နိုင်ငံရေး

June 29, 2022

မွန်ဝန်ကြီးချုပ် ဒေါက်တာအေးဇံ ရွေးကောက်ပွဲအမှုမှ လွတ်မြောက်

ထောင်ဒဏ် ၂၃ နှစ်ချမှတ်ခံထားရတဲ့ မွန်ပြည်နယ် ဝန်ကြီးချုပ် ဒေါက်တာအေးဇံဟာ အာဏာသိမ်း စစ်ကောင်စီက နောက်ထပ်စွဲဆိုထားတဲ့ ရွေးကောက်ပွဲ မလျော်သြဇာသုံးမှု အမှု ၂ မှုကနေ ကွင်းလုံးကျွတ် လွတ်မြောက်သွားတယ်လို့ တရားရုံးနဲ့ နီးစပ်သူတွေက ပြောပါတယ်။

ဝန်ကြီးချုပ် ဒေါက်တာအေးဇံဟာ ပြီးခဲ့တဲ့ ရွေးကောက်ပွဲမှာ မလျော်သြဇာသုံးတယ်ဆိုတဲ့ စွပ်စွဲချက်နဲ့ အာဏာသိမ်း စစ်ကောင်စီက ရာဇသတ်ကြီး ဥပဒေ ပုဒ်မ ၁၇၁(စ) နဲ့ အမှု ၂ မှု ဖွင့်လှစ် တရားစွဲထားတာဖြစ်ပါတယ်။

စစ်ကောင်စီက စွဲဆိုထားတဲ့ အဲဒီအမှုတွေမှာ တရားစွဲ အဖွဲ့အစည်း ခွင့်ပြုမိန့် မပါတဲ့အတွက် ဝန်ကြီးချုပ် ဒေါက်တာအေးဇံ ရှေ့နေအဖွဲ့က အမှုဖြစ်စဉ် တစ်ခုလုံးကို ချေဖျက်ရုပ်သိမ်းပေးဖို့ ပြည်ထောင်စုတရားလွှတ်တော်ချုပ်ရုံးကို လျှောက်ထားခဲ့တာပါ။

အဲဒီအမှုတွေအတွက် ဇွန် ၂၉ ရက်မှာ ပြည်ထောင်စု တရားလွှတ်တော်ရုံးချုပ်ကနေ ပယ်ဖျက်ကြောင်း စီရင်ချ အမိန့်ချမှတ်လိုက်တယ်လို့ တရားရုံးနဲ့ နီးစပ်သူ တစ်ဦးက ပြောပါတယ်။

ဒါကြောင့် ဝန်ကြီးချုပ် ဒေါက်တာအေးဇံဟာ စစ်ကောင်စီက စွဲဆိုထားတဲ့ ရွေးကောက်ပွဲ မလျော်သြဇာသုံးမှု ဖြစ်တဲ့ ပုဒ်မ ၁၇၁(စ) ရဲ့ အမှု ၂ မှုကနေ လွတ်မြောက်သွားတာပါ။

ဒါပေမဲ့ ဝန်ကြီးချုပ် ဒေါက်တာအေးဇံဟာ စစ်ကောင်စီ စွဲဆိုထားတဲ့ ရွေးကောက်ပွဲ မလျော်သြဇာသုံးမှု နောက်တမှု ဖြစ်တဲ့ ရာဇသတ်ကြီး ဥပဒေ ပုဒ်မ ၁၃၀ (က) အတွက် ဆက်လက် တရားရင်ဆိုင်ရမှာ ဖြစ်ပါတယ်။

ဝန်ကြီးချုပ် ဒေါက်တာအေးဇံဟာ စစ်တပ် အာဏာသိမ်းပြီးနောက် စစ်ကောင်စီက စွဲဆိုထားတဲ့ အဂတိမှု ၉ မှုအတွက် ထောင်ဒဏ် ၂၁ နှစ် အမိန့်ချမှတ်ခဲ့ထားရသလို ပုဒ်မ  ၅၀၅(ခ)နဲ့ ထောင်ဒဏ် ၂ နှစ် စုစုပေါင်း ထောင်ဒဏ် ၂၃ နှစ်ထိ ချမှတ်ခံထားရတာပါ။

လက်ရှိမှာတော့ ဝန်ကြီးချုပ် ဒေါက်တာအေးဇံကို အာဏာသိမ်း စစ်ကောင်စီက ကျိုက်မရောဗဟိုအကျဉ်းထောင်မှာ ဖမ်းဆီးချုပ်နှောင်ထားပါတယ်။

28 seconds Ago

ဒေါ်အောင်ဆန်းစုကြည်အပါအဝင် မတရားဖမ်းဆီးခံထားရသူအားလုံးလွတ်မြောက်ရေး ကြိုးပမ်းနေဟု NUG ပြော

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် စစ်ကြောရေးစခန်းတွေ၊ အကျဉ်းထောင်တွေအတွင်း  ဓားစာခံတွေသဖွယ် မတရားဖမ်းဆီးခံထားကြရသူတွေရဲ့ အခြေအနေအရပ်ရပ်ကို စောင့်ကြည့်နေကာ အားလုံးလွတ်မြောက်ရေးအတွက် ကြိုးပမ်းဆောင်ရွက်နေတယ်လို့ အမျိုးသားညီညွတ်ရေးအစိုးရ (NUG) က ပြောပါတယ်။

ဇွန် ၂၉ ရက် ရက်စွဲနဲ့ အဆိုပါ ထုတ်ပြန်ချက်မှာတော့ ဒေါ်အောင်ဆန်းစုကြည်ကို လက်ရှိအချိန်မှာ နေပြည်တော်အကျဉ်းထောင်ကို ပို့ဆောင်ချုပ်နှောင်ထားကြောင်းနဲ့ မြန်မာ့နိုင်ငံရေးသမိုင်းမှာ စစ်အာဏာရှင် အဆက်ဆက်က အာဏာတည်မြဲရေးအတွက် နိုင်ငံရေးခေါင်းဆောင်တွေ၊ နိုင်ငံရေးတက်ကြွလှုပ်ရှားသူတွေနဲ့ ပြည်သူတွေကို နည်းလမ်းပေါင်းစုံနဲ့ ညှဉ်းပမ်းနှိပ်စက်သတ်ဖြတ်တာ၊ မတရားဖမ်းဆီးချုပ်နှောင်တာ၊ အသက် အိုးအိမ်စည်းစိမ်တွေကို ထိပါးဖျက်ဆီးတာတွေကို ကျူးလွန်ခဲ့ကြသလို အခုလက်ရှိ အကြမ်းဖက်စစ်ကောင်စီဟာလည်း ခေတ်အဆက်ဆက် အာဏာရှင်တွေထက် ပိုမိုဆိုးဝါးတဲ့ လူ့အခွင့်အရေးချိုးဖောက်မှုတွေ၊ စစ်ရာ ဇဝတ်မှုတွေ၊ လူသားမျိုးနွယ်စုအပေါ်ကျူးလွန်တဲ့ ရာဇဝတ်မှုများစွာကို ဆင်ခြင်တုံ့တရား ကင်းမဲ့စွာ ဆက်လက်ကျူးလွန်နေတယ်လို့ ဖော်ပြထားပါတယ်။

ဒါ့အပြင် အကြမ်းဖက်စစ်အုပ်စုက မတရားဖမ်းဆီးထားတဲ့ နိုင်ငံတော်သမ္မတ၊ နိုင်ငံတော်အတိုင်ပင်ခံပုဂ္ဂိုလ်အပါအဝင် နိုင်ငံရေးခေါင်ဆောင်တွေ၊ နိုင်ငံရေး တက်ကြွလှုပ်ရှားသူတွေ၊ ပြည်သူတွေအားလုံးဟာ ရာဇဝတ် ဂိုဏ်းတခုက ဓားစာခံအဖြစ် ဖမ်းဆီးခံထားရသူတွေနဲ့ အလားသဏ္ဍာန်တူနေတဲ့ ကာလဖြစ်တာကြောင့် တဦးတယောက်ချင်းစီတိုင်းရဲ့ အသက်အန္တရာယ်မှာ စိုးရိမ်ဖွယ် အနေအထားဖြစ်နေတယ်လို့လည်း NUG က ပြောပါတယ်။

အပြည်ပြည်ဆိုင်ရာ လူ့အခွင့်အရေး ကြေညာစာတမ်း (UDHR) နဲ့ အပြည်ပြည်ဆိုင်ရာ နိုင်ငံသားနှင့် နိုင်ငံရေး အခွင့်အရေးများ (ICCPR) ပဋိညာဉ်စာတမ်းတွေမှာတော့ ဘယ်လိုရည်ရွယ်ချက်အတွက်မဆို ဓားစာခံ အဖြစ် ဖမ်းဆီးတာဟာ လူတဦးချင်းရဲ့ဘဝ၊ လွတ်လပ်ခွင့်နဲ့ လုံခြုံမှုအပါအဝင် လူတိုင်းရဲ့ ဂုဏ်သိက္ခာနဲ့ အခြေခံ အခွင့်အရေးတွေ၊ ကုလသမဂ္ဂက ထိန်းသိမ်းထားတဲ့ အခြေခံတန်ဖိုးတွေကို ချိုးဖောက်တယ်လို့ ပြဋ္ဌာန်း ထားတာမို့ အကြမ်းဖက်စစ်ကောင်စီရဲ့ လုပ်ရပ်တွေဟာ နိုင်ငံတကာလူ့အခွင့်အရေး စံချိန်စံညွှန်းတွေနဲ့ ကိုက်ညီခြင်းမရှိရုံသာမက မြန်မာနိုင်ငံက ၂၀၀၄ ခုနှစ် ဇွန် ၄ ရက်မှာ လက်မှတ်ရေးထိုးခဲ့တဲ့ ဓားစာခံဖမ်းခြင်း ဆန့်ကျင်ရေး အပြည်ပြည်ဆိုင်ရာ ကွန်ဗင်းရှင်းပါ  အချက်အလက်တွေကိုလည်း ဗြောင်ကျကျ ချိုးဖောက်နေတယ်လို့ ဆိုပါတယ်။

ဒါကြောင့်မို့ မတရားဖမ်းဆီးခံထားရသူတွေအားလုံး အမြန်ဆုံး ပြန်လည်လွတ်မြောက်ရေးအတွက် ဒီမိုကရေစီရေးကြိုးပမ်းဆောင်ရွက်နေကြသူတွေ၊ လူ့ဂုဏ်သိက္ခာနဲ့ လူ့အခွင့်အရေးကို လေးစားတန်ဖိုး ထားကြသူ တွေ အားလုံးနဲ့ နိုင်ငံတကာအသိုက်အဝန်းအနေနဲ့ မြန်မာပြည်သူတွေနဲ့အတူ ဆက်လက်ရပ်တည်ပြီး အစွမ်းကုန် ကြိုးစားဆောင်ရွက်ကြဖို့လည်း တာဝန်ရှိကြောင်း တိုက်တွန်းထားပါတယ်။

မြန်မာနိုင်ငံမှာတော့ အကြမ်းဖက် စစ်အုပ်စုက မတရားအာဏာသိမ်းယူထားတဲ့ ကာလဟာ တနှစ်ခွဲနီးပါး ကြာမြင့်လာခဲ့ပြီဖြစ်သလို ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ ကျန်းမာရေး၊ ပညာရေး၊ လူမှုရေးကဏ္ဍတွေအသီးသီးမှာ အဘက်ဘက်က ကျဆင်းနေခဲ့တာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ချက်မှာတော့ မြန်မာနိုင်ငံမှာ မတရားအာဏာသိမ်း ၁ နှစ်ခွဲနီးပါးအကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှု တွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၂,၀၃၉ ယောက်နဲ့ ဖမ်းဆီးထိန်းသိမ်းခံရသူပေါင်း ၁၄,၃၇၄ ယောက်ထိ ရှိလာခဲ့ပြီလို့ ဖော်ပြပါတယ်။

12 mins Ago

ညီမဖြစ်သူ ထောင်ကျနေချိန် နေအိမ်ကို ရောင်းချပြီး အမွေခွဲရန် ဦးအောင်ဆန်းဦး ကြိုးပမ်း

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နေပြည်တော်ထောင်မှာ အကျဉ်းကျခံနေရချိန် သူ့ရဲ့ အစ်ကိုတော်စပ်သူ ဦးအောင်ဆန်းဦးက နေအိမ် အမွေရလိုမှုနဲ့ စွဲထားတဲ့အမှုကို   ဇွန်လ ၂၇ ရက်နေ့က နောက်ဆုံးအကြိမ်အဖြစ် ပြည်‌ထောင်စုတရားလွှတ်တော်မှာ ကြားနာခဲ့ပါတယ်။ 

ဒေါ်အောင်ဆန်းစုကြည် ၁၅ နှစ်ကြာ နေအိမ်အကျယ်ချုပ်နဲ့နေခဲ့ရတဲ့ ရန်ကုန်တက္ကသိုလ်ရိပ်သာလမ်း၊ ခြံအမှတ် ၅၄ ရှိနေအိမ်ကို ဘယ်လိုအမွေခွဲမယ်ဆိုတာနဲ့ ပတ်သက်ပြီး ပြီးခဲ့တဲ့နှစ် အောက်တိုဘာမှာ ဦးအောင်ဆန်းဦးက တင်သွင်းခဲ့တဲ့ အထူးအယူခံကို တရားရုံးကလက်ခံခဲ့တာ ဖြစ်ပါတယ်။

တရားရုံးရဲ့ အထူးခုံရုံးကနေ ၃ လအတွင်း အမိန့်ချမှတ်မှာဖြစ်ပြီး ဒါဟာ နောက်ဆုံးအမိန့်ဖြစ်တယ်လို့ ဦးအောင်ဆန်းဦးရဲ့ရှေ့နေ ဦးအေးလွင်ရဲ့ ပြောဆိုချက်ကို ကိုးကားပြီး အေပီသတင်းမှာ ဖော်ပြပါတယ်။

အငြင်းပွားမှုမှာဆုံးဖြတ်ရခက်တဲ့အချက်က အမွေကိုဘယ်လိုခွဲဝေမယ်ဆိုတဲ့ အချက်ဖြစ်တယ်လို့ ဦးအောင်ဆန်းဦးရဲ့ရှေ့နေ ဦးအေးလွင်ကပြောကြားပြီး အဲဒီအိမ်ဟာ ဒေါ်လာသန်း ၉၀ လောက်တန်ကြေးရှိတယ်လို့ သူကပြောပါတယ်။

ဒါပေမဲ့ အိမ်ရဲ့တန်ဖိုးတွက်ချက်မှုကိုတော့ အတည်ပြုလို့မရနိုင်သေးကြောင်းနဲ့ ဒေါ်အောင်ဆန်းစုကြည်ရဲ့ ရှေ့နေတွေကို ဆက်သွယ်လို့ မရကြောင်း AP သတင်းကပြောပါတယ်။

ဦးအောင်ဆန်းဦးဟာ ညီမဖြစ်သူ ဒေါ်အောင်ဆန်းစုကြည်ကို ၂၀၀၀  ပြည့်နှစ်မှာ စတင်တရားစွဲဆိုခြင်းမပြုမီ ဆယ်စုနှစ်အတော်များများတည်းက အမေရိကန်ပြည်ထောင်စုမှာ ပြောင်းရွှေ့နေထိုင်နေသူဖြစ်ပါတယ်။

အမွေဝေစုရရှိရေးအတွက် သူ့ရဲ့တရားစွဲဆိုမှုကို ၂၀၀၁ ခုနှစ် ဇန်နဝါရီလမှာတည်းက တရားရုံးက ပယ်ချခဲ့ပေမဲ့ အဲဒီနောက်ပိုင်း ဆယ်စုနှစ် နှစ်ခုကျော်ကြာတဲ့အချိန်ထိ အမွေရရှိရေး အကြိမ်ကြိမ်တရားစွဲဆိုခဲ့တာဖြစ်ပါတယ်။

ဒေါ်အောင်ဆန်းစုကြည် ဂုဏ်သိက္ခာကျဆင်းရေးကို စဉ်ဆက်မပြတ်ကြိုးစားဆောင်ရွက်နေတဲ့ စစ်တပ်အသိုင်းအဝိုင်းက ဒီအမှုကိုအထမြောက်အောင် ဝိုင်းဝန်းဆောင်ရွက်ပေးတာလို့လည်း အများစုက ယုံကြည်နေကြပါတယ်။

၂၀၁၆ ခုနှစ်မှာ ရန်ကုန်အနောက်ပိုင်းခရိုင်တရားရုံးက မောင်နှစ်မနှစ်ယောက်ကြား အမွေခွဲဖို့ ဆုံးဖြတ်ပေးလိုက်ပေမဲ့ ဒီဆုံးဖြတ်ချက်အပေါ် မတရားကြောင်းနဲ့ အိမ်ကိုရောင်းချပြီး ရတဲ့ငွေကိုခွဲယူရန် ဆုံးဖြတ်ချက်ချပေးဖို့ အောင်ဆန်းဦးက အကြိမ်ပေါင်းများစွာ အယူခံဝင်ခဲ့ပေမယ့် တရားရုံးက ပယ်ချခဲ့ပါတယ်။ ပြီးခဲ့တဲ့နှစ်က အယူခံဝင်ချိန်မှာတော့ တရားရုံးက လက်ခံခဲ့ပါတယ်။

ပြီးခဲ့တဲ့တနင်္လာနေ့က နောက်ဆုံးအကြိမ် ကြားနာမှုမှာ နှစ်ဘက်လုံးကရှေ့နေတွေက နောက်ဆုံးတင်ပြချက်တွေကို တင်ပြခဲ့ကြောင်း AP သတင်းဌာနကို ဦးအောင်ဆန်းဦးရဲ့ရှေ့နေက ပြောပေမဲ့ အသေးစိတ်ကိုတော့ မပြောပြခဲ့ဘူးလို့ဆိုပါတယ်။ “အထူးအယူခံဝင်တဲ့ အကြောင်းက အမွေကိုဘယ်လိုခွဲကြမလဲဆိုတဲ့ အကြောင်းပဲဖြစ်ပါတယ်” လို့ သူကပြောခဲ့တာဖြစ်ပါတယ်။

အသက် ၇၇ နှစ်ရှိပြီဖြစ်တဲ့ လူထုခေါင်းဆောင် ဒေါ်အောင်ဆန်းစုကြည်ကို  အာဏာသိမ်း စစ်တပ်က ဖမ်းဆီးထောင်ချထားပြီး နှစ်ပေါင်း ၁၀၀ ကျော် ထောင်ဒဏ်ချမှတ်နိုင်တဲ့ အမှုပေါင်းများစွာနဲ့ တရားစွဲဆိုခဲ့ပါတယ်။

ဒေါ်အောင်ဆန်းစုကြည် နိုင်ငံရေးဇာတ်ခုံကနေ အပြီးတိုင်ပျောက်သွားရေးနဲ့ သူတို့ရဲ့ အာဏာသိမ်းလုပ်ရပ်ကိုအကြောင်းပြနိုင်ဖို့ ရည်ရွယ်ပြီး အာဏာသိမ်းစစ်တပ်က အခုလိုအမှုတွေဆင်ကာ စွပ်စွဲတာဖြစ်တယ်လို့ မြန်မာပြည်သူတွေနဲ့ နိုင်ငံတကာက သဘောပေါက်ထားကြပါတယ်။

အင်းယားကန်စပ်က ကိုလိုနီခေတ်ပုံစံနှစ်ထပ်တိုက်ပါဝင်တဲ့ မြေ ၂ ဧကအကျယ်ရှိ မိသားစုပိုင်ခြံကို အမွေရလိုမှုနဲ့ ၂၀၀၀ ပြည့်နှစ်မှာ ဦးအောင်ဆန်းဦးက ပထမအကြိမ် တရားစွဲဆိုခဲ့တာဖြစ်ပါတယ်။ အဲဒီအိမ်ဟာ ၁၉၄၇ ဇူလိုင်လမှာ  ဗိုလ်ချုပ်အောင်ဆန်းလုပ်ကြံခံရပြီးနောက် ကျန်ရစ်သူဒေါ်ခင်ကြည်ကို အစိုးရက ပေးအပ်ခဲ့တာဖြစ်ပါတယ်။

ဒေါ်အောင်ဆန်းစုကြည်ဟာ ၁၉၉၀ ရွေးကောက်ပွဲမကျင်းပမီ ၁၉၈၉ ခုနှစ်ကန  ၂၀၁၀ ပြည့်နှစ်အတွင်း တက္ကသိုလ်ရိပ်သာလမ်း ခြံနံပါတ် ၅၄ မှာ နေအိမ်အကျယ်ချုပ် ၃ ကြိမ် စုစုပေါင်း ၁၅ နှစ်နီးပါးကြာအောင်နေခဲ့ရပါတယ်။

ထိန်းသိမ်းခံရစဉ်ကာလတစ်လျှောက် ဒေါ်အောင်ဆန်းစုကြည်ဟာ အကူအညီပေးတဲ့ မိတ်ဆွေတချို့နဲ့အတူ နေထိုင်ခဲ့ရတာဖြစ်ပြီး စားဖို့မလောက်တာကြောင့် ပရိဘောဂတချို့ကို ရောင်းချခဲ့ရတဲ့ အချိန်ရှိခဲ့ပါတယ်။

အဲဒီနောက် ဒေါ်အောင်ဆန်းစုကြည် နိုင်ငံရေးတရားဟောပြောခွင့် အနည်းငယ်ရခဲ့ပြီး အဲဒီအိမ်ဟာ တရားမဝင်ပါတီဌာနချုပ် ဒါမှမဟုတ် နိုင်ငံရေးစင်မြင့်လေးတခုဖြစ်ခဲ့ပြီး   အိမ်ရှေ့လမ်းပေါ်မှာ လာရောက်စုဝေးခဲ့ကြတဲ့ ထောက်ခံအားပေးသူတွေကို အဲဒီအိမ်ရဲ့ဝင်ပေါက်ကနေ စကားပြောခွင့်ရှိခဲ့ပါတယ်။

အဆိုပါအမှတ် ၅၄ နေအိမ်ဟာ အမေရိကန်သမ္မတ ဟောင်းဘာရက်အိုဘားမား၊ နိုင်ငံခြားရေးဝန်ကြီးဟောင်း ဟီလာရီကလင်တန်၊ ကုလသမဂ္ဂအတွင်းရေးမှူးချုပ်ဟောင်း ဘန်ကီမွန်း၊ ဟောလီးဝုဒ်သရုပ်ဆောင် မီရှဲလ်ယိုတို့လို ကမ္ဘာ့အထင်ကရပုဂ္ဂိုလ်တွေ လာရောက်လည်ပတ်ခဲ့ဖူးတဲ့ သမိုင်းဝင် နေအိမ်လည်းဖြစ်ပါတယ်။

6 hours Ago

စစ်ကောင်စီခန့် အုပ်ချုပ်ရေးမှူးများ နုတ်ထွက်ရန် ရေးဘီလူးအဖွဲ့ သတိပေး

မွန်ပြည်နယ်၊ ရေးမြို့နယ်က စစ်ကောင်စီ တင်မြှောက်ထားတဲ့ အုပ်ချုပ်ရေးမှူးတွေ ဇွန် ၂၉ ရက်ကစပြီး မိမိအသိစိတ်နဲ့ နုတ်ထွက်ကြဖို့ ရေးဘီလူးအဖွဲ့သားတွေက လူမှုကွန်ရက် စာမျက်နှာကတဆင့် သတိပေးလိုက်ပါတယ်။

ရေးဘီလူးအဖွဲ့မှ တာဝန်ရှိသူတဦးက “စစ်ကောင်စီက တိုက်ရိုက်ခန့်အပ်ထားတဲ့ အုပ်ချုပ်ရေးမှူးတွေဟာ စစ်ကောင်စီရဲ့ အလိုတော်ကျ လက်ပါးစေတွေ ဖြစ်ကြတယ်။ CDM သမားတွေရဲ့ မိသားစုဝင်တွေ၊ PDF တွေရဲ့ မိသားစု ဆွေမျိုးတွေနဲ့ နယ်မြေတွေရဲ့ သတင်းအချက်လက်တွေကို အမြဲစောင့်ကြည့်ပြီး သတင်းအချက်အလက်တွေ ရရှိအောင် သွယ်ဝိုက်သောနည်းလမ်းနဲ့ ကူညီပေးနေတဲ့အတွက် အန္တရာယ်ရှိလာလို့ အခုလို သတိပေးပြီး နုတ်ထွက်ခိုင်းရခြင်းဖြစ်တယ်” လို့ ပြောပါတယ်။

ရေးမြို့နယ်မှာ မြို့ပေါ်ရပ်ကွက် ၉ ရပ်ကွက်နဲ့ ကျေးရွာအုပ်စုပေါင်း ၄၄ အုပ်စုရှိပြီး အုပ်ချုပ်ရေးမှူးအများစုဟာ အန်အယ်လ်ဒီအစိုးရလက်ထက်ကတည်းကနေ ဒီနေ့အထိ ပါဝင်နေကြပြီး တချို့တွေလည်း အလုပ်တာဝန်ကနေ ရပ်နားထားကြပါတယ်။

နုတ်မထွက်တဲ့ အုပ်ချုပ်ရေးမှူးတွေအတွက် ရေးဘီလူးအဖွဲ့အနေနဲ့ နောင်ဖြစ်လာမယ့် အကျိုးသက်ရောက်မှုတွေကို တာဝန်ယူသွားမှာ မဟုတ်သလို အရပ်သားအုပ်ချုပ်ရေးမှူးတွေကို ပစ်မှတ်ထားပြီး ရှင်းလင်းသွားမယ်လို့ ဆိုပါတယ်။

ရေးဘီလူးအဖွဲ့သားတွေဟာ ဇွန် ၂၇ ရက်က အစင်ကျေးရွာအဝင် တံတားလုံခြုံရေးယူနေတဲ့ ပြည်သူ့စစ်အဖွဲ့ဝင် ၅ ဦးကို ပစ်ခတ်ရှင်းလင်းခဲ့ပြီး ဒီနေ့အထိ စစ်တပ်၊ ရဲ၊ သတင်းပေးတွေ တဒါဇင်ကျော်လောက်ကို ရှင်းလင်းထားခဲ့ပါတယ်။

စစ်ကောင်စီဘက်ကတော့ ရေးဘီလူးအဖွဲ့သားတွေဟာ အကြမ်းဖက်လုပ်ရပ် လုပ်ကိုင်သူတွေဖြစ်တယ်လို့ စွပ်စွဲထားပြီး ရေးဘီလူးအဖွဲ့ရဲ့ လှုပ်ရှားနေတာနဲ့ ပတ်သက်လို့ သတင်းပေးနိုင်တဲ့သူတွေကို ဆုကြေးပေးမယ်လို့ သတင်းထုတ်ပြန်ထားပါတယ်။

7 hours Ago

ပင်းတယမြို့ဝင်ရဲကင်း ပစ်ခတ်ခံရ

ရှမ်းပြည်နယ်တောင်ပိုင်း၊ ပင်းတယမြို့နယ် မြေက်ဘက်အထွက်ရှိ မြောက်ကျောင်းကြီးရဲကင်း ဇွန် ၂၉ ရက် မနက် ၁၀ နာရီဝန်းကျင်လောက်က ပစ်ခတ်တိုက်ခိုက်ခံရပြီး စစ်ကောင်စီတပ်ဖွဲ့ဝင် ၁ ဦး သေဆုံးကာ ၁ ဦး ဒဏ်ရာရရှိသွားတယ်လို့ ဒေသခံတွေက ပြောပါတယ်။

ပင်းတယမြို့ခံတဦးက “ဘယ်အဖွဲ့ကဝင်ပစ်လဲ ဆိုတာတော့ မသိရသေးပါဘူး။ စစ်ကောင်စီတပ်ဖွဲ့ဝင် ၁ ဦးသေတယ်။ ဒဏ်ရာရသွားတဲ့ ၁ ဦးကို ကားနဲ့တင်သွားတယ်။ မနက် ၉ နာရီခွဲဝန်းကျင်အချိန်ကလည်း လမ်းသွားလမ်းလာပြည်သူ ၁ ဦးကို အဲဒီရဲကင်းက သေနတ်နဲ့ပစ်လို့ ဒဏ်ရာရသွားသေးတယ်” လို့ ဒီဗွီဘီကို ပြောပါတယ်။

အဆိုပါရဲကင်းမှာ စစ်ကောင်စီတပ်သား ၁၀ ဦးဝန်းကျင်ရှိပြီး ဂိတ်မှာထိုင်တဲ့လူ ၃ ဦးနဲ့ ၅ ဦးကြားမှာ ရှိတယ်လို့ သိရပါတယ်။

တိုက်ခိုက်ခံရပြီးနောက် စစ်ကောင်စီတပ်ဖွဲ့ဝင်တွေရဲ့ ရမ်းသန်းပစ်ခတ်မှုကြောင့် လမ်းသွားလမ်းလာ အနည်းဆုံး ၃ ဦးလောက် ဒဏ်ရာရရှိခဲ့တယ်လို့ သိရပါတယ်။

လက်ရှိအချိန်မှာ မြို့အဝင်အထွက် ဂိတ်အားလုံးကို ပိတ်ဆို့စစ်ဆေးနေတာကြောင့် ဒေသခံ လမ်းသွားလမ်းလာတွေ အခက်တွေ့နေတယ်လို့ သိရပါတယ်။

8 hours Ago

မြန်မာနိုင်ငံဆိုင်ရာ အာဆီယံအထူးကိုယ်စားလှယ် ပရတ်ဆာခွန်း မြန်မာနိုင်ငံသို့ ဒုတိယအကြိမ် သွားရောက်

အာဆီယံဥက္ကဋ္ဌရဲ့ မြန်မာနိုင်ငံဆိုင်ရာ အထူးကိုယ်စားလှယ် ကမ္ဘောဒီးယား ဒုနိုင်ငံခြားရေးဝန်ကြီး ပရတ်ဆာခွန်း  ဦးဆောင်တဲ့ အဖွဲ့ဟာ ဇူလိုင် ၂၉ ရက် ဒီကနေ့ မြန်မာနိုင်ငံကို ခရီးစတင်ထွက်ခွာသွားပါတယ်။

ပရတ်ဆာခွန်း ဦးဆောင်တဲ့ အာဆီယံသံတမန်များအဖွဲ့ဟာ မြန်မာနိုင်ငံမှာ ကာလရှည်ကြာဖြစ်ပေါ်နေတဲ့ ပဋိပက္ခတွေအပေါ် ငြိမ်းချမ်းစွာအဖြေရှာနိုင်ရေးအတွက် ဇွန်လ ၂၉ ရက်နေ့ကနေ ဇူလိုင်လ ၃ ရက်နေ့အထိ ၅ ရက်ကြာလာရောက်တာဖြစ်ပြီး ဒါဟာ သူ့ရဲ့ ဒုတိယ အကြိမ်မြောက် မြန်မာပြည်ခရီးစဉ်လည်းဖြစ်ပါတယ်။

၂၈ ရက်နေ့မှာထုတ်ပြန်ခဲ့တဲ့ ကမ္ဘောဒီးယားနိုင်ငံခြားရေးဝန်ကြီးဌာနရဲ့ ထုတ်ပြန်ချက်အရ အထူးကိုယ်စားလှယ်ဆာခွန်းနဲ့အတူ လာအိုနိုင်ငံရဲ့ အာဆီယံဆိုင်ရာ အမြဲတန်းကိုယ်စားလှယ်ဖြစ်သူ အာဆီယံလူမှုရေးနဲ့ ယဉ်ကျေးမှုအဖွဲ့အစည်းရဲ့ ဒုတိယအထွေထွေအတွင်းရေးမှူး Ekkaphab Phanthavong ၊ အာဆီယံအတွင်းရေးမှူးချုပ်ရုံးမှ ဝန်ထမ်းတွေနဲ့ ကမ္ဘောဒီးယား  အဆင့်မြင့် အစိုးရအရာရှိတွေ လိုက်ပါလာတယ်လို့ သိရပါတယ်။

မြန်မာနိုင်ငံဆိုင်ရာ အာဆီယံအထူးကိုယ်စားလှယ်ရဲ့ ဒုတိယအကြိမ်မြောက် ဒီခရီးစဉ်ဟာ အချက် ၅ ချက်ပါ အာဆီယံသဘောတူညီချက်နဲ့ ပတ်သက်ပြီး မြန်မာနိုင်ငံမှာ ပြောင်းလဲတိုးတက်မှုတွေ ဖော်ဆောင်ဖို့ဖြစ်သလို ၂၀၂၂ ခုနှစ် မေလ ၆ ရက်နေ့က ဖနွမ်ပင်မှာကျင်းပခဲ့တဲ့ မြန်မာနိုင်ငံကို အာဆီယံရဲ့ လူသားချင်းစာနာမှုအကူအညီပေးရေး အစည်းအဝေးရဲ့ ရလဒ်လည်းဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

ပြီးခဲ့တဲ့ မတ်လထဲမှာ ပထမအကြိမ်အဖြစ် လာရောက်ခဲ့စဉ်က နိုဘယ်ဆုရှင် ဒေါ်အောင်ဆန်းစုကြည်နဲ့ နောက်အခေါက်တွေမှာတွေ့ခွင့်ပေးမယ့် အလားအလာရှိတဲ့သဘောမျိုး အာဏာသိမ်းစစ်ကောင်စီခေါင်းဆောင်မင်းအောင်လှိုင်က ပြောခဲ့ပေမယ့် မြန်မာနိုင်ငံရဲ့ လက်ရှိ အခြေအနေတွေအရ ဆာခွန်းဟာ ဒေါ်အောင်ဆန်းစုကြည်နဲ့ တွေ့ခွင့်ရဖို့တော့ မသေချာဘူးလို့ ဆိုပါတယ်။

ဆာခွန်းလာရောက်တာဟာ အာဆီယံဥက္ကဋ္ဌနဲ့ အဖွဲ့ဝင်နိုင်ငံတွေက မြန်မာနိုင်ငံ ဒီမိုကရေစီလမ်းကြောင်းပေါ်ပြန်ရောက်ရေးနဲ့ ပုံမှန်အတိုင်းပြန်လည်တည်ငြိမ်ရေးအပေါ်မှာ သံန္နိဋ္ဌာန်ချဆောင်ရွက်ပေးနေတယ်ဆိုတာကို ပေါ်လွင်စေတယ်လို့ ကမ္ဘောဒီးယားနိုင်ငံ ရွိုင်ရယ်အကယ်ဒမီတက္ကသိုလ်က နိုင်ငံရေးသိပ္ပံ ပါမောက္ခတစ်ဦးဖြစ်တဲ့ ယန်းပီအွတ် က ကမ္ဘောဒီးယားသတင်းစာကို ပြောပါတယ်။

“ကမ္ဘောဒီးယာမှာ ဆယ်စုနှစ်ပေါင်းများစွာ စစ်ဖြစ်ခဲ့ပြီးနောက် ၁၉၉၈ နှောင်းပိုင်းကနေစပြီး တည်ငြိမ်တဲ့ ငြိမ်းချမ်းရေးရလာခဲ့တယ်။ နိုင်ငံအတွင်းမှာ အန္တရာယ်နဲ့ ဘေးဒုက္ခတွေရောက်စေတာကလွဲရင် စစ်ပွဲတွေကြောင့် ဘာမှကောင်းကျိုးမရှိဘူး။” 

ပရတ်ဆာခွန်းရဲ့ အခုတကြိမ်မြန်မာပြည်ခရီးစဉ်ဟာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ထိန်းသိမ်းထားရာနေအိမ်ကနေ နေပြည်တော်အချုပ်ထောင်ကို ပြောင်းရွှေ့အကျဉ်းချထားချိန်နဲ့လည်း တိုက်ဆိုင်နေပါတယ်။

ဒေါ်အောင်ဆန်းစုကြည်ကို နေပြည်တော်ထောင်မှာ အကျဉ်းချလိုက်တာနဲ့ပတ်သက်လို့  ဝန်ကြီး  ပရတ်ဆာခွန်းက ဇွန် ၂၇ ရက်မှာ  စစ်ကောင်စီထံ စာပေးပို့ပြီး ဒေါ်အောင်ဆန်းစုကြည်ကို အရင်ထိန်းသိမ်းထားရာ နေအိမ်သို့ ပြန်လည်ပို့ဆောင်ပေးဖို့ ပန်ကြားထားပါတယ်။

Photo Credit-MFAIC

8 hours Ago

ဆိပ်ဖြူ သစ်တောဝန်ထမ်း ၂ ဦး CDM ပြုလုပ်ပြီး တော်လှန်ရေးတပ်ဖွဲ့နှင့် ပူးပေါင်း

မကွေးတိုင်း၊ ဆိပ်ဖြူမြို့နယ်မှာ သစ်တောဌာနက ဝန်ထမ်း ၂ ယောက် CDM ပြုလုပ်ပြီး တော်လှန်ရေးတပ်ဖွဲ့နဲ့ ပူးပေါင်းခဲ့တယ်လို့ ဆိပ်ဖြူဘာမထီ ပြည်သူ့ကာကွယ်ရေးတပ်ဖွဲ့က ပြောပါတယ်။

ဆိပ်ဖြူမြို့နယ် သစ်တောဦးစီးဌာနက တောကြပ်တွေဖြစ်တဲ့ ဦးသိန်းထွန်းနဲ့ ဦးသိန်းအေးကျော်တို့ ၂ ယောက် ​CDM ပြုလုပ်ပြီး ပြည်သူ့ရင်ခွင်ခိုလှုံကာ ဆိပ်ဖြူဘာမထီ PDF နဲ့ ပူးပေါင်းခဲ့တယ်လို့ ဆိုပါတယ်။

ဦးသိန်းထွန်းက “ကျနော်တို့က ဒီလုပ်ငန်းထဲမှာ ဆက်ပြီး ရပ်တည်နေမယ်ဆိုရင် စစ်ကောင်စီကို အားပေးအားထား မြှောက်ပင့်ပေးသလို ဖြစ်မှာမို့လို့ ဒါတွေကို စွန့်လွှတ်ခဲ့တာ။ အခုလိုရာထူးမျိုးနဲ့ CDM ဝင်လိုက်ရင် နောင်တချိန်မှာ ဒီထက်ရာထူးကြီးတာတွေ ရမယ်ဆိုတဲ့ မျှော်လင့်ချက်မျိုး လုံးဝမပါဘဲ ပြည်သူ့လစာကိုစားပြီး ပြည်သူ့အတွက် ပေးဆပ်ချင်လို့ CDM လုပ်ခဲ့တာ” လို့ ဆိုပါတယ်။

ကမ္ဘာ့နိုင်ငံအသီးသီးမှာ စစ်တပ်ဆိုတာရှိပြီး ကိုယ့်တိုင်းပြည် ကိုယ့်လူမျိုးကို ကာကွယ်စောင့်ရှောက်ရမှာ ဖြစ်ပေမဲ့ စစ်ကောင်စီတပ်က လက်နက်အားကိုးနဲ့ ပြည်သူကို အနိုင်ကျင့်ကာ သူတို့ကိုယ်တိုင် သူပုန်ဖြစ်နေတာလို့ ဦးသိန်းထွန်းက ပြောပါတယ်။

“ကျနော်တို့ဌာနတွေမှာလည်း ဝန်ကြီးဌာနရဲ့ ဆုံးဖြတ်ချက်နဲ့ မလုပ်ရဘဲ သူတို့ဆုံးဖြတ်ချက်တွေနဲ့ပဲ လုပ်နေရတယ်။ ဝန်ထမ်းတွေကို သူတို့က သူခိုးဖြစ်အောင် ဖန်တီးထားပြီး ဝန်ထမ်းတိုင်းက သူခိုးတွေပဲလို့ ဘယ်ဝန်ထမ်းကိုမဆို ကျနော်ပြောရဲတယ်။”

စစ်ကောင်စီက သစ်တောဝန်ထမ်းတွေကို အဆင့်လိုက် နေပြည်တော်မှာ စစ်သင်တန်းပို့ချနေပြီး သူတို့ထဲကိုရောက်အောင် ဖိအားပေးတာကြောင့် အဲဒီစစ်သင်တန်းကို မတက်ရောက်ခဲ့ဘဲ CDM ပြုလုပ်ပြီး ဆိပ်ဖြူဘာမထီ PDF နဲ့ လာရောက်ပူးပေါင်းတာလို့ ဆိုပါတယ်။

ဆိပ်ဖြူဘာမထီ PDF ရဲ့ တပ်ခွဲမှူး ကိုပိုင်က “သူတို့ ၂ ယောက်က စစ်အာဏာရှင်ကို မကြိုက်လို့ CDM လုပ်ဖို့ တခြားအဖွဲ့တွေနဲ့ ချိတ်ဆက်ပေမဲ့ ယုံကြည်မှုအားနည်းပြီး လက်မခံကြလို့ မေလ ၂ ရက်နေ့မှာ ကျနော်တို့ဆီ ရောက်လာကြတာ။ ကျနော်တို့‌တော့ ဘယ် CDM သမားကိုမဆို ကြိုဆိုပါတယ်” လို့ ပြောပါတယ်။

လက်ရှိမှာတော့ သူတို့နှစ်ယောက်ကို NUG ရဲ့ အစီအမံနဲ့ ဖွင့်လှစ်ထားတဲ့ စာသင်ကျောင်းတွေမှာ ကျောင်းဆရာအဖြစ် တာဝန်ပေးထားပြီး လက်နက်တပ်ဆင်ပေးထားတာတော့ မရှိသေးဘူးလို့ ဆိုပါတယ်။

“ဒါပေမဲ့ အရေးကြုံရင်တော့ သူတို့လည်း လက်နက်ကိုင်ရမှာပါ။ CDM ဆရာ/ဆရာမတွေ သိပ်မရှိလို့ ဆယ်တန်းအောင်၊ ဘွဲ့ရ လူငယ်တွေနဲ့သာ သင်ကြားနေရလို့ သူတို့ ၂ ယောက်ကလည်း ဘွဲ့ရပြီးသားဆိုတော့ ကလေးတွေ ပညာရေးအတွက် အများကြီး အကျိုးရှိတယ်” လို့ ကိုပိုင်က ပြောပါတယ်။

ဆိပ်ဖြူမြို့နယ်ထဲမှာတော့ PDF ထိန်းချုပ်တဲ့နယ်မြေ နည်းပါးလို့ NUG ရဲ့ ပြည်သူ့ပညာရေးအစီအစဥ်နဲ့ ဖွင့်လှစ်တဲ့ စာသင်ကျောင်းတကျောင်းသာရှိပြီး ကျောင်းသား၊ ကျောင်းသူ ၆၀ ကျော်လောက်ကို ဆရာ/ဆရာမ ၆ ယောက်နဲ့ အလယ်တန်းအဆင့်ထိ ပညာသင်ကြားပေးနေတယ်လို့ သိရပါတယ်။

8 hours Ago

တရက်တည်း စစ်ကောင်စီအကြမ်းဖက်တပ်ဖွဲ့ဝင် အယောက် ၆၀ ကျော်သေဆုံးဟု NUG ထုတ်ပြန်

ဇွန် ၂၈ ရက် မနေ့ကတရက်တည်း ဖြစ်ပွားခဲ့တဲ့ တိုက်ပွဲတွေမှာ စစ်ကောင်စီ အကြမ်းဖက်တပ်ဖွဲ့ဝင် အယောက် ၆၀ ကျော် သေဆုံးခဲ့တယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ပါတယ်။

ခုထုတ်ပြန်ထားတဲ့ အချက်အလက်ဟာ မြေပြင်အခြေအနေမှာ ပိုများနိုင်ပြီး တရက်တည်း ထိခိုက်ဒဏ်ရာရရှိတဲ့သူ အရေအတွက်ကတော့ ၁၉ ယောက် ရှိခဲ့တယ်လို့ ဆိုပါတယ်။

NUG ကာကွယ်ရေးဝန်ကြီးဌာနကတော့ မြန်မာနိုင်ငံတဝန်း ပြည်သူ့ခုခံတော်လှန်စစ် အရှိန်မြှင့်နေပြီး ပြီးခဲ့တဲ့ မေ ၇ ရက်ကနေ ဇွန် ၆ ရက်အထိ ၁ လတာကာလအတွင်း စစ်ကောင်စီဘက်က အယောက် ၂,၀၀၀ ကျော် သေဆုံးခဲ့တယ်လို့ ထုတ်ပြန်ထားပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာ ဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။

လူထုသပိတ်တိုက်ပွဲတွေအနေနဲ့ မနေ့က တရက်တည်းမှာ ကချင်ပြည်နယ်၊ မကွေးတိုင်းနဲ့ မန္တလေးတိုင်းတို့မှာ ၁ ကြိမ်စီ၊ စစ်ကိုင်းတိုင်းမှာ ၄ ကြိမ်နဲ့ အများဆုံး ဖြစ်ပွားခဲ့တယ်လို့ ထုတ်ပြန်ချက်ထဲမှာ ဖော်ပြပါတယ်။

ဒါ့အပြင် ပြည်သူ့ခုခံတွန်းလှန်စစ် ၁ နှစ်တာ ကာလအတွင်း စစ်ကောင်စီတပ်သား ၁၅,၀၀၀ နီးပါး သေဆုံးခဲ့ပြီး ထိခိုက်ဒဏ်ရာရသူ အယောက် ၄,၈၀၀ ကျော်ထိ ရှိခဲ့တယ်လို့ NUG အစိုးရ ကာကွယ်ရေးဝန်ကြီးဌာနက ထုတ်ပြန်ပါတယ်။

ဒါဟာ ပြီးခဲ့တဲ့ ၂၀၂၁ ခုနှစ်၊ ဇွန် ၁ ရက်ကနေ အခုနှစ် မေ ၁၇ ရက်အထိ စုဆောင်းရရှိထားတဲ့ အချက်အလက်တွေအရ ဖော်ပြထားခဲ့တာဖြစ်ပြီး မြန်မာပြည်အနှံ့ တိုက်ပွဲတွေမှာ တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ စစ်ကောင်စီဘက်ကတော့ သတင်းထုတ်ပြန်တာ မရှိပါဘူး။

ဒါ့အပြင် စစ်ကောင်စီရဲ့ အဆိုးဆုံး အကြမ်းဖက်တာခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည်အထက်ပိုင်းလမ်းပိုင်းတွေရဲ့ ၉၀ ရာခိုင်နှုန်းကို PDF တွေက ထိန်းချုပ်ထားနိုင်ပြီလို့ NUG အစိုးရက ဇွန် ၂၁ ရက်နေ့ သတင်းစာရှင်းလင်းပွဲမှာ ပြောထားပြီး လက်ရှိ မြေပြင်မှာ အကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။

9 hours Ago

ပုဂံတွင် စစ်ကောင်စီက အင်အား ၁,၀၀၀ ကျော်အသုံးပြု လုံခြုံရေးတင်းကျပ်ချထား

ရှေးဟောင်းယဉ်ကျေးမှုမြို့တော် ပုဂံမှာ အခု ဇွန်လ တတိယပတ်က စတင်ကာ စစ်ကောင်စီက လက်နက်ကိုင် လုံခြုံရေးအင်အား ၁,၀၀၀ ကျော်လောက် ချထားတာ တွေ့ရတယ်လို့ ဒေသခံတွေက ပြောပါတယ်။

လန်ချန်း-မဲခေါင်ဒေသ ပူးပေါင်းဆောင်ရွက်ရေး နိုင်ငံခြားရေးဝန်ကြီးများ အစည်းအဝေးကို ပုဂံမှာ ကျင်းပဖို့ရှိနေသလို အာဏာသိမ်းစစ်ခေါင်းဆောင်ဟာလည်း ပုဂံမြို့ကို ဇူလိုင် ပထမပတ်ထဲမှာ သွားရောက်ဖို့ ရှိနေတယ်လို့ သတင်းထွက်ပေါ်နေတာပါ။

လုံခြုံရေးအင်အားချထားတာ များပြားတာကြောင့် မြို့ခံတွေ အပြင်မထွက်ရဲသလောက် ဖြစ်နေပြီး ဖမ်းဆီးခံရမှာလည်း စိုးရိမ်ပူပန်နေရတယ်လို့ ဒေသခံတွေက ပြောပါတယ်။

“ရဲအင်အားက ၈၀၀ ကျော်လောက်ရှိမယ်။ စစ်သားကတော့ တပ်ရင်း ၈၈ ဘတ်တံဆိပ်နဲ့ ဝတ်စုံတွေနဲ့တွေ့တယ်။ အားလုံးဆို ၁,၀၀၀ ကျော်လောက်ရှိမယ်” လို့ ဒေသခံတဦးက ပြောပါတယ်။

လုံခြုံရေးတွေကို မြို့နေ့ရာအနှံ့ ချထားသလို နန်းတော်ထဲမှာလည်း အင်အားအများအပြား ချထားကာ မြစ်ထဲမှာလည်း အင်အား ၂၀၀ ကျော် အသုံးပြုပြီး လုံခြုံရေးချထားတာရှိတယ်လို့ ဆိုပါတယ်။

ပုဂံမြို့မှာ အရင်က မဲခေါင်အစည်းဝေးကို နန်းတွင်းဟောထဲမှာ ကျင်းပလေ့ရှိပြီး ဒီနှစ်မှာတော့ Aureum palace ဟိုတယ်မှာ အတွင်းစည်းရော အပြင်စည်းရော လုံခြုံရေးအင်အား ချထားတာတွေ့တယ်လို့ ဒေသခံတွေက ပြောပါတယ်။

ပုဂံမြို့ဟောင်းဘက်က နှစ်လမ်းသွားလမ်းရဲ့ လမ်းဘေး ပလက်ဖောင်းတွေမှာ စည်ပင်က ထုံးသုတ်ပြီး သစ်ပင်တွေနဲ့ ခြံစည်းရိုးတွေကိုတော့ ပြည်သူတွေကို ထုံးသုတ်ခိုင်းနေတယ်လို့ ဒေသခံတဦးက ပြောပါတယ်။

လန်ချန်း-မဲခေါင် အစည်းအဝေးကို ဇူလိုင် ၂ ရက်မှ ၅ ရက်အထိ ပြုလုပ်ဖို့ စီစဉ်ထားပြီး အစည်းအဝေးကို တရုတ်၊ ထိုင်း၊ လာအို၊ ကမ္ဘောဒီးယား၊ ဗီယက်နမ်နဲ့ မြန်မာ စတဲ့ ၅ နိုင်ငံက နိုင်ငံခြားရေးဝန်ကြီးတွေ တက်ရောက်လေ့ရှိတယ်လို့ သိရပါတယ်။

တရုတ်နိုင်ငံခြားရေးဝန်ကြီး ဝမ်ယိဟာလည်း အစည်းအဝေးတက်ဖို့ အခုသီတင်းပတ်အကုန်မှာ မြန်မာနိုင်ငံကို လာရောက်ဖို့ရှိနေတယ်လို့ စစ်ကောင်စီ ပြောခွင့်ရသူကို ကိုးကားပြီး အေအက်ဖ်ပီသတင်းမှာ ဖော်ပြပါတယ်။

9 hours Ago

ရဝမ်လူငယ်များအသင်းဥက္ကဋ္ဌ ဦးဖုန်ရော့ဖီနန်ကို စစ်ကောင်စီက ထောင်ဒဏ် ၁၀ နှစ်ချ

ကချင်ပြည်နယ်၊ ပူတာအို နမ်ဟော့အကျဉ်းထောင်မှာ ထိန်းသိမ်းခံနေရတဲ့ ရဝမ်လူငယ်များအသင်းဥက္ကဋ္ဌ ဦးဖုန်ရော့ဖီနန်ကို စစ်ကောင်စီက ဇွန် ၂၈ ရက်မှာ ထောင်ဒဏ် ၁၀ နှစ် ချမှတ်လိုက်တယ်လို့ မိသားစုနဲ့နီးစပ်သူက ပြောပါတယ်။

"မနေ့က ညနေပိုင်းမှာပဲ အမိန့်ချလိုက်တာပါ။ နေ့လယ်က ရဲတွေ မအားလို့ဆိုပြီး ညနေမိုးချုပ်ခါနီးမှာပဲ အမိန့်ချလိုက်တယ်။ ထောင် ၁၀ နှစ်တဲ့။ ဥပဒေအရာရှိပြောတာက ဦးဖီနန်ဟာ PDF နဲ့ CDM သမားတွေကို ကူညီလို့ ထောင်ချတယ်။ တကယ်တော့ အဲ့ဒီအပြစ်က ထောင်ဒဏ်ပိုများနိုင်တယ်။ ဦးဖီနန်မို့လို့ လျှော့ချလိုက်တာတဲ့။”

ဦးဖီနန်ရဲ့ မိတ်ဆွေတဦးက "ဆရာဖီနန်က ပူတာအိုဒေသအတွက် ကဏ္ဍစုံကြိုးစားသူ၊ ရ၀မ်လူငယ်တွေအတွက် သာမက ပူတာအိုလူငယ်ထု‌အတွက် အလုပ်အကိုင် အခွင့်အလမ်းတွေ ဖန်တီးနိုင်သူဖြစ်တယ်။ ပြီးတော့ ခေါင်လန်ဖူးမှာ သတ္တုတူးဖော်ရေးကိစ္စနဲ့ပတ်သက်ပြီး ဒေသခံပြည်သူတွေရဲ့အသံကို ခရိုင်အဆင့်၊ ပြည်နယ်အဆင့်နဲ့ ပြည်ထောင်စုအဆင့်ထိ တင်ပြတောင်းဆိုခဲ့သူဖြစ်ပါတယ်။ ပူတာအိုဒေသခံလူကြီးတချို့က အဲ့ဒီသတ္တုလုပ်ကွက်ကြောင့် နှစ်နာသွားတဲ့သူတွေ ရှိတယ်လေ။ ဆရာဖီနန်ကို ထောင်ချတဲ့ကိစ္စမှာ သူတို့ရဲ့ ပယောဂလည်း ပါနိုင်တယ်" လို့ ပြောပါတယ်။

ဦး‌ဖီနန်ဟာ ရ၀မ်လူငယ်များအသင်းအပြင် မြောက်ပိုင်းရောင်စဉ် လူငယ်များအသင်း (NSYA) နဲ့ တခြားပူတာအိုအခြေစိုက် လူမှုအဖွဲ့အစည်းရဲ့ တာ၀န်ခံအဖြစ် ဦးဆောင်သူဖြစ်ပြီး ကိုဗစ်-၁၉ ရောဂါ ကာကွယ်ရေးအတွက်လည်း ပူတာအိုခရိုင်နယ်စုံ ကိုယ်တိုင်သွားရောက်ကာ ဒေသခံပြည်သူတွေကို အသိပညာပေးဖို့ အမြဲကြိုးစားသူဖြစ်တယ်လို့ NSYA ရဲ့ အတွင်းရေးမှူးက ပြောပါတယ်။

"ဦးဖီနန်က ပူတာအိုဒေသဖွံ့ဖြိုးတိုးတက်ရေးအတွက် အမြဲကြိုးစားသူပါ။ တကယ့်တန်ဖိုးရှိတဲ့ လုပ်ဖော်ကိုင်ဖက်တဦးဖြစ်တယ်။ ငါတို့ရုံးမှာ သတ္တုတူးဖော်မယ့် ကုမ္ပဏီတာ၀န်ရှိသူတွေနဲ့ တွေ့ဆုံတုန်းက သူ့စိတ်ဓာတ်၊ ခံယူချက်တွေက လေးစားအတုယူစရာဖြစ်ခဲ့တယ်။ သူပြောလိုက်တာ ခေါင်လန်ဖူးဒေသခံတွေက သတ္တုတူးဖော်မယ့် ကိစ္စကို လုံး၀သဘောမတူတဲ့အကြောင်း သူကိုယ်တိုင် Survey ကောက်ထားတဲ့ ဒေသခံပြည်သူတွေရဲ့အသံကို နိုင်ငံတော်အတိုင်ပင်ခံရယ် ၊ မင်းအောင်လှိုင်နဲ့ သမ္မတရုံးထိ ကိုယ်တိုင်တင်ပြပြီးပြီလို့ ပြောခဲ့တာ မှတ်မိသေးတယ်။”

ဦးဖီနန်ဟာ စစ်ကောင်စီအာဏာသိမ်းမှုကို ကန့်ကွက်ဆန္ဒထုတ်ဖော်လို့ ပထမဆုံး ပူတာအိုလူငယ် ၅ ယောက်  ဖမ်းဆီးခံရချိန် ၂၀၂၁ ခုနှစ် ဖေဖော်ဝါရီတုန်းက တကြိမ်နဲ့  ၂၀၂၂ ခုနှစ် ဖေဖော်ဝါရီ ၈ ရက်ညက ဒုတိယအကြိမ် ဖမ်းဆီးခံရပြီး ထောင်ဒဏ် ၁၀ နှစ်ချမှတ်ခံရတာ ဖြစ်ပါတယ်။

ပူတာအိုထောင်မှာ နိုင်ငံရေးအမှုနဲ့ ဖမ်းဆီးခံရသူ ၉ ယောက်ရှိပြီး ဦးဖီနန်က ထောင်ဒဏ်အမြင့်ဆုံး ၁၀ နှစ်ချမှတ်ခံရတာပါ။

11 hours Ago

ဖားကန့် ပြည်သူ့လွှတ်တော်ကိုယ်စားလှယ်၏နေအိမ်ကို စစ်ကောင်စီက ချိပ်ပိတ်

ကချင်ပြည်နယ်၊ ဖားကန့်မြို့၊ ရှရော်ခကျေးရွာရှိ ဖားကန့် ပြည်သူ့လွှတ်တော်ကိုယ်စားလှယ် ဦးအောင်ဟိန်းမင်းရဲ့ နေအိမ်ကို ဇွန် ၂၉ ရက် ဒီမနက် ၆ နာရီက စစ်ကောင်စီတပ်က ချိပ်ပိတ်လိုက်တယ်လို့ ဒေသခံတွေက ပြောပါတယ်။

စစ်ကောင်စီတပ်ဖွဲ့ဝင် အယောက် ၅၀ လောက် အရပ်ဝတ်တွေနဲ့ လာရောက်ပြီး နေအိမ်ကို သော့ခတ်ချိပ်ပိတ်သွားခဲ့တယ်လို့ ဆိုပါတယ်။

“အိမ်မှာတော့ ဘယ်သူမှမရှိဘူး။ မနက် ၆ နာရီလောက်က အရပ်ဝတ်တွေနဲ့ပဲ အယောက် ၅၀ လောက်လာပြီး အိမ်ကို သော့ခတ်သွားတာ။ တခြား ပစ္စည်းတွေ သယ်သွားတာတွေတော့ မတွေ့ဘူး။”

ဦးအောင်ဟိန်းမင်းဟာ ၂၀၂၀ ရွေးကောက်ပွဲမှာ အန်အယ်လ်ဒီပါတီကနေ ဝင်ရောက်ယှဉ်ပြိုင်ခဲ့ပြီး ပြည်သူ့လွှတ်တော်ကိုယ်စားလှယ်နေရာ ရရှိထားတာပါ။

လတ်တလော ကချင်ပြည်နယ်အတွင်း မေလပိုင်းကစတင်ပြီး အန်အယ်လ်ဒီပါတီဝင်တွေရဲ့ နေအိမ်တွေ ချိပ်ပိတ်ခံရမှု ပိုများလာပါတယ်။

12 hours Ago

တရုတ်နိုင်ငံခြားရေးဝန်ကြီး မြန်မာသို့ လာရောက်မည်

တရုတ်နိုင်ငံခြားရေးဝန်ကြီး ဝမ်ယိဟာ အခုသီတင်းပတ်အကုန်မှာ မြန်မာနိုင်ငံကို လာရောက်ဖို့ရှိနေပြီး ဒါဟာ စစ်အာဏာသိမ်းပြီးနောက်ပိုင်း တရုတ်နိုင်ငံက အဆင့်အမြင့်ဆုံး ပုဂ္ဂိုလ်တယောက် လာရောက်မှုဖြစ်မယ်လို့ အေအက်ဖ်ပီသတင်းမှာ ဖော်ပြပါတယ်။

လန်ချန်း-မဲခေါင် ပူးပေါင်းဆောင်ရွက်ရေး နိုင်ငံခြားရေး ဝန်ကြီးများ အစည်းအဝေး တက်ရောက်ဖို့ ဝမ်ယိဟာ မြန်မာနိုင်ငံကို လာရောက်မှာဖြစ်တယ်လို့ အာဏာသိမ်းစစ်ကောင်စီရဲ့ ပြောခွင့်ရပုဂ္ဂိုလ် ဗိုလ်ချုပ် ဇော်မင်းထွန်းရဲ့ ပြောဆိုချက်ကို ကိုးကားပြီး ခုလိုရေးသားထားတာပါ။

ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီလက အာဏာသိမ်းယူခဲ့တဲ့ စစ်တပ်ကို ဝေဖန်ပြစ်တင်တာမျိုးမရှိတဲ့ တရုတ်နိုင်ငံဟာ မြန်မာစစ်တပ်ကို စစ်လက်နက်ပစ္စည်းတွေ အဓိက ထောက်ပံ့ပေးနေတဲ့ မဟာမိတ်နိုင်ငံလည်း ဖြစ်ပါတယ်။

လက်ရှိမှာတော့ တရုတ်နိုင်ငံခြားရေးဝန်ကြီးရဲ့ ဒီခရီးစဉ်အတွင်း အာဏာသိမ်း စစ်ခေါင်းဆောင် မင်းအောင်လှိုင်နဲ့ တွေ့ဆုံမယ်အစီအစဉ် ရှိမရှိကိုတော့ မပြောနိုင်သေးဘူးလို့ ဗိုလ်ချုပ် ဇော်မင်းထွန်းက အေအက်ဖ်ပီကို ပြောထားပါတယ်။

တရုတ်နိုင်ငံက ကျောထောက်နောက်ခံပြုထားတဲ့ ဒီအစည်းအဝေးပွဲကိုတော့ လာမယ့် ဇူလိုင် ၂ ရက်ကနေ ၅ ရက်အထိ ကျင်းပမှာဖြစ်ကာ လန်ချန်းလို့ တရုတ်နိုင်ငံက ခေါ်တဲ့ မဲခေါင်မြစ်ကို မျှဝေထားတဲ့ နိုင်ငံတွေဖြစ်တဲ့ ကမ္ဘောဒီးယား၊ ထိုင်း၊ လာအို၊ မြန်မာနဲ့ ဗီယက်နမ်နိုင်ငံတွေက နိုင်ငံခြားရေးဝန်ကြီးတွေ တက်ရောက်ကြမယ်လို့ ဆိုပါတယ်။

မတရားအာဏာသိမ်းယူမှုနဲ့ အကြမ်းဖက်ဖြိုခွင်းမှုတွေ ကျူးလွန်နေတဲ့ မြန်မာစစ်အုပ်စုကို အနောက်နိုင်ငံ အစိုးရအုပ်စုတွေက ပြစ်ဒဏ်ခတ်ပိတ်ဆို့အရေးယူမှုတွေ လုပ်ဆောင်နေချိန်မှာ အာဏာသိမ်းစစ်အုပ်စုကတော့ တရုတ်နဲ့ ရုရှားအပါအဝင် မဟာမိတ်တွေအပေါ် ပိုပြီးတော့ အားကိုးလာနေတာဖြစ်ပြီး တရုတ်အစိုးရကတော့ အခြေအနေတွေ ဘယ်လိုပြောင်းလဲသွားပါစေ၊ မြန်မာနိုင်ငံရဲ့ အချုပ်အခြာ ပိုင်ဆိုင်မှုနဲ့ လွတ်လပ်တဲ့နိုင်ငံအဖြစ် တည်ရှိမှုကို အစဉ်အမြဲ ထောက်ခံသွားမယ်လို့ ပြီးခဲ့တဲ့ ဧပြီလတုန်းက ပြောထားခဲ့ပါတယ်။

အာဏာသိမ်းစစ်ကောင်စီဟာ နိုင်ငံတကာ စင်မြင့်ထက်မှာတော့ အထီးကျန်ဖြစ်နေပြီး ကမ္ဘောဒီးယားခေါင်းဆောင် ဟွန်ဆန်ဟာ စစ်အာဏာသိမ်းပြီးနောက် လာရောက်လည်ပတ်တဲ့ တစ်ဦးတည်းသော နိုင်ငံတကာက ခေါင်းဆောင် ဖြစ်လာခဲ့တာပါ။

ဒါ့အပြင် စစ်ကောင်စီခေါင်းဆောင်ကို အာဆီယံထိပ်သီးအစည်းအဝေးပွဲတွေနဲ့ တခြား ဆွေးနွေးဘက်နိုင်ငံတွေရဲ့  ထိပ်သိမ်းအစည်းအဝေးပွဲတွေမှာ   ပါဝင်တက်ခွင့်မပြုသလို စစ်ကောင်စီ နိုင်ငံခြားရေးဝန်ကြီးဟာလည်း  ပြီးခဲ့တဲ့ ဖေဖော်ဝါရီက ကျင်းပခဲ့တဲ့ အာဆီယံနိုင်ငံခြား ရေးဝန်ကြီးအစည်းအဝေးပွဲတွေမှာ တက်ခွင့်မပြုခဲ့ပါဘူး။

15 hours Ago
More News
Up