ပိုင်းက အရပ်သား ၁ ဦး မိုင်းစထိမှန် ဒဏ်ရာရခဲ့တယ်လို့ ဒေသခံတွေနဲ့ လူမှုကူညီရေးအသင်းက သိရပါတယ်။
အကူအညီ ပေးခဲ့သူတဦးက "မနက်ပိုင်း ၁၀ နာရီ ဝန်းကျင်လောက်က။ နောင်ပြစ်အုပ်စု၊ နောင်ပြစ်ကျေးရွာ (ဟောင်း) မှာနေတဲ့ လွေးအေးယဥ်ပါ။ ခေါင်းမှာ မိုင်းစ ထိမှန်ခဲ့တာ" လို့ ပြောပါတယ်။
လက်ဖက်ခြံကိုသွားရင်း လက်ဖက်ခြံတဲနားအရောက် ရှေ့ကသွားတဲ့ ခွေးက မိုင်းနင်းမိပြီး ပေါက်ကွဲကာ အဲဒီအမျိုးသမီးကို မိုင်းစထိမှန်ခဲ့တာလို့ ဒေသခံ ၁ ဦးက ပြောပါတယ်။
“ကံကောင်း ထောက်မစွာနဲ့ သူ့ထက် ခွေးကအရင်ရောက်လို့ ခွေးက သာမိုင်းနင်းမိသွားတာ။ သူ့ကိုတော့ မိုင်းစပဲ ထိမှန်ခဲ့တယ်။”
လက်ဖက်ခြံကနေ ရွာအထိ သွားလာလမ်း ကျဉ်းတာကြောင့် သူမရဲ့ အမျိုးသားက ရွာအထိ ကျောပိုးသယ်လာရပြီး မိုးသည်း‌‌နေတာကြောင့် သွားလာရခက်ခဲလို့ ညနေပိုင်း မိုးတိတ်ချိန်မှ ရွာခံ ၂ ဦးက နောင်ပြစ်ကနေ ကြူရှော မြောက်ရွာထိ သယ်ပို့ခဲ့ရတယ်လို့ ဆိုပါတယ်။
ကြူရှော မြောက်ရွာကနေ ကျောက်မဲဆေးရုံကိုတော့ အိုမ်တ‌မာဝ် လူမှုကူညီရေးအသင်း လာကြိုကာ ပို့ဆောင်ပေးခဲ့တယ်လို့ ရွားသားတွေက ပြောပါတယ်။
ကျောက်မဲမြို့နယ်မှာ တိုင်းရင်းသား လက်နက်ကိုင်တွေဖြစ်တဲ့ RCSS နဲ့ SSPP, TNLA ပူးပေါင်းတပ်တို့ အကြား တိုက်ပွဲဖြစ်ပွားနေတာ လချီကြာပြီ ဖြစ်ပြီး တိုက်ပွဲကြောင့် ဒေသခံတွေ ထွက်ပြေးတိမ်းရှောင်နေရသလို မကြာခဏ မိုင်းနင်းမိ ဒဏ်ရာရသူတွေလည်း များပြားလာတယ်လို့ သိရပါတယ်။

2 weeks Ago

November 13, 2021

ကျောက်မဲမြို့နယ်ရှိ စစ်ဘေးရှောင်များအတွက် စားနပ်ရိက္ခာနှင့် အဝတ်အထည်များ ကူညီထောက်ပံ့ (ဓာတ်ပုံ)

ရှမ်းပြည်နယ်မြောက်ပိုင်း၊ ကျောက်မဲမြို့နယ်ရှိ  ယာယီစစ်ဘေးရှောင်းစခန်းတွေမှာ ခိုလှုံနေကြတဲ့ ပြည်သူလူထုတွေကို ရှမ်းပြည်သံဃာတွေနဲ့  ပြည်သူ ငြိမ်းချမ်းရေးပူးပေါင်းဆောင်ရွက်ရေး ကော်မတီ‌က နိုဝင်ဘာ ၁၃ ရက် ဒီကနေ့ စားနပ်ရိက္ခာနဲ့ အဝတ်အထည်တွေ ထောက်ပံ့ ကူညီခဲ့ပါတယ်။

ကျောက်မဲမြို့နယ်မှာ ရှမ်းပြည်ပြန်လည်ထူထောင်ရေးကောင်စီ (RCSS)နဲ့ ရှမ်းပြည်တိုးတက်ရေးပါတီ (SSPP) ပူးပေါင်းမဟာမိတ်အဖွဲ့တွေ တိုက်ပွဲဖြစ်ပွားနေတာကြောင့် ပြည်သူလူထု ၂၀၀၀ ကျော် အိုးအိမ်စွန့် ခွာပြီး ယာယီစစ်ဘေးရှောင်စခန်းတွေမှာ ခိုလှုံနေရပါတယ်။

ရှမ်းပြည်နယ်မှာ ဖြစ်ပွားနေတဲ့ စစ်‌ပွဲ‌တွေ အမြန်ဆုံးရပ်ပြီး တွေ့ဆုံညှိနှိုင်းတဲ့ နည်းလမ်းနဲ့ ပြဿနာကို အလျင်အမြန်ဖြေရှင်းကြဖို့ လက်ရှိ တိုက်ပွဲဖြစ်ပွားနေတဲ့ ရှမ်းတပ်နှစ်တပ်နဲ့ မဟာမိတ်တပ်တွေကို ရှမ်းပြည်သံဃာတွေနဲ့ ပြည်သူ ငြိမ်းချမ်းရေးပူးပေါင်းဆောင်ရွက်ရေး ကော်မတီက ထပ်မံမေတ္တာရပ်ခံထားပါတယ်။

2 weeks Ago
More News
Up