ကျောက်ပန်းတောင်း

September 15, 2022

ကျောက်ပန်းတောင်း-မိတ္ထီလာလမ်းတွင် ခရီးသည်တင်ကား ၂ စီးတိုက်မိပြီး လူ ၁၂ ဦးသေဆုံး

မန္တလေးတိုင်း၊ ညောင်ဦးခရိုင်၊ ကျောက်ပန်းတောင်း-မိတ္ထီလာလမ်းပိုင်း ဇီးဖြူကုန်းကျေးရွာအနီးမှာ စက်တင်ဘာ ၁၄ ရက် ည ၉ နာရီခွဲလောက်က ကားသုံးစီးဆင့်တိုက်ပြီး  သေဆုံးသူ ၁၂ ယောက်အထိရှိလာပြီးလို့  ဒေသခံပရိတအသင်းတွေထံက သိရပါတယ်။

ယာဉ်တိုက်မှုဖြစ်တဲ့ အဆိုပါကား သုံးစီးထဲမှာ  ခရီးသည်တင်ကား  နှစ်စီးပါဝင်ပြီး လူပေါင်း ၆၀ ဝန်းကျင်လိုက်ပါလာခဲ့တာပါ။

လက်ပံပျား-ဇီးဖြူကုန်းရွာကြား၊ မိုင်တိုင်အမှတ် ၄၅/၁ မှာ  ကားပျက်နေလို့ လမ်းဘေးရပ်ထားတဲ့ ကုန်တင်ကားကို  ပုဂံမင်းသားခရီးသည်တင်ကားက ဝင်တိုက်မိပြီး နောက်မှာ အရှိန်နဲ့ပါလာတဲ့ သန်မြန်သူခရီးသည်တင်ကားက  ထပ်တိုက်မိတာလို့ ဒေသခံ ပရဟိတအဖွဲ့က ပြောပါတယ်။

ယာဉ်တိုက်မှုကြောင့် ကားတွေကြားမှာ ညပ်မိနေသူတွေရှိပြီး  အရေးပေါ်သွေးလိုအပ်နေတဲ့ လူနာတွေနဲ့ အပြင်းအထန်ဒဏ်ရာရသူတွေကို ဆေးရုံကိုပို့ဆောင်ထားပါတယ်။

ယာဉ်တိုက်မှုကြောင့် အမျိုးသား ၁၂ ယောက်၊ အမျိုးသမီး ၃ ယောက် ထိခိုက်ဒဏ်ရာ(မစိုးရိမ်ရ)၊ အမျိုးသား ၂ ယောက် ထိခိုက်ဒဏ်ရာ(စိုးရိမ်ရ)ပြီး  အမျိုးသား ၉ ယောက်နဲ့ အမျိုးသမီး ၃ ယောက် သေဆုံးခဲ့တယ်လို့ မီးသတ်တပ်ဖွဲ့က သတင်းထုတ်ထားပါတယ်။ 

အခုယာဉ်တိုက်မှုဟာ ကျောက်ပန်းတောင်းမြို့မှာ အပြင်းထန်ဆုံးနဲ့ လူ သေဆုံးမှုအများဆုံး မတော်တဆမှုဖြစ်တယ်လို့ ကျောက်ပန်းတောင်းဒေသခံပရဟိတအသင်းဝင်တဦးက ပြောပါတယ်။

5 months Ago

May 10, 2022

ကျောက်ပန်းတောင်းမြို့က မြန်မာဘီယာ ရုံးချုပ် ဗုံးခွဲတိုက်ခိုက်ခံရ

မန္တလေးတိုင်း ကျောက်ပန်းတောင်းမြို့မှာ မေ ၉ ရက်နေ့က စစ်ကောင်စီရဲ့ စီးပွားရေးဒေါက်တိုင်တခုဖြစ်တဲ့ မြန်မာဘီယာ ရုံးချုပ်ကို ဗုံးခွဲတိုက်ခိုက်ခဲ့တယ်လို့ ကျောက်ပန်တောင်း ပြည်သူ့ကာကွယ်ရေးတပ်ဖွဲ့ KDF က ပြောပါတယ်။

ကျောက်ပန်တောင်းမြို့က မြန်မာဘီယာ ဖြန်ချိရေး ရုံးချုပ်ကို မေလ ၉ ရက်နေ့ မွန်းတည့် ၁၂ နာရီ မိနစ် ၄၀ လောက်မှာ KDF တပ်ဖွဲ့က ဝင်ရောက်ဖောက်ခွဲတိုက်ခိုက်ခဲ့တာကြောင့် ဖြန်ချိရေးလုပ်တဲ့ ကားနဲ့ ဘီယာဖာတွေ ထိခိုက်ပျက်ဆီးခဲ့ပြီး လူထိခိုက်မှုမရှိဘူးလို့ KDF ရဲ့တာဝန်ခံ ဗိုလ်KD က ဒီဗွီဘီကို ပြောပါတယ်။

“အဓိက ကတော့ စစ်ကောင်စီရဲ့ ဒေါက်တိုင်တစ်ခုဖြစ်နေလို့ တိုက်ခိုက်ရတာပါ။ စစ်ကောင်စီရဲ့ ဝင်ငွေစီးဆင်းတဲ့ လမ်းကြောင်းတခုကို ဖျက်ဆီးတာဖြစ်ပြီး ပြည်သူတွေအနေနဲ့လည်း ရောင်းချတာ၊ သုံးစွဲတာတွေ မလုပ်စေချင်လို့ ဖောက်ခွဲတိုက်ခိုက်ခဲ့တာ။” 

KDF အနေနဲ့ စစ်ကောင်စီရဲ့ အဓိကကျတဲ့ ပစ်မှတ်တွေကို ဦးစားပေးတိုက်ခိုက်သွားမှာဖြစ်ပြီး မြို့ပြပြောက်ကျားကနေတဆင့် မြို့သိမ်းတိုက်ပွဲအထိ ဖော်ဆောင်သွားမယ် ရည်ရွယ်ထားတယ်လို့ ပြောပါတယ်။

အခက်အခဲတွေ အများကြီးရှိနေပေမယ့် အကောင်းဆုံး လုပ်ဆောင်သွားမှာဖြစ်သလို ပြည်သူလူထုအနေနဲ့ မိမိတို့တတ်နိုင်တဲ့ နေရာကနေ ပူးပေါင်းကူညီပေးကြဖို့ကိုလည်း တောင်းဆိုထားပါတယ်။

မြန်မာဘီယာရုံး ဖောက်ခွဲတိုက်ခိုက်ခံရတာနဲ့ ပတ်သက်လို့ စစ်ကောင်စီက သတင်းထုတ်ပြန်တာ မရှိသေးပါဘူး။

9 months Ago
More News
Up