ဒိန်းမတ် F-16 တိုက်လေယာဉ် ၄ စီး လစ်သူယေးနီးယားနိုင်ငံကို ရောက်လာ

ဒိန်းမတ်နိုင်ငံက F-16 တိုက်လေယာဉ် လေးစီးဟာ လစ်သူယေးနီးယားနိုင်ငံကို ဇန်နဝါရီ ၂၇ ရက်မှာ ရောက်လာပါတယ်။

ဘောလ်တစ်ဒေသနဲ့ ဥရောပမြောက်ပိုင်းမှာ မြောက်အတ္တလန္တိတ် စစ်ရေးမဟာမိတ်အဖွဲ့ နေတိုး စစ်ဆင်ရေးတွေကိုတိုးမြှင့်ဖို့ ရောက်လာတာဖြစ်ပြီး နေတိုးကတော့ ဥရောပအရှေ့ပိုင်းမှာ သင်္ဘောတွေနဲ့ တိုက်လေယာဉ်တွေ ပိုပြီးအားဖြည့်ဖို့နဲ့ တပ်တွေ အသင့်ရှိနေစေဖို့ စီစဉ်နေတယ်လို့ ပြောပါတယ်။

ရုရှားကတော့ ယူကရိန်းနယ်စပ်နားမှာ သူတို့ အင်အားတိုးချဲ့ ချထားတဲ့ တပ်တွေအပေါ် တုံ့ပြန်ရာမှာ အနောက်နိုင်ငံတွေဟာ ဂယောင်ချောက်ချားဖြစ်နေတယ်လို့ ပြောပါတယ်။

ယူကရိန်းနယ်စပ်တလျှောက်မှာ ရုရှားနဲ့ တင်းမာမှု တိုးလာနေလို့ နေတိုးလေတပ် ထိန်းသိမ်းကြပ်မတ်ရေးအဖွဲ့အတွက် တိုးချဲ့တပ်ခွဲ တခွဲ စေလွှတ်ဖို့ နေတိုးမဟာမိတ်အဖွဲ့က ဆုံးဖြတ်ပြီးပြီလို့ လစ်သူအေးနီးယား ကာကွယ်ရေးဝန်ကြီးဌာနက ပြောပါတယ်။

ဒါဟာ နေတိုးရဲ့ အရှေ့ဘက်မဟာမိတ်တွေဖြစ်တဲ့ အက်စ်တိုးနီးယား၊ လတ်ဗီယာ၊ လစ်သူယေးနီးယား၊ ပိုလန်၊ ရိုမေးနီးယားနဲ့ ဘူလ်ဂေးရီးယားတို့ရဲ့ လုံခြုံရေးကို အားဖြည့်ဖို့ လိုအပ်ချက်နဲ့ ပတ်သက်နေတယ်လို့လည်း ဝန်ကြီးဌာနက ပြောပါတယ်။ 

//
More News
Up