ကမ္ဘာ့စာနယ်ဇင်းလွတ်လပ်ခွင့်နေ့

May 3, 2019

လူထု အားကိုးအားထားပြုနိုင်သည့် သတင်းမီဒီယာများအဖြစ် ရပ်တည်ရန် ကာချုပ်တိုက်တွန်း

ပြည်သူလူထုက အားကိုးအားထားပြုနိုင်တဲ့ သတင်းမီဒီယာများအဖြစ် ရပ်တည်ကြဖို့  တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ကမ္ဘာ့စာနယ်ဇင်း လွတ်လပ်ခွင့်နေ့မှာ သဝဏ်လွှာပေးဖို့ တိုက်တွန်း ပြောကြားလိုက်ပါတယ်။ မေလ ၃ ရက်မှာ ကျရောက်တဲ့ World Press Freedom Day အခမ်းအနားကို မြန်မာနိုင်ငံ သတင်းမီဒီယာကောင်စီက ဦးစီးပြီး ရန်ကုန်မြို့တော်ခန်းမမှာ ဒီကနေ့မနက်က ကျင်းပရာ နိုင်ငံတော်သမ္မတ၊ နိုင်ငံတော်အတိုင်ပင်ခံပုဂ္ဂိုလ်နဲ့ တပ်မတော်ကာကွယ်ရေး ဦးစီးချုပ်တို့က သဝဏ်လွှာတွေ အသီးသီး ပေးပို့ခဲ့ကြတာပါ။ ကာကွယ်ရေးဦးစီးချုပ်ရဲ့ သဝဏ်လွှာမှာတော့ သတင်းစကားတိုင်းဟာ သန့်ရှင်းစင်ကြယ်ပြီး မူလအတိုင်း မှန်မှန်ကန်ကန်ဖြစ်ဖို့ အရေးကြီးတယ်လို့ ဖော်ပြထားပါတယ်။ ဒါ့အပြင် လူ့အခွင့်အရေး ကြေညာစာတမ်း အပိုဒ် ၁၉ အရ လွတ်လပ်စွာ ထုတ်ဖော်ခွင့် ရှိတယ်ဆိုပေမယ့် တခြားသူတွေရဲ့ အခွင့်အရေး၊ အများပြည်သူ အေးချမ်းသာယာရေးနဲ့ အကျိုးစီးပွား ဖြစ်ထွန်းရေးတို့အတွက် ဥပဒေအရ သတ်မှတ်ထားတဲ့ ကန့်သတ်ချက်တွေ အတိုင်းသာ ကျင့်သုံးပိုင်ခွင့်ရှိတာကို သတိပြုကြရမယ်လို့လည်း ဆိုပါတယ်။ စတုတ္ထမဏ္ဍိုင် သတင်းမီဒီယာတွေဟာ လွတ်လပ်မှု၊ မှန်ကန်မှု၊ တရားမျှတမှု၊ ဥပဒေအရ ညီညွတ်မှုရှိတဲ့ သတင်းစကားတွေအတွက် ပြည်သူလူထုက အားကိုးအားထားပြုနိုင်တဲ့ သတင်းမီဒီယာတွေအဖြစ် ရပ်တည်ဖို့လည်း ကာကွယ်ရေးဦးစီးချုပ်က ပြောသွားပါတယ်။ နိုင်ငံတော်သမ္မတ ဦးဝင်းမြင့်ကတော့ စာနယ်ဇင်းသမားတွေအနေနဲ့ မီဒီယာဆိုင်ရာ အရည်အသွေးတွေကို ကြိုးပမ်းမြှင့်တင်ကြပြီး ဒီမိုကရေစီရေးကို ကာကွယ်တဲ့ စာနယ်ဇင်းသမားတွေ ဖြစ်အောင် ကြိုးစားကြဖို့ တိုက်တွန်းလိုက်ပါတယ်။ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကတော့ မြန်မာနိုင်ငံမှာ ယနေ့ကာလကဲ့သို့ လွတ်လပ်စွာ ရေးသားထုတ်ဖော် ပြောဆိုနိုင်တဲ့ အခြေအနေမျိုး ရောက်ရှိအောင် ရင်းနှီးပေးဆပ်မှုများစွာနဲ့ ကြိုးပမ်းဆောင်ရွက်ခဲ့ရကြရတဲ့ အကြောင်းနဲ့ မြန်မာ့ ဒီမိုကရေစီ ကူးပြောင်းမှုဖြစ်စဉ်မှာ တက်ကြွစွာ ပါဝင်ခဲ့ကြတဲ့ သတင်းစာဆရာကြီးတွေကို ကမ္ဘာ့စာနယ်ဇင်း လွတ်လပ်ခွင့်နေ့မှာ ချီးကျူး မှတ်တမ်းတင်တယ်လို့ ပြောသွားပါတယ်။ ပြန်ကြားရေးဝန်ကြီး ဒေါက်တာဖေမြင့်ကလည်း သတင်းမီဒီယာလောကမှာ နိုင်ငံတည်ငြိမ်အေးချမ်းရေးနဲ့ ပဋိပက္ခတွေကို ပိုပြီး ဆိုရွားစေမယ့် သတင်းတု သတင်းအမှားတွေ ပျံ့နှံ့နေတာကို သတိထားပြီး ဖြေရှင်းရှောင်ရှားကြဖို့ သတင်းမီဒီယာသမားတွေကို တိုက်တွန်းပါတယ်။ လက်ရှိအစိုးရလက်ထက်မှာ တရားစွဲဆိုခံထားရတဲ့ သတင်းသမား အမှုပေါင်း ၃၁ မှုနဲ့ တရားရင်ဆိုင်နေရတဲ့ သတင်းသမား ၄၇ ဦးရှိပြီး ဒီအထဲမှာ တပ်မတော်က တရားစွဲဆိုထားတဲ့ အမှု ၄ မှု ပါဝင်တယ်လို့ အသံအဖွဲ့ရဲ့ ထုတ်ပြန်ချက်အရ သိရပါတယ်။ လတ်တလော ဧရာဝတီသတင်းဌာနနဲ့ အာအက်ဖ်အေ သတင်းဌာနတို့ရဲ့ သတင်းသမားတွေကို တပ်မတော်က တရားစွဲဆိုထားပါတယ်။
2 years Ago

ဒီမိုကရေစီကို ကာကွယ်သည့် စာနယ်ဇင်းသမားများဖြစ်အောင် ကြိုးစားရန် သမ္မတ တိုက်တွန်း

စာနယ်ဇင်းသမားတွေအနေနဲ့ မီဒီယာဆိုင်ရာ အရည်အသွေးတွေကို အစဉ်တစိုက် ကြိုးပမ်းမြှင့်တင်ကြပြီး ဒီမိုကရေစီရေးကို ကာကွယ်တဲ့ စာနယ်ဇင်းသမားတွေ ဖြစ်အောင် ကြိုးစားကြဖို့ နိုင်ငံတော်သမ္မတ ဦးဝင်းမြင့်က တိုက်တွန်းလိုက်ပါတယ်။ ဒီကနေ့ မေလ ၃ ရက်နေ့မှာ ကျရောက်တဲ့ ကမ္ဘာ့စာနယ်ဇင်း လွတ်လပ်ခွင့်နေ့ (World Press Freedom Day) အခမ်းအနားသို့ ပေးပို့တဲ့ သဝဏ်လွှာမှာ သမ္မတက တိုက်တွန်း ပြောသွားတာပါ။ ပြည်သူလူထုအကြား ဒီမိုကရေစီ အသိပညာတွေ ပြန့်ပွားဖို့ စာနယ်ဇင်းသမားတွေ အနေနဲ့ ပံ့ပိုးကူညီပြီး ဒီမိုကရေစီ ဖက်ဒရယ်ပြည်ထောင်စု နိုင်ငံတော် တည်ဆောက်ရေးမှာ ဝိုင်းဝန်းပူးပေါင်း ဆောင်ရွက်ကြဖို့လည်း သမ္မတက တိုက်တွန်းပါတယ်။ အစိုးရအနေနဲ့ လွတ်လပ်တဲ့မီဒီယာနဲ့ ဒီမိုကရေစီဟာ အစဉ်အမြဲ ယှဉ်တွဲနေတယ်လို့ ယုံကြည်တဲ့အကြောင်း၊ ဒီမိုကရေစီ အသွင်ကူးပြောင်းရေးမှာ မီဒီယာရဲ့ "အား" မလွဲမသွေ လိုအပ်တယ်လို့ ခံယူပြီး ဒီမိုကရေစီစနစ် အားကောင်းဖို့ မီဒီယာလွတ်လပ်ခွင့် မရှိမဖြစ် အရေးကြီးတာကို အသိအမှတ် ပြုတယ်လို့လည်း သမ္မတက ဆိုပါတယ်။ မီဒီယာတွေအနေနဲ့ သတင်းအချက်အလက် တိကျမှန်ကန်မှုရှိရေး၊ ပဋိပက္ခ ဖြစ်စေနိုင်တဲ့ လှုံ့ဆော်ရေးသားမှုနဲ့ သတင်းရေးသားသူရဲ့ ထင်မြင်ယူဆချက်၊ အာဘော် လုံးဝမပါရှိစေရေးတို့ကို စိစစ်ရွေးချယ် ဖော်ပြခြင်းဖြင့် ပြည်သူလူထု လိုလားတောင့်တနေသော ဒီမိုကရေစီခရီးကို အထောက်အပံ့ ပေးစေလိုတယ်လို့လည်း သမ္မတရဲ့ သဝဏ်လွှာမှာ ဖော်ပြပါတယ်။ မေလ ၃ ရက်ကို ကမ္ဘာ့စာနယ်ဇင်း လွတ်လပ်ခွင့်နေ့အဖြစ် ၁၉၉၃ ခုနှစ်မှာ ကုလသမဂ္ဂ အထွေထွေညီလာခံက အတည်ပြု သတ်မှတ်ခဲ့တာဖြစ်ပြီး မြန်မာနိုင်ငံမှာတော့ ကမ္ဘာ့စာနယ်ဇင်း လွတ်လပ်ခွင့်နေ့ အခမ်းအနားကို ၂၀၁၂ ခုနှစ်က စတင်ကျင်းပခဲ့တာပါ။ မြန်မာနိုင်ငံရဲ့ သတင်းလွတ်လပ်ခွင့် အဆင့်ဟာ နိုင်ငံပေါင်း ၁၈၀ အနက် အဆင့် ၁၃၈ မှာ ရပ်တည်နေပြီး မနှစ်ကထက် အဆင့်တဆင့် ကျဆင်းသွားတယ်လို့ ပြင်သစ်အခြေစိုက် နယ်စည်းမခြား သတင်းထောက်များအဖွဲ့ (RSF) က ဧပြီ ၁၈ ရက်မှာ ထုတ်ပြန်ထားပါတယ်။ လက်ရှိအစိုးရလက်ထက်မှာ တရားစွဲဆိုခံထားရတဲ့ သတင်းသမား အမှုပေါင်း ၃၁ မှုရှိပြီး တရားရင်ဆိုင်နေရတဲ့ သတင်းသမား ၄၇ ဦးရှိတယ်လို့ အသံအဖွဲ့ရဲ့ ထုတ်ပြန်ချက်အရ သိရပါတယ်။ အဲဒီထဲကမှ အစိုးရဝန်ထမ်းတွေက တရားစွဲဆိုထားတဲ့အမှု ၁၈ မှု၊ တပ်မတော်က တရားစွဲဆိုထားတဲ့အမှု ၄ မှုနဲ့ တခြားသူတွေက တရားစွဲဆိုတဲ့အမှု ၉ မှုတို့ ပါဝင်ပါတယ်။
2 years Ago
Up