မကွေးတိုင်း၊ ရေစကြိုမြို့နယ်၊ ဟင်္သာကျေးရွာကို ဇန်နဝါရီ ၁၇ ရက်မှာ စစ်ကောင်စီတပ်နဲ့ ပျူစောထီးအဖွဲ့ဝင်တွေ ဝင်ရောက်လာပြီး သေနတ်တွေပစ်ဖောက်ကာ ဆရာတော်တစ်ပါးနဲ့ ကျေးရွာဒေသခံနှစ်ယောက်ကို ဖမ်းဆီးခေါ်ဆောင်သွားတယ်လို့ ရွာသားတွေဆီကသိရပါတယ်။
ဒီမနက် ၆ နာရီခွဲလောက်က ရွာထဲကို စစ်ကောင်စီတပ်နဲ့ ပျူစောထီးအဖွဲ့ဝင်တွေက ဖောကား နှစ်စီးနဲ့ ရောက်ရှိလာကြပြီး ဘုန်းကြီးကျောင်းကို ဝိုင်းကာ ရှာဖွေပြီး သေနတ်တွေပ စ်ဖောက်ခဲ့တာကြောင့် ကျေးရွာဒေသခံတွေလည်းထွက်ပြေးတိမ်းရှောင်ခဲ့ရတယ်လို့ ဒေသခံတွေက ပြောပါတယ်။
စစ်တပ်က ဟင်္သာကျေးရွာက ဆရာတော်နဲ့ ပြည်သူနှစ်ယေက်ကို ဖမ်းဆီးခေါ်ဆောင်ပြီး ဦးကျော်ဝင်းဆိုသူကို အကြောင်းမဲ့ ရိုက်နှက်သွားတယ်လို့ ဒေသခံတွေက ပြောပါတယ်။
ကျေးရွာဒေသခံတစ်ဦးက “ဘုန်းကြီးကျောင်းကိုလာဝိုင်းတာ၊ မနက် ၆ နာရီခွဲလောက်ကတည်းကပဲ ၃ ဦးဖမ်းသွားတယ်။ တစ်ဦးက ဆရာတော်ပါ ရွာထဲက ဒလန်ပျူစောထီးတွေက မဟုတ်မမှန်သတင်းပေးလို့လာဖမ်းတာ။ စစ်ခွေးတွေက ရိုက်နှက်ဖမ်းဆီးသွားတယ်။ ဖောကား ၂ စီးနဲ့ ရောက်လာကြတာ ရွာထဲလည်းရမ်းသန်းပစ်လို့ အကုန်ထွက်ပြေးရတယ်”လို့ ပြောပါတယ်။
ဟင်္သာကျေးရွာမှာ အန်အယ်လ်ဒီပါတီ ဝန်းရံထောက်ခံသူတွေကို လိုက်လံဖမ်းဆီးခဲ့တာဖြစ်ပြီး ၂၀၂၁ ခုနှစ် သြဂုတ်လကလည်း အသက် ၂၁ နှစ်အရွယ်လူငယ်တစ်ယောက်ကို စစ်ကောင်စီက သေနတ်နဲ့ ပစ်ခတ်သတ်ဖြတ်ခဲ့တယ်လို့ ဒေသခံတွေဆီကသိရပါတယ်။
မေ ၂၉ ရက်ကလည်း စစ်ကောင်စီတပ်က ဟင်္သာကျေးရွာအတွင်းက နေအိမ်တွေကို ဝင်ရောက်ဖျက်ဆီးသွားတယ်လို့ သိရပါတယ်။
