စီးပွားရေး

May 20, 2022

ရန်ကုန်စတော့ရှယ်ယာစျေးကွက် အနည်းငယ် ပြန်လှုပ်လာ

ရန်ကုန်စတော့စျေးကွက်မှာ အရောင်းအဝယ်ဖြစ်ခဲ့တဲ့ ရှယ်ယာတန်ဖိုးက ပျမ်းမျှ နေ့စဉ် ကျပ် သန်း ၂၀ နဲ့ ၃၀ အကြား အရောင်းအဝယ် ရှိတာကြောင့် စျေးကွက်အနည်းငယ် ပြန်လှုပ်လာတယ်လို့ စတော့စျေးကွက်သုတေသီတွေက ပြောပါတယ်။

စစ်တပ်မှ အာဏာသိမ်းခဲ့တဲ့ ၂၀၂၁ ခုနှစ်၊ ဖေဖော်ဝါရီ မတိုင်ခင်က ရန်ကုန်စတော့စျေးကွက်မှာ အရောင်းအဝယ် ဖြစ်ခဲ့တဲ့ ရှယ်ယာတန်ဖိုးတွေက နေ့စဉ် ကျပ် သန်း ၁၀၀ ကျော်အထိ ရှိခဲ့တာပါ။ ဒါပေမဲ့ စစ်တပ်မှ အာဏာသိမ်းပြီးတဲ့နောက် ရန်ကုန်စတော့စျေးကွက်ဟာ အေးသွားခဲ့ပြီး အရောင်းအဝယ်ဖြစ်တဲ့ ရှယ်ယာတန်ဖိုးကလည်း တစတစနဲ့ ကျဆင်းလာပါတယ်။

လက်ရှိစတော့စျေးကွက် အခြေအနေနဲ့ပတ်သက်ပြီး စျေးကွက်သုတေသီတဦးက “အရောင်းအဝယ်ကတော့ ၂၀၂၂ ခုနှစ်မှာ ပြန်ပြီးတော့ တက်လာတဲ့ အခြေအနေ ရှိပါတယ်။ ၂၀၂၁ ခုနှစ်နဲ့ယှဉ်ရင် အရောင်းအဝယ်ပမာဏက နည်းနည်း တိုးလာတယ်။ ဒါပေမဲ့ ပြီးခဲ့တဲ့ ၂၀၁၉ ၊ ၂၀၂၀ ခုနှစ်တွေနဲ့ယှဉ်ရင်တော့ အဲ့လောက် ပမာဏအထိ မရှိသေးဘူး။ အဲ့အချိန်တုန်းက daily rate က တရက်ကို သန်း ၁၀၀ ကျော် ရှိတယ်နော်။ အခုကတော့ ပျမ်းမျှပေါ့၊ တရက်ကို သန်း ၂၀ နဲ့ ၃၀ ကြားမှာ ရှိပါ တယ်။ အရင်ကာလ အခြေအနေမျိုးတော့ ပြန်မရောက်သေးဘူး။ ၂၀၂၁ ခုနှစ်နဲ့ယှဉ်ရင်တော့ ၂၀၂၂ ခုနှစ် ၄ လပိုင်းအထိ အရောင်းအဝယ်ဖြစ်တဲ့ ပမာဏက နည်းနည်းလေးတော့ ပြန်တက်လာပါတယ်။ စတော့စျေးကွက်အပေါ် စိတ်ဝင်စားမှု နည်းနည်း ပြန်ရှိလာတဲ့ သဘောပေါ့။ အရင်ပုံစံမျိုး ပြန်ရောက်ဖို့ကတော့ တော်တော်လေးကြိုးစားရဦးမယ်။ အဲဒီလိုပြန်ရောက်ဖို့ကလည်း အခြေအနေ အရပ်ရပ်အပေါ်မှာ အများကြီး မူတည်တာပေါ့” လို့ ဒီဗွီဘီကို ပြောပါတယ်။

ရန်ကုန်စတော့စျေးကွက်မှ ထုတ်ပြန်တဲ့ အချက်အလက်တွေအရ လက်ရှိဘဏ္ဍာနှစ်ဖြစ်တဲ့ (၂၀၂၁-၂၀၂၂ ဘဏ္ဍာနှစ်၏ ဒုတိယ သုံးလပတ်၊ ဇန်နဝါရီ မှ မတ်လ အထိ) နေ့စဉ် အရောင်းအဝယ်ဖြစ်ခဲ့တဲ့ ရှယ်ယာစောင်ရေက ၃၁၀၀ ကျော် ရှိပြီး တန်ဖိုးအားဖြင့် ကျပ်သန်းပေါင်း ၁၅ သန်းကျော် ရှိပါတယ်။

အဆိုပါကာလအတွင်းမှာ ကုမ္ပဏီ တခုချင်းစီ၏ အရောင်းအဝယ်ဖြစ်ခဲ့တဲ့ ရှယ်ယာအရေအတွက် နဲ့ တန်ဖိုးမှာ MYANPIX ကုမ္ပဏီက ရှယ်ယာစောင်ရေပေါင်း ၁၉၄၁၃၄ ရောင်းချနိုင်ခဲ့ပြီး တန်ဖိုးအားဖြင့် ၉၃၁ သန်း ရှိတာကြောင့် ထိပ်ဆုံးအဆင့်မှာ ရပ်တည်နေပါတယ်။

သူ့အနောက်မှာ FMI  ကုမ္ပဏီက ရှယ်ယာစောင်ရေပေါင်း ၄၄၈၀၁ ရောင်းချနိုင်ခဲ့ပြီး တန်ဖိုးအားဖြင့် ကျပ်သန်းပေါင်း ၃၆၅ သန်းဖြင့် ဒုတိယအဆင့်မှာ ရပ်တည်နေပါတယ်။

MTSH ကုမ္ပဏီက ရှယ်ယာစောင်ရေပေါင်း ၁၂၂၉၀၀ ရောင်းချနိုင်ခဲ့ပြီး တန်ဖိုးအားဖြင့် ကျပ်သန်းပေါင်း ၃၆၄ သန်းဖြင့် တတိယအဆင့်မှာ ရှိပါတယ်။

FPB ကုမ္ပဏီက ရှယ်ယာစောင်ရေပေါင်း ၇၂၆၃ ရှိပြီး တန်ဖိုးအားဖြင့် ကျပ်သန်းပေါင်း ၁၃၇ သန်း၊ TMH ကုမ္ပဏီက ရှယ်ယာစောင်ရေပေါင်း ၁၀၂၀၁ ရှိပြီး တန်ဖိုးအားဖြင့် ကျပ်သန်းပေါင်း ၂၇ သန်း၊ EFR ကုမ္ပဏီက ရှယ်ယာစောင်ရေပေါင်း ၅၄၁၃ ရှိပြီး တန်ဖိုးအားဖြင့် ကျပ်သန်းပေါင်း ၁၅ သန်း၊ MCB ကုမ္ပဏီက ရှယ်ယာစောင်ရေပေါင်း ၁၇၃၂ ရှိပြီး တန်ဖိုးအားဖြင့် ကျပ်သန်းပေါင်း ၁၄ သန်း၊ AMATA ကုမ္ပဏီက ရှယ်ယာစောင်ရေပေါင်း ၁၈၂၄ ရှိပြီး တန်ဖိုးအားဖြင့် ကျပ်သန်းပေါင်း ၈ ဒသမ ၇ သန်းဖြင့် အောက်ဆုံးအဆင့်မှာ ရပ်တည်နေပါတယ်။

ဒီကနေ့(မေလ ၂၀ ရက်၊ နေ့လည် ၁နာရီထိ) ရန်ကုန်စတော့စျေးကွက်မှာ အရောင်းအဝယ်ဖြစ်ထားတဲ့ ရှယ်ယာ အရေ အတွက်က ၂၄၄၇ ခုရှိပြီး တန်ဖိုးအားဖြင့် ကျပ်သန်းပေါင်း ၁၈ သန်း ရှိပါတယ်။

ကုမ္ပဏီ တခုချင်းစီ၏ရှယ်ယာတန်ဖိုးမှာ ရှယ်ယာ တခုကို FMI ကုမ္ပဏီက ၇၆၀၀ ကျပ်၊ MTSH ကုမ္ပဏီက ၂၆၅၀ ကျပ်၊ MCB ကုမ္ပဏီက ၇၈၀၀ ကျပ်၊ FPB ကုမ္ပဏီက ၁၈၀၀၀ ကျပ်၊ TMH ကုမ္ပဏီက ကျပ် ၂၅၅၀၊ EFR ကုမ္ပဏီက ကျပ် ၂၆၀၀ နဲ့  AMATA ကုမ္ပဏီက ကျပ် ၅၀၀၀ အသီးသီးရှိတာတွေ့ရပါတယ်။

4 days Ago

ပြင်ပ ဒေါ်လာပေါက်ဈေး ၂,၀၉၀ ကျပ် ဝန်းကျင်ထိ မြင့်တက်

ဗဟိုဘဏ် သတ်မှတ်ဈေး အမေရိကန်တဒေါ်လာ ၁,၈၅၀ ကျပ်ဖြစ်ပေမဲ့ ပြင်ပ အရောင်းအဝယ် ဈေးကွက်မှာတော့ မေ ၂၀ ရက် ဒီကနေ့မှာ တဒေါ်လာကို ၂,၀၉၀ ကျပ်ဝန်းကျင်ထိ မြင့်တက်လာပါတယ်။

ပြီးခဲ့တဲ့တပတ်က ပြင်ပအရောင်းအဝယ်ဈေးကွက်မှာ အမေရိကန် တဒေါ်လာကို မြန်မာငွေကျပ် ၂,၀၅၀ ဝန်းကျင်ရှိခဲ့ပြီး ဒီနေ့မှာတော့ အခုလို ၂,၀၉၀ ကျပ်အထိ ဈေးတက်လာတာ ဖြစ်ပါတယ်။

အခုလို ငွေလဲနှုန်း မြင့်တက်လာပေမဲ့လည်း ပြင်ပဈေးကွက်မှာ ဒေါ်လာဝယ်ယူရ ခက်ခဲတဲ့ အခြေအနေ ဖြစ်နေတယ်လို့ ဒေါ်လာနဲ့ လုပ်ငန်းလုပ်ကိုင်နေသူတွေဆီက သိရပါတယ်။

ပြည်တွင်း ငွေလဲကောင်တာတခုရဲ့ ပြောကြားချက်အရ ရုတ်တရက် ဈေးနှုန်းကွာဟချက် ပြောင်းလဲမှုကြောင့် ဒေါ်လာ လာရောက်ရောင်းချသူမရှိ ဖြစ်နေပြီး ဝယ်ယူလိုသူတွေကို ပြန်လည်ရောင်းချပေးဖို့ အခက်အခဲ ရှိနေတယ်လို့ သိရပါတယ်။

ပြင်ပ တရားဝင် ငွေလဲကောင်တာတွေမှာ အမေရိကန် တဒေါ်လာကို ဝယ်ဈေး ၁,၈၅၀  ကျပ်၊ ရောင်းဈေး ၁၈၅၅ ကျပ်လို့ ကြေညာထားကြပေမဲ့ ငွေလဲကောင်တာရှေ့အရောက် ဈေးနှုန်းနဲ့သာ အမှန်တကယ် အရောင်းအဝယ် ပြုလုပ်ကြောင်းလည်း အသိပေးထားကြပါတယ်။

မြန်မာနိုင်ငံမှာ အာဏာမသိမ်းခင်က အမေရိကန်တဒေါ်လာကို ကျပ်ငွေ ၁,၃၀၀ ဝန်းကျင်သာ ရှိခဲ့ပေမဲ့ အာဏာသိမ်းပြီးနောက်ပိုင်း မြန်မာကျပ်ငွေဈေး ဆက်တိုက် ကျဆင်းလာပါတယ်။

ပြီးခဲ့တဲ့ စက်တင်ဘာလ နောက်ပိုင်းမှာ ပြင်ပပေါက်ဈေး တဒေါ်လာ ၂,၇၀၀ ကျော်အထိ စံချိန်တင် အမြင့်ဈေး ရောက်ရှိခဲ့ပါတယ်။

ဒေါ်လာဈေးနှုန်းကို ထိန်းချုပ်နိုင်ဖို့အတွက် စစ်ကောင်စီ ဗဟိုဘဏ်က အမေရိကန်ဒေါ်လာတွေ စံချိန်တင် ဆက်တိုက်ထုတ်ရောင်းခဲ့ပြီး ဒေါ်လာအသုံးပြုမှု လျှော့ချနိုင်ဖို့အတွက် သွင်းကုန်တွေအပေါ် မူဝါဒချ ကန့်သတ်ခဲ့ပါတယ်။

ဒါ့အပြင် နယ်စပ်ဂိတ်တွေမှာ နိုင်ငံအလိုက် ငွေကြေးတွေနဲ့ မြန်မာကျပ်ငွေ တိုက်ရိုက်လဲလှယ် အသုံးပြုဖို့ ခွင့်ပြုခဲ့ပါတယ်။

အဲဒီနောက် ပြည်ပကနေ လိုင်စင်ရဘဏ်တွေဆီ ဝင်လာတဲ့ နိုင်ငံခြားသုံးငွေတွေကို အလုပ်လုပ်ရက် တရက်အတွင်း ကျပ်ငွေနဲ့ လဲလှယ်ရောင်းချရမယ်ဆိုတဲ့ ညွှန်ကြားချက်ကို ဧပြီ ၃ ရက်နေ့မှာ ဗဟိုဘဏ်က ထုတ်ပြန်လာခဲ့ပြီး ဒီညွှန်ကြားချက်ကြောင့် ဒေါ်လာအသုံးပြုမှုရှိနေတဲ့ လုပ်ငန်းကဏ္ဍတွေကို ဂယက်ရိုက်သွားစေခဲ့ပါတယ်။

စစ်ကောင်စီက အမေရိကန် တဒေါ်လာကို မြန်မာငွေ ၁,၈၅၀ ကျပ်အဖြစ် နှုန်းသေ သတ်မှတ်လိုက်ပြန်ပါတယ်။ ဒါပေမဲ့ လက်တွေ့ မြေပြင်မှာ ပြင်ပပေါက်ဈေးနဲ့သာ အရောင်းအဝယ်တွေကို ဆောင်ရွက်ကြတာဖြစ်လို့  ဆေးဝါး၊ လူသုံးကုန် အပါအဝင် ဒေါ်လာနဲ့ ဝယ်ယူတင်သွင်းရတဲ့ ကုန်ပစ္စည်းတွေ ပြည်တွင်းမှာ ဈေးနှုန်း မြင့်တက်နေဆဲ ဖြစ်ပါတယ်။

ဆေးဝါးအရောင်းဆိုင် ဝန်ထမ်းတဦးက “ဈေးတွေ ထပ်တက်ဖို့ ရှိပါတယ်။ အရင်သွင်းထားပြီးသားတွေ မတက်ပေမဲ့ ထပ်သွင်းလာတဲ့၊ ထပ်ရောက်မယ့် ဆေးတွေက ဈေးထပ်တက်ဖို့ ရှိတယ်” လို့ ပြောပါတယ်။

အာဏာသိမ်းပြီးနောက်ပိုင်း ကုန်ဈေးနှုန်း အဆမတန် မြင့်တက်တဲ့ဒဏ်၊ အလုပ်အကိုင်၊ ဝင်ငွေကျဆင်းပြီး စီးပွားရေးကျပ်တည်းမှုဒဏ်ကို ပြည်သူတွေ ရင်ဆိုင်နေကြရတာ ဖြစ်ပါတယ်။

4 days Ago

May 19, 2022

ဒစ်ဂျစ်တယ်ငွေကြေး တန်ဖိုးကျဆင်းမှု မြန်မာအတွက် သက်ရောက်မှုမရှိနိုင်ဟု ငွေကြေးဆိုင်ရာ ကျွမ်းကျင်သူ သုံးသပ်

နိုင်ငံတကာမှာ ရင်းနှီးမြှုပ်နှံမှုတခုအနေနဲ့ ရောင်းဝယ်နေတဲ့ ဒစ်ဂျစ်တယ်ငွေကြေးတွေရဲ့ တန်ဖိုး ထိုးကျနေပေမဲ့ မြန်မာနိုင်ငံအတွက်တော့ သက်ရောက်မှုက အလှမ်းဝေးပါတယ်လို့ စတော့နဲ့ ငွေကြေးဆိုင်ရာ ကျွမ်းကျင်သူတွေက ပြောပါတယ်။

ကမ္ဘာ့ဒစ်ဂျစ်တယ်ငွေကြေး ဈေးကွက်ကြီးမှာ ဈေးကွက်ဝေစု အကြီးဆုံးရရှိထားတဲ့ ဘစ်ကွိုင် ငွေကြေး (Bitcoin) နဲ့ အီသာ ငွေကြေး (Ether) တို့ရဲ့ တန်ဖိုးတွေဟာ အခုနှစ် မေလအတွင်းထဲမှာ ကျဆင်းမှု ရှိခဲ့တာပါ။

ဒါကြောင့် နိုင်ငံတကာမှာ ရောင်းဝယ်နေကြတဲ့ ဒစ်ဂျစ်တယ် ငွေကြေးတန်ဖိုးတွေ ကျဆင်းမှုရဲ့ သက်ရောက်မှုက မြန်မာနိုင်ငံအတွက်ကတော့ အလှမ်းဝေးနေပါသေးတယ်လို့ စတော့နဲ့ ငွေကြေးဆိုင်ရာ သုတေသီတဦးက ဒီဗွီဘီကို ပြောပါတယ်။

“မြန်မာပြည်အတွက် ဘာသက်ရောက်မှု (impact) က မရှိနိုင်ပါဘူး။ ပြီးတော့ သူတို့က unregulated market မှာ သူ့ဟာသူ တန်ဖိုးသင့်ပြီးတော့ အရောင်းအဝယ် ဖြစ်နေတာလေ။ ပြီးတော့ သူ့ရဲ့ပရိသတ်ကလည်း သီးသန့်ပရိသတ်ပေါ့။ မြန်မာပြည်မှာလည်း အဲဒီအပိုင်းမှာ ရင်းနှီးမြှုပ်နှံတာက အတော်နည်းပါတယ်။ အတော်နည်းတယ်ဆိုတော့ သက်ရောက်မှု (impact) က မရှိနိုင်ပါဘူး။ နောက်တချက်က ဒစ်ဂျစ်ငွေကြေး တန်ဖိုးတွေ ကျလို့ စတော့ဈေးကွက်ထိတာ မဟုတ်ဘူး။ စတော့ဈေးကွက်ထိလို့ ဒစ်ဂျစ်တယ်ငွေကြေး တန်ဖိုးတွေက ကျတာ။ ဒါကြောင့် ဒစ်ဂျစ်တယ်ငွေကြေးက ဘာကိုမျှ ဦးမဆောင်ဘူး။ သူက အနောက်ကနေ တရွတ်တိုက်လိုက်တာပဲ ရှိတယ်။ သူများဖြစ်လို့ သူထိတာနော်။ စတော့ဈေးကွက် မကောင်းလို့ သူက အဲဒီလိုဖြစ်တာ။ သူက အဖြည့်ခံအဆင့်ပဲရှိတယ်။ ဒါကြောင့် သူ့ကြောင့် ဘာမှဖြစ်စရာအကြောင်း မရှိဘူး။ အဝေးကြီးနော်။ ပြီးတော့ သူတို့နိုင်ငံတွေမှာလည်း ဒီလောက်ကြီး မဟုတ်ဘူး။ ပမာဏ (amount) ကြီးတယ် ဆိုပေမဲ့ တခြားဟာတွေနဲ့ ယှဉ်လိုက်ရင် သူ့ရဲ့ပမာဏက ဘာမှမဟုတ်ဘူးနော်။ ဒါကြောင့် သက်ရောက်မှု (impact) ဖြစ်လာစရာ မရှိဘူး။”

စီးပွားရေးသုတေသီတဦးကလည်း “ကမ္ဘာ့ဒစ်ဂျစ်တယ်ငွေကြေးဈေးကွက်မှာ ဒစ်ဂျစ်တယ်ငွေကြေး တန်ဖိုးတွေက အခုဆိုရင် ကျနေတယ်ပေါ့။ ဒါပေမဲ့ ဒီသက်ရောက်မှုက မြန်မာနိုင်ငံအတွက်ကတော့ မရှိနိုင်ပါဘူး။ ဘာကြောင့်လဲဆို ဒီမှာရှိတဲ့ လူငယ်တွေက အပျော်သဘော ဝယ်ထားတာလောက်ပဲ ရှိတာပါ။ တခြားတွေနိုင်ငံတွေမှာလို ပမာဏများများ မရှိဘူးနော်။ ပြီးတော့ (cryptocurrency) ခရစ်တိုငွေကြေးက မြန်မာပြည်မှာ ဈေးကွက်မကြီးတဲ့အတွက် သူ့ရဲ့ ဈေးကွက်ပေါက်ဈေးကလည်း ဘယ်လောက်မှ မရှိဘူးနော်။ ဒါကြောင့် သက်ရောက်မှု (impact) ဖြစ်လာနိုင်စရာ မရှိပါဘူး။ အဝေးကြီးပါ” လို့ ဒီဗွီဘီကို ပြောပါတယ်။

ကမ္ဘာ့ဒစ်ဂျစ်တယ်ငွေကြေးဈေးကွက်မှာ ဈေးကွက်ဝေစု အများဆုံးရရှိထားတဲ့ ဘစ်ကွိုင်ငွေကြေး (Bitcoin) တန်ဖိုးဟာ ပြီးခဲ့တဲ့ ၂၀၂၁ ခုနှစ်၊ နိုဝင်ဘာလမှာ စံချိန်တင်ရရှိခဲ့တဲ့ အမေရိကန်ဒေါ်လာ ၆၉,၀၀၀ ရှိခဲ့ရာကနေ ၂၀၂၂ ခုနှစ် မေလ ၁၁ ရက်နေ့မှာတော့ ၂၉,၆၂၃ အထိ ကျဆင်းသွားတာကြောင့် ရာခိုင်နှုန်းအားဖြင့် ၂၃ ရာခိုင်နှုန်း ကျဆင်းမှု ရှိခဲ့ပါတယ်။

အလားတူ ဈေးကွက်ဝေစု ဒုတိယရရှိထားတဲ့ အီသာငွေကြေး (Ether) တန်ဖိုးကလည်း အခုနှစ် ဇန်နဝါရီနှောင်းပိုင်းကစလို့ ကျဆင်းခဲ့တာ လက်ရှိမှာတော့ အမေရိကန်ဒေါ်လာ ၂,၂၄၅ သာ ရှိပါတော့တယ်။

မြန်မာနိုင်ငံမှာ ကုန်သွယ်မှု၊ ဝန်ဆောင်မှုလုပ်ငန်းတွေနဲ့ ငွေကြေးပေးချေမှုစနစ်တွေ ပိုမိုကောင်းမွန်စေဖို့နဲ့ လွယ်ကူလျင်မြန်စေဖို့အတွက် ဒစ်ဂျစ်တယ်ငွေကြေးတခုဖြစ်တဲ့ USD Tether (USDT) ကို ပြည်တွင်းသုံးစွဲမှုအတွက် တရားဝင် အသိအမှတ်ပြုလိုက်တယ်လို့ အမျိုးသားညီညွတ်ရေးအစိုးရ (NUG) ရဲ့ စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှု ဝန်ကြီးဌာနက ပြီးခဲ့တဲ့ ဒီဇင်ဘာ ၁၁ ရက်နေ့က ထုတ်ပြန်ထားပါတယ်။

5 days Ago
More News
Up