မြန်မာသတင်း

May 24, 2022

ပူတာအိုမြို့နယ်တွင် စစ်ကောင်စီတပ်ထောက်ပို့ယာဉ်တန်းကို ကေအိုင်အေ တိုက်ခိုက်

ကချင်ပြည်နယ်၊ ပူတာအိုမြို့နယ်ရှိ စစ်စခန်းကို ရိက္ခာလာပို့တဲ့ စစ်ကောင်စီယာဉ်တန်း မေလ ၂၃ ရက်မနက်က  ကချင်လွတ်မြောက်ရေးတပ်မတော် (ကေအိုင်အေ)က ပစ်ခတ်တိုက်ခိုက်ရာ စစ်ကား ၂ စီး ပျက်စီးခဲ့တယ်လို့  မျက်မြင်တွေ့တဲ့ ခရီးသွားတွေဆီက သိရပါတယ်။

ပူတာအိုမြို့နယ် တန်ဂျာကျေးရွာနဲ့ နှစ်မိုင်လောက် အကွာမှာရှိတဲ့ အင်တောင်ဘွမ်တောင်နဲ့ အင်ခေါခချောင်းအကြားမှာ ကေအိုင်အေနဲ့ စစ်ကောင်စီတပ် တိုက်ပွဲဖြစ်ပြီး ကားတစ်စီး လက်နက်ကြီးထိမှန်ကာ ချောက်ထဲကျသွားခဲ့တယ်လို့ တွေ့မြင်လိုက်တဲ့ ခရီးသွားတယောက်က ပြောပါတယ်။

“စစ်ကားတစ်စီးက ချောက်ထဲကျသွားပြီး ဆီတင်ကားတစ်စီးလည်းထိပြီး ဆီတွေဖိတ်ပြီး မောင်း ပြေးသွားတယ်။”

တိုက်ပွဲကြောင့် ပူတာအိုမြို့ကနေ မြစ်ကြီးနားမြို့ကို သွားမယ့် ကား‌တွေကို စစ်ကောင်စီဘက်က ဖြတ်သန်းသွားလာခွင့်မပြုဘဲ ပြန်လှည့်ခိုင်းတယ်လို့ သိရပါတယ်။

တိုက်ပွဲဖြစ်ပွားရာ လမ်းကြောင်းပေါ်မှာ ရှိတဲ့ ခရီးသည်တင်လိုင်းကားနဲ့ ကုန်တင်ကားတွေလည်း ပိတ်မိနေပြီး ရှေ့ဆက်သွားမရ နောက်ပြန်ဆုတ်မရဖြစ်နေတယ်လို့ ယာဉ်မောင်းတယောက်က ပြောပါတယ်။

ကေအိုင်အေ အမှတ်(၉) တပ်မဟာ - အမှတ်(၆) တပ်ရင်းနဲ့ အမှတ်(၂၆) တပ်ရင်းနယ်မြေကို မေ ၂၀ ရက် မွန်းလွဲပိုင်းက တကြိမ် ၊ မေ ၂၃ ရက် မနက်ပိုင်းက တကြိမ် စစ်ကြောင်းထိုး လာတဲ့ စစ်ကောင်စီတပ်ကို ကေအိုင်အေတပ်ဖွဲ့က မိုင်းဆွဲတိုက်ခိုက်ခဲ့တယ်လို့ ဒေသတွင်းသတင်းရင်းမြစ်‌ တွေဆီကသိရပါတယ်။

3 hours Ago

တနှစ်ကျော်အတွင်း စစ်တပ်က ပြည်သူ ၁၈၆၀ ကျော်ကို သတ်ဖြတ်၊ ၁၃၈၀၀ ကို ဖမ်းဆီး

မြန်မာနိုင်ငံမှာ မတရားအာဏာသိမ်း ၁ နှစ်ကျော်ကာလ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုကြောင့် နိုင်ငံတဝန်းအပြစ်မဲ့ ကျဆုံးပြည်သူ ၁,၈၆၁ ယောက်နဲ့ ဖမ်းဆီးထိန်းသိမ်းခံရသူပေါင်း ၁၃,၈၂၂ ယောက်ထိ ရှိလာခဲ့ပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၂ ခုနှစ်၊ မေ ၂၄ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြထားပါတယ်။

နွေဦးတော်လှန်ရေး ကာလအတွင်း ဒီနေ့အထိ ၁၀,၇၆၉ ယောက် လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၁,၀၇၈ ယောက်ကတော့ ထောင်ဒဏ် ချမှတ်ခံထားရပါတယ်။

ပြစ်ဒဏ်ကျခံရသူတွေထဲက အသက် ၁၈ နှစ်အောက် ကလေး ၂ ယောက် အပါအဝင် ၇၂ ယောက်ကတော့ သေဒဏ်ချမှတ်ခံထားရတယ်လို့ ဆိုပါတယ်။

ဖမ်းဝရမ်းထုတ်ခံထားရတာကြောင့် တိမ်းရှောင်နေသူ ၁,၉၇၉ ယောက်ထဲက မျက်ကွယ် သေဒဏ်ချမှတ်ခြင်း ခံထားရသူ ၄၁ ယောက် အပါအဝင် အယောက် ၁၂၀ ကတော့ မျက်ကွယ်ပြစ်ဒဏ် ချခံထားရပြီး သေဒဏ်ချမှတ်ခံထားရသူ စုစုပေါင်း ၁၁၃ ယောက်ထိ ရှိလာခဲ့ပြီ ဖြစ်ပါတယ်။

ဒါ့အပြင် အာဏာသိမ်းချိန်မှ ၂၀၂၂ ခုနှစ် ဧပြီလကုန်ထိ အကြမ်းဖက်စစ်အုပ်စုက မတရား ချိပ်ပိတ်သိမ်းဆည်းခံခဲ့ရတဲ့ နေအိမ်၊ အဆောက်အဦ အရေအတွက် စုစုပေါင်း ၅၇၀ ထက်မနည်းရှိခဲ့တယ်လို့လည်း အေအေပီပီက ဆိုပါတယ်။

စစ်ကိုင်းတိုင်းဒေသကြီး၊ ခင်ဦးမြို့နယ်၊ အင်တိုင်းလေးကျေးရွာကို အကြမ်းဖက်စစ်အုပ်စုတပ်က ပြီးခဲ့တဲ့ မေ ၂၀ ရက်နေ့လယ်ပိုင်းအချိန်မှာ လက်နက်ကြီးတွေနဲ့ ပစ်ခတ်စီးနင်းဝင်ရောက်လာခဲ့ပြီး မီးရှို့ခဲ့ကြောင်း သိရှိရပါတယ်။ အဆိုပါ ဖြစ်စဉ်မှာ ဒေသခံရွာသား ၃ ယောက်ဖြစ်ကြတဲ့ ကိုနိုင်ဦး၊ ကိုဝင်းဗိုလ်နဲ့ မလုံးခင်တို့ဟာ လက်နက်ကြီးထိမှန် သေဆုံးသွားခဲ့ပြီး အသက် ၇၅ နှစ်အရွယ် ဦးစိန်လင်းကတော့ မီးရှို့သတ်ဖြတ်ခံခဲ့ရကြောင်း သိရှိရပါတယ်။

ဒါ့အပြင် စစ်ကိုင်းတိုင်းဒေသကြီး၊ မြောင်မြို့မှာတော့ ပြီးခဲ့တဲ့ မေ ၂၂ ရက်နေ့လည် ၁ နာရီခွဲလောက်က အကြမ်းဖက်စစ်အုပ်စုတပ်က ရွှေဘုံသာကျေးရွာမှာ နေထိုင်တဲ့ ကိုစိုင်းညီညီကို PDF နဲ့ဆက်စပ်တယ်လို့ စွပ်စွဲကာ ဖမ်းဆီးသွားခဲ့ ကြောင်း သိရှိရပါတယ်။ ကိုစိုင်းညီညီဟာ မြို့ပေါ်ကို ဈေးသွားဝယ်တဲ့ အချိန်မှာ ဖမ်းဆီးခံခဲ့ရတာဖြစ်ကြောင်း သိရှိရပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေး ကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီး အချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်း ကြားနိုင်ကြောင်း အသိပေးထားပါတယ်။

4 hours Ago

မုံရွာ အပါအဝင် စစ်ကိုင်းတိုင်း မြို့နယ်များတွင် အင်တာနက်နှင့် ဖုန်းလိုင်းများ ပြတ်တောက်

စစ်ကိုင်းတိုင်း၊ မြို့နယ်တော်တော်များများမှာ  မေလ ၂၄ ရက် ဒီကနေ့ မနက် ၇ နာရီလောက်ကစပြီး နေ့လယ် ၁ နာရီ ဝန်းကျင်အထိ အင်တာနက်နဲ့ ဖုန်းလိုင်းတွေ ပြတ်တောက်သွားပါတယ်။

စစ်ကိုင်းတိုင်း၊ မုံရွာ၊ ကန့်ဘလူ၊ ယင်းမာပင်၊ ရွှေဘိုအပါအဝင် မြို့နယ်တော်တော်များများမှာ ဒီကနေ့ မေလ ၂၄ ရက် မနက် ၇ နာရီဝန်းကျင်ကစပြီး အင်တာနက်နဲ့ ဖုန်းလိုင်းတွေ ပြတ်တောက်သွားတယ်လို့ မုံရွာမြို့ခံတွေက ပြောပါတယ်။ 

စစ်ကိုင်းတိုင်းထဲ နဂိုကတည်းက အင်တာနက်လိုင်းရနေတဲ့ မုံရွာမြို့မှာပါ အင်တာနက်နဲ့ ဖုန်းလိုင်းတွေ ယာယီပြတ်တောက်သွားခဲ့တာဖြစ်ပြီး တချို့နေရာတွေမှာတော့ နေ့လယ် ၁ နာရီ ဝန်းကျင်လောက်မှာ ပြန်ရခဲ့တယ်လို့ဆိုပါတယ်။

ဒါ့အပြင် အင်တာနက် ဖြတ်တောက်ခံထားရတာ လနဲ့ချီ ကြာနေတဲ့ ယင်းမာပင်၊ ကန့်ဘလူနဲ့ ရွှေဘိုခရိုင်တွေထဲက မြို့နယ်တွေပါ ဖုန်းလိုင်းတွေ ပြတ်တောက်ခဲ့ပါတယ်။

အခုလို ဖြစ်တာဟာ  စစ်ကောင်စီက ရွာစဉ်လှည့်မီးရှို့တဲ့သတင်းတွေကို အမှောင်ချချင်တဲ့အတွက် ဖြတ်တောက်တာဖြစ်နိုင်တယ်လို့ မုံရွာမြို့ခံ နိုင်ငံရေးတက်ကြွလှုပ်ရှားသူ တစ်ယောက်က ခန့်မှန်းပြောဆိုပါတယ်။

စစ်ကောင်စီက မေလဆန်းပိုင်းကစပြီး ရွာတွေကို အကြမ်းဖက်ဝင်ရောက်ရာမှာ အင်တာနက်နဲ့ ဖုန်းလိုင်းတွေကို ကန့်သတ်ဖို့ Jumper စက်တွေကို ရွာတွေအနီးမှာ ဖွင့်ပြီးမှ ဝင်ရောက်လေ့ ရှိခဲ့တယ်လို့လည်း ဆိုပါတယ်။ 

မုံရွာဒေသခံ နိုင်ငံရေးတက်ကြွလှုပ်ရှားသူ ကိုစိုးဝင်းဆွေက “ဒီမှာကတော့ ရွာစဉ်လှည့်ပြီး မီးရှို့တဲ့ပြဿနာပေါ့ဗျာ။ နောက်တခုက အရင်ကထက်ပိုပြီးတော့ စစ်ကြောင်းတွေဖိလာတဲ့ ပြဿနာတော့ရှိတယ်ဗျ။ ဒါကတော့ ထင်ရှားတဲ့ပြဿနာတွေပေါ့။ မနေ့ကတည်းက ကျနော်တို့လူတွေနဲ့လည်းအဆက်အသွယ်ပြတ်နေတယ်ဗျ။ မနေ့ ညနေပိုင်းလောက်ကစပြီး မရတာဖြစ်မယ် ထင်တယ်။ ဖုန်းနဲ့ အင်တာနက်လိုင်းတွေ ဖြတ်တယ်ဆိုရင်တော့ သူတို့ တစ်ခုခု ဖြတ်လေးဖြတ်ပိုပြီး ဖြတ်တဲ့အနေအထား ရှိတယ်ဗျ။ ဘာဖြစ်လို့လဲဆိုတော့ ရွာစဉ်လှည့်မီးရှို့တဲ့ပြဿနာက နေ့စဉ် စစ်ဘေးရှောင်တွေ တိုးလာတယ်။ စစ်ဘေးရှောင်တွေနဲ့ ပတ်သက်တဲ့ အသံကလည်း ကမ္ဘာမှာက နိုင်ငံတကာမီဒီယာတွေက အသားပေး ဖော်ပြလာတယ်။ ကျန်တဲ့နိုင်ငံရေးကိစ္စတွေ အသာထားဦး၊ လူသားချင်းစာနာထောက်ထားမှုနဲ့ ကြည့်မယ်ဆိုရင်တောင် နိုင်ငံတကာအသိုင်းအဝိုင်းက လက်မခံနိုင်တဲ့ အနေအထားကြီး ဖြစ်တယ်။ သူတို့အနေနဲ့ သတင်းအမှောင်ချချင်တဲ့သဘော ပါမယ်လို့လည်း ယူဆတယ်ဗျ။”လို့ပြောပါတယ်။

ဒီနက်အစောပိုင်းကစပြီး ကန့်ဘလူ၊ ကောလင်း၊ ကနီ၊ ခင်ဦး၊ ကျွန်းလှ၊ မုံရွာ၊ ပုလဲ၊ ပလက်ဝ၊ ရေဦး၊ ယင်းမာပင်မြို့နယ်တွေမှာ အင်တာနက်နဲ့ဖုန်းလိုင်းတွေ ပေါ်လိုက် ပျောက်လိုက် ဖြစ်နေခဲ့တာပါ။ စစ်ကိုင်းတိုင်းမှာ နဂိုကတည်းက အော်ရီဒူးတစ်လိုင်းတည်းကို ဒေသခံတွေက အဓိကအသုံးပြုနေရပြီး MPT နဲ့ တယ်လီနောလိုင်းတွေက အသုံးပြုလို့မရတာ ကြာပြီလို့ ဒေသခံတွေက ပြောပါတယ်။

ခင်ဦးဒေသခံတစ်ဦးက “ညီမက မနေ့ကညကတည်းက တရေးနိုးအွန်လိုင်းကို ရတဲ့အချိန်မှာ ခင်ဦးဘက်က တော်လှန်ရေး Page တစ်ခုကိုင်နေတဲ့မောင်လေးက လှမ်းပြောတယ်။ အရင်တုန်းက ရေဦး၊ ခင်ဦး၊ ဒီပဲယင်း၊ ကျွန်းလှ အဲ့ဘက်တွေ မြို့နယ် ၉ မြို့နယ်ကို လိုင်းဖြတ်မယ်ပြောထားတယ်လို့လှမ်းပြောတယ်။ ညီမက ညတွင်းချင်းပဲ ကိုယ်နဲ့ အဆက်အသွယ်ရှိတဲ့ ရေဦး၊ ခင်ဦးက လူတွေကို အကုန်ပြောထားတယ်။ ဒီအခြေအနေအတွက် ပြင်ဆင်ထားဖို့ပေါ့နော်။ မနက် ၇ နာရီတုန်းက အဆက်အသွယ်ရသေးတယ်။ ၁၀ နာရီလောက်မှာလည်း ဖုန်းတကော ဝင်လာသေးတယ်။ စစ်ကြောင်းထိုး အခြေအနေတော့ မထူးသေးဘူးပေါ့နော်။ လိုင်းတွေကတော့ ပေါ်လိုက် ပျောက်လိုက် ဖြစ်နေတယ်ဆိုပြီးတော့ ကျသွားတယ်။ ပြန်ခေါ်လို့မရတော့ဘူးရှင့်။”

စစ်ကိုင်းတိုင်းထဲက စစ်ဘေးသင့်ပြည်သူတွေကို အင်တာနက်ကို အဓိကထားအသုံးပြုပြီး အကူအညီပေးနေရတာ ဖြစ်တဲ့အတွက် ဖုန်းနဲ့ အင်တာနက်လိုင်းတွေ မရတော့ဘူးဆိုရင် ပြည်သူတွေပိုပြီး အခက်အခဲကြုံလာရမှာ ဖြစ်ပါတယ်။

ခုရက်ပိုင်း မိုးတွေ ဆက်တိုက်ရွာနေတာကြောင့် တောတောင်ထဲမှာ အခက်အခဲဖြစ်နေတဲ့ ပြည်သူတွေရဲ့အသံနဲ့ သတင်းတွေကို ရယူနိုင်ဖို့လည်း ပိုပြီးခက်ခဲသွားမယ်လို့ ပရဟိတသမားတစ်ယောက်က ပြောပါတယ်။ 

ခင်ဦးဒေသခံပရဟိတသမားတစ်ဦးက “ခင်ဦးဘက်က မနက် ၇ နာရီလောက်က ဖုန်းရသေးတယ်။ အခုက ဖုန်းလိုင်းရော အင်တာနက်ရော မရတော့ဘူး။ ခင်ဦးမြို့ပေါ်ရော ရွာတွေရော မရတော့ဘူး။ ရေဦးနားတဝိုက်လည်း အဲဒီလိုပါပဲ။ အမျိုးတွေကို လိုက်ဆက်ကြည့်နေတာ မရတော့ဘူး။ မနက်ခင်းတုန်းက ရသေးတယ်။ ဖုန်းတွေ အင်တာနက်တွေ ရနေတာတောင် သူတို့က လုပ်ချင်ရာလုပ်နေတာ။ Local PDF Page တွေကလည်း တခြားနယ်ကနေ သူတို့အတွက် ကိုင်ပေးတာရှိတယ်။ သူတို့ တင်ထားတာ ဆိုရင်လည်း ဖုန်းလိုင်းတွေကို မရတော့တာပေါ့နော်။ ဖြစ်နေတဲ့သတင်းတွေကို ရနိုင်ဖို့က မလွယ်တော့ဘူးပေါ့။”

စစ်ကောင်စီက စစ်ကိုင်းတိုင်းထဲက ချောင်းဦး၊ ဆားလင်းကြီး၊ မြောင်တို့အပါအဝင် မြို့နယ်ပေါင်း ၂၀ ကျော်မှာ မတ်လ ၃ ရက် ည ၁၁ နာရီကစပြီး အင်တာနက်ဖြတ်တောက်ခဲ့ပါသေးတယ်။ အဲဒီထက်အရင် ကနီ၊ ဘုတလင်၊ ယင်းမာပင် စတဲ့ အင်တာနက်ဖြတ်တောက်ခံရတဲ့ မြို့တွေနဲ့ပါဆို စုစုပေါင်း စစ်ကိုင်းတိုင်းမှာ မြို့နယ်ပေါင်း ၃၀ ကျော်မှာ အင်တာနက် ဖြတ်တောက်ထားပါတယ်။ 

အင်တာနက်နဲ့ဖုန်းလိုင်းတွေ ဖြတ်တောက်တာနဲ့ပက်သက်လို့ စစ်ကောင်စီဘက်က သတင်းထုတ်ပြန်လေ့ မရှိပါဘူး။ 

စစ်ကိုင်းတိုင်းထဲမှာ စစ်ကောင်စီတပ်တွေက နယ်မြေရှင်းလင်းရေး စစ်ဆင်ရေးတွေ တိုးလုပ်လာတာကြောင့် ဒေသခံကာကွယ်ရေးတပ်ဖွဲ့တွေနဲ့ တိုက်ပွဲတွေ ဖြစ်ပွားနေပြီး အရပ်သားတွေရဲ့ နေအိမ်တွေ မီးရှို့ခံရတဲ့ အရေအတွက်ဟာလည်း တရက်ထက်တရက် တိုးလာနေပါတယ်။ 

5 hours Ago

ပြင်ဦးလွင်တွင် အမျိုးသား ၁ ဦး ပစ်ခတ်ခံရ

မန္တလေးတိုင်း၊ ပြင်ဦးလွင်မြို့နယ်၊ မြို့ရှောင်လမ်း၊ ထင်းရှူးတောအနီးမှာ မေ ၂၄ ရက် မနက် ၉ နာရီခွဲလောက်က  အမျိုးသားတယောက်  သေနတ်နဲ့ ပစ်ခတ်ခံခဲ့ရလို့ ဒဏ်ရာရသွားပါတယ်။

သေနတ်နဲ့ ပစ်ခံရသူဟာ နောင်လှိုင်ကျေးရွာအုပ်စု၊ ပါအယ်ကျေးရွာနေ အသက် ၃၈ နှစ်အရွယ် ဦးမဲ ဖြစ်ပြီး ထွန်စက်ငှားဖို့ ဖုန်းဆက်ချိန်းတဲ့နေရာကိုအသွားမှာ ပစ်ခံရတာဖြစ်တယ်လို့ ရဲတပ်ဖွဲ့နဲ့ နီးစပ်သူ တဦးက ပြောပါတယ်။

သေနတ်နဲ့ပစ်ခံရတဲအတွက် ဦးမဲမှာ လက်မောင်းကျည် ဖောက်ဝင်ဒဏ်ရာရရှိပြီး ပြင်ဦးလွင်ခရိုင်ဆေးရုံကြီးမှာ တင်ပို့ထားတယ်လို့ သိရပါတယ်။

မေလ ၂၃ ရက်ကလည်း ပြင်ဦးလွင်မြို့နယ် အောင်ချမ်းသာကျေးရွာအုပ်ချုပ်ရေးမှူး ဦးအောင်နိုင် သေနတ်နဲ့ ပစ်သတ်ခံခဲ့ရပါတယ်။

6 hours Ago

ထန်တလန်မြို့တိုက်ပွဲ၌ စစ်ကောင်စီတပ်သား ၆ ဦးသေဆုံး၊ ၈ ဦးထက် မနည်းဒဏ်ရာရ

ချင်းပြည်နယ် ထန်တလန်မြို့မှာ  မေ ၂၃ ရက်က ဖြစ်ပွားခဲ့တဲ့ မြို့တွင်းတိုက်ပွဲမှာ စစ်ကောင်စီဘက်က ၆ ယောက်သေဆုံးပြီး ၈ ယောက်ထက် မနည်း ဒဏ်ရာရရှိခဲ့တယ်လို့ CDF-ထန်တလန်ရဲ့ ပြန်ကြားရေးတာဝန်ခံက ပြောပါတယ်။

စစ်ကောင်စီတပ်တွေဟာ မနက်ပိုင်း ၆ နာရီလောက်ကစပြီး ထန်တလန်မြို့အမှတ် ၁ ရပ်ကွက်ထဲ ထိုးစစ်ဆင်လာတာကြောင့် CDF-ထန်တလန်နဲ့ မွန်းလွဲပိုင်း ၂ နာရီကျော်အထိ တိုက်ပွဲပြင်းထန်ဖြစ်ပွားခဲ့တယ်လို့ ဆိုပါတယ်။ 

အဲဒီတိုက်ပွဲအတွင်းမှာ စစ်ကောင်စီတပ်သား ၆ ယောက် သေဆုံးကာ ၈ ယောက်ထက် မနည်း ဒဏ်ရာရရှိခဲ့ပြီး CDF-ထန်တလန် တပ်ဖွဲ့မက ရဲဘော် ၄ ယောက် ဒဏ်ရာရရှိခဲ့ကာ မစိုးရိမ်ရဘူးလို့ ဆိုပါတယ်။

စစ်ကောင်စီတပ်သားတွေဟာ ထန်တလန်မြို့အမှတ် ၁ ရပ်ကွက်က နေအိမ်တွေကို မီးရှို့ဖျက်ဆီးခဲ့တာကြောင့် နေအိမ်အတော် များများ မီးလောင်ပြာကျသွားခဲ့တယ်လို့ CDF-ထန်တလန်ရဲ့ ပြန်ကြားရေးတာဝန်ခံက ပြောပါတယ်။

စစ်ကောင်စီတပ်တွေဟာ ၂၀၂၁ ခုနှစ် စက်တင်ဘာလကနေ မနေ့က မေ ၂၃ ရက်နေ့အထိ  ထန်တလန်မြို့က ပြည်သူတွေရဲ့ နေအိမ်တွေကို ၂၈ ကြိမ်လောက် မီးရှို့ဖျက်ဆီးခဲ့ကြလို့ ဘုရား ကျောင်း ၈ ကျောင်းအပါအဝင် လူနေအိမ်ခြေ ၁ ထောင်ကျော် မီးလောင်ပြာကျခဲ့ရတယ်လို့ သိရပါတယ်။

ထန်တလန်မြို့မှာ အိမ်ခြေ နှစ်ထောင်ကျော်ရှိပြီး လူဦးရေ ၁ သောင်းလောက် နေထိုင်ကြကာ စစ်ကောင်စီတပ်​တွေ ထိုးစစ်ဆင်တိုက်ခိုက် မီးရှို့ဖျက်ဆီးတာတွေကြောင့် ဒေသခံ ပြည်သူတွေ ဘေးလွတ်ရာ နယ်စပ်ဘက်တွေနဲ့ အိန္ဒိယနိုင်ငံ မီဇိုရမ်ပြည်နယ်ဘက်ကို ထွက်ပြေး တိမ်းရှောင်နေကြရတယ်လို့ သိရပါတယ်။

စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကတော့ ကျေးရွာတွေကို မီးရှို့ ဖျက်ဆီးတာဟာ သူတို့ရဲ့ လက်ချက်မဟုတ်ဘူးလို့ အမြဲတမ်းငြင်းဆန်လေ့ရှိသလို PDF တပ်ဖွဲ့တွေက ပြုလုပ်တာလို့ သတင်းစာရှင်းလင်းပွဲတွေမှာ ပြောဆိုလေ့ရှိပါတယ်။

အဲဒီတိုက်ပွဲအတွင်းမှာ စစ်ကောင်စီဘက်က သေဆုံးဒဏ်ရာရတယ်လို့ CDF-ထန်တလန်ရဲ့ တာဝန် ခံက ပြောဆိုထားပေမဲ့ ဒီဗွီဘီက သီးခြားအတည် မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

6 hours Ago

စစ်ကောင်စီစေလွှတ်သူများကို စစ်ပညာသင်ပေးမှုရပ်တန့်ရန် ဂျပန်နိုင်ငံတွင် ဆန္ဒပြ

အကြမ်းဖက်မြန်မာစစ်ကောင်စီက စေလွှတ်သူတွေကို စစ်ပညာသင်ကြားပေးတဲ့ ဂျပန်အစိုးရအနေနဲ့ ရပ်တန့်ဖို့အပါအဝင် အချက် ၄ ချက်ပါ ဆန္ဒပြတောင်းဆိုပွဲကို ဂျပန်ရောက်မြန်မာအင်အားစုတွေက မေ ၂၄ ရက်နေ့ညနေပိုင်း တိုကျိုမြို့ ဂျပန် နိုင်ငံခြားရေးဝန်ကြီးဌာနရှေ့မှာ ပြုလုပ်ခဲ့ကြပါတယ်။

“ကျမတို့ ဒီနေ့လာရောက်ဆန္ဒပြရတာက ဂျပန်အစိုးရက မြန်မာပြည်သူများအပေါ် ဆိုးဝါးတဲ့ လူ့အခွင့်အရေး ချိုးဖောက်ကျူးလွန်လျက်ရှိနေတဲ့ မြန်မာစစ်ကောင်စီကို အကူအညီပေးတာတွေ ရပ်တန့်ပေးဖို့၊ NUG အစိုးရကို အမြန်ဆုံးအသိအမှတ်ပြုဆက်ဆံဖို့ အပါအဝင် အမေရိကန်သမ္မတကြီးလည်း ဂျပန်ရောက်နေချိန်မှာ တိုက်ဆိုင်ပြီး လုပ်ရတာပါ” လို့ ဆန္ဒပြပွဲဦးဆောင်သူတဦးဖြစ်တဲ့ မသီရိသစ္စာက ဒီဗွီဘီကို ပြောပါတယ်။

ဂျပန်ကာကွယ်ရေးလေတပ်ကွပ်ကဲမှု ကောလိပ်မှာ ၂၀၁၆ ခုနှစ် သြဂုတ်လမှ ၂၀၁၇ ခုနှစ်အထိ စစ်သင်တန်း တက်ရောက်ခဲ့သူ စစ်ကောင်စီရဲ့လေတပ် ဒုဗိုလ်မှူးကြီး လွှမ်းမိုးက မြန်မာပြည်သူအပေါ် ဆိုးဝါးသော လူ့အခွင့်အရေး ချိုးဖောက်မှုများ ကျူးလွန်နေတာကို Human Rights Watch နဲ့  Justice For Myanmar တို့က မေ ၂၃ ရက်နေ့က ထုတ်ဖော်ခဲ့တဲ့ အထောက်အထားတွေအပါအဝင် ဂျပန်ရောက်မြန်မာအင်အားစုတွေရဲ့ သဘောထားတွေကို ဂျပန်နိုင်ငံခြားရေးဝန်ကြီးဌာန အရှေ့တောင်အာရှ တာဝန်ခံအရာရှိတွေက ဆန္ဒပြနေစဉ် ဝန်ကြီးကိုယ်စား လက်ခံယူခဲ့ကြပါတယ်။

“အရင် ကျနော်တို့လာတွေရင် အထောက်အထားမတွေ့ရသေးဘူး ပြောပြောနေလို့ အခုလို သူတို့လေ့ကျင့်ပေးခဲ့တဲ့ စစ်ကောင်စီ လေတပ်ဒုဗိုလ်မှူးကြီး လွှမ်းမိုးက အခုမြန်မာပြည်မှာ ရက်စက်ကြမ်းကြုတ်တဲ့ ရာဇဝတ်မှုတွေ ကျူးလွန်ကြောင်း အထောက်အထားတွေနဲ့ လာပေးရတာပါ”လို့ ဆန္ဒပြပွဲဦးဆောင်သူတဦးဖြစ်တဲ့ ဦးမြင့်ဆွေက ရှင်းပြပါတယ်။

တောင်းဆိုခဲ့တဲ့စာထဲမှာ ဂျပန်စစ်သင်တန်းဆင်း စစ်အရာရှိတွေက မြန်မာပြည်သူတွေကို အကြမ်းဖက်သတ်ဖြတ်နေတဲ့အတွက် စစ်သင်တန်းပေးတာ ချက်ချင်းရပ်ပေးဖို့၊ အမျိုးသားညီညွတ်ရေးအစိုးရ NUG ကို အမြန်ဆုံးအသိမှတ်ပြုပေးဖို့၊ ရုရှားကို ဂျပန်အစိုးရက စီးပွားရေး ပိတ်ဆို့ကာ သံတမန် ဝန်ထမ်းအချို့ကို နှင်ထုတ်ခဲ့သလို စစ်ကောင်စီကိုလည်း အလားတူ ပြုလုပ်ပေးဖို့၊ မြန်မာဒီမိုကရေစီအသွင်ကူးပြောင်းရေးနှင့် ငြိမ်းချမ်းရေးအတွက် ကုလသမဂ္ဂ အာဆီယံ၊ G7 အပါအဝင် နိုင်ငံတကာ နဲ့အတူ ထိရောက်စွာဆောင်ရွက်ပေးဖို့တို့ ပါဝင်တယ်လို့ ပေးအပ်ခဲ့သူ မဆွေဆက်အေးက ဒီဗွီဘီကို ပြောပါတယ်။

ဆန္ဒပြပွဲကို ဂျပန်ရောက်မြန်မာအင်အားစုတွေသာမက မြန်မာ့အရေးစိတ်ဝင်စားတဲ့ ဂျပန်လူမျိုးတွေပါ လာရောက်ပူးခဲ့ကြပြီး တောင်းဆိုချက်တွေကို ဂျပန်-မြန်မာ နှစ်ဘာသာနဲ့ ဆန္ဒပြ တောင်းဆိုခဲ့ကြပါတယ်။

သတင်း-ဓာတ်ပုံ- ဇော်ဇော်လှိုင်

6 hours Ago

ပေါင်မြို့နယ်တွင် လေဆင်နှာမောင်း တိုက်ခတ်သဖြင့် လူနေအိမ် ၁၀၀ ကျော် ထိခိုက်ပျက်စီး

မွန်ပြည်နယ် ပေါင်မြို့နယ်၊ အလှပ်ကျေးရွာမှာ မေ ၂၄ ရက် မနက် ၁၁ နာရီခွဲက လေဆင်နှာမောင်း တိုက်ခတ်တာကြောင့် လူနေအိမ်အလုံး ၁၀၀ ကျော် ထိခိုက်ပျက်စီးခဲ့တယ်လို့ လူမှုကယ်ဆယ်ရေး အဖွဲ့တွေက  ပြောပါတယ်။

လေဆင်နှာမောင်း တိုက်ခတ်တဲ့အတွက် ဘုန်းကြီးကျောင်း တကျောင်းအပါအဝင် လူနေအိမ် အလုံး ၁၀၀ ကျော် အမိုးလန်တာနဲ့ ယိုင်လဲတာတွေ ဖြစ်ပေါ်ခဲ့သလို အဲဒီထဲမှာတော့ လူနေအိမ် ၃ လုံး နေလို့ မရတော့အထိ ပြိုကျ ပျက်စီးခဲ့တာပါ။

ပြိုကျ ပျက်စီးသွားတဲ့ လူနေအိမ်ရှိ အမျိုးသားတဦး ထိခိုက်ဒဏ်ရာရရှိခဲ့တဲ့အတွက် အလှပ်တိုက်နယ်ဆေးရုံကို ပို့ဆောင်ထားပြီး ဒဏ်ရာ အခြေအနေကတော့ အသက်အန္တာရယ် မစိုးရိမ်ရဘူးလို့ ဆိုပါတယ်။

လေဆင်နှာမောင်း ဒဏ်ကြောင့် လေဘေးသင့်ခဲ့တဲ့ ပြည်သူတွေကို နီးစပ်ရာ ဆွေမျိုးနေအိမ်တွေမှာ ပြောင်းရွှေ့ နေရာချထားပါတယ်။

လက်ရှိမှာတော့ ထိခိုက်ပျက်စီးသွားနေတဲ့ လူနေအိမ်တွေကို လူမှုကယ်ဆယ်ရေးအဖွဲ့တွေ၊ သက်ဆိုင်ရာဌာနတွေနဲ့ ဒေသတွေက ရှင်းလင်းတာတွေ လုပ်ဆောင်နေပါတယ်။

ပင်လယ်ကမ်းစပ်အနီးရှိတဲ့ ပေါင်မြို့နယ် အလှပ်ကျေးရွာဟာ နှစ်စဉ် လေဆင်နှာမောင်းဒဏ်ကို ရင်ဆိုင်နေရသလို ပြီးခဲ့တဲ့ ဧပြီလကလည်း မိုးသက်လေပြင်း ကျရောက်တဲ့အတွက် လူနေအိမ် ၁၀၀ ကျော် ထိခိုက်ပျက်စီးခဲ့ပါတယ်။

7 hours Ago

သိမ်ဇရပ်မြို့ရှိ စစ်ကောင်စီတပ်နှင့် မြို့မရဲစခန်း တိုက်ခိုက်ခံရ

မွန်ပြည်နယ်၊ ကျိုက်ထိုမြို့နယ်၊ သိမ်ဇရပ်မြို့အခြေစိုက် စစ်ကောင်စီ ခြေမြန်တပ်ရင်း ခလရ(၂၀၇)တပ်နဲ့ မြို့မရဲစခန်းကို မေလ ၂၄ ရက် မနက်ပိုင်းက လက်နက်ကြီးနဲ့ ပစ်ခတ်တိုက်ခိုက်ခဲ့တယ်လို့ ကျိုက်ထိုတော်လှန်ရေးအင်အားစု KRF က ပြောပါတယ်။

အဲဒီစစ်ကောင်စီတပ်နဲ့ မြို့မရဲစခန်းကို ကရင်အမျိုးသားလွတ်မြောက်ရေးတပ်မတော် KNLA ၊ PDF ပူးပေါင်းအဖွဲ့က လက်နက်ကြီးနဲ့ ပစ်ခတ်တိုက်ခိုက်ခဲ့တာ ဖြစ်ပါတယ်။

KNLA ပူးပေါင်းအဖွဲ့က ပစ်ခတ်လိုက်တဲ့ လက်နက်ကြီးကျည်ဟာ စစ်ကောင်စီ ခလရ(၂၀၇)တပ်ရဲ့ ဗဟိုကင်းအတွင်း ကျရောက် ပေါက်ကွဲခဲ့တာကြောင့် စစ်ကောင်စီတပ်သာ ၁ ဦး သေဆုံးပြီး ၂ ဦး ထိခိုက်ဒဏ်ရာရှိခဲ့ပါတယ်။

သိမ်ဇရပ်မြို့မရဲစခန်း တိုက်ခိုက်မှုမှာတော့ ထိခိုက်မှု ရှိ၊ မရှိ ဆက်လက် စုံစမ်းနေဆဲ ဖြစ်ကြောင်းနဲ့ ထပ်မံတိုက်ခိုက်နိုင်တဲ့ အခွင့်အရေး ရှိခဲ့ပေမဲ့ မိသားစုတွေကို ငဲ့ညှာတဲ့အားဖြင့် သတိပေးတဲ့အနေနဲ့သာ ပြုလုပ်ခဲ့တယ်လို့ KRF တာဝန်ရှိသူ တစ်ဦးက ပြောပါတယ်။

ဒါကြောင့် စစ်ကောင်စီတပ်ဖွဲ့ဝင်တွေအနေနဲ့ ကျိုက်ထိုတော်လှန်ရေးအင်အားစုကို အချိန်မီ ဆက်သွယ်ပေးဖို့နဲ့ နောက်ထပ် တစ်ကြိမ် အခွင့်အရေးမျှ ပေးမှာ မဟုတ်ဘူးလို့ ဆိုပါတယ်။

ကျိုက်ထိုမြို့နယ်မှာ စစ်ကောင်စီတပ်နဲ့ KNLA ပူးပေါင်းတပ်ဖွဲ့တို့ကြား မကြာခဏ ဆိုသလို တိုက်ပွဲတွေ ဆက်လက်ဖြစ်ပွားနေပြီး အဲဒီတိုက်ပွဲအတွင်း စစ်ကောင်စီဘက်က အထိနာနေတာ ဖြစ်ပါတယ်။

7 hours Ago

အာဆီယံဘုံသဘောတူညီချက် ၅ ရပ်ကို အကောင်အထည်ဖော်ရန် မြန်မာကို Quad အဖွဲ့ဝင် ၄ နိုင်ငံ ပူးပေါင်း တောင်းဆို

မြန်မာနိုင်ငံအတွက် အဖြေတစ်ခုကို ဦးဆောင်ရှာဖွေနေတဲ့ အာဆီယံအဖွဲ့အစည်းရဲ့ ကြိုးပမ်းအားထုတ်မှုနဲ့ အာဆီယံအထူးကိုယ်စားလှယ်ရဲ့ အခန်းကဏ္ဍကို ဆက်လက်အား ပေးထောက်ခံကြောင်းနဲ့ အာဆီယံ ဘုံသဘောတူညီချက် ၅ ရပ်ကို မြန်မြန်ဆန်ဆန် အကောင်အထည်ဖော်ဆောင်နိုင်ဖို့ အင်ဒို-ပစိဖိတ်ဒေသ ကမ္ဘာ့အင်အားကြီး နိုင်ငံ ၄ နိုင်ငံ Quad ရဲ့ ခေါင်းဆောင်တွေက တောင်းဆိုလိုက်ပါတယ်။

အမေရိကန်၊ ဩစတြေးလျ၊ အိန္ဒိယနဲ့ ဂျပန် ၄ နိုင်ငံ ပူးပေါင်းထားတဲ့ Quad အဖွဲ့ရဲ့ ခေါင်းဆောင်တွေဖြစ်ကြတဲ့ အမေရိကန်သမ္မတ ဂျိုးဘိုင်ဒင်၊ အိန္ဒိယ ဝန်ကြီးချုပ် နရင်ဒြာမိုဒီ၊ ဂျပန်ဝန်ကြီးချုပ် ဖူမိအိုခိရှိဒနဲ့ ဩစတြေးလျဝန်ကြီးချုပ် အန်ထော်နီအယ်လ်ဘာနီတို့ဟာ  ဂျပန်နိုင်ငံ၊ တိုကျိုမြို့မှာ ကျင်းပတဲ့ ထိပ်သီးဆွေးနွေးပွဲအပြီး မေ ၂၄ ဒီကနေ့ ရက်စွဲနဲ့ ပူးတွဲကြေညာချက် ထုတ်ပြန်တောင်းဆိုလိုက်တာ ဖြစ်ပါတယ်။

စိုးရိမ်ဖွယ်ရာ လူသားချင်းစာနာမှုဆိုင်ရာ ဆင်းရဲဒုက္ခတွေ ဖြစ်ပေါ်စေခဲ့ပြီး ဒေသတွင်းတည်ငြိမ်မှုဆိုင်ရာ စိန်ခေါ်မှုတွေကိုလည်း ဖြစ်ပွားစေတဲ့ မြန်မာနိုင်ငံရဲ့ အကျပ်အတည်းနဲ့ ပတ်သက်ပြီး အလွန်အမင်း စိုးရိမ်နေဆဲဖြစ်တယ်လို့လည်း ထုတ်ပြန်ချက်ထဲမှာ ဖော်ပြပါတယ်။

ဒါ့အပြင် မြန်မာနိုင်ငံမှာ အကြမ်းဖက်မှုတွေကို ချက်ချင်းရပ်တန့်ရေး၊ နိုင်ငံခြားသားတွေအပါအဝင် နိုင်ငံရေးအရ ဖမ်းဆီးထိန်းသိမ်းထားသူတွေအားလုံး ပြန်လွှတ်ပေးရေး၊ အပြုသဘောဆောင်တဲ့ အပြန်အလှန် ဆွေးနွေးမှုတွေနဲ့ ထိတွေ့ ဆက်ဆံမှုပြုလုပ်ရေး၊ လူသားချင်းစာနာမှုဆိုင်ရာ အကူအညီတွေရောက်ရှိရေးနဲ့ ဒီမိုကရေစီမြန်မြန်ဆန်ဆန်ပြန်လည်ဖော်ဆောင်ရေးတို့အတွက်လည်း ဆက်လက် တောင်းဆိုထားပါတယ်။

မြန်မာနိုင်ငံမှာ စစ်တပ်အာဏာသိမ်းယူထားခဲ့တဲ့ ကာလဟာ တနှစ်ကျော် ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေး မတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး ကဏ္ဍအသီးသီးမှာ အဘက်ဘက်က ကျဆင်းနေခဲ့ပြီး အကြမ်းဖက်စစ်ကောင်စီတပ်တွေနဲ့ ဒေသခံပြည်သူ့ကာကွယ်ရေးတပ်ဖွဲ့တွေ၊ တိုင်းရင်းသားလက်နက်ကိုင် တပ်ဖွဲ့တွေကြား မြေပြင်တိုက်ပွဲတွေလည်း ပြင်းထန်နေတာ ဖြစ်ပါတယ်။

ဒါ့အပြင် စစ်ကောင်စီတပ်တွေ ရွာလုံးကျွတ် မီးရှို့ဖျက်ဆီးမှုကြောင့် ထွက်ပြေးတိမ်းရှောင်နေကြရတဲ့ အရပ်သားပြည်သူတွေ တနေ့တခြား တိုးပွားလာနေသလို နိုင်ငံတဝန်း ခုခံတော်လှန်စစ်ပွဲ အရှိန်မြှင့်နေခဲ့တာ ဖြစ်ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ချက်အရ ၁ နှစ်ကျော်ကာလအတွင်း စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုကြောင့် အပြစ်မဲ့ ကျဆုံးပြည်သူ ၁,၈၆၀ နီးပါးနဲ့ ဖမ်းဆီး ထိန်းသိမ်းခံရသူပေါင်း ၁၃,၇၈၉ ယောက်ထိ ရှိလာခဲ့ပြီလို့ ဆိုပါတယ်။

8 hours Ago

ဂျပန်စစ်သင်တန်းဆင်း မြန်မာလေတပ်အရာရှိ ၁ ဦး လေကြောင်းတိုက်ခိုက်မှု ကျူးလွန်ရာတွင် ဦးဆောင်ပါဝင်နေ

ဂျပန်နိုင်ငံမှာ စစ်သင်တန်းတက်ခဲ့သူတွေထဲက တယောက်ဖြစ်တဲ့  စစ်ကောင်စီလေတပ်မှ ဒုဗိုလ်မှူးကြီး လွှမ်းမိုး ဦးဆောင်တဲ့ တပ်ဖွဲ့ဝင်တွေဟာ အပြစ်မဲ့ပြည်သူတွေအပေါ်  တရားလက်လွတ် လေကြောင်းတိုက်ခိုက်မှုတွေ ကျူးလွန်ခဲ့တယ်လို့ လူ့အခွင့်အရေး လှုပ်ရှားသူတွေက ပြောလိုက်ပါတယ်။

ဒါကြောင့် ဂျပန်အစိုးရအနေနဲ့ မြန်မာစစ်တပ်က အရာရှိတွေကို စစ်သင်တန်းပေးနေတဲ့ အစီအစဉ်ကို ချက်ချင်းရပ်ဖို့နဲ့ သင်တန်းအစီအစဉ်မှာ ပါဝင်ခဲ့တဲ့ တခြားသင်တန်းသားတွေကိုလည်း နိုင်ငံတကာစစ်ပွဲဥပဒေကို ချိုးဖောက်ပြီး စစ်ဆင်ရေးတွေမှာ ပါဝင်ခဲ့ခြင်း ရှိ မရှိ စုံစမ်းစစ်ဆေးသင့်တဲ့အကြောင်း Human Rights Watch နဲ့ Justice For Myanmar အဖွဲ့တို့က တောင်းဆိုလိုက်ပါတယ်။

All Japan Defense Association နဲ့ ကာကွယ်ရေးဝန်ကြီးဌာနတို့ရဲ့ မှတ်တမ်းကနေ သိရှိရတဲ့ အချက်အလက်တွေအရ မြန်မာ့လေတပ်မှ ဒုဗိုလ်မှူးကြီးလွှမ်းမိုးဟာ ၂၀၁၆ ခုနှစ်၊ သြဂုတ်လမှ ၂၀၁၇ ခုနှစ်၊ မတ်လအထိ ဂျပန်နိုင်ငံရှိ လေတပ်ဌာနချုပ်နဲ့ စစ်ဦးစီးကောလိပ်တို့မှာ သင်တန်းတက်ရောက်ခဲ့သူ ဖြစ်ပါတယ်။

ဂျပန်မှာသင်တန်းတက်ခဲ့တဲ့ စစ်ကောင်စီလေတပ်က ဒုဗိုလ်မှူးကြီး လွှမ်းမိုး ဟာ လက်ရှိ မကွေးလေတပ်စခန်းဌာနချုပ်မှာ ဒုတိယလေတပ်စခန်းဌာနချုပ်မှူး အဖြစ် တာဝန်ယူထားသူလည်း ဖြစ်တယ်လို့ဆိုပါတယ်။

ဂျပန်အစိုးရအနေဖြင့် ပြီးခဲ့တဲ့ ၂၀၁၅ ခုနှစ်ကစပြီး မြန်မာနိုင်ငံမှ ဗိုလ်လောင်းတွေနဲ့ အရာရှိတွေကို ကာကွယ်ရေးတပ်ဖွဲ့ဆိုင်ရာ ဥပဒေအရ လက်ခံခဲ့ပြီး စစ်ပညာသင်ကြားပေးခဲ့တာပါ။

ဒီဥပဒေက ကာကွယ်ရေးဝန်ကြီးရဲ့ ခွင့်ပြုချက်နဲ့ ကာကွယ်ရေးဝန်ကြီးဌာနကျောင်းတွေမှာ နိုင်ငံခြားတိုင်းပြည်တွေက သင်တန်းသားတွေကို သင်တန်းပေးတာနဲ့ ပညာသင်ကြားတာကို ခွင့်ပြုပေးထားတာပါ။

ဒါပေမဲ့ ဂျပန်အစိုးရဟာ မြန်မာနိုင်ငံမှာ စစ်တပ်အာဏာသိမ်းပြီးနောက်ပိုင်း ၂၀၂၁ ခုနှစ် အတွင်းမှာ ဗိုလ်လောင်း ၂ ဦး အပါအဝင် အရာရှိ ၂ ဦး ကိုလက်ခံခဲ့ပါတယ်။ ဒီ့အပြင် ၂၀၂၂ ခုနှစ်မှာလည်း နောက်ထပ် ဗိုလ်လောင်း ၂ ဦးနဲ့ အရာရှိ ၂ ဦးကို သင်တန်းပေးဖို့ ထပ်မံလက်ခံခဲ့ပါသေးတယ်။ 

ဒါကြောင့် ဂျပန်အစိုးရရဲ့ သင်တန်းအစီအစဉ်က ရက်စက်ကြမ်းကြုတ်တဲ့ ရာဇဝတ်မှုတွေမှာ ဂျပန်နိုင်ငံဟာ ကြံရာပါဖြစ်နိုင်တာကြောင့် ဒီသင်တန်းအစီအစဉ်ကို ချက်ချင်းရပ်ဆိုင်းဖို့ ဂျပန်အစိုးရထံ အမေရိကန်အခြေစိုက် လူ့အခွင့်အရေးစောင့်ကြည့်အဖွဲ့ဖြစ်တဲ့ Human Rights Watch အဖွဲ့က ပြီးခဲ့တဲ့ ၂၀၂၁ ခုနှစ် ဒီဇင်ဘာလက တောင်းဆိုခဲ့ပါတယ်။ 

အဆိုပါတောင်းဆိုမှုနဲ့ပတ်သက်ပြီး ဂျပန်ကာကွယ်ရေးဝန်ကြီးဌာန အရာရှိတဦးကတော့ သူတို့အနေနဲ့ ဂျပန်နိုင်ငံမှာ လေ့ကျင့်သင်ကြားခဲ့တဲ့ ဗိုလ်လောင်းတွေနဲ့ အရာရှိတွေဟာ မြန်မာနိုင်ငံသို့ ပြန်လည်ရောက်ရှိပြီးနောက် သူတို့ရဲ့လုပ်ဆောင်မှုတွေနဲ့ပတ်သက်လို့  ဘာသတင်းအချက်အလက်မှ မရရှိခဲ့ကြောင်း တုံ့ပြန် ဖြေကြားခဲ့ပါတယ်။

ဧပြီ ၂၆ ရက်က လုံခြုံရေးဆိုင်ရာ ပါလီမန်ကော်မတီ အစည်းအဝေးမှာ ကာကွယ်ရေးဝန်ကြီးဌာန တာဝန် ရှိသူတဦးက ဂျပန်ကာကွယ်ရေးဝန်ကြီးဌာနမှာ လေ့ကျင့်သင်ကြားခဲ့တဲ့ မြန်မာစစ်တပ်မှ ဗိုလ်လောင်းတွေနဲ့ အရာရှိတွေဟာ လက်ရှိမှာ ဘယ်လို ရာထူးတာဝန်တွေ ရယူထားကြောင်းကို ကာကွယ်ရေးဝန်ကြီးဌာနက အတိုင်းအတာတခုအထိ သိရှိတယ်လို့ ပြောပေမဲ့ တခြားနိုင်ငံတွေနဲ့ ဂျပန်နိုင်ငံရဲ့ ဆက်ဆံရေးကြောင့် အသေးစိတ်အချက်အလက်တွေကို ထုတ်ဖော်ပြောကြားဖို့ ငြင်းဆိုခဲ့ပါတယ်။ 

Human Rights Watch အဖွဲ့ရဲ့ အာရှအစီအစဉ် အရာရှိဖြစ်သူ တပ်ပီကာဆိုင်းက “ဂျပန်နိုင်ငံအဖို့ မြန်မာစစ်တပ်က ရှည်လျားတဲ့ သမိုင်းကြောင်းတလျောက် စစ်ရာဇဝတ်မှုတွေကို အရေးယူမခံရဘဲ ကျူးလွန်နေကြောင်း လုံလောက်တဲ့ သက်သေအထောက်အထားတွေ ရှိနေပြီး ဖြစ်ပါတယ်။ သူတို့ရဲ့ စစ်သင်တန်းအစီအစဉ်မှာ ဒီအကြမ်းဖက် မြန်မာစစ်တပ်ကို ထည့်ထားတာဟာ အကြမ်းဖက် မြန်မာစစ်တပ်ရဲ့ ရက်စက်ကြမ်းကြုတ်တဲ့ ရာဇဝတ်မှုတွေမှာ ဂျပန်နိုင်ငံကို ကြံရာပါ ပတ်သတ်စေတဲ့ အန္တရာယ်ကို ဖြစ်စေပါတယ်။ ဒါကြောင့် ဂျပန်အစိုးရအနေနဲ့ သူတို့ရဲ့ သင်တန်း အစီအစဉ်တွေက မြန်မာစစ်တပ်ရဲ့ ရိုင်းစိုင်းတဲ့ ဓလေ့စရိုက်ကို ပြောင်းလဲနိုင်လိမ့်မယ် ဆိုတဲ့ အဓိပ္ပါယ်မရှိ တောင့်တနေတဲ့ အတွေးတွေကို စွန်းလွှတ်သင့်ပါပြီ” လို့ ပြောပါတယ်။

Justice For Myanmar မှ ပြောရေးဆိုခွင့်ရှိသူ မရတနာမောင်ကလည်း “မြန်မာစစ်တပ်က ရက်စက်ကြမ်းကြုတ်တဲ့ ရာဇဝတ်မှုတွေ ကျူးလွန်နေတာကို သိလျက်နဲ့ မြန်မာစစ်တပ်ရဲ့ ဗိုလ်လောင်းတွေကို ဆက်ပြီး လေ့ကျင့်ပေးနေတာကို ဂျပန်နိုင်ငံအနေနဲ့ ဆင်ခြေ ဆင်လက်တွေပေးပြီး ကာကွယ်ပြောဆိုနေတာက လုံးဝ လက်ခံနိုင်စရာမရှိပါဘူး။ ဂျပန်အစိုးရရဲ့ ဗိုလ်လောင်းသင်တန်းအစီအစဉ်က စစ်ကောင်စီကို ပိုပြီး အတင့်ရဲစေပါတယ်။ အဲ့ဒီ့စစ်သင်တန်းတွေကို ချက်ချင်းရပ်တန့်ဖို့၊ မြန်မာစစ်တပ်နဲ့ သူရဲ့ စီးပွားရေးလုပ်ငန်းစုကြီးတွေနဲ့ စီးပွားရေးလုပ်ကိုင်တာတွေ အဆုံးသတ်ဖို့ အပါအဝင် မြန်မာစစ်တပ်က ကြီးလေးတဲ့ လူ့အခွင့်အရေး ချိုးဖောက်မှုတွေ ကျူးလွန်နေတာကို ရပ်တန့်ဖို့ ခိုင်မာအားကောင်းတဲ့ အရေးယူ ဆောင်ရွက်မှု တွေ အမြန်ဆုံး လုပ်ဆောင်ဖို့အတွက် ဂျပန်အစိုးရကိုတောင်းဆိုပါတယ်” လို့ ဆိုပါတယ်။

စစ်တပ်အာဏာသိမ်းပြီးနောက် စစ်ကောင်စီတပ်တွေဟာ စစ်ကိုင်းတိုင်း၊ မကွေးတိုင်း၊ ကချင်ပြည်နယ်၊ ချင်းပြည်နယ်၊ ကရင်နီ၊ ကရင်ပြည်နယ်စတဲ့ ဒေသတွေမှာ လေကြောင်းတိုက်ခိုက်မှုတွေ အပါအဝင် တရားလက်လွတ် ဖမ်းဆီး ပစ်ခတ်သတ်ဖြတ်၊ မီးရှို့လူသတ်မှုအပါဝင် တခြားသော ရက်စက်ကြမ်းကြုတ်မှုတွေကိုပါ ဆက်တိုက် ကျူးလွန်နေတာပါ။

မကွေးတိုင်းဒေသကြီးအတွင်းမှာလည်း လေကြောင်းတိုက်ပွဲတွေ အပါအဝင် ပြင်းထန်တဲ့ တိုက်ပွဲတွေကြောင့် အရပ်သားပြည်သူ  ၅၀၀၀၀ ကျော်ဟာ ထွက်ပြေးတိမ်းရှောင်ခဲ့ရပါတယ်။ 

8 hours Ago

ထိုင်းတောင်ပိုင်း ရနောင်းသို့ MOU လုပ်သားအယောက် ၃၀ စတင်ဝင်ရောက်

ထိုင်းနိုင်ငံမှာ ကိုဗစ်-၁၉ ကူးစက်မှုကြောင့် အိမ်နီးချင်းနိုင်ငံက နှစ်နိုင်ငံသဘောတူ MOU အလုပ်သမား တင်သွင်းမှု ၂ နှစ်ကျော် ဆိုင်းငံ့ထားပြီး ဒီမေလကစ ပြန်လည်လက်ခံနေရာမှာ ထိုင်း တောင်ပိုင်း ရနောင်းမြို့မှာ ဒီကနေ့ မြန်မာရွှေ့ပြောင်းလုပ်သားအယောက် ၃၀ စတင်ဝင်ရောက်လာပါတယ်။ 

သူတို့တွေဟာ ပွင့်ဖူးအောင် ဝန်ဆောင်မှုကုမ္ပဏီရဲ့စီစဉ်မှုနဲ့ ကော့သောင်းမှ ရနောင်းသို့ ရေလမ်းမှ ဝင်လာပြီး ချွန်းဖွန်းခရိုင် ဒူးရင်းသီးစက်ရုံမှာ အလုပ်သွားလုပ်ကြမယ်လို့ မြန်မာနိုင်ငံသားများအရေး ပူးတွဲလှုပ်ရှားမှုကော်မတီဥက္ကဋ္ဌ ဦးမိုးကြိုးက ဒီဗွီဘီကို ပြောပါတယ်။ 

“ဒီကနေ့မနက် ရနောင်းနဲ့ ကော့သောင်းကြား ရေလမ်းကြောင်းခရီးကနေ MOU လုပ်သား ၃၀ ဦး ဝင်လာပါတယ်ခင်ဗျ။ အမျိုးသား ၂၀ ဦးနဲ့ အမျိုးသမီး ၁၀ ဦးပါ။ ပွင့်ဖူးအောင်မြန်မာ အေဂျင်စီနဲ့ ချိတ်ဆက်ပြီးတော့ ထိုင်းနိုင်ငံထဲ အလုပ်လုပ်ဖို့လာတာပါ။  ထိုင်းတောင်ပိုင်း ချွန်းဖွန်းမြို့ G and A Thai Fruit Co., Ltd  ဒူးရင်းသီးမုန့်စက်ရုံမှာ သွားလုပ်မယ်လို့ သိရတယ်၊ အစကတော့ ဒီကနေ့မှာ  ၂၀၀ ကျော်ဝင်မယ်လို့ သတင်းတွေထွက်ပေါ်ပြီး အခု ၃၀ ပဲ ဝင်တယ်ဆိုတော့ နောက်နေ့တွေ ဆက်ဝင်လာဦးမယ်လို့ ခန့်မှန်းရပါတယ်ခင်ဗျ။”

ကော့သောင်း- ရနောင်းလမ်းကြောင်းကနေ ဝင်ရောက်တာဟာ ဒါပထမဆုံးအကြိမ်ဖြစ်ပြီး မြဝတီ- မဲဆောက် လမ်းကြောင်းကနေတော့ ဒီမေလထဲမှာ ၁၁၁၅ ဦး ဝင်ရောက်ခဲ့ပြီး ဖြစ်ပါတယ်။  

ထိုင်းနိုင်ငံရဲ့ အလုပ်သမား လိုအပ်ချက်အရ မြန်မာနိုင်ငံက အလုပ်သမားပေါင်း ၁ သိန်းခွဲကို ခေါ်ယူဖို့ demand letter ပို့ထားပေမဲ့ ဒီမေလထဲမှာ MOU လုပ်သားပေါင်း ၁၁၄၅ ဦးသာ ရောက်ရှိလာလို့ ဆင့်ပါးစပ် နှမ်းပက်သလို မဖြစ်စလောက်ကလေးသာ ရှိတယ်လို့ ဦးမိုးကြိုးက ပြောပါတယ် ။ 

တရားဝင်လမ်းကြောင်းကနေ အနည်းငယ်သာ ပို့ဆောင်နိုင်ပေမယ့် တရားမဝင်လမ်းကြောင်းကနေ ခိုးဝင်သူတွေ ပိုများလာကြောင်း၊ ဒီလထဲမှာ တရားမဝင်မြန်မာ ၂၃၁၉ ဦးနဲ့ ပွဲစား ၂၁ ဦး အဖမ်းခံရတယ်လို့ ဆိုပါတယ်။ တရားမဝင်လမ်းကြောင်းကနေ ဝင်ခြင်းအားဖြင့် ငွေကုန်၊ လူပန်း၊ အဖမ်းခံရသလို အခန့်မသင့်က မတော်တဆထိခိုက်မှုဖြစ်ပြီး အသက်အန္တရာယ်ပါ ကြုံတွေ့နိုင်ကြောင်း၊ ဒီလ ၁၆ ရက်နေ့က ချိုင်းနတ်ခရိုင်ထဲမှာ  မဲဆောက်လမ်းကနေ ပြောင်းဖူး တင်ကား ၁ စီး နဲ့ လိုက်ပါသွားတဲ့ တရားမဝင်မြန်မာတွေ ကားထဲမှာ အသက်ရှုကြပ်ပြီး မြန်မာအမျိုးသမီး ၂ ဦး အသက်ဆုံးရှုံးခဲ့ရတယ်လို့ ဆိုပါတယ်။ 

ဒါကြောင့် ခုလိုအဖြစ်ဆိုးတွေမကြုံရအောင် သက်ဆိုင်ရာမြန်မာအလုပ်သမားဝန်ကြီးဌာနအနေနဲ့ တရားဝင်လုပ်သားစေလွှတ်ခြင်းကို လျင်မြန်ချောမွေ့စွာ ဆောင်ရွက်ပေးဖို့ တောင်းဆိုကြောင်း ဦးမိုးကြိုးက ပြောသွားပါတယ်။ 

9 hours Ago

တော်လှန်ရေးအတွက် လွိုင်ကော် PDF က ရောင်းချသည့် တောင်တန်းဂီတလက်မှတ် ကန်ဒေါ်လာ ၁၀၀ မှစတင်ဝယ်ယူနိုင်

မြန်မာ့နွေဦးတော်လှန်ရေးအတွက် လွိုင်ကော် PDF က တောင်တန်းဂီတ လက်မှတ်တွေကို ဒီကနေ့ စတင်ရောင်းချနေပြီး လက်မှတ်တစောင်ကို အမေရိကန်ဒေါ်လာ ၁၀၀ ကနေ စတင်ပြီးတော့ အားပေးဝယ်ယူနိုင်မှာ ဖြစ်ပါတယ်။

တောင်တန်းခရီးသွား လက်မှတ်ဆိုတာကတော့ လွိုင်ကော်မြို့အပါအဝင် နိုင်ငံအနှံ့က မြို့လေးတွေက လှပတဲ့နေရာတွေကို လည်ပတ်ဖို့အတွက် ခရီးသွား Package ပါဝင်တဲ့ လက်မှတ်ဖြစ်ကာ အရေးတော်ပုံအောင်တာနဲ့ စတင် အသက်ဝင်မယ်လို့ ဆိုပါတယ်။

အသွားအပြန် ကားလက်မှတ်၊ တည်းခို စားသောက် နေထိုင်၊ သွားလာမှုအပြင် လည်ပတ်စရာ နေရာတွေကိုပါ အစီအစဉ် ဆွဲပေးထားပြီး ထူးခြားချက်ကတော့ အရေးတော်ပုံကာလမှာ တိုက်ပွဲဖြစ်ခဲ့၊ မီးလောင်ခဲ့၊ ပျက်စီးခဲ့၊ စစ်မြေပြင် ဖြစ်ခဲ့တဲ့ နေရာတွေဆီကို ခရီးထွက်ရဖို့ စီစဉ်ပေးမှာ ဖြစ်တဲ့အပြင် တော်လှန်ရေး ရဲဘော်တွေ နေခဲ့တဲ့နေရာတွေမှာ ရဲဘော်တွေ အိပ်ခဲ့တဲ့ တဲတွေနဲ့ ညအိပ်ကြည့်ဖို့၊ ထမင်းထုတ်တွေ စားကြည့်ဖို့ စတဲ့ အစီအစဉ်တွေနဲ့အတူ ရဲဘော်တွေရဲ့ ဘဝအတိုင်း နေကြည့်ဖို့ ပြန်ဖန်တီးပေးမယ့် အစီအစဉ်တခုဖြစ်တယ်လို့ ဆိုပါတယ်။

ဝယ်ယူနိုင်မယ့် လက်မှတ်အမျိုးအစားနဲ့ ဈေးနှုန်းတွေအနေနဲ့ အမေရိကန်ဒေါ်လာ ၁၀၀၊ ၂၀၀ နဲ့ ၃၀၀ စီအသီးသီး သတ်မှတ်ထားပြီး နွေဦးတော်လှန်ရေးအတွက် တထောင့်တနေရာကနေ အားပေးထောက်ပံ့ကူညီလိုသူတွေအနေနဲ့ PDF Loikaw page ကတဆင့် ဆက်သွယ်နိုင်မှာဖြစ်ကာ ထိုင်း၊ စင်ကာပူ၊ မလေးရှား၊ ဂျပန်၊ ကိုရီးယားစတဲ့ နိုင်ငံတွေအပြင် အနောက်ဉရောပနဲ့ အမေရိကန်စတဲ့ နိုင်ငံတွေ အသီးသီးကတဆင့်လည်း အားပေးနိုင်မယ်လို့ ဆိုပါတယ်။

ဒီရောင်းချမှုကိုတော့ ပြည်တွင်းဘဏ်တွေရဲ့ အခက်အခဲကြောင့် ပြည်ပဘဏ်တွေနဲ့သာ ချိတ်ဆက်ဝယ်ယူလို့ ရနိုင်မှာဖြစ်တာမို့ နားလည်ပေးကြဖို့နဲ့ နိုင်ငံခြားမှာရှိတဲ့ ရင်းနှီးတဲ့ အသိမိတ်ဆွေတွေကနေတဆင့် ဆက်သွယ် ဝယ်ယူပေးစေလိုကြောင်းလည်း လွိုင်ကော် PDF က တိုက်တွန်းထားပါတယ်။

“ကျနော်တို့ ဒေသဟာ ရက်စက်ကြမ်းကြုတ်တဲ့ စစ်ပွဲတွေနဲ့ မထိုက်တန်ပါဘူး။ ငြိမ်းချမ်းမှု နဲ့သာ ထိုက်တန်ပါတယ်။ ဒီစစ်ပွဲတွေ အမြန်အဆုံးသတ်ဖို့ လိုအပ်ပါတယ်။ ဒါကြောင့်… လက်မှတ်များ ဝယ်ယူအားပေးခြင်းဖြင့် PDF လွိုင်ကော်နဲ့ ကရင်နီပြည်ကို ထောက်ပံ့ကူညီပေးကြဖို့ အထူး တိုက်တွန်းလိုက်ရပါတယ်။ 

“အမှောင်လမ်း ဆီက

အောင်ပန်း ချီ မ မယ့်

တောင်တန်း ဂီတ”

လက်မှတ် ဘယ်လို ဝယ်ရမလဲ?

အဆင့် (၁) -  ဟောဒီ PDF Loikaw page ရဲ့ messenger ကို စာပို့ပြီး ဘဏ့်အကောင့်ကို တောင်းပေးပါ။ ရရှိမယ့် ဘဏ့်အကောင့်တွေက 

အာရှနိုင်ငံများဖြစ်တဲ့ . . 

Thailand

Singapore

Malaysia

Japan

Korea

အနောက်နိုင်ငံများဖြစ်တဲ့ . . 

Europe 

USA

နိုင်ငံတွေရဲ့ ဘဏ့်အကောင့်တွေပဲ ဖြစ်ပါတယ်။ မိမိအဆင်ပြေရာ ဘဏ့်အကောင့်ကို တောင်းယူ နိုင်ပါတယ်။

အဆင့် (၂) - page admin က ပို့လာတဲ့ bank acc ကို ငွေအရင်ဆုံးလွှဲရမှာ ဖြစ်ပါတယ်။ 

အဆင့် (၃) - ငွေလွှဲလိုက်တဲ့ screenshot ကို PDF Loikaw Facebook Page ရဲ့ Messenger ကို ပို့ပေးပါ။

အဆင့် (၄) - Screenshot ကို ပို့လိုက်တဲ့အခါမှာ သက်ဆိုင်ရာ တာဝန်ခံတယောက်က Link လေးတခု ပေးပါလိမ့်မယ်။ အဲ့ဒီ Link လေးထဲ ဝင်ပြီး မိမိရဲ့ အမည်၊ မှတ်ပုံတင် အမှတ်ရဲ့ နောက်ဆုံး နံပါတ် ၄ လုံး၊ Email နဲ့ အခြား ဆက်သွယ်ရမယ့် လိပ်စာတခုကို ဖြည့်စွက်ပေးဖို့ လိုအပ်ပါတယ်။

အဆင့် (၅) - ဒါပြီးရင်တော့ လက်မှတ်ဝယ်ယူခြင်းအစီစဉ်က ပြီးဆုံးပြီဖြစ်ပြီး မကြာခင်မှာ လက်မှတ် ပြန်ပို့လာပါလိမ့်မယ်။ လက်မှတ်ကို ၁၀ ရက်တွင်း အရောက်ပို့ပေးမှာ ဖြစ်ပါတယ်။ 

အကယ်လို့ အသေးစိတ် သေချာ သိချင်တယ်ဆိုရင်လည်း page admin ကို မေးမြန်းနိုင်ပါတယ်။

9 hours Ago

မြင်းခြံမြို့နယ်၌ စစ်ကောင်စီတပ်များ ၅ ရက်ဆက် တိုက်ခိုက်ခံရ

မြင်းခြံမြိုနယ်မှာ မေ ၁၉ ရက်မှ ၂၃ ရက်အထိ ၅ ရက်အတွင်း စစ်ကောင်စီအဖွဲ့ဝင်တွေကို ၅ ကြိမ်တိုက်ခိုက်ခဲ့တယ်လို့ နွားထိုးကြီး မြို့နယ်ဒေသကာကွယ်ရေးအဖွဲ့က ပြောပါတယ်။

မေ ၁၉ ရက် နေ့လယ် ၂ နာရီလောက်မှာ မြင်းခြံမြို့အရှေ့ပိုင်းက အ.ထ.က ၂ ကျောင်းအတွင်း တပ်စွဲထားတဲ့ စစ်ကောင်စီအဖွဲ့ကို ဝင်ရောက်တိုက်ခိုက်ခဲ့ရာ စစ်ကောင်စီအဖွဲ့ဝင် ၂ ဦး ထိခိုက်သေဆုံးပြီး ၃၊ ၄ ယောက်လောက် ထိခိုက်ဒဏ်ရာရနိုင်တယ်လို့  နွားထိုးကြီးမြို့နယ် ဒေသကာကွယ်ရေးအဖွဲ့က ဆိုပါတယ်။

မြင်းခြံမြို့နယ် ကွမ်းစိုက်ကျေးရွာရှိ အထက်တန်းကျောင်းအတွင်း တပ်ဆွဲထားတဲ့ အကြမ်းဖက်စစ်ကောင်စီအဖွဲ့ကိုလည်း မေ ၂၁ ရက်နေ့ နေခင်း ၁ နာရီလောက် ပစ်ခတ်တိုက်ခိုက်ခဲ့ပြီးပြီး ၁ ယောက်သေဆုံးကာ ၁ ယောက် ဒဏ်ရာရခဲ့တယ်လို့ သိရပါတယ်။

NPDF အဖွဲ့ရဲ့ တာဝန်ရှိသူက "မြင်းခြံတုန်းက အရဲတော့ ကိုးရတာပေါ့။ ဘန်ကာမှာ စက်သေနတ်တွေ ဘာတွေချထားတာတော့ ရှိတယ်။ အဲဒါကို အလစ်အငိုက်ဝင်ပစ်တာ။ မြို့လည်းမြို့ပေါ်ဆိုတော့ သူတို့ကလည်း သိပ်သတိမထားတာလည်းပါတယ်။ ကျောင်းထဲက သစ်ပင်အောက်မှာ တယောက်က ကုလားထိုင် ပေါ် ထိုင်နေတာ။ ကျန်တဲ့သူတွေက ခုံတန်းပေါ်မှာ ထိုင်နေကြတာ။ ကုလားထိုင်ပေါ်က တယောက်ရယ် ခုံပေါ်မှာ ထမင်းစားနေတာလားမသိဘူး အဲဒီတယောက်ရယ် ရလိုက်တယ်။ မြင်းခြံတုန်းကတော့ လမ်းသွားတဲ့သူတွေက ဆိုင်ကယ်တွေ ကားတွေက လမ်းဘေးထိုးရပ်ပေးကြတယ်ဗျ။ ကွမ်းစိုက်မှာတုန်းက နှစ်ယောက်ယှဥ်ထိုင်နေတာကို ပထမတခါဆွဲတော့ တယောက်က ခွေကျသွားတယ်ဗျာ။ နောက်ထပ်ဆွဲမယ်လုပ်တော့ ဖောကားတစ်စီးက ဝင်လာတာနဲ့ စောင့်ပြီးထပ်ပစ်တာ။ အဲဒါ စလိုးဒေါင်းကျော်တာရော ရှေ့မှာ လိုက်ထရက်တစီးနဲ့ ထော်လာဂျီတစီးက ယှဥ်လျက်ကြီးမောင်းလာတော့ ကောင်းကောင်း မပစ်လိုက်ရဘူး။ ပြည်သူတွေကို စခတွေနဲ့ ဝေးဝေးနေဖို့ သတိပေးချင်ပါတယ်" လို့ ပြောပါတယ်။

နွားထိုးကြီး-မြင်းခြံလမ်းပေါ်က ကန်နှောင်းရွာ အနီးမှာလည်း မေ ၂၂ ရက် ညနေ ၅ နာရီ ၃၀ မိနစ်လောက်က စစ်ကောင်စီအဖွဲ့ဝင်တွေ စီးနင်းလိုက်ပါလာတဲ့ ကားတစီးကို မိုင်းဆွဲ တိုက်ခိုက်ခဲ့ပေမယ့် သေဆုံးထိခိုက်မှုကိုတော့ အတိအကျမသိရဘူးလို့ နွားထိုးကြီး မြို့နယ်ဒေသကာကွယ်ရေးအဖွဲ့တွေက ပြောပါတယ်။

“ကားက ရဲကားပါ။ နယ်ထိန်းတွေပါတာများတယ်။ ဒီကောင်တွေက နွားထိုးကြီးက လောင်းကစားဝိုင်းတို့ ဘီယာဆိုင်တို့ပေါ့နော် ဆက်ကြေးကောက်ပြီးတော့ ညနေဆိုရင် မြင်းခြံဖက်က KTV တို့ ဘာတို့ သွားတာကိုး။ အဲလိုသွားတဲ့အသွားမှာ ၅ နာရီခွဲမှာ ကျနော်တို့က မိုင်းဆွဲလိုက်တာ” လို့ နွားထိုးကြီးမြို့နယ်ဒေသကာကွယ်ရေးအဖွဲ့ ရဲ့ တာဝန်ရှိသူက ပြောပါတယ်။

နွားထိုးကြီးမြို့ပေါ်မှာတော့ အဲဒီဖြစ်စဥ်အပြီးမှာ နယ်ထိန်း ၃ ယောက်ပျောက်နေပြီး နေပြည်တော် ကို သင်တန်းသွားတယ်လို့ သတင်းလွှင့်ထားကြောင်းလည်း ဒေသခံတဦးက ပြောပါတယ်။

မေ ၂၃ ရက်မှာတော့ ရန်ကုန်-မန္တလေး အမြန်လမ်း မိုင်တိုင် ၃၁၅ နဲ့ ၃၁၆ ကြားမှာ စစ်ကောင်စီအဖွဲ့ရဲ့ စစ်ကားကြီးတစီးကို မနက် ၈ နာရီလောက် မိုင်းဆွဲတိုက်ခိုက်ခဲ့သလို နွားထိုးကြီးမြို့အရှေ့ဘက် ဝက်လူးကျေးရွာအနီးမှာလည်း မနက် ၈ နာရီခွဲလောက် မိုင်းဆွဲတိုက်ခိုက်ခဲ့တယ်လို့ နွားထိုးကြီးမြို့နယ်ဒေသကာကွယ်ရေးအဖွဲ့ခေါင်းဆောင်က ပြောပါတယ်။

"အမြန်လမ်းကတော့ စစ်ကားအကြီးနဲ့ ၂၅ ကောင် လောက်တော့ပါမယ်။ မိုင်း ၄ လုံး ဆွဲတာ။ သေဆုံးထိခိုက်တော့ တော်တော်များလိမ့်မယ်။ မိုင်းဆွဲခံရတဲ့ကားတောင် မနက် ၁၁ လောက်အထိ အဲဒီနားမှာပဲ ရှိနေသေးတယ်။ လူနာတင်ကားတွေဘာတွေလည်း ရှုပ်နေတယ်လို့တော့ သိရတယ်။ ဝက်လူးကတော့ ဒီတိုင်းပဲထွက်လာတဲ့ ကားကိုမိုင်းဆွဲမယ်ပေါ့နော်။ ကြိုတင်ပြီးတော့ မိုင်းဆင်နေတာကို ဒလန်တယောက်ယောက်က မြင်သွားပုံရပါတယ်။ ဒီကောင်တွေက မိုင်းကွင်းကိုလာပြီးတော့ လူလည်းဖမ်းမယ်ဆိုတဲ့ ပုံစံမျိုးတက်လာတာ မိုင်းရှင်းတက်လာတာက ၆ ယောက်လောက်ပေါ့နော်။ နောက်က ပန်းပြီးတက်လာတာရောဆိုရင် ၂၀ လောက်တော့ ရှိလိမ့်မယ်။ အဲဒါကို ကျနော်တို့က မိုင်းကွင်းထဲအရောက်မှာ လက်ဦးမှုယူ မိုင်းဆွဲဲပြီး ရှောင်ထွက်လာတာ။”  

မျက်မြင်တွေ့ရှိသူတွေရဲ့ပြောကြားချက်အရ မိုင်းဆွဲတိုက်ခိုက်မှု ၂ ခုမှာ အနည်းဆုံး စစ်ကောင်စီအဖွဲ့ဝင် ၈ ဦးထက်မနည်း သေဆုံးနိုင်တယ်လို့ နွားထိုးကြီးမြို့နယ် ဒေသကာကွယ်ရေး အဖွဲ့က အတည်ပြုပြောဆိုပါတယ်။

၅ ရက်တာ တိုက်ခိုက်ခံရမှုအတွင်း စစ်ကောင်စီတပ်ဖွဲ့ဝင်တွေ ထိခိုက်သေဆုံးတာနဲ့ ပတ်သက်ပြီး ဒီဗွီဘီက သီးခြားအတည်မပြုနိုင်သေးသလို စစ်ကောင်စီကလည်း သတင်းထုတ်ပြန်တာ မရှိသေးပါဘူး။

10 hours Ago

အမှုကြီးအမှုသေး ၁၀ ခုဝန်းကျင် ဆောပြည်သူ့အုပ်ချုပ်ရေးအဖွဲ့က ကိုင်တွယ်ဖြေရှင်းထား

ဆောမြို့နယ် ပြည်သူ့အုပ်ချုပ်ရေးအဖွဲ့က အမျိုးသားညီညွတ်ရေးအစိုးရ (NUG) နဲ့ညှိနှိုင်းပြီး ကြားကာလအခြေအနေတွေမှာ ဥပဒေမဲ့ လုပ်ရပ်တွေကို မကျူးလွန်ဖို့ တိုက်တွန်းနှိုးဆော်ထား သလို ကျုးလွန်ခံရရင်လည်း ပြည်သူ့အုပ်ချုပ်ရေးအဖွဲ့ကို တိုင်ကြားဖို့ ပညာပေးဆောင်ရွက်ထား တယ်လို့ ဆောပြည်သူ့အုပ်ချုပ်ရေးအဖွဲ့ခေါင်းဆောင် ဒေါက်တာ ကြည်စိုးထွန်းက ပြောပါတယ်။ 

အခုလို အချိန်ကာလမှာ ခေတ်မကောင်းတာကို အခွင့်ကောင်းယူပြီး ရာဇဝတ်မှုတွေ ကျူးလွန်နေတာ ရှိသလို လက်ရှိမှာလည်း အမှုအကြီးအသေး စုစုပေါင်း ၁၀ ခုဝန်းကျင်အထိကို မြို့နယ်အဆင့်က ကိုင်တွယ်ဖြေရှင်းထားကာ ကျန်တဲ့ ကျေးရွာအဆင့် တိုက်နယ်အဆင့်ကိုလည်း သက်ဆိုင်ရာ အုပ်ချုပ်ရေးအဖွဲ့တွေက ညှိနှိုင်းဖြေရှင်းဆောင်ရွက်ထားတယ်လို့လည်း ဆိုပါတယ်။ 

ညှိနှိုင်းဖြေရှင်းလို့ရတဲ့ အမှုမျိုးတွေကို နှစ်ဦးနှစ်ဖက် ကျေလည်တဲ့အထိ ကျေအေးလွှာတွေနဲ့ ညှိနှိုင်း ဆောင်ရွက်နေပြီး ဖမ်းဆီး ထောင်ချရမယ့် အမှုမျိုးတွေကိုတော့ လက်ရှိကာလမှာ အချုပ်ထောင် တွေ မဆောက်နိုင်သေးတဲ့အတွက် ကာကွယ်ရေးအဖွဲ့တွေထဲမှာ ထိန်းသိမ်းပြီး ပြစ်ဒဏ်ချမှတ်ထားတယ်လို့ သိရပါတယ်။ 

ဆောမြို့နယ် ပြည်သူ့အုပ်ချုပ်ရေးအဖွဲ့အနေနဲ့ တရားဥပဒေစိုးမိုးရေး၊ စဉ်ဆက်မပြတ် ပညာသင်ကြားနိုင်ရေး၊ ပြည်သူ့ကျန်းမာရေးစောင့်ရှောက်မှု၊ စစ်ဘေးရှောင်ကူညီ စောင့်ရှောက်ရေး နဲ့ ဘဏ္ဍာငွေရှာဖွေရေး စတဲ့ လုပ်ငန်းကဏ္ဍ ၅ ရပ်ကို လုပ်ဆောင်နေတယ်လို့ တာဝန်ရှိသူတွေက ပြောပါတယ်။ 

ပြီးခဲ့တဲ့ မေ ၁၈ ရက်နေ့က အမျိုးသားညီညွတ်ရေးအစိုးရအနေနဲ့ ကြားကာလမှာ တရားစီရင်ရေးအာဏာတွေကို ကျင့်သုံးဆောင်ရွက်နိုင်ဖို့အတွက် စစ်ကိုင်းတိုင်းအတွင်းက မြို့နယ် ၁၅ ခုမှာ တရားသူကြီးများအဖွဲ့ကို ဖွဲ့စည်းပေးခဲ့ပြီး တရားစီရင်ရေးအာဏာကို အပ်နှင်းပေးခဲ့ပါသေးတယ်။ 

10 hours Ago

ထားဝယ်မြို့ ကမ်းနားစျေးတွင် စျေးသည်အမျိုးသမီး ၁ ဦး ပစ်သတ်ခံရ

တနင်္သာရီတိုင်း၊ ထားဝယ်မြို့ ကမ်းနားစျေးမှာ မေ ၂၄ ရက် မနက် ၉ နာရီလောက်က အသက် ၆၀ အရွယ် ဒေါ်ညွန့်လှိုင်ဆိုသူ စျေးသည်အမျိုးသမီးတဦး ပစ်ခတ်ခံရပြီး သေဆုံးသွားတယ်လို့ မျက်မြင်တွေ့ရှိသူတွေက ပြောပါတယ်။

မျက်မြင်တွေ့ရှိသူတဦးက “သုံးချက်ပစ်ခံရတာ ခေါင်းကိုလည်းထိတယ်၊ ခေါင်းပါပွင့်ထွက်သွားတာ၊ သွေးအိုင်ထဲလဲနေတာ လှုပ်တောင်မလှုပ်တော့ဘူး။ အလောင်းကိုတော့ အရေးပေါ်ကား ၂ စီးနဲ့လာသယ်သွားတယ်” လို့ ပြောပါတယ်။

ထားဝယ်မြို့ခံတချို့ကတော့ အဲဒီပစ်ခတ်မှုကို သွေးသောက်အဖွဲ့က လုပ်ဆောင်ခဲ့တာလို့ ပြောဆိုနေကြပေမယ့် သီးခြားအတည်ပြုနိုင်ခြင်းတော့ မရှိသေးပါဘူး။

ပစ်ခတ်ခံရတဲ့ ဒေါ်ညွန့်လှိုင်နဲ့ နီးစပ်သူတဦးက “သူက စျေးထဲမှာ ငါးလည်းရောင်းတယ်။ အခုပစ်ခံရတာက အပြင်မှာ ဒူးရင်သီးရောင်းနေတုန်းပစ်ခံရတာ။ အရင်ကလည်း စစ်သားတွေ သူ့သားကို လာဖမ်းတာ သူ့သားမရှိလို့ သူ့ကို ခဏဖမ်းသွားသေးတယ်" လို့ ပြောပါတယ်။

ထားဝယ်မြို့ပေါ် အချို့နေရာတွေမှာ အရင်လက NLD ပါတီဝင်တွေ၊ ဆန္ဒပြသူတွေ၊ PDF တပ်ဖွဲ့ဝင်တွေရဲ့ မိသားစုဝင်တွေကို ဖမ်းဆီးသတ်ဖြတ်မယ်ဆိုပြီး သွေးသောက်အဖွဲ့ကနေ ခြိမ်းခြောက်စာတွေ လိုက်ကပ်ခဲ့ပါတယ်။

10 hours Ago

ရွှေသောင်ယံကမ်းခြေတွင် မုန်တိုင်းခိုနေသည့် စက်လှေမှောက်ပြီး အမျိုးသမီး ၁၃ ဦးသေဆုံး

ဧရာဝတီတိုင်း၊ ပုသိမ်မြို့နယ်၊ ရွှေသောင်ယံကမ်းခြေမှာ  မေလ ၂၀ ရက်က အစ္စလာမ်ဘာသာဝင် အမျိုးသမီးအလောင်း ၁၃ လောင်းတွေ့ရှိခဲ့တယ်လို့ ဒေသခံတွေက ပြောပါတယ်။

မုန်တိုင်းကြောင့် ဝင်ခိုတဲ့အချိန်မှာ စက်လှေသမား ထွက်ပြေးသွားတာကြောင့် စက်လှေ မှောက်ပြီး သေဆုံးခဲ့တာဖြစ်ပြီး အယောက် ၆၀ ကျော်ကတော့ အသက်ရှင်နေတာ တွေ့ရှိခဲ့တယ်လို့ ကူညီပေးခဲ့သူတဦးက ပြောပါတယ်။

ပရဟိတကူညီပေးသူတဦးဖြစ်တဲ့ ဦးစိုးမင်းက “ကိုသိသလောက်တော့ အမျိုးသမီးအလောင်း ၁၃ လောင်း ကမ်းလာတင်တာ။ သူတို့က ဒီကို လာတာမဟုတ်ဘူး။ မုန်တိုင်းကြောင့် ဝင်ခိုရင်းနဲ့ လှေမှောက်တာ မနက်မိုးလင်း အလောင်းမှာ ကမ်းခြေရောက်လာတယ်ဆိုလို့ သွားကယ်ကြတာ။ အသက်ရှင်တဲ့သူတွေကတော့ ရေထဲမှာ မျောနေတာ”လို့ ပြောပါတယ်။

စက်လှေမှောက်ပြီး အသက်ရှင်တွေ့ရှိသူ  ၆၀ ကျော်ကိုတော့ ရွှေသောင်ယံ အထက်တန်းကျောင်းမှာ ရဲအစောင့်အကြပ်နဲ့ထားပြီး ကျန်းမာရေးစောင့်ရှောက်မှုတွေ ပြုလုပ်ပေးနေတယ်လို့ ဆိုပါတယ်။

စက်လှေမှောက်လို့ သေဆုံးခဲ့တဲ့သူတွေကို ချောင်းသာမြို့နဲ့ ပုသိမ်မြို့က ပရဟိတအဖွဲ့တွေက လာရောက်သယ်ဆောင်ပြီး အစ္စလာမ်ဘာသာအရ နာရေးပြုလုပ်ပေးခဲ့တယ်လို့ ပရဟိတအသင်းအဖွဲ့တွေက ပြောပါတယ်။

အသက်ရှင်လျက်ဖမ်းမိခဲ့သူ  ၆၀ ကျော်ကိုတော့ လ၀က ဥပဒေနဲ့ အမှုဖွင့်ဖို့ ပြင်ဆင်နေတယ်လို့ သိရပါပြီး ဒီကိစ္စနဲ့ ပတ်သက်ပြီး တိုင်းရဲတပ်ဖွဲ့မှူးရုံးကို ဒီဗွီဘီကဆက်သွယ်မေးမြန်းခဲ့ပေမယ့် ဖုန်းဆက်သွယ်လို့မရခဲ့ပါဘူး။

10 hours Ago

ဘင်္ဂလားဒေ့ရှ်သို့ တရားမဝင်ပို့ဆောင်မည့် ရွှေကျပ် ၄၀ သားအား ကညင်ချောင်းစီးပွားဇုန်၌ ဖမ်းမိ

ဘင်္ဂလားဒေ့ရှ်နိုင်ငံကို တရားမဝင်ပိုးဆောင်မယ့် ရွှေကျပ် ၄၀ သားအား ကညင်ချောင်းစီးပွားရေးဇုန်မှာ မေ ၂၂ ရက်နေ့က ဖမ်းဆီးရမိခဲ့တယ်လို့ ကညင်ချောင်းစီးပွားဇုန်တာဝန်ရှိသူတွေက ပြောပါတယ်။

“ဟုတ်တယ်။ မနေ့က ပူးပေါင်အဖွဲ့က ကုန်ပစ္စည်းတွေကို စစ်ဆေးနေတယ်၊ အဲဒီအနားကို ရောက်လာတဲ့ အမျိုးသား တစ်ယောက်ကို  မသင်္ကာစရာဖြစ်လို့ ခေါ်တဲ့အခါ ရွှေထုတ်ကိုချပြီး ထွက်ပြေးသွားတာ။” လို့ ကညင်ချောင်းစီးပွားရေးဇုန် တာဝန်ရှိသူတဦးက ပြောပါတယ်။

ရခိုင်ပြည်နယ် မောင်တောမြို့ ကညင်ချောင်းစီးပွားရေးဇုန်အတွင်း ဆိပ်ခံတံတားတွေက ကုန်ပစ္စည်းတွေကို ပူးပေါင်းအဖွဲ့က လှည့်လည်စစ်ဆေးစဉ် ဆိပ်ခံ ၃ နဲ့ ကိုက် ၃၀ လောက်အကွာ ကညင်ချောင်းစီးပွားရေးဇုန်အဝင်လမ်းမှာ မသင်္ကာစရာ အမျိုးသား ၁ ဦးအား စစ်ဆေးဖို့ ခေါ်ယူခဲ့ရာ အစစ်ဆေးမခံဘဲ ပုဆိုးနဲ့ ထုပ်ထားတဲ့ အထုပ်တထုပ်အား လွှတ်ချကာ ထွက်ပြေးလွတ်မြောက်သွားခဲ့တာလို့ ဆိုပါတယ်။

လွှင့်ပစ်ခဲ့တဲ့ အထုပ်အား သက်သေတွေနဲ့အတူ ဖွင့်ဖောက်စစ်ဆေးခဲ့ရာ အကယ်ဒမီတံဆိပ်ပါ ရွှေအလေးချိန် ၁၀ ကျပ်သားခန့်  ၄ တုံး (ကာလတန်ဖိုး စုစုပေါင်း ၈၂၀ သိန်း) လောက်အား ပိုင်ရှင်မဲ့ဖမ်းဆီးရမိခဲ့တာလည်းဖြစ်ပါတယ်။

လက်ရှိမျာ ထွက်ပြေးလွတ်မြောက်သွားသူ အမျိုးသားအား ဆက်လက်ရှာဖွေဖော်ထုတ်နေတယ်လို့ သိရှိရပါတယ်။

၂၀၂၂ ခုနှစ် ဖေဖော်ဝါရီလ ၁၇ ရက် နေ့ကလည်း ကျီးကန်းပြင်စစ်ဆေးရေးဂိတ်မှာ တဖက် ဘင်္ဂလားဒေ့ရှ်နိုင်ငံကို သယ်ဆောင်မယ့် သံသယနဲ့ ရွှေချောင်း ၂၀ ဖမ်းဆီးရမိခဲ့ပါသေးတယ်။

11 hours Ago

နိုင်ငံတော်အတိုင်ပင်ခံပုဂ္ဂိုလ်အပေါ် စွပ်စွဲဆိုထားသည့် အဂတိအမှု ၄ မှု ကို စွဲချက်တင် အမိန့်ချ

ဒေါ်ခင်ကြည်ဖောင်ဒေးရှင်းအမှု အပါအဝင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပေါ် စစ်ကောင်စီက စွပ်စွဲ တရားစွဲထားတဲ့ အဂတိအမှု ၄ မှုကို စွဲချက်တင်ကြောင်း တရားရုံးက မေလ ၂၄ ရက် ဒီနေ့ရုံးချိန်းမှာ အမိန့်ချလိုက်ပါတယ်။ 

နေပြည်တော်၊ ဇမ္ဗူသီရိအထူးတရားရုံးမှာ ဒီနေ့ပြုလုပ်ခဲ့တဲ့ရုံးချိန်းမှာ ဒေါ်ခင်ကြည်ဖောင်ဒေးရှင်းနဲ့ ပတ်သက်တဲ့ အဂတိအမှုနံပါတ် ၃ နဲ့ ၄ အတွက် တရားလိုဦးရဲထက်ကို ရှေ့နေအဖွဲ့က အပြန်အလှန်စစ်မေးခဲ့တယ်လို့လည်း တရားရုံးနဲ့နီးစပ်သူက ပြောပါတယ်။  

“စွဲချက်တင်တယ်ဗျ။ အမှုနံပတ် ၃၊ ၄၊ ၅၊ ၂၅ ရယ်။ ၄ မှုပေါ့။ ၅၊ ၂၅ က ဒေါ်အောင်ဆန်းစုကြည် တယောက်တည်း။ ၃ နဲ့ ၄ မှာတော့ ဦးရဲမင်းဦးတို့ ဦးမျိုးအောင် တို့ပါတယ်။ အတိုင်ပင်ခံ ကျန်းမာရေးကောင်းတယ်။ နောက်တစ်ချိန်းမှာ ပြန်ခေါ်သက်သေတွေ စစ်မယ်။ မေ ၃၁ ရက်နေ့ ပေါ့။ ဦးမောင်ဝိတ် လှူတဲ့အမှုကတော့ တရားလို ဦးရဲထက်ကို အပြန်အလှန်မေးပြီး စစ်တာပေါ့။ ၃ နဲ့ ၄ နှစ်မှုစလုံး စစ်တယ်။” 

စီးပွားရေးလုပ်ငန်းရှင် ဦးမောင်ဝိတ်က ပြည်သူလူထုကို ကူညီပေးနေတဲ့ ဒေါ်ခင်ကြည်ဖောင်ဒေးရှင်းအတွက် ငွေကြေးလှူဒါန်းခဲ့တာကြောင့် စစ်ကောင်စီက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို  အဂတိအမှုနဲ့ တရားစွဲခဲ့တာဖြစ်ပြီး မေလ ၂ ရက်နေ့က နေပြည်တော်၊ ဇမ္ဗူသီရိအထူးတရားရုံးမှာ ဒီအမှု စတင်ကြားနာခဲ့ပါတယ်။ 

မန္တလေးတိုင်းဝန်ကြီးချုပ် ဒေါက်တာဇော်မြင့်မောင်၊ နေပြည်တော်မြို့တော်ဝန် ဒေါက်တာမျိုးအောင်တို့ကို စွဲဆိုထားတဲ့ အဂတိအမှုတွေမှာလည်း စစ်ကောင်စီက ဦးမောင်ဝိတ်ကို တရားလိုပြသက်သေအဖြစ် တင်သွင်းထားပါတယ်။

ဦးမောင်ဝိတ်ကတော့ အန်အယ်လ်ဒီနဲ့ပတ်သက်တဲ့ အမှုတွေအားလုံးမှာ သူ့ဘက်က လှူဒါန်းတာတွေသာ ဖြစ်တယ်လို့  တရားရုံးမှာ ထွက်ဆိုထားပါတယ်။

11 hours Ago

စစ်ကောင်စီနှင့် RCSS အချက် ၄ ချက် သဘောတူလက်မှတ်ရေးထိုး

အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့ နေပြည်တော်မှာ ငြိမ်းချမ်းရေးကိစ္စ သွားရောက်ဆွေးနွေးခဲ့တဲ့ RCSS/SSA  ရှမ်းပြည်ပြန်လည်ထူထောင်ရေးကောင်စီ/ ရှမ်းပြည်တပ်မတော် ဥက္ကဋ္ဌ ဗိုလ်ချုပ်ကြီးယွက်စစ်နဲ့ အဖွဲ့ဝင်တွေဟာ ဖက်ဒရယ်ပြည်ထောင်စု တည်ဆောက်ရေးအပါအဝင် အချက် ၄ ချက်ကို သဘောတူ လက်မှတ်ရေးထိုးခဲ့ကြပါတယ်။ 

မေ ၂၀ ရက်နေ့က နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံစဉ် ဖက်ဒရယ်ပြည်ထောင်စုတည်ဆောက်သွားကြဖို့ နှစ်ဘက်တူညီတဲ့ သဘောထားရရှိခဲ့ပြီး မေ ၂၁ - ၂၂ အတွင်း စစ်ကောင်စီရဲ့ အမျိုးသားစည်းလုံးညီညွတ်ရေးနဲ့ ငြိမ်းချမ်းရေးဖော်ဆောင်မှု ညှိနှိုင်းရေးကော်မတီနဲ့ ဆက်လက်ဆွေးနွေးခဲ့တာမှာ အချက် ၄ ချက် သဘောတူလက်မှတ်ရေးထိုးခဲ့တာပါ။

အဆိုပါအချက်ထဲမှာ ပါတီစုံဒီမိုကရေစီ ဖက်ဒရယ်ပြည်ထောင်စုတည်ဆောက်ရေး ပါဝင်တယ်လို့  ဒုဗိုလ်မှူးကြီး  စိုင်းအုမ်ခေးက ဒီဗွီဘီကို ပြောပါတယ်။ 

“ နံပါတ် ၁ က နိုင်ငံရေးကိစ္စ၊ နံပါတ် ၂ က စစ်ရေးစစ်ရာ ကိစ္စ၊ နံပါတ် ၃ က  ‌ဒေသဖွံ့ဖြိုးရေးနဲ့ နံပါတ် ၄ က စီးပွါးရေးကိစ္စပေါ့။ နံပါတ် ၁ မှာ ပါတီစုံဒီမိုကရေစီရွေးကောက်ပွဲ နဲ့ ဖက် ဒရယ်ပြည်ထောင်စုတည်ဆောက်ရေးဆိုတဲ့ အချက်နှစ်ချက်ပါတယ်။ စစ်ရေးစစ်ရာက ၁ ချက်ပဲပါ ပါတယ်။  ဒေသဖွံ့ဖြိုးရေးကို ပြည်သူလူထုအတွက် လက်လှမ်းမီသလောက် စီးပွားရေး၊ စိုက်ပျိုးရေး၊ ကျန်းမာရေး၊ ပညာရေး လမ်းပန်းဆက်သွယ်ရေး စတဲ့ အခြေခံတိုးတက်ဖွံ့ဖြိုးရေးအတွက် အတူတူဝိုင်းဝိုင်းဆောင်ရွက်ဖို့ အချက်တွေပါပါတယ်။”

စစ်ရေးစစ်ရာမှာ ပါဝင်တဲ့အချက်တွေနဲ့ စီးပွားရေးမှာ ဘယ်လိုလုပ်ပိုင်ခွင့်တွေရခဲ့လဲ ဆိုတာကို တော့ ပြောလို့မရသေးဘူးလို့ ဆိုပါတယ်။ 

မေ ၂၁ - ၂၂ တွေ့ဆုံဆွေးနွေးပွဲမှာ  RCSS ဘက်က ဥက္ကဋ္ဌ ဗိုလ်ချုပ်ကြီး ယွက်စစ်၊ အတွင်းရေးမှူး-၁ ဗိုလ်မှူးကြီး စိုင်းငင်းနဲ့ စစ်ကောင်စီဘက်က အမျိုးသား စည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီဥက္ကဋ္ဌ၊ ဒုဗိုလ်ချုပ်ကြီး ရာပြည့်၊ အတွင်းရေးမှူး ဒုဗိုလ်ချုပ်ကြီး မင်းနောင်နဲ့ အဖွဲ့ဝင်တွေဖြစ်တဲ့ ဒုဗိုလ်ချုပ်ကြီး မိုးမြင့်ထွန်း၊ ဗိုလ်မှူးကြီး ဆောင်းဟန်တို့ တက်ရောက်ကြပါတယ်။

နောက်ထပ် ဘယ်တော့တွေ့ဆုံဆွေးနွေးကြမလဲဆိုတာကိုတော့ မသိသေးကြောင်း၊  ဒီတ ခေါက်ခရီးစဉ်ပေါ်မှာတော့ RCSS/SSA အနေနဲ့ ကျေနပ်အားရမှုရှိတယ်လို့ ဆိုပါတယ်။ အကြမ်းဖက်မှုကျူးလွန်နေတဲ့ စစ်ခေါင်းဆောင်ရဲ့  ငြိမ်းချမ်းရေးဆွေးနွေးကို သွားရောက်ခဲ့တဲ့အတွက် လူမှုကွန်ရက်မှာ ဝေဖန်ခံနေရပေမဘ့် တဘက်နဲ့တဘက် ပစ်ခတ်တိုက်ခိုက်နေမယ်ဆိုရင် ဘယ်တော့မှငြိမ်းချမ်းရေးရမှာမဟုတ်ကြောင်း၊  ဘယ်လိုပဲတိုက်နေကြပါစေ နောက်ဆုံးတော့ စကားဝိုင်းပေါ်မှာပဲ ငြိမ်းချမ်းစွာတွေ့ဆုံဖြေရှင်းရတာပဲလို့ RCSS/SSA ဘက်က ပြောသွားပါတယ်။

12 hours Ago

မြစ်ခြေ-ကျွန်းချောင်းလမ်းပိုင်းတွင် ရဲနှင့်ပျူစောထီးအဖွဲ့ဝင်များ စီးလာသည့်ကား မိုင်းဆွဲခံရ

မကွေးတိုင်း ပခုက္ကူမြို့နယ် မြစ်ခြေ-ကျွန်းချောင်း လမ်းပိုင်းမှာ မေ ၂၃ ရက်နေ့ မွန်းလွဲ ၁ နာရီလောက်က စစ်ကောင်စီရဲ့ ရဲတွေနဲ့ ပျူစောထီး ၁၃ ယောက်လောက်စီးလာတဲ့ လိုက်ထရပ် ကားတစီးကို မြစ်ခြေ-ကျွန်းချောင်းပြည်သူ့ကာကွယ်ရေးတပ်ဖွဲ့ MC-KC PDF က မိုင်းဆွဲတိုက်ခိုက်ခဲ့တယ်လို့ MC-KC PDF ရဲ့တာဝန်ခံ G3 က ဒီဗွီဘီကိုပြောပါတယ်။

ရဲဘော် ရှောင်လင်ရဲ့ မွေးနေ့ကို ဂုဏ်ပြုတဲ့အနေနဲ့ ကံကြီးစုရွာထိပ်မှာ ပြည်သူလူထုအား အနိုင်ကျင့်ဗိုလ်ကျ ဓားပြတိုက်နေတဲ့ ရဲနဲ့ပျူစောထီးတွေ စီးလားတဲ့ကားကို Birthday မိုင်းနဲ့ တိုက်ခိုက်ခဲ့တာလို့ ဆိုပါတယ်။

အဲဒီတိုက်ပွဲမှာ စစ်ကောင်စီဘက်က ရဲနဲ့ပျူစောထီး ၅ ယောက်သေဆုံးခဲ့ပြီး အများအပြားဒဏ်ရာရရှိခဲ့ပြီး မြစ်ခြေ-ကျွန်းချောင်းပြည်သူ့ကာကွယ်ရေးတပ်ဖွဲ့ဘက်က ရဲဘော်တွေ အထိအခိုက်မရှိဘူးလို့ ဆိုပါတယ်။

တန့်ကြည့်တောင်အနောက်ဘက်တနေရာကို အင်အား ၇၀ လောက်နဲ့ စစ်ကြောင်းထိုးလာတဲ့ စစ်ကောင်စီတပ်သားတွေကို မေ ၂၂ ရက်နေ့ မနက် ၉ နာရီလောက်ကလည်း မြစ်ခြေကျွန်ချောင်းပြည်သူ့ကာကွယ်ရေးတပ်ဖွဲ့ MC-KC PDF နဲ့ ဆိပ်ဖြူမြောက်ပိုင်းပြည့်သူ့ကာကွယ်ရေးတပ်ဖွဲ့ NSP တို့ ပူးပေါင်းတိုက်ခိုက်ခဲ့ရာမှာ စစ်ကောင်စီဘက်က ၂ ယောက်သေဆုံးပြီး အယောက် ၂၀ လောက် ဒဏ်ရာရရှိခဲ့တယ်လို့ MC-KC PDFရဲ့ တာဝန်ခံက ပြောပါတယ်။

“သူတို့က ပုဂံဘက်ကနေ အင်အား ၁၅၀ လောက်နဲ့ ဆိက္ခဝဘက်ကိုကူးလာတာဗျ။ အဲဒါကြောင့် ကျနော်တို့ကလည်း စစ်ရေးပြင်ဆင်မှု ညပိုင်းကတည်းက လုပ်ထားတယ်။ ကျနော်တို့ ထင်သလိုပဲ မနက်ပိုင်းမှာ အင်အား ၇၀/၈၀ လောက်နဲ့တက်လာတယ်ဗျ။ အဲဒါကြောင့် ညကတည်းက ကြိုတင်ပြင်ဆင်ထားတဲ့ မိုင်းတွေ၊ ပြောင်းတိုက်တွေ၊ အော်တိုသမားတွေ၊ စနိုက်ပါသမားတွေ အဆင်သင့်လုပ်ထားပြီး လက်ဦးမှုရယူခဲ့တယ်။ ကျနော်တို့ဘက်က အော်တိုနဲ့ဆွဲလိုက်တဲအချိန်မှာ စစ်(...)တွေဘက်က ၂ ယောက် မှောက်ပြီးသေဆုံးသွားတာကို အသေအချာမြင်လိုက်ရတယ်။ ကျန်တဲ့ အယောက် ၂၀ လောက် ဒဏ်ရာရတယ်ဆိုတာကိုတော့ အတွင်းသတင်းအရ သိရတာပါ။ သူတို့ဘက်က အထိနာပြီး နောက်ကြောင်း ပြန်ဆုတ်သွားကြတယ်။”

နှစ်ဖက်တိုက်ပွဲအတွင်းမှာ ညီနောင်မဟာမိတ်တပ်ဖွဲ့ဘက်က ရဲဘော်တစ်ယောက်ထိခိုက်ဒဏ်ရာရရှိပြီး ဒဏ်ရာအခြေနေ မစိုးရိမ်ရဘဲ မိခင်တပ်ရင်းကို ဆုတ်ခွာနိုင်ခဲ့ကြတယ်လို့ ဆိုပါတယ်။

“စစ်(...)တွေနဲ့ ရင်ဆိုင်တိုက်ပွဲ ဆင်နွဲတဲ့အခါ အဓိက အခက်ခဲကတော့ လက်နက်ခဲယမ်းပါပဲ။ ကျနော်တို့ဆီမှာ အော်တိုသေနတ်တွေ ရှိတယ်ဆိုရင်တောင်မှ တိုက်ပွဲတပွဲမှာ သုံးရတဲ့ ကျည်ဆန်ဖိုးက မနည်းဘူးလေ။ လက်ရှိအချိန်မှာ ရှိသလောက် မောင်းပြန်သေနတ်အနည်းငယ်နဲ့ လက်လုပ်သေနတ်တွေကို အဓိကထားပြီး တိုက်ပွဲဝင်နေရလို့ အော်တိုတွေ၊ မောင်းပြန်သေနတ်တွေ ထပ်ဖြည့်ဖို့ လိုအပ်တယ်” လို့ MC-KC PDFရဲ့ တာဝန်ခံက ပြောပါတယ်။

အဲဒီတိုက်ပွဲအတွင်းမှာ စစ်ကောင်စီဘက်က သေဆုံးဒဏ်ရာရမှုအခြေအနေကို MC-KC PDF ရဲ့ တာဝန်ခံကပြောဆိုထားပေမယ့် ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်က လည်း သတင်းထုတ်ပြန်ထားတာ မတွေ့ရသေးပါဘူး။

14 hours Ago

ဝိုင်းမော်-ကန်ပိုက်တည်လမ်းတွင် စစ်တပ်က စစ်ဆေးရေးဂိတ်တိုးချပြီး ငွေကြေးကောက်ခံနေ

ကချင်ပြည်နယ် ဝိုင်းမော်မြို့ကနေ ကန်ပိုက်တည်မြို့ သွားတဲ့လမ်းမှာ စစ်ကောင်စီတပ်နဲ့ လက်အောက်ခံ ပြည်သူ့စစ်အဖွဲ့က စစ်ဆေးရေးဂိတ်တွေ တိုးမြှင့်ချထားပြီး ငွေကြေး ကောက်ခံနေတယ်လို့ ဒေသခံတွေက ပြောပါတယ်။

စစ်ကောင်စီ အာဏာသိမ်းပြီးနောက်ပိုင်း ဝိုင်းမော်-ကန်ပိုက်တည်လမ်းမှာ စစ်ကောင်စီ လက်အောက်ခံ ပြည်သူ့စစ်တပ်ဖွဲ့ရဲ့ စစ်ဆေးရေးဂိတ် ၁၀ ခုထက်မနည်း ထပ်မံတိုးချဲ့ဖွင့်လှစ်ပြီး မော်တော်ယာဉ်တွေဆီက ငွေကြေး ကောက်ခံနေတာလို့ ကိုယ်ပိုင်ယာဉ်နဲ့ ကုန်စည်ပို့ဆောင် ယာဉ်မောင်းတွေက ပြောပါတယ်။

“စစ်ကောင်စီ အာဏာမသိမ်းခင်က ဝါးရှောင်စုပေါင်းဂိတ်နဲ့ ဆဒုံး  စုပေါင်းဂိတ် နှစ်ခုပဲ ရှိတာ။  ၂၀၂၁ နှစ်ကုန်ပိုင်းလောက်ကစပြီး ပြည်သူ့စစ်ဂိတ်တွေ ထပ်တိုးလာတယ်။ ကားကြီးတွေ တစီးကို ၅၀၀၀ လောက်ပေးရတဲ့ဂိတ်ရှိတယ်။ လက်ဖက်ရည်ဖိုး ပေးဆိုပြီး တောင်းတဲ့ဂိတ်တွေရှိတယ်။ မတောင်းတဲ့ ဂိတ်ကတော့ မရှိဘူး" လို့ ဝိုင်းမော်-ကန်ပိုက်တည်လမ်းပိုင်း ကုန်စည်ပို့ဆောင်တဲ့ ယာဉ်မောင်းတဦးက ပြောပါတယ်။ 

ခရီးသည်တင်ယာဉ်တွေနဲ့ ကိုယ်ပိုင်ယာဉ်ငယ်လေးတွေကိုလည်း စစ်ဆေးရေးဂိတ်တွေမှာ ငွေကြေးကောက်ခံတာတွေ ရှိနေပါတယ်။

“ကျနော်တို့ အရှေ့ကသွားတဲ့ ခရီးသည်တင်ကားကို စစ်ဆေးပြီး  ကားဆရာဆီက ပိုက်ဆံတောင်းသွားတာ တွေ့တယ်။ ကျနော့်ကားဆီလာတော့ မှန်ချခိုင်းပြီး ဘယ်သွားမလဲ ဘာလုပ်မလဲ စစ်ဆေးတယ်။ ရပြီ သွားတော့ လက်ဖက်ရည်ဖိုး ပေးခဲ့ဦးမလား မေးတယ်။ ကျနော်ကတော့ စစ်ဆေးပြီး သွားတော့ဆိုကတည်းက လက်ဖက်ရည်ဖိုးမပေးဘူး မောင်းထွက်ခဲ့တာပဲ” လို့ မြစ်ကြီးနားမြို့ကနေ ဆဒုံး ကျေးရာကို ကိုယ်ပိုင်ကားနဲ့ သွားခဲ့သူ အမျိုးသားတဦးက ပြောပါတယ်။

ဝိုင်းမော်မြို့နယ်ကနေ ကန်ပိုက်တည်သွားရာ လမ်းတလျှောက်က စစ်ဆေးရေးဂိတ်တွေကို ဦးရွှေမင်းရဲ့ လီဆူပြည်သူ့စစ်အဖွဲ့နဲ့ ဦးဇခုန်တိန့်ယိန်း ပြည်သူ့စစ်တပ်ဖွဲ့တွေ ဖေင့်လှစ်ထားတာဖြစ်ပြီး အချို့ ဂိတ်ကြီးတွေမှာတော့ စစ်ကောင်စီတပ်နဲ့ ပူးပေါင်းစစ်ဆေးတာတွေ ပြုလုပ်နေတာပါ။

စစ်အာဏာမသိမ်းမီကာလက ဝိုင်းမော်-ကန်ပိုက်တည် လမ်းတလျှောက်မှာ ဝါရှောင်ကျေးရွာ အထွက် စုပေါင်းဂိတ်နဲ့ ဆဒုံးဂိတ် နှစ်ခုသာရှိပြီး ၂၀၂၁ခုနှစ် အောက်တိုဘာလက စတင်ကာ  ဝိုင်းမော်နဲ့ ကန်ပိုင်တည်ကြားမှာ   ဝါးရှောင်ဂိတ်  ဘွမ်တောင်ဂိတ်၊ အင်ဝမ်တောင်ဂိတ်၊ ငေါ့ချုံးဂိတ်၊ ရွှမ်းဝေတံတားဂိတ်၊ ဆဒုံးရေတံခွန်ဂိတ်၊ ဆဒုံးအဝင်ဂိတ်၊ ဆဒုံးအထွက်ဂိတ်၊ မံဝိန်းဂိတ်၊ လော်ဆာကျေးရွာ ဂိတ်တွေ ဖွင့်လှစ်ထားပြီး အခြားကျေးရွာအဝင် အထွက်နေရာတွေမှာလည်း ပြည်သူ့စစ် စစ်ဆေးရေးဂိတ်ငယ်လေးတွေ ရှိတယ်လို့ သိရပါတယ်။

14 hours Ago

ပြည်သူ့ခုခံတော်လှန်စစ်အတွင်း စစ်ကောင်စီတပ်သား ၁၅,၀၀၀ ခန့်သေဆုံးဟု NUG ထုတ်ပြန်

အချိန် တနှစ်နီးပါးအကြာ ပြည်သူ့ခုခံတော်လှန်စစ်အတွင်း အကြမ်းဖက်စစ်အုပ်စုဘက်က စစ်ကောင်စီတပ်သား ၁၄,၈၉၀ ယောက် သေဆုံးခဲ့ပြီး ထိခိုက်ဒဏ်ရာရရှိသူအရေအတွက်ကတော့ ၄,၈၁၄ ယောက်ထိ ရှိခဲ့တယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ပါတယ်။

NUG အစိုးရ၊ ကာကွယ်ရေးဝန်ကြီးဌာနက ပြီးခဲ့တဲ့ ၂၀၂၁ ခုနှစ်၊ ဇွန် ၁ ရက်ကနေ အခုနှစ်၊ မေ ၁၇ ရက်အထိ စုဆောင်းရရှိထားသော အချက်အလက်တွေအရ ထုတ်ပြန်ထားတာဖြစ်ပြီး မြေပြင်အခြေအနေမှာတော့ စစ်ကောင်စီ တပ်ဖွဲ့ဝင်တွေ သေဆုံးဒဏ်ရာရမှုဟာ ခုအရေအတွက်ထက် ပိုများနိုင်တယ်လို့ ဆိုပါတယ်။

နိုင်ငံတဝန်းမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက် သတ်ဖြတ်နေမှုတွေကို ပြည်သူလူထုတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပြီး မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာ ဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။

NUG အစိုးရ တည်ထောင်ပြီး ၁ နှစ်တာကာလအတွင်းမှာ ပြည်သူ့ကာကွယ်ရေးတပ်မတော် တပ်ရင်း၊ တပ်ဖွဲ့ပေါင်း ၂၅၇ ရင်းကို ဖွဲ့စည်းတည်ထောင်နိုင်ခဲ့ပြီးဖြစ်ကာ မြို့နယ်အခြေပြု ပြည်သူ့ကာကွယ်ရေးအဖွဲ့ (ပကဖ) တွေကိုလည်း မြို့နယ်ပေါင်း ၂၅၀ မှာ စနစ်တကျ ဖွဲ့စည်းနိုင်ခဲ့ပြီးဖြစ်တယ်လို့ ဆိုပါတယ်။

ဒါ့အပြင် ဒေသအခြေစိုက် ကာကွယ်ရေးအဖွဲ့တွေ၊ မြို့ပြပြောက်ကျားအဖွဲ့တွေ ၄၀၀ ကျော်နဲ့လည်း ဟန်ချက်ညီစွာ တိုက်ပွဲဖော်ဆောင်ဖို့ ချိတ်ဆက်နိုင်ခဲ့ပြီးဖြစ်တယ်လို့ NUG က ထုတ်ပြန်ထားပါတယ်။

မြန်မာပြည်အနှံ့ တိုက်ပွဲတွေမှာ တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ အကြမ်းဖက်စစ်အုပ်စုဘက်ကတော့ သတင်းထုတ်ပြန်ထားတာ မရှိပါဘူး။

14 hours Ago

လက်နက်ဝယ်ရန် ကျပ်သိန်း ၂၀၀ လိမ်လည်ခဲ့ခြင်းမဟုတ်ဟု စိုင်းထက်အောင် ပြော

လက်နက်ဝယ်ဖို့ ကျပ်သိန်း ၂၀၀ ကို လိမ်လည်ခဲ့တာမဟုတ်ဘဲ တဆင့်ဝယ်ပေးမယ့်သူတွေ ဖမ်းဆီးခံရတာ၊ သူတို့ဆီက လက်နက်မရတာကြောင့်ဖြစ်တယ်လို့ ပင်လုံနည်းပညာတက္ကသိုလ်ရဲ့ အမည်ပျက်စာရင်း ကြေညာခံခဲ့ရတဲ့ ကျောင်းသား စိုင်းထက်အောင်က ပြောပါတယ်။

အာဏာရှင်တော်လှန်ရေးပြည်သူ့တပ်မတော် (DRPA) က လက်နက်ဝယ်ဖို့ ကျပ်သိန်း ၁၄၀၊ MGF ဆီက ကျပ်သိန်း ၆၀ ကို စိုင်းထက်အောင်(ခ) လင်းထင်ကို ပေးခဲ့ပေမယ့် သတ်မှတ်ရက်မှာ လက်နက်မပေးတာ၊ ဖြေရှင်းဖို့ ဆက်သွယ်ခဲ့ပေမယ့်မရခဲ့ဘူးလို့ DRPA က ဆိုပါတယ်။

ဒါကြောင့် သက်ဆိုင်ရာ ကျောင်းသားသမဂ္ဂကို ဆက်သွယ်အကူအညီတောင်းခဲ့ပြီး သမဂ္ဂကလည်း စာထုတ်ဆင့်ခေါ်ပေမယ့် မရခဲ့သလို ပင်လုံနည်းပညာတက္ကသိုလ်ရဲ့ ယာယီတက္ကသိုလ်ကောင်စီကလည်း ဆင့်ခေါ်ပေမယ့်မရလို့ အမည်ပျက်စာရင်းသွင်း၊ ကျောင်းကနေ ထုတ်ပစ်ခဲ့တာပါ။

ဒီအပေါ်မှာ စိုင်းထက်အောင်က “ကျနော်က နောက်လူ ၂ ယောက်ဆီက တဆင့်ဝယ်ပေးတာ။ ငွေတွေကို သူတို့ကို ပေးခဲ့ရတာ။ အရင်ကလည်း သူတို့ဆီက ၄၊ ၅ ကြိမ်ဝယ်ခဲ့ဖူးတယ်။ ၂ ပတ်ပဲကြာတယ်။ အခုတကြိမ်မှာတော့ ငွေချေပြီးနောက်ပိုင်း ဆက်သွယ်လို့မရတော့ဘူး။ ၂ ပတ်နောက်ပိုင်းမှာလည်း ဆက်သွယ်လို့မရတော့ဘူး။ ဒါနဲ့ ကျနော်လည်း နယ်စပ်မှာ အလုပ်လုပ်ဖို့ ထွက်သွားတယ်။ အဲဒီမှာက အင်တာနက်မရတော့ အဖွဲ့နဲ့ ကျောင်းက စာထုတ်တာတွေကို ကျနော်မသိဘူး။ အဖွဲ့က အခုလို ကြေညာတော့ ကျနော့်အဖေက ဆက်သွယ်ပြီး ဖြေရှင်းပေးမယ်ဆိုတဲ့အကြောင်း ပြောထားတယ်။ ဒီကြားထဲမှာလည်း ကျနော်ငွေချေထားတဲ့ သူတယောက်နဲ့ ဆက်သွယ်လို့ရပြီး သူ့ဆီက ငွေသိန်း ၄၀ ပြန်ပေးမယ်လို့ ပြောတယ်။ သူ့ကိုသွားရှာတဲ့အချိန်မှာ DRPA ရဲ့ ဘဏ္ဍာရေးမှူးလည်းပါပါတယ်။ ကျနော်ငွေချေထားတဲ့သူ နောက်တယောက်ကတော့ ဖမ်းခံထားရတယ်ဆိုတာ သိပ်မကြာခင်ကမှ သိရတယ်။ ကျနော်တာဝန်ခံထားတာဖြစ်တဲ့အပေါ် ကျနော်ငွေတွေ ပြန်စိုက်လျော်မယ်လို့လည်း အဖွဲ့ကို ပြောထားပါတယ်” လို့ ပြောပါတယ်။

DRPA ရဲ့တာဝန်ရှိသူတယောက်ကတော့ “(လက်နက်ဝယ်ပေးမယ့် တဆင့်ခံလူကို) သွားရှာတဲ့ အထဲမှာတော့မပါဘူးဗျ။ ကျနော်တို့ ဗဟိုကော်မတီဝင်တွေနဲ့ သူ တယောက်မှ တွေ့ပေးတာမျိုးမရှိဘူး။ သူ့ပြောစကားအတိုင်း Run ပေးခဲ့ရတာပဲရှိတယ်” လို့ပြောပါတယ်။

ဆင့်ခေါ်စာတွေထုတ်ပေမယ့် စိုင်းထက်အောင်ဘက်က ဆက်သွယ်လာတာမရှိခဲ့ဘဲ ကျောင်းက ထုတ်ပယ်တယ်ဆိုတဲ့နောက်မှာမှ စိုင်းထက်အောင်ရဲ့ အဖေဖြစ်သူက ဆက်သွယ်လာပြီး မေလ ပထမပတ်ထဲမှာ ဖြေရှင်းပေးမယ်လို့ ပြောခဲ့တယ်လို့လည်း ဆိုပါတယ်။ အဲဒီနောက်မှာ ထပ်ဆက်သွယ်လာပြီး မေလ ၁၀ ရက်နေ့အထိ စောင့်ပေးဖို့ပြောခဲ့ပြီး နောက်ပိုင်းမှာ ဆက်သွယ်လို့ မရတော့ဘူးလို့လည်း ပြောပါတယ်။

စိုင်းထက်အောင်က “ကျနော့်ဘက်မှာ အဲဒီအချိန်က ပြောစရာမရှိတဲ့အတွက် ပြန်မဆက်သွယ်ဘဲ လက်နက်မှာတဲ့သူကိုပဲ ဆက်သွယ်ပြီး ကိစ္စတွေရှင်းပြဖို့ စာပို့ထားခဲ့ပါတယ်။ ဘာကြောင့်လဲဆိုတော့ အစောပိုင်းကာလတွေမှာ လိမ်ပါတယ်လို့ပြောရင် တပ်ဖွဲ့က ကျနော် အလွဲသုံးစားပြုလုပ်တယ်လို့ သံသယဖြစ်မှာကို စိုးရိမ်တာပါ။ အခု ဖြစ်တဲ့ကိစ္စတွေကလည်း အချိန်ကာလကွာဟမှုတခုနဲ့ နားလည်မှုလွဲသွားတဲ့အချိန်မှာ ဖြစ်ပျက်သွားတာတွေပါပဲ။ အခုလည်း တချို့တဝက်ကို ကျနော့်ဘက်ကနေ စိုက်ပြီး ရန်ပုံငွေ ပြန်ထည့်ဖို့ ကြိုးစားထားတာတွေရှိပါတယ်။ ကျနော့်မှာရှိတာတွေရောင်းပြီးထည့်ပေးမှာပါ” လို့ပြောပါတယ်။

DRPA တာဝန်ရှိသူတယောက်ကတော့ “ကျန်တာက သူ့အပိုင်း သူတာဝန်ယူမှု သူတာဝန်ခံမှုပေါ့ဗျာ။ ကျနော်တို့လက်နက်ဝယ်တာ သူ့ဆီက” လို့ ပြောပါတယ်။

14 hours Ago

ရေစကြိုမြို့နယ်တွင် စစ်ကောင်စီတပ်နှင့် ရဲတပ်ဖွဲ့ဝင်များ တိုက်ခိုက်ခံရ

မကွေးတိုင်း ရေစကြိုမြို့နယ်မှာ မေ ၂၃ ရက်နေ့က စစ်ကောင်စီတပ်နဲ့ ရဲတပ်ဖွဲ့ဝင်တွေ တိုက်ခိုက်ခံခဲ့ရပြီး သေဆုံးဒဏ်ရာ ရခဲ့တယ်လို့ ပြည်သူ့ကာကွယ်ရေးတပ်ဖွဲ့တွေက ပြောပါတယ်။

ရေလယ်ကျွန်းဒေသ မြေတော်ရဲစခန်းက စျေးဝယ်ထွက်လာတဲ့ စစ်ကောင်စီရဲ့ ရဲ ၇ ယောက်ကို မေလ ၂၃ ရက်နေ့ မနက် ၁၀ နာရီခွဲလောက်မှာ ဒေသကာကွယ်ရေး ညီနောင်မဟာမိတ် ၄ ဖွဲ့က ပစ်ခတ်တိုက်ခိုက်ခဲ့တာကြောင့် ရဲ ၃ ယောက်သေဆုံးပြီး ၂ ယောက်အပြင်းထန်ဒဏ်ရာကာ လက်နက်ခဲယမ်းတွေ သိမ်းဆည်းနိုင်ခဲ့တယ်လို့ ရေလယ်ကျွန်းဒေသ ပြောက်ကျားတပ်ဖွဲ့ (YSO-ISA) ရဲ့ ခေါင်းဆောင်က ဒီဗွီဘီကိုပြောပါတယ်။

“ကျနော်တို့က ရိက္ခာပြတ်လို့ မြေတော်ရွာဘက်ကို စျေးဝယ်အောင်သွားခဲ့တယ်။ အဲဒီမှာ မြေတော်ရဲစခန်းက ရဲတွေ ကျနော်တို့နဲ့ မျက်နှာချင်းဆိုင် ပေ ၁၀၀ လောက်မှာ စျေးဝယ်နေတာ မြင်ရတယ်။ ကျနော်တို့ရဲ့ ပစ်ကွင်းထဲမှာ ပြည်သူတွေနဲ့ ရှုပ်နေတဲ့အခါကျတော့ စျေးဝယ်နေတာကို ကြည့်နေလိုက်တယ်။ စျေးဝယ်ပြီးအပြန် ထောင့်တထောင့်ကို ကွေ့ပြီဆိုမှ နောက်ကနေ လိုက်ပစ်လိုက်တာ။”

အဲဒီပစ်ခတ်မှုကြောင့် နေရာမှာတင် ရဲ ၃ ​ယောက် သေဆုံးပြီး ၂ ယောက် အပြင်းအထန် ဒဏ်ရာရရှိသွားကြောင်း၊ အဲဒီ ရဲတွေဆီကနေ G3 မောင်းပြန်သေနတ် ၂ လက်၊ ကျည်ဆန် ၃၅ တောင့်၊ ဗုံးသီး ၁ လုံး၊ ဖုန်း ၁ လုံးနဲ့ ပိုက်ဆံ ၃၁,၇၀၀ ကျပ် သိမ်းဆည်းရမိခဲ့ပြီး မဟာမိတ်ပူးပေါင်းတပ်ဘက်က အထိအခိုက်မရှိခဲ့ဘူးလို့ YSO-ISA ရဲ့ ခေါင်းဆောင်က ပြောပါတယ်။

အဲဒီတိုက်ခိုက်မှုကို YSO-ISA၊ MGN-Tiger (မြင်းခြံ)၊ Black Wolf PDF-MDY၊ ပုဂံ-ညောင်ဦး PDF တို့ ညီနောင်မဟာမိတ် ၄ ဖွဲ့က ပူးပေါင်းပြုလုပ်ခဲ့တာလို့ ဆိုပါတယ်။

အလားတူ ရေစကြိုမြို့နယ်မှာ မေ ၂၃ ရက်နေ့ မနက် ၁၁ လောက်က အင်အား ၆၀ လောက်နဲ့ စစ်ကြောင်းထိုးလာတဲ့ စစ်ကောင်စီတပ်နဲ့ ဒေသကာကွယ်ရေး မဟာမိတ်ပူးပေါင်းတပ်ဖွဲ့တွေ ဆင်ချောင်းကျေးရွာနားမှာ တိုက်ပွဲဖြစ်ပွားခဲ့ပြီး စစ်ကောင်စီတပ်က ၃ ယောက်သေဆုံးပြီး ဒဏ်ရာရသူတွေရှိတယ်လို့  Young Force UG ရဲ့ ပြန်ကြားရေးတာဝန်ခံက ပြောပါတယ်။

“ကျနော်တို့ဘက်က လက်နက်ကြီး၊ လက်နက်ငယ်တွေနဲ့ ပစ်ခတ်တိုက်ခိုက်သလို သူတို့ဘက်ကလည်း ပြန်ပစ်တယ်ဗျ။ နှစ်ဘက် ထိတွေ့တိုက်ပွဲ ၁ နာရီကျော်လောက် ကြာအောင် ဖြစ်ပွားခဲ့တယ်။ ကျနော်တို့ဘက်က လက်နက်ကြီးပိုင်းကို ကျောက်ထု PDF တပ်ရင်း(၂)က ဒုတပ်ရင်းမှူးက ကူညီပစ်ခတ်ပေးခဲ့တယ်။ အပြန်အလှန်တိုက်ပွဲကြားက ရဲဘော်တွေ အထိခိုက်အကျဆုံးမရှိဘဲ ဆုတ်ခွာနိုင်ခဲ့ကြတယ်။”

အဲဒီတိုက်ပွဲကို ပခုက္ကူ Young Force UG၊Earthquake UG၊RSO (ပခုက္ကူ)၊ King Cobra၊ URBAN(ရေစကြို)၊ သံမဏိသိန်းငှက်(မြိုင်) နဲ့ 27 Revolution Force တို့ ညီနောင်မဟာမိတ်တပ်ဖွဲ့တွေ ပူးပေါင်းတိုက်ခိုက်ခဲ့တာလို့ ပြောပါတယ်။

ရေစကြိုမြို့နယ်မှာ တိုက်ပွဲတွေ မကြာခဏဖြစ်ပွားနေပြီး ပြည်သူ့ကာကွယ်ရေးတပ်ဖွဲ့တွေအတွက် အဓိက လက်နက်ခဲယမ်းအကူအညီ လိုအပ်နေတယ်လို့ YSO-ISA ခေါင်းဆောင်က ပြောပါတယ်။

“စစ်(...) တွေနဲ့ ထိတွေတိုက်ပွဲ ဖြစ်ပွားတဲ့အခါ အဓိက လိုအပ်ချက်ကတော့ လက်နက်ခဲယမ်းပါပဲ။ မြေပြန့်ဒေသဖြစ်တဲ့အတွက် လက်နက်လမ်းကြောင်း အဝင်အထွက်လည်း ခက်ခဲတယ်။ ကျနော်တို့မှာ တိုက်ပွဲတပွဲ ဖြစ်တယ်ဆိုရင် ၂ ပွဲစာမရှိဘူး။ တိုက်ခိုက်လို့ နိုင်မှန်းသိရင်တောင် နောက်ထပ်စစ်ကြောင်း ပြန်ထိုးလာခဲ့ရင်ဆိုတဲ့ အတွေးနဲ့ ဒုတိယပွဲအတွက် ကျည်ချွေတာရတယ်။ လက်လုပ်သေနတ်တွေကို အားထားပြီး တိုက်ပွဲဝင်နေရတာဖြစ်လို့ လက်လုပ်တွေရဲ့ ရောက်နိုင်တဲ့ အကွာဝေးထိအောင် အရဲစွန့်ပြီး ရှေ့တိုးခဲ့ရတာတွေရှိတယ်။ တခါတလေလည်း ပစ်ကွင်းထဲမှာ ဝင်ပေမယ့် ကျနော်တို့ရဲ့ လက်နက်တွေ စိတ်မချရလို့ လွှတ်ပေးလိုက်ရတာမျိုးတွေရှိတယ်။ အကူအညီတွေ လောက်လောက်ငင မရတာကြောင့် ပြောက်ကျားစနစ်နဲ့ဘဲ စစ်အာဏာရှင်ပြုတ်ကျတဲ့အထိ တိုက်ပွဲဝင်သွားမယ်” လို့ ပြောပါတယ်။

နှစ်ဖက်တိုက်ပွဲတွေအတွင်း စစ်သားနဲ့ရဲတပ်ဖွဲ့ဝင်တွေ သေဆုံးဒဏ်ရာရမှုအခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

ရေစကြိုမြို့နယ် ရေလယ်ကျွန်းဒေသကကို မေလ ၇ ရက်နေကနေ ၁၇ ရက်နေအထိ စစ်ကောင်စီတပ်သား အင်အား ၁၀၀ လောက်နဲ့ စစ်ကြောင်းထိုးကာ ပြည်သူတွေရဲ့ နေအိမ် ၁၅၀ ကျော်လောက်ကို မီးရှို့ဖျက်ဆီးခဲ့ကြတယ်လို့ သိရပါတယ်။

15 hours Ago

ထိုင်းနိုင်ငံ လိုဏ်ဂူအတွင်း တရားမဝင် ရွေ့ပြောင်းမြန်မာလုပ်သား ၂၅ ဦး ဖမ်းဆီးခံရ

မြန်မာ- ထိုင်းနယ်စပ်၊ တာခ်ခရိုင်၊ တာဆောင်ယမ်းမြို့နယ်၊ လိုဏ်ဂူတလုံးမှာ ခိုအောင်းနေတဲ့ တရားမဝင်  ရွှေ့ပြောင်းမြန်မာအလုပ်သမား ၂၅ ယောက်ကို လူကုန်ကူးတဲ့ ထိုင်းနိုင်ငံသား ၃ ယောက်နဲ့အတူ မေလ ၂၄ ရက်မှာ ထိုင်းစစ်တပ်နဲ့ ရဲတပ်ဖွဲ့တို့က ဖမ်းဆီးခဲ့ပါတယ်။

နယ်စပ်သောင်ရင်းမြစ်ကိုကျော်ပြီး ထိုင်းနိုင်ငံကို တရားမဝင် ဝင်ရောက်လာတဲ့ ရွှေ့ပြောင်းမြန်မာအလုပ်သမား အမျိုးသား ၁၅ ယောက်နဲ့ အမျိုးသမီး ၁၀ ယောက်တို့ကို   မဲ့ဝေဖိုးခီးရွာ၊ ရပ်ကွက် ၄ ရှိ လိုဏ်ဂူတခု အတွင်းပိုင်းမှာထားရှိရာ ထိုင်းအာဏာတွေက သတင်းရရှိတဲ့အတွက် သွားရောက်ရှာဖွေပြီး  ဖမ်းဆီးလိုက်တာပါ။ 

ဖမ်းဆီးခံရတဲ့ တရားမဝင်မြန်မာအလုပ်သမားတွေနဲ့အတူ  လူကုန်ကူးသူ ထိုင်းလူမျိုး ၃ ယောက်နဲ့ မော်တော်ကား ၃ စီး၊ ဆိုင်ကယ် ၁ စီးကိုလည်း သိမ်းဆည်းရမိခဲ့ပါတယ်။

ဖမ်းဆီးခံရသူ ထိုင်းလူမျိုး ၃ ယောက်ထဲမှာ အရင်က လူအယောက် ၅၀ လောက်ကို လူကုန်ကူးခဲ့ဖူးသူ တယောက်လည်း ပါဝင်တယ်လို့ သိရပါတယ်။

အခု ဖမ်းဆီးရမိထားသူတွေကိုတော့ တာဆောင်ယမ်းမြို့မရဲစခန်းမှာ အမှုဖွင့်စစ်ဆေးပြီး ထိုင်းနိုင်ငံ တရားဥပဒေအတိုင်း အရေးယူသွားဖို့ရှိပါတယ်။

15 hours Ago

ဖားကန့်တိုက်ပွဲတွင် စစ်ကောင်စီ တပ်သား ၇ ဦး သေဆုံး

ကချင်လွတ်မြောက်ရေးတပ်ဖွဲ့ (KIA)နဲ့ စစ်ကောင်စီတပ်ဖွဲ့တို့ မေလ ၂၃ ရက် မနက် ၇ နာရီလောက်က  ကချင်ပြည်နယ်၊ ဖားကန့်မြို့နယ်၊ မမုံစံပြကျေးရွာမှာ တိုက်ပွဲဖြစ်ပွားခဲ့ပြီး စစ်ကောင်စီတပ်ဖွဲ့ဝင် ၇ ယောက် သေဆုံးခဲ့တယ်လို့ ဒေသခံတွေဆီကသိရပါတယ်။

မိုင်းထိပြီး စစ်ကောင်စီတပ်ဖွဲ့ဝင် ၇ ယောက်  သေဆုံးခဲ့လို့ အပြန်အလှန် ပစ်ခတ်ကြရာ စစ်ကောင်စီဘက်က လက်နက်ကြီးနဲ့ပစ်လို့ နေအိမ်တချို့ ပျက်စီးသွားတယ်လို့ ဒေသခံတွေက ပြောပါတယ်။

စစ်ရေးလှုပ်ရှားမှု လုပ်လာတဲ့ စကစစစ်ကြောင်းကို မိုင်းဆွဲတိုက်ခိုက်လို့ တိုက်ပွဲဖြစ်ပွားခဲ့တာဖြစ်ပြီး ပြည်သူနှစ်ယောက်လည်း လက်နက်ကြီး ထိမှန်ဒဏ်ရာရရှိခဲ့တယ်လို့ ဒေသခံတယောက်က ဒီဗွီဘီကို  ပြောပါတယ်။

“ရမ်းပစ်နေတာ ပြည်သူတစ်ဦး ကျည်ထိထားတယ်။ တိုက်ပွဲပြင်းထန်နေလို့ သွားမကောက်နိုင်‌သေးဘူး။ အပြင်ထွက်တာမြင်ရင် ပစ်သတ်မယ်လို့ စစ်ကောင်စီ တပ်သားတွေက ပြောတယ်။ လက်နက်ကြီးနဲ့ပစ်လို့ ရွာသားနှစ်ယောက်ကိုထိပြီး ဒဏ်ရာရထားတယ်။ တယောက်က  စိုးရိမ်ရတယ်။”

အပြန်အလှန်ပစ်ခတ်မှုဖြစ်ပွားပြီးနောက် စစ်ကောင်စီတပ်ဖွဲ့ဝင်တွေ ရွာအတွင်းရှိနေပြီး ကျေးရွာအတွင်းနေထိုင်သူတွေကို အပြင်ထွက်ရင် ပစ်သတ်မယ်လို့ ခြိမ်းခြောက်ပြောဆိုထားလို့ လူနေအိမ်ပျက်စီးဆုံးရှုံးတဲ့ အခြေအနေတွေအသေးစိတ်ကိုတော့ မသိရသေးပါဘူး။

အဆိုပါပစ်ခတ်မှုနဲ့  တိုက်ပွဲမှာ စစ်ကောင်စီတပ်သားတွေ သေဆုံးမှုနဲ့ ပတ်သက်ပြီး စစ်ကောင်စီဘက်က သတင်းထုတ်ပြန်ခြင်းမရှိသေးပါဘူး။ 

ပြီးခဲ့တဲ့ မေလ ၂၀ ရက်ကလည်း စစ်ကောင်စီစစ်ကြောင်းကို ကချင်လွတ်မြောက်ရေးတပ် KIA က မိုင်းဆွဲတိုက်ခိုက်ခဲ့ရာ စစ်ကောင်စီတပ်သား ၅ ယောက်သေဆုံးခဲ့ပါတယ်။

15 hours Ago

ရွာငံမြို့တွင် လူမနေသည့် နေအိမ် ၂ လုံးကို PDF နေအိမ်ဟုဆိုပြီး စစ်ကောင်စီချိပ်ပိတ်

ရှမ်းပြည်နယ်တောင်ပိုင်း ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့နယ်  မြင်းကျဒိုးကျေးရွာမှာ ပြည်သူတွေရဲ့ နေအိမ် ၂ လုံးကို စစ်ကောင်စီက ပြီးခဲ့တဲ့ မေလ ၁၅ ရက်နေ့က PDF တွေရဲ့ နေအိမ်ဆိုပြီး ဆေးမှုတ်ချိပ်ပိတ်သွားတယ်လို့ ဒေသခံတွေက ပြောပါတယ်။

စစ်တပ်က အာဏာသိမ်းပြီးနောက်ပိုင်း မြင်းကျဒိုး ကျေးရွာရှိ မိသားစုတချို့ဟာ စားဝတ်နေရေး အခက်အခဲကြောင့် ရပ်ဝေးမှာ သွားရောက်အလုပ် လုပ်ကိုင်နေကြချိန် နေအိမ်တွေမှာ လူမရှိဘဲ ဒီအတိုင်းထားခဲ့ရတာကို အခွင့်အရေးယူပြီး စစ်ကောင်စီနဲ့ လက်ပါးစေပျူစောထီးတွေက PDF အကြမ်းဖက်အိမ်ဆိုပြီး ရေးသားချိပ်ပိတ်ကာ အိမ်တွင်းရှိ ပစ္စည်းတွေကို ယူဆောင်သွားတယ်လို့ ဒေသခံတဦးက ပြောပါတယ်။

အိမ်ပိုင်ရှင်တဦးက “အိမ်မှာ လူမရှိတာက ၆ လလောက်ရှိပါပြီ။ မိသားစု စားဝတ်နေရေးအတွက် တခြားဒေသမှာ အလုပ်သွားလုပ်နေတာကို PDF နေအိမ်လို့ စွပ်စွဲပြီး အိမ်ကို ချိပ်ပိတ်သွားတာ။ တကယ်မဟုတ်ဘဲ စွပ်စွဲခံရလို့  စိတ်မကောင်းဖြစ်ရတယ်။ ကျနော့်သားသမီးနဲ့ မိန်းမ ပြန်လာရင် နေစရာ အိမ်မရှိတော့ဘူး။ ဒါပေမဲ့ အဆိုးဆုံးအချိန်အထိတော့ မျှော်လင့်ထားပါတယ်” လို့ ဒီဗွီဘီကို ပြောပါတယ်။

အိမ်ပိုင်ရှင်ဖြစ်သူရဲ့ မိတ်ဆွေတဦးက “ဘာမှမကူညီလိုက်နိုင်တဲ့အတွက် စိတ်မကောင်းဖြစ်ရပါတယ်။ သူ့တို့မိသားစုအတွက် အတတ်နိုင်ဆုံး ကူညီသွားပေးမှာ။ စိတ်ဓာတ်မကျဖို့ နဲ့ အားပေးဖြစ်ပါတယ်” လို့ ပြောပါတယ်။

မြင်းကျဒိုးကျေးရွာမှာ လူမရှိတဲ့နေအိမ်တွေကို စစ်ကောင်စီနဲ့ ပျူစောထီးတွေက လိုက်လံစစ်ဆေးမေးမြန်းနေတာကြောင့် အိမ်နီးချင်းတွေက ရပ်ဝေးမှာ အလုပ်သွားလုပ်နေတဲ့ ပြည်သူတွေဖြစ်ကြောင်း နဲ့ PDF တွေရဲ့ နေအိမ် မဟုတ်ကြောင်း ပြောနေရတယ်လို့ ဒေသခံတွေက ပြောပါတယ်။

16 hours Ago

လောင်းလုံးမြို့နယ် ကျောက်နီမော်ရွာက ပြည်သူ ၂ ဦးကို ပျူစောထီးအဖွဲ့ ဖမ်းဆီး

တနင်္သာရီတိုင်း၊ လောင်းလုံးမြို့နယ်၊ ကျောက်နီမော်ကျေးရွာနေ ပြည်သူ ၂ ဦးကို မေ ၂၃ ရက် ညနေပိုင်းမှာ ပျူစောထီးအဖွဲ့ဝင် ၁၀ ဦးလောက်က လာရောက်ဖမ်းဆီးသွားတယ်လို့ ဒေသခံတွေက ပြောပါတယ်။

အဖမ်းခံရသူ ၂ ဦးမှာ အသက် ၅၀ အရွယ် ဦးကျော်စိုးနဲ့ အသက် ၆၀ အရွယ် ဒေါ်ကမ်း တို့ဖြစ်ကြပြီး ဘာကြောင့် အခုလို အဖမ်းခံရတယ်ဆိုတာ မသိရသေးပါဘူး။

ဒေသခံတဦးက “ဖမ်းပြီး နှစ်ယောက်စလုံးကို ပျူစောထီးတွေ စခန်းချနေတဲ့ စက်ရုံဟောင်းကို ခေါ်သွားတယ်၊ အခုတော့ လောင်းလုံး စရဖရုံးက လာခေါ်သွားပြီ၊ မျက်နှာ အဝတ်စစည်းပြီး ခေါ်သွားတယ်လို့ကြားတယ်” လို့ ပြောပါတယ်။

ကျောက်နီမော်ကျေးရွာမှာ စစ်ကောင်စီက လက်နက်တပ်ဆင်ပေးထားတဲ့ ပျူစောထီးအဖွဲ့ဝင် ၁၀ ဦးလောက်နဲ့ ရွာအနီးရှိ တောင်ပေါ်စခန်းတခုမှာ စစ်ကောင်စီတပ်သား ၂၀ လောက်ရှိပြီး ငါးဖမ်းလှေတွေမှာ ဆက်ကြေးကောက်တာ၊ ကျေးရွာအတွင်း လောင်းကစားဝိုင်းတွေထောင်ပြီး ပိုက်ဆံကောက်တာတွေ ပြုလုပ်လေ့ရှိတယ်လို့ ရွာခံတွေက ပြောပါတယ်။

လောင်းလုံးမြို့နယ်၊ ပန္ဒလဲကျေးရွာမှာလည်း ပြီးခဲ့တဲ့ ၂ လလောက်က စွန်ရဲအမည်ခံ ပျူစောထီးအဖွဲ့ဝင်တွေက ပြည်သူ ၃ ဦးကို ပစ်ခတ်သတ်ဖြတ်ခဲ့တာကြောင့် လက်ရှိအချိန်ထိ ရွာခံအများစု ကြောက်လန့်ပြီး နေအိမ်စွန့်ခွာ တိမ်းရှောင်နေကြရပါတယ်။

စစ်ကောင်စီ ပြန်ကြားရေးဒုဝန်ကြီး ဗိုလ်ချုပ်ဇော်မင်းထွန်းကတော့ ပျူစောထီးအဖွဲ့တွေ ဖွဲ့စည်းပေးထားတာမရှိဘူးလို့ ငြင်းဆိုထားပေမယ့် လောင်းလုံးမြို့နယ်အတွင်းမှာတော့ လက်နက်ကိုင် ပျူစောထီးအဖွဲ့ဝင်တွေက​ ရဲစခန်းတွေကို ဝင်ထွက်သွားလာတာ၊ စစ်ကောင်စီတပ်ဖွဲ့ဝင်တွေနဲ့ ပေါင်းပြီး ပြည်သူတွေကို ဖမ်းဆီးတာတွေ မကြာခဏ ပြုလုပ်လေ့ရှိတယ်လို့ ဒေသခံတွေက ပြောပါတယ်။

16 hours Ago
More News
Up