ကျိုက်ထို

September 16, 2021

ကျိုက်ထို NLD ပါတီအလုပ်မှုဆောင်၏ခင်ပွန်း ဖမ်းဆီးခံရပြီး ၄ ရက်အကြာ၌ သေဆုံး

မွန်ပြည်နယ်၊ ကျိုက်ထိုမြို့နယ် အမျိုးသားဒီမိုကရေစီအဖွဲ့ချုပ် NLD ပါတီ အလုပ်မှုဆောင်အဖွဲ့ဝင် ဒေါ်သီတာအေးရဲ့ ခင်ပွန်းဖြစ်သူ ဖမ်းဆီးခံရပြီး ၄ ရက်အကြာမှာ သေဆုံးကြောင်း စစ်ကောင်စီ အကြောင်းကြားလာတယ်လို့ ကျိုက်ထို NLD ပါတီတာဝန်ရှိသူတွေက ဒီဗွီဘီကို ပြောပါတယ်။

စက်တင်ဘာ ၁၂ ရက်နေ့က ကျိုက်ထိုမြို့နယ်၊ ဘိုက္ကားကျေးရွာမှာ ဒေါ်သီတာအေးကို စစ်ကောင်စီက ဖမ်းဆီးဖို့ လာရောက်ခဲ့တာဖြစ်ပြီး ဒေါ်သီတာအေးကို မတွေ့လို့ ခင်းပွန်ဖြစ်သူ ဦးရန်နိုင်ဦးနဲ့ ရပ်ကွက်နေ ကိုထွန်လင်းတို့ကို ဖမ်းဆီးသွားခဲ့တာ ဖြစ်ပါတယ်။

ကိုထွန်းလင်းကတော့ ဖမ်းဆီးခံရပြီး ၁ ရက်အကြာမှာ ပြန်လည်လွတ်မြောက်လာခဲ့တာ ဖြစ်ပါတယ်။

လာရောက်ဖမ်းစီးစဉ် ရိုက်နှက်နှိပ်စက်တာတွေ လုပ်ဆောင်သွားသလို ဖမ်းဆီးပြီး စက်တင်ဘာ ၁၆ ရက်နေ့မှာတော့ ဦးရန်နိုင်ဦး သေဆုံးသွားပြီလို့ စစ်ကောင်စီတပ်ဖွဲ့ဝင်တွေက မိသားစုကို အကြောင်းကြားလာခဲ့တာ ဖြစ်ပါတယ်။

ဦးရန်နိုင်ဦးဟာ ကျိုက်ထိုမြို့နယ် အထွေထွေအုပ်ချုပ်ရေးဦးစီးဌာနရဲ့ ကျေးရွာ စာရေးတစ်ဦးလည်း ဖြစ်ပါတယ်။

ကျိုက်ထိုမြို့နယ်အတွင်းမှာတော့ စစ်ကောင်စီတပ်ဖွဲ့ဝင်တွေက NLD ပါတီဝင်တွေ၊ CDM ဝန်ထမ်းတွေနဲ့ စစ်အာဏာရှင်ဆန့်ကျင်သူတွေကို အင်အားသုံးပြီး ဖမ်းဆီးတာတွေ ဆက်တိုက် လုပ်ဆောင်နေတာ ဖြစ်ပါတယ်။

1 day Ago

ကျိုက်ထိုတွင် မလေးရှားပို့မည့် ကျပ်သန်းပေါင်း ၄ သောင်းကျော်တန်ဖိုးရှိ မူးယစ်ဆေးများ ဖမ်းမိ

မွန်ပြည်နယ်၊ ကျိုက်ထိုမြို့နယ်မှာ မလေးရှားပို့မဲ့ ငွေကျပ် သန်းပေါင်း ၄ သောင်းကျော် တန်ဖိုးရှိတဲ့ မူးယစ်ဆေးတွေ ဖမ်းမိခဲ့တယ်လို့ မြန်မာနိုင်ငံ မူးယစ်ဆေးထိန်းချုပ်ရေး ဗဟိုကော်မတီ (CCDAC MYANMAR)က စက်တင်ဘာ ၁၅ ရက်နေ့မှာ ထုတ်ပြန်ပါတယ်။

မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့ဝင်တွေပါတဲ့ ပူးပေါင်းအဖွဲ့ဟာ စက်တင်ဘာ ၁၀ ရက် မနက်ပိုင်းက  ကျိုက်ထိုမြို့နယ်၊ ရန်ကုန်-မော်လမြိုင်သွားကားလမ်းပေါ်က မရမ်းချောင် ပူးပေါင်း စစ်ဆေးရေးစခန်းမှာ စစ်တောင်းတံတားဘက်နေ ကျိုက်ထိုဘက် မောင်းလာတဲ့ ကား ၂ စီးကို စစ်ဆေးခဲ့ပါတယ်။

မြင့်ကို မောင်းနှင်ပြီး ဒေါ်မီမီအေး(ခ)မီမီအေးကျော်လိုက်ပါလာတဲ့ Alphard ကားပေါ်က နေ ငွေကျပ် ၅၁၇ ဒသမ ၂၈ သိန်းကို သိမ်းဆည်းရမိတယ်လို့လည်း ဆိုပါတယ်။

ဒီကားနောက်မှာ စိုးသူရမောင်းနှင်ပြီး မင်းထင်နဲ့ စောမြင့်တို့လိုက်ပါလာတဲ့ Tipper အဖြူရောင် ၆ ဘီးယာဉ်ကို စစ်ဆေးရာမှာတော့ ကားနောက်ခန်းမှာ စားသောက်သီးနှံတွေနဲ့ ဖုံးအုပ် သယ်ဆောင်လာတဲ့ ဆာလာအိတ် ၅၂ အိတ်ထဲကနေ ဒေသကာလတန်ဖိုးငွေကျပ် ၄၁ ဒသမ ၁၇၅ ဘီလီယံ (ကျပ်သန်းပေါင်း ၄၁၁၇၅ ကျော်) တန်ဖိုးရှိတဲ့ အိုက်စ်(မက်သာအဖက်တမင်း) ကီလို ၁,၀၀၀၊ ကက်တမင်း ၄၇ ကီလိုကို ဖမ်းဆီးရမိခဲ့ပါတယ်။

စစ်ဆေးဖော်ထုတ်ချက်အရ မူးယစ်ဆေးဝါးတွေ သယ်ဆောင်ရာမှာ ပူးပေါင်းပါဝင် ဆောင်ရွက်ခဲ့တဲ့ ကျော်ဇောဝင်း(ခ)သားသားကို စက်တင်ဘာ ၁၁ ရက်နေ့ မွန်းလွဲပိုင်းက ရန်ကုန်တိုင်း၊ ဗဟန်းမြို့နယ်၊ မြန်မာပလာဇာမှာ ထပ်ဖမ်းမိပြီး သူတို့ကို ဥပဒေအရ အရေးယူထားတယ်လို့ ဆိုပါတယ်။

စစ်ဆေးချက်တွေအရ ဖမ်းမိတဲ့ မူးယစ်ဆေးဝါးတွေကို ရှမ်းပြည်နယ်၊ ကျေးသီးမြို့နယ်က နေ တနင်္သာရီတိုင်း၊ ထားဝယ်မြို့ကို သယ်ဆောင်ပြီး ပင်လယ်ရေကြောင်းကတဆင့် မလေးရှားရေပိုင်နက်ကို သယ်ဆောင်မယ်လို့ သိရပြီး ကွင်းဆက်ပြစ်မှုကျူးလွန်သူတွေကို ဆက်လက်စစ်ဆေး ဖော်ထုတ်နေတယ်လို့လည်း CCDAC MYANMAR က ထုတ်ပြန်ပါတယ်။

1 day Ago

September 11, 2021

ကျိုက်ထိုက Mytel တာဝါတိုင် မိုင်းခွဲ ဖျက်ဆီးခံရ

မွန်ပြည်နယ်၊ ကျိုက်ထိုမြို့နယ်၊ အင်္ဂဘိုကျေးရွာက Mytel တာဝါတိုင် စက်တင်ဘာ ၁၁ ရက် မနက် ၅ နာရီလောက်မှာ  မိုင်းခွဲခံခဲ့ရတယ်လို့ ဒေသခံတွေက  ဒီဗွီဘီကို ပြောပါတယ်။

အဲဒီတာဝါတိုင်ကို အမည်မသိ လူတစုက မိုင်းထောင်ဖောက်ခွဲခံခဲ့ရတာ ဖြစ်ပြီး၊ ပြည်သူတွေ ထိခိုက်ဒဏ်ရာ ရရှိတာမရှိဘူးလို့ သိရပါတယ်။

ဖောက်ခွဲပြီးနောက် တာဝါတိုင်ပြိုကျတာ မရှိပေမယ့် စက်ခန်းအတွင်းက ဆက်သွယ်ရေးစက် ပစ္စည်း‌တွေ ပျက်စီးသွားခဲ့ပါတယ်။

တာဝါတိုင် ဖောက်ခွဲခံခဲ့ရတဲ့အတွက်ကြောင့် စစ်ကောင်စီတပ်ဖွဲ့ဝင်တွေနဲ့ မိုင်တဲ တာဝန်ရှိသူတွေ လာရောက် စစ်ဆေးသွားတယ်လို့ ဒေသခံတစ်ဦးက ပြောပါတယ်။

Mytel တာဝါတိုင် မိုင်းထောင်ဖောက်ခွဲခံရတာဟာ စစ်တပ် အာဏသိမ်းပြီးနောက် မွန်ပြည်နယ်မှာ ပထမဦးဆုံးအကြိမ် ဖောက်ခွဲခံလိုက်ရတာ ဖြစ်ပါတယ်။

အာဏာသိမ်းစစ်ကောင်စီက  Mytel နဲ့ MPT တာဝါတိုင်တွေမှာ လုံခြုံရေး တိုးမြှင့်ချထားဖို့ ပြီးခဲ့တဲ့ ရက်ပိုင်းက ညွှန်ကြားထားပါတယ်။ 

6 days Ago
More News
Up