ကိုရိုနာကာကွယ်ရေး

April 8, 2020

ကိုရိုနာကာကွယ်ရေး နှာခေါင်းစည်း Masks များ လက်ဘနွန် အကျဉ်းသားများ ချုပ်လုပ်

လက်ဘနွန်နိုင်ငံရဲ့ အကြီးဆုံးထောင်ထဲက ထောင်သားတွေဟာ ပြည်တွင်းလုံခြုံရေး တပ်ဖွဲ့ဝင် (ISF) တွေနဲ့ ထောင်သားတွေအတွက် မျက်နှာဖုံး၊ နှာခေါင်းစည်းတွေကို ချုပ်လုပ်နေပါတယ်။ နိုင်ငံတွင်း ကိုရိုနာဗိုင်းရပ်စ် ကူးစက်မှုတိုက်ဖျက်ရေး အစိတ်အပိုင်းအနေနဲ့ ခုလို ထုတ်လုပ်နေတာပါ။ (ISF) တပ်ဖွဲ့ဝင်တွေရဲ့ ကြီးကြပ်မှုအောက်က အလုပ်ရုံထဲမှာ ထောင်သားတွေ အလုပ်လုပ်နေပါတယ်။ လတ်တလော ဖြန့်ချိထားတဲ့ ရုပ်သံထဲမှာ ထောင်သားအားလုံး မျက်နှာဖုံးနဲ့ လက်အိတ်တွေ ဝတ်ထားတာ တွေ့ရပါတယ်။ ရူမီယာထောင်ထဲက အထည်ချုပ်အလုပ်ရုံဟာ သီတင်းပတ် တပတ်ကျော်အတွင်း မျက်နှာဖုံး ရာချီ ထုတ်လုပ်ခဲ့ပြီး ဘေးရွတ်မြို့တော်က ပုဂ္ဂလိက တက္ကသိုလ်ဆေးရုံမှာ သုံးနေတယ်လို့ (ISF) ဌာန ပြည်သူ့ဆက်ဆံရေး အကြီးအကဲ ဗိုလ်မှူးကြီး ဂျိုးဇက်မောင်ဆယ်လမ်က ဧပြီ ၇ ရက်မှာ ပြောပါတယ်။ (ISF) ဌာနဟာ မျက်နှာဖုံး ချုပ်လုပ်နည်းကို ဆေးရုံတွေကနေ သင်ယူခဲ့ပြီး ထောင်သားတွေကို ပြန်သင်ပြပေးခဲ့တယ်။ ထောင်သားတွေဟာ ကိုရိုနာဗိုင်းရပ်စ် ကူးစက်မှုတိုက်ဖျက်ရေး စစ်ပွဲမှာ ပါဝင်ခွင့်ရလို့ ဂုဏ်ယူနေကြတယ်လို့ သူက ဆက်ပြောပါတယ်။ လက်ဘနွန်ထောင်တွေထဲမှာ ကိုရိုနာကူးစက်ခံမှတ်တမ်း မရှိပါဘူး။ နိုင်ငံတွင်း အင်္ဂါနေ့ထိ အတည်ပြုချက်အရ COVID-19  ကူးစက်ခံ ၅၄၈ ယောက် ရှိပြီး ကူးစက်ခံ ၁၉ ယောက် သေဆုံးခဲ့ပါတယ်။
1 year Ago

April 5, 2020

မြို့နယ် ၃ ခုတွင် ကိုရိုနာကာကွယ်ရေး ဆောင်ရွက်နေသူများအား နှောင့်ယှက်သူ ၄ ဦးကို အမှုဖွင့်

တံတားဦး၊ ရေတာရှည်နဲ့ ဇလွန်မြို့နယ်တွေမှာ ကိုရိုနားဗိုင်းရပ်စ်ပြန့်ပွားမှု မရှိစေဖို့ ဆောင်ရွက်နေတဲ့ တာဝန်ရှိသူတွေအား နှောင့်ယှက်သူ ၄ ဦးကို သက်ဆိုင်ရာရဲစခန်းအသီးသီက အမှုဖွင့်ထားတယ်လို့  ပြည်ထဲရေးက သတင်းထုတ်ပြန်ပါတယ်။ ဧပြီလ ၃ ရက်က တံတားဦးမြို့နယ် စပါးတွင်းရွာနေ ဦးမာကျော့ရဲ့အိမ်မှာ Covid-19 ရောဂါမပြန့်ပွားစေဖို့ အစိုးရလမ်းညွှန်ချက်တွေကို အသံချဲ့စက်နဲ့ နှိုးဆော်တာ၊ တခြားဒေသကနေ ကျေးရွာ လာသူတွေကို ကျန်းမာရေးစစ်ဆေးတာတွေ ဆောင်ရွက်ချိန် တရွာတည်းနေ စိုးနိုင်ဟာ အရက်သေစာ သောက်စားမူးယစ်ပြီး တားဆီးဟန့်တား နှောင့်ယှက်ကာ ခဲနဲ့ ပေါက်တဲ့ဖြစ်စဉ်ဖြစ်ပွားခဲ့ပါတယ်။  ရေတာရှည်မြို့နယ်နေသူ ဘုန်းမြင့်မိုးကတော့ သူရဲ့လူမှုကွန်ရက်အကောင့်နဲ့ရေတာ ရှည်မြို့သူ/သားများ Group Facebook လူမှုကွန်ရက်စာမျက်နှာမှာ “ကဲ ရေတာရှည် အမျိုးတွေ ဘရင်းကုန်း Positive တဲ့နော်”ဆိုပြီး ရေတာရှည်မြို့နယ်၊ ဘရင်းကုန်းကျေးရွာမှာ ကိုရိုနာဗိုင်းရပ်စ်ကူးစက်ရောဂါပိုးတွေ့ရှိကြောင်း မဟုတ်မမှန် ရေးသားခဲ့တယ်လို့ ထုတ်ပြန်ချက် အရ သိရပါတယ်။ ဇလွန်မြို့နယ်မှာလည်း ဧပြီလ ၃ ရက် ည ၇ နာရီလောက်က ကျေးရွာအုပ်ချုပ်ရေးမှူး ဦးလှဆောင်းဦးစီးတဲ့ အဖွဲ့ဟာ အ.မ.က(မောင်းထောင်)မှာ ပြည်ပက ပြန်ရောက်လာသူတွေကို စောင့်ကြည့်ရေးတာဝန်ဆောင်ရွက်နေချိန် ဝင်းကိုနဲ့ရန်မျိုးအောင်တို့ဟာ အရက်သေစာ သောက်စားမူးယစ်ကာ အော်ဟစ်ဆဲဆိုပြီး စာသင်ကျောင်းကို ကျောက်ခဲတွေနဲ့ ပစ်ပေါက်ခဲ့ကြ တယ်လို့ ထုတ်ပြန်ချက်မှာ ဖော်ပြထားပါတယ်။ အခုလိုဖြစ်စဉ်တွေနဲ့ပတ်သက်လို့ တံတားဦးမြို့နယ်၊ စပါးတွင်းရွာနေ စိုးနိုင်ကို သဘာဝဘေးအန္တရာယ် စီမံခန့်ခွဲမှုဆိုင်ရာ ဥပဒေပုဒ်မ ၂၆၊ ရေတာရှည်မြို့နယ်က ပြည်သူများ အထင်အမြင် လွဲမှားစေရန် မဟုတ်မမှန် ရေးသားဖော်ပြခဲ့သူ ဘုန်းမြင့်မိုးကို ရေတာရှည်မြို့မရဲစခန်း(ပ)၁၃၆/၂၀၂၀၊ သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေပုဒ်မ ၂၇ တို့နဲ့ အမှုဖွင့်စစ်ဆေးနေပါတယ်။  ဇလွန်မြို့နယ် မောင်းထောင်ရွာက ဝင်းကို နဲ့ ရန်မျိုးအောင်တို့ကိုတော့ ဇလွန်မြို့မရဲစခန်းက (ပ)၇၆၈/၂၀၂၀၊ ရာဇသတ်ကြီးပုဒ်မ ၃၃၆/ ၃၅၃/ ၂၉၄/ ၁၁၄ (လုံခြုံရေးကို ဘေးဖြစ်စေသော ပြုလုပ်မှု၊ တာဝန်ဝတ္တရား ဆောင်ရွက်နေသော ပြည်သူ့ဝန်ထမ်းအား အနိုင့်အထက်ပြုမှု၊ ဆဲဆိုမှု၊ အားပေးကူညီမှု) တို့နဲ့ အမှုဖွင့် စစ်ဆေးနေတယ်လို့ ထုတ်ပြန်ချက်မှာ ဖော်ပြထားပါတယ်။
1 year Ago
Up