လွှတ်တော်/ဥပဒေရေးရာ

April 5, 2022

မွန်ဝန်ကြီးချုပ်အပေါ်စွဲထားသည့် ရွေးကောက်ပွဲအမှု ရုံးထုတ် စစ်ဆေး

ထောင်ဒဏ် ၂ နှစ် ချမှတ်ခံထားရတဲ့ မွန်ပြည်နယ်ဝန်ကြီးချုပ် ဒေါက်တာအေးဇံကို ရွေးကောက်ပွဲ မလျော်သြဇာသုံးမှု အပါအဝင် အမှု ၃ မှုအတွက် မော်လမြိုင်မြို့နယ်တရားရုံးမှာ  ဧပြီ ၅ ရက်က   ရုံးထုတ် စစ်ဆေးခဲ့တယ်လို့ တရားရုံးနဲ့ နီးစပ်သူက ပြောပါတယ်။

ဝန်ကြီးချုပ် ဒေါက်တာအေးဇံကို စစ်ကောင်စီက ရွေးကောက်ပွဲမှာ မလျော်သြဇာသုံးတယ်ဆိုပြီး ရာဇသတ်ကြီး ဥပဒေ ပုဒ်မ ၁၃၀ (က) နဲ့ အမှု တစ်မှု၊ ပုဒ်မ ၁၇၁ (စ)နဲ့ အမှု နှစ် မှု ဖွင့်လှစ်ထားတာ ဖြစ်ပါတယ်။

အဲဒီရွေးကောက်ပွဲအမှုတွေအတွက် ပြီးခဲ့တဲ့ မတ်လ ၂၉ ရက် ရုံးချိန်းမှာ စစ်ကောင်စီတရားသူကြီးက စွဲချက်တင် အမိန့်ချမှတ်ထားတာဖြစ်ပြီး ဝန်ကြီးချုပ် ဒေါက်တာအေးဇံကတော့ အပြစ်မရှိကြောင်း ထွက်ဆိုခဲ့ပါတယ်။

ဝန်ကြီးချုပ် ဒေါက်တာအေးဇံရဲ ရွေးကောက်ပွဲအမှုတွေကို စစ်ကောင်စီ မော်လမြိုင်ခရိုင် ရွေးကောက်ပွဲ ကော်မရှင်အဖွဲခွဲ့အတွင်းရေးမှူး ဦးထင်ကျော်က တရားလိုအဖြစ် ဆောင်ရွက်နေတာပါ။

လက်ရှိမှာတော့ ဝန်ကြီးချုပ် ဒေါက်တာအေးဇံဟာ စစ်ကောင်စီက စွဲဆိုထားတဲ့ အဂတိ လိုက်စားအမှု အမှု ၉ မှု၊ ရွေးကောက်ပွဲ မလျော်သြဇာသုံးမှု အမှု ၃ မှု ၊ စုစုပေါင်း အမှု ၁၂ မှုနဲ့ တရားရင်ဆိုင်နေရတာပါ။

3 months Ago

လက်ရှိ မြန်မာနိုင်ငံသားဥပဒေကို ပယ်ဖျက်ပြီး၊ အသစ်ပြန်ရေးဆွဲမည်ဟု NUG ဝန်ကြီးပြော

လက်ရှိ မြန်မာနိုင်ငံသားဥပဒေကို ပယ်ဖျက်ပြီး၊ အသစ်ပြန်လည်ရေးဆွဲ သွားမယ်လို့ အမျိုးသားညီညွတ်ရေးအစိုးရ (NUG)၊  တရားရေးဝန်ကြီးဌာန ပြည်ထောင်စုဝန်ကြီး ဦးသိန်းဦးက ပြောကြားလိုက်ပါတယ်။

လတ်တလောမှာ NUG ဝန်ကြီးတွေအပါအဝင်  ဒီမိုကရေစီအရေးတက်ကြွလှုပ်ရှားသူတွေ၊ စစ်အာဏာရှင်ဆန့်ကျင်သူ ထင်ရှားကျော်ကြားသူတွေကို စစ်ကောင်စီက နိုင်ငံသားအဖြစ်က ရုပ်သိမ်းနေတာနဲ့ ပတ်သက်ပြီး ဧပြီ ၄ ရက်က ထုတ်ပြန်ပြောကြားလိုက်တာပါ။ 

အကြမ်းဖက်စစ်အုပ်စုက NUG အစိုးရ အဖွဲ့ဝင်တွေနဲ့ ထင်ရှားကျော်ကြားတဲ့ မြန်မာ့ဒီမိုကရေစီ ဘက်တော်သားတွေကို ခြိမ်းခြောက်ဖို့ မြန်မာနိုင်ငံသားဥပဒေကို အလွဲသုံးစားပြုတဲ့အပေါ် ပြင်းထန်စွာရှုတ်ချကြောင်းနဲ့ စစ်အုပ်စုအနေနဲ့ မြန်မာနိုင်ငံရဲ့ တစ်ခုတည်းသော တရားဝင်အစိုးရဖြစ်တဲ့ NUG အစိုးရနဲ့ ပြည်ထောင်စုဝန်ကြီးတွေနဲ့ ထင်ရှားကျော်ကြားတဲ့ ဝန်းရံသူတွေကို ခုလိုမျိုး ယုတ်ညံ့စွာ ဒဏ်ခတ်အရေးယူတာဟာ နိုင်ငံတကာ ဥပဒေတွေအရသော်လည်းကောင်း မြန်မာနိုင်ငံသား ဥပဒေအရသော်လည်းကောင်း အကျုံးမဝင်ဘူးလို့ ဖော်ပြပါတယ်။

“ကျွန်တော်နှင့် ကျွန်တော်၏ လုပ်ဖော်ကိုင်ဖက်များကို ယခုကဲ့သို့ အဓိပ္ပါယ်မဲ့ တိုက်ခိုက်ခြင်းဖြင့် ကျွန်ုပ်တို့၏ စိတ်ဓါတ်ပိုင်းဆိုင်ရာ ထိခိုက်သွားစေမည်ဟု စစ်အုပ်စုမှ တွေးထင်နေခြင်းသည် သာလျှင် ၎င်းတို့အနေဖြင့် မည်မျှထင်ယောင်ထင်မှား ဖြစ်နေသည်ကို သိသာစေပါသည်။ ၎င်းတို့တွေးထင်နေသလို မဖြစ်သည့်အပြင် မြန်မာနိုင်ငံတော်သစ်ကြီးဆီသို့ ငြိမ်းချမ်းမူနှင့် တရားမျှတမူ ယူဆောင်လာသည့်အခါ ကျွန်ုပ်တို့မှ စစ်အုပ်စုအဖွဲ့ဝင်များအား နိုင်ငံသားဖြစ်မူကို ရုပ်သိမ်းမည် မဟုတ်သော်လည်း၊ စစ်အုပ်စု ကျူးလွန်ခဲ့သမျှ စစ်ရာဇဝတ်မူများနှင့် ရက်စက်ယုတ်မာမူများအား ထိရောက်စွာ အရေးယူ အပြစ်ပေးနိုင်မည့် တရားစီရင်မှုကို ပြုလုပ်သွားမည် ဖြစ်သည်”လို့ ထုတ်ပြန်ထားပါတယ်။

အကြမ်းဖက်စစ်အုပ်စုက NUG အဖွဲ့ဝင်တွေနဲ့ ဒီမိုကရေစီဘက်တော်သားတွေကို နိုင်ငံရေးတိုက်ခိုက်နေတာဖြစ်ပြီး သူတို့ ကိုးကားတဲ့ နိုင်ငံသားဥပဒေပုဒ်မ ၁၆ နဲ့ ၁၇ လုပ်ပိုင်ခွင့်ဆိုတာ မြန်မာနိုင်ငံသားတစ်ဦးက တခြားနိုင်ငံတခုမှာ နိုင်ငံသားခံယူပြီး အခြေချနေထိုင်မှသာ အကျုံးဝင်မှာဖြစ်တယ်လို့ NUG တရားရေးဝန်ကြီးဌာနက ပြောပါတယ်။

စစ်ကောင်စီဟာ ပြီးခဲ့တဲ့ ဧပြီ ၁ ရက်က အဆိုတော်ကျားပေါက်၊ သရုပ်ဆောင် မင်းသား ဒေါင်း၊ စာရေးဆရာ သရဝဏ်-ပြည်နဲ့ ဦးကျော်မိုးထွန်းအပါအဝင်  ၁၇ ယောက်ကို မြန်မာနိုင်ငံသားအဖြစ်ကနေရပ်စဲခဲ့သလို  ၈၈ မျိုးဆက်ကျောင်းသားခေါင်းဆောင် ကိုမင်းကိုနိုင်၊ အိပန်ဆယ်လိုနဲ့  (NUG) ဝန်ကြီးတွေ အပါအဝင် ၁၁ ဦးကို နိုင်ငံသားအဖြစ်မှ ရပ်စဲကြောင်း ပြီးခဲ့တဲ့  မတ်လ  ၄ ရက်ကကြေညာခဲ့တဲ့အတွက်  စုစုပေါင်း ၂၈ ဦးရှိသွားပြီ ဖြစ်ပါတယ်။

အကြမ်းဖက် စစ်​ကောင်စီအဖွဲ့ဟာ အစိုးရမဟုတ်တဲ့အတွက် သူတို့ထုတ်ပြန်တဲ့ ‘နိုင်ငံသားဖြစ်မှုက ရပ်စဲခြင်း’ ဆိုတာ တရားမဝင်ဘူးလို့ ကြေညာခံထားရသူတွေက တုံ့ပြန်ထားပါတယ်။

ဓာတ်ပုံ-Ministry of Justice

3 months Ago

February 2, 2022

နိုင်ငံတော်အတိုင်ပင်ခံပုဂ္ဂိုလ်၏ ရာထူးသက်တမ်းကို NUG အစိုးရသက်တမ်းနှင့်အညီ သတ်မှတ် ပြဋ္ဌာန်း

နိုင်ငံတော်၏ အတိုင်ပင်ခံပုဂ္ဂိုလ်ဆိုင်ရာ ဥပဒေ ၂၀၂၁ ကို ပြင်ဆင်တဲ့ ဥပဒေကို ဒီကနေ့ ဖေဖော်ဝါရီ  ၂ ရက် ရက်စွဲနဲ့ ပြည်ထောင်စုလွှတ်တော်ကိုယ်စားပြုကော်မတီ (CRPH)က ပြဋ္ဌာန်း လိုက်ပါတယ်။

ဒီဥပဒေကို နိုင်ငံတော်၏ အတိုင်ပင်ခံပုဂ္ဂိုလ်ဆိုင်ရာ ဥပဒေ ၂၀၂၁ ကို ပြင်ဆင်သည့် ဥပဒေ ဟု ခေါ်တွင်စေရမှာဖြစ်ပြီး အချက် ၂ ချက်နဲ့ အစားထိုးရ မယ်လို့ ဖော်ပြထားပါတယ်။

နိုင်ငံတော်၏ အတိုင်ပင်ခံပုဂ္ဂိုလ်ဆိုင်ရာဥပဒေ ၂၀၂၁ ပုဒ်မ ၆၊ ပုဒ်မခွဲ (က) ကို  “(က) ဖက်ဒရယ်ဒီမိုကရေစီပဋိညာဉ်ပါ နိုင်ငံရေးလမ်းပြမြေပုံနှင့် နိုင်ငံရေးရည်မှန်းချက်များ အကောင်အထည်ဖော်နိုင်ရေးအတွက် ဖက်ဒရယ်ဒီမိုကရေစီ ပဋိညာဉ်နှင့်အညီရေးဆွဲထားသော မဟာဗျူဟာအရ နိုင်ငံတော်နှင့်နိုင်ငံသားများ၏ အကျိုးစီးပွားများအတွက် အမျိုးသားညီညွတ်ရေးအစိုးရကို အကြံပေးရမည်။”လို့ အစားထိုး လိုက်ပါတယ်။

နိုင်ငံတော်၏ အတိုင်ပင်ခံပုဂ္ဂိုလ်ဆိုင်ရာ ဥပဒေ ၂၀၂၁ ပုဒ်မ ၇ ကိုတော့  “၇။ အတိုင်ပင်ခံ ပုဂ္ဂိုလ်၏ ရာထူးသက်တမ်းသည် အမျိုးသားညီညွတ်ရေးအစိုးရ၏ သက်တမ်းနှင့်အညီ ဖြစ်သည်။”လို့ အစားထိုးလိုက်တာ ဖြစ်ပါတယ်။

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကိုတော့ အာဏာသိမ်း စစ်တပ်က ဖမ်းဆီးထားပြီး ပုဒ်မမျိုးစုံနဲ့ တရားစွဲထားကာ နှစ်ရှည်ထောင်ဒဏ်တွေ ချမှတ်ဖို့ ကြိုးပမ်းနေတာ ဖြစ်ပါတယ်။ 

မြန်မာနိုင်ငံမှာ အကြမ်းဖက် စစ်အုပ်စုက မတရားအာဏာသိမ်းယူခဲ့တဲ့ ကာလဟာ ၁ နှစ် ပြည့်မြောက်ခဲ့ပြီဖြစ်သလို မြန်မာပြည်သူတွေရဲ့ စစ်အာဏာရှင်ဆန့်ကျင်တော်လှန်ရေး လှုပ်ရှားမှုတွေဟာလည်း အရှိန်အဟုန်နဲ့ ဆက်လက်ပြီးတော့ ရှိနေဆဲဖြစ်ပါတယ်။

အမျိုးသားညီညွတ်ရေးအစိုးရ(NUG)ကတော့ ၂၀၂၁ စက်တင်ဘာ ၇ ရက်မှာ စစ်အာဏာရှင်ဆန့်ကျင်ရေး ခုခံတွန်းလှန်စစ်စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက်စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန် တိုက်ဖျက်ကြဖို့ ကြေညာထားခဲ့ပါတယ်။

5 months Ago
More News
Up