ကနေဒါ

April 9, 2021

ကနေဒါတွင် ကိုဗစ်-၁၉ ကူးစက်ခံရမှု ၁ သန်းကျော်၊ ကမ္ဘာတဝန်းသန်းချီကူးစက်ခံ ၂၃ နိုင်ငံဖြစ်လာ

ကနေဒါနိုင်ငံမှာ ကိုဗစ်-၁၉ ရောဂါကူးစက်ခံရသူ ၁ သန်းကျော်လာခဲ့ပြီးနောက် ကမ္ဘာတဝန်း သန်းချီကူးစက်ခံရတဲ့ နိုင်ငံပေါင်း ၂၃ နိုင်ငံထိ ရှိလာခဲ့ပြီ ဖြစ်ပါတယ်။

          တကမ္ဘာလုံးအတိုင်းအတာနဲ့ ရောဂါကူးစက်ခံရသူ ၁၃၄ သန်းကျော်၊ သေဆုံးသူ ၂၉ သိန်းကျော်နဲ့ ရောဂါပြန်လည်ပျောက်ကင်းလာသူအရေအတွက်ကတော့ ၁၀၈ သန်း ကျော် ရှိနေတာပါ။

ရောဂါဖြစ်ပွားမှု အမြင့်ဆုံးနိုင်ငံတွေထဲမှာတော့ အမေရိကန်နိုင်ငံက ကူးစက်ခံရသူ ၃၁ ဒသမ ၆ သန်းကျော်၊ သေဆုံးသူ ၅ သိန်း ၇ သောင်းကျော် ရှိနေပြီး သူ့နောက်မှာတော့ ဘရာဇီးနိုင်ငံက ကူးစက်ခံရသူ ၁၃ ဒသမ ၁ သန်းကျော်၊ သေဆုံးသူ ၃ သိန်း ၄ သောင်း ကျော်နဲ့ ရှိနေတာ ဖြစ်ပါတယ်။

တတိယနေရာမှာတော့ အိန္ဒိယနိုင်ငံက ကိုဗစ်-၁၉ ရောဂါကူးစက်ခံရသူ ၁၃ သန်း ကျော်၊ သေဆုံးသူ ၁ သိန်း ၆ သောင်းကျော်နဲ့ ထိပ်ဆုံး ၃ နိုင်ငံအနေနဲ့ အသီးသီး ရပ်တည် နေပါတယ်။

အဲဒီ ၃ နိုင်ငံနောက်မှာတော့ ပြင်သစ်၊ ရုရှားနဲ့ ယူကေနိုင်ငံတွေက ကူးစက်ခံရသူ ၄ သန်းကျော်စီ၊ အီတလီ၊ တူရကီနဲ့ စပိန်နိုင်ငံတွေက ကူးစက်ခံရသူ ၃ သန်းကျော်စီ၊ ဂျာ မနီ၊ ပိုလန်၊ ကိုလံဘီယာ၊ အာဂျင်တီးနား၊ မက္ကဆီကိုနဲ့ အီရန်နိုင်ငံတွေက ကူးစက်ခံရသူ ၂ သန်းကျော်စီ ရှိနေတာ ဖြစ်ပါတယ်။

အဲဒီနောက်မှာတော့ ယူကရိန်း၊ ပီရူး၊ ချက်သမ္မတနိုင်ငံ၊ တောင်အာဖရိက၊ အင်ဒိုနီး ရှား၊ နယ်သာလန်၊ ချီလီနိုင်ငံတွေနဲ့အတူ ကနေဒါနိုင်ငံမှာလည်း ကိုဗစ်-၁၉ ရောဂါ ကူး စက်ခံရသူ အရေအတွက် ၁ သန်းကျော်လာခဲ့ပြီ ဖြစ်တာမို့ ခုချိန်ထိ ကမ္ဘာတဝန်း ကိုဗစ်-၁၉ ရောဂါကူးစက်ခံရသူ ဦးရေ ၁ သန်းကျော်လာခဲ့တဲ့ နိုင်ငံပေါင်း ၂၃ နိုင်ငံထိ ရှိလာ ခဲ့ပြီလို့ Worldometers ဝက်ဘ်ဆိုက်ဒ်မှာ ဖော်ပြထားပါတယ်။

ရောဂါဖြစ်ပွားမှုစတင်ရာ တရုတ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အ ရေအတွက် ၉ သောင်းကျော်၊ စုစုပေါင်း သေဆုံးသူ ၄,၆၃၆ ယောက်နဲ့ နိုင်ငံအလိုက် အ မှတ်စဉ် ၉၂ နေရာထိ ကျဆင်းသွားခဲ့ပါတယ်။

အာရှဒေသတွင်း နိုင်ငံတွေထဲမှာတော့ ကိုဗစ်-၁၉ ရောဂါကူးစက်ပြန့်ပွားမှု အမြင့် ဆုံး အိန္ဒိယ၊ တူရကီ၊ အီရန်၊ အင်ဒိုနီးရှားနိုင်ငံတွေပြီးရင် အီရတ်က ရောဂါကူးစက်ခံရသူ ၉ သိန်းကျော်၊ အစ္စရေးနဲ့ ဖိလစ်ပိုင်နိုင်ငံတွေက ၈ သိန်း ကျော်စီ၊ ပါကစ္စတန်က ၇ သိန်း ကျော်၊ ဘင်္ဂလားဒေ့ရှ်နဲ့ ဂျော်ဒန်နိုင်ငံတွေက ၆ သိန်းကျော်စီနဲ့ အသီးသီး ကူးစက်ခံထား ရတာ ဖြစ်ပါတယ်။

မြန်မာနိုင်ငံမှာတော့ လက်ရှိအချိန်ထိ ကိုဗစ်-၁၉ အတည်ပြု လူနာစုစုပေါင်း ၁၄၂,၅၄၉ ယောက်၊ သေဆုံး သူ ၃,၂၀၆ ယောက်နဲ့ ဆေးရုံက ဆင်းခွင့်ရသူပေါင်း ၁၃၁,၈၃၄ ယောက်ရှိနေပြီး အာဆီယံနိုင်ငံ တွေထဲမှာ ကိုဗစ်-၁၉ ရောဂါကူးစက်ခံရပြီး သေဆုံးမှုအများဆုံး ၃ နိုင်ငံထဲမှာ ပါဝင်နေပါတယ်။

မလေးရှားနိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၃ သိန်းခွဲ ကျော်နဲ့ သေဆုံးသူ ၁,၃၀၈ ယောက် ရှိပါတယ်။

စင်ကာပူနိုင်ငံကတော့ ရောဂါကူးစက်ခံရသူအရေအတွက် ၆ သောင်းကျော်နဲ့ သေ ဆုံးသူအရေအတွက်အယောက် ၃၀ ရှိနေတာ ဖြစ်ပါတယ်။

မြန်မာနဲ့ အိမ်နီးချင်းနိုင်ငံတနိုင်ငံဖြစ်တဲ့ ထိုင်းနိုင်ငံမှာတော့ ကိုဗစ်-၁၉ ရောဂါကူး စက်ခံရသူ အရေအတွက် ၃ သောင်းကျော်နဲ့ သေဆုံးသူ ၉၅ ယောက် ရှိနေပါ တယ်။

ဗီယက်နမ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၂,၆၆၈ ယောက်နဲ့ သေဆုံးသူအရေအတွက် ခုရက်ပိုင်းမှာ တိုးမလာဘဲ ၃၅ ယောက် ရှိနေပြီး ဘရူ နိုင်းနိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၂၁၆ ယောက်နဲ့ သေ ဆုံးသူ ၃ ယောက် ရှိနေတာပါ။

ကမ္ဘောဒီးယားနိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၃,၀၂၈ ယောက်နဲ့ သေဆုံးသူ ၂၄ ယောက်ရှိလာခဲ့ပြီဖြစ်ပြီး လာအိုနိုင်ငံမှာတော့ ရောဂါ ကူးစက်ခံရသူ ၄၉ ယောက် ရှိနေပေမယ့် သေဆုံးလူနာ ခုချိန်ထိ မရှိသေးပါဘူး။

2 months Ago

February 28, 2021

လုံခြုံရေးတပ်ဖွဲ့ဝင်များ အကြမ်းဖက်အင်အားသုံးနှိမ်နင်းမှု ချက်ချင်းရပ်တန့်ရန် ကနေဒါ တောင်းဆို

ရန်ကုန် အပါအဝင် နိုင်ငံတဝန်း ဆန္ဒပြသူတွေကို လုံခြုံရေးတပ်ဖွဲ့ဝင်တွေက အကြမ်းဖက် အင်အားသုံး နှိမ်နင်းတာတွေ တိုးမြှင့်လုပ်ဆောင်နေတာကြောင့် သေဆုံး ဒဏ်ရာသူတွေ တွေ့ရှိရတဲ့အတွက် ထိတ်လန့်တုန်လှုပ်မိတယ်လို့ ကနေဒါသံရုံးက ထုတ်ပြန်လိုက်ပါတယ်။ 

မြန်မာနိုင်ငံမှာ ဒီမိုကရေစီ အုပ်ချုပ်ရေး ပြန်လည်ရရှိဖို့ ဆန္ဒပြပွဲတွေမှာ အသက်ဆုံးရှုံးသွားရသူတွေ၊ ထိခိုက် ဒဏ်ရာရရှိကြရသူတွေနဲ့ ထပ်တူရှိနေတယ်လို့ ဆိုပါတယ်။

လက်နက်မဲ့ ဆန္ဒပြသူတွေကို လုံခြုံရေး တပ်ဖွဲ့ဝင်တွေက အင်အားသုံးတာ၊ ဆန္ဒပြသူတွေ၊ နိုင်ငံရေးသမားတွေ၊ အစိုးရ ဝန်ထမ်းတွေ၊ အရပ်ဘက် တက်ကြွလှုပ်ရှားသူတွေ၊ သတင်းထောက်တွေနဲ့ ဒီမိုကရေစီ ဘက်တော်သား ခေါင်းဆောင်တွေကို ဖမ်းဆီး ထိန်းသိမ်းတာကိုလည်း  ပြင်းပြင်းထန်ထန် ရှုတ်ချကြောင်း ကြေညာချက်မှာ ဖော်ပြထားပါတယ်။

စစ်တပ်နဲ့ ရဲတပ်ဖွဲ့ဝင်တွေက ဆန္ဒပြသူတွေကို တိုက်ခိုက်တာ၊ ခြိမ်းခြောက်တာတွေကို ချက်ချင်း ရပ်တန့်ဖို့နဲ့ ဖမ်းဆီးခံထားရသူအားလုံး လွှတ်ပေးဖို့ ကနေဒါသံရုံးက တောင်းဆိုလိုက်ပါတယ်။

ဒါ့အပြင် ချက်ချင်း အင်တာနက် အပြည့်အဝ ပြန်ပေးဖို့နဲ့ လူမှုကွန်ရက်ဆိုင်ရာ ပိတ်ဆို့ထားမှုတွေကို ပယ်ဖျက်ပေးဖို့လည်း တောင်းဆိုထားပါတယ်။

ကနေဒါနိုင်ငံက ကုလသမဂ္ဂ အထွေထွေ ညီလာခံမှာ ပြောကြားထားသလို မြန်မာပြည်သူတွေနဲ့ အတူရပ်တည်မယ်လို့ ဆိုပါတယ်။

ဒါ့အပြင် မြန်မာနိုင်ငံထဲ ရောက်နေတဲ့ ကနေဒါ နိုင်ငံသားတွေအနေနဲ့ အိမ်တွေထဲမှာပဲ သိုသိုသိပ်သိပ် နေထိုင်ကြဖို့၊ ဆန္ဒပြပွဲတွေနဲ့ လူစုလူဝေးတွေ အားလုံးကို ရှောင်ကြဖို့ အခြေအနေ တိုးတက်မှုနဲ့ ပတ်သက်ပြီး ဒေသခံ မီဒီယာတွေကို စောင့်ကြည့် သတင်းယူကြဖို့ ကနေဒါသံရုံးက မြန်မာနိုင်ငံဆိုင်ရာ ခရီးသွားသတိပေးချက်ကို ဖေဖော်ဝါရီ ၂၈ ရက်မှာ ထုတ်ပြန်လိုက်ပါတယ်။

4 months Ago
More News
Up