ကိုဗစ်

July 24, 2021

ရန်ကုန်သုသာန်များတွင် ယနေ့ ရုပ်အလောင်း ၉၀၀ နီးပါး မီးသင်္ဂြိုဟ်

ရန်ကုန်မြို့ရှိ သုသာန် ၄ ခုမှာ  ဒီနေ့ ဇူလိုင် ၂၄ ရက်နေ့ မီးသင်္ဂြိုဟ်ပေးရတဲ့ ရုပ်အလောင်း ၉၀၀ နီးပါးရှိခဲ့တယ်လို့ အကူအညီပေးနေတဲ့ ပရဟိတသမားတွေက ပြောပါတယ်။ 

ဒီနေ့ ရေဝေးမှာ ရုပ်အလောင်း ၃၀၀ ကျော်၊ ထိန်ပင်မှာ ၃၀၀ ကျော်၊ ကျီစုမှာ ၁၀၀ ကျော်၊ ကျူချောင်းမှာ ရုပ်အလောင်း ၁၅၀ ကျော်  မီးသင်္ဂြိုဟ်ခဲ့တာဖြစ်ပါတယ်။

ရေဝေးနဲ့ ထိန်ပင်ကနာရေးတွေကို ကူညီပေးနေတဲ့ ပရဟိတစေတနာ့ဝန်ထမ်း တစ်ဦးက  "၆ နာရီရောက်တဲ့ကားတွေဆိုရင်  မီးသင်္ဂြိုဟ်ပေးတယ်။ ၆ နာရီကျော်မှ ရောက်တဲ့ကားတွေဆို အအေးခန်းမှာထားပြီးနောက်နေ့မှ  သင်္ဂြိုဟ်ပေးတယ်။ ၃၀၀ ကျော်ကျော်ပဲရှိမယ်။ ကျလာပြီ။"လို့ ပြောပါတယ်။ 

ဇူလိုင် ၂၃ ရက်နေ့ကတော့ သုသာန် ၄ ခုမှာ  ရုပ်အလောင်း ၁၀၀၀ ကျော်လောက်  မီးသင်္ဂြိုဟ်ပေးခဲ့ရပါတယ်။ မနေ့ကစပြီး ရန်ကုန်သုသာန်တွေမှာ ညနေ ၆ နာရီအထိပဲ  ရုပ်အလောင်းတွေကို  မီးသင်္ဂြိုဟ်ခွင့်ပြုပြီး အချိန်ကန့်သတ်လိုက်တဲ့အတွက် အချိန်အတွက်အခက်အခဲရှိနေတယ်လို့ ပရဟိတသမားတစ်ယောက်က ပြောပါတယ်။ 

ကျီစုသုသာန်မှာ နာရေးကူညီပေနေတဲ့ ပရဟိတသမားတစ်ဦးက "အရင် တန်းစီနေကျ ညနေအထိ ကားတွေမရှိတော့ဘူး။ ဒီနေ့ ၁၀၀ ကျော်လောက်ပဲရှိတော့တယ်။ သုသာန်တွေက  ညနေ ၆နာရီကျော်ရင် တိုက်ရိုက်မီးရှို့တာတွေ လက်မခံတော့ဘူး။ အဲ့ဒီတော့ နောက်ကျတဲ့အလောင်းတွေဆို အိမ်မှာပဲ ထားခိုင်းရတော့တယ်။ အဲ့ဒီတစ်ခုတော့ အဆင်မပြေဘူး"

တခြားသုဿာန်တွေမှာ  မီးသင်္ဂြိုဟ်ရတဲ့ ရုပ်အလောင်းအရေအတွက် ကျသွားပေမယ့် ကျူချောင်း သုသာန်မှာတော့ သိသိသာသာ အရေအတွက်မကျသေးဘူးလို့ ပရဟိတ သမားတစ်ယောက်က ပြောပါတယ်။သုသာန်တွေမှာ နိဗ္ဗာန်ယာဉ်တွေများလွန်းတဲ့အတွက် ရုပ်အလောင်းတစ်ခု  မီးသင်္ဂြိုဟ်ဖို့ အချိန်သုံးနာရီလောက် တန်းစီစောင့်ရတယ်လို့ ဆိုပါတယ်။

ကျူချောင်းသုသာန်မှာ နာရေးကူညီပေးနေသူတစ်ဦးက  "ဒီနေ့ကျူချောင်း အခြေအနေကလည်း မနေ့ကနဲ့ မကွာပါဘူး။ ဒီနေ့လည်း ၁၅၀၊ ၁၆၀ လောက်သွားမှာပဲ။ အခက်အခဲကတော့ တန်းစီနေရတာပေါ့ဗျာ။ မနက် ၁၀ နာရီလောက်က တန်းစီတာ နေ့ခင်း ၁ နာရီလောက်မှ ကျနော့် ကားပေါ်က အလောင်းချရတယ်။ တခြားပြောထားတဲ့ Body တွေလည်း သွားမသယ်နိုင်။ အဲ့ဒီမှာတင် အချိန်တွေပုပ်တာပေါ့။ ပုံမှန်ဆို အချိန် ၃ နာရီလောက်အတွင်း ၅ လောင်း ၆လောင်းလောက် အကူအညီပေးလို့ရတယ်။”

ဇူလိုင် ၁၃ ရက်နေ့ကစပြီး ရန်ကုန်မြို့ ထိန်ပင်၊ ရေဝေး၊ ကျီစု၊ ကျူချောင်းသုဿန်လေးခုမှာ တစ်ရက်ကို ရုပ်အလောင်းစုစုပေါင်း ၆၀၀ ကျော် ၇၀၀နီးပါး  မီးသင်္ဂြိုဟ်ခဲ့ရါတယ်။

ဇူလိုင် ၂၀ ရက်နေ့မှာတော့ သုဿန်လေးခုမှာ ရုပ်အလောင်း ၁၂၀၀ ကျော် ၁၃၀၀ နီးပါး  မီးသင်္ဂြိုဟ်ပေးခဲ့ရပြီး ကိုဗစ်ကြောင့် အောက်ဆီဂျင်မရဘဲ သေဆုံးသူအရေအတွက်ဟာ အဆမတန်များပြားခဲ့ပါတယ်။ အောက်ဆီဂျင်လိုအပ်လို့ အကူအညီတောင်းနေသူတွေလည်း အများကြီးရှိနေသေးတယ်လို့ ပရဟိတအဖွဲ့တွေက ပြောပါတယ်။

Photo- ဘိုစိန်လူမူကူညီကယ်ဆယ်ရေးအဖွဲ့ (ရန်ကုန်)

5 days Ago

July 19, 2021

ပုသိမ်မြို့တွင် ကိုဗစ်ကြောင့် နေအိမ်များ၌ သေဆုံးမှုနှုန်း ပိုများလာ

ပုသိမ်မြို့တွင် ကိုဗစ်ကြောင့် နေအိမ်များ၌ သေဆုံးမှုနှုန်း ပိုများလာ

DVBပုသိမ်မြို့တွင် ဇူလိုင် ၁၈ ရက်​နေ့က ကိုဗစ်-၁၉ ​ရောဂါ​​ကြောင့် နေအိမ်တွေမှာ သေဆုံးသူ ၅၀ အပါအဝင် လူနာ ၇၄ ဦး စံချိန်တင် သေဆုံးခဲ့တယ်လို့ သိရပါတယ်။

ဇူလှိုင် ၁၈ ရက်​နေ့က ကိုဗစ်​ကြောင့် နေအိမ်တွေမှာ အယောက် ၅၀၊ ပုသိမ်​ဆေးရုံကြီးမှာ ၁၂ ဦးနဲ့ မဆရ-၄ တောင်ပေါ်‌ဆေးရုံက ၃ ဦး သေဆုံးခဲ့တာလို့ မ​နောဖြူလူမှုကူညီ​ရေး အဖွဲ့က ထုတ်ပြန်ထားပါတယ်။

ကိုဗစ်-၁၉ အတည်ပြုလူနာတစ်ဦး "​နေအိမ်​တွေမှာ ​သေတာ မြင့်တက်လာတာ ကျန်းမာ​​ရေး ​စောင့်​ရှောက်မှုမရကြလို့၊ အခုအထိ တိတိကျကျ မလုပ်​ဆောင်နိုင်ဘူး၊။ ဆေးရုံမှာ ​ဆေးဝါး ​အောက်ဆီဂျင် ​​နေရာ အခက်အခဲဖြစ်​နေတယ်။ တရက်ထပ်တရက်ပို ​သေနှုန်းမြင့်လာတာ စိုးရိမ်စရာ အရမ်း​ကောင်းလာတယ်။ ဒုတိယလှိုင်းမှာ အ​ကောင်းဆုံးထိန်းချုပ်နိုင်​​အောင် စီမံခဲ့တယ်။ အခုက အရည်အချင်းမရှိဘဲ ဦး​ဆောင်သူ​တွေ​ကြောင့် ကျနော်တို့မြို့အထိနာတာ” ​ပြောပါတယ်။

ပုသိမ်မြို့မှာ ကိုဗစ်-၁၉ တတိယလှိုင်းကာလ ဇူလိုင် ၁၈ ရက်​​နေ့အထိ ကိုဗစ်ကြောင့် သေဆုံးသူ ၄၀၀ ကျော်ရှိလာပြီလို့ သိရပါတယ်။

1 week Ago
More News
Up