Home
မြန်မာသတင်း
NUG ပညာရေးဝန်ကြီးဌာနက မူလတန်း ဆရာအတတ်ပညာသင်တန်းသား ခေါ်ယူ
DVB
·
February 4, 2023

မူလတန်း ဆရာအတတ်ပညာသင်တန်း  (PTC)တက်ရောက်လိုတဲ့  သင်တန်းသားတွေကို  အမျိုးသားညီညွတ်ရေးအစိုးရ(NUG)က ဖေဖော်ဝါရီ ၃ ရက်မှာ စတင်လျှောက်လွှာ ခေါ်ယူနေပါတယ်။

စစ်ကောင်စီကို တော်လှန်ဆန့်ကျင်နေတဲ့ ပြည်သူတွေ ပညာရေးအခွင့်အလမ်းမဆုံးရှုံးစေဖို့နဲ့ ဆရာအင်အား ပြန်လည် ဖြည့်တင်းနိုင်ဖို့ ရည်ရွယ်ဖွင့်လှစ်တာလို့ ဆိုပါတယ်။

အခုဖွင့်လှစ်မယ့်သင်တန်းဟာ ဒုတိယအကြိမ်ဖြစ်ပြီး ပထမအကြိမ်အဖြစ်  သင်တန်းအပတ်စဉ် (၁) ကနေ (၇) အထိ ဖွင့်လှစ်ပို့ချခဲ့ပြီးဖြစ်ပါတယ်။ ဒုတိယအကြိမ်မှာတော့  ၂၀၂၃ မတ်လ ၆ ရက်ကနေ ၂၀၂၄ ခုနှစ် မတ်လ ၂၇ ရက်အထိ သင်တန်း အပတ်စဥ် ၄ ခုအဖြစ် ဖွင့်လှစ်ပို့ချမှာပါ။

အပတ်စဥ် တခုစီရဲ့ သင်တန်းကာလကတော့ ၃ လဖြစ်ပြီး သင်တန်းသား အယောက် ၂၅၀ စီ  လက်ခံခေါ်ယူမှာဖြစ်တယ်လို့ ထုတ်ပြန်ပါတယ်။

သင်တန်းလျှောက်ထားမယ့်သူဟာ တက္ကသိုလ်ဝင်တန်းအောင်မြင်ပြီးသူ၊ စစ်ကောင်စီရဲ့ ယန္တယားတွေမှာ ပါဝင်ပတ်သက်မှု လုံးဝမရှိသူဖြစ်ရမှာဖြစ်ပြီး သင်တန်းပြီးဆုံးတဲ့အထိ တက်ရောက်နိုင်သူတွေသာ လျှောက်ထားရမှာပါ။

သတ်မှတ်ထားတဲ့ စံနှုန်းပြည့်မီပါက သင်တန်းပြီးမြောက်ကြောင်း အသိအမှတ်ပြု လက်မှတ် (Completion Certificate) ကို တပါတည်းပေးအပ်မှာ ဖြစ်တယ်လို့သိရပါတယ်။

ကြားကာလပညာသင်ကြားရေးကို အကောင်အထည်ဖော်နေတဲ့ Federal Schools တွေ၊  မြေပြင် သင်ကြားရေးကျောင်းတွေ၊  တိုင်းရင်းသားဒေသက ကျောင်းတွေမှာ  စေတနာ့ဝန်ထမ်းဆရာအနေနဲ့ ဆောင်ရွက်နေသူတွေကို ဦးစားပေးရွေးချယ်မှာဖြစ်ပြီး ပညာရေးတက္ကသိုလ်၊ ပညာရေးကောလိပ်က ကျောင်းသားကျောင်းသူတွေအနေနဲ့ အခုသင်တန်းကို လျှောက်ထားစရာမလိုဘူးလို့လည်း ထုတ်ပြန်ထားပါတယ်။

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024