လူမှုရေး

May 22, 2022

စစ်တပ်မီးရှို့ ဖျက်ဆီးခဲ့သည့် မြိုင်မြို့နယ် ရွာ ၆ ရွာအတွက် အရေးပေါ်အကူအညီလိုအပ်နေ

မကွေးတိုင်း မြိုင်မြို့နယ်မှာ မေ ၁ ရက်ကနေ ၂၁ ရက်အထိ စစ်ကောင်စီတပ်တွေ မီးရှို့ ဖျက်ဆီးခံခဲ့ရတဲ့ ကျေးရွာ ၆ ရွာက ဒေသခံပြည်သူတွေနဲ့ CDM ဝန်ထမ်းတွေအတွက် အမိုးအကာ၊ စားနပ်ရိက္ခာနဲ့ ဆေးဝါးတွေ အရေးပေါ်အကူညီ လိုအပ်နေပါတယ်။

စစ်ကောင်စီတပ်ဟာ မေ ၁ ရက်ကစလို့ ရွာသစ်ကြီးရွာက နေအိမ် ၇၅ လုံး၊ နှမ်းစားကျင်းရွာက နေအိမ် ၇ လုံး၊ သံဘိုကြီးရွာက နေအိမ် ၁၀ လုံး၊ ပိတောက်ကန်ရွာက နေအိမ် ၆၅ လုံး၊ ပန်းတိုင်းတောရွာက နေအိမ် ၁၃ လုံးနဲ့ ကြက်ခြံ ၁၅ ခြံ၊ လက်ယက်မ(စံပြ)ကျေးရွာက အိမ်ခြေ ၇၀၀ ကျော်လောက်နဲ့ ကား၊ ဆိုင်ကယ်တွေ မီးရှို့ဖျက်ဆီးခံခဲ့ရတယ်လို့ CDM ကျောင်းဆရာတယောက် ပြောပါတယ်။

ဒါ့အပြင် နဂါးပွက်၊ အိုးဘို၊ ကန်နက်၊ မန်ကျီးလေးပင်၊ တောင်ဘို့၊ တောင်ကိုင်းနဲ့ ဖျသီးရွာတွေကိုလည်း စစ်ကောင်စီတပ်တွေနဲ့ ပျူစောထီးတွေ ဝင်ရောက်မွှေနှောက်ပြီး ပြည်သူတွေရဲ့ ကား၊ဆိုင်ကယ်၊ ရွှေထည်ပစ္စည်းတွေနဲ့ ငွေကြေးတွေကို ခိုးယူသွားကြတယ်လို့ လက်ယက်မရွာ ဒေသခံတယောက်က ပြောပါတယ်။

“စစ်ကောင်စီတပ်တွေဟာ မြိုင်မြို့နယ်ထဲကို စစ်ကြောင်း ၃ ကြောင်းထိုးပြီး ရွာတွေကို ဝင်မွှေတာဗျ။ PDF အားကောင်းတယ်လို့ ထင်တဲ့ရွာတွေကို ဆက်တိုက်မီးရှို့ဖျက်ဆီးကြတာ။ အပြစ်မဲ့ ပြည်သူတွေကိုလည်း မတရားဖမ်းဆီးသတ်ဖြတ်တာတွေလုပ်တယ်ဗျ။ တချို့ပြည်သူတွေကတော့ ဆွေမျိုးသာချင်းတွေရှိတဲ့ ဘေးလွတ်မဲ့ ရွာတွေနဲ့ တချို့ကတော့ တောတောင်တွေထဲက သစ်ပစ်အောက်တွေမှာ ဖြစ်သလိုနေနေကြရတယ်။ ရွာကို ပြန်မယ်ဆိုရင်လည်း နေစရာအိမ်ကမရှိတော့ဘူး။ စစ်(...)တွေနဲ့ ပျူတွေ ပြန်ဝင်လာမှာစိုးလို့ ယနေ့အချိန်ထိ တောထဲမှာပဲ နေနေကြရတယ်။” 

လက်ရှိမှာ မိုးရာသီကာလဖြစ်ပြီး အမိုးအကာတွေ အလုံအလောက်ပါမလာကြတာကြောင့် အခက်အခဲအတော်ကြုံနေကြရတယ်လို့ ဆိုပါတယ်။

“တောထဲဆိုတော့ ခြင်တွေကလည်း အရမ်းကိုက်တယ်။ တချို့ဆိုရင် အအေးမိ၊ ဖျားနာ၊ ချောင်ဆိုးတာတွေ ဖြစ်နေကြတယ်။ ဆေးဝါးလည်း အလုံအလောက်ပါမလာလို့ ဆေးမြီးတိုတွေနဲ့ပဲ ကုနေကြရတယ်။ စားနပ်ရိက္ခာတွေကလည်း ပါလာတဲ့ဟာလေးတွေနဲ့ မျှတစားသောက်နေရပြီး ကုန်ခါနီးနေပြီ။” 

စစ်ကောင်စီတပ်တွေ စစ်ကြောင်းထိုးပြီး ရွာတွေကို မွှေနှောက်မီးရှို့တာကြောင့် ကျေးရွာပေါင်း ၂၀ လောက်က ဒေသခံပြည်သူ ၂၀၀၀၀ ကျော်လောက်ဟာ နေရပ်စွန့်ခွာပြီး ဘေးလွတ်ရာနေရာတွေကို ထွက်ပြေးတိမ်းရှောင်နေကြရတယ်လို့ ဆိုပါတယ်။

ပြည်တွင်း ပြည်ပမှာရှိတဲ့ ပြည်သူတွေအနေနဲ့ မြိုင်မြို့နယ်က နေအိမ်တွေမီးရှို့ဖျက်ဆီးခံရတဲ့ စစ်ဘေးရှောင်ပြည်သူတွအတွက် စားနပ်ရိက္ခာ၊ အမိုးအကာ၊ ခြင်ထောင်နဲ့ ဆေးဝါးတွေ လှူဒါန်းပေးကြဖို့ ဒေသခံတွေက မေတ္တာရပ်ခံထားပါတယ်။

စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကတော့ ကျေးရွာတွေကို မီးရှို့ ဖျက်ဆီးတာဟာ သူတို့ရဲ့ လက်ချက်မဟုတ်ဘူးလို့ အမြဲတမ်းငြင်းဆန်လေ့ရှိပြီး PDF တပ်ဖွဲ့တွေကသာ ပြုလုပ်နေတာလို့ သတင်းစာရှင်းလင်းပွဲတွေမှာ ပြောဆိုလေ့ရှိပါတယ်။

မကွေးတိုင်းဒေသကြီးမှာ စစ်တပ်အာဏာသိမ်းတဲ့ ဖေဖော်ဝါရီ ၁ ရက်နေ့ကနေ အခုနှစ်ဧပြီ ၃၀ ရက်နေ့အထိ စစ်ကောင်စီတပ်ဖွဲ့တွေနဲ့လက်အောက်ခံအဖွဲ့တွေက မီးရှို့ဖျက်ဆီးလို့ အိမ်ခြေ ၂၁၃၁ လုံး မီးလောင် ဆုံးရှုံးခဲ့တယ်လို Data For Myanmar က မေ ၁ ရက်နေ့ရက်စွဲနဲ့ ထုတ်ပြန်ထားပါတယ်။

3 days Ago

နေအိမ်များ မီးရှို့ဖျက်ဆီးခံခဲ့ရသည့် ရှားဖိုရွာက ပြည်သူ ၃၀၀ ကျော် အကူအညီလိုအပ်နေ

ပြီးခဲ့တဲ့ မေလလဆန်းပိုင်းမှာ စစ်ကောင်စီတပ်ဖွဲ့က နေအိမ်တွေမီးရှို့ဖျက်ဆီးခဲ့တဲ့ စစ်ကိုင်းတိုင်း ကလေးမြို့နယ် ရှားဖိုရွာက ပြည်သူတွေ နေထိုင်စားသောက်ရေး အခက်အခဲကြုံနေကြရပါတယ်။

စစ်ကောင်စီတပ်ဟာ ရှားဖိုကျေးရွာအတွင်းက လူနေအိမ်အလုံး ၁၀၀ ကျော်နဲ့ စားသောက်ဖို့ သိုလှောင်ထားတဲ့ စပါးကျီတွေကိုလည်း မီးရှို့ဖျက်ဆီးသွားကြတာကြောင့် ဒေသခံ စစ်ရှောင်တွေဟာ ပြန်စရာနေအိမ်မရှိတော့ဘဲ ကျေးရွာအနီးက ယာတောတွေမှာ ယာယီတဲတွေဆောက်လုပ်နေထိုင်ကြရပြီး အခက်အခဲကြုံနေကြရတယ်လို့ ဒေသခံတဦးက ပြောပါတယ်။

"စစ်သားတွေက တခါမှ ရွာထဲကို စစ်ကြောင်းမထိုးဖူးဘူး၊ ရွာကိုလည်းမဝင်ဖူးဘူး၊ တခါမှလည်းမပြေးရဘူး၊ ဘေးရွာတွေကတော့ ပြေးကြရတယ်။ အခုလည်း ရွာကိုဝယ်မယ် မထင်လို့ ဘာမှမပြင်ဆင်ထားဘူး။ တကယ်တမ်းဝင်ပြီဆိုတော့ အပြေးတပိုင်း ပြေးခဲ့ကြရတာ ဘာမှပါမလာဘူး။  အခုအိမ်ကို မီးရှို့ခံရတော့ ပြန်စရာအိမ်လည်း မရှိတော့ တောထဲမှာပဲ နေကြရတော့တာ စားသောက်စရာလည်းမရှိတော့ အဆင်မပြေဘူး။” 

လက်ရှိမှာ ကူညီထောက်ပံ့ပေးနေတဲ့ အဖွဲ့အစည်းတွေနဲ့ ပရဟိတအသင်းတွေ မရှိတာကြောင့် ပိုမိုခက်ခဲနေကြတယ်လို့ ဆိုပါတယ်။

ယာယီတဲတွေနဲ့ နေထိုင်နေကြရတဲ့ အဆိုပါစစ်ဘေးရှောင်စခန်းမှာ သက်ကြီးရွယ်အိုတွေ မွေးကင်းစကလေးငယ်တွေ၊ နို့တိုက်မိခင်တွေနဲ့ မသန်မစွမ်းတွေလည်း ရှိနေတယ်လို့ ဒေသခံတွေက ပြောပါတယ်။

ရှားဖိုကျေးရွာကို စစ်ကောင်စီတပ်တွေက မေ ၁ ရက်နေ့မှာ စစ်ကြောင်းထိုးဝင်ရောက်ခဲ့ပြီး ဒေသခံနေအိမ် ၁၀၀ ကျော်ကို မီးရှို့ဖျက်ဆီးခဲ့တာကြောင့် လူဦးရေ ၃၀၀ ကျော် အခက်အခဲဖြစ်ပေါ်နေကြပါတယ်။

3 days Ago

May 19, 2022

NUG က ဧပြီလအတွင်း လူသားချင်းစာနာမှုအကူအညီ ကျပ်သန်း ၁၀၀ ကျော် ထောက်ပံ့

အမျိုးသားညီညွတ်ရေးအစိုးရ (NUG)၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ပြီးခဲ့တဲ့ ဧပြီလအတွင်း လူသားချင်းစာနာမှု အကူအညီ ကျပ်သန်း ၁၀၀ ကျော်ကို ထောက်ပံ့ပေးနိုင်ခဲ့တယ်လို့ ထုတ်ပြန်ပါတယ်။

NUG အစိုးရအနေနဲ့ အာဏာသိမ်း အကြမ်းဖက်စစ်တပ်ရဲ့ ထိုးစစ်ဆင် တိုက်ခိုက်မှုတွေကြောင့် ထွက်ပြေးတိမ်းရှောင်နေကြရတဲ့ ပြည်သူတွေ၊ တော်လှန်ရေးမှာ ပါဝင်ရင်း ထိခိုက်ဒဏ်ရာရရှိသူတွေနဲ့ အသက် ဆုံးရှုံးရသူတွေရဲ့ မိသားစုဝင်တွေ၊ အကူအညီလိုအပ်နေတဲ့ မသန်စွမ်းတွေအပါအဝင် ထိခိုက်လွယ်အုပ်စုတွေအပါအဝင် အကြောင်းကိစ္စအမျိုးမျိုးကြောင့် လူသားချင်းစာနာမှုအကူအညီလိုအပ်သူတွေကို မိတ်ဖက်အသီးသီးနဲ့ လက်တွဲချိတ်ဆက်ကာ အ တတ်နိုင်ဆုံး ပံ့ပိုးကူညီပေးနေတယ်လို့ ဆိုပါတယ်။

ပြီးခဲ့တဲ့ ဧပြီလအတွင်း ထောက်ပံ့မှုမှာတော့ စစ်ကိုင်းတိုင်း၊ မကွေးတိုင်းနဲ့ ကရင်ပြည်နယ် ၃ ခုကို ထောက်ပံ့မှု အများဆုံးပြုလုပ်ခဲ့ပြီး ယာယီစစ်ဘေးရှောင်စခန်းတွေက လူဦးရေ ၉၇,၅၂၉ ယောက်ကို ထောက်ပံ့နိုင်ခဲ့တယ်လို့ ဆိုပါတယ်။

နေရပ်စွန့်ခွာထွက်ပြေးတိမ်းရှောင်နေသူတွေနဲ့ စစ်ဘေးရှောင်တွေကို ၆၅ ဒသမ ၁၆ သန်း၊ ကျဆုံးသွားသူတွေနဲ့ ထိခိုက်ဒဏ်ရာရသူတွေကို ၁၆ ဒသမ ၇၈ သန်း၊ ထိခိုက်လွယ်အုပ်စုဝင် CDM ဝန်ထမ်းတွေကို ၄ ဒသမ ၂၂ သန်း၊ ထိခိုက် လွယ်ပြည်သူတွေနဲ့ မိသားစုဝင်တွေကို ၁၁ ဒသမ ၃၅ သန်းနဲ့ အထွေထွေ လူသားချင်းစာနာမှုအကူအညီတွေအတွက် ၂ ဒသမ ၈၇ သန်းစီ ထောက်ပံ့နိုင်ခဲ့တာပါ။

ခုလို ထောက်ပံ့မှုတွေကို စစ်တပ်ရဲ့ အတားအဆီး အမျိုးမျိုးကြားက ဘေးဒုက္ခခံစားနေကြရတဲ့ ပြည်သူတွေလက်ဝယ်အရောက် စီစဉ်ဆောင်ရွက်ပေးကြတဲ့ ဒေသခံ မိတ်ဖက်အဖွဲ့တွေ၊ ကိုယ်စားလှယ်တွေနဲ့ စေတနာ့ဝန်ထမ်း ပြည်သူ တွေကိုလည်း ကျေးဇူးတင်ရှိကြောင်း ထုတ်ပြန်ချက်ထဲမှာ ဖော်ပြပါတယ်။

ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) က ထုတ်ပြန်ချက်အရ  မြန်မာနိုင်ငံမှာ ပြီးခဲ့တဲ့ မေ ၂ ရက်အထိ နေရပ်စွန့်ခွာ ရွှေ့ပြောင်းနေထိုင်ရသူ စုစုပေါင်း ၉ သိန်းကျော်ထိ ရှိလာခဲ့ပြီလို့ ဆိုပါတယ်။

နေရပ်စွန့်ခွာ ပြောင်းရွှေ့နေထိုင်တဲ့ ဒေသတွေမှာ ခိုလှုံစရာနေရာ၊ အစားအစာ၊ သောက်သုံးရေနဲ့ ဆောင်းရာသီသုံးပစ္စည်းတွေ လုံလောက်စွာ မရရှိနိုင်တာကြောင့် တချို့ နေရပ်စွန့်ခွာသူတွေဟာ မူလနေထိုင်ရာဒေသတွေဆီ ပြန်နေ ကြပေမယ့် ဒေသတွင်း တိုက်ပွဲတွေ ဆက်လက်ဖြစ်ပွားနေတာကြောင့် သူတို့ဟာ နေရပ်စွန့်ခွာရတာတွေ တကျော့ပြန်လည် ဖြစ်ပေါ်လာနိုင်ဖွယ် ရှိတယ်လို့လည်း ခန့်မှန်းထားပါတယ်။

မြန်မာနိုင်ငံမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူလူထုတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာပါ။

နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာ ဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။

6 days Ago
More News
Up