ကေအန်ယူ

January 21, 2023

၁၅ ရက်တိုက်ပွဲအတွင်း စစ်ကောင်စီ ဒုတပ်ရင်းမှူးအပါအဝင် ၅၀ ခန့်သေဆုံး

ကေအန်ယူ ကော်သူးလေအုပ်ချုပ်နယ်မြေ၊ ခလယ်လွီထူခရိုင် တပ်မဟာ ၃ နယ်မြေတွေထဲမှာ ပြီးခဲ့တဲ့ ဇန်နဝါရီ ၁ ရက်ကနေ ၁၅ ရက်နေ့အထိ ဖြစ်ပွားခဲ့တဲ့ တိုက်ပွဲတွေအတွင်း စစ်ကောင်စီဘက်က ဒုတပ်ရင်းမှူး ၁ ယောက်အပါအဝင် ၄၇ ယောက် သေဆုံးခဲ့ပြီး ၁၉ ယောက်လောက် ထိခိုက်ဒဏ်ရာရရှိခဲ့တယ်လို့ ထုတ်ပြန်ပါတယ်။

သီတင်း ၂ ပတ်ကျော်အတွင်း ကရင်အမျိုးသား လွတ်မြောက်ရေးတပ်မတော် (KNLA) တပ်မဟာ (၃) လက်အောက်ခံ တပ်ရင်း (၈)၊ တပ်ရင်း (၉)၊ ကရင်အမျိုးသားကာကွယ်ရေးတပ်ဖွဲ့ (KNDO) တပ်ရင်း (၃)၊ ကရင်အမျိုးသားလွတ်မြောက်ရေး တပ်မတော် (KNLA) လက်အောက်ခံ Federal Wings Drone တပ်ဖွဲ့တွေနဲ့ အာဏာသိမ်းအကြမ်းဖက် စစ်ကောင်စီတပ်တွေကြား မြေပြင်တိုက်ပွဲပေါင်း ၅၅ ကြိမ် ဖြစ်ပွားခဲ့ ပြီး Federal Wings Drone တပ်ဖွဲ့ကလည်း ဝေဟင်တိုက်ခိုက်မှုပေါင်း ၁၄ ကြိမ်လောက် ပြုလုပ်ခဲ့တယ်လို့ ဆိုပါတယ်။

အဆိုပါ တိုက်ပွဲတွေအတွင်း ကရင်အမျိုးသား လွတ်မြောက်ရေးတပ်မတော် (KNLA)၊ ကရင်အမျိုးသား ကာကွယ်ရေးတပ်ဖွဲ့ (KNDO) တို့ဘက်ကတော့ ၂ ယောက် ကျဆုံးခဲ့ပြီး ထိခိုက်ဒဏ်ရာရရှိသူ ၂ ယောက် ရှိခဲ့ တယ်လို့ ထုတ်ပြန်ချက်မှာ ဖော်ပြပါတယ်။

ဒါ့အပြင် အာဏာသိမ်းအကြမ်းဖက်စစ်ကောင်စီတပ်ဖွဲ့တွေ အသုံးပြုတဲ့ စစ်ကား ၂၁ စီးကိုလည်း ဖျက်ဆီးနိုင်ခဲ့တယ်လို့ ဆိုပါတယ်။

အာဏာသိမ်းအကြမ်းဖက်စစ်ကောင်စီတပ်တွေဟာ ပြည်သူလူထုနေထိုင်ရာ ကျေးရွာတွေထဲကို ရည်ရွယ်ချက်ရှိရှိ လက်နက်ကြီးနဲ့ ပစ်ခတ်ခဲ့တာကြောင့် ခလယ်လွီထူခရိုင် တပ်မဟာ (၃)၊ လယ်ဒို (ကျောက်ကြီး) မြို့နယ်၊ မူး (မုန်း) မြို့နယ် အုပ်ချုပ်နယ်မြေတွေထဲက ပြည်သူ ၅၀၀၀ ကျော် ထွက်ပြေးတိမ်းရှောင်နေကြရတယ်လို့ ဆိုပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပါတယ်။

NUG အစိုးရကတော့ ပြည်သူ့ခုခံတွန်းလှန်စစ်ပွဲ စတင်ခဲ့တဲ့ ၁ နှစ်အတွင်း အကြမ်းဖက် စစ်ကောင်စီဘက်က တပ်ဖွဲ့ဝင်ပေါင်း ၂၀,၁၅၀ ကျော်သေဆုံးကာ ဒဏ်ရာရသူ ၇,၀၀၀ ကျော်လောက်ရှိလာပြီး စစ်ကောင်စီ စိုးမိုးအုပ်ချုပ်နိုင်တဲ့နေရာဟာ တိုင်းပြည် နယ်မြေအကျယ်အဝန်းရဲ့ ထက်ဝက်တောင် မရှိတော့ဘူးလို့ NUG ယာယီသမ္မတ ဒူဝါလရှီးလက ပြောကြားထားပါတယ်။

မြန်မာပြည်အနှံ့ တိုက်ပွဲတွေမှာ တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ အကြမ်းဖက် စစ်ကောင်စီဘက်ကတော့ သတင်းထုတ်ပြန်တာ မရှိပါဘူး။

2 weeks Ago

January 19, 2023

ကရင်နှင့် ကရင်နီဒေသတွင် ပစ်ခတ်တိုက်ခိုက်မှုများ ဆက်ဖြစ်၊ ဒေသခံထောင်ချီ စစ်ဘေးရှောင်

ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေ၊ ညောင်လေးပင်ခရိုင် တပ်မဟာ-၃၊ ကျောက်ကြီးမြို့နယ်ထဲက ကျေးရွာတွေထဲကို စစ်ကောင်စီတပ်တွေက သီတင်း ၂ ပတ်အတွင်း လက်နက်ကြီးအလုံး ၃၀ ကျော် ပစ်ခတ်ခဲ့တာကြောင့် ဒေသခံပြည်သူ ၂,၅၀၀ ကျော် ထွက်ပြေးတိမ်းရှောင်နေကြရတယ်လို့ ကေအန်ယူက ထုတ်ပြန်ပါတယ်။

ဇန်နဝါရီ ၃ ရက်ကနေ ၁၇ ရက်အထိ ၁၅ ရက်အတွင်း အရပ်သားပြည်သူလူထုနေထိုင်ရာ ကျေးရွာတွေထဲကို စစ်အုပ်စုက ရည်ရွယ်ချက်ရှိရှိ လက်နက်ကြီးတွေနဲ့ ပစ်ခတ်တိုက်ခိုက်ခဲ့တာ ဖြစ်ပြီး အရပ်သားပြည်သူလူထုနေအိမ် ၂ လုံး ပျက်စီးခဲ့ကာ ၁ ယောက် ထိခိုက်ဒဏ်ရာ ရရှိခဲ့တယ်လို့ ဆိုပါတယ်။

ကေအန်ယူ ညောင်လေးပင်ခရိုင်ထဲမှာ တပ်စွဲထားတဲ့ ခလရ-၁၂၄၊ ခလရ-၆၀၊ ခမရ-၃၅၁ နဲ့ ခမရ-၄၃၉ တို့က ပစ်ခတ်ခဲ့တာကြောင့် ခလယ်တူရယ်ကျေးရွာကို လက်နက်ကြီး ၉ လုံး၊ ဃဲဒဲကျေးရွာကို ၄ လုံး၊ ပကော်ခီးကျေးရွာကို ၂ လုံး၊ ကျို့ကုန်းကျေးရွာကို ၂ လုံး၊ သရေးစီလော်ကျေးရွာကို ၂ လုံး၊ မတောကူးကျေးရွာကို ၅ လုံး၊ သေဂေါ်ဒဲကျေးရွာကို ၄ လုံးနဲ့ ရွှေပေါက်ကံကျေးရွာကို ၃ လုံးစီနဲ့ စုစုပေါင်း ကျေးရွာ ၈ ရွာထဲကို ပစ်ခတ်ခဲ့ကြတာလို့ ကေအန်ယူ ထုတ်ပြန်ချက်မှာ ဖော်ပြပါတယ်။

ကရင်နီ (ကယား) ပြည်နယ်၊ ဒီးမော့ဆိုမြို့နယ်မှာလည်း ၆ မိုင်လမ်းကြီးတကျော ပြီးခဲ့တဲ့ တပတ်အတွင်း တိုက်ပွဲဖြစ်ပွားလို့ စစ်ကောင်စီဘက်က ထိခိုက်ကျဆုံးမှုရှိကြောင်း ကရင်နီအမျိုးသားများကာကွယ်ရေးတပ် (KNDF) တပ်ရင်း-၉ က သတင်းထုတ်ပြန်ထားပါတယ်။

စံပြ ၆ မိုင်ကျေးရွာအုပ်စု လမ်းမကြီးတကျောကို စစ်ကောင်စီတပ်ဖွဲ့တွေက ဇန်နဝါရီ ၁၁ ရက်ကစပြီး စစ်ကြောင်းထိုး ဝင်ရောက်ခဲ့တဲ့အတွက် နှစ်ဖက် တိုက်ပွဲဖြစ်ပွားခဲ့တာလို့ ဆိုပါတယ်။

အဆိုပါ တရက်တည်းမှာပဲ ဖြစ်ပွားခဲ့တဲ့ တိုက်ပွဲကြောင့် စံပြ ၆ မိုင် ဘုရားကျောင်း အပါအဝင် လမ်းမကြီးတကျောရှိ နေရာ ၃ ခုမှာ စစ်ကောင်စီဘက်က ဝင်ရောက်တပ်စွဲထားတယ်လို့ ဆိုပါတယ်။

၆ မိုင်ဘုရားကျောင်းမှာ တပ်စွဲထားတဲ့ စစ်ကောင်စီတပ်ဖွဲ့ထဲက အပြင်ထွက်လာတဲ့ စစ်ကြောင်းကို ညအချိန်မှာ တိုက်ခိုက်ခဲ့လို့ တိုက်ပွဲ မိနစ် ၂၀ လောက် ဖြစ်ပွားခဲ့ပြီး စစ်ကောင်စီက ထိခိုက်ကျဆုံးမှုကိုတော့ မသိရသေးပါဘူး။

ဒါ့အပြင် နောက်ရက်တွေမှာလည်း ၆ မိုင်ကျေးရွာနဲ့ ဘက်သလိန်ကျေးရွာရှိ စစ်ကောင်စီ ခြေကုပ်ယူထားနေရာတွေအပြင် ခမရ ၄၂၇ တပ် ကင်းပုန်းတို့ကို KNDF က အလစ်အငိုက် တိုက်ခိုက်ခဲ့တယ်လို့ ဆိုပါတယ်။

ဇန်နဝါရီ ၁၃ ရက်နဲ့ ၁၅ ရက်နေ့မှာတော့ ဘုရားကျောင်းမှာ တပ်စွဲထားတဲ့  စစ်ကောင်စီတပ်ကို KNDF B (09) က လက်နက်ကြီးနဲ့ အလစ်အငိုက် တိုက်ခိုက်ခဲ့ရာမှာ စစ်ကောင်စီဘက်က ၆ ဦး သေဆုံးသွားခဲ့ကြောင်းလည်း ထုတ်ပြန်ထားပါတယ်။

3 weeks Ago
More News
Up