အားကစား

May 24, 2022

နည်းပြကွန်တီအား ထောက်ခံမှုအပြည့်အဝပေးရန် စပါးအသင်းကို ကစားသမားများတောင်းဆို

နည်းပြကွန်တီကို ထောက်ခံမှုအပြည့်အဝေပေးဖို့ စပါးအသင်းကို ကစားသမားတွေက တောင်းဆိုထားပါတယ်။ 

ကွန်တီဟာ အသင်းကိုရောက်ရှိချိန်မှာ ကစားသမားခေါ်ယူမှုနဲ့ ပတ်သက်ပြီး ဝေဖန်မှုတချို့ရှိခဲ့လို့ စပါးအသင်းနဲ့ အနာဂတ် မတည်မငြိမ်ဖြစ်ခဲ့ရပါတယ်။ 

ဒါပေမဲ့ ရာသီကုန်ဆုံးချိန်မှာတော့ အာဆင်နယ်ကို ကျော်တက်ပြီး ချန်ပီယံလိဂ်ဝင်ခွင့် ရရှိခဲ့အောင် စွမ်းဆောင်နိုင်ခဲ့ပါတယ်။ 

ဒီလိုအချိန်မှာ နည်းပြကွန်တီအပေါ်မှာ ထောက်ခံမှုအပြည့်အဝပေးဖို့ စပါးအသင်းဘုတ်အဖွဲ့ကို အသင်းရဲ့စီနီယာ ကစားသမားတွေက တောင်းဆိုခဲ့တာပါ။ 

နောက်ခံလူ အဲရစ်ဒိုင်ယာကတော့ လက်ရှိအချိန်မှာ နည်းပြ ကွန်တီကို လုပ်ပိုင်ခွင့်အပြည့်ပေးပြီး ရင်းနှီးမြှုပ်နှံမူတွေလုပ်ဆောင်ဖို့ အချိန်ကောင်းဖြစ်ကြောင်း၊ အသင်းအောင်မြင်မှုရရှိရေးဟာ အသင်းရဲ့လက်ထဲမှာပဲ ရှိနေပြီဖြစ်ကြောင်း ပြောပါတယ်။ 

အသင်းခေါင်းဆောင်ဖြစ်သူ ဂိုးသမား ဟူဂိုလိုရစ်ကလည်း နည်းပြကွန်တီဟာ သူလိုချင်တာတွေက ဘာတွေလဲဆိုတာ တိတိကျကျ သိမြင်သူဖြစ်ပြီး ကြီးမားတဲ့ ယုံကြည်မှုလည်းရှိသူ ဖြစ်ကြောင်း ချီးကျူးပါတယ်။ 

လတ်တလောသတင်းတွေအရ စပါးအသင်းဟာ ဆောက်သမ်တန်ဂိုးသမား ဖော်စတာကို ခေါ်ယူဖို့ နီးစပ်နေပြီး မန်စီးတီးတိုက်စစ်မှူး ဂါဘရီယယ်ဂျေးဇူကိုလည်း ခေါ်ယူဖို့ ကြိုးပမ်းနေပါတယ်။

19 hours Ago

မန်စီးတီးနှင့် လီဗာပူး ကျဆုံးချိန်ရောက်လာဦးမည်ဟု မန်ယူနည်းပြ တန်ဟတ်ဂ် သုံးသပ်

မန်စီးတီးနဲ့ လီဗာပူးအသင်းတို့ဟာ လက်ရှိအချိန်မှာ ပုံစံကောင်းရနေပေမယ့် တချိန်မှာ ကျဆုံးချိန် ရောက်ရှိလာဦးမယ်လို့ မန်ယူနည်းပြသစ် အဲရစ်တန်ဟတ်ဂ်က ပြောပါတယ်။ 

တန်ဟတ်ဂ်ဟာ ယူနိုက်တက်နည်းပြချုပ်အနေနဲ့ ပထမဆုံးအကြိမ်ပြုလုပ်တဲ့ သတင်းစာရှင်းလင်းပွဲ မှာ မန်စီးတီးနဲ့ လီဗာပူးအသင်းတို့ကို ချီးကျူးခဲ့ပေမယ့် မန်ယူအသင်းက ကျော်ဖြတ်နိုင်မယ်လို့ ယုံကြည်ကြောင်း ပြောခဲ့ပါတယ်။ 

“လက်ရှိအချိန်မှာ မန်စီးတီးနဲ့ လီဗာပူးနှစ်သင်းစလုံးကို ချီးကျူးချင်ပါတယ်။ သူတို့နှစ်သင်းက ဘောလုံးကို အကောင်းဆုံးကစားနေတယ်။ ဒါပေမဲ့ ဘောလုံးမှာတော့ သူတို့ရဲ့အချိန်တွေဟာ တချိန်မှာ အဆုံးသတ်ရစမြဲပါပဲ။ သူတို့နဲ့အတူ ယှဉ်ပြိုင်သွားမှာဖြစ်ပြီး တခြား အသင်းတွေကလည်း အဲဒီလိုလုပ်ဆောင်ချင်မယ်ဆိုတာ သေချာပါတယ်။ ဒါက စွန့်စားမှုတခုလို့တော့ မထင်ဘူး။ ယူနိုက်တက်က ခမ်းနားလှတဲ့ သမိုင်းကောင်းရှိပြီး ဒီအသင်းက လူတွေနဲ့အတူ အနာဂတ်ကိုပုံဖော်ဖို့အတွက် စိတ်လှုပ်ရှားမိပါတယ်” လို့ နည်းပြတန်ဟတ်ဂ်က ပြောပါတယ်။ 

ဆက်လက်ပြီး နောက်ခံလူ မက်ဂွိုင်းယားဟာ  အကောင်းဆုံးစွမ်းဆောင်ရည် ထုတ်ပြနိုင်ခဲ့ပြီးသား ကစားသမားဖြစ်လို့ လက်တွဲပြီးလုပ်ဆောင်သွားမယ်လို့ မှတ်ချက်ပေးသွားပါတယ်။

20 hours Ago

အာရှခြေစစ်ပွဲမတိုင်ခင် ဟောင်ကောင်၊ ဘာရိန်းတို့နှင့် မြန်မာအသင်းခြေစမ်းပွဲကစားမည်

အာရှဖလားခြေစစ်ပွဲကစားဖို့ရှိတဲ့ မြန်မာ့လက်ရွေးစင်ဘောလုံးအသင်းဟာ ဟောင်ကောင်၊ ဘာရိန်း အသင်းတွေနဲ့ ခြေစမ်းပွဲ၂ပွဲကစားဖို့ရှိပါတယ်။ 

မြန်မာ့လက်ရွေးစင်အသင်းဟာ လက်ရှိအချိန်မှာ ကစားသမား ၂၇ ဦးနဲ့ ထိုင်းနိုင်ငံ၊ ဘန်ကောက်မြို့မှာ လေ့ကျင့်မှုတွေပြုလုပ်နေတာပါ။ 

အာရှခြေစစ်ပွဲ အကြိုပြင်ဆင်မှုအနေနဲ့ လာမယ့် မေ ၂၄ ရက်မှာ ဟောင်ကောင်အသင်းနဲ့ လေ့ကျင့်ရေးခြေစမ်းပွဲအနေနဲ့ ယှဉ်ပြိုင်ကစားသွားမှာပါ။ 

ဒါ့အပြင် မေလ ၂၇ ရက်နေ့ ဘန်ကောက်မြို့မှာ ဘာရိန်းအသင်းနဲ့ ဖီဖာအသိအမှတ်ပြု နိုင်ငံတကာ ခြေစမ်းပွဲ ကစားသွားမှာပါ။ 

မြန်မာအသင်းရဲ့ အာရှခြေစစ်ပွဲစဉ်တွေကို လာမယ့်ဇွန်လအတွင်း ကာဂျစ္စတန်နိုင်ငံမှာ သွားရောက်ယှဉ်ပြိုင်ရမှာပါ။ အုပ်စုအဖွင့်ပွဲစဉ်အနေနဲ့ ဇွန်လ ၈ ရက်မှာ တာဂျစ်ကစ္စတန်၊ ဇွန်လ ၁၁ ရက်နေ့မှာ ကာဂျစ္စတန်၊ ဇွန် ၁၄ ရက်နေ့မှာ စင်ကာပူအသင်းနဲ့ ယှဉ်ပြိုင်ကစားသွားရမှာပါ။ 

အုပ်စုပွဲစဉ်တွေအပြီးမှာ အုပ်စုပထမနဲ့ ဒုတိယရတဲ့အသင်းတွေက ၂၀၂၃ ခုနှစ် တရုတ်နိုင်ငံမှာကျင်းပမယ့် အာရှ ဖလား ပြိုင်ပွဲကို ဝင်ရောက်ယှဉ်ပြိုင်ခွင့်ရမှာဖြစ်ပါတယ်။ 

မြန်မာ့လက်ရွေးစင်အသင်းကို ဂျာမန်နည်းပြ အန်တွန်နီဟေးက တာဝန်ယူနေပြီး ပြီးခဲ့တဲ့ ဆီးဂိမ်းပြိုင်ပွဲအသင်းက ကစားသမား ၁၃ ဦး အထိ ပါဝင်နေပါတယ်။ 

20 hours Ago

May 23, 2022

ပရီးမီးယားလိဂ်ရွှေဖိနပ်ဆုရရန် ငယ်စဉ်ကတည်းကအိပ်မက်ရှိခဲ့ကြောင်း ဆွန်ဟောင်မင်ပြော

ပရီးမီးယားလိဂ်ရဲ့ ဂိုးသွင်းအများဆုံးရွှေဖိနပ်ဆုရဖို့ ငယ်စဉ်ကတည်းက အိပ်မက်ရှိခဲ့တာလို့ စပါးတိုက်စစ်မှူး ဆွန်ဟောင်မင်က ပြောပါတယ်။ 

တောင်ကိုရီးယားတိုက်စစ်မှူးဟာ လိဂ်နောက်ဆုံးပွဲစဉ်ဖြစ်တဲ့ နောဝှစ်ချ်နဲ့ပွဲစဉ်မှာ အနိုင်ဂိုး ၂ ဂိုးသွင်းခဲ့ပြီး စုစုပေါင်း ၂၃ ဂိုး သွင်းယူနိုင်ခဲ့တာပါ။ လီဗာပူး တိုက်စစ်မှူး မိုဆာလက်ကလည်း ၂၃ ဂိုး သွင်းခဲ့တာကြောင့် ဂိုးသွင်းအများဆုံးရွှေဖိနပ်ဆုကို ၂ ဦးစလုံးက သီးခြားစီရယူနိုင်ခဲ့ပါတယ်။ 

ရွှေဖိနပ်ဆုရယူနိုင်ခဲ့တဲ့အပေါ် မယုံကြည်နိုင်လောက်အောင် ဖြစ်ခဲ့ပေမယ့် ငယ်စဉ်ကတည်းက ရယူချင်ဖို့ အိပ်မက်မက်ခဲ့တာလို့ ဆွန်ဟောင်မင်ကပြောပါတယ်။ 

“ရွှေဖိနပ် ဆုရယူနိုင်ခဲ့တာက တကယ်ကို စိတ်ခံစားချက်တွေများပါတယ်။ ဒီဆုကို ငယ်စဉ်ကတည်းက ရယူနိုင်ဖို့ အိပ်မက်ရှိခဲ့တာဖြစ်ပြီး ခုတော့ ကျနော့်လက်ထဲ ရောက်လာပြီ။ မယုံကြည်နိုင်စရာပါပဲ။ ပထမပိုင်းကတည်းက ဂိုးသွင်းခွင့်တွေရဖို့အသင်းက ကူညီပေးခဲ့ပေမယ့် ကျနော် လွဲချော်ခဲ့တာတွေ ရှိတယ်။ ဒုတိယပိုင်းရောက်မှ ဂိုးတွေရခဲ့ပြီး အဲဒီမတိုင်ခင်မှာ စိတ်ပျက်မှုတွေ ရှိခဲ့တယ်” လို့ ဆွန်ဟောင်မင်က ပြောပါတယ်။ 

နည်းပြကွန်တီကလည်း ချန်ပီယံလိဂ်ဝင်ခွင့်သေချာဖို့ အရင်ဦးစားပေးဖြစ်ခဲ့ပေမယ့် ဆွန်ဟောင်မင် ရွှေဖိနပ်ဆုရဖို့ကိုလည်း ကူညီဖို့ပြင်ဆင်ခဲ့ကြောင်း ပြောသွားပါတယ်။

2 days Ago

၅ နှစ်အတွင်း ချန်ပီယံ ၄ ကြိမ်ဖြစ်ခဲ့မှု ထူးခြားသည့်စွမ်းဆောင်နိုင်မှုဖြစ်ကြောင်း ဂွါဒီယိုလာပြော

မန်စီးတီးအသင်းအနေနဲ့ ပြီးခဲ့တဲ့ ၅ နှစ်အတွင်းမှာ ချန်ပီယံဆုဖလားကို ၄ ကြိမ်အထိ ရယူနိုင်ခဲ့တာက ထူးခြားပြောင်မြောက်တဲ့ စွမ်းဆောင်နိုင်မှုဖြစ်ကြောင်း နည်းပြဂွါဒီယိုလာက ပြောပါတယ်။ 

မန်စီးတီးအသင်းဟာ မနေ့ညက ကစားခဲ့တဲ့ ပရီးမီးယားလိဂ်နောက်ဆုံးအပတ်ပွဲစဉ်မှာ အက်စတွန်ဗီလာကို ဦးဆောင်ဂိုး ၂ ဂိုးအရင်ပေးခဲ့ရပေမယ့် ချေပဂိုးနဲ့ အနိုင်ဂိုးတွေသွင်းပြီး ၃ ဂိုး ၂ ဂိုးနဲ့ အနိုင်ရခဲ့တာပါ။ ဒီနိုင်ပွဲကြောင့် ဒုတိယနေရာက လီဗာပူးကို တမှတ်အသာနဲ့ ချန်ပီယံဆုဖလား ကိုင်မြှောက်နိုင်ခဲ့တာပါ။ 

အခုနှစ်မှာ ချန်ပီယံဖြစ်ခဲ့တာဟာ ၅ နှစ်အတွင်းမှာ ၄ကြိမ်မြောက်ဖြစ်ပြီး ထူးခြားတဲ့ စွမ်းဆောင်နိုင်မူဖြစ်တယ်လို့ ဂွါဒီယိုလာက ပြောခဲ့တာပါ။ 

“ကျနော်တို့က ဂန္ထဝင်ကစားသမားတွေဆိုတာကို အမြဲတမ်းအမှတ်ရနေလိမ့်မယ်။ ဒီကစားသမားတွေဟာ ဂန္ထဝင်တွေဆိုတာ လူတွေ လက်ခံရပါမယ်။ ဒီကစားသမားတွေဟာ အသင်းအတွက် အဆုံးစွန်အထိ စွမ်းဆောင်နိုင်သူတွေ ဖြစ်တယ်။ ၅ နှစ်အတွင်းမှာ ၄ ကြိမ်ချန်ပီယံဖြစ်တယ်ဆိုတာ ကျနော်တို့ လုပ်ဆောင်နိုင်ခဲ့တာတွေထဲမှာ အကောင်းဆုံး အောင်မြင်မှုဖြစ်ကောင်းဖြစ်နိုင်ပါတယ်။ ဒီလိုနိုင်ငံမှာ ဒါမျိုးစွမ်းဆောင် နိုင်ခဲ့တာက ကစားသမားတွေရဲ့ ထူးခြားပြောင်မြောက်တဲ့ စွမ်းဆောင်ရည်ကြောင့်ပါပဲ။” 

လီဗာပူးအသင်းလို ပြိုင်ဘက်ကောင်းကို အရင်က မတွေ့ခဲ့ဖူးကြောင်း၊ ပြိုင်ဘက်ကောင်းရှိလို့သာ တိုးတက်မှုတွေ ရှိလာစေတာလို့ ဂွါဒီယိုလာက ပြောသွားပါတယ်။

2 days Ago

ချန်ပီယံဖြစ်ခဲ့သည့် ဂွါဒီယိုလာနှင့်မန်စီးတီးအသင်းသားများကို လီဗာပူးနည်းပြ ဂုဏ်ပြုစကားပြော

ချန်ပီယံဆုဖလားရယူနိုင်ခဲ့တဲ့ မန်စီးတီးအသင်းနည်းပြနဲ့ အသင်းသားတွေအတွက် ဂုဏ်ယူ ကြောင်း ပြိုင်ဘက်လီဗာပူးနည်းပြ ယာဂန်ကလော့ပ်က ပြောပါတယ်။ 

လီဗာပူးအသင်းဟာ မန်စီးတီးကို တမှတ်အကွာနဲ့ ချန်ပီယံဆုဖလားလက်လွှတ်ခဲ့ရတာဖြစ်ပေမယ့် မန်စီးတီးအသင်းသားတွေအတွက် ဂုဏ်ယူကြောင်း နည်းပြကလော့ပ်က ချီးကျူးခဲ့တာပါ။ 

“ကစားသမားတွေဟာ ထူးချွန်တဲ့ ဘောလုံးရာသီတခုကို စွမ်းဆောင်နိုင်ခဲ့ကြတယ်။ တရာသီလုံးကိုကြည့်မယ်ဆိုရင် ထူးခြားမှုတွေ ပြည့်နှက်နေတယ်။ ချန်ပီယံဖြစ်သွားတဲ့ မန်စီးတီးအသင်းနဲ့ နည်းပြဂွါဒီယိုလာ၊ သူ့ကစားသမားတွေကို ဂုဏ်ပြုပါတယ်။ ကျနော်တို့ နီးစပ်ခဲ့ပေမယ့် အဆုံးသတ်မှာတော့ မလုံလောက်ခဲ့ပါဘူး” လို့ နည်းပြ ကလော့ပ်က ဝုဗ်အသင်းနဲ့ ပွဲစဉ်အပြီးမှာ ပြောပါတယ်။ 

လီဗာပူးအသင်းအတွက် ဘောလုံးရာသီ မပြီးဆုံးသေးပေမယ့် အတွေ့အကြုံကြွယ်ဝတဲ့အသင်းနဲ့ ချန်ပီယံလိဂ်ဗိုလ်လုပွဲ ကစားသွားဖို့ ကျန်ရှိသေးကြောင်း၊ ပရီးမီးယားလိဂ်ချန်ပီယံဆုဖလားကို လက်လွှတ်ခဲ့ရတာက ချန်ပီယံလိဂ်ဆုဖလားကို ရယူချင်တဲ့ဆန္ဒ ပိုပြီးရှိစေကြောင်း နည်းပြ ယာဂန်ကလော့ပ်ကပြောပါတယ်။

2 days Ago
More News
Up