China Focus

December 1, 2022

ကျန်ဇီမင်းနဲ့ တရုတ်ပြည်က သတင်းနှစ်ပုဒ်

ဒီရက်ထဲ တရုတ်ပြည်က သတင်းထူး နှစ်ခုကြားရတယ်။ တစ်ခုက တရုတ်ပြည်အနှံ့ မြို့ကြီးတချို့မှာ ဆန္ဒပြပွဲတွေ ဖြစ်ပေါ်နေပြီး တရုတ်ရဲတွေနဲ့ ဆန္ဒပြသူတွေ ထိပ်တိုက်တွေ့နေကြတာဖြစ်ပြီး တစ်ခုက တရုတ်သမ္မတဟောင်း ကျန်ဇီမင်း၊ (အသက် ၉၆နှစ်) ကွယ်လွန်သွားပြီ ဆိုတဲ့သတင်းပါ။ 

တရုတ်ပြည်မှာ ဆန္ဒပြပွဲ အငယ်စားလေးတွေ ဖြစ်နေတာတော့ကြာပြီ။ ဒီရက်ထဲ ပိုစိပ်လာပြီး တက္ကသိုလ်ကျောင်းဝင်းတွေအထိ ပျံ့နှံ့လာတာ တွေ့ရတယ်။ အဓိက ကတော့ ရှီကျင့်ပင်ရဲ့ ဇီးရိုးကိုဗစ် မူဝါဒအရ ကိုဗစ်ကူးစက်မှုကို ပြင်းပြင်းထန်ထန် ထိန်းချုပ်မှုကြောင့်ပါ။ ကိုဗစ်ကူးစက်မှု တခု တွေ့လိုက်တာနဲ့ အဲဒီပတ်ဝန်းကျင်တခုလုံး အသွားအလာ ကန့်သတ်တာ၊ ဈေးပိတ်၊ ဆိုင်ပိတ်၊ စက်ရုံပိတ် လုပ်လိုက်တော့ ဒီလို ထိန်းချုပ်မှုအောက် ရောက်နေတဲ့ ပြည်သူတချို့ မကျေမနပ်ဖြစ်ရာက အစိုးရဆန့်ကျင်ရေးဆန္ဒပြပွဲတွေအထိ ဖြစ်လာခဲ့တယ်။ အထူးသဖြင့် လူနေထူထပ်တဲ့ ရှန်ဟိုင်းလို၊ ဘေဂျင်းလို မြို့ကြီးတွေမှာ တင်းကျပ်တဲ့ lock down လုပ်တာတွေရှိလာတော့ လူတချို့ လမ်းပေါ်ထွက် ဆန္ဒထုတ်ဖော်တဲ့အထိ ဖြစ်လာတာပဲ။ 

တရုတ်အစိုးရရဲ့ မူဝါဒကတော့ ဇီးရိုး ကိုဗစ် ဆိုတဲ့အတိုင်း ကူးစက်မှုကို အလျင်အမြန် ထိန်းချုပ်စေတဲ့နည်းနဲ့ တားဆီးဖို့ပါ။ ဒါပေမဲ့လည်း ဒါဟာ ပေးဆပ်ရမှု အတော်ကြီးပါတယ်။ စက်ရုံ၊ အလုပ်ရုံတွေ စားသောက်ဆိုင်တွေ ရက်အတန်ကြာ ပိတ်ထားရတော့ ဆုံးရှုံးနစ်နာမှု အတော်ကြီးပါတယ်။ 

မကြာသေးခင်ကပဲ တရုတ်နိုင်ငံရဲ့ အကြီးဆုံး အိုင်ဖုန်းစက်ရုံမှာ အလုပ်သမားတွေနဲ့ လုံခြုံရေးတွေ ရုန်းရင်းဆန်ခတ် ဖြစ်ကြတယ်။ ကိုဗစ်လော့ခ်ဒေါင်းကြောင့် အလုပ်သမားတွေကို ပေးရမယ့် နစ်နာကြေးမပေးနိုင်ရာက ဖြစ်ခဲ့သလို အလုပ်သမားတွေ ထွက်ပြေးကြတယ် ဆိုတာလည်း ကြားရတယ်။ အမေရိကန် Foxconn နည်းပညာအုပ်စုရဲ့ အိုင်ဖုန်းထုတ်လုပ်ရေးစက်ရုံဟာ ဟေနန်ပြည်နယ် ကျန်ကျို့မှာ ရှိပြီး အလုပ်သမား ၃၀၀၀၀၀ လောက် နေထိုင်လို့ “အိုင်ဖုန်းစီးတီး” လို့ ခေါ်တွင်တယ်။

တရုတ်ရဲ့ ဇီးရိုးကိုဗစ် ပေါ်လစီဟာ တရုတ်နိုင်ငံရဲ့ စီးပွားရေးကို သိသိသာသာ ထိခိုက်နေတယ်။ ကမ္ဘာ့ဘဏ်ရဲ့ အစီရင်ခံစာအရ ၂၀၁၃ ကနေ ၂၀၁၈ အထိ တရုတ်ဟာ တကမ္ဘာလုံးကုန်ထုတ်လုပ်မှု GDP ရဲ့  ၂၈ ရာခိုင်နှုန်းရှိခဲ့ပေမယ့် ကိုဗစ် ကာလနောက်ပိုင်း ၃ ဒသမ ၁ ရာခိုင်နှုန်းပဲ ရှိတော့တယ်လို့ ဆိုတယ်။ လူတွေက အစိုးရရဲ့ တင်းကျပ်တဲ့ လော့ခ်ဒေါင်းတွေကို ကြောက်နေကြပြီ။ အထူးသဖြင့် လူငယ်တွေ။ အခု တကမ္ဘာလုံးနီးပါး ကိုဗစ်ကို pandemic လို့ မသတ်မှတ်တော့ဘဲ endemic အဖြစ် ဖြေလျှော့ပေးနေချိန်၊ ကမ္ဘာတခြမ်းမှာ လူတွေအားလုံး ကမ္ဘာ့ဖလားပွဲကို ပျော်ပျော်ပါးပါး ကြည့်နေကြချိန်မှာ တင်းကျပ်တဲ့ စည်းမျဉ်းတွေကြောင့် လွတ်လပ်မှုပျောက်ဆုံးလာတဲ့ လူငယ်တွေ လမ်းပေါ်ထွက်လာခဲ့ကြတာ ဖြစ်တယ်။ 

နောက်ဆုံးသတင်းအရတော့ ဒီရက်ထဲ ဟောင်ကောင်အနီးက ကွမ်ကျို့နဲ့ ချုံကင်းမြို့တွေမှာ အစိုးရက ကိုဗစ်ကန့်သတ်ချက်တွေ ပြန်ရုပ်သိမ်းလိုက်ပြီလို့ သိရတယ်။ 

ဒီလို အခြေအနေမျိုးမှာပဲ တရုတ်သမ္မတဟောင်း ကျန်ဇီမင်း ကွယ်လွန်သွားပြီဆိုတဲ့ သတင်း ထွက်ပေါ်လာခဲ့တာပဲ။ ကျန်ဇီမင်း (အသက်-၉၆နှစ်) ဟာ နိုဝင်ဘာလ ၃၀ ရက်၊ နေ့လယ်ပိုင်းက ရှန်ဟိုင်းမြို့မှာ ကွယ်လွန်သွားတယ်လို့ ဆင်ဟွာသတင်းဌာနက ကြေညာတယ်။ ကျန်ဇီမင်းဟာ တရုတ်နိုင်ငံကို ခေတ်မီဖွံ့ဖြိုးတိုးတက်ရေး လမ်းကြောင်းမှန်ပေါ်ရောက်အောင် ဦးဆောင်ခဲ့သူအဖြစ် ထင်ရှားတယ်။ တိန်အင်မင် အရေးအခင်းနောက်ပိုင်း ၁၉၈၉ ကနေ ၂၀၀၂ အထိ တရုတ်ကွန်မြူနစ်ပါတီ အထွေထွေအတွင်းရေးမှူး တာဝန်ထမ်းဆောင်ခဲ့ပြီး ၁၉၉၃ ကနေ ၂၀၀၃ အထိ တရုတ်သမ္မတအဖြစ် သက်တမ်း နှစ်ဆက် တာဝန်ယူခဲ့တယ်။ 

ကျန်ဇီမင်းလက်ထက်မှာ အဆင်မပြေဖြစ်နေတဲ့ အမေရိကန်နဲ့ ဆက်ဆံရေး ပြေလည်အောင် ဆောင်ရွက်နိုင်ခဲ့ပြီး တရုတ်ပြည် စီးပွားရေးတိုးတက်အောင်မြင်အောင် လုပ်ဆောင်နိုင်ခဲ့တယ်။ အာရှစီးပွားရေးအကျပ်အတည်းကာလ (၁၉၉၇-၉၈) ကို တောင့်ခံနိုင်ခဲ့ပြီး ၂၀၀၁ မှာ ကမ္ဘာ့ကုန်သွယ်ရေးအဖွဲ့ (WTO) ကို ဝင်ရောက်နိုင်ခဲ့သလို သူ့လက်ထက်မှာပဲ ၂၀၀၈ ဘေဂျင်းအိုလံပစ်ကို အောင်အောင်မြင်မြင် ကျင်းပနိုင်ခဲ့တယ်။ ကျန်ဇီမင်း လက်ထက် ၁၉၉၇ မှာ နှစ်ပေါင်း ၁၅၀ ကျော် ဗြိတိသျှလက်အောက်ရောက်နေတဲ့ ဟောင်ကောင်ကို တရုတ်နိုင်ငံလက်အောက် ပြန်ရောက်အောင် လုပ်ဆောင်ခဲ့တယ်။ ဒီလို ပြန်လည်ရရှိအောင် ၁၉၈၄ မှာ တိန်ရှောက်ဖိန်က ကနဦးကြိုးပမ်းပေးခဲ့တာဖြစ်ပြီး ကျန်ဇီမင်းလက်ထက်မှာ အကောင်အထည်ပေါ်လာတာ ဖြစ်တယ်။ 

ကျန်ဇီမင်းဟာ ၁၉၉၇ မှာ ပထမဦးဆုံး တရုတ်ခေါင်းဆောင်အဖြစ်နဲ့ အမေရိကန်ကို သွားရောက်ခဲ့ပြီး ဆက်ဆံရေးတိုးတက်ကောင်းမွန်အောင် လုပ်ဆောင်ခဲ့တယ်။ အမေရိကန် သမ္မတ ဘီလ်ကလင်တန်နဲ့ တွေဆုံစဉ်မှာ နှစ်နိုင်ငံကြား အပြုသဘောဆောင် မဟာဗျူဟာဆက်ဆံရေးနဲ့ အချိန်ကာလရဲ့ ရေစီးနဲ့အတူ အတူတကွရှေ့ဆက်ကြဖို့ ပြောဆိုခဲ့တယ်။ ကျန်ဇီမင်းလက်ထက်မှာပဲ ၁၉၉၉ ဘဲလ်ဂရိတ် တရုတ်သံရုံးကို နေတိုးတပ်ဖွဲ့က ဗုံးကြဲမှု ပေါ်ပေါက်ခဲ့ပြီး တရုတ်တိုက်လေယာဉ်နဲ့ အမေရိကန်ထောက်လှမ်းရေးလေယာဉ် တရုတ်လေပိုင်နက်ထဲ တိုးတိုက်မှုဖြစ်ပေါ်ခဲ့လို့ နှစ်နိုင်ငံကြား ဆက်ဆံရေးဟာ ၁၉၇၁ နောက်ပိုင်း အဆိုးရွားဆုံးအခြေအနေ ရောက်သွားပေမယ့် ဒီအကျပ်အတည်းကို ကျန်ဇီမင်း ကိုင်တွယ်ဖြေရှင်းနိုင်ခဲ့တယ်။ ကျန်ဇီမင်းဟာ ၂၀၀၂ မှာ အမေရိကန် သမ္မတ ဂျော့ဒဗလျူဘုရှ်နဲ့ တက္ကဆက်မှာ တွေ့ဆုံခဲ့တဲ့ ကမ္ဘာ့ခေါင်းဆောင်အနည်းငယ်ထဲက တစ်ဦးဖြစ်တယ်။

သူ့လက်ထက်မှာ တရုတ်စီးပွားရေး တစ်နှစ်ပြီး တစ်နှစ် တိုးတက်ခဲ့သလို ဆင်းရဲ ချမ်းသာ ကွာဟာမှု၊ လာဘ်ပေးလာဘ်ယူကိစ္စတွေ ကြီးထွားခဲ့တယ်။ ဘယ်လိုပဲဖြစ်ဖြစ်  လျှပ်စစ်အင်ဂျင်နီယာတစ်ဦး ဖြစ်ပြီး ကဗျာရေး၊ သီချင်းဆိုတတ်သလို ပွင့်ပွင့်လင်းလင်း နေတတ်တဲ့ ကျန်ဇီမင်းဟာ သူ့ရဲ့ Three represents မူဝါဒနဲ့ တရုတ်ဆိုရှယ်လစ်ဗိမာန်ကို အလှဆင်ခဲ့သူဖြစ်တယ်လို့ ဆိုတယ်။  သူ့ရဲ့ မူဝါဒက တရုတ်ကွန်မြူနစ်ပါတီမှာ လူတန်းစားပေါင်းစုံ ပါဝင်လာရေးဖြစ်တယ်။ 

၂၀၀၂ ခုနှစ်မှာ ဟူကျင်တောင်းက တရုတ်ကွန်မြူနစ်ပါတီ အထွေထွေအတွင်းရေးမှူးဖြစ်လာပြီး ကျန်ဇီမင်းက တရုတ်ကွန်မြူနစ်ပါတီ ဗဟိုစစ်ကော်မရှင် ဥက္ကဋ္ဌအဖြစ် ၂၀၀၅ ခုနှစ်အထိ တာဝန်ထမ်းဆောင်ပြီးနောက်မှာ ရာထူးက လုံးဝအနားယူသွားခဲ့တယ်။ 

မကွယ်လွန်မီ ကျန်ဇီမင်းကို နောက်ဆုံးမြင်တွေ့လိုက်ကြရတာက ၂၀၁၉ ခုနှစ်၊ တရုတ်ပြည်သူ့သမ္မတနိုင်ငံ ထူထောင်တဲ့ နှစ် (၇၀) ပြည့်အခမ်းအနားမှာဖြစ်ပြီး တခြားသော တရုတ်ခေါင်းဆောင်ကြီးများနဲ့အတူ စစ်ရေးပြအခမ်းအနားကို ကြည့်ရှုခဲ့တာပဲ ဖြစ်တယ်။ 

CWM

 Ref: China's Jiang Zemin confounded doubters, mended US ties. Photo: CNA 

2 months Ago

July 8, 2022

အိမ်နီးနားချင်းဆိုးများ ဝန်းရံနေတဲ့ မြန်မာပြည်

လူဘဝမှာ အရပ်ထဲ ရွာထဲ‌ နေထိုင်ကြတော့ မိတ်ဆွေကောင်းပီသပြီး ရိုင်းပင်းကူညီတတ်တဲ့ အိမ်နီးနားခြင်းကောင်း ရတတ်သလို မကောင်းဆိုးဝါးစိတ်ဓာတ်နဲ့ ရန်သူသဖွယ် မိမိအကျိုး မလိုလားတတ်တဲ့ အိမ်နီးချင်းဆိုးတွေနဲ့လည်း ကြုံရတတ်ပါတယ်။

မြန်မာနိုင်ငံနဲ့ ပြည်သူလူထုအတွက်တော့ ကံဆိုးမသွားရာ မိုးလိုက်လို့ရွာတယ် ဆိုရမလား မိမိအိမ်သားထဲမှာ လူစိတ်မရှိတဲ့ တိရစ္ဆာန်အရိုင်းအစိုင်းလို စိတ်ဓာတ်နဲ့ လူယုတ်မာ စစ်အခွင့်ထူးခံတွေ နှိပ်စက်တဲ့ဒဏ်ကို ကျောကော့နေအောင် ခံရရုံသာမက မိတ်ဆွေမပီသဘဲ အမြတ်ထုတ်ချင်ကြတဲ့ အိမ်နီးချင်းဆိုးတွေပေးတဲ့ ဒုက္ခမျိုးစုံကိုလည်း ခါးစည်းခံခဲ့ကြရပါတယ်။

မြန်မာနိုင်ငံအပေါ် စိတ်ရင်းစေတနာမရှိ၊ မိတ်ဆွေကောင်း မပီသတဲ့အထဲမှာ ကွန်မြူနစ် အာဏာရှင်စနစ် ခြယ်လှယ်‌နေတဲ့ တရုတ်နိုင်ငံရဲ့ တပါတီအာဏာရှင်အစိုးရက ထိပ်ဆုံးက အမြဲပါခဲ့ပါတယ်။

ဒီဆောင်းပါးကို ရေးရခြင်း ရည်ရွယ်ချက်က တရုတ်နိုင်ငံနဲ့ တရုတ်လူမျိုးမုန်းတီးရေး ဖြန့်ချိဖို့ မဟုတ်ပါဘူး။ တရုတ်နိုင်ငံကို ခြယ်လှယ်ဗိုလ်ကျနေတဲ့ ကွန်မြူနစ်အာဏာရှင် ပေါလစ်ဗျူရိုအဖွဲ့ရဲ့ မမှန်ကန်တဲ့ စိတ်နေသဘောထားနဲ့ လုပ်ရပ်ဆိုးတွေကို စာဖတ်သူတွေ ပိုသိလာစေဖို့ ရေးခြင်းသာ ဖြစ်ပါတယ်။

ပါးစပ်နဲ့ စက္ကူပေါ်မှာသာ ဆွေမျိုးပေါက်ဖော် ဆက်ဆံရေးတို့၊ မိတ်ဝတ်မပျက် ဆက်ဆံရေး စတာတွေ ပြောနေခဲ့ပေမဲ့ လက်တွေ့မှာတော့ မြန်မာပြည်သူတွေနဲ့ မြန်မာနိုင်ငံ အကျိုးစီးပွား ဆုတ်ယုတ်ဖို့၊ ဒုက္ခတွင်းထဲ ဆင်းရဲတွင်းထဲ ပိုကျအောင် နိုင်ငံရေး၊ စီးပွားရေး၊ စစ်ရေး အဘက်ဘက်မှာ ပိုဒုက္ခရောက်‌အောင် အဆင်းမှာ ဘီးတပ်တာမျိုး၊ မသာအိမ် ဖဲလိမ်ရိုက်တာမျိုး၊ သိသိသာသာတမျိုး၊ မသိမသာတမျိုး လုပ်ဆောင်ခဲ့တာကို လွတ်လပ်‌ရေးရစကတည်းက ဒီကနေ့အချိန်ထိ အနှစ် ၇၀ ကျော် သမိုင်းတလျှောက်လုံးမှာ အိမ်နီးချင်းကောင်းမပီသတဲ့ လုပ်ရပ်‌တွေကိုသာ ကွန်မြူနစ်ဇာတ်ပျက် တရုတ်အစိုးရက ကျူးလွန်ခဲ့ပါတယ်။

တကယ်တော့ မြန်မာနိုင်ငံဟာ ၁၉၄၈ ခုနှစ် ဇန်နဝါရီ ၄  ရက်မှာ လွတ်လပ်ရေးရခဲ့ပြီး တရုတ်ပြည်သစ်ကတော့ ၁၉၄၉ ခုနှစ် အောက်တိုဘာ ၁ ရက်နေ့မှ ပေါ်ထွက်လာခဲ့တာမို့  တနှစ်ကျော်ကာလမှာ မြန်မာ-တရုတ် သံတမန်ဆက်ဆံရေးဟာ ကူမင်တန်အစိုးရနဲ့ပဲ ဖြစ်ခဲ့ပါတယ်။ နောက်တော့ မော်စီတုန်းရဲ့ တပ်နီတွေ အောင်ပွဲခံပြီး ကွန်မင်တန် တရုတ်ဖြူတွေ စစ်ရှုံးတော့မှ ကွန်မြူနစ်အစိုးရနဲ့ ဆက်ဆံခဲ့ရတာပါ။

မြန်မာနဲ့တရုတ် နယ်နိမိတ်သတ်မှတ်‌ရေးကိစ္စအတွက် ၁၉၅၆ ခုနှစ် အောက်တိုဘာ-နိုဝင်ဘာ ခရီးစဉ်အတွင်းမှာ ဖီမော်-ဂေါ်လန်-ကန်ဖန် ဆိုတဲ့ ကချင်ရွာကြီးသုံးရွာကို ဒေသခံတိုင်းရင်းသားတွေ၊ တိုင်းရင်းသားခေါင်းဆောင်တွေက မြန်မာပိုင်နက်ဖြစ်တာမို့ တရုတ်နိုင်ငံဘက် မပါလိုကြပါဘူး။ ဒါပေမဲ့ ၁၉၆ဝ ပြည့်နှစ် ဇန်နဝါရီ ၂၈ မှာ စစ်ဓားပြလောင်း ဗိုလ်ချုပ်ကြီးနေဝင်းက တိုင်းရင်းသားပြည်သူ့အလိုကို ဆန့်ကျင်ပြီး အင်အားကြီးတဲ့ တပ်နီ တရုတ်အစိုးရကို မျက်နှာချို‌သွေးဖို့ အဲဒီရွာသုံးရွာပါ ပေးအပ်ခဲ့ပါတယ်။

တရုတ်အစိုးရကလည်း သူတို့နယ်မြေမဟုတ်တာ သိသိကြီးနဲ့ ဒေသခံတိုင်းရင်းသားတွေ အလိုမတူတာ သိလျက်သားနဲ့လည်း အရယူခဲ့တာပါပဲ။ နိုင်ငံပိုင်နက်ကို တလက်မတောင် အပဲ့မခံဘူးလို့ အသံကောင်းဟစ်လေ့ရှိပေမဲ့ နိုင်ငံအပေါ် စေတနာမရှိတဲ့ စစ်ဓားပြတွေ အုပ်စိုးတဲ့ ကာလတလျှောက်လုံးမှာ နယ်ခြားစည်းမျဥ်းတ‌လျှောက် နိုင်ငံပိုင်နယ်နိမိတ်တွေ အများအပြား ဆုံးရှုံးခဲ့ရပါတယ်။ နယ်နိမိတ်စည်းပေါ်က မြစ်ချောင်းတွေ မြစ်ကြောင်းပြောင်း ကမ်းပါးတွေ ပြိုလာရင် မြန်မာပိုင်နက်ကို ဖဲ့ယူ တိုးယူပြီး နယ်မြေချဲ့ထွင်လာကြတာ ဖြစ်ပါတယ်။

စစ်အာဏာရှင်စနစ်ဆိုးကြောင့် အဘက်ဘက် နိမ့်ကျကျန်ရစ်တဲ့ မြန်မာနိုင်ငံကို တရုတ်အစိုးရဟာ စီးပွားရေး၊ ကုန်သွယ်ရေးမှာ နည်းမျိုးစုံနဲ့ အမြတ်ထုတ်ခဲ့ကြပါတယ်။ ငွေပင်ငွေရင်းနည်းတဲ့ မြန်မာကုန်သည်တွေဟာ နယ်စပ်မှာ တရုတ်နိုင်ငံနဲ့ အရောင်းအဝယ် လုပ်ကြရာမှာ မိအေး နှစ်ခါနာ  သုံးခါနာဆိုသလို အရှုံးခံ အမြတ်ထုတ်ခံကြရပြီး မဖွံ့ဖြိုးတဲ့ တိုင်းပြည်တွေကို အတိုးနှုန်းမြင့်မားစွာနဲ့ ငွေထုတ်ချေး စာချုပ်ချုပ်ပြီး အဲ့ဒီနိုင်ငံတွေဟာ အကြွေးလည်ပင်းခိုက်ပြီး နောက်ဆုံး အကြွေးရှင် တရုတ်နိုင်ငံကို မိမိနိုင်ငံပိုင်လုပ်ငန်း မြေနေရာတွေကို ထိုးအပ် ဆုံးရှုံးခဲ့ကြရပါတယ်။

အဲဒီလို ခေတ်သစ်စီးပွားရေးကိုလိုနီနယ်ချဲ့ သိမ်းပိုက်တာ ခံရမှုမှာ ထင်ရှားတဲ့ သာဓကတွေကတော့ သီရိလင်္ကာနိုင်ငံနဲ့ အာဖရိကနိုင်ငံတချို့ ဖြစ်ပါတယ်။ လူ့အခွင့်အ‌ရေး ချိုးဖောက်မှုတွေကြောင့် နိုင်ငံအများစုက အဆက်ဖြတ်တာ ခံခဲ့ရတဲ့ စစ်အခွင့်ထူးခံ ဗိုလ်ယုတ်တွေဟာ လူမိုက် ပညာမဲ့ခေါင်းဆောင်တွေနဲ့သာ ဆက်ဆံ အမြတ်ထုတ်တတ်တဲ့ တရုတ်အစိုးဆီက ပိုက်ဆံတွေချေးပြီး နိုင်ငံရဲ့ အဖိုးတန် သဘာဝသယံဇာတတွေကို စိတ်ကြိုက်ထုတ်ခွင့်ပေး၊ သူတို့ချမ်းသာကြွယ်ဝဖို့ တိုင်းပြည်နဲ့ ပြည်သူလူထု အကျိုးမခံစားရဘဲ နိုင်ငံတွင်း စီးပွားရေးလုပ်ကွက်တွေ ပရောဂျက်တွေ အရှုံးခံ ပေးခဲ့ကြပါတယ်။

ဧရာဝတီမြစ်ဆုံဆည်တည်ဆောက်ရေး ပရောဂျက်၊ လက်ပတောင်းတောင်ဒေသ ကြေးစင်တောင် စပယ်တောင်စီမံကိန်း၊ တကောင်းနီကယ်စက်ရုံစီမံကိန်း၊ ကျောက်ဖြူရေနက်ဆိပ်ကမ်းစီမံကိန်း စတဲ့စီမံကိန်းတွေဟာ တရုတ်အစိုးရရဲ့ မြန်မာနိုင်ငံအပေါ် မသာအိမ် ဖဲလိမ်ရိုက်တဲ့ သာဓကတွေပါပဲ။

ငါးမျှားချိတ်မှာ တပ်ထားတဲ့ ငါးစာနဲ့တူတဲ့ ဖွံ့ဖြိုးတိုးတက်ရေးအတွက် အကူအညီငွေ ထုတ်ပေးတဲ့သဘောမျိုး မဲခေါင်-လန်ချန်း ပူးပေါင်းဆောင်ရွက်မှု အထူးရန်ပုံငွေ (၂၀၂၁) အနေနဲ့ မြန်မာနိုင်ငံက စီမံကိန်း ၂၁ ခုအတွက် အမေရိကန်ဒေါ်လာ ၆ ဒသမ ၁ သန်းကျော် ရန်ပုံငွေ လွှဲပြောင်းလက်ခံလွှာ လက်မှတ်ရေးထိုးပွဲ အခမ်းအနားကို ၂၀၂၁ ခုနှစ် ဩဂုတ် ၁၀ ရက် နံနက်ပိုင်းမှာ ပြုလုပ်ပြီး နဖားကြိုးထိုးခဲ့ပါတယ်။

နောက်တခါ စစ်ဓားပြဂိုဏ်းရဲ့ နိုင်ငံခြားရေးဝန်ကြီး ဝဏ္ဏမောင်လွင်က ဒီနှစ် မတ် ၃၁ ရက်နေ့မှာ တရုတ်အစိုးရရဲ့ ဖိတ်ခေါ်ချက်နဲ့ တရုတ်ပြည်ကို သွားပါတယ်။ နှစ်နိုင်ငံ စီးပွားရေးနဲ့ နည်းပညာ ပူးပေါင်းဆောင်ရွက်ရေးစာချုပ် ချုပ်ဆိုခဲ့ပြီး အမေရိကန်ဒေါ်လာ သန်း ၁၀၀ ကျော်ခန့် စစ်ဓားပြတပ်ကို ကူညီမယ်လို့ ကြေညာပြောဆိုခဲ့တာဟာ ပြည်သူလူထုကို ဆက်ပြီးသတ်ဖြတ်ဖို့ လက်နက်ဖိုး ကျည်ဆန်ဖိုး ပေးလိုက်တာပါပဲ။

အကြမ်းဖက်စစ်တပ်က ပြည်သူ့ထံက အာဏာလုပြီးတဲ့နောက် တရုတ်အစိုးရဟာ  ပြည်သူသတ် ဖက်ဆစ်စစ်ကောင်စီကို ပထမဆုံးဖိတ်ခေါ်တဲ့ နိုင်ငံကြီး ဖြစ်ပါတယ်။ သူတို့သဘောကတော့ မြန်မာပြည်သူလူထု အသတ်အဖြတ်ခံနေရချိန် အသုဘရှုနေရတဲ့နိုင်ငံမှာ  အာဏာလု စစ်ဓားပြခေါင်းဆောင်တွေနဲ့ ကျင့်ဝတ်မဲ့စွာ ပိုင်ရှင်ကိုဂရုမစိုက်ဘဲ ပိုင်ရှင်မဟုတ်သူနဲ့ စီးပွားရေးအရ လက်တွဲဆောင်ရွက်မယ်ဆိုတဲ့ သဘောပါပဲ။

အိမ်တွင်းဓားပြတိုက်၊ လူသတ်၊ မီးရှို့တာ ခံ‌နေရလို့ အသုဘရှုနေရတဲ့အိမ်ကို အိမ်သူအိမ်သားတွေ အလိုမတူဘဲ အိမ်ထဲဝင်ပြီး စစ်ဓားပြတွေနဲ့ စီးပွားရေးလုပ်ဖို့ ဦးဆောင်ဆွေးနွေးမယ့်သူဟာ စစ်ဓားပြထက်ဆိုးတဲ့ မကောင်းဆိုးဝါး မိစ္ဆာဂိုဏ်းချုပ်လို့ ပြောရမှာပါပဲ။

အဆိုးဆုံးကတော့ ပြီးခဲ့တဲ့ ဇူလိုင် ၂ ရက်နေ့က တရုတ်နိုင်ငံခြားရေးဝန်ကြီး ဝမ်ယိ ခေါင်းဆောင်တဲ့ ကိုယ်စားလှယ်အဖွဲ့ဟာ (၇) ကြိမ်မြောက် မဲခေါင်-လန်ချန်း ပူးပေါင်းဆောင်ရွက်မှု နိုင်ငံခြားရေးဝန်ကြီးများ အစည်းအဝေးကို တက်ရောက်ဖို့  မြန်မာ့ရှေးဟောင်းယဉ်ကျေးမှုနယ်မြေ ပုဂံမြို့မှာ ရောက်ရှိခဲ့ပေမဲ့ လူထုခေါင်းဆောင်နဲ့တွေ့ရဖို့ မကြိုးစားဘဲ မြန်မာ့နိုင်ငံရေး ပြေလည်စေချင်တယ်လို့ ပြောဆိုတာဟာ စေတနာမပါဘဲ ကြားကောင်းအောင် ပြောခဲ့တာ ဖြစ်ပါတယ်။

တရုတ်နိုင်ငံပြီးရင် အိမ်နီးချင်းမပီသတဲ့အထဲမှာ ထိုင်းနိုင်ငံဝန်ကြီးချုပ် ပရာယွတ်လည်း ပါပါတယ်။ သူ့အကျိုးစီးပွားအတွက်သာ ကြည့်တဲ့ လူသတ်ဓားပြ စစ်အစိုးရနဲ့ ပုလင်းတူဘူးစို့ အာဏာရှင်ပါပဲ။ ဒါကြောင့်လည်း ထိုင်းနိုင်ငံအတွင်းကို ဇွန်လ ၃၀ ရက်နေ့တုန်းက အကြမ်းဖက်စစ်ကောင်စီရဲ့ တိုက်လေယာဉ်တစင်းက နယ်စပ်နား‌နေတဲ့ ပြည်သူလူထုနဲ့ တိုင်းရင်းသားလက်နက်ကိုင်အဖွဲ့တွေကို ဗုံးကြဲဖို့ ထိုင်းလေကြောင်းပိုင်နက်ထဲ ကျူးကျော်ဝင်ရောက်မှုအတွက် မြန်မာဘက်က တောင်းပန်ထားပြီးဖြစ်လို့ ပြဿနာမဟုတ်ဘူးလို့ ထိုင်းဝန်ကြီးချုပ် ပရာယွတ်က ပြောဆိုလိုက်တာကို ထိုင်းပြည်သူတွေက လှောင်ပြောင်ခဲ့ကြပါတယ်။

ဒီဆောင်းပါးကိုနိဂုံးချုပ်ရရင် အိမ်နီးချင်းကောင်းနိုင်ငံ မဟုတ်ကြတဲ့ တရုတ်၊ ထိုင်း စတဲ့နိုင်ငံတွေက အာဏာရှင်အစိုးရများဟာ မြန်မာပြည်သူတွေ ခံစားရတဲ့ ဒုက္ခတွေအပေါ်  ဘယ်တုန်းကမှ စာနာ‌ဖေးမလိုစိတ် မရှိကြပါဘူး။ သူတို့နဲ့ မျိုးတူ၊ နာမ်တူ၊ အကျိုးစီးပွားတူရာ စစ်ဓားပြ အာဏာရှင်တွေဘက်ကသာ ရပ်တည်ကူညီကြရင်း မြန်မာပြည်သူလူထုရဲ့ သဘောထားဆန္ဒကို တလျှောက်လုံး ပစ်ပယ်ခဲ့ကြတာ သမိုင်းက သက်သေပြနေပါတယ်။

ဗူးလေးရာဖရုံဆင့် ဆိုသလို နွမ်းပါးချို့တဲ့ရှာတဲ့ မြန်မာပြည်သူ တိုင်းရင်းသားထုအပေါ် အမြတ်ထုတ် ခေါင်းပုံဖြတ်တဲ့ စီးပွားရေးရင်းနှီးမြှုပ်နှံမှုကို အသုံးချပြီး ခေတ်သစ် ကိုလိုနီနယ်ချဲ့ လုပ်ရပ်‌တွေနဲ့ အိမ်နီးချင်းဆိုး အာဏာရှင်အစိုးရဆိုးများသာ ဖြစ်ကြပါတယ်။

ဒါကြောင့် မြန်မာပြည်သူလူထု တိုင်းရင်းသားလူမျိုးအားလုံးဟာ ပြည်တွင်းအာဏာရှင် စစ်ဓားပြတွေရန်ကိုသာမက ပြည်ပ အိမ်နီးချင်းဆိုး အာဏာရှင်အစိုးရတွေရဲ့ အန္တရာယ် ရန်စွယ်များကိုပါ ရင်ဆိုင်နေကြရတာမို့ ကိုယ့်ပြည်တွင်းအား၊ ပြည်သူလူထုအားကိုသာ ဗဟိုပြုပြီး အချင်းချင်း စည်းလုံးညီညွတ်စွာ စုစည်းညီညွတ်ကြဖို့၊ စစ်ဖိနပ်အောက်က လွတ်မြောက်ရေးနဲ့ ဖက်ဒရယ်ဒီမိုကရေစီ ပြည်ထောင်စုကြီးပေါ်ထွန်းပြီး တိုင်းရင်းသားလူမျိုးအားလုံး တန်းတူညီမျှ အေးချမ်းသာယာတဲ့ဘဝတွေ အတူတည်ဆောက်ကြမယ်ဆိုတဲ့ စိတ်ဓာတ်၊ ယုံကြည်ချက်နဲ့ ခိုင်ခိုင်မြဲမြဲ လက်ချင်းချိတ်ဆက်ထားကြမှသာ မကောင်းဆိုးဝါး အာဏာရှင်တွေကို တွန်းလှန်ချေမှုန်းနိုင်မှာ ဖြစ်ပါကြောင်း။

မင်းကောင်းချစ်

7 months Ago
More News
Up