စစ်ကိုင်းတိုင်းကနေ ချင်းပြည်နယ်ဘက်ကို စစ်ကူသွားတဲ့ စစ်ကောင်စီတပ်ကကားတွေ ဇန်နဝါရီ ၁၇ ရက် မနက်ပိုင်းမှာ ခြုံခိုတိုက်ခိုက်ခံရပြီး စစ်ကောင်စီတပ်သား ၁၀ ယောက်သေဆုံးကာ အများ အပြားဒဏ်ရာရရှိသွားတယ်လို့ CDM-Syin တပ်ဖွဲ့ကနေ သိရပါတယ်။
ကလေးမြို့ကနေ ချင်းတောင်ဘက်ကို စစ်ကူတတ်လာတဲ့ စစ်ကောင်စီကား ၅ စီးကို ဒီကနေ့မနက် ၁၀ နာရီလောက်မှာ ချင်းပြည်သူ့ကာကွယ်ရေး ညီနောင်မဟာမိတ်တပ်ဖွဲ့ ၇ ဖွဲ့က ခြုံခိုတိုက်ခိုက်ရာ စစ်ကောင်စီတပ်သား ၁၀ ယောက်သေဆုံးပြီး အများ အပြားဒဏ်ရာရရှိသွားတယ်လို့ CDM-Syinတပ်ဖွဲ့ရဲ့ ပြန်ကြားရေးတာဝန်ခံက ဒီဗွီဘီကို ပြောပါတယ်။
စစ်ကောင်စီတပ်တွေဟာ ကလေးမြို့ကနေ ချင်းပြည်နယ်ဘက်ကို စစ်ကားအကြီး ၃ စီး၊ စက်သေနတ်ပါတဲ့ စစ်ကား အသေး ၂ စီးနဲ့ စစ်ကူတက်လာလို့ CNA, CDM Siyin,Kalay PDF , PDF Zoland, Zongam Army, CDF KKGနဲ့ Zomi PDF တို့စုပေါင်း မဟာမိတ်တပ်ဖွဲ့တွေက ခြုံခိုဖြတ်တိုက်ခဲ့တာလို့ ဆိုပါတယ်။
အဲဒီတိုက်ပွဲအတွင်းမှာ စစ်ကောင်စီဘက်က အထိနာပြီး သေဆုံးဒဏ်ရရသူများပြားတာကြောင့် နောက်ကို ပြန်လှည့်ပြီး ဆုတ်ခွာသွားကြတယ်လို့ ပြောပါတယ်။
တီးတိန်မြို့နယ် သိုင်းငင်းရွာဘက်ကို စစ်ကောင်စီတပ်တွေက ဇန်နဝါရီ ၁၅ ရက်မှာ ဂျက်တိုက်လေယာဥ် ၂ စီးနဲ့ ဗုံးကြဲတိုက်ခိုက်တာကြောင့် ညီနောင်မဟာမိတ်တွေဘက်က ရဲဘော် ၇ ယောက်အပြင်းထန်ဒဏ်ရာရရှိသွားပြီး တစ်ယောက်ကျဆုံးခဲ့တယ်လို့ သိရပါတယ်။
အဆိုပါတိုက်ပွဲနဲ့ ပတ်သက်လို့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာမတွေ့ရသေးပါဘူး။