အမျိုးသမီး/လူငယ်

April 29, 2022

မြဝတီကာစီနိုရုံတွင် ထိုင်းအမျိုးသမီး ၃၀၀ ခန့် ပြည့်တန်ဆာအဖြစ် အဓမ္မစေခိုင်းခံနေရဟုဆို

မြန်မာ-ထိုင်းနယ်စပ်၊ မြန်မာနိုင်ငံဘက်ခြမ်း မြဝတီမြို့က ကာစီနိုလောင်းကစားရုံတခုထဲမှာ ပြည့်တန်ဆာအဖြစ် အဓမ္မစေခိုင်းခံနေရတဲ့ ထိုင်းအမျိုးသမီး ၃၀၀ လောက်ရှိနေတယ်လို့ အဲဒီကနေ ထွက်ပြေးလွတ်မြောက်လာတဲ့ အသက် ၂၅ နှစ်အရွယ် ထိုင်းအမျိုးသမီးက ပြောပါတယ်။

အခြေအနေအရ အမည်မဖော်လိုတဲ့ အဆိုပါ အမျိုးသမီးက သူကြုံတွေ့ခဲ့ရတဲ့ အခြေအနေတွေနဲ့ ပတ်သက်ပြီးတော့ ထိုင်းတော်ဝင်ရဲတပ်ဖွဲ့ကို ဧပြီ ၂၈ ရက်မှာ တိုင်ကြားခဲ့ချိန် ခုလိုပြောလိုက်တာပါ။

အခုနှစ်အစောပိုင်းတုန်းက အင်တာနက်နာမည်ကျော်တယောက်က အွန်လိုင်းကနေ တိုက်ရိုက်ထုတ်လွှင့်တဲ့ အစီအစဉ်တခု ပြုလုပ်ခဲ့ပြီး အိမ်နီးချင်းနိုင်ငံ နယ်စပ်ဒေသမှာ ပြည်သူ့ဆက်ဆံရေးနဲ့ ဖျော်ဖြေရေးဆိုင်ရာ အလုပ်အကိုင်တွေအတွက် လျှောက်ထားနိုင်ဖို့ အမျိုးသမီးတွေကို ဖိတ်ခေါ်ခဲ့ကြောင်းနဲ့ အဆိုပါအလုပ်တွေဟာ လိင်ပိုင်းဆိုင်ရာ ဝန်ဆောင်မှုတွေနဲ့ မပတ်သက်ကြောင်းလည်း သူက အခိုင်အမာပြောဆိုခဲ့တယ်လို့ ဆိုပါတယ်။

အမျိုးသမီးအနေနဲ့ အဲဒီအလုပ်ကို လက်ခံခဲ့ပြီး မြဝတီမြို့က ကာစီနိုရုံကို ရောက်ရှိသွားချိန်မှာတော့ ပြည့်တန်ဆာအဖြစ် မလုပ်ဘူးဆိုရင် ဘတ်ငွေ ၂၅၀၀၀ ပြန်ပေးရမယ်လို့ အဲဒီက ဝန်ထမ်းက ပြောခဲ့တယ်လို့ဆိုပြီး အဲဒီအခြေအနေမှာ ထိုင်းအမျိုးသမီး ၃၀၀ လောက် ကာစီနိုရုံထဲမှာ ပိတ်မိနေကြောင်း အမျိုးသမီးက ပြောပါတယ်။

ပြီးခဲ့တဲ့ ဧပြီ ၂၇ ရက်ညမှာတော့ ထိုင်း-မြန်မာနယ်စပ် မြန်မာနိုင်ငံ၊ မြဝတီဘက်ခြမ်းမှာ ပြည့်တန်ဆာအဖြစ် လူကုန်ကူးခံရပြီး ပိတ်လှောင်ခံနေရတဲ့ ထိုင်းမိန်းကလေး ၂ ယောက်ဟာ သောင်ရင်းမြစ်ကိုလက်ပစ်ကူးပြီး ထိုင်းနိုင်ငံ မဲဆောက်ဘက်ကို ပြန်ရောက်လာတယ်လို့ ထိုင်းသတင်းတွေမှာ ဖော်ပြပါတယ်။

အဆိုပါမိန်းကလေးတွေဟာ ထိုင်းနယ်စပ်နဲ့ မီတာ ၄၀၀ အကွာရှိ နေအိမ်တလုံးမှာ အလှောင်ခံနေရတာဖြစ်ပြီး ပြည့်တန်ဆာအဖြစ် အတင်းစေခိုင်းခံရတာကြောင့် ထိုင်းလွှတ်တော်အမတ်ရဲ့ လက်ထောက် နိုင်းဧကဖုပ်ရိုင့်ပရဆစ်ကို လူမှုကွန်ရက်ကနေတဆင့် တိုင်ကြားခဲ့တယ်လို့ဆိုပါတယ်။

နိုင်းဧကဖုပ်လည်း မဲဆောက်ကိုလာရောက်ပြီး ထိုင်းနယ်ခြားစောင့်တပ်ကို အကြောင်းကြားထားရာမှာ မြန်မာစစ်တပ်ကင်းစောင့်အဖွဲ့ ဂျူတီချိန် အလဲအလှယ်လုပ်စဉ် မိန်းကလေး ၂ ယောက်က ထွက်ပြေးလာခဲ့ကြောင်း၊ သောင်ရင်းမြစ်နားရောက်တော့ အနောက်က ဓာတ်မီးတွေနဲ့ ထိုးပြီးလိုက်လာလို့ မြစ်ထဲ ခုန်ချကူးခတ်ခဲ့ကာ ထိုင်းစစ်သားတွေကို လှမ်းအော်ပြီးအကူအညီတောင်းခဲ့ကာ လွတ်မြောက်လာခဲ့တာလို့ သိရပါတယ်။

ဒီကနေ့မနက်မှာတော့ နိုင်းဧကဖုပ်က သူတို့ ၂ ယောက်လုံးကို ဘန်ကောက်ကို ပြန်ခေါ်လာခဲ့ပြီး ကာစီနို လောင်းကစားရုံမှာ ကျန်ရှိနေသေးတဲ့ အမျိုးသမီးတွေကို ကယ်တင်နိုင်ဖို့ ဆက်လက်ပြီးတော့လုပ်ဆောင်သွားမယ်လို့ ဆိုပါတယ်။

4 weeks Ago

April 21, 2022

နွေဦးတော်လှန်ရေးအတွင်း ကျဆုံးသူများ၏ ထက်ဝက်ခန့်မှာ လူငယ်များဖြစ်ဟု NUG ထုတ်ပြန်

နွေဦးတော်လှန်ရေးကာလအတွင်း ကျဆုံးခဲ့ရတဲ့ အမျိုးသမီးတွေနဲ့ လူငယ်နဲ့ ကလေးသူငယ်တွေ စာရင်းကို အမျိုးသားညီညွတ်ရေးအစိုးရ (NUG) က ထုတ်ပြန်လိုက်ပြီး သေဆုံးသူ စုစုပေါင်းရဲ့ ၄၆ ဒသမ ၇ ရာခိုင်နှုန်းဟာ လူငယ်တွေ ဖြစ်တယ်လို့ ဆိုပါတယ်။

ဧပြီ ၁၁ ရက်အထိ တော်လှန်ရေး ကာလအတွင်း စစ်ကောင်စီရဲ့ အကြမ်းဖက်မှုကြောင့် ကျဆုံးသွားခဲ့တဲ့ အမျိုးသမီး၊ လူငယ်နဲ့ ကလေးသူငယ်အရေအတွက် ၁,၆၇၃ ယောက်ရှိခဲ့ပြီး အဲဒီထဲမှာ လူငယ်စုစုပေါင်း ၇၈၂ ယောက် ပါဝင်ခဲ့တယ်လို့ ဆိုပါတယ်။

ကျဆုံးလူငယ်တွေထဲမှာတော့ အမျိုးသား ၇၂၆ ယောက်နဲ့ အမျိုးသမီး ၅၆ ယောက် ပါဝင်နေပြီး တိုင်းဒေသကြီးနဲ့ ပြည်နယ်အလိုက် ထိခိုက်ကျဆုံးမှုမှာတော့ စစ်ကိုင်းတိုင်းဒေသကြီးမှာ ၂၅၄ ယောက်နဲ့ ကျဆုံးသူ လူငယ်တွေအများဆုံးဖြစ်နေပြီး သူ့နောက်မှာတော့ ရန်ကုန်တိုင်းဒေသကြီးက ၁၅၆ ယောက်၊ မန္တလေးတိုင်းဒေသကြီးက ၁၄၅ ယောက်စီနဲ့ အစဉ်လိုက် ရှိနေတာပါ။

ဒါ့အပြင် နွေဦးတော်လှန်ရေးကာလအတွင်း ထိခိုက်ကျဆုံးခဲ့ရတဲ့ အမျိုးသမီးအရေအတွက်ကတော့ ၁၅၆ ယောက်နဲ့ စုစုပေါင်း ကျဆုံးသူတွေရဲ့ ၉ ဒသမ ၃ ရာခိုင်နှုန်း ရှိနေပြီး ကျဆုံးကလေး အရေအတွက်ကတော့ ၁၃၃ ယောက်နဲ့ စုစုပေါင်း ကျဆုံးသူတွေရဲ့ ၇ ဒသမ ၆ ရာခိုင်နှုန်း ရှိနေတာလို့ ဆိုပါတယ်။

အကြမ်းဖက်စစ်အုပ်စုရဲ့ မတရားအာဏာသိမ်းယူမှုကို ပြည်သူတရပ်လုံးက ဆန့်ကျင်တော်လှန်ခဲ့ကြတဲ့ နွေဦးတော်လှန်ရေးကာလဟာ တနှစ်ကျော် ကြာမြင့်လာခဲ့ပြီဖြစ်ကာ ဒီကာလတွေအတွင်း စစ်အုပ်စုဟာ နည်းလမ်းမျိုးစုံနဲ့ သူတို့ကို ဆန့်ကျင်သူ နိုင်ငံရေးသမားတွေ၊ တက်ကြွလှုပ်ရှားသူတွေ၊ သတင်းသမားတွေ၊ ထင်ရှားကျော်ကြားသူတွေသာမက အပြစ်မဲ့ ပြည်သူတွေကိုပါ မင်းမဲ့စရိုက်ဆန်ဆန် ပစ်ခတ်သတ်ဖြတ်နေ တာ ဖြစ်ပါတယ်။

နိုင်ငံတဝန်းမှာတော့ အကြမ်းဖက်စစ်ကောင်စီတပ်တွေနဲ့ ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသားလက်နက်ကိုင်တပ်တွေကြား တိုက်ပွဲတွေလည်း မြို့ရွာအနှံ့ ပြင်းထန်နေပြီး စစ်အုပ်စုဟာ လူမဆန်စွာ ရွာလုံးကျွတ် မီးရှို့ဖျက်ဆီးတာတွေ၊ လေကြောင်းတိုက်ခိုက်မှုတွေကိုပါ  ဥပဒေမဲ့ လုပ်ဆောင်နေခဲ့တာ ဖြစ်ပါတယ်။

လက်ရှိမှာတော့ မြန်မာပြည်သူတွေဟာ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူလူထုတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ၊ ပြည်သူ့ ခုခံစစ်ကို ဆင်နွှဲနေကြတာပါ။

နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင် ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေလည်း တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။

1 month Ago
More News
Up