ကာကွယ်ရေးဝန်ကြီး

September 12, 2021

အိန္ဒိယ-ဩစတြေးလျ နိုင်ငံခြားရေးနှင့် ကာကွယ်ရေးဝန်ကြီးများ နယူးဒေလီတွင် တွေ့ဆုံ

အိန္ဒိယနဲ့ သြစတြေးလျ နိုင်ငံခြားရေးနဲ့ ကာကွယ်ရေးဝန်ကြီးတွေ အိန္ဒိယမြို့တော် နယူးဒေလီမှာ စက်တင်ဘာ ၁၁ ရက်က တွေ့ဆုံခဲ့ပြီး နှစ်နိုင်ငံကြား ဆက်ဆံရေး အားဖြည့်ဖို့ ဆွေးနွေးခဲ့ပါတယ်။

သြစတြေးလျ နိုင်ငံခြားရေးဝန်ကြီး မာရိစ်ပိန်းနဲ့ ကာကွယ်ရေးဝန်ကြီး ပီတာဒတ်တွန်တို့ဟာ နယူးဒေလီကို စက်တင်ဘာ ၁၀ ရက်က ရောက်လာတာပါ။

ကာကွယ်ရေးနဲ့ ဗျူဟာမြောက် အပြန်အလှန် ဆက်ဆံရေး ကျစ်လျစ်အောင်လုပ်ရေး ဝန်ကြီးအဆင့် အစည်းအဝေးကို တက်ဖို့ ရောက်လာတာပါ။

သူတို့ဟာ အိန္ဒိယ ကာကွယ်ရေးဝန်ကြီး ရာ့ဂျ်နာ့သ်ဆင်းနဲ့ နိုင်ငံခြားရေးဝန်ကြီး ဆူဘရာမန်ယံ ဂျိုင်ရှန်ကာတို့နဲ့ တွေ့ဆုံဆွေးနွေးပါတယ်။

“သြစတြေးလျနဲ့ အိန္ဒိယတို့ဟာ ဘယ်တုန်းကမှ ဒီထက်ပိုပြီးနီးကပ်တဲ့ မိတ်ဖက် မဖြစ်ဖူးသေးဘူးလို့ ပြောရင် မျှတမယ်လို့ ကျနော် ထင်တယ်”လို့ သြစတြေးလျ နိုင်ငံခြားရေးဝန်ကြီးက ပြောပါတယ်။

အိန္ဒိယ၊ သြစတြေးလျ၊ အမေရိကန်နဲ့ ဂျပန်တို့ဟာ ကွက်ဒ်အဖွဲ့ဝင်နိုင်ငံတွေပါ။ အင်ဒိုပစိဖိတ် ဒေသအတွင်း တရုတ်ရဲ့ စစ်ရေး၊ စီးပွားရေးနဲ့ နိုင်ငံရေး လှုပ်ရှားမှု တိုးလာတာကို ထိန်းဖို့ ကာကွယ်ရေးတံတိုင်း အလားအလာအတွက် ပိုတိုးလုပ်ဆောင်နေတယ်လို့ သံတမန်တွေက ပြောပါတယ်။

သြစတြးလျ ဝန်ကြီး ၂ ယောက်ဟာ စက်တင်ဘာ ၁၁ ရက်က အိန္ဒိယ ဝန်ကြီးချုပ် နရင်ဒြာမိုဒီနဲ့ တွေ့ဆုံခဲ့ပါတယ်။

3 months Ago

July 20, 2021

ရေတပ်သင်္ဘောသားများ ကိုဗစ်-၁၉ ကူးစက်ခံရမှုအတွက် တောင်ကိုရီးယား ကာကွယ်ရေးဝန်ကြီး တောင်းပန်

တောင်ကိုရီးယား ကာကွယ်ရေးဝန်ကြီး ဆောအုပ်ခ်ဟာ အာဖရိက ကမ်းလွန်ပင်လယ်ပြင်မှာ ကင်းလှည့်နေတဲ့ ရေတပ်ဖျက်သင်္ဘောပေါ်မှာ သင်္ဘောသားတွေ ကိုရိုနာဗိုင်းရပ်စ် အကြီးအကျယ် ကူးစက်ခံရတဲ့အတွက် ဇူလိုင် ၂၀ ရက်မှာ တောင်းပန်လိုက်ပါတယ်။

ပင်လယ်ဓားပြ တိုက်ဖျက်ရေးအတွက် ကင်းလှည့်နေတဲ့ သင်္ဘောပေါ်မှာ သင်္ဘောသား ၈၀ ရာခိုင်နှုန်းကျော် ကိုရိုနာဗိုင်းရပ်စ် ကူးစက်ခံခဲ့ရတာပါ။

စစ်တပ်ဟာ ကူးစက်မှု ဟန့်တားရေး လုပ်ဆောင်ချက်တွေကို ပိုတိုးတက်ကောင်းမွန်အောင် ပြုပြင်မယ်လို့လည်း ရုပ်သံ ကြေညာချက်အတွင်း ဝန်ကြီးက ပြောပါတယ်။

ရောဂါပြင်းထန်တဲ့ ၁၂ ယောက်ကို ဆေးရုံတင် ကုသထားပြီး ကျန်တဲ့ ကူးစက်ခံ စစ်သည် ၂၈၉ ယောက်ကိုတော့ ကုသရေးစင်တာကို ရောက်ရောက်ချင်း သီးခြားခွဲထားမယ်လို့ ကျန်းမာရေး ဝန်ကြီးဌာန အရာရှိက ပြောပါတယ်။

ဇူလိုင် ၁၅ ရက် မှာ ကူးစက်မှုကို ပထမဆုံး အစီရင်ခံချိန်မှာ သင်္ဘောပေါ်မှာ စစ်သည် အယောက် ၅၀ သာ ကူးစက်မခံခဲ့ရတာလို့ တောင်ကိုရီးယား ပူးတွဲစစ်ဦးစီးအရာရှိချုပ်က ပြောပါတယ်။

အာဏာပိုင်တွေက လူနာတွေကို လေကြောင်းကနေ စတင်သယ်ဆောင်နေပြီး အစားထိုးအဖွဲ့က သင်္ဘောကို တောင်ကိုရီးယားဆီ ပြန်မောင်းနှင်လာမယ်လို့ ရိုက်တာ သတင်းဌာနက တင်ပြထားပါတယ်။

4 months Ago
More News
Up