ကုလလူ့အခွင့်အရေး

September 24, 2021

စစ်ကောင်စီတပ်များ ပြန်ပေးဆွဲနေဟု ကုလလူ့အခွင့်အရေးအထူးကိုယ်စားလှယ်ပြော

မြန်မာနိုင်ငံမှာ အတင်းအဓမ္မအာဏာသိမ်းထားတဲ့ စစ်ကောင်စီရဲ့တပ်ဖွဲ့တွေဟာ ဖမ်းဝရမ်းထုတ်ခံရလို့ထွက်ပြေးနေသူတွေ လာအဖမ်းခံစေဖို့ နည်းဗျူဟာတစ်ခုအဖြစ် ကလေးငယ်တွေ အပါအဝင် သူတို့ရဲ့မိသားစုဝင်တွေကို ပြန်ပေးဆွဲနေတယ်လို့ မြန်မာနိုင်ငံဆိုင်ရာကုလသမဂ္ဂ အထူးကိုယ်စားလှယ် တွမ်အန်ဒရူးစ်က စက်တင်ဘာ ၂၂ ရက် ကုလသမဂ္ဂ လူ့အခွင့်အရေးကောင်စီမှာ ပြောပါတယ်။ 

မြန်မာနိုင်ငံက အကျပ်အတည်းဟာ ပိုမိုဆိုးရွားလာခဲ့ပြီး အစုလိုက်အပြုံလိုက် ရက်စက် ကြမ်းကြုတ်တဲ့ ရာဇ၀တ်မှုတွေ ဆက်လက်ဖြစ်ပွားတာနဲ့ လက်နက်ကိုင်ပဋိပက္ခတွေကြောင့် သေနိုင်လောက်အောင် အန္တရာယ်များတာတွေနဲ့ ရင်ဆိုင်နေရပြီလို့လည်း ဆိုပါတယ်။ 

အခုတခါ စစ်တပ်က နောက်ထပ်ယုတ်မာတဲ့နည်းဗျူဟာကို ပိုသုံးလာပြီးတော့ ဖမ်းဝရမ်း ထုတ်ခံထားရသူတွေရဲ့ မိသားစုဝင်တွေကိုပြန်ပေးဆွဲတာ အပါအ၀င် ပြစ်ဒဏ်စုပေါင်းချမှတ်တာ တွေ လုပ်နေတယ်လို့ တွမ်အန်ဒရူးစ်က ပြောပါတယ်။ 

တွမ်အန်ဒရူးစ်ရဲ့သက်သေခံချက်ဟာ ခက်ခဲတင်းကျပ်တဲ့ စစ်အာဏာရှင် အုပ်ချုပ်ရေး အောက်မှာ ရှစ်လနီးပါးရှိနေခဲ့တဲ့ မြန်မာနိုင်ငံရှိ လူသားချင်းစာနာထောက်ထားမှု အခြေအနေနဲ့ ပတ်သက်ပြီး လူ့အခွင့်အရေးကောင်စီကို  တင်ပြခဲ့တာဖြစ်ပါတယ်။ 

စစ်အုပ်စုဟာ မြန်မာပြည်သူတွေကို စနစ်တကျနဲ့ ကျယ်ကျယ်ပြန့်ပြန့် တိုက်ခိုက်မှုတွေလုပ်ဖို့ ညွှန်ကြားထားကြောင့် စစ်အာဏာရှင်တွေဟာ လူသားမျိုးနွယ်အပေါ်ကျူးလွန်တဲ့ရာဇ၀တ်မှုတွေကို ကျူးလွန်နေတယ်ဆိုတာ မငြင်းနိုင်တဲ့အမှုတခုဖြစ်တယ်လို့ တွမ်အင်ဒရူးစ်က ပြောပါတယ်။ 

ဒီလအစောပိုင်းက မြန်မာနိုင်ငံက အဓိက အတိုက်အခံလှုပ်ရှားသူတွေဟာ စစ်အစိုးရကိုဆန့်ကျင်တဲ့ ပြည်သူတွေရဲ့ခုခံတော်လှန်စစ်ကို ကြေညာခဲ့ပါတယ်။ ဒီလုပ်ရပ်ဟာ နိုင်ငံအတွင်းက စစ်တပ်ရဲ့ပြင်းထန်တဲ့အကြမ်းဖက်မှုတွေကို ထင်ဟပ်နေတယ်လို့လဲ အန်ဒရူးစ်က ပြောပါတယ်။

အခုက စစ်တပ်နဲ့ပူးပေါင်းတယ်လို့ စွပ်စွဲခံရသူတွေနဲ့ ကလေးငယ်တွေအပါအဝင် သူတို့ရဲ့မိသားစုဝင်တွေလည်း အသတ်ခံရတယ်ဆိုတဲ့ သတင်းတွေ အပါအဝင် မြန်မာနိုင်ငံမှာ အကြမ်းဖက်မှု အရှိန်မြင့်နေတာဟာ အတော်လေး စိတ်သောက ရောက်ရတယ်လို့ သူက ဆိုပါတယ်။

နိုင်ငံတကာလူ့အခွင့်အရေး စံချိန်စံညွှန်းတွေနဲ့ လူသားချင်းစာနာထောက်ထားမှုဆိုင်ရာ အခြေခံမူတွေကို လေးစားလိုက်နာကြဖို့ လူတိုင်းကို မေတ္တာရပ်ခံပါတယ်လို့လည်း သူကပြောပါတယ်။ 

“ဘာကိုစောင့်နေကြတာပါလဲ။ ကျနော်တို့ ပိုကြာနေလေ လူတွေပိုသေလေ”ပဲလို့ တွမ်အန်ဒရူးစ်က ပြောသွားပါတယ်။ 

2 months Ago

February 11, 2021

မြန်မာစစ်တပ်ကိုအရေးယူရန် ကုလလူ့အခွင့်အရေးကောင်စီကို တိုက်တွန်း

 မြန်မာ့အရေးအတွက် ကုလသမဂ္ဂလူ့အခွင့်အရေးကောင်စီမှာ ဖေဖော်ဝါရ ၁၁ရက်နေ့ အထူးအစည်းအဝေး ကျင်းပမယ့် ကြေညာချက်ကို ပထမခြေလှမ်းအဖြစ် ကြိုဆိုပေမဲ့  လက်ဆုပ်လက်ကိုင်ပြနိုင်တဲ့ အရေးယူဆောင်ရွက်ချက်တွေလုပ်ဖို့ လိုအပ်တယ်လို့ အပြည်ပြည်ဆိုင်ရာလွတ်ငြိမ်းချမ်းသာခွင့် အဖွဲ့ကြီး Amnesty International က ပြောဆိုလိုက်ပါ တယ်။

မြန်မာ စစ်တပ်ရဲ့ လူ့အခွင့်အရေးချိုးဖောက်မှုကို တုံ့ပြန်ဖို့ နိုင်ငံတကာ လူ့အဖွဲ့အစည်းဟာ နည်းလမ်းအားလုံးကိုသုံးဖို့ မဖြစ်မနေ အရေးကြီးတယ်၊ မြန်မာစစ်တပ် ခေါင်းဆောင်မှုထဲမှာ နိုင်ငံတကာဥပဒေကို ဆန့်ကျင်တဲ့ ရာဇဝတ်မှုတွေကို ကျူးလွန်သူတွေလို့ စွပ်စွဲခံရသူတွေ ပါနေပြီး သူတို့ကျူးလွန်တဲ့ ဖိစီးနှိပ်စက်မှုတွေ အလွဲသုံးစားမှုတွေကို မစစ်ဆေးဘဲ ဆက်နေခွင့် မပြုနိုင်ဘူးလို့ Amnesty International ရဲ့ သုတေသန ဆိုင်ရာ ဒေသတွင်း ဒုညွှန်မှူး အီမာလင်း ဂီးလ်က  ပြောပါတယ်။

“ဖြုန်းဖို့ အချိန်မရှိတော့ဘူး ဖေဖော်ဝါရီ ၁ ရက်နေ့တည်းက ခုထိ လူ ၁၅၀ထက် မနည်း အဖမ်းခံရပြီးပြီ အရပ်သားအစိုးရ အဖွဲ့ဝင်တွေလည်း နေအိမ်အကျယ်ချုပ် နေရဆဲပဲ လူ့အခွင့်အရေး ခုခံကာကွယ်သူ အများအပြားလည်း ပုန်းနေရတယ်။ နေရပ်ရှောင် ဒုက္ခသည်တွေ တိုင်းရင်းသား လူနည်းစုတွေနဲ့ ပဋိပက္ခ ဖြစ်နေတဲ့ ဒေသတွေက လူတွေကို အထူးသဖြင့် စိုးရိမ်တယ်။ စစ်တပ်က ဘာလုပ်နိုင်တယ်ဆိုတာ ကျမတို့ သိတယ်”လို့  သူက ဆက်ပြောပါတယ်။

နိုင်ငံတဝန်း ထောင်သောင်းချီတဲ့ လူတွေဟာ အဖမ်းခံ အရိုက်ခံရနိုင်တဲ့ ဘေးကို ရင်ဆိုင်ပြီး လမ်းပေါ်ထွက် ဆန္ဒပြပြီး စစ်အာဏာသိမ်းတာကို ဆန့်ကျင်နေကြတယ်။ မြန်မာနိုင်ငံအတွင်း လွတ်လပ်စွာ ဆန္ဒထုတ်ဖော်ခွင့် အသင်းဖွဲ့စည်းပိုင်ခွင့် နဲ့ စုဝေးနိုင်ခွင့် တွေ ကို ကျင့်သုံးနေသူတွေ အားလုံးအတွက် နိုင်ငံတကာ လူ့အဖွဲ့အစည်းက မတ်တပ်ထရပ်ရမယ်။ သူတို့ မထိခိုက်အောင် ကာကွယ်ဖို့ စွမ်းအားရှိသမျှ အကုန်လုပ်ရမယ် လို့လည်း သူက ပြောပါတယ်။

လူ့အခွင့်အရေး ကောင်စီရဲ့ လက်ဆုပ်လက်ကိုင်ပြနိုင်တဲ့ အရေးယူ ဆောင်ရွက်ချက်တွေဟာ မြေပြင်က လူ့အခွင့်အရေး ချိုးဖောက်မှုတွေ နောက်ထပ် ဖြစ်မလာအောင် ဟန့်တားရာမှာ မရှိမဖြစ် အရေးပါသလို နိုင်ငံတွေဟာ ဒီသီတင်းပတ် အထူး အစည်းအဝေး ကနေ အဓိပ္ပာယ်ရှိတဲ့ ရလဒ် ထွက်အောင် လုပ်ဆောင်ရမယ်လို့လည်းတိုက်တွန်းပြောပါတယ်။

10 months Ago
Up