တိုင်းရင်းသား

May 27, 2022

တိုင်းရင်းသားတော်လှန်ရေးအဖွဲ့များနှင့် ကုလလုံခြုံရေးကောင်စီအဖွဲ့ဝင်များ အလွတ်တမ်း တွေ့ဆုံဆွေးနွေး

မြန်မာ့ပြည်တွင်းပဋိပက္ခနဲ့ ပတ်သက်လို့  တိုင်းရင်းသားတော်လှန်ရေးအဖွဲ့တွေနဲ့ ကုလသမဂ္ဂ လုံခြုံရေးကောင်စီအဖွဲ့ဝင်တွေ မေလ ၂၅ ရက်က အလွတ်သဘောတွေ့ဆုံဆွေးနွေးခဲ့ကြတယ်လို့  ကြားကာလ ကချင်နိုင်ငံရေး ညှိနှိုင်းဆောင်ရွက်မှုအဖွဲ့ (KPICT) က သတင်းထုတ်ပါတယ်။

နော်ဝေ Mission အစီအစဉ်အနေနဲ့ တွေ့ဆုံခဲ့ကြရာမှာ KPICT အတွင်းရေးမှူး Salang Nsang Gum San တခြားတိုင်းရင်းသားတော်လှန်ရေးအဖွဲ့ ကိုယ်စားလှယ်များပါဝင်ခဲ့ကြပြီး၊  မြန်မာ့ပြည်တွင်းပဋိပက္ခတွေနဲ့ တခြား သက်ဆိုင်ရာကိစ္စရပ်တွေ ဆွေးနွေးခဲ့တယ်လို့ ဆိုပါတယ်။

တိုင်းရင်းသားတော်လှန်ရေးအဖွဲ့တွေဘက်က ဒီဆွေးနွေးရာမှာ  စစ်တပ်ရဲ့ အဓိကငွေကြေးထောက်တိုင်ကြီးတရပ်ဖြစ်တဲ့ ရေနံလုပ်ငန်းမှ ဝင်ငွေလမ်းကြောင်ကို ဖြတ်တောက်နိုင်ရေး၊ လုံခြုံရေးကောင်စီအနေနဲ့ တိုင်းရင်းသား တော်လှန်ရေးအဖွဲ့အစည်းအသီးသီးနဲ့ မျက်နှာစုံညီတွေ့ဆုံဆွေးနွေးရေးအရေးကြီးတဲ့အကြောင်း ပြောဆိုခဲ့တယ်လို့သိရပါတယ်။

ဒါ့ပြင် တိုင်းရင်းသားပြည်သူတွေအတွက် လိုအပ်သော လူသားချင်းစာနာကူညီရေး အထောက်အပံ့တွေကို အိမ်နီးချင်းနိုင်ငံတို့ရဲ့ နယ်စပ်ဂိတ်တွေမှ သယ်ယူပို့ဆောင်နိုင်ဖို့ ကူညီဆောင်ရွက်ပေးရေး၊  အာဆီယံနိုင်ငံတွေက ပူးပေါင်းဆွေးနွေးရေး လမ်းစဉ်အကောင်အထည်ဖော်ရေး တိုက်တွန်းနေတာဟာ ငြိမ်းခါနီးမီးတောက်အား အသက်ပြန်သွင်းတဲ့အသွင် မဖြစ်စေဖို့ အရေးကြီးတဲ့အကြောင်းလည်း ဆွေးနွေးခဲ့တယ်လို့ ထုတ်ပြန်ချက်မှာဖော်ပြပါတယ်။

Photo- KPICT

2 hours Ago

May 26, 2022

ကရင်ငြိမ်းချမ်းရေးကောင်စီအဖွဲ့ စစ်ခေါင်းဆောင်နှင့်တွေ့ဆုံ၊ ဒေသဖွံ့ဖြိုးရေးကိစ္စ တင်ပြ

စောထော့လေးဦးဆောင်တဲ့ ကရင်ငြိမ်းချမ်းရေးကောင်စီ  KNU/KNLA(PC)အဖွဲ့ဟာ အာဏာသိမ်းစစ်ခေါင်းဆောင်နဲ့ မေလ ၂၆ ရက် ဒီမနက် နေပြည်တော်မှာတွေ့ဆုံပြီး   ဒေသဖွံ့ဖြိုးတိုးတက်ရေးဆိုင်ရာကိစ္စတွေတင်ပြခဲ့ကာ အမှတ်တရလက်ဆောင် ပစ္စည်းတွေ ပေးအပ်ခဲ့ပြီး စုပေါင်းဓာတ်ပုံရိုက်ကြတယ်လို့ စစ်ကောင်စီ ပြန်ကြားရေးက သတင်းထုတ်ပါတယ်။

အာဏာသိမ်းစစ်ခေါင်းဆောင်ကလည်း KNU/KNLA(PC) ဥက္ကဋ္ဌ စောထော့လေးဦးဆောင်တဲ့ ကိုယ်စားလှယ်အဖွဲ့ကို ဒီမိုကရေစီနဲ့ ဖက်ဒရယ်ကိုအခြေခံတဲ့ ပြည်ထောင်စုစနစ် တည်ဆောက်ရေးဆိုင်ရာ ကိစ္စရပ်တွေ ရှင်းလင်းပြောကြားခဲ့တယ်လို့ဆိုပါတယ်။

ဒါ့အပြင် တစ်နိုင်ငံလုံးတိုင်းရင်းသားဒေသတွေပါမကျန် ပညာရည်မြှင့်တင်ရေးကိစ္စ၊ ပါတီစုံဒီမိုကရေစီစနစ်ကျင့်သုံးရေးကိစ္စ၊ ဒီမိုကရေစီနှင့် ဖက်ဒရယ်ကိုအခြေခံတဲ့ ပြည်ထောင်စုစနစ် တည်ဆောက်ရေးဆိုင်ရာကိစ္စရပ်တွေကို စစ်ခေါင်းဆောင်က  ရှင်းလင်းဆွေးနွေး ပြောကြားခဲ့တယ်လို့ ဆိုပါတယ်။

ဆွေးနွေးပွဲကို စစ်ကောင်စီဘက်က ဗိုလ်ချုပ်မှူးကြီးစိုးဝင်း၊ ဗိုလ်ချုပ်ကြီးမြထွန်းဦး၊ ဒုတိယဗိုလ်ချုပ်ကြီးမိုးမြင့်ထွန်း၊ ဒုတိယဗိုလ်ချုပ်ကြီးရာပြည့်တို့လည်းတက်ရောက်ကြပြီး KNU/KNLA(PC)ဘက်က ဒုတိယဥက္ကဋ္ဌနော်ကပေါ်ထူးနဲ့ ဗဟိုကော်မတီဝင် စောမောင်မောင်တို့လည်း တက်ရောက်ကြပါတယ်။

KNU/KNLA(PC)ဥက္ကဋ္ဌ ဦးဆောင်တဲ့အဖွဲ့ဟာ စစ်ကောင်စီလက်အောက်ခံ  ငြိမ်းချမ်းရေး ဆွေးနွေးရေးအဖွဲ့၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင် မှုညှိနှိုင်းရေးကော်မတီတို့နဲ့ နေပြည်တော်မှာ ဆက်လက်ဆွေးနွေးဖို့ ရှိနေပါတယ်။

အာဏာသိမ်းစစ်ခေါင်းဆောင်ဖိတ်ခေါ်တဲ့ဆွေးနွေးပွဲကိုတက်ရောက်ဖို့ စစ်တပ်နဲ့ တိုက်ပွဲတွေဖြစ်ပွားတာမရှိတဲ့ တိုင်းရင်းသားလက်နက်ကိုင်  ၁၀ ဖွဲ့ တက်ရောက်ဖို့ စာရင်းပေးထားတာဖြစ်ပါတယ်။

ဒီအဖွဲ့တွေထဲမှာ ‘ဝ’ ပြည်သွေးစည်းညီညွတ်ရေးပါတီ (UWSP/UWSA)၊ အမျိုးသားဒီမိုကရေစီမဟာမိတ်တပ်မတော် (NDAA) မိုင်းလားအဖွဲ့၊ ရှမ်းပြည်တိုးတက်ရေးပါတီ (SSPP/SSA)၊  ရှမ်းပြည်ပြန်လည်ထူထောင်ရေးကောင်စီ (RCSS/SSA)၊ ရခိုင်ပြည်လွတ်မြောက်ရေးပါတီ (ALP)၊ ဒီမိုကရေစီအကျိုးပြုကရင့်တပ်မတော် (DKBA)၊ မွန်ပြည်သစ်ပါတီ (MNSP) ၊ ကရင်ငြိမ်းချမ်းရေးကောင်စီ (KNLA-PC)၊ ပအိုဝ်းအ မျိုးသားလွတ်မြောက်ရေးအဖွဲ့ချုပ် (PNLO)၊ လားဟူဒီမိုကရက်တစ်အစည်းအရုံး (LDU) ၁၀ ဖွဲ့ ပါဝင်ပါတယ်။

12 hours Ago

နိုင်ငံကိုလက်နက်ဖြင့်တည်ဆောက်နေသဖြင့် ထိခိုက်မှုကြီးမားနေဟု SNLD ခေါင်းဆောင်ပြော

ပညာကို အခြေခံပြီးတည်ဆောက်ရမယ့်ခေတ်ကို ရောက်နေပေမယ့် မြန်မာနိုင်ငံမှာ လက်နက်နဲ့ နိုင်ငံကို တည်ဆောက်သလိုဖြစ်နေလို့ ထိခိုက်မှုကြီးမားနေပြီး ရပ်ရွာအေးချမ်းသာယာရေးနဲ့ တရားဥပဒေစိုးမိုးရေးဟာ တဖြည်းဖြည်း ယုတ်လျော့ကျဆင်းနေတယ်လို့  SNLD ပါတီဥက္ကဋ္ဌ ဦးစိုင်းညွန့်လွင်က ပြောပါတယ်။ 

ဒီကနေ့ ၂၆ ရက်မနက်က ရှမ်းပြည်နယ်မြို့တော် တောင်ကြီးမှာ စတင်ကျင်းပတဲ့ တနိုင်ငံလုံးဆိုင်ရာပါတီညီလာခံအဖွင့်မိန့်ခွန်းမှာ ရှမ်းတိုင်းရင်းသားများဒီမိုကရေစီအဖွဲ့ချုပ် (SNLD) ပါတီဥက္ကဋ္ဌ အခုလို ပြောကြားသွားတာပါ။ 

ပါတီညီလာခံကို ၃ နှစ် ၁ ကြိမ် ကျင်းပတာဖြစ်ပြီး ၃ နှစ်တာကာလအတွင်း ပါတီလှုပ်ရှားမှုနဲ့ အားနည်းချက်အားသာချက်တွေကို ပါတီဥက္ကဋ္ဌက သုံးသပ်ပြောကြားရာမှာ လက်ရှိမြန်မာနိုင်ငံမှာ နိုင်ငံရေးပါတီတွေအတွက် ဘောင်ကျဉ်းနေပြီး လက်နက်ရှိမှ လူရာဝင်သလိုဖြစ်နေတယ်လို့ ပါတီဥက္ကဋ္ဌက ပြောပါတယ်။ 

“အခုခေတ် အခုအချိန်ကာလမှာ တိုင်းပြည်ကို တည်ဆောက်တဲ့နေရာမှာ ပညာကို အခြေခံပြီးတည်ဆောက်ကြရတဲ့ခေတ်ကို ရောက်နေပါပြီ။ ပညာကိုအခြေခံတဲ့ လူ့အဖွဲ့အစည်းဖြစ်နေပါပြီ။  ကံမကောင်းအကြောင်းမလှတော့ ကျနော်တို့က ကျနော်တို့နိုင်ငံမှာ လက်နက်နဲ့ နိုင်ငံကို တည်ဆောက်နေတာကို သတိပြုမိကြပါလိမ့်မယ်။ လက်နက်မရှိရင် မျက်နှာငယ်ရတယ်၊ လူရာမဝင်သလိုဖြစ်ရတယ်၊ နေရာတိုင်းမှာ လက်နက်ကိစ္စက အရေးပါ သလိုဖြစ်နေတယ်။  လက်နက်မရှိရဘူးလို့ ကျနော်တို့မဆိုလိုပါဘူး၊ လက်နက်ရှိဖို့ လိုအပ်ပါတယ်။ သို့သော် လက်နက်နေရာမှာပဲ လက်နက်ရှိဖို့လိုပါတယ်၊ လက်နက်မလိုတဲ့နေရာမှာ လက်နက် မရှိစေချင်ပါဘူး။ အခုတော့ ကျနော်တို့က နေရာတကာမှာ လက်နက်ဖြစ်နေတော့ တိုင်းပြည်တည်ဆောက်ရေးအတွက် လိုအပ်တဲ့ ပညာရဲ့အခန်းကဏ္ဍတွေပျောက်နေတယ်၊ တခြားပညာနဲ့ဆိုင်တဲ့ လုပ်ငန်းတွေနောက်ကျနေတယ်ဆိုတဲ့အတွက် အလွန်ကို ထိခိုက်မှုကြီးမားတယ်လို့ ပြောကြားလိုပါတယ်။ ယဉ်ကျေးတဲ့ လူ့အဖွဲ့အစည်းကို တည်ဆောက်နေချိန် ကျနော်တို့က လက်နက်ကိုပဲ ဦးစားပေးတဲ့ အဖွဲ့အစည်းဖြစ်နေဆဲ ဖြစ်နေတာကို ဝမ်းနည်းစွာတွေ့ရပါတယ်။ ဒါကိုပြုပြင်ပြောင်းလဲဖို့လိုတယ်လို့ ယူဆပါတယ်၊ လက်နက်ကိုင် ပဋိပက္ခတွေရဲ့ နောက်ဆက်တွဲဟာဆိုရင် ရပ်ရွာအေးချမ်းသာယာရေးနဲ့ တရားဥပဒေစိုးမိုးရေးက တဖြည်းဖြည်းနဲ့ ယုတ်လျော့ကျဆင်းနေပါတယ်။”

ကျန်းမာရေး၊ ပညာရေး၊ လူမှုရေး အခန်းကဏ္ဍ အလွန်အမင်းထိခိုက်နစ်နာနေတာ အင်မတန် ထိခိုက်ဝမ်းနည်းစရာကောင်းသလို နိုင်ငံရဲ့ စီးပွားရေးလုပ်ငန်း အဆမတန်ကျဆင်းနေတာနဲ့အမျှ ပြည်သူလူထုရဲ့ စားဝတ်နေရေး အသက်မွေးဝမ်းကျောင်းတွေကလည်းပဲ အင်မတန် ခက်ခဲကျပ်တည်းနေရ၊ ပြဿနာတွေ ရင်ဆိုင်နေရတယ်လို့ ဆိုပါတယ်။ 

လက်ရှိပဋိပက္ခတွေကို မဖြေရှင်းနိုင်ပါက ဒီနိုင်ငံဟာ ကျဆုံးနိုင်ငံအဖြစ် ဦးတည်နေကြောင်း၊ ဒီအတွက် SNLD အနေနဲ့ စိတ်ပူပန်မှုဖြစ်ရကြောင်း၊ ရင်ဆိုင်နေရတဲ့အခက်အခဲတွေကို နိုင်ငံရေးပါတီတရပ်အနေနဲ့ ထိထိရောက်ရောက် ကူညီဆောင်ရွက်ကာကွယ်မပေးနိုင်တဲ့အတွက် အလွန်ဝမ်းနည်းရတယ်လို့ SNLD ပါတီဥက္ကဋ္ဌ ဦးစိုင်းညွန့်လွင်က ပြောပါတယ်။ 

လက်ရှိအခြေအနေမှာ နိုင်ငံရေးဘောင်ကျဉ်းနေပေမယ့် SNLD ပါတီအနေနဲ့ကတော့ အကြိမ်ကြိမ် လဲကျ၊ အကြိမ်ကြိမ်ပြန်ထဆိုတဲ့ ထုံးနှလုံးမူပြီး ပါတီရဲ့ အမြင့်ဆုံး အန္တိမရည်မှန်းချက်ကို ဦးတည်ကာ ဆက်လက်ကြိုးစားဆောင်ရွက်သွားမှာဖြစ်ကြောင်း၊ တဦးတယောက်ရဲ့ အာဏာပေါ် မူမတည်ဘဲ စုပေါင်းခေါင်းဆောင်မှုနဲ့ ပါတီက ချမှတ်ထားတဲ့ မူဝါဒအတိုင်း ဆောင်ရွက်သွားမယ်၊ ပါတီနည်းဗျူဟာတွေ ပြောင်းလို့ရပေမယ့် ပါတီရဲ့ မဟာဗျူဟာ ပြောင်းလဲမှာ မဟုတ်ကြောင်း၊ ရာထူးကြောင့်ပဲဖြစ်စေ၊ ငွေကြေးကြောင့်ဖြစ်စေ၊ ဖိအားပေးမှုကြောင့်ဖြစ်စေ ပါတီမူဝါဒ ပြောင်းလဲမှာမဟုတ်ဘူးလို့ ဆိုပါတယ်။ 

ပါတီဝင်တိုင်းဟာ ပါတီရဲ့ ရည်မှန်းချက်ပန်းတိုင်ကို မျက်ခြည်မပြတ်ဖို့လိုအပ်ကြောင်း၊ ရည်မှန်းချက်မျက်ခြည်ပြတ်က လမ်းကြောင်းလွှဲသွားပြီး မူလရည်မှန်းချက်နဲ့ ပြဒါးတလမ်း သံတလမ်းဖြစ်သွားတတ်ကြောင်း၊ တချို့အဖွဲ့အစည်းမှာ အာဏာရှင်ကို တော်လှန်ဖို့ ရည်မှန်းဆောင်ရွက်ရင်း မျက်ခြည်ပြတ်တော့ သူတို့ကိုယ်တိုင် အာဏာရှင်ဖြစ်မှန်းမ သိဖြစ်သွားတာ၊ တချို့မှာ မူလရည်မှန်းချက်နဲ့ ပြောင်းပြန်ဖြစ်သွားတာတွေ ရှိတယ်လို့ ဆိုပါတယ်။ 

၂၀၂၀ ရွေးကောက်ပွဲမှာ SNLD ပါတီကိုယ်စားလှယ်တွေ သန့်သန့်ရှင်းရှင်း ဝင်ရောက်ယှဉ်ပြိုင် အနိုင်ရခဲ့ပေမဲ့ ရွေးကောက်ပွဲ ရလဒ်ပယ်ဖျက်ခံခဲ့ရကြောင်းနဲ့  အနိုင်ရ ကိုယ်စားလှယ်တွေအနေနဲ့ လွှတ်တော်ကိုယ်စားလှယ်အဖြစ် တာဝန်ထမ်းဆောင်ခွင့်မရပေမဲ့ ပြည်သူ့ကိုယ်စားလှယ်တွေ အဖြစ် သက်ဆိုင်ရာ မဲဆန္ဒယ်နယ်က ပြည်သူ့အကျိုးပြုလုပ်ငန်းတွေ ဆက်လက်လုပ်ဆောင်ကြဖို့ ပါတီ ခေါင်းဆောင်က တိုက်တွန်းပြောပါတယ်။ 

လက်ရှိမှာ ဘယ်လိုအခြေအနေမျိုးကို ကြုံတွေ့နေရပါစေ၊ ယဉ်ကျေးတဲ့လူ့အသိုင်းအဝိုင်းရဲ့ ထုံးစံဖြစ်တဲ့ နိုင်ငံရေးကိစ္စတွေကို စားပွဲဝိုင်းမှာ ဖြေရှင်းနိုင်ကြတဲ့ အခြေအနေမျိုးရောက်ရှိ လာအောင် အားသွန်ခွန်စိုက် ဝိုင်းဝန်းကြိုးပမ်းဆောင်ရွက်ကြရမယ်လို့ ပါတီဥက္ကဋ္ဌက ပြောသွားပါတယ်။ 

SNLD ဟာ ငွေကြေးအရာမှာဆင်းရဲပေမယ့် ဂုဏ်သိက္ခာအရာမှာကြီးမားကြောင်း၊ ပါတီဝင်အင်အားနည်းပါးပေမယ့် ထိုက်တန်တဲ့ နိုင်ငံရေးခွန်အားရှိကြောင်း၊ ပါတီဟာ ဒေသအရ ကျယ်ပြန့်မှုနည်းပေမယ့် စုစည်းညီညွတ်မှုခိုင်မာကြောင်း ပါတီဥက္ကဋ္ဌ ဦးစိုင်းညွန့်လွင်က ပြောသွားပါတယ။ 

SNLD ပါတီရဲ့ တနိုင်ငံလုံးဆိုင်ရာညီလာခံကို မေလ ၂၆ - ၂၇ နှစ်ရက်တာကျင်းပသွားမှာ ဖြစ်ပါတယ်။ 

ဒီကနေ့ ညီလာခံကို ပါတီဗဟိုအလုပ်အမှုဆောင်၊ အမှုဆောင်နဲ့ အဖွဲ့ဝင်တွေ မိတ်ဖက်ပါတီတွေရော  နိုင်ငံခြားသံရုံးမှ လေ့လာသူတွေပါ   စုစုပေါင်း  ၃၀၀ ကျော် တက်ရောက်ခဲ့ပါတယ်။ 

တခြားနိုင်ငံရေးပါတီနဲ့ လူထုအခြေပြုအဖွဲ့အစည်းတွေ စုစုပေါင်း ၂၉ ဖွဲ့ကလည်း ညီလာခံကို ကြိုဆိုကြောင်း သဝဏ်လွှာပေးပို့ခဲ့ကြပါတယ်။

17 hours Ago

ကရင်နီပြည်အတိုင်ပင်ခံကောင်စီ (KSCC) က အကျဉ်းသား ၂၄ ဦးကို ပြန်လွှတ်ပေး

ကရင်နီ (ကယား) ပြည်နယ်အတွင်း လက်ရှိ ဖမ်းဆီးထိန်းသိမ်းထားတဲ့ အကျဉ်းသား ၂၄ ဦးကို လွတ်ငြိမ်းချမ်းသာခွင့် ပေးလိုက်ကြောင်း ကရင်နီပြည်အတိုင်ပင်ခံကောင်စီ (KSCC) က ဒီကနေ့ မေ ၂၆ ရက်မှာ ထုတ်ပြန်ပါတယ်။

ကရင်နီပြည်နယ်မှာ ဖမ်းဆီးထားတဲ့ အကျဉ်းသား ၁၂၆ ယောက်ရှိပြီး နိုင်ငံတကာအဖွဲ့အစည်းတွေရဲ့ တောင်းဆိုမှု၊ လူသားချင်း စာနာထောက်ထားမှုနဲ့ အကျဉ်းသားတွေရဲ့ ခံဝန်ကတိတွေကြောင့် အခုလို ပြန်လွှတ်ပေးလိုက်တာ ဖြစ်ပါတယ်။

အရင်ကာလတွေမှာလည်း ဖမ်ဆီးခံရတဲ့ တရုတ်နိုင်ငံသား ၄ ယောက် အပါအဝင် အကျဉ်းသားတချို့ကို ပြန်လွှတ်ပေးခဲ့တယ်လို့လည်း KSCC က ဆိုပါတယ်။

စစ်ကောင်စီရဲ့ ထောက်လှမ်းရေးတပ်နဲ့ ဒလန်တွေ၊ စစ်ကောင်စီတပ်ဖွဲ့ဝင်တွေနဲ့ စစ်တပ်ရဲ့ အကြမ်းဖမ်းမှုတွေမှာ ဒေါက်တိုင်အဖြစ် ပါဝင်နေသူအားလုံးနဲ့ တခြားရာဇဝတ်မှု ကျူးလွန်သူတွေကို ကရင်နီပြည်ရဲဌာန၊ ပြည်သူ့ကာကွယ်ရေးတပ်နဲ့ တိုင်းရင်းသား လက်နက်ကိုင် အဖွဲ့အစည်းတွေကို ဆက်လက်ဖမ်းဆီး ထိန်းသိမ်းသွားမယ်လို့လည်း ကြေညာချက်မှာ ပါရှိပါတယ်။

ဒါကြောင့် ကရင်နီပြည်နယ်အတွင်းရှိ စစ်ကောင်စီရဲ့ ဒေါက်တိုက်အဖြစ် ပါဝင်ပတ်သက်နေသူတွေ အမြန်ဆုံး ပြင်ဆင်ပြီး ပြည်သူ့အစိုးရ၊ ပြည်သူ့တပ်ဖွဲ့တွေနဲ့ ဘက်ပြောင်း ပူးပေါင်းကြဖို့လည်း တိုက်တွန်းထားပါတယ်။

21 hours Ago

ဖက်ဒရယ်ပြည်ထောင်စုတည်ဆောက်ရေး အပါအဝင် ၇ ချက် စစ်ကောင်စီနှင့် မွန်ပြည်သစ်ပါတီ သဘောတူ

အာဏာသိမ်း စစ်ကောင်စီနဲ့  ငြိမ်းချမ်းရေး ဆွေးနွေးရာမှာ ပါတီစုံဒီမိုကရေစီစနစ်ကနေ ဖက်ဒရယ်ပြည်ထောင်စုတည်ဆောက်သွားဖို့နဲ့ မွန်ဒေသဖွံ့ဖြိုးရေးလုပ်ငန်းတွေ ဆက်လက် ဆောင်ရွက်သွားဖို့ အပါအဝင် အချက် ၇ ချက် သဘောတူ လက်မှတ် ရေးထိုးခဲ့တယ်လို့ မွန်ပြည်သစ်ပါတီက ပြောပါတယ်။

အန်အယ်လ်ဒီအစိုးရလက်ထက်တုန်းက တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးဆိုင်ရာ သဘောတူစာချုပ် NCA မှာ ပါဝင် လက်မှတ်ရေးထိုးခဲ့တဲ့ မွန်ပြည်သစ်ပါတီဟာ အာဏာသိမ်း စစ်ကောင်စီနဲ့ မေလ ၂၃ ရက်မှ  ၂၅ ရက်နေ့ထိ ၃ ရက်ကြာ နေပြည်တော်မှာ ငြိမ်းချမ်းရေးအတွက် သွားရောက် တွေ့ဆုံဆွေးနွေးခဲ့တာပါ။

အဲဒီငြိမ်းချမ်းရေးဆွေးနွေးပွဲမှာ ဖက်ဒရယ်ဒီမိုကရေစီပြည်ထောင်စု တည်ဆောက်သွားဖို့၊ တိုင်းရင်းသားတွေလိုချင်တဲ့ တန်းတူရေးနဲ့ ကိုယ်ပိုင်းပြဋ္ဌာန်းခွင့် ရရှိဖို့၊ လက်ရှိနိုင်ငံရေး အကျပ်အတည်း ဖြေရှင်းရာမှာ ပါဝင်သင့် ပါဝင်ထိုက်သူတွေအားလုံး ပါဝင်ရေးအတွက် တင်ပြဆွေးနွေးခဲ့တာပါ။

ဆွေးနွေးပွဲအပြီးမှာတော့ ပါတီစုံဒီမိုကရေစီစနစ် ခိုင်မာရေး၊ ပါတီစုံဒီမိုကရေစီစနစ်ကနေ ဖက်ဒရယ်ပြည်ထောင်စု တည်ဆောက်ရေး၊ ပြည်ထောင်စု ငြိမ်းချမ်းရေး ဖော်ဆောင်ရေး၊ မွန်ဒေသဖွံ့ဖြိုးရေး လုပ်ငန်းတွေ ဆက်လက် ဆောင်ရွက်သွားဖို့ အပါအဝင် အချက် ၇ ချက် သဘောတူ လက်မှတ်ရေးထိုးနိုင်ခဲ့တယ်လို့ မွန်ပြည်သစ်ပါတီ ပြောခွင့်ရ နိုင်အောင်မငေးက ပြောပါတယ်။

“ပါတီစုံ ဒီမိုကရေစီစနစ်ခိုင်မာရေးအတွက်လုပ်ပေးဖို့ အတည်ပြုနိုင်ခဲ့တယ်၊ နောက်တော့ ဒီမိုကရေစီနဲ့ ဖယ်ဒရယ်ပြည်ထောင်စုကို အခြေခံတဲ့ ဖယ်ဒရယ် ပြည်ထောင်စုတည်ဆောက်သွားဖို့လည်း ကျနော်တို့ထပ်မံပြီးတော့ အတည်ပြုခဲ့တယ်ခင်ဗျ။ နောက်တော့ ပြည်ထောင်စုငြိမ်းချမ်းရေး အကောင်အထည်ဖော်သွားဖို့လည်း ထပ်မံပြီးတော့ သဘောထားတူညီမှု ရရှိခဲ့ပါတယ်။ နောက်တော့ ဒေသဖွံ့ဖြိုးရေးလုပ်ငန်းတွေ ဆက်လက်အကောင်အထည်ဖော်ဖို့ အတွက်လည်း သဘောတူညီခဲ့ပါတယ်ခင်ဗျ။”

ဒါ့အပြင် အဲဒီဆွေးနွေးပွဲမှာ မွန်အများစု နေထိုင်တဲ့ ဒေသတွေရှိ စာသင်ကျောင်းတွေမှာ မွန်ဘာသာ တစ်ဘာသာကို သင်ရိုးညွှန်းတမ်းမှာ ထည့်သွင်း သင်ကြားနိုင်ရေးအတွက် မူဝါဒ ချမှတ် အကောင်အထည် ဖော်ဆောင်သွားဖို့ သဘောတူ လက်မှတ်ရေးထိုးခဲ့ပါတယ်။

ဆွေးနွေးပွဲမှာတော့ မွန်ပြည်သစ်ပါတီဘက်က တင်ပြလာတဲ့ မွန်အမျိုးသားနေ့မှာ တရားဝင် ရုံးပိတ် ရရှိရေး၊ မွန်သံဃာတော်တွေရဲ့ ရာမညနိကယာဂိုဏ်းကို တရားဝင်သံဃအဖွဲ့အစည်းအဖြစ် အသိအမှတ်ပြုရေးတို့ကို မှတ်တမ်းအဖြစ် ထားရှိခဲ့ပါတယ်။

မွန်ပြည်သစ်ပါတီက ဒီဆွေးနွေးပွဲဟာ လက်ရှိနိုင်ငံရေး အကျပ်အတည်းအတွက် အကောင်းဆုံး ရလဒ် တစ်ခု မဟုတ်ပေမယ့် အားရကျေနပ်မှု ရှိတယ်လို့ ပြောပါတယ်။

မွန်လူငယ်တစ်ဦးကတော့ တိုင်းရင်းသားတွေ လိုချင်နေတဲ့ ဖက်ဒရယ်ဒီမိုကရေစီ ပြည်ထောင်စုဟာ အာဏာသိမ်း စစ်ကောင်စီထံ သွားရောက် တောင်းဆိုလို့ မရသလို စစ်ကောင်စီက ဆောင်ရွက်ပေးမယ်ဆိုတဲ့ သဘောတူချက်တွေဟာ လက်ရှိနိုင်ငံရေး အခြေအနေအရ ဖြစ်လာမှာ မဟုတ်ဘူးလို့ မှတ်ချက်ပြုပါတယ်။

“စစ်ကောင်စီကပေးမယ့် ဖယ်ဒရယ်တို့၊ ကိုယ်ပိုင်ပြဋ္ဌာန်းခွင့်တို့၊ ကိုယ်ပိုင်အုပ်ချုပ်ခွင့်တို့ဆိုတာက ပြောရမယ်ဆိုရင် အိပ်မက်သက်သက်ပဲ တကယ်ကိုအိပ်မက်သက်သက်ပဲ။ တကယ်လို့သာ ဖယ်ဒရယ်ဒီမိုကရေစီပြည်ထောင်စု ဖယ်ဒရယ်သွားချင်တယ်ဆိုရင် စစ်ကောင်စီဆီမှာ သွားတောင်းလို့ မရဘူး။ ဖယ်ဒရယ်ဒီမိုကရေစီကို တကယ်သွားချင်တယ်ဆိုလို့ရှိရင် အခုတော်လှန် ရေးလုပ်နေတဲ့ တော်လှန်ရေးအဖွဲ့တွေ အားလုံးအားလုံး စုပေါင်းပြီး စစ်အာဏာရှင်ကို တိုက်ထုတ်နိုင်ပြီးတော့မှပဲ ဖယ်ဒရယ်ဒီမိုကရေစီ ပြည်ထောင်စုဆိုတာ တည်ဆောက်လို့ရမယ်။ ဒီကိစ္စကလွယ်လွယ်နဲ့ အကောင်အထည်ဖော်နိုင်ဖို့က မဖြစ်နိုင်သေးဘူးလို့ မြင်တယ်။” 

မွန်ပြည်သစ်ပါတီကတော့ ဒီဆွေးနွေးပွဲဟာ နိုင်ငံရေးပြဿနာကို နိုင်ငံရေးနည်းလမ်းနဲ့ ဖြေရှင်းရမယ်ဆိုတဲ့ NCA မူအတိုင်း လျှောက်လမ်းနေတဲ့အတွက်ကြောင့် စစ်ကောင်စီ ဖိတ်ခေါ်တဲ့ ငြိမ်းချမ်းရေးဆွေးနွေးပွဲကို တက်ရောက်ရတာလို့ ဆိုထားပါတယ်။

ဒါပေမဲ့ အခုလို မွန်ပြည်သစ်ပါတီက စစ်ကောင်စီ ဖိတ်ခေါ်တဲ့ ငြိမ်းချမ်းရေးဆွေးနွေးပွဲ သွားတဲ့အပေါ် မွန်လူထုအကြား သဘောထား ကွဲလွဲမှုတွေ ရှိနေတာပါ။

Photo-DSINFO

23 hours Ago
More News
Up