ကနီ

August 26, 2021

စစ်တပ်နှင့်ပျူစောထီးကြောင့် မင်းကင်းဒေသခံများ နေ့စဉ် နေရပ်စွန့်ခွာ ထွက်ပြေးနေရ

စစ်ကောင်စီတပ်တွေ ဝင်ကျေးတွေအတွင်း ဝင်ရောက်ပြီး ရိုက်နှက်ဖမ်းဆီးတာတွေကြောင့် စစ်ကိုင်းတိုင်း မင်းကင်းမြို့နယ်က ဒေသခံတွေ ကနီမြို့နယ်အတွင်းကို နေ့စဉ် နေရပ်စွန့်ခွာ ထွက်ပြေးလာနေကြတယ်လို့ သိရပါတယ်။

စစ်ဘေးရှောင် မိန်ကလေးတစ်ဦးက “ကျမတို့  ကျောက်ခဲတက်ရွာက လူတွေ နေရပ်မှာ မနေရဲလို့ ကနီနယ်ဘက်ကို ထွက်ပြေးခဲ့ရတယ်ပေါ့။ ဘာလို့ထွက်ပြေးရလဲဆိုတော့ ပန်ဆက်ရွာက ပျူစောထီးတပ်နဲ့ စစ်ခွေးက နေစဉ် ကျမတို့ရွာကို နေ့စဉ်လာမွှေဖျက်ဆီးတာခံရတယ်။ လူတွေ့ရင် ဖမ်းဆီးရိုက်နှက်တာတွေလည်းလုပ်တယ်။ အထူးသဖြင့် NLD ထောက်ခံတဲ့သူတွေဆိုရင် နာလန်မထူအောင်အတင်းရိုက်ကြတာ။ သူတို့ကို အတင်းအကျပ်ထောက်ခံဖို့ ကျမတို့ကို ပြောတယ်။ မထောက်ခံတဲ့သူဆိုရင် လူကိုပါသတ်မယ်၊ အိမ်ကိုမီးရှို့မယ်လို့ ခြိမ်းခြောက်ကြတယ်။ ကျမတို့လည်း နေ့စဉ်အဲလိုအလုပ်ခံနေရတော့ သူတို့နဲ့‌လွတ်ရာရှောင်ပုန်းရတာပေါ့” လို့ ပြောပါတယ်။

ပန်ဆက်ကျေးရွာက ပျူစောထီး နဲ့ အကြမ်းဖက်စစ်ကောင်စီတပ်တွေ ညှဉ်းပန်းနှိပ်စက်တာကြောင့် နေရပ်စွန့်ခွာနေရသူအများစုဟာ ကျောက်ခဲတက်ကျေးရွာက အများဆုံးဖြစ်ပြီး ကျန်ကျေးရွာတွေလည်း ပါတယ်လို့ သိရပါတယ်။

လက်ရှိ ဩဂုတ်လအတွင်း စစ်ဘေးရှောင် ၁၀၀၀ ကျော်နေပြီလို့ စစ်ဘေးရှောင်အရေး ကူညီဆောင်ရွက်ပေးနေသူတစ်ဦးက ပြောပါတယ်။

“ဒုက္ခရောက်လို့ ကျနော်တို့ဘက် ထွက်ပြေးလာတဲ့သူ ဦးရေး ၁၀၀၀ ကျော်နေပြီဗျ။ မင်ကင်းမြို့နယ်က ပြည်သူတွေက အများဆုံးပဲ။ လောလောဆယ်တော့ စားသောက်စရာပြတ်လပ်‌တော့မှာဗျ။ အချိန်ကြာလာရင်တော့ အစာရေစာနဲ့ ဆေးဝါးများပါ ပြတ်လပ်နိုင်ပါတယ်။”

ထွက်ပြေးလာတဲ့အထဲမှာ ကလေးတွေ၊ လူအိုတွေ၊ ကိုယ်ဝန်ဆောင်အမျိုးသမီးတွေလည်း ပါတာကြောင့် အစားအသောက်နဲ့ဆေးဝါးတွေ အမြန်ဆုံး ကူညီပေးကြဖို့ မေတ္တာရပ်ခံတယ်လို့ ဆိုပါတယ်။

မင်းကင်းမြို့နယ် ပန်းဆက်ကျေးရွာအတွင်း တပ်စွဲထားတဲ့ ပျူစောထီးတပ်ဟာ ပြီးခဲ့တဲ့ ဩဂုတ် ၂၃ ရက်နေ့ကလည်း သင်တောကျးရွာက အပြစ်မဲ့ပြည်သူတွေရဲ့ ပစ္စည်းတွေကို ဖျက်ဆီးတဲ့အပြင်  ရွှေ၊ ငွေ၊ ဖုန်း နဲ့ သိန်း ၃၆၀ တန် လယ်ထွန်စက်နှစ်စီးလည်း ယူဆောင်သွားကြတယ်လို့ ဒေသခံတွေက ပြောပါတယ်။

1 month Ago

August 18, 2021

ကနီဒေသ၌ စစ်ကောင်စီတပ်က အစုအပြုံလိုက်သတ်ဖြတ်မှု ၄ ကြိမ်အတွင်း အနည်းဆုံး ၄၃ လောင်းတွေ့ရှိ

ကနီဒေသတဝိုက် စစ်ကောင်စီတပ်တွေဟာ ပြီးခဲ့တဲ့ ဇူလိုင်တလတည်းမှာတင် အ စုလိုက်အပြုံလိုက် သတ်ဖြတ်မှု ၄ ကြိမ် ကျူးလွန်ခဲ့ကြပြီး သတ်ဖြတ်စွန့်ပစ်ထားခဲ့ကြတဲ့ ရုပ်အလောင်းအနည်းဆုံး ၄၃ လောင်း တွေ့ရှိခဲ့ရတယ်လို့ နိုင်ငံရေးအကျဉ်းသားများကူညီ စောင့်ရှောက်ရေးအသင်း(အေအေပီပီ)က ထုတ်ပြန်ပါတယ်။

ပြီးခဲ့တဲ့ ဖေဖော်ဝါရီ ၁ ရက်က စတင်ကာ မတရားစစ်အာဏာသိမ်းခဲ့ကြတဲ့ အကြမ်းဖက် စစ်အာဏာရှင်ကို တစိုက်မတ်မတ် တွန်းလှန်ခုခံနေကြတဲ့ မြန်မာနိုင်ငံအနှံ့အပြား ဒေသတွေထဲမှာ စစ်ကိုင်းတိုင်းဒေသကြီး ယင်းမာပင်ခရိုင်အတွင်းက ကနီမြို့နယ်ဟာ စစ်အာဏာရှင်ကို နည်းလမ်းပေါင်းစုံ အသုံးပြုဆန့်ကျင်တော်လှန်နေတဲ့ ထင်ရှားတဲ့ အရပ်ဒေသတခု ဖြစ်ပါတယ်။

ဒါကြောင့်လည်း အာဏာသိမ်းစစ်ကောင်စီက အငြိုးတကြီးနဲ့ နယ်မြေစိုးမိုးရေးအ ကြောင်းပြကာ ကနီမြို့ပေါ်နဲ့ အနီးအနားပတ်ဝန်းကျင် ကျေးရွာတွေမှာ ပစ်ခတ်ဖမ်းဆီးတာတွေ၊ တောနင်းရှာဖွေတာတွေ ပြုလုပ်ရှိနေသလို ကျေးရွာတွေအတွင်း စစ်အင်အား အလုံးအရင်းနဲ့ ဝင်ရောက်စီးနင်းတာတွေကြောင့် ဒေသခံ ထောင်ပေါင်းများစွာဟာ နီး စပ်ရာ ကျေးရွာ၊ တောအုပ်တွေအတွင်း ထွက်ပြေးတိမ်းရှောင်နေရတာ ဖြစ်ပါတယ်။ ဒါ့အ ပြင် ကျေးရွာတွေထဲ ဝင်ရောက်ကာ ကျွဲ၊ နွားတွေအပါအဝင် ပစ္စည်းဥစ္စာတွေ လုယူတာ၊ သိမ်းပိုက်တာတွေကိုပါ ပြုလုပ်လာခဲ့ကြတာပါ။

ကလေးမြို့ အခြေစိုက် တပ်ရင်း (၂၂၈) အပါအဝင် တပ်မ (၄၄)နဲ့ (၉၉) လက် အောက်ခံတပ်ရင်းတွေက ဗျူဟာ သုံးခုခွဲကာ အင်အားတစ်ထောင်ခန့်ဖြင့် ကနီမြို့နယ်အ တွင်း ကျေးရွာတိုင်းနီးပါးကို ဝင်ရောက်စီးနင်းနေကြပြီး ဒေသခံတွေ အများအပြားဟာ အကြမ်းဖက်ဖမ်းဆီးခံရတာတွေ၊ ညှဉ်းပန်းနှိပ်စက်ခံရတာတွေ၊ အသက်သေဆုံးတဲ့အထိ လူ မဆန်စွာ သတ်ဖြတ်ခံရတာတွေကိုလည်း ရင်ဆိုင်ကြုံတွေ့နေရတယ်လို့ အေအေပီပီ ထုတ်ပြန်ချက်ထဲမှာ ဖော်ပြပါတယ်။

ဒါ့အပြင် စစ်ဘေးရှောင် ပြည်သူတွေမှ စားနပ်ရိက္ခာနဲ့ ဆေးဝါးပြတ်လပ်မှုဒဏ်ကို ခံစားနေကြရပြီး မုံရွာနယ်ဘက်ကို သွားရောက်ဝယ်ယူရာမှာလည်း အကြမ်းဖက်စစ်အုပ်စု လက်ပါးစေတွေက ပမာဏများပြားတဲ့ ငွေကြေးကောက်ခံတာတွေအပြင် စစ်ဖိနပ်နဲ့ ကန်တာ၊ သေနတ်ဒင်နဲ့ထုတာတွေ စတဲ့ အနိုင်ကျင့်မှုတွေကိုလည်း ပြုလုပ်နေကြောင်း သိရပါတယ်။

ကနီမြို့နယ်ရှိ ကျေးရွာတချို့မှာလည်း ဇူလိုင် ၉ ရက်နေ့ကစတင်ကာ အူရီဒူးနဲ့ တယ်လီနောအော်ပရေတာတွေရဲ့ အင်တာနက်နဲ့ ဖုန်းလိုင်းတွေ ပြတ်တောက်ခဲ့ပြီး ဩ ဂုတ် ၂ ရက်နေ့မှာတော့ MPT လိုင်းပါ ထပ်မံပြတ်တောက်ခဲ့တာမို့ လက်ရှိမှာတော့ စစ် တပ်ပိုင် Mytel အော်ပရေတာ ဖုန်းနဲ့ အင်တာနက်လိုင်းသာ ရွာတွေမှာ အသုံးပြုလို့ ရနေ တယ်လို့ ဒေသခံတွေက ပြောပါတယ်။ ဒါဟာ စစ်အုပ်စုက အရပ်သားပြည်သူတွေအပေါ် ဖြတ်လေးဖြတ်ဗျူဟာကို အသုံးပြု တိုက်ခိုက်တာလို့ အေအေပီပီက ဆိုပါတယ်။

ပြီးခဲ့တဲ့ ဇူလိုင်လအတွင်း အကြမ်းဖက်စစ်ကောင်စီတပ်တွေရဲ့ အစုလိုက်အပြုံလိုက် သတ်ဖြတ်ခံခဲ့ရသူတွေထဲမှာ ဒေသခံပြည်သူ့ကာကွယ်ရေးတပ်ဖွဲ့ဝင်တချို့လည်း ပါဝင်ပြီး လူငယ်၊ လူကြီး၊ မသန်စွမ်း စတဲ့ အပြစ်မဲ့ ပြည်သူတွေ အများအပြား ပါဝင်နေတာပါတယ်။

အကြမ်းဖက်စစ်အုပ်စုရဲ့ ရက်စက်တဲ့ လူမဆန်စွာကျူးလွန်မှုတွေဟာ မြန်မာနိုင်ငံ နေရာအနှံ့အပြားမှာ နေ့စဉ်နဲ့အမျှ ဖြစ်ပေါ်နေပြီး ကနီမြို့နယ်ဖြစ်စဉ်တွေကတော့ တိကျတဲ့ သက်သေအထောက်အထားတွေနဲ့ ပေါ်ပေါက်လာရတဲ့ ဖြစ်ရပ်တခုဖြစ်တယ်လို့ အေအေပီပီက ပြောပါတယ်။

စစ်အုပ်စုဟာ ၎င်းတို့ ကျူးလွန်တဲ့ ရာဇဝတ်မှုတွေကို တာဝန်ယူ၊ တာဝန်ခံရမှာ ဖြစ် ပြီး ကနီမြို့နယ်မှာ ဖြစ်ပွားခဲ့တဲ့ အစုလိုက်အပြုံလိုက် သတ်ဖြတ်ခံရမှုတွေဟာ နိုင်ငံတကာဥပဒေအရ အမြစ်ပြတ် သုတ်သင်ရှင်းလင်းရေးလုပ်ရပ်တခုဖြစ်တယ်လို့လည်း ဆိုပါတယ်။  ကနီဖြစ်စဉ်ဟာ ဂျီနီဗာကွန်ဗင်းရှင်းကို ပြောင်ပြောင်တင်းတင်း ချိုးဖောက်ပြီး အ ရပ်သားတွေကို ပစ်မှတ်ထား အမြစ်ပြတ်သတ်ဖြတ်တာမျိုးဖြစ်တာမို့ နိုင်ငံတကာ အသိုင်း အဝိုင်းအနေနဲ့ ခုလိုလူသားမျိုးနွယ်အပေါ် ကျုးလွန်တဲ့ ရာဇဝတ်မှုကို ပြစ်တင်ရှုတ်ချရမည်ဖြစ်ပြီး ထိထိရောက်ရောက် တရားစွဲဆိုရမယ်လို့ အေအေပီပီက ဆိုပါတယ်။

1 month Ago

စစ်ကောင်စီတပ်ကြောင့် ကနီ ဒေသခံထောင်ချီ နေရပ်စွန့်ခွာ ထွက်ပြေးနေရ

ကနီမြို့နယ်အတွင်းကို ဩဂုတ် ၁၇ ရက်နေ့ မနက်က စစ်ကောင်စီတပ်‌တွေ  ဝင်ရောက်လာတာကြောင့်  ဒေသခံရွာသားတွေ ထောင်နဲ့ချီ နေရပ်စွန့်ခွာ ထွက်ပြေးနေရတယ်လို့ ဒေသခံတွေက ပြောပါတယ်။

နတ်ရဲတောင်ရွာသားတစ်ဦးက “ကျနော်တို့ ကနီမြို့ချင်းတွင်း မြစ်အရှေ့ဘက်အခြမ်းက တပုန်း၊ ပျဉ်တော၊ နတ်ရဲတောင်၊ ကံကြီးက လူတွေအကုန်လုံးတော့ ထွက်ပြေးနေရပြီဗျ။ ဒီကောင်တွေက ယုံလို့မရဘူးလေ။ အရင်တခါလာတုန်းကလည်း အကုန်ဖျက်ဆီးကြတော့ နေအိမ်တွေထဲ မနေရဲကြဘူးပေါ့ဗျာ။ ဒီမနက်ခင်းက ဝင်လာပြီဗျ။ ဘာလာလုပ်ကြတယ်တော့ မသိဘူး။ အတော်လေးကို ဒုက္ခရောက်ရပါတယ်ဗျ။ ကိုဗစ်-၁၉ ရောဂါသမားလည်း မနေရဲဘူး။ အကုန်ထွက်ပြေးနေရတယ်” လို့ ပြောပါတယ်။

စစ်ကိုင်းတိုင်း၊ ကနီဒေသတဝိုက် နယ်မြေတွေမှာ အာဏာသိမ်းစစ်တပ်ရဲ့ တပ်ဖွဲ့ဝင်တွေ လက်ချက်နဲ့ သေဆုံးခဲ့ရသူတွေရဲ့ ရုပ်အလောင်းပေါင်း ၄၀ ကို ပြီးခဲ့တဲ့ ဇူလိုင်လအတွင်း နေရာ ၃ နေရာကနေ တွေ့ရှိထားပါတယ်။

ဒီဖြစ်စဉ်ကို ကုလသမဂ္ဂဆိုင်ရာ မြန်မာအမြဲတမ်း ကိုယ်စားလှယ် ဦးကျော်မိုးထွန်းက ကုလသမဂ္ဂ အတွင်းရေးမှူးချုပ် အန်တိုနီယို ဂူးတားရက်စ်ထံကို စာရေးသားပေးပို့ အကြောင်းကြားထားတွေလည်း ရှိနေပါတယ်။

ကနီမြို့နယ်မှာ စစ်ကောင်စီတပ်တွေက ဒေသခံ PDF တပ်တွေနဲ့ ပတ်သက်ပြီး အပြစ်မဲ့ပြည်သူတွေကို ဖမ်းဆီးရိုက်နှက် စစ်ဆေးမေးမြန်းတာတွေကြောင့် ပြည်သူတွေ နေ့စဉ်လိုလို ထွက်ပြေးနေရကြရတယ်လို့ သိရပါတယ်။

ကနီမြို့နယ်မှာ စစ်ကောင်စီတပ်နဲ့ ပြည်သူကာကွယ်ရေးတပ်တို့ ဧပြီ ၁၁ ရက်နေ့ကနေ့ ဩဂုတ် ၁ ရက်နေ့အထိ ၅ လတာအတွင်း တိုက်ပွဲ ၃၅ ကြိမ်ဖြစ်ပွားခဲ့တယ်လို့ သိရပါတယ်။

1 month Ago
More News
Up