နိုင်ငံတကာ

May 24, 2022

ရေနစ်သေဆုံးခဲ့သည့် ထိုင်းသရုပ်ဆောင်မင်းသမီး တိုင်မိုနိဒါး၏ ရုပ်အလောင်းကို မီးသင်္ဂြိုဟ်

ထိုင်းနိုင်ငံ ဘန်ကောက်မြို့မှာ လွန်ခဲ့တဲ့ ဧပြီလကုန်ပိုင်းက ကျောက်ဖရားမြစ်ထဲ ပြုတ်ကျ သေဆုံးသွားခဲ့တဲ့ ထိုင်းသရုပ်ဆောင်မင်းသမီးရဲ့အလောင်းကို မေ ၂၄ ရက် ဒီနေ့ညနေပိုင်းမှာ အခမ်းအနားနဲ့ မီးသင်္ဂြိုဟ်လိုက်ပါတယ်။

ဈာပနအခမ်းအနားကို ပထုန်ဌာနီမြို့နယ်၊ ခလောင်းဆီနယ်မြေ မက်ဿဒစ်ခရစ်ယာန်ဘုရားရှိခိုး ကျောင်းမှာ ကျင်းပပြီး မိဘဆွေမျိုးနဲ့ အရင်းနှီးဆုံး ဆရာသမား မိတ်ဆွေသူငယ်ချင်း စုစုပေါင်း ၁၀၀ ကျော်လောက်သာ ဖိတ်ကြားခဲ့တာပါ။

သူ့ရဲ့ခေါင်းတလားကိုတော့ သူနှစ်သက်တဲ့  ပုစွန်ဆီရောင်၊ ပန်းရောင်နှင်းဆီပန်း အပွင့်ပေါင်း ၁၀၀၀နဲ့ အထူးဆင်ယင်ပြုလုပ်ထားပါတယ်။ သူရဲ့မျက်နှာကတော့ ပျက်စီးယိုယွင်းနေပြီ ဖြစ်တဲ့အတွက် ဇာပဝါနဲ့ လွှားထားပြီး ဘယ်သူမှ ဓာတ်ပုံရိုက်ခွင့်မရှိပါဘူး။ 

အခမ်းအနားကျင်းပပုံကို ဘုရားရှိခိုးကျောင်း ယူကျု့ချနယ်လ်ကနေ တိုက်ရိုက်ထုတ်လွှင့်ပြပြီး သတင်းထောက်တွေလည်း အပြင်ကနေသာ သတင်းယူခွင့်ရှိပါတယ်။ 

ချနယ်လ်အသီးသီးက သတင်းထောက်ပေါင်း ၁၀၀ ကျော်လာတာကြောင့် တိုင်မိုသေဆုံးမှုမှာ တရားစွဲခံထားရတဲ့ တလှေတည်းစီး အပေါင်းအဖော်တွေဟာ သတင်းထောက်တွေ မတွေ့အောင် အဝင်အထွက် ရှောင်ပုန်းထွက်ပြေးပြီး ပြန်ခဲ့ရပါတယ်။ 

သူသေဆုံးမှုမှာ ပထုန်ဌာနီခရိုင်ရဲတပ်ဖွဲ့က မတော်တဆသေဆုံးမှုနဲ့ အမှုပိတ်ပြီး လှေပေါ်က အပေါင်းပါ ၅ ဦးကို ပေါ့ဆမှုနဲ့အရေးယူဖို့ တရားရုံးကို အမှုတွဲပို့ထားပြီး ဖြစ်ပါတယ်။ 

ဒါပေမဲ့ ရဲတပ်ဖွဲ့ရဲ့ ထုတ်ပြန်ချက်မှာ ယုတ္တိမတန်တာတွေ၊ မေးခွန်းထုတ်စရာတွေ အများကြီး ရှိနေတာမို့ တိုင်မိုကို ချစ်တဲ့ ပရိသတ်၊ အပေါင်းအသင်းမိတ်ဆွေတွေနဲ့ လူ့အခွင့်အရေးဆိုင်ရာ ရှေ့နေတွေက လက်မခံနိုင်ဘဲ သက်သေအထောက်အထားတွေ ရှာဖွေပြီး ဖြစ်ရပ်မှန်ပေါ်ပေါက်ရေး ကြိုးစားနေပါတယ်။ 

အဲဒီထဲက ရာဇဝတ်မှုကြောင့် သားကောင်ဖြစ်ခဲ့ရသူတွေ အကူအညီပေးနေတဲ့အဖွဲ့ ဥက္ကဋ္ဌ နိုင်းအာ ချရိယ ရုန်းရတ်တနဖုန်းကလည်း တိုင်မိုသေဆုံးမှုဟာ မတော်တဆ မဟုတ်၊ တမင်သက်သက် သတ်ဖြတ် အလောင်းဖျောက်ခံရတာလို့ အခိုင်အမာပြောဆိုနေပါတယ်။

တိုင်မိုရဲ့ ညာဘက်ပေါင်ပေါ်က ဒဏ်ရာဟာ ရဲတွေပြောသလို ပန်ကာဒလက်နဲ့ ထိမိတာမဟုတ်ဘဲ ဓားနဲ့ တမင်သက်သက် အခြစ်ခံရတာဖြစ်ပြီး ခြစ်နေစဉ် နောက်တယောက်က ပေါင်ကိုကိုင်ထားတဲ့ သက်သေ၊ လှေပေါ်က လူတွေ ဘယ်ချိန်မှာ ဘာလုပ်ခဲ့လဲဆိုတဲ့ သက်သေတွေ သူ့ဆီမှာရှိကြောင်း၊ လှေပေါ်က တယောက် အမြင်မှန်ရပြီး သူ့ထံ ဆက်သွယ်ဝန်ခံကာ သက်သေတွေပါ ပို့ထားကြောင်း၊ ဒါပေမဲ့ ထိုင်းအထူးမှုခင်းစုံစမ်းစစ်ဆေးရေးဌာနက ဒီအမှုကို ဆက်လက်ကိုင်တွယ်စစ်ဆေးဖို့ လက်မခံတာကြောင့် သက်သေတွေ ထုတ်မပေးနိုင်သေးဘူးလို့ ပြောပါတယ်။ 

သူဟာ အမှုကို အမှန်တရားဖြစ်အောင် ကူညီပေးဖို့ ထိုင်းအမျိုးသားအထက်လွှတ်တော် အဖွဲ့ထံလည်း စာပို့ထားပါတယ်။ ဒီကနေ့မှာလည်း ကျောက်ဖရားမြစ်ထဲသွားပြီး စပိဘုတ်လှေရဲ့ အနေအထား၊ အနီးနားက စီစီတီဗွီကင်မရာတွေ ထပ်စစ်ခဲ့ပါတယ်၊ 

အစပိုင်းမှာ သင်္ဘောကျင်းပိုင်ရှင်တဦးက သူတို့ဆီက စီစီကင်မရာပျက်နေတယ်လို့ ပြောပေမယ့် ဒီနေ့သွားစစ်တာ စီစီကင်မရာ တကယ်မပျက်ဘဲ သင်္ဘောကျင်းပိုင်ရှင်အစစ်နဲ့လည်း တွေ့ခဲ့ကြောင်း၊ တိုင်မိုတို့စီးတဲ့ စပိဘုတ်ကိုလည်း ရေဆေးထားတာ တွေ့ရကြောင်း သံသယဖြစ်စရာ ထပ်တွေ့တယ်လို့ ပြောပါတယ်၊ ဆက်လက်ပြီး ဒရုန်းရဲ့အကူအညီနဲ့ ကျောက်ဖရားမြစ်ထဲက ဓားမြှောင်တစ်ချောင်း ရှာဦးမယ်လို့ ပြောပါတယ်။ 

ဒီအမှုကို ဆက်မလိုက်ဘဲ ရဲတွေ ပြောတဲ့အတိုင်း လက်ခံလိုက်ရင် နောက်နောင်မှာလည်း ငွေကြေးတတ်နိုင်ရင် လုပ်ချင်ရာလုပ်လို့ ရတယ်။ အမှန်တရားကို ငွေနဲ့ဖုံးလို့ရတယ်ဆိုတဲ့ ထုံးစံဖြစ်သွားမှာဖြစ်ကြောင်း၊ သူ့အနေနဲ့ အာဏာရှိသူ၊ ငွေကြေးချမ်းသာသူတွေနဲ့ ထိပ်တိုက်ရင်ဆိုင်နေရတာကြောင့် တကယ်လို့ တခုခုဖြစ်သွားရင်  တိုင်မိုအမှုကလွဲလို့ တခြား ဘာအကြောင်းအရာမှမရှိ၊ သူ သေဆုံးပါက သူ့မိန်းမနဲ့ ကလေးတွေကို စောင့်ရှောက်ပေးဖို့ လိုက်ဖ်လွှင့်ပြောဆိုထားပါတယ်။ 

တဘက်ကလည်း မင်းသမီးတိုင်မိုရဲ့ လူမှုကွန်ရက်ကို တစုံတယောက်က တိုင်မိုကဲ့သို့ အသုံးပြုနေပြီး သူဟာ အချစ်ဆုံးသူငယ်ချင်းနဲ့ ယုံကြည်ရသူရဲ့ လုပ်ကြံမှုကိုခံရကြောင်း၊ လှေပေါ်ပါအဖော်တွေ အမှန်အတိုင်းဝန်ခံကြဖို့ မဝန်ခံရင် ဒီအကောင့်ကနေ ဖြစ်ရပ်မှန်တွေ ဆက်တိုက်ဖော်ပြသွားမယ်လို့ ခြိမ်းခြောက်ထားပါတယ်။

သူပြောတဲ့အတိုင်း ဘယ်သူမှမမြင်ဖူးသေးတဲ့ သူတို့လှေပေါ်အတူရှိစဉ်ရိုက်ထားတဲ့ပုံတွေ ဆက်တိုက် တင်လာပါတယ်။ ဓာတ်ပုံတွေကတော့ တိုင်မိုရဲ့ ကိုယ်ပိုင်ဖုံးထဲကပုံတွေလို့ သူ့မိခင်ကပြောပါတယ်။ 

တယ်လီဖုန်းမှာ အစပိုင်းက မိခင်က သိမ်းထားတယ်ပြောပြီး သတင်းထောက်က နောက်တကြိမ် ထပ်မေးတော့ သူ့ရှေ့နေကို ပေးလိုက်ပြီလို့ ပြောပါတယ်၊ ရှေ့နေကလည်း သူ့ဆီမှာ မရှိဘူးလို့ ပြောပြန်ပါတယ်၊ ရဲတပ်ဖွဲ့ကတော့ တိုင်မိုရဲ့ ဖေ့စ်ဘွတ်ခ် အဟက်ခံရတာဖြစ်ပြီး တရားခံဟက်ကာကို  တပတ်အတွင်း ဖော်ထုတ်မယ်လို့ ပြောထားပါတယ်။ 

အသက် ၃၇ နှစ်အရွယ် ထိုင်းသရုပ်ဆောင်မင်းသမီး တိုင်မိုနိဒါးဟာ ပြီးခဲ့တဲ့ ဧပြီ ၂၄ ရက်က ပထုန်ဌာနီမြို့နယ် ကျောက်ဖရားမြစ်ထဲမှာ အပေါင်းဖော် ၅ ဦးနဲ့အတူ လှေစီးရင်း ရေနစ် သေဆုံးခဲ့ရတာဖြစ်ပါတယ်။

9 hours Ago

အင်ဒို-ပစိဖိတ် သာယာဝပြောရေး စီးပွားရေးမူဘောင် အမေရိကန်သမ္မတ ချပြ

အမေရိကန်သမ္မတဂျိုးဘိုင်ဒင်ဟာ သူ့ရဲ့ပထမဆုံး အာရှခရီးစဉ်မှာ အင်ဒို-ပစိဖိတ် သာယာဝပြောရေးအတွက် စီးပွားရေးမူဘောင် (IPEF) ကို တိုကျိုမှာ ထုတ်ဖော်ချပြခဲ့ပါတယ်။  

သမ္မတဘိုင်ဒန်ဟာ အာရှမှာ အမေရိကန်ရဲ့စီးပွားရေး ဆက်ဆံမှုဆိုင်ရာ ဆွေးနွေးတဲ့ အစီအစဉ်ကို မေ ၂၃ ရက်မှာ စတင်မိတ်ဆက်လိုက်ပြီး (IPEF) အစီအစဉ်မှာ စတင်ပါဝင်မယ့် ၁၃ နိုင်ငံအနေနဲ့ သူတို့ရဲ့ သဘောတူညီချက်တွေကို ဘယ်လိုလုပ်ဆောင်ရမယ်ဆိုတာကို ပုံစံချဖို့နဲ့ တရုတ်တို့ ပူးပေါင်းပါဝင်နိုင်ခွင့် ရှိ၊ မရှိ ဆိုတဲ့အချက်တွေကိုတော့ ချန်လှပ်ထားခဲ့ပါတယ်။ 

“၂၁ ရာစု စီးပွားရေးရဲ့ အနာဂတ်ကို ကျနော်တို့ ဒေသမှာ.. အင်ဒို-ပစိဖိတ်ဒေသမှာ… အကြီးအကျယ် ရေးသားသွားမှာပါ” လို့ တိုကျိုမှာပြုလုပ်တဲ့ ဖွင့်ပွဲမှာ ဘိုင်ဒန်က ပြောကြားသွားပါတယ်။ 

ဒီသဘောတူညီချက်မှာ အိန္ဒိယ၊ မလေးရှားနဲ့ ဖိလစ်ပိုင်တို့ အပါအဝင် ပူးပေါင်းပါဝင်တဲ့ နိုင်ငံတွေကို အကောက်ခွန်သက်သာခွင့် မပေးထားကြောင်း၊ ဒါပေမယ့် ရာသီဥတုပြောင်းလဲမှု ကနေ ထောက်ပံ့ရေးကွင်းဆက် ခံနိုင်ရည်ရှိမှုနဲ့ ဒစ်ဂျစ်တယ်ကုန်သွယ်မှုအထိ အဓိက ပြဿနာတွေကို ဖြေရှင်းဖို့ နည်းလမ်းတခု ပေးထားကြောင်း အိမ်ဖြူတော်က ပြောပါတယ်။ 

ဘိုင်ဒန်ဟာ အာရှတဝန်းရှိ သဘာဝပတ်ဝန်းကျင်၊ အလုပ်သမားနဲ့ တခြားစံနှုန်းများကို မြှင့်တင်ဖို့ သဘောတူညီချက်ကို လိုလားတာပါ။ IPEF ကို ကနဦး တည်ထောင်သူတွေကတော့ သြစတြေးလျ၊ ဘရူနိုင်း၊ အင်ဒိုနီးရှား၊ ဂျပန်၊ တောင်ကိုရီးယား၊ နယူးဇီလန်၊ စင်ကာပူ၊ ထိုင်း၊ ဗီယက်နမ်နဲ့ အမေရိကန်တို့ ဖြစ်ပါတယ်။ 

ထူထောင်တဲ့နိုင်ငံတွေဟာ သူတို့လိုက်နာချင်ကြတဲ့ စံနှုန်းတွေ၊ အဲဒီစံနှုန်းတွေကို ဘယ်သို့ဘယ်ပုံ လိုက်နာကြမယ် ဆိုတာတွေနဲ့ ဒီစံနှုန်းတွေကိုလည်း အဲဒီနိုင်ငံတွေရဲ့ ပြည်တွင်းဥပဒေပြုလွှတ်တော်တွေက အတည်ပြုဖို့ လို မလို စတာတွေအပြင် တရုတ်နိုင်ငံ အပါအဝင် အလားအလာရှိသော အဖွဲ့ဝင်တွေကိုလည်း ဘယ်လိုထည့်သွင်းစဉ်းစားမယ် ဆိုတာတွေကို ညှိနှိုင်းဖို့ လိုလိမ့်မယ်လို့ တာဝန်ရှိသူတွေက သတင်းထောက်တွေကို ပြောပါတယ်။ 

ဝါရှင်တန်ဟာ သမ္မတဟောင်း ဒေါ်နယ်ထရမ့်ပ် လက်ထက်မှာ နိုင်ငံစုံ ပစိဖိတ်ဖြတ်ကျော် ကုန်သွယ်ရေး သဘောတူညီချက်ကနေ နုတ်ထွက်ပြီးကတည်းက သူ့ရဲ့အင်ဒို-ပစိဖိတ် ထိတွေ့ဆက်ဆံမှုမှာ စီးပွားရေးမဏ္ဍိုင်တစ်ခု လျော့သွားခဲ့ပြီး သူ့ရဲ့သြဇာလွှမ်းမိုးမှုကို ချဲ့ထွင်ဖို့ သူ့ရဲ့အဓိကပြိုင်ဘက် တရုတ်နိုင်ငံကို အနိုင်ရရေး လုပ်ဆောင်ခဲ့ပါတယ်။ 

12 hours Ago

တူရကီအပေါ် ဆွီဒင်၏ ပိတ်ဆို့အရေးယူထားမှုအပေါ် လျစ်လျူမရှုနိုင်ဟု သမ္မတ အာဒိုဂန်ပြော

ဆွီဒင်နိုင်ငံက တူရကီနိုင်ငံအပေါ် ချမှတ်ထားတဲ့ ပိတ်ဆို့အရေးယူမှုတွေကို တူရကီအနေနဲ့ လျစ်လျူမရှုနိုင်ကြောင်း တူရကီသမ္မတ တေယစ်ပ်အာဒိုဂန်က မေ ၂၃ ရက်မှာ ပြောကြား ခဲ့ပါတယ်။ 

တူရကီဟာ နေတိုးမဟာမိတ်တွေ ချမှတ်ထားတဲ့ ပိတ်ဆို့အရေးယူမှုတွေကို ရုတ်သိမ်းဖို့ ဆွေးနွေးဆဲဖြစ်ကြောင်း သူ့နိုင်ငံရဲ့ နေတိုးအဖွဲ့မှာ အရေးပါတဲ့အခန်းကဏ္ဍကို ကိုးကားပြီးတော့ သမ္မတအာဒိုဂန်က အစ္စတန်ဘူလ်က ရေငုပ်သင်္ဘော ထုတ်လုပ်ရေး အခမ်းအနားမှာ ပြောကြားခဲ့တာပါ။  

ဆွီဒင်ဝန်ကြီးချုပ် မာဂလေနာအန်ဒါဆွန် ဆီကို စနေနေ့က ဖုန်းခေါ်ဆိုပြီး အာဒိုဂန်က ပြောကြားခဲ့ရာမှာ ၂၀၁၉ ခုနှစ်က ဆီးရီးယား ကျုးကျော်စစ်အပြီးမှာ တူရကီအပေါ် ချမှတ်ထားတဲ့ လက်နက်ပြည်ပတင်ပို့မှုအပေါ် ပိတ်ဆို့မှုကို  ရုတ်သိမ်းသင့်တယ်လို့ ပြောကြားခဲ့ပါတယ်။

လုံခြုံရေးဆိုင်ရာ သတိတရားတွေကို ထည့်မစဉ်းစားထားတဲ့ ချဲ့ထွင်ရေးမူဝါဒတွေဟာ တူရကီနဲ့ နေတိုးအတွက် မကောင်းကြောင်းလည်း  အာဒိုဂန်က ပြောကြားခဲ့ပါတယ်။ 

ဆွီဒင်နဲ့ ဖင်လန်တို့ရဲ့ ကမ်းခြေနေ ဒေသခံတွေဟာ ကာဒစ္စတန်အလုပ်သမားများပါတီ (PKK) အဖွဲ့နဲ့ ၂၀၁၆ ခုနှစ်က အာဏာသိမ်းဖို့ကြိုးပမ်းမှုကို ကြိုးကိုင်နေကြောင်း စွပ်စွဲထားတဲ့ ဖှက်သူလာ ဂူလန်ရဲ့နောက်လိုက်တွေနဲ့ အချိတ်အဆက်တွေ ရှိတယ်လို့လည်း တူရကီအစိုးရက ပြောပါတယ်။ 

ရုရှားဟာ ဖေဖော်ဝါရီ ၂၄ ရက်မှာ ယူကရိန်းကို ကျူးကျော်လာပြီးနောက် ဖင်လန်နဲ့ ဆွီဒင်တို့ဟာ နေတိုးအဖွဲ့ကို ဝင်ရောက်ဖို့ ပြီးခဲ့တဲ့ ဗုဒ္ဓဟူးနေ့က တရားဝင် လျှောက်ထားခဲ့ပါတယ်။ 

တူရကီက အဲဒီနှစ်နိုင်ငံ နေတိုးအဖွဲ့ဝင်ဖြစ်မှုကို ကန့်ကွက်လိုက်တာကြောင့် နေတိုးမဟာမိတ်နိုင်ငံ တွေ အံအားသင့်ခဲ့ရပါတယ်။

ဒါပေမဲ့ တူရကီရဲ့ ကန့်ကွက်မှုတွေဟာ  နေတိုးအဖွဲ့၀င် ဖွဲ့စည်းမှုလုပ်ငန်းစဉ်အတွက် လမ်းပိတ်သွားမှာ မဟုတ်ကြောင်း အနောက်နိုင်ငံခေါင်းဆောင်တွေက သူတို့ယုံကြည်မှုကို ထုတ်ဖော် ပြောခဲ့ပါတယ်။ 

12 hours Ago

ကမ္ဘာ့စီးပွားရေးဖိုရမ်တွင် ယူကရိန်းစစ်ပွဲအရေးကိစ္စ လွှမ်းမိုးနေ

ကမ္ဘာတဝန်း နိုင်ငံရေးနဲ့ စီးပွားရေး ခေါင်းဆောင်တွေ နှစ်စဉ်ကျင်းပမြဲဖြစ်တဲ့ ကမ္ဘာ့စီးပွားရေးဖိုရမ်(WEF)ကို ဆွစ်ဇာလန်နိုင်ငံ ဒါဗို့စ်မြို့ အပန်းဖြေစခန်းမှာ မေ ၂၃ ရက်က စတင်ခဲ့ပြီး ၄ ရက်ကြာ ကျင်းပမယ့် အစီအစဉ်ထဲမှာ ယူကရိန်းစစ်ပွဲကိစ္စကတော့ ထိပ်ဆုံးကနေ ပါဝင်ပါတယ်။

ယူကရိန်းအကျပ်အတည်းအပြင် ကပ်ရောဂါအပြီး ပြန်လည်ထူထောင်ရေး၊ ရာသီဥတုပြောင်းလဲ မှုကို ကိုင်တွယ်ဖြေရှင်းရေး၊ အလုပ်အကိုင်တွေရဲ့ ရှေ့အနာဂတ်၊ လူတွေနဲ့ ကမ္ဘာမြေကြီးရဲ့ ရေရှည်အကျိုးကို ထည့်စဉ်းစားထားတဲ့ စီးပွားရေးစနစ်ကို အရှိန်မြှင့်ရေးနဲ့ နည်းပညာအသစ်တွေကို အသုံးချရေးစတာကိစ္စတွေဟာ အစည်းအဝေးတွေမှာ ဆွေးနွေးဖို့ စီစဉ်ထားတဲ့ ခေါင်းစဉ်တွေထဲမှာ ပါဝင်ပါတယ်။ 

WEF အစည်းအဝေးဟာ ကိုရိုနာ ဗိုင်းရပ်စ်ကူးစက်မှုကြောင့် ၂ နှစ်ကျော်ကြာ ရပ်ဆိုင်းထားရာ ကနေ ပြန်ကျင်းပတာဖြစ်ပါတယ်။ 

WEF တည်ထောင်သူနဲ့ အမှုဆောင်ဥက္ကဋ္ဌ ကလပ်စ်ရှာဝက်ဘ်က အခမ်းအနားမှာ ယူကရိန်း ကိုယ်စားလှယ်တွေအတွက် နွေးထွေးတဲ့ လက်ခုပ်တီးအားပေးမှု တောင်းဆိုခဲ့ပြီးတော့ ဒီစစ်ပွဲဟာ လာမယ့်နှစ်တွေမှာ ကမ္ဘာ့နိုင်ငံရေးနဲ့စီးပွားရေးအခင်းအကျင်းကို ပြန်လည်ပုံဖော်မယ့် အာဏာနဲ့အတူ သမိုင်းရဲ့ အချိုးအကွေ့တစ်ခု ဖြစ်လာတော့မယ်လို့ ပြောကြားခဲ့ပါတယ်။

ဆွစ်ဇာလန်သမ္မတ အစ်ဂနာဇီရိုကတ်စ်ဆစ်က ပြောကြားခဲ့ရာမှာ- အစိုးရတွေနဲ့ တခြားအဖွဲ့အစည်း တွေဟာ အမျိုးသားရေးဝါဒ၊ အာဏာရှင်စနစ်နဲ့ ပြည်တွင်းစီးပွားရေးလုပ်ငန်းတွေအပေါ် အကာအကွယ်ပေးတဲ့ မူဝါဒတွေကနေ ကြီးထွားလာတဲ့ အန္တရာယ်တွေမှာ သူတို့ရဲ့ အားနည်းချက်ကို လျှော့တွက်ခဲ့ကြတာ ကြာလှပြီလို့ ပြောပါတယ်။ 

ရုရှားသမ္မတ ဗလာဒီမာပူတင်ကတော့ ယူကရိန်းကို ကျူးကျော်တိုက်ခိုက်တာဟာ နိုင်ငံကို လက်နက်ဖြုတ်သိမ်းဖို့နဲ့ အစွန်းရောက် ရုရှားဆန့်ကျင်ရေး အမျိုးသားရေးဝါဒီတွေကို ဖယ်ရှားဖို့ အထူးစစ်ဆင်ရေးတစ်ရပ်လို့ ခေါ်ဆိုပါတယ်။ 

ယူကရိန်းနဲ့ သူ့ရဲ့မဟာမိတ်တွေကတော့ ဒါဟာအခြေအမြစ်မရှိတဲ့ အကြောင်းပြချက်အဖြစ် ပယ်ချခဲ့ပြီး ဒီသုံးလကြာစစ်ပွဲမှာ လူပေါင်း ထောင်နဲ့ချီ သေဆုံးခဲ့ပြီး သန်းနဲ့ချီတဲ့လူတွေ အိုးမဲ့အိမ်မဲ့ ဖြစ်ခဲ့ရကာ မြို့ကြီးတွေ ပြိုပျက်ကြေမွခဲ့ရပါတယ်။ 

13 hours Ago

ယူကရိန်းဆိပ်ကမ်းပိတ်ထားမှု ကမ္ဘာ့စားနပ်ရိက္ခာလုံခြုံရေးကို စစ်ကြေညာခြင်းဖြစ်ဟု ကုလပြော

ယူကရိန်းဆိပ်ကမ်းတွေကို ရုရှားက မဖွင့်နိုင်တာဟာ ကမ္ဘာ့စားနပ်ရိက္ခာလုံခြုံရေးအပေါ် စစ်ကြေညာတာနဲ့ အတူတူပဲလို့  မေ ၂၃ ရက်က  ဆွစ်ဇာလန်နိုင်ငံ ဒါဗို့စ်မြို့မှာ ကျင်းပနေတဲ့ ကမ္ဘာ့စီးပွားရေး ဖိုရမ်မှာ  ကုလသမဂ္ဂက  ပြောလိုက်ပါတယ်။

ကုလသမဂ္ဂ စားနပ်ရိက္ခာအစီအစဉ် (WFP) ရဲ့ အကြီးအကဲက  “ဆိပ်ကမ်းတွေကို ပြန်ဖွင့်နိုင်မယ်ဆိုရင် ဒါဟာ ပြဿနာကို ဖြေရှင်းတာသာမက မတည်ငြိမ်တဲ့ စားနပ်ရိက္ခာ စျေးကွက် တည်ငြိမ်ရေးကိုပါ စတင်ဖန်တီးရာရောက်တယ်။ ကျနော်တို့ ရင်ဆိုင်နေရတဲ့ တခြား ကိစ္စရပ်တွေ အားလုံးကိုပါ ပူးပေါင်း ဖြေရှင်းရာ ရောက်တယ်”လို့ ပြောပါတယ်။

လွန်ခဲ့တဲ့ ၃ လက ရုရှားအစိုးရက စစ်တပ်တွေကို ယူကရိန်းနိုင်ငံဆီ လွှတ်လိုက်ကတည်းက ယူကရိန်းရဲ့ ပင်လယ်နက်နဲ့ အာဇော့ဗ်ပင်လယ်တို့က အဓိက ဆိပ်ကမ်းတွေသုံးလို့ မရဘဲ ဖြစ်ခဲ့တာကြောင့် အရင်နှစ်ကနဲ့ စာရင် ကောက်ပဲသီးနှံ တင်ပို့မှုဟာ ထက်ဝက်ကျော် ကျဆင်းခဲ့ပါတယ်။

WFP ဟာ ကမ္ဘာတဝန်း လူ ၁၂၅ သန်းကို ကျွေးမွေးနေရပြီး အဲဒီအတွက် လိုအပ်တဲ့ ကောက်ပဲသီးနှံ ၅၀ ရာခိုင်နှုန်းကို ယူကရိန်းနိုင်ငံဆီကနေ ဝယ်နေတာပါ။ 

ကမ္ဘာ့အဆင်းရဲဆုံးနဲ့ အထိခိုက် မခံနိုင်ဆုံး နိုင်ငံတချို့ အပါအဝင် နိုင်ငံပေါင်း ၃၆ နိုင်ငံဟာ သူတို့ရဲ့ ဂျုံတင်သွင်းမှု ၅၀ ရာခိုင်နှုန်းကျော်ကို ရုရှားနဲ့ ယူကရိန်းအပေါ် မှီခိုနေရတယ်လို့ ကုလသမဂ္ဂ က ပြောခဲ့ပြီးပါပြီ။ 

ရုရှားက ယူကရိန်းအပေါ် ကျူးကျော်စစ်ဟာ ကောက်ပဲသီးနှံ၊ ဟင်းချက်ဆီ၊ လောင်စာ၊ ဓာတ်မြေဩဇာ စျေးတွေကို ထိုးတက်စေခဲ့လို့ ဆင်းရဲတဲ့ နိုင်ငံတွေမှာ စားနပ်ရိက္ခာ၊ စွမ်းအင်နဲ့ စီးပွားရေး အကျပ်အတည်းတွေ ပိုဆိုးစေလိမ့်မယ်လို့ ကုလသမဂ္ဂက သတိပေးခဲ့ပါတယ်။

“လူဦးရေ သန်း ၄၀၀ကို ကျွေးဖို့ လုံလောက်တဲ့ စားနပ်ရိက္ခာတွေကို ထုတ်နေတဲ့ နိုင်ငံ တနိုင်ငံကို ယူလိုက်ရင် ဘာတွေ ဖြစ်သွားမယ်လို့ ခင်ဗျားထင်သလဲ။ လောင်စာစျေး၊ စားနပ်ရိက္ခာစျေး၊ ကုန်စည်သယ်ပို့ရေး စရိတ်တွေ ထပ်ပေါင်းထည့်လိုက်ပေါ့။ ဒါဟာ ကျနော်တို့ လုပ်ငန်းလည်ပတ်ဖို့သာမက ကမ္ဘာလုံး ဆိုင်ရာ စားနပ်ရိက္ခာ လုံခြုံရေးကိုပါ ပျက်စီးစေတယ်”လို့ (WFP) ရဲ့ အကြီးအကဲ ဒေးဗစ် ဘီစ်လေက ပြောပါတယ်။

ကမ္ဘာ့ ဆာလောင်မွတ်သိပ်မှုဘေးကို ရှောင်ဖို့နဲ့ ယူကရိန်းကို ကူညီဖို့ ဩဒက်ဆာ ဆိပ်ကမ်းမြို့ ကနေ ထွက်ဖို့ စင်္ကြံလမ်းကနေ တဆင့် စားနပ်ရိက္ခာ ပြည်ပ တင်ပို့တဲ့ သင်္ဘောတွေအတွက် ဘေးကင်းရေး လမ်းကြောင်းရဖို့ နိုင်ငံတကာ လူ့အဖွဲ့အစည်းက ကူညီသင့်တယ်လို့ ယူကရိန်း ဒုဝန်ကြီးချုပ် ယူလီယာဆွယ်ရဲဒန်ကိုက ကမ္ဘာ့စီးပွားရေး ဖိုရမ်မှာ ပြောပါတယ်။

13 hours Ago

အမေရိကန်၏ အင်ဒိုပစိဖိတ်ဗျူဟာ ကျဆုံးတော့မည်ဟု တရုတ်နိုင်ငံခြားရေးဝန်ကြီး ဝေဖန်

အမေရိကန်ရဲ့ အင်ဒိုပစိဖိတ်ဗျူဟာ ဟာ တကမ္ဘာလုံး စိုးရိမ်ပူပန်ပြီး သတိထားနေရတာနဲ့ တပြိုင်တည်းမှာ အမေရိကန်ရဲ့လှုံ့ဆော်မှုကြောင့် ကျဆုံးဖို့ အလားအလာ ရှိနေတယ်လို့ တရုတ် နိုင်ငံတော်ကောင်စီဝင်နဲ့ နိုင်ငံခြားရေး ဝန်ကြီး ဝမ်ရိက မေ ၂၂ရက်မှာ ပြောပါတယ်။

ပါကစ္စတန် နိုင်ငံခြားရေးဝန်ကြီး ဘီလာဝယ်ဘတ်တိုဇာဒါရီနဲ့ တရုတ်တောင်ပိုင်း ကွမ်တုံပြည်နယ် ကွမ်ကျိုးမြို့က သတင်းစာရှင်းလင်းပွဲမှာ ခုလို ပြောလိုက်တာပါ။

အမေရိကန်ရဲ့ အင်ဒိုပစိဖိတ်ဗျူဟာကြောင့် နိုင်ငံတကာ လူ့အဖွဲ့အစည်းထဲမှာ အထူးသဖြင့် အာရှ-ပစိဖိတ် ဒေသထဲမှာ ပိုပြီး သတိထား စိုးရိမ်လာနေရတယ်လို့လည်း ဝမ်က ပြောပါတယ်။

ဒါဟာ ပထဝီနိုင်ငံရေးအရ ထိပ်တိုက်တွေ့ဖို့နဲ့ ကြီးစိုးလွှမ်းမိုးမှုကို လှုံ့ဆော်ပေးတဲ့ မဟာဗျူဟာရဲ့ ရည်ရွယ်ချက်ကြောင့် ပေါ်ထွန်းလာတာလို့လည်း ဝမ်က ပြောပါတယ်။

အမေရိကန်ရဲ့ မူဝါဒဟာ အာရှပစိဖိတ်ဆိုတဲ့ ခေါင်းစဥ်ကို ဖျက်ဆီးဖို့ ကြိုးစားရုံသာမက ဆယ်စုနှစ်ချီအောင် ဒေသထဲက နိုင်ငံတွေရဲ့ အာရုံစိုက် အားထုတ်မှုတွေကနေ ဖန်တီးခဲ့တဲ့ ငြိမ်းချမ်းတဲ့ ဖွံ့ဖြိုးတိုးတက်ရေး အရှိန်အဟုန်နဲ့ စွမ်းဆောင်မှုတွေကိုပါ ချေဖျက်ဖို့ ကြိုးစားနေတာလို့ ဝမ်က ဆက်ပြောပါတယ်။

အာရှပစိဖိတ်ဒေသတွင်းက ပြည်သူတွေအနေနဲ့ ကြီးစိုးလွှမ်းမိုး ဗိုလ်ကျမှုကြောင့် ဖြစ်တဲ့ ပဋိပက္ခတွေနဲ့ ထိပ်တိုက်တွေ့မှု တွေကို မှတ်မိနေဆဲဖြစ်ပြီး ခုတော့ သူတို့ဟာ နိုင်ငံတော် တည်ငြိမ်ရေးနဲ့ ပျော်ရွှင်မှုကို ရအောင် အားထုတ်နေပြီလို့လည်း ဝမ်က ပြောခဲ့ပါတယ်။

13 hours Ago

ရာသီဥတုပြောင်းလဲမှုတိုက်ဖျက်ရေး ကွက်ဒ်အဖွဲ့ဝင် ၄ နိုင်ငံခေါင်းဆောင်များ သဘောတူ

အင်ဒိုပစိဖိတ် ဒေသတွင်းလေးနိုင်ငံအဖွဲ့ (ကွက်ဒ်) ရဲ့ ခေါင်းဆောင်တွေက ရာသီဥတု ပြောင်းလဲမှုတိုက်ဖျက်ရေး လုပ်ဆောင်ကြဖို့အပါအဝင် လွတ်လပ်ပွင့်လင်းတဲ့ ဒေသအတွက် အတူရပ်တည်ရေး မေလ ၂၄ ရက်မှာ ဂျပန်နိုင်ငံမှာ ကျင်းပတဲ့ ထိပ်သီးဆွေးနွေးပွဲမှာ ကတိပြုလိုက်ကြပါတယ်။

အမေရိကန်၊ ဩစတြေးလျ၊ အိန္ဒိယနဲ့ ဂျပန်  လေးနိုင်ငံရဲ့ ခေါင်းဆောင်တွေဟာ   ရုရှားအရေး အပါအဝင် ကိစ္စရပ်တွေအပေါ် ကွဲပြားနားတဲ့အမြင်တွေကို ဆွေးနွေးခဲ့ကြပြီး  တရုတ်ရဲ့ သူ့ကိုယ်သူ ယုံကြည်မှု ပိုတိုးလာတာကို တုံ့ပြန်ဖို့အတွက်လည်း ရည်ရွယ်ပြီး  ဆွေးနွေး နေတာပါ။

ဒါ့အပြင် ထိုင်ဝမ်အရေးဟာ ကွက်ဒ် အစည်းအဝေးအတွင်း ဆွေးနွေးဖို့ တရားဝင် ကိစ္စရပ် မဟုတ်ပေမဲ့ ခေါင်းဆောင် လေးယောက် တွေ့ဆုံချိန်မှာ အဓိက ဆွေးနွေးစရာ ခေါင်းစဉ် ဖြစ်လာပါတယ်။

အမေရိကန်သမ္မတ ဂျိုးဘိုင်ဒန်၊ အိန္ဒိယ ဝန်ကြီးချုပ် နရင်ဒြာမိုဒီ၊ ဂျပန်ဝန်ကြီးချုပ် ဖူမိအိုခိရှိဒနဲ့ ဩစတြေးလျဝန်ကြီးချုပ် အသစ် အန်ထော်နီအယ်လ်ဘာနီတို့ဟာ ၄ နိုင်ငံဆွေးနွေးပွဲသာမက နှစ်နိုင်ငံချင်း အပြန်အလှန် အစည်းအဝေးတွေလည်း ကျင်းပကြဦးမှာပါ။

ဒီဆွေးနွေးပွဲ ပြီးတဲ့အခါမှာ  အိန္ဒိယနဲ့ ဂျပန် နှစ်နိုင်ငံခေါင်းဆောင်တွေ  အလုပ်သဘော ညစာစားဖို့ စီစဉ် ထားပါတယ်။

13 hours Ago

ကမ္ဘာတဝန်းတွင် အိုးအိမ်စွန့်ခွာ ထွက်ပြေးရသည့် ဒုက္ခသည်ဦးရေ သန်း ၁ဝဝ ကျော်ရှိလာ

ကမ္ဘာတဝန်းမှာ အိုးအိမ်စွန့်ခွာ ထွက်ပြေးရတဲ့ ဒုက္ခသည်ဦးရေ သန်း ၁ဝဝ ကျော်ရှိလာတဲ့ထဲက မြန်မာ၊ အာဖဂန်နစ္စတန်၊ ဘာကီနာဖာဆို၊ ကွန်ဂို၊ အီသီယိုးပီးယားနဲ့ နိုင်ဂျီးရီးယား နိုင်ငံတွေမှာ နေရပ်စွန့်ခွာထွက်ပြေးရသူဟာ ၂ဝ၂၁ နှစ်ကုန်ပိုင်းအထိ သန်း ၉ဝ အထိရှိခဲ့ကြောင်း ကုလသမဂ္ဂ ဒုက္ခသည်များဆိုင်ရာမဟာမင်းကြီးရုံး  (UNHCR) က မေ ၂၃ ရက်မှာ ထုတ်ပြန်ပါတယ်။   

ပဋိပက္ခတွေ၊ အကြမ်းဖက်ခံရမှုတွေ၊ လူ့အခွင့်အရေးချိုးဖောက်မှုတွေနဲ့ နှိပ်စက်ညှဉ်းပန်းမှုတွေ အောက်ကနေ ထွက်ပြေးတိမ်းရှောင်လာရတဲ့သူ အရေအတွက်ဟာ ပထမဆုံးအကြိမ် စံချိန်တင် သန်း ၁ဝဝ ကျော်သွားတယ်လို့ UNHCR ရဲ့ ထုတ်ပြန်ချက်မှာ ဖော်ပြပါတယ်။   

ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ၂ဝ၂၂ ခုနှစ် မေလဆန်းပိုင်းက ထုတ်ပြန်တဲ့ အစီရင်ခံစာအရ မြန်မာနိုင်ငံမှာတော့ စစ်တပ်က အာဏာသိမ်းထားတဲ့ တနှစ်ကျော်ကာလအတွင်းမှာ ဒုက္ခသည်အသစ် ၅၉၀,၁၀၀ အထိ တိုးလာပြီး အရင်ကတည်းကရှိနေတဲ့ ဒုက္ခသည် ၃၄၆,၆၀၀ နဲ့ပေါင်းရင် လက်ရှိ မြန်မာနိုင်ငံမှာရှိတဲ့ စစ်ဘေးဒုက္ခသည် စုစုပေါင်းဟာ ၉၃၆,၇၀၀ ကျော်ရှိနေပါတယ်။  

သန်း ၁ဝဝ ကျော်လာတဲ့ ကမ္ဘာတဝန်း ဒုက္ခသည်အရေအတွက်ကိုကြည့်ရင် ထိတ်လန့်စရာကောင်းပြီး၊ ပဋိပက္ခတွေအဆုံးသတ်ဖို့ လိုနေပြီလို့ ကုလသမဂ္ဂကက ဆိုထားပါတယ်။  

ကမ္ဘာတဝန်းမှာ အိုးအိမ်စွန့်ခွာ ထွက်ပြေးရတဲ့ ဒုက္ခသည်ဦးရေ သန်း ၁ဝဝ ကျော်ထဲက  ၂ဝ၂၂ ခုနှစ်ဆန်းပိုင်းက စခဲ့တဲ့ ယူကရိန်း-ရုရှားစစ်ပွဲကြောင့် နေရပ်စွန့်ခွာထွက်ပြေးခဲ့ရတဲ့သူက ၁၄ သန်း ရှိပါတယ်။

18 hours Ago

အီရန်တော်လှန်ရေးအစောင့်တပ်အရာရှိ လုပ်ကြံခံရမှု လက်စားချေမည်ဟု သမ္မတ ကတိပြု

အီရန်တော်လှန်ရေး အစောင့်တပ်အရာရှိ ဗိုလ်မှူးကြီး ဆာယဒ် ခိုဒိုင် တီရန်မြို့တော်မှာ လုပ်ကြံသတ်ဖြတ်ခံရတဲ့အတွက် လက်စားချေမယ်လို့ အီရန်သမ္မတ အီဘရာဟင်မ် ရိုင်စီက မေ ၂၃ရက်မှာ ကတိပြုလိုက်ပါတယ်။

ကြီးမြတ်တဲ့ အာဇာနည်အပေါ် ရာဇဝတ်သားတွေက ပြုခဲ့တဲ့ သွေးကြွေးအတွက် သေချာပေါက် လက်စားချေမယ်ဆိုတာ  သံသယမရှိဘူးလို့ ရိုင်စီက ပြောပါတယ်။

မော်တော်ဆိုင်ကယ် စီးလာတဲ့ လူ ၂ ယောက်က ခိုဒိုင်ကို သေနတ်နဲ့ ပစ်ခတ်ခဲ့တာလို့ အီရန်အစိုးရ မီဒီယာတပိုင်းဖြစ်တဲ့ တက်စ်နင်မ်က မေ ၂၂ ရက်မှာ ဖော်ပြပါတယ်။

အစ္စရေးထောက်လှမ်းရေးကွန်ရက်က အဖွဲ့ဝင်တွေကို အီရန်အစောင့်တပ်က တွေ့ရှိ ဖမ်းဆီး ထားတယ်လို့ အီရန်အစိုးရမီဒီယာ တပိုင်းဖြစ်တဲ့ ISNA သတင်းဌာနက ဖော်ပြပါတယ်။

အစ္စရေးထောက်လှမ်းရေးအဖွဲ့ မော့ဆက်ကို ကြီးကြပ်တဲ့ အစ္စရေးဝန်ကြီးချုပ်ရုံးကတော့ မှတ်ချက်ပေးဖို့ ငြင်းပါတယ်။

ခိုဒိုင်းဟာ ကာကွယ်စောင့်ရှောက်သူတွေထဲက တဦးလို့ တက်စ်နင်မ်သတင်းဌာနက ဖော်ပြ ပါတယ်။ ကာကွယ်စောင့်ရှောက်သူဆိုတဲ့ အသုံးအနှုန်းဟာ အီရတ် ဒါမှမဟုတ် ဆီးရီးယားနိုင်ငံမှာ ရှိတဲ့ ရှီးယိုက်မွတ်စလင်ဆိုင်ရာ နေရာတွေကို ကာကွယ်ဖို့ အီရန်ကိုယ်စား တိုက်ခိုက်ရေး ပြောဆိုပေးတဲ့ စစ်ဘက်ဆိုင်ရာ ပုဂ္ဂိုလ်တွေ ဒါမှမဟုတ် အကြံပေးပုဂ္ဂိုလ်တွေကို ရည်ညွန်းတယ်လို့ ရိုက်တာသတင်းမှာ ဖော်ပြပါတယ်။

19 hours Ago

ထိုင်ဝမ်ကျွန်းကို ကာကွယ်ရန် အင်အားသုံးမည်ဟု အမေရိကန်သမ္မတပြော

အမေရိကန်သမ္မတ ဂျိုးဘိုင်ဒန်က ထိုင်ဝမ်ကျွန်းကို ကာကွယ်ရာမှာ အင်အားသုံးဖို့ ဆန္ဒရှိတယ်လို့ မေ ၂၃ ရက်မှာ ပြောလိုက်ပါတယ်။

ဘိုင်ဒန်ဟာ ဂျပန်မြို့တော် တိုကျိုကို အလည်အပတ် ခရီးအတွင်း တရုတ်ကို ဆက်တိုက် ဝေဖန် ပြောဆိုခဲ့တာပါ။

ဘိုင်ဒန်ရဲ့ လက်ထောက် တယောက်ကတော့ တကိုယ်တော် အုပ်ချုပ်နေတဲ့ ထိုင်ဝမ်အပေါ် အမေရိကန်ရဲ့ မူဝါဒ အပြောင်းအလဲ မရှိဘူးလို့ ပြောပါတယ်။

ထိုင်ဝမ်သာ တကယ်လို့ တိုက်ခိုက်ခံရရင် အမေရိကန်က ထိုင်ဝမ်ကို ကာကွယ်ပေးမှာလားလို့ ဂျပန် ဝန်ကြီးချုပ် ခီရှီဒါနဲ့ ပူးတွဲ သတင်းစာရှင်းလင်းပွဲမှာ သတင်းထောက်တယောက်က ဘိုင်ဒန်ကို မေးခဲ့တာပါ။

“ဟုတ်ကဲ့၊ ဒါဟာ ကျနော်တို့ ပေးထားတဲ့ ကတိပဲ။ အဲဒီလို ဖြစ်ရပ်မျိုး ဖြစ်မလာဖို့ ဒါမှမဟုတ် မကြိုးစားရဖို့ မျှော်လင့်တယ်” လို့ ဘိုင်ဒန်က ပြောပါတယ်။ 

တရုတ်နိုင်ငံခြားရေးဝန်ကြီးဌာနကတော့ အမေရိကန်ဟာ ထိုင်ဝမ် လွတ်လပ်ရေးအတွက် ကာကွယ်မပေးသင့်ဘူးလို့ တုံ့ပြန်ပြောဆိုခဲ့ပါတယ်။

တရုတ်နိုင်ငံဟာ သူ့ရဲ့ အချုပ်အခြာအာဏာနဲ့ နယ်မြေစိုးမိုးရေးဆိုင်ရာ ကိစ္စရပ်တွေအတွက် အပေးအယူ ဒါမှမဟုတ် လိုက်လျောဖို့ နေရာမရှိဘူးလို့ တရုတ်နိုင်ငံခြားရေးဝန်ကြီးဌာန ပြောခွင့်ရ ဝမ်ဝင်ဘင်က ဘေဂျင်းမြို့တော် ပုံမှန်သတင်းစာ ရှင်းလင်းပွဲမှာ ပြောလိုက်တာပါ။

တရုတ်ပြည်သူတွေရဲ့ ခိုင်မာတဲ့ ဆုံးဖြတ်ချက်၊ သူ့ရဲ့ အမျိုးသား အချုပ်အခြာအာဏာနဲ့ နယ်မြေ ဂုဏ်သိက္ခာကို ကာကွယ်ဖို့ စွမ်းဆောင်နိုင်မှုကို ဘယ်သူကမှ လျှော့မတွက်သင့်သလို တရုတ်လူမျိုး ၁ ဒသမ ၄ ဘီလီယံကို ဆန့်ကျင်ဖို့ မသင့်တော်ဘူးလို့လည်း ဝမ်က ပြောခဲ့ပါတယ်။ 

19 hours Ago

မျောက်ကျောက်ရောဂါအတည်ပြုလူနာ ၉၂ ဦးထိရှိလာဟု WHO ထုတ်ပြန်

မျောက်ကျောက်ရောဂါနဲ့ ပတ်သက်လို့ ကပ်ဘေးမသင့်သေးတဲ့ နိုင်ငံတွေမှာ ပိုပြီး စောင့်ကြည့်စစ်ဆေးခဲ့ရာမှာ ကူးစက်ခံဦးရေ ပိုများလာတာကို ဖော်ထုတ်နိုင်လိမ့်မယ်လို့ ကမ္ဘာ့ကျန်းမာရေးအဖွဲ့ (WHO) က မေ ၂၁ ရက်မှာ ပြောပါတယ်။

WHO ရဲ့ အချက်အလက်တွေအရ မေ ၂၁ ရက်အထိ အတည်ပြုလူနာ ၉၂ ဦးနဲ့ မျောက် ကျောက်ရောဂါ သံသယရှိသူ ၂၈ ဦးကို အဖွဲ့ဝင်နိုင်ငံ ၁၂ နိုင်ငံမှာ တွေ့ခဲ့ပြီး ဒီနေ့အထိ မျောက်ကျောက် ဗိုင်းရပ်စ်ကြောင့် သေဆုံးမှုမရှိသေးပါဘူး။

အတည်ပြုလူနာနဲ့ သံသယလူနာ အများစုဟာ ဗြိတိန်၊ စပိန်၊ ပေါ်တူဂီ နိုင်ငံတွေက ဖြစ်ပြီး ဩစတြေးလျ၊ ဘယ်လ်ဂျီယံ၊ ကနေဒါ၊ ပြင်သစ်၊ ဂျာမနီ၊ အီတလီ၊ နယ်သာလန်၊ ဆွီဒင်နဲ့ အမေရိကန်နိုင်ငံတွေမှာလည်း တွေ့ရှိခဲ့ပါတယ်။

မေ ၂၂ ရက်က ဩစတြီးယားနိုင်ငံ မြို့တော် ဗီယန်နာမှာ မျောက်ကျောက် ဗိုင်းရပ်စ် ကူးစက်ခံ အတည်ပြု လူနာတယောက်ကို ဒီနှစ်အတွင်း ပထမဆုံးအနေနဲ့ တွေ့ခဲ့ပါတယ်။

ရထားတဲ့ အချက်အလက်တွေအရ လူမှလူ ကူးစက်ခြင်းဟာ ရောဂါလက္ခဏာပြတဲ့ လူတွေနဲ့ အတူ အနီးကပ် လူချင်းထိတွေ့နေသူတွေကြားမှာ ဖြစ်ပွားနေတယ်လို့ အကြံပြုထားပါတယ်။

မျောက်ကျောက် ဗိုင်းရပ်စ်ဟာ ရေကျောက် ဗိုင်းရပ်စ် မိသားစုဝင်ဖြစ်ပြီး ပြင်းထန်မှု အားနည်းပုံပေါ်တယ်လို့ ကနဦး သိရှိထားပါတယ်။

မျောက်ကျောက်ရောဂါ လက္ခဏာတွေထဲမှာ အဖျား၊ ခေါင်းကိုက်၊ ယောင်ယမ်း၊ နောက်ကျော နာကျင်တာ၊ ကြွက်သား နာကျင် ကိုက်ခဲတာနဲ့ မျက်နှာ လက်နဲ့ ခြေတွေမှာ အင်ပြင်တွေ တဖြည်းဖြည်း ပေါ်လာတာတွေ ဖြစ်လေ့ ရှိပါတယ်။

ဗိုင်းရပ်စ်ဟာ ပွန်းပဲ့နေတဲ့ အရေပြား၊ အသက်ရှူလမ်းကြောင်း ဒါမှမဟုတ် မျက်စိ နှာခေါင်း ပါးစပ်တွေကနေ ကိုယ်တွင်း ဝင်နိုင်ပါတယ်။ မိခင်ကနေ ကလေးကို ကူးစက်နိုင်သလို လိင်ဆက်ဆံခြင်းအားဖြင့်လည်း ကူးစက်နိုင်ပါတယ်။

ရောဂါပေါက်ပွားကာလ ၆ ရက်ကနေ ၁၃ ရက်ထိ ကြာနိုင်ပြီး တချို့တွေမှာ ၂၁ ရက်ထိ ကြာနိုင်ပါတယ်။ လူနာ အများစုကတော့ သီတင်းပတ်တွေအတွင်း ပြန် နာလန်ထူလေ့ ရှိပါတယ်။

လောလောဆယ် ရောဂါအတွက် သီးခြား ကုသနည်းမရှိဘဲ ကာကွယ်ခြင်းအားဖြင့် ထိန်းချုပ် နိုင်ပါတယ်။

ရေကျောက် ကာကွယ်ဆေးဟာ မျောက်ကျောက် ရောဂါကို ဟန့်တားရာမှာ ၈၅ ရာခိုင်နှုန်း ထိရောက်မှု ရှိတယ်လို့ သုတေသီတွေက ပြောပါတယ်။

20 hours Ago
More News
Up